راح عندها قعد واقف اونفاص ليها يخزر فيها منبعد نطق
ادهم : ملا نتي هي
تبسمت و قالتله
هند : ايه انا ؛ انا لي بعتلك الميساجات هاذوك
ادهم : واش لي يخليني نامنك
هند : معندي وعلاش نكذب ... تفضل اقعد
قعد قدامها يخزر للبحر
ادهم : كيفاش عرفتي بابا
هند : وقتها انا كنت عايشة hors wilaya و منصف كان يجي تما علجال الخدمة و تعرفنا قعدنا en contact واحد ربعة شهور و تزوجني موراها و قعد مخبي عليكم سورتو باباه علبالوا مراحش يقبل هاذ الزواج على هادي قعدنا مخبيين منبعد ... منبعد جاتنا طفلة و وقتها زادت المشاكل بيناتنا صح مكان منقص علينا والو بصح انا كرهت مالخوف و العلاقة لي خبيناها ، وليت نهدد فيه اذا مقالش للعائلة على هاذ الزواج مراحش نخليه يزيد يشوف الطفلة ، كان حلي الوحيد بارسكو علبالي كان متعلق بزاف ببنتو بصح ... هو دالي بنتي بسيف عليا الحاجة لي متوقعتهاش منو و البروبلام وقت سرقولي بنتي مكانش علبالي بلي هو وقتها كانت بيبية عمرها ممبا شهر .... جازوا العوام و انا دخلت فاكتئاب و وقت عرفت بلي بنتي راهي عندو مات .... عييت نحوس عليها فكل بلاصة مكاش حاجة مدرتهاش بصح مقدرتش نجي لداركم خافت ؛ خافت تلوموني و تخرجوني غالطة و فوق هذا خافت نخربلكم عائلتكم
قعد ساكت جامي توقع باباه يدير هكذا ولا توقع تكون عندو ختو
ادهم : و دوكا راكي تحكيلي باش نعاونك تلقاي بنتك
هند : اممم ... شوف ادهم قبل ما قصدتك سقسيت عليك مليح ، ملقيتش حل من غيرك راني محروقة على بنتي من 21 سنة عييت و تهد حيلي تعيش وليدي عاوني لقالي بنتي صدقني غير نلقاها راح نديها و نبعد مراحش نديرلكم حتى بروبلام و واحد مراح يعرف
ضحك ادهم ضحكة سخرية و قاللها
ادهم : راح نلقاها متخمميش بصح ... ماشي علجالك راح نحوس عليها بارسكو هذيك ختي و امانة بابا و وقتها راح تقعد عند عائلتها مع دارها و ناسها و خيرلك متزيديش تخرجي فوجهي ولا فوجه دارنا ، متنسايش بلي نتي فواحد الوقت خربتي دار كنتي قادرة تتزوجيه قدام ربي و عباده ماشي بالتخبية و دوكا راكي تخلصي ف les fautes تاعك
ناض و خلاها تعيط موراه ركب طونوبيلتو و راح
........
خليونا نوليو لعند رورو
كانوا قاعدين جابولهم الفطور ؛ حتى نطقت روسلين
روسلين : سراج ماشي قلتلي عندك هدرة معايا
سراج : ايه .... شوفي روسلين ... يعني حنا عندنا شحال ملي نعرفو بعضنا و صراحة حبيت نقصد الباب الكبير ( معلباليش اذا يقولوا هكذا 😂 المهم ) و نجي نخطبك
الماء اللي كانت تشرب فيه حصللها بدات تكح
سراج : راكي مليحة
روسلين : ... اممم
سراج : روسلين جامي كنت سيريو مع وحدة هكذا ... يعني والفتك بزااف وليت نحب نشوفك بزاف روسليين انا ... انا نح....
روسلين : حببس سراج ..... سراج سمحلي بصح ... بصح مرانيش واجدة
رفدت ساكها و خرجت تجري هو قعد واقف مفهمش ردة الفعل تاعها ، كذبت تلحق للطونوبيل قاعدة تتنفس بزربة مفهمتش واش بيها و واش صرالها لوكان جا ليها قبل شهر و لا كثر لوكان راهي ميتة بالفرحة واش لي تبدل حست نفسها ضاق معرفتش كيفاش و وقتاش دخلت للدار و لحقت لشمبرتها رمات كلش من يدها و طاحت فالارض ؛ حاسة راسها ملخبط كامل .... مقدرتش تفهم واش صرالها دموعها قعدوا يهبطوا وحدهم ، حاسة غصة فقلبها زادت تفكرت ادهم كي عيط عليها صباح غمضت عينيها مفهمتش واش بيها وعلاش محبتش تتقبل لي قالوا سراج فالوقت لي عندها شحال و هي تستنى فهاذ اللحظة واش تبدل و واش لي خلى la réaction تاعها تكون هكذا تمنات لوكان مراحتش و مسمعتوش ؛ معلبالهاش شحال جاز و هي قاعدة فالحالة هذيك تبكي كيما جامي بكات و لحد دوكا مفهمتش وعلاش راهي تبكي هكذا حاسة الدنيا ضاقت بيها من كل جهة ، سمعت دقديق
فخرية : مدموزال هبطي العشاء واجد
روسلين : ... روحي مرانيش حابة نتعشا
هبطت فخرية و روسلين سيات تنوض بسيف حطت يدها فالحيط تمشات حتى لحقت للدوش شافت روحها فالمراة حالتها تخلع عينيها تنفخوا بزاف و حماروا غسلت وجهها بالماء و خرحت هي غير خرجت و بدات تحس فالدنيا دور بيها ( سييتوها ديجا تبكيو بزااف حتى تتغشاو 🥺 ) النفس تقطع عليها و موراها محست بوالو .... طاحت فالارض و راسها خبط فالكوافوز تاعها
......
تلايمو على الطابلة واحد دخل ادهم اخر واحد هذاك وين جا ، دخلت فخرية تحط فالعشا
رهف : فخرية عيطتي لروسلين
جاسم : ايه مزال مهبطت !
فخرية : قاتلي مرانيش حابة نتعشا
رهف : اهه وعلاش
جاسم : فخرية روحي قوليلها قالك جدك اهبطي
فخرية : ايه مسيو جاسم
نرجس ( بلعقل ) : الفشوش الزايد
فاطمة : كشما قلتي نرجس سمعينا حسك
نرجس : اهه
صفية : خير عمتي وعلاش راكي تهدري هكذا معاها
فاطمة : اسكتي صفية مهدرتش معاك
ادهم قعد يخزر فالباب يستنى فروسلين بارسكو عرفها زعفت على الصباح
نرجس : معليش ماما ؛ ماني استغفرت برك
فاطمة : اممم مليح
سمعوا فخرية تعيط مالفوق ، طلعوا يجريو عندها ......
هذا هو البارت نتمنى يكون عجبكم خليولي ارائكم اقتراحاتكم توقعاتكم ايا كل وحدة تخلي فكرة للبارت الجاي خلي نشوفو ابداعاتكم نحب نشوف تفاعلكم راني حطيتلكم 3 حلقات اليوم 😂 و الى الملتقى ان شاء الله في بارت جديد
💚
💚
💚
DU LIEST GERADE
ابن عمي { ادهم و روسلين } _ باللهجة الجزائرية
Romantikالقصة دور في دار وحدة بين اولاد العم و باقي التفاصيل تعرفوهم فالكرونيك ملاحظة : الرواية من نسج خيالي لا علاقة لها بالواقع
