سلطان صعدت للسطح وانا الدنية تفتر بية رفعت راسي للسمة اشكي حالي لربي الي من بداية شبتي ما شفت بس المرار وكل ما اگول ارتاحيت تطلع لي سالفة شكل ...
يارب ضاگت ومنك الفرج تعبت من وين احصلهة من اهلي الي باعوني لو من الناس الي طلع علية وعلى مرتي حچي لو من هذا النجس الي ايريد بلقيس ...
اخذت نفس وحسيت على ايد ربتد على جتفي درت وچان الگة محسن واگف
- ها خوية شمالك حسبة اتجيبك وحسبة اتوديك اذا على موضوع بتك باجر احنة رادين للديرة لا تنغث يا بعد اخوك ..
- سلطان : يا محسن انت اجي تحچي انا طايح بمصيبة چبيرة وبنتي راح اتروح من ايدي.
- محسن : افة شنهي هاي المصيبة الي خلت سلطان عاجز عاد انت ابو عگل الچبير تعال اگعد سوالف الي .
گعدت على مندر محسن واطلعت جگرة وشغلتهة
- سلطان : انت تعرف سبب جيت عزام الي ؟
- محسن : لا يا خوي بس سمعت صارت مشكلة بينة وبين حاتم و الي فهمتة انت السبب .
- سلطان : اذا هوة اخوي ابن امي وابوي باعني علمود گيعان و بساتين شترجة من الغرب .
- محسن : ايولي هذا هسة سولف الي شنهي الي مكدرك وشبيهة بلقيس؟
- سلطان : اكو رفيق شاف بلقيس و رادهة واجة خطبهة واحنة ماقبلنة بس هذا اتسودن اشلون رفضانة و ظل يفتر وراهة بكل مكان الى ان هددنة اذا ما نوافق راح ياخذهة غصب انة ما بقيت احد ما وسطتة ما فاد ..
بس واحد نصحني گال هذا اخو شيخ عشيرة وخلي شيخ عشيرتك يحچي ويا ويردة فتصلت بعزام رغم انة حالف ما اذل روحي الة ولا افتح باب الصلح بينة بس لخاطر بنتي ذليت روحي وهوة هم ما قصر اجة وصار بين الرفيق وعزام كلام خشن الى ان وصلنة لمرحلة اتفاق وهية انو بلقيس اتريد ابن عمهة وراح تزوجة وگال الرفيق ميخالف بس اذا ما ازوجت ارد اخذهة وافقنة گلنة بلكي تجي عليهة قسمة واتروح لحال سبيلهة .
- اي وشصار هسة اذا انحل الموضوع؟!
- هسة من ردت اودي بلقيس لبيت خالتهة شفت الرفيق نفسة يم بابهم وشافهة واجة عليهة بس هية من خوفهة صعدت بسيارة وردينة بسرعة للبيت واكيد هذا هسة ايجي علينة بأي وكت .
- ما عندك حل غير ازوجهة لبن عمهة والة ياخذهة هذا.
- ازوجهة المن لود حاتم وهية عدهة استعداد تشرب دمهم لو المن .
قطع كلامنة تدخل حمد الي استغربنة اشلون سمع حچينة
- حمد : عمي راح اگول انا ابن عمهة وهاي مرتي واحل المشكلة .
- سلطان : بوية هذول ما يتوط وياهم واذا گلك شنو الشي الي يثبت زواجك شراح اتگول؟
- حمد : امهر على بلقيس الصبح وانطي العقد .
- محسن : نصي صوتك لا اسمعك مرتك واسوينة فضيحة واشلون تمهر على البت وهية ما هاويتك؟
- حمد : انة گلت امهر عليهة ما گلت اتزوجهة .
- محسن : شنهي الفرق ؟!
- سلطان : بلقيس مراح تقبل .
- حمد : شوف عمي ما عندك حلول هواي اذا عدة اليوم على خير من باچر اطلع بلقيس على الكويت هذا واحد واذا اجاكم الرفيق هسة امة تنطيهة الة ويزوجهة او اگول هاي مرتي وهية بس مهر على ورق شني اتگول.
- محسن : انا اشوف حچي حمد صحيح .
- سلطان : حمد شني اليضمن اذا مهرت عليهة بعدين اطلگهة وانت من الاساس هاويهة ورايدهة.
- حمد : انا ما انكر يا عمي انا هاوي بلقيس بنتك بس مو انة الي اجبر حرمة علية بدون رضاتهة واذا گالت الي ماريدك لو شما ايصر ما اريدة عسة لو ادوس على گبلي .
- سلطان : انت يا حمد ما طالع على عزام انت طالع على جدك الشيخ حمد الله ايرحمة ويغفرلة .
- حمد : لا تكدر يا عم ترة محد خسرك بس عشيرتك واولهم ابوي الي ما لتفين حولة بس الثعالب .
- محسن : عوفونة من هذا الحچي هسة شراح اسون؟
- سلطان : انة من راي حمد اذا طلع الصبح اشردهة واذا لا سامح الله ......
سمعنة دگت الباب بصوت ايخوف گمزت من مكاني
حمد : عمي منو جايك هيچ وكد
- سلطان : اكيد هوة حمد بوية اتكل عليك.
نزلنة وفتحنة الباب ودخل يتوعد وايحذر الواضح شارب بس من گلة حمد بلقيس مرتي نز ( انصدم) واكيد ما صدگ فطلب العقد مال زواج رد علي حمد
- احنة خطار جاين بيت عمي والعقد مو عدنة حاليين بالعمارة .
- انتو اضحكون علي انة سألت گالو بلقيس ما مزوجة.
- اذا ما اصدگ تعال عگب باجر واشوف العقد وبيا تاريخ .
- ماشي اذا اجيت ومالگيت بلقيس الة اكنسكم كلكم بالسجن واضح لو لا .
- انشاللله.
طلع من البيت انة انتچيت على الحايط محتار صح خلصت من هذا الرفيق بالوقت الراهن بس شيقنع بلقيس بالموافقة على المهر واشوي وچان تجي نادية وبلقيس مثل العاصفة
نادية : يابو وسام شنو هذا الحچي انا ما فهمت شي ؟
- بلقيس : انة الي ما فهمت ممكن احد يفهمني من چذبتو هيچ چذبة ما فكرتو راح يسأل على العقد هسة اشلون اتحلوهة بلة زحمة؟؟
- سلطان : باچر اتعقدين على حمد بدون فكرنة بهذا الموضوع.
- بلقيس : شنو شنو انة ازوج حمد ؟
- محسن : على كيفچ بوية احنة ما گلنة تزوجي گلنة تمهرين علية تعالو دخلو جوة بس احنة باب واگفين نتحچة !
بلقيس : ما ردت استعجل مثل كل مرة واصيح وايگولون ما عدهة اخلاق ردت احد ايبررلي گلت ايجوز هاي چذبة بس ابوي اكدهة من گال باچر اتعقدون خفت كلش خفت لان سمعت حچي الرفيق اذا ما نعقد راح ايأذرن كل اهلي واكيد هذا الي رادة استاذ حمد واكثر شخص فرح بالموضوع هوة
دخلنة جوة ونزلت خولة اتباوع علينة وعلامات الاستغراب على وجهة الواضح ما تدري رجلهة باجر يمهر علي سمعت دگت الباب ردت اطلع ماخلني حمد
- رجعي وين رايحة انا افتح الباب.
- والله بطران انت افتح الباب ياهو الكاضك.
دخلت للدوانية وگعدت اگبال ابوي
- بلقيس : اي بابة سولف اشلون تقبل تربطني بحمد وانت تعرف تدري بية انة رافضة موضوع الزوج كلة تجي تربطني بأبن عزام هاي المرجية منك.
- محسن : يا بعد ابوچ افهمي السالفة بالاول وبعدين احچي وتراه عيب اتگولين على عمچ عزام هاي اكثر من مرة اسمعه منچ.
- بلقيس : عمي انا وين وانتو وين
دخل وسام وحسام وحمد ومرتة ورى الواضح رادهة تصعد بس هية ما قبلت
صاح وسام والابتسامة على وجهة
- مساكم الله بالخير.
من شافني گاعدة وراسي مشدود وسمع اخر حچي حچيتة طارت ابتسامتة وگال
- وسام : سلامتچ بلقيس خير شصاير ليش راسچ مشدود.
- بلقيس : ياريتني ميتة وخلصنة من هل الحياة ولك وسام والله تعبت .
- وسام : بلقيس مو فورتي دمي احچي منو وياچ؟
- بلقيس : الرفيق رجع ..
- محسن: بوية خولة روحي فوگ عدنة موضوع انريد نحچي بي.
- خولة : عليش عمي ما اتريدني اسمع فضايح بتكم ؟
هوة انا منهارة وهاي تمسلت لا صدگ وصلت حدهة گمت ودفعتهة بكل قوتي طاحت بالگع گعدت على بطنهةوحطيت ادية على رگبتهة وخنگتهة بكل قوتي
- بلقيس : شوفي يبت حاتم اذا اسمع صوت الچ مرة ثانية والله اموتچ خلاص انة حذرتچ مساع بس الواضح انتي ما تفتهمين بالحچي و اللسانچ اتحطي بحلگچ وما اطلعي ..
سحبني حسام وسام منهة ردت اموتهة ضلت اتباوعلي مرعوبة واتكح لان خنگتهة
- حسام عوفني عليهة هاي الحيوانة حسبالهة انا اگليلت شر دعوفني حبيبتي ايردون ايطلعوچ لان ما ايريدونچ اسمعين ..
باجر راح ايخلوني امهر على رجلچ .
- خولة : يبووووي يبووووي حمد جبتني علمود اشوف عرسك .
- حمد : اصريخ لا اصرخين وصوت ما اسمع ولا اكو عرس ولا بطيخ امشي صعدي فوگ لا ورح جدي اسحلج من شعرج وروك بطنچ روك .
- وسام : شنو السالفة محد ايفهمنة شنو زواج شنو حمد يمهر على بلقيس هو ابكيفكم انتو اتلعبون .
- سلطان : طبعاً ما تدري اذا حضرتك شوف بيش الساعة راجع للبيت وين تدري شنو الصار الرفيق رجع راد ياخذ اختك حمد وكف بوجهة وگالة هاي مرتي اشلون تزوجهة هذاك ما صدگ فگال اريد عقد الزواج فباچر لازم نهر الهم.
- وسام : لا انتو اكيد اتشاقون شنو تمهرون وبعدين حمد اشلون اتگول هاي مرتي .
- حسام : وسام انطي مجاي خلي نفهم شنو الموضوع ما ايصير كلشي بالصياح .
- وسام : اشلون ما اصيح وباجر ايريدون ايمهرولهة بلقيس انتي موافقة؟!
- بلقيس : وسام اشبيك اشلون اوافق.!
- حمد : عمي هوة مهر بس لا عرس ولا بطيخ الى ان يهدة الوضع وكلمن ايروح بسبيلة .
- بلقيس : وشنو الشي الي يضمن كلمن ايروح بسبلة ها .
- حمد : افة يبت عمي انة رجال والرجال عند احچايتة ليمتة ما عمي سلطان ايگلي طلك اطلگ وهذا وعد ارجال لا تكدرين وتضوجين انة ما اغصبج على شي.
- حسام : هذا خوش حچي بس اذا انت گال مزوچ بلقيس اشلون راح تمهر باجر وتاريخ العقد شراح اسوي بي؟
- حمد : بوية هاي سالفة سهلة انشوف سيد ونشرحلة وضعة وانگلة مسألة حياة وموت اكيد يتعاطف والشهود همة عمي سلطان وانت يا وسام .
- سلطان : بوية حمد ما نعرف اشلون انشكرك على وگفتك ويانة لو ما انت چان بلقيس هسة عند هذا الردي.
- حمد : افة عمي بلقيس بنت عمي وعرضي اشلون اقبلهة احد يتمادة على عرضي وداعتك يا عمي لو مو رفيق چان كتلتة وخلصتكم منة بس اذا كتلتة راح ايكتلونة كلنة .
- وسام : انة اسف خوية حمد صيحت عليك.
- حمد : حقك خوية هاي اختك.
- بلقيس : اعذرني حمد اذا صيحت عليك وانت هم عمي اترخص اريد ارتاح.
صعدت فوگ اتمددت بفراشي وغطيت راسي مختنگة حيل ادموعي وحدهم ظلو ايصبن بدون صوت حسيت امي گعدت يم راسي اسمع صوت بجيهة رفعت الغطة وكتلهة
- ليش تبچين يمة ترة والله مدود حيلي ومابية اتحمل شوفت ادموعچ
- ابچي عليچ الي حالچ حال امچ من شبيت خلصت شبتي بس مشاكل الى ان ازوجت ابوچ گلت ارتاحيت سلطان راح ايعوضني وسلطان ما قصر لكن قمن زواجنة چان خساتة اهلة و منذك وكت لهذا وكت متعذبة هسة انتي يا يمة مثل امچ جبتية من ونة لونة .
- يمة نامي يمي تعبانة
اتمددت امي ابصفي ادنيت شبگتهة مباشرة نمت فتحت اعيوني على ضوة الشمس كلهم گاعدين باقية بس انا على السطح گمت لميت افراشي ونزلت اول ما نزلت امي گالت
روحي بدلي علمود ترحين وية ابوج وحمد للسيد يعقد الكم.
رجعت صعدت دگيت الباب بغرفتي چانت بس خولة بالغرفة
دخلت هية تخزر بية طلعت تنورة وقميص
- خولة : اي هسة ارتاحيتي من لفيتي على الرجال واخذتي يالي ما تخفين اللله ما اتگولين مزوج وعدة جهال.
- بلقيس : اتعرفين لو ما حمد ابن عزام چان قبلت بي بس علمود اغثچ يبت حاتم اه لو بيدي احركم كلكم .
- خولة : ماعندچ اخلاك حاتم عمچ اشلون اتگوليلة حاتم.
- بلقيس : عمة العمتچ وعمتة انا ما عندي عمام خوش لو مو خوش لو تودين ادوس بطنچ مثل البارحة .
عفتهة وطلعت من الغرفة صار بوجهي حمد ردت اعبر
لزم جتفي وگال
- صح انة حبيتچ من كل گلبي بس يابت عمي اذا انت ما هويتني ما جبرج على شي وحسبي هل زواج كانو ما صار ولا تكدرين وحتة للوادم لا تگولين صدگيني سويت هل شي بس لجل مصلحتچ.
- تسلم واسفة اذا اتماديت البارحة وياك اعذرني اعصابي تعبانة .
- معذورة.
عافني ودخل نزلت للحمام بدلت ولفيت شعري اشلون ما كان وگعدت انتظر حمد وسام نزلو طلعنة صديق بابة قرايبة شيخ وشرحلة الموضوع وقبل ايسوي العقد النة رجعنة للبيت لگينة خولة باب لامه غراضهة وگاعدة انا ما هتميت عفتهة ودخلت وهية وگفت على حمد الة ايرجعهة وصدگ ورة ساعة ودو علية گالو عمچ محسن ايريد ايسلم عليچ.
نزلت گال
- الله وياج بوية ديري باج على روحچ وانشالله ربچ ايعوضچ خير لا تكدرين يابعد عمچ انة اترخص .
- بلقيس : عمو عيد الزيارة لا تگطع جيتك .
- محسن : اشلون اگطع جيتي بخوي والله انة حاسبة ما يريدنة بس من گال حمد يسأل عليكم طلبت منة ايجبني ويا بعد اندليتكم بين فترة وفتر اجيكم .
- سلطان : كل الهلة بيك وجيتك ما تعرف اشگد فرحتني وانت بوية حمد لا تگطع.
- حمد : انشالله
حمد : چنت اتمنى اتگلي تعال لا تگطع بس اكتفت بسكوت الحمد لله على الاقل من اباوع عليهة مو حرام ولا احس اتعدة على عرض عمي ..
اتوادعنا وصعدت بالسيارة خولة صاعدة قبلي ومادة البوز عفتهة ما حجيت حمزة گلبة على گلب ابو بقة مچلب بلقيس وهية شبگتة ريحتهة بعدهة امچلبة بياشم بيهة بسيارة واضحك من اذكر حچيهة وية خولة اتگلهة چنچ وحدة اتبيع روبة والاقوة چنت عبالي هادية وما ادور عرايك بس من هجمت على خولة صارت ذيچ مثل الدجاجة جواهة وخلتهة تخنس ...
اه يا بلقيس ليتچ ترضين بية ليش كل هل كره الي شني ذنبي بالي سواه ابوي ماعرف الطريق كلة حسبة تاخذني وحسبة اجيبني وگفنة لان حمزة راد ايروح لحماملزمني عمي حمد وگالي
- شوف بوية خولة اكيد راح اتروح اتگل لهلهة واسوي مشاكل علمود مهرك على بلقيس شنو راح اتگول؟
- مراح اگول شي وخاصة موضوع الرفيق اذا حچيتة راح يتهموهة على انة عدهة علاقة بي .
- اي يا بعد عمك هو انا ردت اتأكد منك .
- راح اگول البت من اول ما شفتهة عجبتني وردتهة وادري بأبوي ما يقبل فأخذت عمي محسن يخطبهة الي .
- خوش حچي ابوك مو يعرف بالسالفة؟
- اي اگلة بس مو بالبداية خاف ايگول لعمي حاتم ... لو بس اعرف سبب سكوت ابوي على عمي حاتم چانة بخير..
اصعد اجت الغضب بتة .
- يابوي اعدل ما بين گلبك وعگلك ترة خولة عندك اولاد منهة .
- يا عمي غير يبقة عگل علمود اعدل بي .
- شكلة عشگك مثل عشگ عمك سلطان.
صعدنة بالسيارة ورجع الهدوء من وصلنة للعمارة گالت
خولة
ذبني على بيت اهلي .
محسن : عمي ماهو اول واحد يتزوج ولا اخر واحد عليش اتهجمين بيتچ.
- حمد : خالهة يا عمي اتروح ترتاح تعبانة انة مراح احسبهة زعلانة حمزة بوية انت تجي وياي .
- حمزة : صار .
- خولة : لا حمزة يروح وياي.
- حمزة : انة ما ارتاح بيت خوالي اريد اروح لبيتنة.
- خولة : طبگ طوب كونك ما رديت .
- حمزة: يمة عليش ما تعلمين من عمة بلقيس اشواي من تتتحچة عندهة اسلوب و اتخلي الكل ايحبهة..
- حمد : ولك اسكت لا اتعم على روحك😂.
- خولة : حتة انتة يبن بطني صفيت وية مرت ابوك علي .
- حمزة : شني مرت ابوي ؟
- حمد : مالك غرض بمك هاي تهذري ( حچي مالة معنة) .
- خولة : انة الي اهذري بسيطة يا حمد وحگ هو علي الي اخلي ابوي يلعب جولة بيكم .
- حمد : خولة توزنين كلامچ لا تحسفين بعدين علية.
- خولة انة اتحسف ايكون اكتل روحي اذا رديتلك.
- حمد : الله كريم يالة نزلي هذا بيت اهلچ ومثل ما گتلچ اذا اصير مشاكل اتحلمين اردچ مرة الي فاهمة.
نزلت وسدت الباب وعمي محسن هم نزل بعد ما سلم علي وگالي اهدة اشوي وانة رحت للقصر انا وحمزة ..
حمزة هو الطفل الي اكبر من عمرة الي احس بي زلمة مو طفل على رغم صغر سنة ...
من چنت اروح للديوان اخذة وياي ومن نرجع چنت اناقشنة بالمواضيع الي اصير يعجبني ردة دائماً گلبة على گلبي سعد بعدة اصغير بس امبين علية طالع على خوالة .
- حمزة بوية اشمالك تكدرت؟
- بوية صدگ تزوجت عمتي بلقيس؟
- اي بوية صدگ.
- اشلون تزوجتهة وهية ما تهواك ولا تريدك واشلون قبلو وانت لا جايب جدي ولا عمامي للخطبة؟
- وعلي انت يا حمزة اذا صرت شيخ الة اتخرب على كل حلك والي قبلهم شوف بوية اكو مرات ضروف اتخليك تنجبر اسوي اشياء مو ابراتك وعمتك بلقيس مرت بهل ضروف فقبلت تزوجني وانا لجل اساعدهة هم وافقت بهل زواج بس يا حمزة هذا الحچي سر بيني وبينك ما اريد احد يعرف بي ولا حتى تحچي وية روحك واضح يا بعد ابوك؟
- انت اتحب عمة بلقيس بس هية ما اتحبك .
- اشلون عرفت انت؟!
- انت دوم اتباوع عليهة وين ما تروح وين ما تگعد بس هية ابد ما تهتم بوجودك ومن الاصل تتحاشة الاماكن الي انت بيهة.
- والله بس انت تفتهمني يا بعد ابوك شسوي اذا هية ما هاويتني شني فايدة الزواج انزل يا بعد ابوك ما اريد احد يدري بالحجي الي بينة خليك ساكت واي شي يسألوك گول ما عرف خوش.
- تامر بوية
نزلنة تلگونة زلام ابوي باوعت اكو هوسة بالديوان استغربت صح انا ما اروح للديوان من فترة بس شني الصاير دخلت حمزة ورجعت للديوان سلمت ودخلت
- الله بالخير .
الكل : الله بالخير شيخ.
- عزام والفرحة على وجهة من جيت حمد للديوان : حمد لله على سلامتك بيوة تعال جاري .
حمد ما ردت افشل ابوي اگبال الناس گعدت يمة
- حمد : سلامات شني الصاير اشوفكم مخبوصين؟!
- حاتم : عمي صايرة طلابة بين ولدنة وية بيت لويلو ( البو عبود حالين) .
- ليش واشعجب اهمة ما يتعدون علينة ولا احنة نتعدة عليهم!
- حاتم : شوف يا شيخ عزام انة اريد حگ و ابني الي انطگ منهم غدر واذا ما تاخذة مهم ايصير الحچي ماهو بزين .
- حمد : عمي اهدة اشواي خلنة نفهم الموضوع بهداي وين ابنك خلي ايفهني وانا احلهة وياهم واجيبلك حگك مربع واخذ هل حچاية من هل شارب لچن اذا كان الك حگ واذا ابنك يا عمي الغلطان ليكون اهينة اگبال الكل مو اتگول حمد ما گال .
جاي احچي ودخلو شيخ بيت لويلو وابنة ايصير رفيجي ويامة ماكل وشارب بيتهم گمت سلمت عليهم
وبعدهة الكل گعد
- شيخهم : انا جاي اهنا يابو حمد وعندي حگ عدكم ولو ما معزت حمد عندي الة اسويهة طلابة چبيرة عبن ابنكم تعدة علينة و ايريد طلاب .
——————-
مو تنسون التعليق والنجمة
واعذروني على الاخطاء جاي انزل بلة تدقيق
En.Zahraa