ابن عمي { ادهم و روسلين } _ باللهجة الجزائرية

بارت 23

هبطت روسلين و خلاتو ؛ من نهار الاول معجبهاش و متعجبهاش لهدرة معاه

هبطت لتحت و راحت لشمبرة نهال طبطبت و دخلت لقاتها رافدة واحد الورق فيدها تقراهم

روسلين : نهال
نهال : اهه روسلين

راحت روسلين عندها سلمت عليها

نهال : كيفاش راكي
روسلين : نقولوا سافا
نهال : و طاطا رهف كيفاش راهي ، كنت طالعة نشوفها قالولي طلعت لشمبرتها تريح محبيتش نديرونجيها
روسلين : راهي مليحة دوك برك كنت عندها خليتها راقدة .... ايهيه واش راكي دايرة فيها
نهال : راح ندخل نخدم هاذ اليامات ؛ راح نروح منبعد نشوف واحد شركة اذا قبلوني شفت شحال من وحدة منقبل متقبلتش فيهم ان شاء الله تكتبلي نخدم فيها
روسلين : اهاه وعلاش تخدمي و قرايتك
نهال : عادي نقدر نوفق بيناتهم اصلا مقعدليش بزاف و نكمل قرايتي و زيد لازم نعاون ماما بزاف عليها كامل المصاريف عليها
روسلين : لوكان قلتيلي نقول لجدي يخدمك فوحدة من شركات تاعو
نهال : لالا روسلين مارسي مي نرانيش حابة نخدم عند هاذ العائلة صراحة .... خليك مني نتي واش حوالك واش حوال سوسو
روسلين : ههه مكان والو لحد الان يعني بصح تقدري تقولي تقربنا لبعضنا كثر ملي كنا بكري
نهال : اممم مليح ؛ متعرفي بلاك تزيدو تتقربو كثر

رمات روسلين عليها بالمخدة

روسلين : ههه متحشميش
نهال : ههه محسوب نتي مراكيش حابة .... صحة نتي تحبيه ؟؟؟
روسلين : معلباليش يعني ... كيفاش نفهمك يعجبني بزااف نحب نكون معاه بصح معلاباليش دايمن نحس كاين نقص 
نهال : مثلا
روسلين : زعما الكونفيونص منحسش كاين بزاف كونفيونص بيناتنا شغل منقدرش ندير فيه ثقة عمياء  معلباليش اذا كي منعرفوش مليح ولا ؛ و زيد اليوم كي عيط و عرف بلي ماما دارت اكسيدون ستنيت منو يدعمني معلاباليش بصح على الاقل يواسيني ولا يحوس عليا خسر عليا زوج كلمات ، بلاك كلش يجي مع الوقت بصح مننكرش بلي حابة نكون معاه و هو اللي راني متمنياتو
نهال : معليش كلش يجي مع الوقت ... روسلين انا هذاك هو لازم نروح المقابلة تاعي مور ساعة لازم نلحق
روسلين : تحبي نوصلك ولا نوصي شوفور يوصلك
نهال : لالا متشقيش روحك ؛ نروح وحدي اصلا ماشي بعيدة منسحقش طونوبيل
روسلين : دبري راسك ايا مالا العشية
نهال : باي

خرجت روسلين و نهال زادت شوية وقت نا سقمت ساكها و خرجت ؛ كانت تمشي برا و تدعي باش يقبلوها وصلت قدام الشركة ؛ دخلت وراولها البيرو تاع directeur ؛ طبطبت و دخلت كي سمعت l'autorisation باش تدخل شافته مهبط راسه مع الورق غير طلع راسه تشوكات كي شافته مؤيد و شكون من غيرو شفات بلي هو صاحب ادهم لي لسقت معاه خطرة مام هو كي شافها عرفها تبسم على جنب اما هي فدارت روحها متعرفوش ممبا

مؤيد : تقدري تدخلي مدموزال

دخلت قعدت قدامه و حطتله السيفي تاعها رفد قراه و قاللها

مؤيد : ملا نقولو تبداي الخدمة من غدوة

من جهة فرحت بزاف و من جهة استغربت كيفاش قبلها ديراكت بلا مايسقسيها ما والو

نهال : داكور مسيو

رفدت ساكها و قالتلوا

نهال : bonne journée

و خرجت

بعد مرور شهرين :

راح نروحو نشوفو حكايتنا بعد شهرين بمانه مصراوش بزااف احداث مي صراو تطورات راح نلخصلكم واش صرا فهاذ الشهرين

بمانه حبسنا عند مؤيد و نهال ؛ ما تبدل والو فهاذ الوقت غير انه ولات تخدم عنده بيناتهم كل الاحترام و مام هي متحبش تزيد بزاف الهدرة ولا تدخل روحها حدها حد روحها الشي لي عجب مؤيد بزاف

نروحو لاشرف و خطيبته عادي مصرا والو و العرس مزال

سرور و ادهم علاقتهم تحسنت شوية و سرور قوات علاقتها بزاف بالعائلة سورتو مع ريحان

ادهم و روسلين ولاو قراب بزاف ؛ منبعد ما وقف ادهم مع روسلين كي دارت يماها اكسيدون مالغري كانوا كلمات قالهملها برك بصح بالنسبة ليها يعنيولها بزااف فالوقت لي حست روحها ضعييفة بزاف لقاته دعمها بزوج كلمات و من تما ولات تعزو بزاف مام هو دونك تقربو من بعضهم فهاذ الشهرين في حدود الصداقة و الاخوة 😆
ريحان و روسلين كيما العادة علاقتهم باردة من اخر مرة ضاربوا فيها مولاتش ريحان تحمل روسلين بزاف
ايه و سراج تقرب بزاااف من روسلين هاذ الشهرين

وهاذي هي اهم الاحداث لي صرا

نتلقاو غدوة ان شاء الله في بارت جديد راح تكون فيه لانيفارسار تاع مسيو ادهم واش نقوللكم عليها غير انه راح تصرا فدار مع روسلين و سرور تاني  ، انطلاقا من البارت 24 راح يبداو الاحداث و حكاية ادهم و روسلين يعني واش فات كان مجرد بداية و منطلق للكرونيك تعرفتو في 23 بارت هذا على اهم الاحداث ؛ الشخصيات عقليتها طبيعتها المشاكل كيفاش بدات الحكاية .... نتمنى الحكاية حتى لدوك تكون عاجبتكم اي افكار ولا انتقادات ولا اقترحات متنساوش تخليوها فالتعليقات و الى الملتقى ان شاء الله في بارت جديد 💚 و سمحولي اذا مقدرتش نرد على تعليقاتكم راني نسوفري مع الانترنت بسيف باش كتبت اليوم و حطيت غير تولي مليحة نرد عليهم 💛🧡💜💚❤