#للجميلات_حصراً

#للجميلات_حصراً ٢٥

السلام عليكم
متابعه حلوه اتمنالكم
🌺🌹🌺🌹🌺🌹🌺🌹🌺🌹

#للجميلات_حصراً.   ٢٥
#زينب_الموسوي

ندى
ال اووووف لو تغير اسمها ... تختار اسمي ... والاه شكلي
والحظ في خصومه دائمه ويايه

استهلينا العمليات لجهاد بعمليه .. ل استبدال شراين متضخمه والنزف بيها متحول لنزف خارجي ... وهذا الي مسبب انتفاخ الرجل والصعوبه في استخدامها والوقوف والمشي
قبلها. بيوم  ... طلعنا اني وياه للمستشفى بعد مااحضرت حقيبه صغيره اله بيها احتياجاته .. وحقيبه ثانيه لبنتي نور ... السكوت  متخذه وسيله للتعبير عن قلقه وخوفه ..،
واني ماحبيت اكسر هالخوف  واضايقه .. وصلنا  للمركز صحي ثاني يختلف عن المستشفى الي اجرينا بيها الفحوصات ...
والمركز يدار من اربعة اطباء  محترفين بهذي  العمليات  ...
دخلت وياه الغرفه الاوليه ... حضرت ممرضه صغيره بيضاء وجهها مبتسم كانها ملاك .. اعطتني ملابس العمليه ...
حتى اساعده يغير  وهوه جالس على كرسي  والكابه مسيطره عليه

: يله جهاد حبيبي توكل بالله
نتر الصدريه نتر من ايدي

: بلا حبيبي وهالسوالف اني مو طفل
سكتت عنه وخليت ابالي التوتر الي هوه بيه
: اطلعي اريد اغير ملابسي
: اساعدك خليني 

رفض وهو  ينزع
اديه ترجف وهوه يفتح الازرار
اجيت يمه
فتحتهم اني اله ولبسته الزي للعمليات ... دنگ راسه  وتنهد

: ندى تحمليني  ترى اني ماادري شلون متحمل نفسي

بوسته بخده
: ولايهمك  عيوني انت ...
وحاول شويه تهدا وتسترخي العمليه بالرجل  ومابيها خطوره
صح مؤذيه وتاخذ وقت  لكن المهم النتيجه   ... تفائل شويه ها
: متفائل  ... انطيني نور

عمر نور كان تلث اشهر  ... اخذها بايديه وباسها  مرتين وتلاثه  ورجعها

: ديري بالج عليها  
: واني شعندي غيرها هيه وابوها

انطرق الباب ودخل الدكتور ( ميرد )  مبتسم  ويحمل جهاز  صغير  لقياس الضغط  سلم

: هلوووو  مستعد جورج
رد وعيونه عليه

؛ مستعد

قاس ضعطه  وگله
: شويه مرتفع  استرخي العمليه بسيطه

دخلت ممرضه تدفع كرسي وتحول جهاد  على كرسي ودفعته الممرضه ... اني شايله نور وهوه لازم ايدها ... للباب وگفتني الممرضه

: سيدتي هذي غرفة العمليات
ممكن ترجعين ...
نظرته وهو يبوس ايد نور ... ونصيت بسته براسه ... ودفعته الممرضه للداخل ... نفتح الباب مجرد رؤيه الغرفه والاجهزه والاطباء يستعدون صابني بالفزع ...
نسدت الباب ... ونفتحت دموعي ... بالممر مكتوب يمنع  الجلوس هنا
وقطعه تمنع الاكل والشرب .. ونور محتاجه  حليب
طلعت لصاله ثانيه فيها عدد من الناس تنتظر ايضا ... جلست مقابل الباب ونور انطيتها الممه ترضع وعيني على الباب ومركزه بالوجوه يمكن المح واحد من الي شفتهم دخلوا وياه ...
الوقت  يتبارز ويايه بسيف  قاتل ...كل ساعه كل فتحة باب
ترفع ضغطي وتنزله ... نامت نور  وخليتها بعربتها ... وراحت ناس ... وتبدلت بناس ثانيه تنتظر ... واني گاعده ... القران بيدي ... واقرا سوره بعد سوره
ومازلت انتظر .. غفيت على الكرسي ...من ارهاق التفكير
وسمعت صوت فتاة
: سيدتي  سيدتي الاطباء خلصوا اليوم 
فزيت ...
: خلصوا اليوم شنو 

شرحت اليه قصدها

: عملية اليوم خلصت تگدرين تفتهمين اكثر من الدكتور
واشرتلي عليه واگف بالممر ينتظر يفهمني
تركت بنتي بمكانها ... ورحت عند الدكتور
استقبلني بابتسامه
واني على وشك انهار بالارض

: دكتور شنو اخبار العمليه

جاوبني بصوت هاديء واثق من كلامه
: العمليه اليوم تلخصت باستبدال اورده دقيقه جدا  وهذا يحتاج وقت وجهد اضافه الى ان خبير الاعصاب  بكرى  يبدي بعمليه ثانيه ... لذلك العمليه باقيه مفتوحه  وتبقى مفتوحه لعدة ايام لحد تخلص عملياته
: يعني شگد يبقى وكيف يتحرك  كيف ياكل وكيف  يغسل

اطرق براسه  قبل لايجاوب
: عن طريق كيس خارجي ..
وميتحرك لحد نخلص .. الدكتور  ميگدر يقوم بكل هالعمل بيوم واحد الارهاق ياثر على الانجاز

هالكلام  مخبرونا بيه قبل هاليوم ...ومااعتقد جهاد  راح يتحمل ... الوضع ...
بقيت لحد الساعه بثمانيه بالليل اتوسل اشوفه .. ويردون عليه انتظري
وانتظر  ... بين تعب ... وتفكير .. وقلق .. الساعه ثمانيه وربع
سمحولي اشوفه  ... بدون ماادخل الطفله ويايه ...
شفته نايم  بعده مصاحي من البنج .. المغذي بايده وجهاز الاوكسجين  على وجهه ... والاجهزه حواليه ...  ورجليه مغطيها بشاش وقطن ...
واني اقترب منه ... الممرضه منعتني
: ممنوع الاقتراب واللمس

مرات نحتاج  ل اكثر من الدمع
يشرح هضمنا  والغصه بداخلنا
واني اكتفيت بالدمع ... الى ان وصلت لبيتي ... واذنت لنفسي
بالصراخ والبكاء حد فقدان القوه والحيل  .. مااعرفت النوم ولا الاكل  الا قليل من جزر  صغير موضوع بكيس 
صحيت اليوم الثاني  .. مجرد  بدلت لبنتي وحضرت احتياجاتها
واكلت شي بسيط من الجبن   وطلعت بسيارتي للمستشفى ... ونفس الحاله  عمليه وبنج وانتظار  ومن يطلعون الكادر الطبي يسمحولي
اشوفه  وهوه نايم  .. باليوم الرابع  مكان في عمليه لان ينتظرون خبير الاعصاب
وگدرت اشوفه ... دخلت لغرفته
مدد على سديه ... الضعف والهزال باين عليه .. وكيس الادرار والخروج بجانبه ..،
ويمكن هالشي الي خلاه يتعصب من شافني ...
: اطلعي ندى شعندج اهنا

: على كيفك جهاد  ان شاء الله مابقى الا القليل
تنهد بقوه  ودموعه ملت وجهه
مانعها تنزل 
: سنين من صارت الحادث
واني بين عمليات وتشوه   وجلد ينقطع من مكان وينزرع بمكان ..، وشرايين تنسد وشرايين تتغير .. الى متى  ؟... مكافي. ؟مخلصت ؟.. شنو الذنب وشلون اكفر عنه؟ ... يعني لو ميت قبل  سنين هوايه ارحم
: جهاد  ماكو داعي لكل هذا .. الدكتور گلك الطريق طويل .. ويحتاج وقت

رفع راسه قليل وصاح بيه

: فعلا الطريق طويل .. وبهذله
وانتي تبهذلتي هوايه ويايه ..، روحي ندى  وبعد لاترجعين روحي

مامسموحلي اقترب بس اقتربت

: شدتحجي انت لخاطر الله شنو اروح واتركك 
لمسته حتى ارجع راسه على السرير

زدادت عصبيته  وصاح  والممرضات دخلوا

: روحي داگلج مااريد تشوفيني
روحي ربي بنتج .. وكملي دراستج .. وحصلي شغل محترم لاتربيها على المساعدات
واتركيني اهنا اذا متت راح تعرفين واذا عشت  اني اجيج

اقتربت منه اكثر والممرضات يمنعني 
صرخ
: اطلعي برى اتركيني والله اذا شفتج اهنا اطلكج  ... سمعتي اطلكج 
اطلعي ..
على صوته حضروا الاطباء   .. الممرضات  يدفعوني بطء  خارج الغرفه ... وهو داير وجهه عني 
حجيت وياه من بعيد ومن بين اديهن التدفعني

: جهاد راح اروح .. وابقى ادعيلك واصليلك .. واجي يوميه اسال عليك حتى لو يطردوني ابقى باب المستشفى

سحبتني الممرضه ... واني اگله
: الله وياك  جهاد  ... الله وياك وهذا كافي
انسدت الباب  ... وبقت الممرضه لازمتني وهيه تشوفني مهزوزه وابجي  وممرضه ثانيه جلبت كرسي وگعدت  ... اكمل بجي  ...
لمحت الدكتور .. ركضت وراه بالممر   استوقفته بصياحي

: دكتور شسويتوا  بزوجي ... نازل نص وزنه باربع ايام وعصبي وحالته النفسيه تعبانه
ليش مگلتوا عن هذي الاجراءات قبل العمليه على الاقل يكون مستعد لتقبل الوضع

نزع نظاراته وجاوبني

: الحقيقه  الصور والاشعه ماوضحت حجم الضرر  لحد فتحنا قدمه ... اكتشفنا مجموعه اورده  تالفه واستبدالها يكون دقيق
ضربت على رجليه بياس
: ويمتى تخلصون 
جاوبني متالم على حالتي

: نهايه الاسبوع باقل تقدير

: يعني بعد تلث ايام  ...
طيب انطوه مهدئات  مسكنات حتى يهدا

: هذا عملنا عزيزتي
انصرف من امامي ... صحت وراه
: دكتور  رجعلي رجلي حتى لو مثل مكان
ابتسم  وجاوب بثقه
: ارجعه احسن ماكان ....
ورجع  يمي ( اكتبي رقمي ... وفري على نفسج الزياره اليوميه )
: لا دكتور  مستحيل اتركه يوم

راح من يمي ... وبقيت باروقه المستشفى اجمع معلومات من كل ممرضه ودكتور ومريض
وسالت عنه ياكل
الممرضات جاوبوا ( عنيد مياكل الا القليل )
تركت المستشفى العصر ..،بسيارتي  دموعي تنزل واسوق  واحجي مع طفلتي الرضيعه
: نور ماما مااريدج تتربين بلا اب
ياربي خليه اليه بس يبقى ويايه حتى لو ظالم   حتى لو يكرهني
حتى لو مشوه  او معاق
يارب  لاتحرم بنتي من ابوها

وصلت للباب .. جارتي مكسيكيه
ماريا تنتظرني  تعرف بحالة  جهاد  عرفت من دموعي الالم الي عايشه جهاد

: كيفه جورج 
جاوبته بيأسي
: عايش  وبس
مسحت على راسي وهيه تنطيني
شمعه 
: شنو هذي ماريا
: هذي من الكنيسه .. اشعليها اليوم  لشفائه
شكرتها واخذت الشمعه ... مديت ايدي بصندوق البريد ... قائمة الكهرباء ... فتحتها بالباب انذار بالقطع ... والمبلغ ٢٠٠ متراكم .. ناسيه  ادفعها ..
اخذتها ورجعت للبنك سحبت من حسابي فلوس ودفعتها بالبنك ورجعت لبيتي ...
بالليل نامت نور   وطفيت الاضويه كلها حتى الثلاجه افصلها  عن الكهرباء  كم ساعه وارجعها ... ومااشتري حاجات كثيره  فقط للحاجه لان اني وحدي ... واكتفي بضوى واحد عند المساء ..

وبعيدا عن التفكير  بوضع جهاد
  بحديث مع النفس  وبتخطيط دافعه الخوف من المستقبل فكرت  بالقادم
زوجي احتمال  ان يكون غير قادر على العمل مره ثانيه ... وهذي امريكا تحتاج عمل  ومكانة فلوس تدفع  ومتسد الحاجات ...
واعرف نفسي مااگدر على شغل بهذله .. ولاا گدر اعتمد على الفلوس الي جمعناها من شغله وشغلي
لان هذي للمستقبل تاركيها ...
وفلوس المساعدات  مستحيل اعيش عليها ... بقى طريق واحد هوه الدراسه .. اكمل دراستي مهما تقسى الظروف .. واتخرج معلمه براتب ثابت شهريا ... وتامين صحي اليه ولبنتي ...ولزوجي

ومن الصبح ... حولت التفكير لخطوات عمليه ..، اتصلت بالجامعه القديمه وطلبت تحويل كردت الدروس لجامعه جديده في سان فرانسيسكو ...
وسجلت سمستر جديد ...
ورجعت للمستسفى اتقصى الاخبار ... عرفت بعد الاخصائي
مواصل ...
رجعت سجلت بنتي (بدي كير )
حضانه ... وطلعت لدائره الرعايه خبرتهم بدراستي وبتسجيل بنتي ... وعدتني الباحثه تنظر بامر زياده المساعدات اليه ...
وصار  مختصر يوميات هوه المستشفى ... نور  ... ودوام الجامعه ... تسديد الدفعات  .. وبنهايه اليوم اخذ نور  واتوجه للمستشفى ...
ابقى في مدخل قسم الجراحه ..، اوصي الممرضات يشوفوه ويطمنوني ... وكلهم يشكون من عصبيته وعناده بالاكل ... اخبرهم( اسالوه  اگدر اشوفه ) 
وانتظر جوابه وكل مره اتمنى يگلي (تعالي  سنديني واسندج
ونحضن جراحنا ونبعد الياس الي طوى گلوبنا طي السجل ) يرجعلي الجواب
( خلي تروح  )  مر شهر ونص  حسبتهم يوم يوم وشوغه شوغه
وصلت للمستشفى الساعه سته العصر   ... الممرضات صاروا يعرفوني ...
مجرد دخلت نادتني وحده منهن
: دكتور ميرد طلبج  لمكتبه
سمعت جملتها نزل دمي لرجليه .. ونشف ريگي واني اتقدم باتجاهه مكتبه فتحت الباب عيوني فارغه من التعابير
اشرلي ( اهدي  واگعدي )
گعدت مركزه على شوكت ينفتح حلكه ويحجي
: خلصت عمليات الاورده بنجاح
وبكرى الفجر ... عملية اعصاب
دقيقه جدا ومطمانين من النتيجه لان الدكتور هذا مياخذ حاله اذا ممتاكد من نجاحها

: وليش الفجر

جاوبني بساطه
: موعد وصول طائرة الخبير 
روحي ارتاحي ونشوفج باجر

نظرت للارضيه احسها ظلمت امامي  اصلا نسيت حاله اسمها راحه كيف تكون  وشنو احساسها .. وبالكرسي حسيت مابيه حيل اكوم وارجع الفجر
طلبت ابقى بالمستشفى

: دكتور  ممكن تخليني الليله هذي ابات بالمستشفى ... مستعده ادفع فلوس . بس ابات اهنا  ... لحد اطمئن على عمليته
مااگدر ارجع اسوق ايدي متطاوعني
هز راسه وگال ( بالتاكيد  راح اتدبر الامر مع الممرضات )

: وطلب ثاني منك... 

وگف حتى يسمع الطلب الثاني

: اخذ بنته يشوفها 
مديت ايدي وانطيته نور

استجاب لطلبي ... واخذ نور

مشيت خلفه
بقيت واگفه باب الغرفه من دخل 
الباب  مسدوده  واسمع صوته يبجي
مااتحملت فتحت  الباب ودخلت ابجي وياهم
كلشي بيه كان محتاج انسان يگله ( تهون  اصبر ) ويكابر ...
فتحت عيونه باصابعي  الي غمضهم من شافني ... وجثمت على رگبي يمه ...

: هانت ابو نور  وان شاء الله ترجعنا  واگف على رجليك 
اكتفى بالنظر  اليه دقايق  وتحسر  وبدا يشكي

: احس نفسي صرت ثگل على كلشي بالدنيا حتى هذا السرير
كرهني ... ظهري مااحس بيه انصهر مع حديد السرير ...

: اتحمل شويه  الفجر عمليتك
للاعصاب وبعدها يسدون العمليه .. وشويه شويه ترجع تمشي وتتحرك ...
وتتعافى .. ونرجع نتعارك اني وياك .. وتعتذر  وتگلي فتحي صفحه جديده
ابتسم وگلي ( ابو طبع مايغير طبعه )
: اتعودت عليك وعلى طباعك ... ومتتصور شگد مشتاقتلك  ... الدنيا  بلا ضوى بلياك 

مد ايده خلف ضهري  زاح بيها شگد هموم وخوف وشتات

: وين اكو مثلج انتي 
تحسر حيل
وكمل كلامه ويايه

:... هالربط بهذا السرير ..، خلاني افكر بيج
شگد تحملتي ومافد يوم شكيتي الا اليه 
: لان مالي غيرك ... حبيتك  واني مراهقه من خلف سياج يفصل بيتنا عن بيتكم  ...
غمض عيونه كانه تذكر السياج

: يمكن  اني كنت سعيد الحظ  بهالحب ...
وانتي تعيسه حظ

: كل واحد ياخذ نصيبه  ياجهاد
وماكو انسان سعيد او تعيس
الا بارادته ... وانت ارادتي   مهما تكون  ... فتحت عيني وسديتها عليك  ...
نزلت عند راسه  وبست خده
:( الله لايحرمني منك )

هدأ  وسالني عن احوالي وحجيتله عن الدراسه  واثنى عليه
بقيت عنده نص ساعه  ... غسلت اله وجه  ورگبته .. والممرضات استغلوا وجودي وانطوه عصير   ودعته على خير
وطلعت مع بنتي لسرير في غرفه
مابيها مرضى ..،
فتحت جنطة اتاكدت عندي حليب وحفاضات كافيه ..،
لليله ومجرد نامت نور ... توضيت وتوجهت بالصلاه والدعاء  بهذا الساعات الباقيه لعمليته ...
....................................
شذر

زادت  متاعبي  بهذي الحياه .. لدرجه .،، افتح عيني الصبح .. واشوف الضوى  وبين نفسي اگول ( هم يوم جديد بدا  )

نجيب عايش الدور الي رسمه اله المحامي ... ميشتغل گاعد بالبيت ... لان المحامي فهمه ان ممكن يصوروه  كدليل على عدم اعاقته .. ويراجع اطباء ...
وكل ميحددون موعد ( امراي  المفراس )  .. ياجله بحجة خايف ... وهذي تعليمات المحامي ايضا .. وثبتت الفحوصات عدم تاثرها بالوگعه
المحامي حول القضيه بادعاء الضرر النفسي
رغد  حالتها الصحيه متدهوره ..، واقترح عليها نجيب تاجر الشقه الي هيه مو ملكها
وانما الحكومه تدفعها الها ايجارها ..، واجرتها حتى تستفاد من الكاش ..، لان متگدر تعمل
وعاشت ويانا  ...
واني اداريها ... الادويه بمواعيد
زيارات المستشفى بمواعيد ...
ديار وحنين بالروضه اني اوصلهم واجيبهم ... واعتذر عن اي اجتماع او رحله  بسبب ضيق الوقت
الحكومه گطعت المساعدات الماليه عنا  بعد مطالبت نجيب بشغل  لان تقاريره تذكر الاصابه متاثر على شغله ولان الفندق نفسه عرض عليه عمل وهوه جالس ..، ورفض
والمصاريف  غرگانه بيها لوحدي ...
ماظل عندي وقت للخبز والالتزام مع الناس ..الا  القليل
الي ميكفي قائمة الغاز الي صارت تجي عاليه بعد ماطلعوني من البرنامج .. لكون المساعدات مقطوعه ... مراجعة للاطباء على صحتي وزني الي ينزل من التعب  ماغطاها التامين  بعتباره حاله غير مرضيه
ولمن انقطع التامين المراجعات القديمه طالبتني المستشفيات بتكاليفها

گعدت الصبح ... خليت الريوك للمرضى الي عندي ... وضايق صدري من وجودهم وقدرة التحمل صارت صفر .. منتظره بس جگه انفجر ... وجهزت الاطفال للروضه .. الجو بارد  .. اخذت المفتاح اشغل السياره قبل لااطلعهم ...،شغلتها  اشر ضوى البانزين  فارغ ...
دورت جيبوبي ماعندي فلوس .. طبيت للبيت شفت الجنطه كل الي عندي مع الخرده يصرون تلث دولارات
ماكو غير رغد ... جانت نايمه گعدتها
: رغد  محتاج عشر دولارات افول السياره

رفعت راسها ورجعت نامت وجاوبت
: ماعندي  ولا فلس البارحه رحت للصالون صبغت شعري بيها 
زهگت عليها  وعلى بطرها

: ولج وكت صبغ. انتي همين جان جبتي عصاره من الولمارت وصبغتي بيها 
: لاتصيحين من الصبح .. الجمعه استلم الشيك وانطيج

: ومنا للجمعه بشنو اوصل الجهال
: شوفي صديقاتج
: صديقاتي مللوا مني

اخذت ال ٣ دولارات  وصعدت الجهال ...وگفت محطة البانزين
واستحي انزل. واكول للعامل فولي بتلث دولارات 
وديار  يلح عليه ( انزلي ماما تاخرنا )
: حاضر  يمه نازله
دخلت للمحطه في ناس واگفه استحي احجي ... رحت بين النساتل  والعصير. واباوع شوكت يفرغ المكان ... انتظرت  وعيني على الاطفال بالسياره ... فرغت  المحطه
وتقدمت راسا خليت تلث دولارات على الميز گدامه .. وانطلقت الكلمات بسرعه
: شغلي رقم تسعه بتلث دولارات
ظل يباوع على الفلوس وعليه وجاوب
: اوكي
طلعت راسا شغلت البانزين ... واباوع على العداد  .. دولار اثنين
تلاثه توقف  العداد ...
ودخلت السياره .. وابتعدت بسرعه ...  وصلت للروضه بركت ... ونزلت الاطفال للصف وقعت ...وطلعت ...
وگفت السياره بارك الروضه
ورجعت مشي .. خايفه البانزين يخلص وشلون ارجعهم ... الجو بارد  الاطفال ميتحملون ومشيت عشرين دقيقه .. لدرجه احس رجليه جمدت ..، وجهي تمزق من البرد
وصلت لشقتي ... صحت على ام فقار جارتي  ...باوعت من البلكونه  واشرتلي اصعدي .. متگدر تطلع من البرد ...
صعدت رجليه  اجرها جر ...
فتحت الباب دخلت بلا كلمة تفضلي .. وانتجيت على القنفه الهث

جابت صينيه الريوك وگعدت يمي على القنفه وتسالني
: شبيج وين جنتي
: وصلت الجهال بالسياره ... وتركتها اهناك ماعندي فلوس بانزين
: صدك تحجين .. لاحول ولاقوة الا بالله .. ورجلج ماتحرك يدور على شغل
: على گعدته  ويتامر  االريوك عسل  والغدى  مفطح ...
: ههههه اه من سوالفج. ..

دغتني ( اكلي   ويايه )
اكلت  من التعب مااحس بطعم شنو الي خليته بحلگي
وبلا مااطلب فلوس  سألتني

:هسه شگد محتاجه

: الي تگدرين عليه  بين مااخبز  واوديه  للمحل يشتريه 

گامت لغرفتها

انطتني ٨٠ دولار ... شكرتها ...ونزلت
واستلمت العجن  والخبز لحد الساعه ... وحده الظهر ... طلعت اودي الخبز  رغد طالعه
ونجيب  بالمستشفى ماخذه صديقه ... طلعت مشي للمحل الي جان هوه يجي ياخذه  هسه
المحل صار بيد العمال
العامل  استقبلني باعذار
:  صاحب المحل  ماموجود  خليه اهنا  واذا  رجع  نتصل بيج

كل هذا التعب واخليه  ماقبلت
: لا راح اخذه لمعاميلي 
رحت امشي والاكياس بايدي ...
دخلت شارع الروضه  وگفت سياره يمي  باوعت بيها عزيز
فتح الزجاج وسلم 
:  الله يساعدج ام ديار  ليش تمشين

ارتبكت  وماحبيت  يعرف قصصي المإساويه

: ها  السياره اهناك عطلت

نزل من السياره وسالني
.. وليش. مااتصلتي بيه لو بجودي نسحبها ؟

: والله خجلانه منكم 

: شنو هالحجي  هذا من سافر جهاد  گتلج  ذمه برگبتج تحتاجين شي ومتگليلي .. اصعدي خليني اشوف السياره

صعدت وافكر  اذا نكشفت جذبتي شگول
وصلني للروضه ونزل للسياره بس خلها السويج  شغلها اشتغلت
صار  وجهي  لوحه فنيه بالاصفر والاحمر 
باوعني  نظرته تگول عرفني جذابه عرگت  رغم البرد
: مابيها شي السياره  بس بانزين مابيها
: يا  واني عبالي عاطله الحمد لله
دخلنا  اثنينا ناخذ الاطفال هوه اخذ ابنه واني اخذت جهالي
واجى عليه قبل لااحرك  .. فتحت  الشباك ..
: ها خويه اكو شي 
اشر على اكياس الخبز

: محتاج الخبز  هذا 

: اي تتدلل  اخذه گدامك
اخذه من السياره .. وطلع محفظته
؛ شدتسووي ترى مااخذ منك فلوس

ضحك  ورد عليه

: ليش فلوسي حرام ..، هذا تعبج
واني اريد الخبز
حسب الفلوس وخلاها بيد ديار
وراح لسيارته
طلعت بالسياره واني غاطه بالخجل .. وكارهه روحي وحياتي
لا عندي احد اعتمد عليه بالاطفال واشتغل ..، ولا عندي وقت مثل قبل للخبز
ومربوطه برجال  صرت من اشوفه اتحجب لان غريب عني بكل المعاني.. مااريده يشوف شعري  ،،، ورغد  نص عافيتها راحت وبعدها تصرف على الحمره والصبغ
ودي اصرخ صرخه تملي هذا العالم واكثر ... ودي اصحى الكى نفسي بغير عالم

مرت يومين ..، اجتي عليه ام فقار  هيه تشتغل بمطعم عربي مفتوح جديد
فتحت الباب  ودخلت
: تفضلي ام فقار  هلا بيج
: والله مستعجله بس گوليلي اكو احد يمج
: لا بس اني  ..الهيبه رايح مشيه يخطب لصاحبه لان تعرفين رجلي فريضه  الديوان 

ضحكت وضربتني على كتفي
: ههههه  الله يعلي مقامه
اكلج خلينا من رجلج الشيخ نجيب .. جايبتلج شغله حلوه وسهله وابيتج

: فدوه لعينج شنو هيه
: تعرفين المطعم الي اشتغل بيه رزقه على طلاب الجامعه المبتعثين من دول الخليج

: اي  واني شعليه
: ذولي يدورون الاكل العربي   يعني الكبسه .. والباميا  وكم اكله وياها  انتي تطبخين بالليل واخذهن اني ويايه للمطعم
ويحسب الج كاش الحكومه متدري

اجتني رحمه وانقاذ من ربي
وصرت اتشكر منها

: رحمه على والديج. الله يوفقج
انتي بس گولي شگد يردون واني حاضره
گامت بعجله وفتحت الباب وكالت

: اليوم بالليل ارجعلج الخبر واجيب المواد

الشغل اجى بوقته .. وبالليل كلهم نايمين اگدر اشتغل بكيفي
انشغل فكري .. وصار عندي حماس ...
وبرجعة نجيب  ... اختفى الحماس وهوه يخبرني فكرة اصدقائه حتى نرجع المساعدات
ويقنعني بالانفصال

: ترى مجرد اجراء شكلي حتى ترجع مساعدات الج وللاطفال

: ميحتاج تقنعني  بالانفصال اصلا هذي حقيقه .. الي خايفه منه  تاخذ المساعدات  وترجع لسوالفك  المكسره

ضحك بسفاهه

: اني ويني وين هالحجي رجال مكسر  .. گوه اگوم وگوه اگعد

: صدك الكذبه الكذبتها  ...
شوكت يطلع التعويض  واخلص من الخدمه ومن البهذله

راح للمطبخ يصب لنفسه اكل
ويحلف بيه
: وداعتج بس  اقبض التعويض الا اوديج لبيت الله
صب وخلى الجدر مفتوح غطيته ورديت عليه

: حلفت وداعتي لو حالف براس بصل احسن
ضحك ولاهمه قهري وبهذلتي

: هههه دمج  خفيف صوندا
هسه شگلتي  تقدمين انفصال

غلى دمي وانتهى نكراني للتعاسه والمذله الراضيه بيها

اخذت الاكل منه  وگفت بالمطبخ اصيح

: من الصبح باجر  ... بس انقل عنوانك   على شقة رغد  ورغد تروح وياك  وخلي المحامي يدبرلك ممرضه
وسنت واحد ماتاخذ مني سمعت زين
فتحت الباب  وصرخت بيه

(يله اطلع )

اجى يمي ومستغرب انفعالي

: شبيج يابنت الحلال  شغيرج عليه

انتفظت لعمري  وفتحت الشبابيك حتى اسمع نفسي والناس تسمع

: انت منو حتى ماتغير عليك 
شنو صفتك بحياتي
مجرد عاله  اطلع برى لا والله اشهد ضدك بالمحكمه  واخليك تخسر التعويض وترجع تمسح كاشي بالفنادق

صار يفر براسه مستغرب ثورتي

خليت الباب مفتوح ودخلت للغرفه
اكتفيت منه ومن رغد .. حياتي مااعرف بيا طريق موديتني
وجوده من عدمه سواء
لا بل عدم وجوده افضل .. والستر الي اعتبرت  نجيب يمثله گدام الناس
مااريده ..، المستوره ماتحتاج رجال ... سترها من ضميرها وعقلها
واني مقشمره نفسي سنين ونجيب ابو المخدرات والنسوان ستري
نسدت الباب الخارجيه .. طلعت قفلتها  وحاجيته من الشباك

: انسى عنواني من هذي اللحظه
لا والله تخسر كلشي

الظهر گعدت مع اطفالي .. دكت الباب رغد
فتحته وماخليتها تدخل
بقيت لازمه الباب وصحت ديار
: ماما ديار جيب جنطة رغد
ركض جابها .. شمرتها بالممر

: هذي جنطتج اذا ناقصها شي اخسر الج

بلا متحجي عرفت جايه تهددني بديار
: انطيني ابني 

: روحي اشتكي اني لازورت ولا كذبت
نجيب الي زور .. اشتكي عليه خلي ينسجن وتخسرين انتي وياه التعويض

سديت الباب بوجها ..، دگت على الباب مرتين وراحت

بليلتها نمت مرتاحه ..، وماعندي هم
وفكرت بنفسي لاول مره ...
اقدم انفصال يرجع التامين والمساعدات واشتغل واتعالج وادرس مثل الناس

: تقدم الانفصال  وانصرفت المساعدات ..،
واطبخ واخبز وابيع ... واصرفهم على الاطفال 

و رغد من حصلت تقاعد گلت هاي هيه افتكيت منهم اثنينهم

وبعد اسبوعين اجى عليه شيخ الجامع  ونجيب وياهم   ابو حسن صديق جهاد

گعدوا بالصاله .. وحديثهم
عن نجيب
الشيخ گلي
: انتي الجاليه اهنا كلها تعرفج وتعرف اخلاقج  ونعرف نجيب غلط وتاه عن طريق الصواب
وهسه ميريد غير يعيش وياج يربي اطفاله
لان وحدج متگدرين

: شيخنا  هو طلب مني اقدم انفصال  وقدمت والكذب على الحكومه حرام صح لو لا

رد عليه بايه قرانيه
: ومن اضطر  غير باغ ولاعاد
بنتي انتم مضطرين لحد يطلع تعويضه
شكيت الشيخ  كلامه صحيح وجاي بدافع انساني

ونجيب خطب خطبه  عن مزاياه كاب متفاني
: اني باقي اهنا علمود  الاطفال اريد اشارك بتربيتهم  لازم يتعودون على وجودي كبروا ولوحدج مراح تگدرين عليهم

گدام الشيخ وابو حسن طلبت يتعهد  مياخذ مني فلوس
ومااله عليه اي حق
لا اطبخ ولا اغسل اهدومه .. يعني يكون الانفصال حقيقي يعني هجر
ويبقى للاطفال
والشيخ اكد لنجيب هذا حقها

طلعوا  من الشقه ورجع

نجيب ويايه ... اب  ل اطفاله ... غرفته معزوله  واني انام بين اطفالي  وماانطيه من فلوسي
ومااعتمد على فلوس رغد
التنطيه  بامل التعويض

تمر عليه اوقات اتمنى ادرس واطور نفسي واتعلم انگليزي
واحجي ويه الناس الي يحاجوني واني بس اهز براسي وابتسم
اتمنى يصير عندي بيت  ملك ..، وعمل محترم ..، واثاث جديد
وفراشات ناعمه ل اطفالي ... واشتريلهم ملابس مرتبه وغاليه
بدل ملابس ( الثرف ستور
محل لبيع الملابس المستعمله )
لكن تبقى مجرد  امنيات متتجاوز  باب الشقه والحال الي معاجبني اليوم ... يمكن يتغير باجر ويصير اتحسر على حالي هسه
..................

سهير

ركزت بالصوت كم ثانيه وعرفته

عرفتك منو انت .. يحي السايق

: بلي اني يحي 
: وشنو سبب الاتصال متخاف اگول للدكتور الي مشغلك سايق

بجواب وقح  وتحدي جاوبني

: لا مااخاف  انتي الخايفه من الدكتور ليطردج من شغلج

: ياشغل هذا
: زوجه تلث ايام بالاسبوع

ثار اعصابي صرت اغلط بلا شعور
: امشي ولي لك 
وهو يسمعني ويرد بهدوء
: وين اولي  من شفت ايدج وسمعت صوتج  واني تايه

: روح للجامع يصيحون باسمك

: اويلي جماله تنكت 
: شرايد انت ها
؛ اكون صديق  ممكن
: ممحتاجه صديق اني وراح اسد الخط

تحداني اسد الخط
: سديه  يله
سديه اشو مسديتيه طبعا لان تخافين يجي الدكتور  وادك عليج واسكت لو اوزع رقمج على كم شاب يتصلون بيج
وهو موجود مجرد اتصال زغير واحد يگول اسمج اتصوري الدكتور شيصير بيه يمكن ينجلط

: بسيطه هسه اتصل بالدكتور واگله عليك يامعفن ياواطي
: اتحداج تسويها تخافين من شكه  والحجيه تريد لزمه عليج
واني راح اگله احبها وتحبني

كلامه خوفني

: وتالي وياك شرايد ؟

: كتلج رايد نكون اصدقاء بس
نسولف بس انتي مو گاعده لوحدج  واني لوحدي شيصير قابل راح  اخطفج من التلفون

: مصدك بروحك انت  عمرك سمعت عن وحده تركت دكتور وصادقت السايق مالته المهتلف

:لا بس سمعت عن وحده تركت الشايب وحبت شاب

: والله لو اريد شاب  اخذت ... بس الدكتور عندي بالف واحد مثلك

يضحك ويجاوبني
: شدعوه  الف خليهم عشره ميه بس مو الف 
صدك انتي ليش تزوجتيه اخاف محلوه  ترى انصدم والله
بس اكيد حلوه لعد الدكتور ليش ماخذج
اذا  انتي صوتج يذبح خليني اشوفج

: باحلامك  تشوفني

سديت الخط  .. وارجف  وباوعت وجهي  احمر  بلا سبب ..
وباليوم  الثاني  من  وصل ماجد
مااعرف اگله لو اسكت
اذا هوه اول ميجي يشكيلي تعبان  ويريدني انسيه
فكرت احجي ل امي وهيه تحجي لعمي ويشوفون حل

طلعنا  للعشى بمطعم  واني متعوده من اطلع وياه اكون بكامل زينتي واناقتي ...
نزلنا  وايدي بايده  .. وهوه يبدي اعجابه بتسريحة شعري الجديده الي درجت بيها خصل من الامام وتركت  الخصل الطويله للخلف  ... عند الشارع وصلنا  حتى ناخذ تكسي راسا وگفت سيارته  الي بيها يحي
ونزل فتح الباب اليه وللدكتور
صعدنا  والدكتور يريد يعرف سبب جيته
: اني گتلك روح ارتاح  ليش رجعت
: والله مريت على اقارب اليه اهنا  ودارجع للبيت شفت حضرتك والمدام  طالعين

: صدفه غريبه .. على العموم  ودينا لمطعم بالمنصور
: صار دكتور
اني بالخلف   والدكتور يمي واحس عيونه عليه بالمرايه
انداريت على الجانب بجسمي وعيني ..، فظلت عيني على الدكتور وابد مادرت وجهي للمرايه .. واقتربت من ماجد حتى تختفي صورتي من المرايه .، ابتسم مستغرب گعدتي بهالشكل
همست اله
: نعسانه خليني اخلي راسي على رجليك
ماعارض وگلي (تفضلي   )
وفجاءه اخذت  بريك قوي  وگع  كل جسمي للاسفل
صاح بيه ماجد

: هاي شبيك يحي شنو هالسرعه الي تمشي بيها

بسرعه جاوبه مثل محضر الجواب

: اسف اتصورت مستعجلين  وردت اعبر الاشاره مالحكت
دنگ الدكتور   عليه
: سهير   تاذيتي

: لا مابيه شي  الحمد لله
اعتدلت بگعدتي  و نظرت ليحي بغضب  وهوه  مبتسم 

دققت بشكله .. عادي مابيه شي مميز  .. ماعدا  العيون  الجريئه
وابتسامه المفعمه بالشباب
نزلنا امام المطعم  وفتحلي ماجد الباب .. اخذت ايده   ومشيت وهوه واگف لان ماسمعت صوت السياره 
نثرت شعري باصابعي على كتف ماجد  .. وهوه طاير بيه اكثر من خصل شعري
اندار على يحي
: يحي روح  وباجر  اتصل بيك

جاوبه اذا تحبوون انتظركم
اكد عليه ماجد  ( روح )
: صار دكتور 
دخلنا  ..الطاوله الي عادة نجلس عليها  حاضره  سحبلي الكرسي وكعدت
واخذ  قائمة الطعام هوه يعرف طلبي  ويحب شراهتي بالاكل بسبب  حبوب المانع ... والطريقه الي يتاكد بيها التزامي بالحبوب هيه الاكل
بكل خوف وارتباك  يسلب الروح
اقرب الاكل مني واكل بلا شهيه
  حتى هوه انتبه
: اليوم  شهيتج مو مثل كل مره
: لامتوهم اصلا سعيده 
انت ويايه والمكان حلو .. واغاني  حلوه  والظاهر شبعت من السعاده
انت  لازم تاكل حتى تبثلي سعادتك ويايه

: اني سعيد وياج وملتزم بغذاء صحي  لخاطرج  اريد اعيش عمر اطول وياج
: عمرك طويل ياعمري  اسمع هذي الاغنيه  احب اغنيها الك
الاغنيه فاتحيها بالمطعم

( وين متحب اني اجيك .. روحي ملهوفه ملهوفه عليك
لحجيك يلوگ الدلال  اطلب وماكو محال  كلي لك وبين اديك )
غنيتله بصوت هامس واطرق بالشوكه على الاقداح الموجوده امامنا 
وقمة السعاده والفرح انرسمت على وجهه
وافصح عنها بمدح الاغنيه
: حلوه اغانيكم  هالجيل مختصره ومعبره ..، اني راح اگلج الاغنيه الي ابالي واني انتظر اوصل يمج

: الله الله كول
: انت ياجنه حبي واشتياقي وجنوني
انت ياقبله روحي
وإنطلاقى وشجونى اغدا تشرق أضواؤك  في ليل عيونى ؟ آه من فرحة أحلامى ومن خوف ظنونى

خفت الجالسين يصفگولونه سكته بالتصفيق خفيف والثناء على صوته

:   دكتور صوتك  حلو
: هذا مو صوتي هذا گلبي
: ههههه هسه   انفتحت شهيتي للاكل
: اكلي حبيبتي بالعافيه

رجعنا للشقه  واني نايمه بجانبه  ..، رن  التلفون
فز هوه
: نام حبيبي احتمال هذي امي

خايفه يجاوب وشخص يگول اسمي
طلعت شلت التلفون
: الوووو
: ياريتني ماشفتج 
: الدكتور نايم جوى
: وانتي  كنتي نايمه يمه هنياله

: احترم نفسك لك
: وعيونج محترم نفسي لو مامحترمها  ادخل للشقه واخطفج منه  وشيصير خلي يصير
لج انتي ماعندج ولد عم جيران
شلون عافوج تروحين  من اديهم

سديت التلفون وفصلت الفيشه
ورجعت نمت 
واليومين الي بعدهم  بالليل افصل التلفون وانام ومن الصبح ارجعه 
السبت طلع الدكتور ..، والظهر استعديت للطلعه
اتصل  يحي
: اني واگف تحت البنايه تحبين اوصلج لمكان
: انت لزكه شنو
: لا سايق  واعرف اتركين الشقه وتروحين ل ابنج 
: شمدريك  انت
: صار يومين اسال عليج   ... يله انزلي عندي مو ضوع مهم وياج

: شنو الموضوع
: موضوع يخص الحجيه والدكتور  اذا متعرفيه انتي الخسرانه
: جايه  بس والله اذا تجاوزت بكلمه الا  ابهذلك

: اني مبهذل من يوم شفتج

نزلت على الدرج مااعرف شنو الي يدفعني ..، غرور ... تهور

فضول اعرف اخبار الحجيه
مااعرف
دافع مجهول  خلاني اصعد السياره وياه واسمع كلماته وارد عليها بكلمات استهزاء

: تعالي نگعد بهذي الكفتريا الصبح ماكو  ازدحام
: اعرفك تعرفني  واگعد وياك
: اي غير احجي وياج بالموضوع
: احجي وفضني
: اني احبج شنو الحل
: ماكو حل اني متزوجه واحب زوجي  احجي الموضوع وبسرعه

: طيب خلينا اصدقاء بس اشوفج
: تشوفني شنو  انت متفتهم

رفع صوته
: لا ماافتهم  واحبج والا اخذج منه

ادركت ركوبي للسياره خطا وداركت هالخطا

بالصراخ ( وگف السياره )
استغرب صريخي واستمريت
اصرخ ( اگلك وگف السياره
اذا مابهذلتك ياكلب وهسه تشوف )
خاف والظاهر محاسب حساب صريخي صار يعتذر
( الله يخليج بس اهدي خلص اسف اعتذر .. اوصلج  وبعد مااضايقج ابد )
———————————
نلتقي غدا على خير 🌹