"ရေတွင်းက အိမ်အပြင်ဘက်မှာရှိတော့ ကျွန်တော်ရေချိုးခါနီးဆို အစေခံတွေက ရေပုံးတွေနဲ့ သယ်လိုက်၊ လောင်းထည့်လိုက် လုပ်နေရလို့...ရေချိုးကန်ထဲကို ပိုပြီးလွယ်လွယ်ကူကူရေဖြည့်နိုင်အောင် ရေစုပ်စက်လုပ်လိုက်တာ...ဒီမှာက လျှပ်စစ်မရှိဘူးလေ...အဲ့တော့ လျှပ်စစ်မလိုတဲ့ရေစုပ်စက်ပေါ့"
"လျှပ်စစ်ဆိုတာ ဘာလဲ"
" မှော်စွမ်းအင်လိုမျိုး စွမ်းအင်တစ်မျိူးပဲ...အန္တရာယ်များပေမဲ့ သုံးတတ်ရင်အများကြီးအသုံးဝင်တယ်"
အရုဏ နားလည်သွားဟန်ဖြင့် ခေါင်းညိတ်သည်။
" ရေစုပ်စက်က ဘယ်လိုအလုပ်လုပ်တာလဲ"
" လေဖိအားက ရေတွင်းထဲက ရေတွေအပေါ်သက်ရောက်တော့ ရေတွင်းထဲကရေတွေက ဖိအားနည်းတဲ့အပေါ်က ရေစည်ထဲကို ပိုက်ကနေတစ်ဆင့် စီးတက်သွားပြီးတော့..."
"မောင့်ကို မျက်စိရှေ့မှာပြလိုက်တာက ပိုကောင်းမယ်ထင်တယ်..."
ရှင်းပြလည်း နားလည်နိုင်မည်မဟုတ်သည့်အတွက် မျက်စိရှေ့တွင်ချပြလိုက်ခြင်းက ပို၍အဆင်ပြေပေလိမ့်မည်။
အရုဏ၏စကားက ဆီလျော်မှုရှိသည့်အတွက် ယုဂန်သည် အရုဏကိုပြသရန်အတွက် ရေစုပ်စက်နှင့်ရေပိုက်ခေါင်းတပ်ဆင်ထားရာ မိမိ၏ရေချိုးခန်းဆီသို့ ခေါ်ဆောင်သွားသည်။
ရေချိုးခန်းမှာ ခမ်းနားသောစံအိမ်တော်ကြီး၏ ရေချိုးဆောင်ဖြစ်သည့်အလျောက် အတော်အတန်ကျယ်ဝန်းသောအခန်းဖြစ်သည်။ အစေခံများ၏ထိန်းသိမ်းမှုကြောင့် သန့်ရှင်းပြောင်လက်နေသည့်အပြင် ရေချိုးကန်မှာလည်း ငါးပေပတ်လည်မျှအကျယ်ရှိကာ နှစ်ပေနက်သည်။ ရေချိုးကန်ဘေးရှိ သစ်သားစင်တွင် ရေသန့်စင်ရာ၌သုံးသော ပစ္စည်းအချို့၊ ဆပ်ပြာ၊ အမွှေးနံ့သာ၊ လိမ်းကျံစရာ စသည်တို့ဖြင့် ပြည့်နှက်နေသည်။
ယုဂန်သည် ရေချိုးကန်၏ဘောင်ပေါ်တွင်တင်ပါးလွှဲထိုင်၍ သူခက်ခက်ခဲခဲပြုလုပ်ခဲ့ရသော ရေပိုက်ခေါင်းနှင့် ရေပိုက်တို့ကိုပြသသည်။
မိမိလာခဲ့သောကမ္ဘာကလို ရေပိုက်ခေါင်းနှင့်ရေပိုက်မှာ ဝယ်ဖို့နေနေသာသာ၊ ရှိတောင်မရှိသဖြင့် ပုံကြမ်းရေးဆွဲပြီး ပန်းထိမ်ဆရာဆီပြေးကာ ပြုလုပ်ခိုင်းခဲ့ရသည်။ ပုံကြမ်းဆွဲရသည်မှာ လွယ်ကူသော်လည်း ပိုက်ခေါင်းနှင့်ပိုက်ပြုလုပ်နိုင်မည့်သတ္တုကို ရှာဖွေရခြင်းနှင့် ပန်းထိမ်ဆရာအား နားလည်အောင် ပြောယူရသည်မှာ အတော်လေးပင်ပန်းသောကိစ္စဖြစ်သည်။
YOU ARE READING
The Everlasting One ( volume 1 )
FantasyStart Date : 4.9.2020 End Date : 24.11.2021 သူဟာ သာမန်တက္ကသိုလ်ကျောင်းသားတစ်ယောက်ပါ ။ မှော်စွမ်းအင်တွေ၊ parallel worldတွေကို ယုံကြည်တဲ့ကောင်လေးတစ်ယောက်ပေါ့။ တစ်နေ့မှာတော့ တခြားကမ္ဘာတစ်ခုကို သူရောက်ရှိသွားတဲ့အခါ...... ဟာ သာမန္တကၠသိုလ္ေက်ာင္းသားတစ္ေ...
Chapter : 73
Start from the beginning