#للجميلات_حصراً

#للجميلات_حصراً ١١

السلام عليكم ...
تاخرت اعذروني ...

#للجميلات_حصراً١١

#زينب_الموسوي

🌹🌹🌹🌹🌹🌹🌹

في اقصى جموح الخيال .. واعلى درجات الهذيان .. مااتصورت ينتهي الحال بيه في غرفة نوم مع نجيب
واعرف بنات بعضهم صديقاتي
يتمنن لو كانوا ابدالي .. عروسه
لنجيب
دخل للغرفه ..، واغلق الباب
من اهنا قررت اخذ دور العمياء الصماء .. الخرساء ... وهو يجرب اسمي الحقيقي شذر وينسى وينطق صوندا ويضحك

ويختصر المسافه بينا ...
وضحكاته تتوالى
: صوندا. اقصد شذر
وضحك
:اهووو هاي شلون راح اتعود على اسمج

دار الحوار بينه وبين نفسه .. الضحك الي يقطع كل جمله ... اكدلي هوه ايضا ممستوعب هالحقيقه

ركزت تفكيري على كيف اتجنب ريحة اللحم الي ملت الغرفه ومسببتلي غثيان وحراره باطرافي
وازداد الوضع سوء .. بسحبي من ايدي ... واستقر بيه الحال گاعده على المندر وامام الصينيه مباشره ... ونجيب لجانبي يباوع على كل سنتمتر بيه ويبحث عن جزء واحد امتلكه حتى يتغزل بيه ...
وابتدى بجملة
: صون شذر شذر اليوم طالعه
وسكت وفكر واباوع. دون جدوى
دار وجهه ورفع بايده قطعه اللحم قربها مني
وكذب اول كذبه بحياتنا الزوجيه المباركه

:طالعه لعابه. بالضبط
اكلي. مبين عليج مماكله

بگد شمئزازي من المنظر بعدت ايده .. وردت انهض منه
ايده جرتني حسيت عظام ايدي طگت ورجعت لمكاني
وهوه ياكل بلا مباله .. عيوني مارفعتها مركزه بالوان المندر حتى حفظتهن ازرك وبنفسجي .. وبان وقت الجد ... من كلامه

: صون.. شذر اني وانتي بمهمه
لازم اناديها. وهسه ...
مفروض عليه دتشوفين اهلي واصدقائي لازم اثبتلهم اني رجال ... وانتي عليج تسكتين وتتحملين احسن متتكفخين مني ومن امج وتسمعين كم كلمه تسم بدنج

الاستهانه. مو سهل احد يتحملها
والي افتهمته هوه رافض مثلي
والليله كلها شوشت افكاري ومع ذلك حاولت الخلاص
طلعت كلماتي بلا ترتيب وبخوف

: اني مااريد اتزوج امي وخالتي اتفقن بينهن

ضحك بصوت عالي
: ليش اني اريد اتزوجج يمعوده
شنو ماكو نسوان
گتلج امر مفروض عليه ومهمه راح أأديها
وگف وهو يشيل الصينيه
ويبعدها غسل بدولكة مي موجوده بالغرفه
وراح للزاويه اخذ البطانيه الموجوده طلعها بعصبيه من جنطتها وشمرها عليه
گلبي اوشك على التوقف وصرت اسمع دگاته اكثر من اي وقت

وهو ينزع ملابسه ويگلي
(انزعي البدله وتغطي وراح اطفي الضوى )

بقيت جامده وحتى ايدي مگدرت احركها للبطانيه
وهوه مستمر باهانتي

: سمعتي الي گلته .. نفذي اريد اخلص

سحبت البطانيه ... وتغطيت بيها واني احاول افتح سحاب البدله فجاءه الغرفه تحولت صقيع. وكلشي بيه يرجف
طفى الضوى هوه وبرر السبب
( مااعتقد بيج شي اريد اشوفه )
سكتت وقع اقدامه ... ومن ريحة الاكل الباقيه باصابعه حسيت ايده كتمت انفاسي .. والوساده
على وجهي .. كأن الموت جثم عليه .. اخاف اصرخ .. ومااريد اسكت ... عقلي وگلبي توقفن عن مهمتهن الرئيسيه
وصار كل همي اخلص ...
كتمت الصرخه والدموع نزلت على وساده بيني وبينه
حجبت منظر القسوه والهوان
لكن ماگدرت تخليني مااحس
بيهم
وضع غلط ... ومكاني غلط .. وانسان غلط
(ظلمة .. بلا صوت ... برد
انفاس كريهه ..، وقوه مفرطه
كان له ماكان
وتم مااراد
حمامة بلا ريش ولاجناح
وقعت تحت انياب صقر
لايرغب في افتراسها
بل ينتقم ممن اجبره ان تكون طعامه
يظن اني اساءه له
ويعتقد ان من مثله ..،
يستحق حوريه ... مثيره ...
جميله
وماتحته ... ليست سوى
نطيحه )

واختم الليله الموعوده ...بشمر ثياب اليه
وجمله تمنيت اني اگولها بدله
( خرب بحضي المصخم ... كل منج يمه )
فتح الضوى ..، سديت عيوني ودخلت تحت البطانيه ..، خايفه
يطلع صوتي بالبجي ... حبست صرختي ... لحد يطلع ...
عديت الثواني ... لطلعته ... احس الجدران راح تطبگ عليه
فتحت عيني ... اشوف ليش ميطلع
لبس دشداشه بيضه ..، وگبال المرايه مشط شعره وخلى عطر
وطلع ... بس سد الباب ... الهلاهل اخترقت صميم روحي المسلوبه ... وصرخت بكل قوتي ...دخلت امه وامي
شافني ارجف تحت البطانيه
وهنه يبوسن بيه
ويرددن
: عفيه بالحبابه سباعيه
حتى صوتها مااطلع
كان همي الوحيد هوه ادفى
البرد حسيت وصل للرئتين والنفس جمد
اخذتني امي للحمام ... حتى اغسل ...بالطابق الجوى .. على الدرج دخت .. ولزمتني امي وسهير

البيت اصبح فارغ من النسوان الا كم وحده من اقاربه .. ونظراتهن مسامير تضرب بيه
دخلت للحمام سديته عليه
انتظرت المي يسخن ... وشفت بخاره يوگع على ارضية الحمام
غسلت بيه لكن ماحسيت بسخونته ... زلت الالوان عن وجهي ... ونزلت شعري
وتقيت ...
امي سمعت صوتي اتقيء فتحت الباب صيحت
:لاتفتحيه مااريد احد يشوفني
ختلت خلف الباب وهيه تناوشني لفة ثياب
اخذت المنشفه ..، لفيت بيها جسمي ... ولبست الفستان الاحمر الي محضرته امي
ماحسيت بالدفء
طلعت لغرفتي ... دخلت سهير وندى ورايه
بوسوني ..، وهنوني
وسهير حضرت المكياج تخليلي مره ثانيه

دموعي تنزل ومااگدر اسيطر على رجفة جسمي سهير تمسح وتخلي المكياج مره ثانيه

: اكلج ام محمد ماكو داعي للمكياج اني راح انام ونجيب شايفني بلا مكياج
ضحكت وهيه تباوع على ندى
: هنيالج تنامين .. لج هسه نجيب بس يروحون اصدقائه يسهر وياج للصبح
وبعدين انتي هسه زوجته لازم داىما يشوفج حلوه ومرتبه

: والله خساره بالمكياج مااشوف دينطي نتيجه

: شگد تعاندين انتي .. ديري بالج تعاندين نجيب ترى عصبي وخاصة هالايام اعصابه تلفانه مااعرف شبيه

هيه متعرف شبيه لكن اني اعرف عصبي من هالزواج

ضربن وجهي قاط صبغ ثاني
وطلعن سيت ابيض حتى البسه
مجرد طلعن من الغرفه
سديت الباب لبست دشداشه قديفه ماروني حتى ادف وتحتها ستريج مااعرف منو مشتريه
ومخليه ويه اغراضي ومتصور راح البسه لنجيب
گعدت ابجي واعرف هالبجي
راح يكون من ضمن يومياتي بهذي الغرفه

كمت شلت قاط نجيب من الارض خليتهم بالكنتور
وعلگت البدله البيضه
ورحت اخذت مخده من السرير وطفيت الضوى
ونمت على المندر وتغطيت بالبطانيه
ومصارين بطني تتصارع من الجوع .. صار اكثر من عشرين ساعه مماكله ..،
تصارعت مع الجوع بكل الاتجاهات .. يمنى يسرى
حدقت بالسگف بقيت جوعانه
سالت مني دمعه حاره واتذكرت جهاد من كان يجيبلي بسكت تالي الليل. حتى اكله يعرفني مااكل لحد مااموت جوع

... نفتحت الباب والضوى من برى ملى الغرفه
غطيت راسي راسا مدعيه النوم العميق ...
من تحت البطانيه سمعته
: شذر جبتلج بسكت
اعرف جهاد دائما كان يشتريلج بسكت تالي الليل
بعدني افكر ارفع البطانيه لو لا

: ادري منايمه. گومي اكلي
لاتموتين عندي وابتلي واني مناقص مصايب
..............................
نجيب

مصيبتي متحملها وساكت ... اتخبط بالتفكير ... وخايف من الجاي
مرات اندم لان ورطت نفسي وياها ... ومرات اكول احبها ولازم اساعدها ...
مكبوت ... مضغوط .. مرتبك
ومالگيت متتفس غير العنف مع هالمسكينه ... الي تحت البطانيه وترتعد ضلوعها خوف
وگفت انطيها. بسكت
مدت ايدها واخذته ... گعدت منتجيه على الكنتور ... وتفتح الباكيت ... وتشتمه

: شمنطيج جگاير سومر. هوه بسكت. ليش تشتميه ؟؟؟

تغلبت على خوفها.الغافي على عيونها الغايره
: البسكت. مرات بيه ريحه موحلوه

: خليله عطر تصير رويحته حلوه
ضحكت اما هيه فمااعتقد شفتها بيوم تضحك
فتحت الضوى بغرفتنا
وسديت الباب الخارجي ... گعدت بسريري ... اباوعها
واتسال ويه نفسيي
: شنو نوع العلاقه الي راح تربطني بشذر
مستحيل بيوم ارغبها زوجه ومااعتقد اكو رجال بالعالم يرغب بيها ... من زمان اني انظرلها نظرة شفقه ... واحس من اشوفها ان القدره الربانيه
عند خلقها. توقفت لسبب ما
وبقت ناقصه الصناعه
وهناك حلقه مفقوده بيها تخليها غير محسوبه على الاحياء او الاموات ...
ومع ذلك اشوف بيها عزيمه ... شموخ ... وعمري ماكرهتها
واحسها تحتاج مساعده .. علاج ..، عطف
شي ينقصها لكن مااعرفه شنو
وهالاحساس دفعني اوضحلها الخطوط العريضه بزواجنا

: صو .. شذر تعالي يمي دنسولف
توقفت عن الهضم .،، وجمدت النظره بعيونها

: شبيج مثل المشنوق تعالي نسولف
لاتتصورين ميت عليج تعالي دنتفاهم

تركت البسكت على فراشها
وكفت .. تمشي
: بطريقج. افتحي الميز الي يمج ... تلگين البوم صور جيبيه وياج
جابته بسرعه ... وسلمته من بعد متر عني
اشرتلها على مكان تگعد بيه
تصير على طرف السرير مقابيلي
گعدت

فتحت الالبوم
: تفرجي على صوري ويه البنات
شوفيهم ... ذولي كل البنات الي عرفتهم بحياتي
تفرجت صوره ..صوره
ونظرات الانبهار تبدو عليها

خلصت الصور سدت الالبوم
وانتظرت تعرف القصد

اخذته منها
: شذر هذي البنات الي تعجبني اشكالهم واجسادهم .. وحركاتهم ..، مابيج شي منهم
وتمنيت اتزوج وحده تفوق ذني الشفتيهن الف مره بالجمال ..، والاثاره .،

: لعد ليش ماتزوجتها ؟

: للاسف ماعندي ثقه بيها وبصراحه ... ينقصها الشرف
وكنت مستعد اتغاضى وانسى ماضيها وابدي صفحه جديده وياها ... بس قدر صار اكبر مني ومنها

: قصدك زواجنا ... والي سونه امي وخالتي

: لا مو هذا قصدي

اكلج خلينا من هذا الموضوع وجاوبيني ...شذر انتي تشوفين زواجنا بيه حقانيه اليه ... انصاف اتزوجج انتي

دنگت وجاوبت

: انت وين واني وين .. اني اعرف قدر نفسي
: هاي انتي گلتيها .. فخليج بحالج وخليني بحالي

:والله العظيم تمنيت انت ترفض لان رجال ...تگدر ترفض
واسال خالتي گتلها مااريد اتزوج
بس

: بس شنو احجي لاتخافين

: بس امي باعتني عليك بست اوراق ...

: هاي يعني تدرين امج السبب
واني مالي ذنب ..ومااحبيت اكسر بخاطر صديقي جهاد لو عرف رافضج
والسته اوراق اعتبريهم دين
عليه ارجعه الج بس ابيع السياره الي اشتريتها بيهن

فزت من مكانها
: لا دين شنو ... لعد انت شنو ذنبك ... امي انطتك هديه
وميصير اني اخذهم

: لعد السياره الج اني خليت ولد يشتغل بيها واردها الج

: لا حتى واردها مااريده خليها للبيت .. خالتي تكول انت حملك ثگيل

: شذر نحتاج فتره نتعود على بعض شنو رائيج
هسه انتي بحالج واني بحالي مااگدر اغصب نفسي عليج .. صعب ... مالي رغبه بيج ... ماادري يجوز اتعود عليج
وانتي اكيد متقبلين بشخص مارابغ بيج

ردت بكلمه وحده هيه الكلمه الي اريد اسمعها

: بكيفك

ردها اراحني ..، وبنفس الوقت تاكدت هيه ايضا غير مستعده لحياة زوجيه

: والله انتي احسن بنيه بالكون

سكتت وعرفت تريد تطلب شي

: احجي احس عندج حجي

: انت تدري اني اخيط عبي واحوك بلوزات ... واريد استمر بشغلي

: براحتج. اشتغلي
واسترسلت بالكلام باريحيه بعد مازال هاجس الواجب الزوجي
من افكارها

: جهاد حولي ورقتين هديه لزواجي
حتى اشتري مكينه تگص نقشات للبلوزات

: وينهم الورقتين عندج
: اي عندي
راحت للكنتور فتحت جنطه زغيره وطلعت ورقتين
انطتني الورقتين .. على بعد مترين عني

خليت الورقتين بجيبي

: اني اشتريلج المكينه من الشورجه بعد رايده شي
جاوبت بسرعه

: اريد راديو اخليه يمي من اخيط . اني مااتفرج تلفزيون

: واحلى راديو لصوندتي الحبابه
اسف اسف
قصدي شذر

: عادي الكل يدري اسمي صوندا

: دخلي واحد يكولها الا ادفنه وهوه عايش
شذر طول ماانتي بيتي الج ماتنذلين ولاتنهانين
حالج حال اخواتي .. بس مااريد
احد يدري باتفاقنا ...

: لا مااكول

: وشغله ثانيه
متحاسبيني وين رايح وين جاي
لان اني عصبي واضرب
وانتي مو مال ضرب

: ابد مااحجي

: واهلج شوكت. متريدين تروحيلهم انطي خبر ل امي وروحي
: اشكرك

: هاي هيه لعد اتفقنا يله طفي الضوى اريد انام

ماصدكت عتقتها .. طفت الضوى
وگالت

: اني انام اهنا على المندر وانت بمكانك

: احسن اني هم نومي عبث

اسدلت اجفان عيني ..رغبة في النوم بعد ليلة متعبه
جالت افكاري ..، وتجمعت بجبل هم ... المصيبه كبيره ...

واكثر الي هامني ... هوه خوفي على مصير اخواتي لو انكشف
المدفون

من يوم الي تورطت ... اسال نفسي شنو السر الي مخليني
امشي مثل الاعمى وراها
لحد نزلتني اسفل السافلين

وشنو فايده الافكار هسه ؟ انام افضل

.............................
شذر
الساعه ثمانيه الصبح گعدت ... نجيب بعده نايم
اني مااعرف اطول بالنوم .. الجوع يگعدني ...
مااگدر انزل من الخجل .. اني بيت اهلي خاتله .. شحال اهنا
بس انزل احسن ميگعد نجيب
ويباوعني .. اكره نفسي من يباوعني ودي اختفي.. اطير ..
اموت .. افضل ما صورتي تصير بعينه
وگفت على اطراف اصابعي ..، حتى ميحس بيه ... شلت البطانيه .. رجعتها للزاويه
ولبست روب قديفه ... وطلعت
سديت الباب بهدوء
نزلت كم درجه اشوف منو بالبيت ... اخاف خطار
باوعت البيت فارغ ونظيف
دخلت للمطبخ ... قوري الجاي بعده حار ... وفي صينية كيمر
مغطايه بقطعة قماش ابيض
( اكيد امي دازتها للعريس )
دورت على بطاطا ... موجوده بسله اخذت حبتين حتى اسلگهم ...
انفتحت الباب من جوى
هذي طريقتهم من زمان بفتح الباب ... يرفعونه للاعلى تفلت الحديده وينفتح الباب
دخلت ام نجيب شايله علاگه قماش على راسها
فتحتلها باب المدخل ..، التعب لاهب خدودها ... ذبت العلاگه على الارض وگعدت ترتاح

: شعندج گاعده من الصبح
: خاله اني مااعرف انام للظهر
متوعده اگعد الصبح اخلص خياط الناس
انتي وين جنتي

اتنفست من التعب

: اخذت التنور الحمه ... بس اللحام گلي ميفيد ... بعته عليه
وتسوگت
: اساعدج بشي خاله

: لا گعدي البنات يساعدني ... وانتي اصعدي البسي كوستم
اليوم عمامج وابوج يتغدون عدنه

: صار خاله
واني اريد ادخل الغرفه دگ التلفون
: جاوبي التلفون شذر
شلت السماعه ... وباوعت نجيب يركض على الدرج
: هلووو جهاد خويه شلونك

: شلونج شذر حبيت اتصل واكون اول واحد يباركلج

: فدوه لعينك حبيبي
من سمعوا جهاد تجمعوا حولي
نجيب وخالتي وندى ... وهو يطلب مني اسولف وياه ...
: گوليلي طلعتي حلوه بالعرس

: يعني مو كلش
: ههههه دزي الصور على العنوان اخذيه من ندى

: ان شاء الله بس تطلع الصور
ادزها

: نجيب حباب وانتي صيري سباعيه ومؤدبه

: صار.

:: محتاجه شي شذر
: محتاجه سلامتك
كلمة محتاجه خلت خالتي تدفعني من ايدي ونجيب يخنزر عليه
افتهمت قصدهم

: اخاف زحمه عليك
: لا يازحمه گولي

: اريد اشتري تنور ماعدنا بالبيت
هز ايده نجيب
: تنور ليش انتي تخبزين يمعوده انتي خلصانه

: لا خالتي تخبز
ها خوش تدللين ... من احول ادزلج ورقه. كافي لو بعد

: تسلملي كلش كافي
انطيت التلفون النجيب .. الي بدا المكالمه بضحكه

: لك حتى اني اتزوجت وانت ظال باير ههههه

وضحكه ثانيه ... وندى تنتظر دورها ...
وخالتي الابتسامه شاكه وجهها
ونظرات الرضا عليه تحوطني
ناول نجيب التلفون لندى الي اخذت التلفون ودخلت للصاله
وصعد الدرج .. وهوه معترض عليه ويهز ايده
: تنور هذا حظي ...
اما امه ... فابدت كل الاهتمام بيه
: معليج بيه يحجي ويسكت ... انتي من اخوج يحول فلوس انطينياها لاتنطيها اله ... ولج ياخذها ويروح للنسوان .. وياخذنه منج

: صار خاله
: والزگيله لزگه وين ميروح ... وبدلي وتمكيجي
هسه ينساهن ويظل يفكر .. بيج

عرفت السر ورى اختفاء ابو نجيب الظاهر جانت لازگتله لزگه
ومثل اي عروس تريد رضى ام العريس جاوبتها

: صار خاله
: دكومي اخذيله الريوك امج جابت صينيه گيمر وانتي تريكي وياه وابقي يمه لاتنزلين

: خاله اني مااكل گيمر .. اتريك بطاطا مسلوگه بلا خبز

: والله انتي المسلوگه .. ولج اكلي حتى تسمنين وتصيرين حلوه

الكل يتصور. ان اني مااحب الاكل بارادتي ..
والحقيقه ان الاكل مجرد يدخل معدتي ..، احسه تحول نار .. وماارتاح الا استفرغه
ومرات اتعمد استفرغه حتى ارتاح .. هالحاله بدات عندي من كنت بالسادس ابتدائي ...
من رجعنا من العطله الصيفيه
وشفت صديقاتي ... متغيرات بالوزن والطول ... والحلاوه
مثل الوررد. اليافعه
وبديت اسمع منهم كلمة اكلي ... واكلي ... واكلي
وفعلا بديت اكل ... واكل ... وامااشوف نتيجه غيرت بشكلي
فقط احس بالتخمه ...
وبعدها لجئت للادويه. بالحاح من امي وعمتي
والادويه انعكست على مقاومتي للامراض ... لحد كرهت الاكل والادويه

وبيت اهل نجيب صارت المعاناة اكبر ... مجرد نتجمع على الاكل ... تصدر( كلمة اكلي )
من كل حدب وصوب وخاصة نجيب. اخذ دور المشرف على اكلي من اول ايام
واحنا نتجمع ثالث يوم على الاكل
لاحظ اني مااكل تمن
: شذر اشو متاكلين تمن. ولاخبز ليش

: معدتي متتحمل ... ومرگه كافي
شال ايده من الاكل وهو يفهم الباقين
: محد ياكل .. اذا متاكل
شذر ترى حالج انتي والميت سوى
يله اكلي .. يله احنا ناكل

كل العيون اتجهت عليه .. وباستغراب

اصبحت مضطره اكل واتحمل الالم بعدين ... ومجرد انهي لكمه ... يصدر امر من واحد من الگاعدين ( اكلي )
وانفذ ... واخلي خاشوگه بعد الثانيه .. حسيت انمليت وراح انفجر ...

بعد الغدى صعدت للغرفه
رايحه جايه ... احس عبالك حجر دخل لمعدتي ...
ساعتين متحمله ... نزلت ادور على هيل ... او اي شي يساعدني على الهضم
استوقفني
صوت نجيب من الصاله. يتصل بالتلفون ... وگفت خلف الباب
اسمع

: لاتظلين تلحين وكل شويه تتصلين
مااريد اخواتي يحسن

سمع جوابها ... ورد عليها

: يازواج. انتي بطرانه ... ورطتيني ورطتي نفسج
وسكت وبعدها كمل

: اليوم بالليل اجي عليج

قبل لااسمع الجمله الاخيره
كنت اتصور نجيب ميعني اليه شي .. وميهمني البنات الي يعرفهن
ومع تلك المكالمه ... حسيت اني غلطانه ... ونجيب حرك الغيره داخلي ... لدرجه ماانتبهت وجوده وهوه
يفتح الباب واني استمع ... ودفعني للصاله ..، لزمني من دشداشتي وهو يقبض باثنين اديه على انفاسي

: شعندج تتسنطين

: مو اتسنط اجيت ادور عليك

: شرايده مني ... شعليج بيه

: ردت اسالك عن مكينه الحياكه

: دورت عليها وملگيتها ... انقلعي من گدامي ... وبعد مااشوف وجههج
يله
صرخه وحده صعدت بيها الدرج مااعرف شلون

للعصر ... بدل وطلع
وصاحتني خالتي استقبل زبوناتي القديمات بعد الزواج

اخذت منهم القماش والقياسات
وطلعوا .. وراها اجتي مره جيرانه ... هم تبارك لخالتي ..
وتحت عبايتها بلوزات قديمه تريد تحولها جديده لبنت ابنها
اخذتهم منها
وطلعت ... ندى گاعده وزعلانه
ومتقبل تحجي ويه احد

: شبيج ندى ليش زعلانه
السوال طلع المخفي داخلها

: جهاد عبالك يحسب الدقايق من يتصل بيه ...
وبس يشكي من الحياة اهناك

: سوده عليه يجوز تعبان من الغربه والوحده ... اگلج ليش متحجزين اتصال وتحجين وياه انتي

: المكالمات غاليه على نجيب
وجهاد ماخلاني اتعين

: لعد خيطي ويايه هم تتسلين
وهم تدفعين فلوس المكالمات

گامت بملل تام اخذت الصوف بايدها والدمعه على رموشها
وعبر ت عن الم مكتوم
: اتعلم شاسوي .. اريد اشوف تاليتها ويه گلبي شنو ؟

سكتت اخاف هذي تطلع قهر اخويه بيه

خلصت النهار اعلم البنات ..
سهير وندى ونجوى
علمتهم كيف نفتح البلوزات القديمه وناخذ الصوف ونحوله موديل جديد
وعلمتهم كيف نگلب العبايه
وكيف ناخذ القياس .. ونخيط بغرز صغيره .... ونحول القماصل العسكريه القديمه ... ل اشياء جديده ومفيده
والبنات وجدن متعه ... وصممن يخيطن
وخالتي تطلع من الكنوز الاثريه داخل كنتورها ... وتگللهن
تعلمن ...
حتى الجوراب الممزق طلعته
والبنات واني نضحك على سوالفها
ونتفرج تلفزيون ...
تقريبا الساعه ... ١١ بالليل
رجع .. نجيب
وشافنا مخبوصين بالصوف والحياكه والعبي
... وعجبه لون ماروني كان جاكيت قديم اله... شاله بايده

: الله هذا الجاكيت وين لگيتوه

جاوبته امه
لگيته بكنتوري محروك وماهلي اذبه
: والله جان يدفي ... واطلع بيه اخبل
بدن اخواته وامه يتغزلن بيه
واني وجهي يذب الوان خوفا من المقارنه

: يمه انت شتلبس حلو
: اي والله خويه ... المعلمات بالاداره جانن متخبلات عليك

اخذت الجاكيت وضميته اثناء انشغالهم بالغزل والمدح

صعد لغرفته ... واني بقيت مع البنات نتفرج تلفزيون
وامه تكح جذب
: احم احم
باوعت عليها .. اشرتلي اصعدي

سويت نفسي ماافتهم السهره حلوه شسوي فوك

أيست مني افتهم صاحت بيه

: متگومين تبدلين وتسهرين ويه رجلج انتي مو عروس
وكلام سهير شجعني

: دگومي ياعيني .. شفتي اليوم بالغدى شلون خايف عليج
ولعلمج هاي اول مره ... يرجع من وكت من سهره
يله كومي واتركي الخجل

انطوني دفعه معنويه ... ويمكن ... تركت عقدي ... وعدم ثقتي بنفسي
صعدت للدرج افكر شاسوي
وشاگول ..،
يمكن يكون كلامهن صحيح ... وفعلا هوه هوايه يهتم باكلي ...

فتحت الباب ... لگيته نازع ملابسه ... ومعلگهم .. فقط باقي
بالداخليات ... وبايده ..، ملابس ثانيه ... ومنشف
افتهمت يريد ياخذ حمام
ويه دخولي ... انتبه الجاكيت بايدي

: ها اشو الجاكيت جايبته اهنا

: دافكر. افتح صوفه واحوله يلك الك

: والله شاطره
اقترب مني مبتسم ..،
: تعالي اخذي قياسي
: لا ميحتاج اني اعرف من النظر

ضحك ضحكه تتحدى كل عاقل بالدنيا ... يشوفها ويبقى عنده عقل
واقترب وهو ياخذ الجاكيت

وخلاه على جسمه
: يانظر ... اذا انتي مدنگه ...
اخذني عليه والجاكيت بينا
وبمزاح كاد يصيبني بجلطه

: وينهم عيونج. (ابو الدكم) اني شايف دگم
صغار
وضحك بصوت عالي
بكل الجراءه العندي ... رفعت عيني لعينه
رمشه يصلح يكون غطاء مضاد لا اقوى برد بالعالم

: يله اخذي القياس
مديت ايدي رغم رجفتهم ..، حتى اخلي الجاكيت على صدره واقيس
مقبل ينطيه
: باصابعج قيسي
توقف نبض گلبي فعلا لثواني ورجع يدگ سريع

: مااگدر والله مااگدر
: اشو تگدرين ... يله سمعي الكلام
خليت اديه على صدره شبر .. شبرين ... تلاثه
وكم اصبع

:اصابع لعابه اسمن من ايدج
اني وراج وراج لحد اخليج اسمن من امل طه
(ابو الدكم ) خو مازعلت مني الضهر لان صيحت عليج
ترى اني نبهتج عصبي ومااتفاهم وخاصة هالايام ... واگع. بمصيبه جبيره

: هاي ثالث مره اسمعك تگول مصيبه
احجيلي ... يمكن اساعدك .. ادعيلك

: لاتشغلين بالج. ابو الدكم انتي متحملين قهر
:يعني السالفه بيها قهر ... الله ينجيك يارب
: ادعيلي الله يخليج انتي گلبج طيب وعلى نياتج ...
تحرك بعيد عني ... وهوه يطلع للحمام
اندار عليه

: ابو الدكم عيوني خجلان منج
لان تصرفت بفلوس المكينه احتاجيت كلش

: فدوه الك الفلوس ..
وبس اسلم الخياط للعالم وينطوني فلوس اخذهم اخاف تحتاج

: مو اگلج انتي احسن بنيه بالعالم
تحرك كم خطوه ورجع

:ها بس جبتلج الراديو

: صدك والله وينه

: على مخدتج وجبتلج بسكت ونساتل اخذيهم
وبس اطلع من الحمام اخليج تاكلين الباكيت كله ... حتى لو اعرف اسهر الليل كله
طلع من الغرفه ... نسيت الراديو ... والبسكت
وتوجهت للكنتور ..، فتحته عندي قميص احمر شفاف قصير وروب طويل ستن
بدلت بسرعه ... واعيد بذاكرتي
الاسم الي گاله اليه ( ابو الدكم )
حسيت الاسم احلى وصف وصفني بالدنيا
خليت كحل لعيوني ... واول مره احب عيوني ..، ومااخجل من صغرهن
ولميت شعري وخليت عليه ( البوند). اسود المودته منتشره
وگعدت على السرير انتظر

....................
جهاد

تحولت الى اله بشريه ... مهمتها تلتهم ادويه ... وعقاقير ..، وتنتج فلوس ... وتحول ل اهلي بالعراق
تعبت لدرجه احيانا اتمنى الموت ..، وفقدت شعور البهجه بحياتي
شركة التامين رفضت تدفع بقية العمليات بحجة هذي عمليات ثانويه ...
واستانفت التقديم مره ثانيه حتى يوافقون على الدفع ..،
وقت للترفيه ماعندي .. عمل مستمر .. حتى شريكي بالسكن مااشوفه الا عشر دقايق باليوم

اهلي طلباتهم زادت... وبدل مااحول لطرف واحد صاروا
كل طرف يريد احول على حده
والكل يشكي
شهيد يدعي ان ثائر يطشر بالفلوس
وميعرف يتصرف ..، امي تگلي شهيد ومرته يبنون بيت ... ومينطينا مصرف
واخواتي محتاجات ..،
اما ندى فصارت مثل ركن المهجور اذكره وقت التعب
ومن اتصل بيها ... اشوف نفسي وين وصلت بالقسوه ... والجمود
ماعدت احمل مشاعر ولا احاسيس وكل اتصال ينتهي بخلاف اكبر
عادة اتصل بيها احد الصبح لان اكون عندي عطله
لكن فاجاني اتصالها هيه يوم سبت واني راجع من العلاج هلكان ونايم. على الارض
جاوبت التلفون

: هلووو حبيبي شلونك

: هلوو ندى. خو مصاير شي اهلي شلونهم شذر بس لامريضه

: كلهم بخير ..،
قطعت اسألتي وحجت بسرعه

: جهاد الاتصال خمس دقايق ومكلف .. لاتضيعه
بشلونكم واخباركم
مشتاقتلك ... شگد متتصور
واتمنى احس انت خطيبي ... ممكن؟

: اني هم مشتاقلج شگد متتصورين
مسحت وجهي حتى افتح عيوني ادور على الكلمه الحلوه اكولها مامعقوله ابقى جاف الهلدرجه وياها
مالگيت غير كلمة
: تعبان والله ياندى

: سلامتك. ياعيني اخذ اجازه شويه ارتاح

: واهلي. منو الهم والله يموتون جوع

: لاحبيبي مو الهلدرجه .. لعد هذي الناس الي ماعدهم احد بالخارج شلون عايشه

: والله ماادري كل مااتصل يشكون ويبجون والفلوس الي ادزها زادت مشاكلهم

: جهاد اترك هالحجي ... وخلينا بينا ... شوكت تخلص المعامله
اريد اجي يمك واصحح هوايه امور

مااعرفت شنو تقصد بالضبط بس عرفت اتعصب عليها

: ياامور الي تقصديها ... اذا تتصورين تمنعيني من اهلي
فوالله لا انتي ولا الف مره تمنعني خليها ابالج زين

سكتت وتحسرت وردت

: ماقصدت الي افتهمته ... قصدت ... اشيل عنك التعب
والغربه
مع السلامه

بأخر ثانيه تندمت على العصبيه وحاولت امنعها تسد الخط
: تعالي ندى بعد الخمس دقايق مخلصت

حسيت بدموعها رغم مشفتها

: وليش ادفع فلوس خمس دقايق
اني هم اهلي غالين عليه ومااريد احملهم فوك طاقتهم
اتصلت حتى اسمع كلمه حلوه منك ... وتندمت لان اتصلت
سدت التلفون ... قبل لينگطع الخط
رديت اتصلت ... يطلع الاوبريتر الي يطول ساعه يله ينطيني الخط
وبقيت ساعه انتظر
المكالمه وصوت الاوبريتر
( يرجى الانتظار ... سوف يلبى طلبك في اقرب وقت )
واسمع واغفي
جاوبتني بعد خمسه وتلاثين دقيقه .. بدالة العراق
: تفضل الرقم المطلوب
انطيتها الرقم
دگت وسمعتني
: اخي مشغول الرقم
: مشغول ليش شگد الساعه عدكم ؟
: بالسبعه الصبح
سديت الخط ( الضاهر رافعه السماعه هيه حتى مااتصل )
رجعت انام ...
وابالي الغصه بصوتها ...
طار النوم من عيني ...
سحبت صورها من الرف القريب مني
ومررت اصابعي على ملامحها

: حلوه لدرجة الطغيان ...
ويمكن احلى من سهير
ياترى .. من تشوفني راح تقبل بيه ...
يمكن لو اعاملها بود وحنيه تتعلق بيه ...اكثر ومتتمسك بيه
رغم كلشي
المشكله بداخلي اني فقدت القدره على تقدير مشاعر الناس
وتحولت حجر اصم ..، لايلين
ولا يتفتت
الادويه والعمليات انتزعت من داخلي جهاد ... وخلته مجرد اسم لشخص كان عايش

غفيت ...
وگعدت على صوت عزيز

: اگعد صور العروس عفستها
فزيت
: شنو ياصور
ضحك عليه
: خايب الصور الي على صدرك
هههه
اذا هيج تحبها ... ليش هيج قاسي بردك وياها
ترى سمعت المكالمه البارحه البت مگالت شي
جهاد. حاول تلين وياها ترى البنيه راح تتغرب وتترك اهلها ووطنها وظيفتها علمودك
وتتصور الحياة اهنا جنه
يعني تجي تنصدم بيك وبالحياه
هاي شطلعت

: والله العظيم. مااعرف ليش هيج اتصرف وياها تصدك لحد الان مگايلها كلمة احبج

ضحك بطبعه الي يضحك على طول
: ههههه اگلك اخاف لان اني موجود بالشقه
بويه انه اليوم معزوم عند اهل جودي
وانت عندك عطله اتصل بيها
واحجي وياها حجي حلو
خطيه .. وفلوس المكالمه اني ادفعها بعد شتريد

: روح لك هوه يدفعها انت هم حافي منتف امر مني

استلم مهمته المعتاده باعداد الريوك والجاي
واسترجعت الجمله الي گالها عن جودي صديقته الامريكيه
ولو هو ميعترف بيها صديقه
بس هيه فرضت نفسها عليه
سالته
:صدك انت معزوم عند اهل. جودي ... تعرف اهنا التعارف ويه الاهل يعني الامر صار جدي بينك وبينها

: والله جدي حبوبتي هذا عدهم
اني شوكت ميعجبني اشلع

: ترى جودي خوش بنيه بالنسبه لحياة الامريكيات

: صح خوش بنيه ... كمرحله مجبر عليها .. بس الگلب يحوم اهناك ... على نهر الفرات ..،
يريد عراقيه ...
بويه شايف العراقيه من ترجع من الشغل وتتلگاك بكلمة الله يساعدك ... وجهالك ملح جلح
يشبوهنك نسخه طبق الاصل
يرگضون يتلكوك ..،
وتصبلك ام الجهال الغدى بصينيه فافون ... وتناوشك الخبزه الحاره من ايدها
هذي الحياه الي اريدها عراقيه
ميه بالميه
اما جهال ملح وعيونهم زرك ... ذولي مايدوون گلبي

ضحكت على بساطته بالاحلام وعلقت عليه

: فگر ابن فگر شاسويلك ... عاد اتعلم من جودي اللغه ياحضي
مو ابقى مبتلي بيك واترجملك

: اي هذي سهله اتعلم واصير احسن منك بالانگليزي

طلع من الشقه ورا ماخلى بيدي كلاص الجاي .. حتى اركز بكلامي من اتصل بندى ...
وكعدت ساعه اتصل والاوبريتر
يرد عليه .،، ولازم اعصابي
كوه ..، ساعتين الا ربع يله جاوب رجال من البداله
وانطيته. الرقم .. الوقت المغرب عدهم ... بلكي هيه تجاوب
جاوبت امها. ودقيقتين شلونك شلونك
: خاله الله يخليج گوه حصلت خط ..، اريد احجي ويه ندى

: صار يمه تدلل

صاحتها مرتين يله اجت
بس كالت الوووو وسكتت

: شدعوه الوووو بس كل مره شلونك حبيبي

: جاي تكمل عركة البارحه
ترى مليت

: حقج اني هم مليت ... من الوحده ... اتمنى المعامله تخلص اليوم ... حتى تجين يمي

سكتت تريد تسمع اكثر
: متحجين شبيج بعدج زعلانه

: اي زعلانه صالحني
: هههه اسف حبيبيتي ... انتي لو تدرين وضعي اهنا عذرتيني

: ماسمعت شي عيد من كلمة اسف

: اسف حبيبتي ... اكمل
: لا خلي المأسي ومره وحده خلي اتصالنا بلا خلافات وعركات

: ههههه ... خلي اگلج شي
البارحه من سديتي التلفون
اتصلت عليج وطلع مشغول

: اي اني رفعت السماعه
: ادري بيج خبيثه
المهم هذا مو موضوعنا ...
بعد ماايست احصل خط اخذت صورج ... احزري شسويت بيها

: حرگتهم اكيد
: هههههه لا لج ... اخذت الصور وتاملت جمالج ... وبوستهم ..، ونمت وهمه على صدري
بحيث صديقي عزيز ... الصبح شافهم على صدري

: ههههه شگد عيب

: ليش عيب قابل صور وحده غريبه ..، انتي زوجتي ... احسن منه مصادق امريكيه

شهكت بس سمعت كلمة امريكيه

: صخام بوجهي امريكيه الله عليك ... مو ياثر عليك وتروح تصادق امريكيه
: لا لج امريكيه شنو ... اني رايدج الج

: مد اصدك الي داسمعه اخاف احلم ..، هاي انت لو غيرك

:هههه اني صدكي

؛ تعرف البارحه ليش اتصلت بيك

: لا مااعرف ليش

: صار سنتين اخر مره شفتك

سكتنا اثنينا بانتظار منو يكسر هالصمت
واكيد هيه الي حجت ورغم صوتها يتقطع بطبع خجل
حجت عن مشاعرها بلا تحفظ

: تتذكر اخر ليله من ودعتك
كم مره باحلامي تمنيت هالليله تنعاد .. الايام الي گالوا عنك مفقود ... نستني معنى الحياه
لان صدگني انت الحياة بالنسبه اليه .. وشكد متتصور احبك

: مااعرف بشنو ارد لكن اتمنى تبقين تحبيني على طول ..
هذا الي ينقصني .. الحب

: احبك والله .. وتبقى اكبر امنياتي ان يجمعني الله بيك برضاه وحلاله

: ان شاء الله نونو حبيبتي ..، عندي طلب

: عيوني الك كول

: احلفي متركيني شميصير

: وليش اتركك ..، اني احبك من زمان ..، مااعتقد اكو سبب يخليني اتركك
وحتى تطمئن احلفلك
والله شاهد اكون الك زوجه ... وحبيبه ... وسند
وماكو شي يغيرني ... مدام تعاملني بالحسنى ..، وتخاف الله بيه
: الله على حجاياتج شالت مني هم جبال

اخذنا الكلام لحد اتدخل ابو البداله وهوه مزعوج وصاح

: ماخلصتوا ترى اكو غيركم يريد يتصل باهله خلي عدكم ذوق

من الخوف ندى سدت الخط
واني اعتذرت منه وسديت التلفون
——————————-

البارت ٤١٥٠ كلمه

: