روسلين : اهه ادهم
ادهم : نقدر ندخل
روسلين : اهه بيانسور
جبد الكرسي تاع لاكوافوز و دناه قدام البونك و قعد
ادهم : ايه واش راكي ديري
روسلين : والو كنت نسقم فدوزاني
ادهم : اممم ماشي ولاو يجيو يخطبوك لازملك هاذ الحاجات
تبسمت روسلين و دنات السلة و حطت مخدة في حجرها
روسلين : اممم المرة هاذي نتا محبيتش بصح لمرة لجاية منعرف بلاك انا نقبل
ادهم : عندك الحق ماشي دايمن حنا لي نقررو عليك ... و هنا لقيتيني حاصل
روسلين ( دنات خصلة من شعرها ) : وعلاش حصلت قولي بلاك نعاونك
ادهم : وعلاش هذاك نهار محبيتيش تمدي رايك و زعما خليتنا حنا لي نقبلو ولا نرفضو ... كيما دورتها فمخي ملقيتهاش علبالك ؛ لوكان نقولو زعما حشمتي منا محبيتيش تقولي ... مجياش نتي وجهك مبخص متعرفيش للحشمة ... ولا حبيتي تعرفي صح راينا ... بصح مراكيش مالنوع لي تحوس على راي الناس
روسلين : بصح رايك يهمني ادهم
قعدو ساكتين منبعد قالتلو
روسلين : يا سيدي نحيلك حيرتك ... لا هذا ولا هذاك قلت هكذاك باش نطيح عاقلة و رزينة برك اصلا مكنتش sérieuse
ادهم : بصح هاذي ماشي حاجة تتلعب فيها روسلين نتي قاعدة تتمسخري و لوكان قبلنا بهاذ الزواج
روسلين : علبالي متقبلش نهون عليك تزوجني اممم
ادهم : ......
روسلين : يا سيدي نقولوا قبلتو انا نعاود نرفض ساهلة
قعد يخبطلها فراسها بصبعو
ادهم : يا لي راسها فارغ ؛ ماشي كلش ناس يتقعدو فيه .... متحشميش تتمسخري بجدك
روسلين : ادهم خلاص فهمنا و زيد متمسخرتش غير بجدي متنساش مام نتا داخل فلعب
ادهم : روسلين
روسلين : نعرف اسمي
جبدلها شعرها و هي بدات تضحك
روسلين : خلاص كنت نتقعد حبس
ادهم : حبسي تمسخيرك
روسلين : دور الارض و مافيها متلقاش وحدة كيما روسلين هاني قتلك
ادهم : هكذا
روسلين : عندك شك
ادهم : معلباليش مزال مدرتش الارض و مافيها
عوجت فمها
ادهم : معندناش الحق نتقعدو
روسلين : تمسخير تاعك سامط هكذا ناس يهدرو
ادهم : صحا معليش
دنا الكرسي و ناض
روسلين : زعفت ؟؟
تبسم و قاللها
ادهم : وعلاش نزعف بصح لازم نروح
روسلين : فهاذ الوقت و وين
ادهم : عندي خدمة روسلين راح نقعد يامات و نولي
روسلين : اممم
فتحت عينيها كي حست يديه على وجهها باسها من راسها و قاللها
ادهم : تهلاي فروحك ياك متخصك حتى حاجة
دارتلو براسها لالا بسيف وجهها كان راح يطرطق خرج و خلاها قاعدة تتبسم وحدها حتى دخلت عليها زهرة
زهرة : شكون هذا متقوليليش راجلك
روسلين : زهرة ... اهه هذا وليد عمي
زهرة : هكذا ... اجمل حاجة شفتها فنهاري هذا وليد عمك ههه
روسلين : زهرة حبسي مالجياحة
زهرة : خير غرتيي اممم
روسلين : وعلاش نغير ... قوليلي عيطتلك مقبيل هداوين جي
زهرة : اهه متفكرينيش ظهري تكسر هاذيك فخرية مطلقتنيش حتى كملنا كامل الكوزينة و مزية مطلقتنيش لوكان قطعنا اللحظات ....
روسلين: زهههرة
زهرة : ههه خلاص هاتي مالاخر واش عندك نروح نرقد على روحي يطيح سعدهم كسرولي ظهري
روسلين : هاكي رفدي هاذي
زهرة : واش هاذي
دنات تلقى سلة معمرة من مكياج و روايح و كامل الحاجات لي تحبهم مستهم تشوف فيهم بفرحة
زهرة : ليمن نديهم
روسلين : لزهرة
زهرة : ايه بصح شكون زهرة ... اههه متقوليليش ليا
روسلين : اممم
ناضت زهرة حست فرحتها تخلطت بالحشمة
زهرة : بصح ... روسلين ختي منقدرش نقبل هذوما كامل بزاف عليا و زيد غاليين
روسلين : بصح انا هذوما منستعملهمش كامل اصلا مزالو جدد ... اديهم خير ملي نرميهم و نولي مبذرة هيا ديريهم بالصحة و الهناء
زهرة عينيها دمعو و سوطات على روسلين تعنق
زهرة : يعطيك صحة روسلين نتي صح قلبك بيض و تستاهلي كل خير متقدىيش تعرفي شحال كنت نتمنى هه نمسهم برك ، ربي يمدلك ما تتمناي و يرزقك وليد الحلال ؛ ماهو معاك وليد الحلال بووه عليا
روسلين : زهرة مزالك
زهرة : ههه خلاص كنت نتمسخر وشبيك ؛ تصبحي بخير
روسلين : و نتي بخير
رفدت زهرة السلة هذيك و خرجت و روسلين تكسلت حاسة روحها فرحانة بزااف بصح يا فرحة ما رح تم
نهار جديد :
حست روسلين بواحد يمسحلها على شعرها تبسمت و فتحت عينيا بلعقل ( ماشي ادهم متزيدوش عليها 😑 )
روسلين : ماما
رهف : اههه واش صرا تفاطنتي تمتم
روسلين : ههه
رهف : دايمة الضحكة حبيبتي
روسلين : امين
رهف : روسلين بنتي واش كنت راح نقلك
روسلين : انعم ماما خير
رهف : خير خير بنتي ... حابة نرجع لدارنا
ناضت روسلين و تقعدت
روسلين : وعلاش !!
رهف : يا بنتي انا هاذ الخطرة عييت بزاف و حابة نريح راسي شوية
روسلين : و تخلينا وحدنا
رهف : مراكمش وحدكم راكي نتي وختك فاطمة معاكم و جدكم و ولاد عمومكم نهال جميلة و كامل ؛ اصلا منطولش نريح شوية و نولي
روسلين : ايه مطوليش بزاف بصح
عنقتها روسلين و رهف مسحتلها على شعرها
رهف : بلاكو على بعضكم ياك
يتبع 🧡🧡🧡 .....
YOU ARE READING
ابن عمي { ادهم و روسلين } _ باللهجة الجزائرية
Romanceالقصة دور في دار وحدة بين اولاد العم و باقي التفاصيل تعرفوهم فالكرونيك ملاحظة : الرواية من نسج خيالي لا علاقة لها بالواقع
