ابن عمي { ادهم و روسلين } _ باللهجة الجزائرية

بارت 20

روسلين : قلت .... بصح مافيها والو اذا هدرت شوية

قعدت روسلين تخزر قدامها و ساكتة و ادهم تاني ؛ شدت شحال منبعد نطقت

روسلين : نقدر نسقسيك

قعدت تستنى يريبوندي مريبونداش

روسلين : وشبيك مغلوق هكذا .... يعني مراحش تموت اذا هدرت لالا 
ادهم : مالاول قتلك مجيش نتي لي لسقتي
روسلين : ندمت لوكان عرفت هكذا منجيش جيبني منبعد تبدا تحاسب فيا ، حتى يماك مسلكتش جابتلك زعما سرور و قيمت بيك و بحبيبتك منبعد جي نتا تهدر معاها هكذاك عيب
ادهم : لوكان نتي محشرتيش نيفك فحاجة متخصكش

دارت عندو روسلين و قالتله

روسلين : سما الغلطة فناس لي تخمم عليك و على مصلحتك حنا حبيناك تتزوج و دير دارك و ولادك راك تكبر 
ادهم : يعطيك الصحة كي راكي تخممي عليا

ضحكت روسلين و قالتله

روسلين : ههه ... صح نبتي هذاك نهار مكانتش زعما باش نقربكم مي شوف عائلتك عرفت سرور يعني لازم تتشكرني نحيت عليك بزاف خدمة

دور ادهم راسو عندها و خزر فيها و هي قالتله

روسلين : ادهم .... سرور باينة تحبك سيي متخسرهاش
ادهم : و نتي واش تعرفي في الحب هذا باش قاعدة تهدري عليه
روسلين : الغلطة فلي هدر معاك
ادهم : لالا قوليلي باش نعرف ياك يقولك سقسي المجرب و متسقسيش طبيب

روسلين حمارت حشمت و دخلت في بعضها ؛ ادهم كي شافها هكذاك ضحك ، قعدت تخزر فيه كي ضحك تالمون جامي شافته يضحك

ادهم : راني نتقعد معاك زيد كشما يصرالك نحصل فيك ولا .... ولا كاينة منها باش حشمتي هكذا

روسلين زادت حمارت و هو ناض و قاللها

ادهم : نوضي نوضي دوك يطيح الليل

راح للطونوبيل و هي مزالت قاعدة حطت يديها على خدودنا تبرد فيهم مالحشمة ناضت تجري لحقتو

روسلين : ادهم عيب عليك تهدر معايا هكذا و تحشمني
ادهم : ايا اطلعي و سكتي حلاتلك الهدرة وقيل
روسلين : 😒😒😒

في الليل :

حبست طونوبيل قدام الفيلا جوايه 8 تاع الليل ؛ هبطت روسلين و ادهم و دخلوا للدار لقاو الخدامة توجد فالعشاء

روسلين : زعما ستنيتك تعشيني برا franchement c'est pas du tout romantique
ادهم : متكبريش كرشك بزاف

تبسمت روسلين و راحوا غسلوا يديهم منبعد هبطو و بداو يجيو واحد بواحد كان طايح واحد سكات روسلين عرفت بلي ناضت حرب صباح دخل جاسم شد بلاصتو

جاسم : تقدرو تحطو الماكلة .... ادهم وين رحت نتا و روسلين ؟؟
ادهم : درنا دورة و رجعنا للدار جدي
جاسم : ايه معليش

كملوا ياكلوا منبعد كل واحد رفد روحو و طلع منهم جاسم صفية و ولادها

روسلين : واش سر هاذ السكات
جاد : سكتي برك راطيتي بزاف ؛ عمتي صفية سقلت عمو اشرف و ناضت كبيرة بيناتهم لوكان مدخلش جدي يسلك لوكان اليوم باتنا فسبيطار
روسلين : a ce point
جاد : oui a ce point mademoiselle

رفد ادهم تليفونو و خرج و منبعد الباقي كل واحد وين راح

صباح جديد :

دخلت ميس لشمبرة رهف باش تصبح عليها بصح ملقاتهاش جاتها بيزار ؛ هبطت لتحت دخلت للصالون لقات غير ريحان قاعدة

ميس : صباح الخير طاطا
ريحان : صباح الخير بنتي
ميس : طاطا مشفتيش ماما وين راهي
ريحان : ها رهف ، منكدبش عليك بنتي معلباليش وين راحت مي خرجت صباح بكري بلاك عندها شغل دوك جي
ميس : ايه

قعدت ميس مستغربة من يماها و وين راحت ؛ شافت ادهم لي دخل تبسم معاها و راح سلم على راس يماه

ادهم : صباح الخير يما
ريحان ( بتشناف ) : صباح الخير
ادهم : و شنوفة هاذي علاش
ريحان : شوف نتا واش درت
ادهم : يما شوفي ؛ نتي تعرفيني مليح تعرفيني نكره واحد يدخل روحو فحياتي و لا يفرض رايه عليا
ريحان : بصح انا ...
ادهم : علبالي واش في راسك ؛ بصح فهمي يا يما بلي انا و سرور بيناتنا amitié و خدمة و برك متخليش عقلك يديك بعيد

دارتله ريحان براسها ايه و خرج

نروحو لبلاصة اخرى ؛ في واحد الباتيمون و نروحو ندخلوا للدار لي جاية فالايتاج الاخر

رهف : قتلك شحال من خطرة متزيديش تعيطيلي
هند : راح نقعد نعيط حتى تقوليلي عليها
رهف : اههه يا ربي اعطيني الصبر ؛ نقولهالك و نعاودهالك معلباليش بنتك وين راهي و خطيني من مشاكلك منسحقش المشاكل فداري فهمتي
هند : هاذ الخطرة يا رهف اذا مقلتليش وين راهي بنتي صدقيني نجي لوسط داركم و نفضح كلش

شدتها رهف من يدها و قالتلها

رهف : المرحوم وصاني عليك بصح بنتك مقالي عليها والو و حبيت نقولك هاذ الخطرة اذا زدتي سييتي تهدديني ولا تشطاري معايا ؛ دراهم لي يلحقوك باش داوي يماك نسايهم وقتها نشوفو واش ديري

رفدت رهف ساكها و خرجت غير لحقت برا حطت يدها على قلبها تسيي تشد غصتها

رهف : وعلاش انا وعلاش ؛ وعلاش نتا مت و كفلتني بعبئ ثقيل عليا كيفاش تحبني نفرق طفلة على عائلتها و يماها وعلاش

هبطو دموعها و كملت تمشي ما حسو غير بصوت طونوبيل جاية قدامها و موراها مزادت حست بوالو

هذا هو البارت ان شاء الله يكون عجبكم خليولي ارائكم اقتراحاتكم و توقعاتكم و الى الملتقى ان شاء الله في بارت جديد 💚💛