ابن عمي { ادهم و روسلين } _ باللهجة الجزائرية

بارت 5

جاسم : منسحقش يديرلي مشاكل و تبهدايل مع ناس كيما كل مرة سمعة تاعي منسحقوش يشوهها
صفية : كونك هاني بابا

كملوا تعشاو فسكات منبعد كل واحد طلع لشمبرته

في الليل :

ميس كي مجاهاش نعاس طلعت لعند روسلين طبطبت طبطبت مريبونداتش عرفتها راقدة

ميس : افف

هبطت ميس للجنينة و قاعدة تتفرج فيها و تتبسم قاعدة تتمشى حتى شافت une grange ( بمعنى اسطبل تاع الاحصنة معرفتش اسمه بالجزائرية المهم )

تبسمت و راحت غير دخلت لقات بزاف احصنة تماك تبسمت

ميس : ياي شحال حطة

راحت عند واحد و بدات تمس فيه و تلعب معاه و هو عجبه الحال و قرب من عندها محستش بالوقت و هي تلعب معاه عجبها بزاف الحال غير دورت راسها لقات ادهم واقف قدامها حشمت بزاف و هبطت راسها

ادهم : واش راكي ديري هنا
ميس : انا ... انا

دنا عندها و قاللها

ادهم : عجبك

دارتله براسها ايه

ميس : اممم بزاف

دنا ادهم عنده و قعد يلعب معاه و بلاما يدور راسه هدر

ادهم : نتي هي ميس ياك
ميس : ايه
ادهم : شحال عمرك
ميس : 15
ادهم : اممم ... ( دور راسو عندها ) ... مرحبا بيك فوسك عائلتك

تبسمتله ميس و فرحت بزاف بهدرته يعني اكثر واحد كان مليح معاها مبدئيا من بعد جدها

ميس : مارسي اد ... ادهم

جبد ادهم سكر و قعد يوكل فيه للحصان و يهدر فنفس الوقت

ادهم : وعلاش مارسي
ميس : بارسكو هدرت معايا gentiment ههه بزاف هنايا نحسهم ميحبوناش على هاذيك بلاك كي مكانش معانا بابا معلاباليش
ادهم : معندك مديري بمحبة ناس ... هاكي

مدلها شوية سكر تبسمتلوا

ميس : اهه مكانش عمبالي بلي يحبو سكر
ادهم : سيي مي متكثريلوش منو
ميس : ههه ايه

قعدت ميس توكلو و تلعب معاه منبعد قاللها ادهم

ادهم : مدام عجبك بزاف ديه ولا تاعك

دارت ميس عندو بفرحة كبيرة

ميس : ياي صح ... يعطيك صحة مارسيي بزااف
ادهم : المهم انا نروح تصبحي بخير
ميس : و نتا بخير

Adham ****

كنت نتمشى برا حتى سمعت حس جاي من la grange كي دخلت لقيتها ميس ؛ صراحة مالغري منعرفهمش مليح بحكم معاشوش معانا مي يغيضوني بزاف من مرت عمي رهف حتى بناتها كانوا  دايمن منبوذين في عائلتنا و زيد كبروا وحدهم و انا علبالي واش معنتها تعيش و تكبر بلا اب ؛ حسيتها فرحت بزاف بالحصان هذاك على هاذي قولتلها تديه ؛ خرجت من تما طالع نرقد حتى قابلتني نرجس

**** ____________

نرجس : ادهم
ادهم : انعم
{ بالمناسبة ادهم ايهم يتشابهوا فالاسماء واشرايكم نبدل اسم ادهم لايهم ولا نخلوه ؟؟ }

نرجس : هاذي غيبة ؛ متسقسي متقول بنت عمتي كاش مخصها سورتو هاذ اليامات ملي ولات عندك خدمة بزاف و موليتش جي للدار

خزر فيها ادهم ببرود منبعد قاللها

ادهم : اذا انا كي نكون فدار و منحوسش عليك حبيتي كي نكون خدام نحوس عليك ؛ وقيلا تخالطتلك مع سي جمال ( باباها ) ولا واحد من خاوتك

طلع ادهم و خلاها تاكل فروحها

نرجس : نشوفو يا ادهم شكون لي راح يولي يحوس على لوخر

صباح جديد :

بعدما سقهواو كل واحد وين راح ؛ روسلين راحت عند نهال لقاتها قاعدة فلبونك و تقرا فكتاب سوطات عليها روسلين

روسلين : نهولة حبيبتي
نهال : ههه ملخر واش كاين روسلين
روسلين : ههه جيتك يا لالة باش نخرجك تشمي شوية هواء
نهال : اممم و وين نشم الهواء
روسلين : اممم زعما نروحو نديرو shopping منبعد نديرو فيها فطور شباب منبعد ... اممم نروحو وين مراكي حابة

نهال بتسمتلها بحزن و هبطت راسها قاعدة تلعب بصباعتيها منبعد طلعت راسها و قالتلها

نهال : معليش روحي مع بت عمتك منها تتعرفو على بعضكم و منها تنحي على خاطرك انا لازم نعاون ماما منبعد سمحيلي رورو

روسلين فهمتها معندهاش دراهم محبتش تخرج تشري معاها ؛ خزرت فيها و عنقتها نهال تشوكات منها منبعد زادت عنقتها ، جبدت روسلين روحها و قالتلها

روسلين : قبل كلش نتي ماشي لازم تخدمي مع طاطا جميلة اذا حبيتي تعاونيها بمحبة خاطرك معليش مي مراكيش هنا باش تخدمي علينا فهمتي و زيد نهال تعرفيني شحال نحبك و نعزك نتي ختي و صاحبتي و حبيبتي ياك مكانش حشمة بيناتنا اذا شريت لختي و خلصتلها لحوايج و لفطور نورمال ياك مفيها والو
نهال : بصح روسلين بزاف عليك يعني كل خطرة تشريلي و تخلصيلي من تليفون للحوايج للpc بزاف عليك ختي
روسلين : يعني لوكان نتي عندك زعما تشحي عليا و متمديليش هاا قولي
نهال : بصح ...
روسلين : لالا غير قوليلي دوكا باش ندير حسابي ههه
نهال : ههه باينة منعز عليك والو ؛ حاجة ما تغلى على الغالية
روسلين : خدودي راح يطرطقو من الحشمة
نهال : هههه
روسلين : حقا حقا واش قلتيلي مقبيل ، نروح مع بنت عمتي ... سمحيلي مي نتي مهبولة علبالك نتي متعرفيهاش تعيي تلغي كيفاش عاملة الزرزومية متكبرة و زواخة و تبان غيورة مالغري منعرفهاش مليح ملي نقعد فطابلة و هي تخزر فيا بنص عين تاكلني بهذوك العينين
نهال : ايه الزين هذا كامل و ميغيروش منو
روسلين : احم احم ... ههه علبالك نقعدو هكذا منكملوش لهدرة حتى لغدوة
......

هذا هو البارت تاع اليوم نتمنى يكون عجبكم ؛ راح نزيد نحطلكم فالليل ان شاء الله و وعد نسيي نحط كل يوم ؛ قررت نتلهى فالكرونيك هاد اليامات بارسكو تكاسلت عليها شوية من قبل من قلة التفاعل المهم حابة نشوف ارائكم فاحداث البارت توقعاتكم و اقتراحاتكم و الى الملتقى ان شاء الله في بارت اخر 💚