جاسم : ان شاء الله ؛ بشفاء عليك رهف راح نخليك مع بناتك شوية و لعشية نبعت واحد يجيبهم
خرج جاسم و قعدو غير البنات مع يماهم جوزوا النهار معاها كي لحقت العشية سمعوا الطبطيب
رهف : انعم
دخل ادهم عندها
ادهم : مساء الخير
رهف : مساء الخير وليدي
ادهم : كيفاش راكي دوكا
رهف : نقدرو نقولوا راني مليحة
ادهم : بشفاء عليك
رهف : الله يسلمك
حك نيفه بيده ( معلباليش كيفاش نشرحلكم هاذ الجاست المهم جاست يديرو مسيو ادهم بزاف 😂 )
ادهم : جدي وصاني على البنات باش يجيو معايا
رهف : اهه ايه قالي صباح نبعتلهم شكون يديهم ؛ روسلين ميس بلاكو على بعضكم هكذا بناتي
روسلين : متقلقيش روحك ماما
سلموا البنات على يماهم و خرجوا مع ادهم روسلين ركبت قدامه و ميس ملور ؛ واحد ربع ساعة كانوا وصلوا للدار ، ميس هبطت هي الاولى روسلين كانت راح تهبط منبعد دارت لادهم
روسلين : ادهم مارسيي على كلش .... يعني مننساش وقفتك معايا البارح يعني نقدر نقول نتا من اكثر الناس لي وقفوا معانا فهاذ الدار
دار ادهم عندها و قاللها
ادهم : شوفي .. هي صح منعرفوكمش بزاف و معشناش مع بعضنا بزاف بصح تقعدي بنت عمي من لحمي و دمي و لي تقيسك نتي ولا ميس تقيسني مكانش فرق بينكم و بين جاد و قمر و وقت مسحيقتوني راح تلقاوني معاكم
تبسمتله روسلين
روسلين : يعطيك صحة ادهم خيرك مننساهش كامل
هبطت روسلين من طونوبيل و هو راح ؛ طلعت ديراكت لشمبرتها رمات روحها على البونك حاسة روحها عيانة بزااف غمضت عينيها حتى سمعت الباب
روسلين : ادخل
فتحت عينيها لقاتها ميس داخلة و فيدها سندويش
ميس : رورو درتلك سندويش خفيف
تبسمت روسلين و قالتلها
روسلين : مارسي ميس بصح مرانيش قادرة كامل ناكل
ميس : بصح ماكليتي والو مصبح
روسلين : مرانيش قادرة معليش خليهولي كي نجوع نوض ناكلوا
ميس : ايه كيما تحبي
صونا تليفون روسلين رفدتو لقاتوا سراج تبسمت و خزرت فميس
روسلين : ميمي غلقي معاك الباب كي تخرجي
خرجت ميس و هي ريبوندات
روسلين : الو وي
سراج : واش روسلين وين راكي
روسلين : فدار وين حبيتني نكون
سراج : ماشي عندي شحال مسمعتش حسك
روسلين : بارسكو ماما دارت اكسيدون سما كنا معاها
سراج : اههه مسمعتش ؛ و كيفاش راهي دوكا
روسلين : راهي مليحة الحمد لله
سراج : الحمد لله ... مالا انا نخليك تكوني عيانة دوكا ؛ باي
روسلين : باي سراج
كوبات و رمات تليفون فوق البونك ؛ غمضت عينيها محستش بالوقت و هي راقدة حتى محبوش ينوضوها خلاوها تريح ؛ حكمتها الفطنة جوايه 3 تاع صباح هبطت لتحت كلات حاجة خفيفة و قعدت برا فالجنينة تخمم فلي صرا و فلي جاي حتى لحق الفجر صلات و رجعت تكسلت شوية
هبطت لتحت لقاتهم مجمعين فصالون صبحت عليهم و قاعدة تخزر فالباب وقتاش تدخل يماها ، حاسة دار سامطة بلا بيها زمان سمعت حس طونوبيل دخلت ناضت هي و ميس يجريو للباب لقاو يماهم جات و معاها جاسم و ريحان راحو سلموا عليها و دخلت ؛
قمر : بشفاء عليك طاطا
جاد : هاي رجعت خالتو رهف و نتي تقلقي في روحك ميس مرحبا بيك عندنا
رهف : ههه الله يسلمك جاد و نتي تاني قمورة
جاز امجد قدامها
امجد : بشفاء عليك خالتي
رهف : الله يسلمك وليدي
دخلت للصالون قعدت لقات صفية قاعدة تما لي هدرت معاها من فوق القلب
صفية : بشفاء عليك
رهف : الله يسلمك ؛ انا سمحولي نطلع لشمبرتي نريح شوية
جاسم : خودي راحتك
روسلين : انا نعاونك ماما باش تطلعي
طلعت رهف مع روسلين لي عاونتها باش تطلع منبعد سقمتلها فراشها و غلقت عليها الباب
وهي هابطة فدروج تكروازات مع امجد ؛ جات راح تكمل طريقها حبسها كلامو
امجد : روسلين
دورت راسها عندو
روسلين : انعم
امجد : راكي مليحة ؟
روسلين : ايه وعلاش منكونش مليحة
امجد : قلت بلاك تكوني cv pas مور كامل واش صرا
روسلين : لالا راني لاباس ، صحا
هي جات هابطة و هو رجع هدر قلبت عينيها
امجد : روسلين
روسلين : خير ان شاء الله
امجد : معلباليش وعلاش راكي تعاملي فيا هكا يعني اذا على نهار لول كامل مكانش قصدي نهدر معاك هكذاك و اصلا مكنتش نعرف بلي نتي بنت خالي
روسلين : معليش نورمال ؛ دوكا اذا تسمحلي نهبط
هبطت روسلين و خلاتو ؛ من نهار الاول معجبهاش و متعجبهاش لهدرة معاه
يتبع بعد حين ( البنات فليل نزيد نحط بارت ) 💛💛💚💚🧡🧡❤❤💜💜 .....
YOU ARE READING
ابن عمي { ادهم و روسلين } _ باللهجة الجزائرية
Romanceالقصة دور في دار وحدة بين اولاد العم و باقي التفاصيل تعرفوهم فالكرونيك ملاحظة : الرواية من نسج خيالي لا علاقة لها بالواقع
