ابن عمي { ادهم و روسلين } _ باللهجة الجزائرية

بارت 38

مخلاهش يكمل هدرتو و كوبا ادهم عليه
كسر ستيلو لي فيدو ؛ مفهمش المشاكل لي قاعدة طيح عليه رفد تليفونو لافاست تاعه و خرج ؛ معرفش اذا يروح للسبيطار ولا لالا فالاخر ميقدرش ينسى العشرة تمتم و ميروحش يطل عليها مالغري هبطت من عينه بزاف بصح مبادئه متسمحلوش ميروحش يسقسي على انسان عرفو و عاشرو من سنين و تشارك معاه الحلوة و المرة ؛ زمان لقا روحو قدام سبيطار لي بعتله مؤيد لادراس تاعه ... دخل للداخل و سقسا على شمبرتها

غير دخل لقاها مكسلة و قدامها يماها بالمناسبة سرور عايشة غير مع يماها بارسكو باباه و يماها مطلقين ، و باباه عليش فالخارج يجي يشوفها مرة على مرة

ادهم : مساء الخير
يمات سرور : مساء الخير وليدي

روسلين غير سمعت صوته تقعدت

سرور : ادهم

دنا عندها

ادهم : راكي مليحة
سرور : اممم شوية ... اقعد وعلاش راك واقف

حك نيفه ( جاست تاع ادهم كي يتقلق ولا .... ايا كملوها )

قعد فالكرسي لي قدامها

يمات سرور : لوكان تشوف يا وليدي كيفاش طاحت معرفتش وقتاش زلقت ( خرجت فيها رورو 😂 )
سرور : ادهم ... ( شدتله يده و بداو عينيها يدمعو ) سمحلي على كلش معلباليش كيفاش هدرت هكذاك البارح

جبد ادهم يدو و خزر فيماها لي حمحمت و خرجت

ادهم : سرور وعلاش spectacle هذا قدام يماك
سرور : سمحلي ادهم مقصدتش و زيد ماما علبالها بلي صرا .... سمحلي انا زدت فيها بزاف منعرفش كيفاش هدرت هكداك بصح مقدرتش نحكم فروحي ادهم تعيش حق العشرة و الصحبة متزيدش دورلي راسك و تروح ماشي على اي بروبلام دورلي ظهرك
ادهم : سرور ماشي اي بروبلام ... تعرفيني نكره واحد يدخل روحو فحياتي نتي حاجة و عائلتي حاجة واحد اخرى و يكون فعلمك عائلتي قبلك و قبل كلش

بلعت غصتها مالغري معجبتهاش هدرتو بصح سكتت

سرور : ادهم سمحلي انسى لي صرا و خلينا نكملوا كلي ما كان والو

ادهم قعد ساكت و يخزر فيها دخلت بعضها حساته يقرا فيها ماشي يخزر 😂 هدر بكل برود

ادهم : حق العشرة سرور راح نسمحلك بصح تعرفيني ماشي انا لي نصبر بزاف هذا شحال و انا نقولك سقمي روحك معايا و لي صرا المرة لي فاتت كان القطرة لي فيضت الكاس تحوسي السماح راكي مسامحة بصح كل واحد يشد سابعو ، قعدت بيناتنا خدمة برك

خرج مخليها تاكل فروحها مالتغزال

.....

كان يسوق ، خزر فساعته لقاها راح الحال ميقدرش يروح فهاذ الوقت عند هند و زيد سيركولاسيون 😆
حس بواحد يطبطبلو فالكارو دور راسو يلقاهم زوج دراري يمسحولو فطونوبيل واحد يجي عمرو واحد 12 سنة و لاخر صغير كاش 5 سنين عقد حواجبو و هبط الكارو

ادهم : واش راكم ديرو
امين : راني نمسحلك فطونوبيل عمو
ادهم : صحا قولي وين راهم والديك 
امين : بابا ميت   ماما فدار مع ختي صغيرة و هذا خويا صغير 
و انا هو الاخ لكبير لازم نخدم على دارنا

نطق خوه صغير

رسيم : عمو طونوبيلتك بزاف شابة
ادهم : كي تكبر مام نتا تكون عندك وحدة هكذا
رسيم : صحح
ادهم : ايه

سكت ادهم و هو يشوف فيهم ؛ دور راسو شاف الباطة تاع القاطو لي جابها لختو قمر رفدها و مدها لهذاك طفل صغير

ادهم : ياك نتا تحب الحلوى
رسيم : اييه و بزااف
ادهم : قولي وسمك
رسيم : رسيم و هذا امين

جبد ادهم من جيبو باكي تاع دراهم و مدهم لامين ؛ و فرفشله شعرو

ادهم : هذوما مدهم ليماك ياك ؛ و متزيدوش تخرجو تمسحو للناس برا ... روح قرا و موراها خدم و رفد داركم ، و هاذي لاكارت تاعي اذا كاش ما سحقيتو عيطلي
امين : يعطيك صحة عمو
رسيم : يعطيك صحة على القاطو عمو الشباب

تبسم ادهم معاهم دارولو بيدهم باي و راحو

08:00 Pm :

كانوا قاعدين فصالون و فخرية تحط الماكلة من جهة الاخرى ؛ دخل ادهم و غير قعد نطقت ريحان

ريحان : ادهم كيفاش راهي سرور ؛ هذاوين سمعت بلي طاحت
ادهم : .... راهي مليحة
ريحان : مسكينة عين بيها ، كي عيطتلها و قالتلي بلي راني فسبيطار مامنتش و مكانش علبالي بلي كنت رحت عندها سينون لوكان قتلك تديني معاك
فاطمة : بوووه لي يسمع يقول دارت اوبيراسيون ولا رايحين طلوا عليها فالاخر طاحت برك

طلع ادهم عينيه تلاقاو مع عينين روسلين لي كانت تخزر فيه بخزرة مفهمهاش

ادهم : انا نطلع نبدل

ناض ادهم و نطقت صفية

صفية : مراكيش تحبسي تليفونات نتي و سرور ريحان
رهف : ايه راكي ديري فلافار
صفية : على حساب شوفة ... ( اواه وقيلا صفية و رهف راح يتحدو ضد ريحان 🤔 )
ريحان : وعلاش ما نهدرش معاها اذا كتب ربي تكون عروستي وعلاش لالا
رهف : هااا قولينا هكذا
فاطمة : مدام راكي تشوفي فسرور توالم ادهم جيبيها نتعرف عليها وعلاش لالا ميتزوجهاش ولا واش قالو روسلين واش رايك فسرور تكون مرت خوك
ريحان : ايه واش تقولي روسلين

روسلين تنبزت بهدرتهم

روسلين : دبرو راسكم فالاخر حياتهم ماشي حياتي

قاطعتهم فخرية كي دخلت

فخرية : العشاء راهو واجد

بداو ينوضو و راحو شدو بلايصهم روسلين حست روحها تقنطت من هدرتهم رفدت روحها خرجت ديراكت طالعة لشمبرتها

يتبع 💚💚💚 ....