ناض ادهم و خرج و ريحان قاعدة تتبسم بسيف ؛ جاز العشاء موراها بخير 😆 سرور رجعت للدار و كل واحد راح لشمبرته رقد غير رهف لقعدت تتقلب طار عليها نعاس و فالاخر خرجت بقرار يريحها و يهنيها من هاذ السر لي خباته شحال
10:00 AM :
روسلين قاعدة مع نهال فالجنينة يقراو كيفكيف و رهف واقفة تشوف فيهم من داخل صالون ؛ خممت و خممت ملقاتش مخرج من هاذ الحكاية ادهم راح يجيبها موراها حتى يعرف سنين و هي مخبية علبالها غلطت بصح ملقات حتى حل واحد اخر و اليوم و بعدما يعرف ادهم بلي ختو هي نهال رهف راح تخسر دارها و عائلتها و سورتو بناتها كيفاش راح يخزرو فيها بعد لي دارته حست ببنادم موراها مسحت دمعتها لي هبطت و دارت لقاته ادهم ضحكت ، عرفته راح يجي ؛ خزر فيها مليح و قاللها
ادهم : خممتي فلي قلتهولك
غمضت عينيها و تبسمت ؛ رجعت دارت كيما كانت و هو موراها
رهف : علبالي ليوم يا ادهم بلي هبطت من عينك بزاف و علبالي بلي راك تشوف فيا وحدة متسواش انانية معندهاش قلب ولا رحمة ؛ علبالي غلطت و لوكان يرجع بيا الوقت منعاودش غلطتي بصح ... كي عرفت بلي غلطت لقيت روحي غرقت و مكانش كيفاش نخرج .... باباك الله يرحمه ... كيما علبالك عاود زواج على يماك و تزوج بهند و خبا علينا كامل و واحد مكان علبالو ؛ علبالي تقول لوكان قال بصح ... زواجه من ريحان كان تقليدي و موراها نتا جيت للدنيا عمي جاسم كان يحب بزاف ريحان و نتا كثر بارسكو اول حفيد من ولاده و منصف لوكان قاللهم على الزواج واحد ماكان راح يقبل المهم انا مرانيش نبرر لي داره بصح حبيتك تعرف كيفاش كان لوضع كي تزوج و بحكم كنا بزاف قراب حكالي ؛ و حب يدي بنتو فالاول عارضته بصح منبعد تبعته ملقيت حتى حل راح تقولي كنتي قادرة تنصحيه بصح مفاد معاه والو باباك كان راسو يابس و انا كنت صغيرة و ملقيت روحي غير نعاونو ؛ و دينا الطفلة و مديناها لوحدة رباتها و مراها باباك مات و خلالي عبئ كبير عليا خافت نهدر و نخرب الدار كامل خافت نتحرم من بناتي و هما اصلا بلا اب صدقني كانت مغلوقة من كل جهة ....... ختك ادهم .... عاشت معاكم كامل هاذ الوقت و نتوما برك معلبالكمش
عقد ادهم حواجبو من هدرتها
ادهم : شكون
رهف : هايليك .... نهال ... نهال هي ختك
ادهم قعد ساكت من شووك شكون قال بلي بنت خدامتهم هي ختو
ادهم : ههه يعني ختي كانت خدامة فدار باباها
غمضت عينيها ملقات متقول
رهف : ادهم ... صدقني لي راح نقولو ماشي لمصلحتي فالاول و الاخر علبالي راح يعرفو واش خبيت عليهم علبالي بلي راح نخلص واش درت بارسكو سقمت غلطة بغلطة واحد اخرى بصح يا وليدي دير فبالك بلي اذا عرفوا بلي نهال ختك ... يماك محال تتقبل و مراحش تزيد دقيقة فدار نعرفها تخلي دارها و ولادها بلا رجعة ؛ دار كامل راح تتخرب و فوق هذا نهال نعرفها مليح نفسها عزيزة عليها و كرامتها فوق كلش لا راح تقبلكم ولا راح تسمحلكم ؛ و هي تاني حياتها راح تتقلب و تتخرب ... علبالي ماشي ساهلة بصح خمم مليح ادهم
ادهم قعد ساكت لقا روحو صح حاصل خاف يعترف بخته دارهم تتخرب و فنفس الوقت مراهوش حاب ختو تزيد تبعد على عائلتها و يعتبروها كبنت خديمة عندهم ، خرج من دار هارب من لي سمعه تمنى لوكان معرفش تمنى لوكان مبعتثله هند ميساج ولا حوس يعرف la vérité
.......
وقت الفطور كانو نصهم قاعدين يفطرو و لي فالخدمة و لي برا ؛ نطق اشرف
اشرف : علباكم واش كاين هاذ الويكاند
جاد : خليني نخمم
قمر : ههه لانيفارسار تاع جدو
جاد : ايه شيخ كبر
اشرف : ههه المهم انا حبيت نقترح عليكم حاجة ... واش رايكم نروحو la ferme تاعنا و نجوزوا الويكاند تما و منها نديرو حاجة صغيرة لجدي
نرجس : اههه bonne idée
صفية : الله يخليلي وليدي لي يعرف يخمم
ميس : عمو اشرف انا عجبتني l'idée تاعك بزااف
اشرف : خلاص منبعد نهدر مع ادهم و نسقمو الحالة و نروحو
صفية : وعلاش متقدرش تسقم وحدك وعلاش ادهم دخلو فالوسط
نرجس : واش فيها ماما يتعاونو كيف كيف
صفية : ايه مقلنا والو ... بصح واش بيهم عرايسنا ساكتين ههه ريحان نتي فاهمتك حبيبتي وليدك كسرلك جناحك و نحالك طرف تاع الامل لي كان عندك بصح نتي رهف واشبيك حزينة
رهف : والو راسي راهو يوجع ... سمحولي انا نوض بصحتكم
يتبع 💙💛💙 .....
أنت تقرأ
ابن عمي { ادهم و روسلين } _ باللهجة الجزائرية
عاطفيةالقصة دور في دار وحدة بين اولاد العم و باقي التفاصيل تعرفوهم فالكرونيك ملاحظة : الرواية من نسج خيالي لا علاقة لها بالواقع
