سلطان : وصلنة لبيت ابوي وگفت ابابة اخاف هم انطرد لكن عزام دفع الباب ودخل و گال
- ادخل يا خوي الي خاف من الطردة اهو انة موش انت.
- عزام امي ما تريدني من قبل چا هسة اشلون.
دخلنة شفت خولة الي من شافت عزام ركضت سلمت علية وما سلمت علية شترجة من بت حاتم والله ما عندك حظ يا حمد على خولة انوب راد ايكحلهة عماهة من اخذ بلقيس .
دخلنة للدوانية اشوي واجت امي تتجة على عكازة من شفتهة گمت وشبگنهة صح هية ما تريدني لچن هية امي وطاگ گلبي عليهة ورغم الفراق ما حن گلبهة علية دفعتني وگعدت سلم عليهة عزام وگالهة
- عزام : الله بالخير حچية انة اليوم ارد احچيلچ كل الي صار واتمنة السماح منچ ....
وبدة عزام يشرح المي الي صار لچن نضرات امي ما تغيرت بالعكس دارت علية وگالت
- امي: وانت راد علمود اتفشل اخوك بين الزلم الاعوج ايضل اعوج.
- سلطان : مقبولة منچ لچن انة ما فشلت اخوي هوة الي تمادة علية بالديوان والكل شاهد عمري ما عاديت حاتم كل الوقت اهوة الي يحفرالي وانتي امسانتهة يمة احنة هم ولدچ محسن هم ابنچ عليش اتفرقين بينة؟
- امي : ما عندي ولد بس حاتم وانت يالنذل ما ارضة عليك واتگول ما معادي عليش زوجت بنتك لحمد شني ما تدري خولة بت خوك مزوجتة لو تعمدت؟
- عزام : لا يا ام سلطان ما مرجية منچ سلطان يبقة ابنچ الچبير ورفعت راس.
- امي : رفعت راس من راح تزوج وحدة ما معروف اصلهة من فصلهة وتبرة من اهلة.
- سلطان : يمة عليش اضلميني انة ما تبريت منكم انتم الي طرتوني ومارتوني والسبب ابنچ.
- امي : انچب ولا اجيب طاري حاتم ويلة اطلع برة بيتي ماريد اشوف وجهك يالمسموم ما عندي ولد اسمة سلطان مات من اسنين .
گمت وگتلهة
- انة رايح لجن تذكري احچايتي يا يمة من انة اصغير انتي ظالمتني والى هذة يومچ كلة علمود حاتم لا يزعل ..يجي يوم وتحسفين .
طلعت وعفت عزام يمهم قررت ارجع للبصرة بس اشوف محسن يجي وياي لو لا ...
ظليت اتمشة بالبساتين حسيت روحي تهت بالگيعان لچن اكو فلاليح اگدر اسالهم بقيت اتمشة وصلت يم واحد من الفلاحين وسألتة على مكان محسن اخوي دلاني علية بعيد اشوي وصلت بس تعبت بالمشي شفت حمد بالباب واگف اهو وحمزة ابنة
ركض صوبي
- ها عمي عليش تعبان اشصاير ابوي وين ليش راد بحدك .
- ما صاير شي لچن ردت امشي وتهت الى ان وصلت اهنا.
- امشي تغدة عدنة.
- ما تقصرون .. محسن خطية امسوي الغدة ومنتضرني بوية باچر انة ارد للبصرة.
- عليش عمي اكو احد ماذيك مقصرين وياك بشي؟
- لا يا بوي لچن عندي شغل ما اگدر ابقة.
- وسام وحسام اهناك .
- انت تعرف وسام هسة الگا متعارك وية السوگ كلة ادخل تغدة ويانة .
- تسلم عمي ما اشتهي ماكل اليوم رحت للخلفة علمود بيت بلقيس وگال خلال شهر كامل فبلكي اجهزون نفسكم على الاسبوع الجاي علمود النيشان .
- انشالله خير .
- اترخص اجيك العصر .
دخلت للبيت و اتلگاني بن محسن لان محسن ما موجود گتلة وين ابوك گال
جاي يشتغل عمي .
- روح صيح ابوك وگولة سلطان ايريدك .
اشوي واجة محسن وكلة طين وشكلة يكسر الخاطر
- خوية مو گتلك لا تشتغل عند الناس .
- سلطان يا خوي انة مرتاح هيچ و العيشة مستورة ما يحتاج اشتري گاع.
- الة يحتاج شني اتريد اتخلي ولدك بعدين ايصيرون فلاليح عند الناس ما عدهم مستقبل ودراسة.
- يا دراسة وحنة يادوب عايشين .
- باجر ارجع للبصرة اريدك تجي وياي .
- تامر ياخوي .
اتغدينة وبقينة انسولف وجانة العصر حمد اخذنة للديوان وگعدنة نتسامر لليل رجعنة..
عزام لح راد ابقة بيتة تعذرمنة صح بيت محسن تعبان لچن هذا بيت اخوي ومرتاح بي
وثاني يوم طلعنة من الفجر بسيارتي انة ومحسن قبل ما اطلع وصيت حمد على گاع زينة واهم شي قريبة عليهم لمحسن بدون ما يعرف احد وصلنة الضهر للبصرة
بلقيس : بعد ما راح ابوي خلصت الايام بحدهة تمشي خلاص استسلمت للامر الواقع ما باليد حيلة كل معارفنة عرفو بية انخطبت وطش الخبر والناس تجي اتبارك مرات انجبر اطلع اسلم ومرات ما اطلع امي تتعذر واتگولهم راحت لبيت خالتهة .
من قهري بس اشتغل اذا انقهر لو انام لو اشتغل ...
چنت انظف بالبيت وسمعت امي اصيح علي
- امي : بلقيس ولچ بلقيس صوتي راح وينچ.
- بلقيس: ها مامة شكو ليش اصيحين.
- امي : ومرض ما اسمعين صوت الباب يندگ انطرشتي .
- بلقيس : ما سمعت طالعة .
طلعت للباب وصحت منووو
- بابة : انة يا بعد ابوچ
فتحت الباب ودخل باب حسبالك مفاركتة سنين شبكتة وذبيت حسرة گلبي
-بابة : ها بوية عليش تحسرين صاير شي منو امزعلچ؟!
- بلقيس : محد بس مشتاقتلك ما متعودة على فراگك
شفت عمو محسن ورا سلمت علية ودخلنة
فتحت باب الدوانية لعمو محسن ورحت لمي گتلهة اجة بابة عافت الجدر ورحات لبوي ضحكت عليهة ولا چنهم اكبار اذا واحد ايفارگ الثاني بسرعة ايبين عليهم ومن يتلاگون شكلهم يفضحهم لان ايموت ضحك بين المستحة منة وبين الشوگ هل مرة مابية اضحك عليهم بقيت بالمطبخ وامي راحت لبوي .
نصيت الجدورة اخذت صلاحية ماي لعمي محسن ..
امي وابوي چانو بالهول گاعدين عفتهم ودخلت للدوانية انطيت الماي لعمو محسن الي باوعلي وابتسم
- محسن : منهو الي كدر ام اللسان لا ايكون من شفتيني ضجتي؟
- بلقيس : لا عمو بالعكس جيتك اتفرحنة هلة بيك بكل وقت .
- صايرة عاقلة و رزنة لچن ما ايلوگلچ .
- بعد الواحد لازم يعقل .
- بوية صبينة چاي.
- راح انصب غدة عمو لا تشرب چاي هسة.
- بوية هاي عمو بالعمارة ما اتصرف لعمامچ گولي عمي منا ورايح.
- الله كريم .
طلعت مابية اجادل اكثر شفت امي وابوي يتناقشون الواضح علية لان من شافوني سكتو
كملت طريقي للمطبخ وحضرت الصحونة و والزلايط وطلعت طرشي طفيت التمن والمرگ ..ودخلت علية انسام مثل كل مرة لازم تنطي الموجز اكيد چانت تسمع لبابة ولمامة بس هل مرة انسام ما اتباوع الي اصلاً وكانو تتهرب من نظراتي .
- انسام اشبيچ صاير شي؟!
- ها لا ما صاير شي.
-اشبيهم مامة وبابة على شنو جاي يحچون؟
- ما ادري ما سمعت شي .
- اشعجب مو من عاتچ ما اسمعين!
- خلي انصب الاكل بسرعة بابة جوعان.
- خلصت بس تجي امچ اصب .
- بلقيس انة هواي احبچ والله.
- و حتة انة احبچ بس اكثر من ما انتي اتحبيني غير انتي اختي الوحيدة.
- بس انة ما اتحمل البيت بدونچ لا تروحين للعمارة.
- ما ايفيد بعد الحچي ولا اتحطين على الجروح ملح ترة والله راح اموت من التفكير اشلون اروح واعيش وية ناس ما اعرفهم واشلون اتعود على اغيابكم.
- اظل بحدي يعني
ظلت تبچي مدري انقهر عليهة مدري على روحي شبگتهة ومسحت ادموعه
- لا تبچين الي ايسمعچ ايگول باجر رايحة للعمارة اشبيچ على الاقل ٤ اشهر لان راح يبني بيت...
- بس سمعت بابة ايگول الاسبوع اليجي النيشان وبعد شهر العرس متفق حمد وية بابة.
اتعودت على الصدمات ظلو ما ايثرون بية حمد مستعجل لان ما عندة مرة وايريد ايعوض معدنت مرتة فچلب بية .
الله كريم حمد اذا ما خليتك تكره عيشتك مثل ما كرهتني بروحي ما اطلع بلقيس.
- وين صافنة اشو سكتي !
- عندچ حل مثلاً انتي تدرين بية مجبورة على كل هذا الموضوع بيدي شي وما سويتة .
- بلقيس لا اتروحين عفية.
- لا اتخافين فترة وارجع اخلي يكره روحة وايطلگني.
- انوب اترجعين امطلگة شيفكنة من حچي الناس.
- احسن ما اعيش وية واحد ما اطيقة.
سمعت اصوات امي وابوي قريبة سكتت ومسحت ادموع انسام وگمت اسوي روحي اعزل بالمطبخ.
دخلت امي وابوي
- امي : طفيتي الجدورة؟
- بلقيس : اي .
- بابة : اشبيچ بابة بلقيس ليش احسچ ضايجة من رجعتي للبيت؟
- اشلون الواحد ايضوج من ضوة اعيونة بالعكس كلش فرحنة.
- بابة : هذا فرحچ هيچ چا من اتضوجين اشلون.
- بلقيس : ما اضوج مادامك سالم بابة روح صيح لعمو خلي يتغدة على ما انصب .
اتهربت من الموضوع بابة بسرعة يفضح الي بداخلي.
رحت يم امي الي حچت بصوت ناصي
- لا اتكسرين فرحت ابوچ من اول ما اجة يسأل اشبيهة بلقيس ضايجة واحسهة ما مقتنعة بالخطبة اذا سألج گوليهة مقتنعة.
- انشالله عندچ اوامر بعد؟
- اسلوبچ غيري افضل الچ لا هذا خشمچ اليابس يتكسر مفهوم.
- ابجالچ انكسر خشمي لا اتخافين ما اسوي شي ولو ما عيب چا ما اكلت وياكم من الاساس.
- انتي ليش اتحسسيني اكرهچ صدگيني بعدين تتشكريني لان حمد هوة الرجال الوحيد الي يگدر يتحمل اسلوبچ الخايس وهو الي يگدر اينسيچ الماضي .
- اشكرچ على شنو على زواج فاشل لو على رجال ما اطيقة اشلون يگدر اينسيني الماضي وانة ما بالعة فكرة قربة مني.
- تتعودين وبعدين اتحبي انطي لروحچ فرصة وسمعي حچي قبلچ هم انة چنت شايفة روحي وما عاجبني العجب و كلة احچي من ورة خشمي حتة وية ابوچ بس اشوي اشوي ظليت احبة بدون ما ادري وحمد نفس نوعيت ابوچ .
حمحم عمو محسن ودخل انسام تنگل للسفرة وانة من دخلو هم ظليت انگل وياهة خلصنة وگعدنة
بدة بابة ايسولف النة شنو الي صار بالعمارة وكل اشوي ايجيب طاري حمد وهيچ سوة وهيچ سوة علمود يرفع قدرة عندي انة اسوي روحي ما اسمع .
- سلطان : بلقيس بوية شو ساكتة؟!
- بلقيس : لا جاي اكل بس استغربت اشو ما جبت طاري عمو حاتم او بيبي شنو ما رحتلهم؟
گرصتني امي حيل اباوع لبابة اتحولت ملامحة لنكسار ودنگ وعمي محسن نفس الشي
ردت اغير الموضوع الجواب واضح من شكل بابة
- بلقيس: اگلك بابة عمو محسن ماشايف من البصرة شي ليش ما تطلع انت ويا اتسيرون على جماعتك بالليل ؟
- بابة : اي والله من زمان ما ملتمين اتروح وياي يا خوي؟
- محسن : اروح لچن ارد انام الضهر وبعدة وين ما اتريد اروح .
انتبهت على اهدوم عمي محسن تعبانات خطية گتلة الواضح حالتة تعبانة
- بلقيس : عمو انطيني اهدومك اغسلوهم وراح اجيبلك اهدوم من بابة .
- محسن : لا يا بعد عمچ ما ارد اتعبچ.
- بلقيس: شنو القصة هية دشداشة اغسلهة .
خطية استحة گدرت اغير الموضوع
خلصنة غدة العصر ابوي وعمو طلعو صعدت نمت بعد ما عزلت البيت وغسلت اهدوم عمو وصعدت لغرفتي مديت طولي على الچرباية ونمت مرت الايام بشكل عادي جنت احاول اتناسة الموضوع
الى ان اتصل عزام على بابة وگالة باجر راح انجيب جاهة واصير خطبت بنيتك رسمي وبنفس اليوم النيشان علمود طريق الرجعة ثاني يوم
امي من ساعتهة گلبت البيت تنضف وتغسل الوصخ والنضيف طيحت حضنةانة اشتغل وياهة ومستغربة عليهة حتة ظلت تشتري غراض للبيت گتلة
- ترة مالة داعي كلش هواي عليهم الطارمة همة وين شايفين واتريدين اتغيرين من الاثاث .
- عيب هذا الحچي هذول اهلچ وخطار عدنة اتريدين ابوچ يطلع فشلان اگبالهم شگلك مرتك ما تعرف الاصول وهاي الي عفت اهلك علمودهة وهم ما ايعيروچ من اتروحين يمهم واضلين تفتخرين بيت اهلچ.
- مو زين وقبلت بيهم ترة اكو فرق بينة وبينهم مثل الفرق بين السمة والگاع .
- رجعنة لنفس الموال وبعدين وياچ عود فشلينة باچر يمهم وشوفي ...
- بلة تهديد اصلاً مابية للمشاكل حلگلي ما افتحة بس اتخلص الحفلتكم اصعد لغرفتي .
- شراح اتلبسين؟ اشلون نسيت موضوع البدلة!
- ما البس بدلة عندي كوستم وامشي حالي بي لا اتعبين روحچ وهم صالون ما اروح.
- ماشي يا بلقيس عود طلعي مبهذلة وروح ابوي اذا ما گلت لبوچ واخوانچ سبب رفضچ لحمد ما اطلع نادية .
- انتي متأكدة انة بنتچ .
- هوة لان بنتي انة جاي اسوي هيچ كافي تتعلقين بوهم دمرتي اعصابي ..كملي شغلچ.
خلصت تنضيف البيت وطبيت سبحت من طلعت لگيت بوجهي وسام
- اشبيك وثول ما اشوف چا فلشت وجهي.
- على كيفچ ما ادري بيچ .
- وخر من وجهي مالي خلگك
دخلت للغرفة ارد امشط ولگيت انسام امزعبلة بغراضي هوة انة طالعة روحي وهاي گالبة غراضي صحت بصوت عالي
- انسااام انسااام..
اجت تركض
- ها شكو ليش اصرخين؟!
- مليون مرة گايلة الچ من الطلعين غراضي اترجعيهم لمكانهم گايلة لو لا؟
- ما ادري هسة انتي صرختي علمود الغراض حسبالي عندچ شغلة .
انة دمي فاير وهاي تحچي وياي برود على الميز شيشة ريحة لزمتهة وشمرتهة بكل قوتي عليهة
- الحيوانات ما تمشي بس بالطگ عود عيديهة وشوفي والله الة اكسر اديچ انقلعي من وجهي گبر ايلفچ.
اجت امي وسام وحسام على صياحنة
- امي : خير شصاير ليش هل صياح راح اتلمين المنطقة علينة ما اتگليلي اشبيچ .
- انسام : صار الهة ساعة اصيح علمود لاعبة بغراضهة حتة طگتني والله يمة ما لحگت المهم انتي صحتيني .
- امي : بلقيس انتبهي على تصرفاتچ ما ايصير ترة الناس ما تشتغل عندچ وسام استوچ متعاركة وياي اشبيچ ؟
- بلقيس : هسة انة الي طلعت غلطانة مو اكيد مثل كل مرة بلقيس الغلطانة لا اتخافون راح اولي واتخلصون مني عود ماكو ازعاج .
- امي : احچي مثل الاوادم خربطة لا اتربطين واعتذري لخوانچ ياله .
- وسام : عوفيهة يمة ما يحتاچ تعتذري.
- حسام : اذا هيچ راح اتعاملين بيت اعيالچ فمن الافضل تبقين بلة عرس ولا اتفشلينة وايگولون ابوي ما عرف ايربي .
من سمعتة هيچ حچ جبتة براجدي ودفعتة طلعتة برة الغرفة بس لزم ادية ولواهم حسيتهم راح يتكسرون دفعة وسام وصار حاجوز بينة
- حسام : ولك هاي ما عدهة تربية خليني اربيهة .
- بلقيس : احسن منك مرباية يا حقير يا نذل كل مرة ايگلي وسام هذا چلب ما اصدگ بس هسة عرفت حچية صدگ .
- امي : ولكم بس خل يجي ابوكم وانة اعلمكم .
- حسام : ما اشوفين بنتچ ما اتگليلي يا ست بلقيس ليش ضايجة من العرس خاف امصاحبة واحد ومقهورة ما تردين تزوجين حمد گولي عاشگة يا زبالة .
- بلقيس : انة هيچ تحچي وياي يا حسام ولك ما يسوة التعب عليك حسافة يوم من الايام گتلك خوية .
دخلت للغرفة وقفلت الباب انسام ضلت ادگ بالباب طفيت الضوة وگتلهم ارد انام عوفوني
چانت ادموعي وحدهم تنزل كلهة ما اتريدني لا امي ولا حتة اخواني لا وحسام يتهمني بشرفي الحقير
وسام ايباوعلة وساكت وامي هم الله كريم
اسمع دگ الباب
- انسام : بلقيس فتحي الباب حسام ما يقصد صدگيني والله ما ادري عذريتي هم انة مقهورة عليچ لان راح اتروحين فتحي الباب .
ما فتحت الباب ما اريدهة اشوفني وانة ابچي اكرهة احد ايشفق علية وانة ابچي .. مرات الانسان ايكون قوي وايضم ادموعة وايكابر بس من تنجمع علية المشاكل ولكل شخص حدود للصبر اذا اتعدت راح ينفجر من البچي
من گد ما بچيت نمت بالگاع ما اگدر اتحرك من صداع فزيت على دگ الباب صوتي رايح ما اگدر حتة ارد اكو ضوة مال برة امبينة منهة الساعة ١٢ واشوي
جسمي متكسر من نومت الگاع .. گمت شغلت الضوة باوعت على وجهي مورم من البچي
- بابة : بلقيس بابة فتحي الباب ارد احچي وياچ .
ما اريد احچي وية بابة لان بس هوة بقالي ما اريد اخسرة هم هوة خليني ما افتح الباب احسن شربت ماي وگتلة
- بلقيس : بابة ارد انام باجر نحچي لا اتخاف علي مابية شي.
- اشبي صوتچ اكو احد امضوجچ؟
- لا محد مضوجني بس لان جنت نايمة وفزيت .
- على راحتچ نامي يا بعد ابوچ .
رجعت نمت فزيت بالتسعة على صوت الحركة برة غرفتي .
جسمي وراسي يوجعني عدلت شعري اشلون ما كان ونزلت
انسام شافتني ركضت علية وشبگتني ابتسمت بوجهة
- اسفة البارحة طگيتچ اتحمليني بس هل كم يوم انتي تدرين ما عندي احد بالبيت اگدر اشكيلة بس انتي اتفهميني .
- والله ادري بيچ انتي ضايجة لان راح تزوجين حمد ومجبورة علية ميخالف ما اضوج منچ انتي لا اتنقهرين من اخواني وامي ترة ايريدون مصلحتچ.
- اي كلهة اتريد مصلحتي لهل سبب الكل ايبزني بالحچي اصلاً محد ايهمني بعد .
- بابة البارحة سال عليچ گالتة مامة نايمة من وكت استغرب وتاناچ اتگعدين ماكو خطية ايگول بلقيس بيهة شي ما اعرف ليش احسهة ما مرتاحة .
- اصلاً بس علمود بابة قبلت والله امشي .
- خالة سليمة عدنة غسلي وجهچ اعيونچ مورمة من البچي .
- لا ما چنت ابچي بس لان نمت اهواي .
صعدت للحمام الفوگ غسلت وجهي ونزلت سلمت وانة ابتسم
- بلقيس : صباح الخير .
- الكل : صباح النور .
- سليمة. : هلة بعروستنة المتنبلة ولچ اليوم نيشانچ وهسة گاعدة !
- بلقيس: والله تعبانة البارحة نضفنة البيت وهلكت نمت على وجهي من التعب .
- هديل : خالة نادية گالت لمي ما راح تروحين للصالون عود ليش؟
- بلقيس : لان عادت اهل العمارة تختلف عنة لازم العروس بالعرس اتمكيچ مو بالنيشان .
- سليمة : اي عمي وصارت تعرف عاداتهم وتقاليدهم ماعرفناچ هاي بلقيس لو غيرهة.
ضحكت مجاملة دخل حسام ما يدري گاعدة من شافني دنگ وحچة وية امي اموصيتة على ثلج يمكن وجايبة عفتهم يحچون رحت سويتلي گهوة اصحصح بيهة .
صبيت بفنجان اجتي امي
- اتريگي لا اشربين گهوة.
عفتهة ودخلت چني ما اسمعهة صعدت لغرفتي طلعت اهدوم مرتبة وعندي دشداشة اشتريهة من خالة سليمة من الكويت كلش حلوة لبستهة ومشطت شعري وضفرتة راخي علمود اشسورة بعدين وعزلت الغرفة
البيت كلة نضيف من البارحة چانو مجمعين بالهول من نزلت شفتهم مجيد گاعد بصف وسام ويضحكون ويمهم وسام وهديل وانسام وامي وخالة سليمة بابة وعمو ابو مجيد گاعد باوعتلهم بابتسامة سلمت على عمو ابو مجيد و گعدت يم بابة الي شبگني وباسني من راسي
عمو ابو مجيد : ها خوية ابو وسام شكلك ندمان راح تنطي بنيتك ؟
- ابوي : بلقيس اعز بزري حتلو ايزعلون البقية لچن هية الهة معزة بگلبي تختلف عن الكل .
- سليمة : يا خوي كل البنيات تالي ايعرسن .
————-
En.Zahraa
——-