السلام عليكم
عجبني البارحه ان اكثر المتابعات ذكروا البلد الي يتابعوني منه
حياكم الله وين متكونون متابعات ومتابعين
وياريت تستمرون بالتصويت
🌹🌹🌹🌹🌹🌹🌹🌹🌹
# للجميلات_حصرا ١٠
#زينب_الموسوي
العاشر
ندى
لو انطينا للعقل اجازه ..وركناه على جنب ... وخلينا العواطف
هيه الي تحكم قرارتنا ...
اكيد راح نتبع نداء القلب ..
وسواء بقناعه مني .. او بمحاوله بالتغاضي عن حقيقه واضحه .. ان جهاد گلبه مو يمي
صغيت لكلام اختي سهير ...
وهيه تقنعني بتبادل الادوار اعتمادا على الشبه
اوصدت ابواب الغرفه عليه ... والشبابيك .. وانبرت تخطب
وتتحدث وتوعض
: ترى انتي مو اول وحده تتزوج واحد كان يحب وحده ومااتزوجها
: المشكله كان يحب اختي ومازال
: من حسن حظج يحب اختج
لان اعرف عنه كل صغيره وجبيره .. شيحب وشيكره
اعرف طبعه واسلوبه .. وراح انطيج ادقق التفاصيل عنه
وصدگيني اسبوع واحد ينساني وينسى حتى اسمي
: احلفي. انتي متحبيه
: اكون صريحه وياج .. وانتي تدرين بكلشي ..اني صح حبيت جهاد وكتلت نفسي حتى ينتبه عليه ويحبني
بس والله من تزوجت مازن .،
مابقت ذرة حب بگلبي لجهاد
حديثها بيه صدق و انفعالاتها اثرت بيه واصبحت على وشك اقتنع وهيه مستمره بالاقناع
: ندى شگد مااگلج الزوج عزيز قليله
شوفي الله سوى العلاقه الزوجيه
بصوره تختلف عن اي علاقه ثانيه .،، علاقه جسد وروح تحسين صرتي مع هذا الانسان روح وحده ... الي تستريه عن امج واختج .، متگدرين تستريه عنه
اغلى مابيج يكون اله وملك
والله من اول ليله ويه مازن نسيت جهاد وعشيرته والخلفوه
سرحت بالخيال وهيه تحجي عن زوجها . ضربتها على كتفه بايدي
: هي لاتجاوزين على جهاد
افتهمتي هذا راح يصير رجلي
ضحكت وهيه تسترجع الگالته
: يا صدك نسيت
ضحكنا سوا .. وذكرتها بشرط ام جهاد المستحيل
: اگلج بقت شغله شذر ونجيب شنو حلها ..
: وج هذي صدك نكته نجيب ياخذ شذر صوندا
ههههه
: بس ترى خوش بنيه وحبابه
ويمكن تطلع نجيب للخارج
: نجيب ميريد يطلع ويترك امي
: انتي وافقي على جهاد واليوم اني وامي نقنع نجيب
: اني اكيد موافقه .،
وبعد موافقتي
استلمت حملة اقناع نجيب امي .. وسهير
ماتركله اي منفذ ... امي ويه رجعته من الدوام وهيه تصبله العشى ... وسهير مگابلته وابنها بحضنها . تنومه وتدگ دگه خفيفه على صدره وتحرك رجلها حتى ينام ..
گعد هوه على القنفه ياكل
واني اراقب من الدرج بلا ميشوفني ..، سهير اشرت ل امي براسها ان تبدي الحجي
وامي تفرك باديها. نطقت اول جمله
: يمه نجيب لگيتلك مره
بلا ميشيل ايده او يبدي اي اهتمام .. وبروحه الفكاهيه جاوب
: لگيتيلي ليش شنو النسوان ضايعه
جوابه قلل من حماس امي وزيد حيرتها.
وهذا استدعى تدخل سهير الي تبدو. اشد ثبات من امي
: نجيب شذر
راسا رفع راسه وبقلق
: شذر صوندا شبيه بس لاماتت
: لا اسم الله ماتت شنو
: عبالي خطيه لان اني كل مااشوفها اكول راح تموت
ساد الصمت. ورجع ياكل واستفسر من سهير
: شبيها صوندا ؟
بصوت متقطع وحركة ايد اسرع على صدر ابنها جاوبت
: هيه العروس الك شنو رائيك
ضحك وبقى يضحك لحد دمعت عيونه ويضحك ويحجي
: اني ههه ازوج صوندا هههه شاتزوج منها صدوك تحجون لو نكته
انسحبت سهير من محاولة الاقناع رغم وجودها بالجلسه
وبقى دور امي
: ليش يمه شبيها شذر اشو شرف وشطاره عينها متنشال عن الگاع مابيها شي يتعيب
: اي صدك مابيها شي هيه عباره عن ماكو
يمه الله يخليج بلا هالمقدمات مال الشرف والاخلاق .، احجيلي المخفي
ردت سهير .. بگلمه تحجيها والثانيه تبلعها
: جهاد مكلف امه تخطبله ندى
قاطعها
: عوفوا جهاد بحاله مو كل شويه مسويات مزاد عليه
واحجن الصدك .. انتن تريدن جهاد يخطب ندى
والامهات اتفقن بينهن
شذر تاخذ نجيب بالمقابل صح
هزت راسها امي ( اي )
وهو رجع للضحك
: زين ميصير اخذ ماسه او جوهره بمكانها
: لايمه ميصير وام جهاد تسلم عليك وتكول ميخسر لامهر ولانيشان واله مني ست اوراق
رفع عينه بتعجب على كلام امي
: يعني امها المخططه ..، واكيد جهاد عنده خبر
حسيته حتى الاكل نسدت نفسه عنه وصاح( ندى ندى تعالي )
اجيت اسحب الخطوه گوه
اشرلي اگعدي .. گعدت يم سهير مقابيله
عيونه عليه وبلا ميرمش سالني
: موافقه على هالمشروع . اذا موافقه خلي ابالج جهاد كان رايد سهير يعني انتي بديله
وراح تروحين غربه لا ام ولااخ ولااخت يمج حتى الاتصال صعب
بقيت ساكته وهوه ينتظر جواب
جاوبت سهير بدالي
: مدام سكتت يعني موافقه خويه
وفاجأنه برده
: واني موافق. لان جهاد صديقي
واريد احافظ على هالصداقه للابد .. اختي عنده واخته عندي
: ضحكت امي واني متفاجأه بالگاله
وسهير اثنت عليه
: والله خويه متلگه احسن منها شريفه وشاطره وربت گدام عيونه. لاعدها زايده ولاناقصه حجايه متحجي واذا على الضعف هوايه بنات بعد الزواج تسمن
باوعنا تلاثتنا ..، ومالت نبرة صوته للجديه والحزن
: يمه انتي واخواتي الي راغبات هالزواج .. لاتنسن هالشي
اني مامفكر بالزواج لحد معين يتخرج من الكليه واخواتي يتزوجن ... واذا اخذها فجبر خواطر مالي نفس بيها
بس النسوان اذا رادن شي يسونه ...
والي صار قبل. غير العلاقه بينا وبين اهل جهاد .. واذا ارفض هسه ... معناها اني السبب بالخراب هالمره
كمل هالحجي وانسحب من يمنا .. بدل ملابسه وطلع من البيت ..،
شعور بالتقصير اتجاهه اعترانا تلاثتنا لكن ماخلانا نتراجع
وبلغنا ام جهاد موافقه نجيب
....................................
نجيب
طلعت من البيت ... محتار بلي سمعته من امي واخواتي ..، لكن ممستغرب .. الحصار غير قيم الناس وتفكيرها ،.، الشباب بل اردن تهاجر يشتغلون شهريين
بمطاعم ... واعمال بناء حتى يصرفون على اهلهم ... الماده اصبحت شحيحه ... والامراض تفتك بالصغار والكبار
شذر لايمكن بيوم تحرك مشاعري. مافد يوم نظرت الها نظره اشتهاء ... وعلى النقيض تماما عن الي اعرفهن من بنات الليل ..، والي يجذبني الهن
وگفت بوسط الشارع ،،، وگف ولد من المنطقه اسمه رائد عنده تكسي طلع راسه من الزجاج
سالني .. (وين رايح اوصلك )
صار اسبوعين من وعدت رغد اهزمها ورجعت بكلامي واتصلت بيها اعتذرت
وتعاركنا وسدت التلفون
خطر ابالي اروح ... ذبحني الشوگ اله .. واستنفذت مقاومتي لحنين گلبي
جاوبه شوگي وحنيني واني افتح الباب واصعد بالتكسي
: سوق واني ادليك
حرك سيارته... وطلع بيه
اباوع على الشوارع والساحات
الناس بدت ترجع لبيوتها و تلملم بسطياتها الي تحوي اغراض بيتها من تحف ،.، صيني
فراشات .. اثاث ... تلفزيونات ..،
حتى حديد الشبابيك الناس صارت تستغني عن الشبابيك وتسد مكاناتها بكارتون واقمشه متهالكه ..،
هالصور دفعتني. لقناعه
شذر هيه الجدار الي راح استند عليه لحد يمر هالحصار
واذا على الانوثه والجمال ...
عندي الي يعوضني عنها ...
انطيت رائد فلوسه ..، وگتله نزلني. اهنا .. نزلني بمكان قريب من المزرعه مشيت وگفت گبال
الباب متردد ادگه ..
اخاف الحارس يسمع اعرف هوه مسافر للعماره
بمهمه من الدوله ... ومع ذلك خايف من بطشه لو عرف
دگيت الباب خفيف .. وانتظرت تجاوب
من خلف الباب اجاني صوتها
: خلي الاغراض برى وروح
اتصورت الحارس
اقتربت من الباب وبصوت ناصي
: افتحي الباب رغد اني نجيب
شهگت. خوف ( نجيب )
وفتحت الباب راسا ... مجرد طل وجهها دفعت نفسي الها وسديت الباب برجلي .. وشلتها
لحد داخل البيت ... دموعها تنزل على رگبتي .. واديها ماسكتني مثل طفل ملتف حول
حضن والده ... نزلتها واباوع الها بعيون تمليها الصبا والهوى
وجهه ذبلان .. والجمال مرهق
: رغد شتريدين اكول حتى تسامحيني
بجت وراسها داخل الجزء المفتوح من قميصي
: لاتحجي شي .. بس مو هذا المرجي منك ..، گتلي احبج وصدگتك وگتلي اهزمج وصدگتك ولك اني هم احبك
ليش متصدگني اگدر انهزم ويه الحارس الذابح نفسه عليه
بس احبك انت
ابتعدت مسافه عني .. واندارت رفعت ثيابها .،، حتى اشوف اثار الضرب على ضهرها ..، واكتافها
واثار حرق على صدرها. ورجليها
: شوف هذا ضرب البارحه
: ابن الكلب ليش هيج
: شحجيلك عن الي ديسويه بيه
كل قهره من زوجته يطلعه بيه
لان عاجز ... يضرب ويحرك
: رغد تنهزمين ويايه للخارج عندج جواز
استغربت العرض الجديد
: الخارج .. وامك واخواتك ؟!
گعدت يمي على الارض مستسلمه لعبث اديه ... وقبلاتي وحسراتي
حجيتلها موضوع شذر
: رغد راح اتزوجها علمودج ..تطلعني للخارج واطلبج انتي مااگدر اعيش بلياج
والله مااگدر ..
اخذتها بين اديه ومسترسل احجي وهيه تسمع
: نطلع. ل امريكا اني وياج وهناك محد يعرفج ويعرفني ونبدي من جديد
: اخاف تتزوجها وتنساني
: اني انساج ولج لو. اگدر انسى نسيتج ويه وحده اثنين شو ماليات الشوارع
مسحت دموعها وگعدت تسالني
: شوكت تتزوجها
: فد شهر .، وانتي باجر
ادبرلج غرفه زغيره وتنهزمين
: ياريت. .. بس ترى هوه يعرف كنت صديقي واخاف يبليك
: انتي معليج اني اشوف حل بعدين المهم قبل ليرجع تكونين مهزومه
خططنا. للهروب ..، وعدتها. باقرب وقت ..،
بقيت عدها.. وسهرنا سوا ...
لحد الفجر
قبل لا اودعها .،، وعدتها ادور غرفه بالشيخ عمر
وارجع اخذها ..
سمعت حجيي واقتربت مني نزلت على ايدي تريد تبوسها
سحبت ايدي وخليتها على خدها
وبعيونها الدامعه ترجتني
: شيصير اذا تعقد عليه ... عقد شيخ وبس
: رغد. ودي بس خايف ماتلتزمين ويايه وتضحكين اهلي
مخالتني اكمل
: هالمره. صادقه اني احبك
والي شفته من لطيف كرهني نفسي
والله هالمره ماخلفلك وعد
: خليني اهزمج اول مره وبعدين
يصير حل
بجت من الخوف وترجتني ابقى للصبح عدها
: والحارس اخاف يشوفني
: معليك منه .. اني اصيحه واوديه للسوك بين متطلع
رجعنا للسرير .. واخذتنا النعاس
بالاربعه الفجر
وكفت سيارة لطيف سمعت صوتها اتصورته حلم
فزيت مرعوب .. البس بملابسي
وهيه اخذت كلشي بالغرفه يدل
على معاشره
ودخلت للحمام
واني حذائي بايدي تسللت من السياج وطلعت من البيت ..
وبقيت ربع ساعه متخبي بجانب التنور
لحد انهزمت ....
رحت للبيت افكر بطريقه اهزمها
باعتراف داخل نفسي اني احبها
وصارت تغنيني عن كل النسوان
واني مو احسن منها بشي ..
واصبح القرار اخلصها من لطيف
...............................
جهاد
بمكالمه مع والدتي ... وصلتلي اخبار. غير قابله للتصديق
نجيب رايد شذر
وامي مصره على خطوبتي لندى
: يمه فهميني نجيب ليش. يريد شذر نجيب صديقي واعرفه واعرف يدور جمال
: يمه هالحجي من جان طايش
هسه كبر وعقل ورايد شذر
لان شرف واخلاق وتربيه
: والله اذا صدك هالحجي فنجيب طلع اسم على مسمى
وفعلا صديق وفي
: بقت انت وندى شنو رائيك
البنيه تشبه اختها واحلى منها
واشطر وماعدها تكبر مثل ذيج
: يمه هالبنات مامقسومه وحده منهم اليه صار مرتين. ومتصير
: خلي احجيلك ليش سهير اتزوجت ورفضتك
لان تدري اختها تحبك رفضتك
: هالحجي مو صدك لان ندى مگالته اليه من جنت
ماگدرت اكمل
: من جنت شنو يمه
: ماكو شي يمه .. اريد احجي ويه البنيه اول وافهمها ضروفي
: شبيها ضروفك يمه .. الحمد لله عندك خير وعايش بالخارج
خالي مختلي منو متقبل بيك
: ميخالف يمه احجي وياه افضل ..
مرت يومين افكر بالموضوع ومتردد .. مامقتنع ان ندى توافق واني الي نسيتها وفكرت بسهير
موفقتها اكبر دليل على حبها اليه
عزيز افتهم من صفناتي بالعمل
عندي حسبه شاغله بالي
واني وياه نتناقش بكلشي
: متگلي شمالك صارلك يومين تصفن
شني عروس جديده
: تريد الصدك اي
ضحك وبروحه المرحه تحسر
: ولك هنيالك كليوم تطلعلك وحده تريدك .. جا مثل حضي
: اگلك هسه خليني من حضك واسمعني تتذكر من حجيتلك على ندى
: اخت سهير اي اتذكرها شمالها
: امي خاطبتها اليه .. واني متردد لان البنيه احس هالزواج بيه ظلم الها
: سهله اتصل بالبنيه واحجيلها على كلشي .، واذا رفضت من حقها .. واذا وافقت ماكو ظلم
بالموضوع
:خايف اتصل تعاتبني لان نسيتها
: خايب هوه اكو احلى من معاتب العشاگ بس انت مو شكول حب .. مال سهير يوم تحييك وعشره تموتك
: ترى بديت تخربط واني ساكت لان اعرفك تحب تتشاقى
ضحك ورد
: خايب انه صويحبك واريد مصلحتك
وسمعت كلامه واتصلت بندى
الاتصال اتفقت ويه امي تبلغها
جاوبت بكلمة الوووو
ضاعت الكلمات مني وردت گالت
: الوووو جهاد تسمعني
: هلووو ندى اسمعج شلونج
: اسال عليك .. وانت شلونك
: بخير .. ندى بلا متعاتبين اعرف نفسي غلطان بحقج .. وخالفت وعدي وياج
: مااعاتب مدام تگول غلطان
واترك اي كلام يضايقك ويضايقني ..
: ندى امي تريد تخطبج شتگولين
: امك بس وانت
: ندى اريدج مو زوجه فقط اريدج انسانه تساندني وتوكف ويايه وتتحمل ضروفي وتعبي
: سلامتك من التعب .. حبيبي
ميهمني شمتكون ظروفك اني وياك واريدك .. وامي دائما تكول مثل ( غربوهن وجربوهن ) وبقى الامر بيدك انت
: شتريدين اگول وانتي كل كلمه منج تمحي الف جرح والف اه
: ليش صوتك حزين وكلماتك تقهر .. شبيك جهاد احجيلي
لاتكون مريض
: لا لا مو مريض بس شويه تعبان ومن تجيين راح تعرفين كلشي
: اجي واشوفك اكيد راح يكون ذاك اليوم اسعد ايام عمري
: ان شاء الله نونو
حديثها انتشلني من يأس وغربه
ومرض واوجاع .. تخيلت هالكون مابيه الا اني وندى
وحلقنا فوق السحب .. وارتفعنا نتراقص بموسيقى ناعمه على وجهه القمر
ودعتني بجمله ( راح اعد الايام لشوفتك ) وجاوبتها
( واني مثلج )
نسيت حتى احجيلها الحقيقه .. وعشت بخيال
لدرجه نمت والابتسامه على وجهي
الصبح اتصلت باهلي وبلغت امي
:يمه انتم اذا موافقين عليها اني ماعندي مانع
وعلى الاقل يراعون شذر اذا تزوجت ندى
: فدوه اروحلك يمه واروح لگلبك الجبير
: اسم الله عليج يمه
گوليلي محتاجه شي ادزه
ترددت وهالتردد كل مره معناه وراه طلب يكسر الظهر
: خاف ماعندك يمه
: لا عندي خير من الله بس گولي
: بعد اختك شذر. يحتاجلها مساعده ونجيب ماعده بس هالراتب.
:صار يمه كولي لشذر تدلل
راح ادز عشر اوراق منها مهر لندى والباقي لشذر
القرار بخطوبة. ندى انخذته عبر مكالمة تلفون .. وبعد المكالمه فكرت بهذا القرار
ندى في فترة اعترفت تحبني
تحب جهاد .. الي متعرف وضعه وشكله وعملياته هسه
.. محتاج انسانه تشاركني همي وتعبي وحياتي
وخايفه هالانسانه اتحول خيبه
لكل امالها واحلامها ..،
تركت الخوف ..، واعتمدت على الدعاء ... ابتهل لربنا تتقبل ..
وادعيه يشفيني واكمل عملياتي خلال وقت انتظارها لاجراءات السفر
مر شهر وصلتني الاخبار بخطوبة شذر لنجيب ... وانخطبت ندى اليه
ودزوا صور الخطوبه والعقد
على العنوان ...
وباول مكالمه ويه ندى بعد الخطوبه الرسمي طلبت صوري الحديثه
ومكان عندي غير اتحجج
: خليها هسه الصور. تجين وتشوفيني قابل انتي مشايفتني
: صحيح شايفتك بس حبيت اشوف صورك الجديده واراويهم لصديقاتي
؛ ان شاء الله بمرور الوقت ادزلج صور
ولحت على الصور ودخلت بالغزل طول وعرض
: اريد اطمئن بعدك اسمر وسمارك تغار منه خيوط الشمس
وعيونك شاطي حنيه ..
بعده طولك وراسك العالي اعلى من الكمر
مااعرف اجاوبها وتحسرت على حالي ولگيت مخرج للموقف وهيه تگلي
: جهاد حبيبي تسمعني
: اگلج المكالمه غاليه اهنا لاتضيعيها بغزل وحجي فارغ
ضحكت وحسيت بخفة دمها
تقاوم بيها حدة ردودي وجاوبتني
: هسه تاكدت انت جهاد ماتغيرت .، بحر عميق
وايضا واجهت عباراتها بجديه مصطنعه
:خلي احجيلج عن المعامله ..،
الجواز لازم يكون باسم سهير
لان اذا اقدم طلب جديد راح يطول الموضوع وبس اخذ موافقه الهجره تطلعين للاردن
تسوين مقابله
وبعدها يحددون موعد سفر
يعني الموضوع ميطول من تلث ل اربع اشهر
المهم اسمج بالجواز
شرحتلها كل الامور. حتى تبلغ اهلها وتصير الامور واضحه
وبكل مكالمه اكرر نفس الكلام وهيه تلح على الصور
؛ شذبحتيني بالصور. ترى مفارغ
هالاشياء اني
: وليش عصبي شطلبت اني هيه صور
: اني عصبي اخاف محد گالج
: لا گالولي لاتخاف كلشي گالولي
وماغيروا رائي بيك ... ومهما صار
ابقى احبك .،،
انتظرت الرد وانتظرت
واگفه الكلمه على لساني
وايست تسمعها ..، كملت
: جهاد تتذكر اخر مكالمه قبل الاحداث
گتلي نفتح صفحه بيها ندى وجهاد وبس
بعدك تريد هالصفحه لو غيرت رائيك
: اكيد لعد ليش خطبتج
: بس انت خطبت سهير. وخايفه دتعاملني بعصبيه لان بعدك تريدها
: اكلج من هسه سهير طلعيها من حياتنا .، لاتظلين بمقارنه وياها .. ترى الغربه صعبه وحياتي بس شغل وتعب
مفارغ للتفاهات مال تحبني لو تحب سهير
سمعت كسرة گلبها من رد لسانها
: تفاهات ! الحب صار عندك
: اهوووو اكلج المكالمه طولت ومتدرين شگد غاليه
انتي اذا تريدين شي اتصلي بيه من البريد
: يعني تخابرني كل ١٥ يوم عشر دقايق
وانتظرك وحتى متگلي كلمه حلوه
: صدك بطرانه انتي .. يابه راح اگلج كلمة حلوه
صورج تجنن كلش حلوه .. لذلك اغار عليج واريدج تتحجبين لو لاتجين افضل
: صدك تحجي يعني اذا مااتحجب متريدني
: لعد شنو جايبج تتفرج عليج الناس
والوظيفه لاتداومين اذا على الراتب اني ادزه
: لاعفيه جهاد الا الوظيفه اني درست وتعبت حتى اشتغل
: واني هم درست وتعبت وهسه داشتغل بمعمل كيمياويات اليسوه والميسوه يتامر عليه
: يعني راح تنهي المكالمه وكلمتك التمشي
: طبعا كلمتي
يله مع السلامه
تحولت المكالمات مع ندى الى اثير افرغ بيه همي وتعبي
وعدم قدرتي على طلبات اهلي
وهيه تقاوم ردودي بضحكه ونكته وغزل
...................................
شذر
بعمري الي هوه ١٦سنه
مشيت باوامر امي واسمع كلام ابوي
اخواني ... عمتي بيبيتي
ماخالفت ولااعترضت بيوم ...
ومقتنعه ان يريدون مصلحتي ويفهمون اكثر مني ..،
الا خطوبتي من نجيب ... اعترضت وصرخت ،،، وعيطت
وتوسلت بيهم كلهم حتى ام نجيب.
توسلت بيها ( خاله مااريد اتزوج ) وردت عليه ( كل البنات هيج يكولن ..، وبعدين يكيفن )
هالاصرار. من الجميع خلاني اكول لا ول اول مره بحياتي
وافرغ راسي من اي طاعه مفروضه عليه
الي ديسووه اثبتلي
محد يعرف مصلحة الانسان غيره هوه
محد يدري طاقته للتحمل شگد
ومحد يقدر ثمن الكرامه الا صاحبها
وزواجي من نجيب مو من مصلحتي ..، وفوگ طاقتي ..، واستهانه بكرامتي
لذلك مابقى الا اللجوء لجهاد
واگله حقيقة هالزواج
واخذت الرقم واتصلت بالبداله
الي تنطيني رقم خارجي
والبداله جاوبوني
؛ سديه واحنا نتصل بيج من نحصله
هالشي مكنت اعرفه اتصورت راسا احجي وياه سديت التلفون
وكعدت على الدرج انتظر
واراقب حركه اي شخص يقترب من التلفون ..،
بعد عشر دقايق دك التلفون
شاله ثائر ..،
وجاوب
: لاعيني مطالبين خط
لامنريد تسلم تعبانك
سده الخط توجهت نظرات الاتهام اليه
: يمه منو متصل يريد خط ل امريكا
فزعت امي تحشد ضدي
: ماكو غيرها هالعياره شذر
تريد تخرب خطوبة ندى وخطوبتها والفلوس الخسرناها
والناس الي مشينا عليها ماتفكر بيها
بجره وحده بايد ثائر وراشديين
خلني افتر بمكاني
: مره ثانيه لاتتصلين بكيفج
ونجيب الماعاجبج. يسوى راسج اخاف متدرين مو زين لگيتي واحد يرضى بيج
يله ولي منا
واقترب موعد الخطوبه والعقد ..،
اني المناسبات تثير هلع عندي
مجرد كلمة احتفال تسببلي
مغص
مناسبه يعني بنات حلوه .. وشعر وتسريحات ومكياج
وعيون تقارني بهذي وذيج ..
وتنتقد .. وانتقاص وقلت قيمه
بالليل تسللت للهول واتصلت بيت اهل نجيب
جاوبت ندى لان بهذا الوقت تتصور جهاد يتصل بيها
: الووو. منو
: هلووو ندى اني شذر
: هلووو شذر شعجب.
: ندى الله يخليج مكمن اطلب منج طلب
: كولي گدامج تدللين
: الله يخليج مااريد حفله بالعقد وهوسه ونسوان
يعني بس يخلصون الرياجيل من العقد ويطلعون
: زين اگدر اعرف ليش
: مااگدر اگلج ليش
: مااعتقد امي توافق. لان تريد تفرح بنجيب
: تفرح بنجيب ليش خاطبتله منو. الهام شاهين ... لو ناديه الجندي ... الله يخليج اني وانتم نعرف هالخطوبه شلون تمت. واني ساكته رغم ماموافقه
الله يخليج بلغي اهلج مااريد حفله وخبصه .. عود بالعرس
خلي الناس تتفرج عليه
حبت ندى تمارس دور مرة الاخ الودوده عليه ... وتسمعني كلمات ماتعني اليه شي ولاتغير من تفكيري وهيه تقنعني
: ليش هيج. مستصغره روحج
ترى مناقصج شي انتي
ويه المكياج والتسريحه تطلعين تخبلين
ظلت تناقشني وارد عليها
وگدرت ااثر عليها .. وهيه تسمع صوت بكائي
وباليوم الثاني ... تم عقدي
ام نجيب وبناتها .. فقط
اما امي فعزمت نسوان الشارع والشارع الخلفه
ونسوان عمي وبناتهم ..
وخلتني امام امر واقع ل مفر منه
فضه تولت اصعب مهمه بتاريخ عائلتنا ... وهيه تطلعني حلوه
بذلت مساعيها تجر وتعر بشعري ... وانتهت بالاخير برفع شعري. وضع تاج يضيع الفراغات الشاسعه بشعري
واجهدت نفسها في اظهار عيوني الغايره
ورسم شفاه ممحيه
والبدله وردي اربع مرات البسها وتطلع كبيره وترجع عمتي شكريه تخصرها
وطلعني للصاله ندى وفضه ..، اكاد اسمع الهمز والمز ... من اقاربنا ...
واغض نظراتي عنهن وارسل دموعي عتاب ل امي الي خلتني بهالموقف
البنات حولي يرگصن ويستعرضن جمال اجسادهن وشعرهن
بينما احاول اختفي من الوجود
امام محاولات بجعل الفستان الي ارتديه مناسب لعظام اكتافي ... وعظمين بارزين حول وركي هيه كل مااملك من ملامح الجسد
واستمر الوضع المأساوي
لحد سمعت الهلاهل وامي وعمتي يسحبوني خلف برده تفصل النساء عن الرجال
ويكولولي گولي موافقه
امي لازمه ايدي وعمتي ايدها حول وجهي گلت ( موافقه ) ورد عليه صوت رجال
(بارك الله بيج )
ورجعت بطريقي .. اخذوا اديه ندى ونجوى يرگصوني وياهم
حتى تكمل التمثيليه الكوميديا امام اقاربي .. الي سمعت منهن كلمة ( اخذي دكسن ) اكثر مماسمعت كلمه مبروك ... والشي المفرح ان ام نجيب اختصرت الاحراج وانطتني الحلقه البسها بلا مااشوف نجيب او يشوفني
بالليل ... اخذت حبايه دكسن مخلوطه بشراب (برياگتين )
واستمريت تلث ايام. اشرب ... والكابه ملازمتني ..، والنعاس يخلص بيه نهاري وليلي ... والي اكله استفرغه بعد نص ساعه
اليوم الرابع الظهر ... حسيت نار داخل معدتي .. اصرخ من الالم
وحراره بكل جسمي مااعرف مصدرها ...
سرعوا بيه امي وابويه للمستشفى ... بسياره اخوي شهيد ... وصلنا. اهناك الجو بارد وازدحام الردهات ... والمرضى ... وقذارت الممرات
كلها مامنعتني اتمدد على الارض حتى اطفي حراره احشائي الي احسها تنصهر داخلي
وامي تشربني مي وهيه تسمعني اصرخ ( اه الحگوني )
وابويه يتوسل بالممرضات يدخلوني لغرفة الدكتور
بعد ساعه من الالم والصراخ دخلت على دكتور امي ويايه
الدكتور كبير بالعمر ولابس نظارات ... ويصيح مثل المعلمات
: شبيج تصيحين
: دكتور الم بمعدتي راح اموت
سال امي شماكله خلال ٢٤ ساعه
قبل لاتجاوب امي اني حجيتله
: دكتور صار اربع ايام اشرب دكسن مخلوط برياگتين
هز راسه اسف واتجه ل تانيب امي ... وهو يشوف حلقه بايدي
: ها انخطبت وشربتيها دكسن شنو هيه خروف ودتسمنيه للعيد
امي جاوبته
: دكتور. كل البنات تشرب دكسن
تجاهل امي
صاح لممرضه حتى تاخذني للتحليل
والممرضه من شافتني اتالم .. انقهرت عليه ... سوتلي تحليل دم
وبقتني بغرفتها بيها مدفاءه كهربائيه وجهتها عليه ... وگعدت على كرسي اتدفى ... لحد اخذت النتيجه للدكتور واني وياها ... اتبع خطواتها گوه امي تمشيني ... اخذ الدكتور التحليل وصاح ابويه وتجنب الحجي ويه امي
دخل ابويه وقلق من النتيجه
گله الدكتور
: حجي هذي بنتك تريدها لو ماتريدها اذا متريدها خليها تشرب دكسن
لحد تموت وتخلص منها
دنگ ابويه والدكتور يشرح عن حالتي
: البنيه عدها( الانوريسكيا )
هذا مرض يصيب الي فاقدين الشهيه ... وبسبب عصبي نفسي
واي مشهيات ممكن تقتلهم لان السبب بالدماغ ميتقبل اكل نتيجة معاناه طويله مع النحافه والجوع المزمن
حجي راح اكتبلها. ادويه مسكنه للالم وابد لاتخليها تاخذ اي مشهيات
اخذنا الوصفه ... واشترينا الدوى من الممرضات الي يبعنه بسعر اعلى وطلعنا
اخذت الدوى بالبيت ... وبقيت نايمه بالفراش اسبوع كامل
وعمتي وامي يجهزن للعرس ...
يشترن مكياج وملابس واحذيه
واني بداخلي استحيف الفلوس الي ضاعت
اختي فضه تركت بيت عيالها
وصارت مگابلتني .. مره تعلمني على المكياج .. ومره على اللبس
وبطاعه كامله .. واستسلام تام
امشي خلف ارادات كل من شاء
ويجي اخر الليل .. اتمنى يكون هذا حلم واصحه منه
مابقت غير توحه بنت اخويه
تساعدني .. هيه دائما يمي
تاكل شكو اكل ينفرض عليه
اخليها تاكله ابدالي وانطيها خمسين حتى تسكت
: اگلج توحه تروحين لبيت خاله ام نجيب وتدخلين جوى وتگولين بصوت عالي
( شذر بيها مرض معدي )
افتهمتي
شتگولين
: بيها مرض معدي
:عفيه روحي حبابه
اعرف وقت جية نجيب من الشغل
قبل لاتطلع كبستها عروبه
واصرت تسبحها وفشلت الخطه
لكن وصل خبر مرضي ل ام نجيب مااعرف شلون وجتي تشوفني ودخلت للغرفه
وهيه تكول
: شبيها جنتي
وتبوسني ( عين وصابتج يمه )
اني ادري العين على شنو
ازدادت الگابه عندي ... وفقدت شهيتي كليا .... مو فقط للاكل انما للحياة
وارق اصبح انيسي ... يخلص الليل افكر. شلون اراح اتزوج .. وشلون اتحمل اطلع امام الناس
بهالشكل القبيح والملامح المعدومه .. والجسم الهزيل
مامرت ليله عليه من خطوبتي لحد مصباح زفتي مابجيت
الصبح ... مجتمعات الي يحبن والي يكرهن من نسوان اقاربنا
وفضه اختي وندى ... صفطن ثيابي وحاجاتي بجنط واخذنها
لبيت نجيب
وبنات عمي وسهير اخذوني للصالون البنت الي استلمتني
وحده من صاحبات نجيب اعرفها كانت ويانا بالمتوسطه عرفت العريس نجيب
أتأ فأف وتذب كل كلمه. كانما حجاره تفشخ
وسهير تردها..
صارت تگلب بشعري بقوه
: هاي شعرها ميصير تسريحه
وماعندي بدله تجي على قياسها
وتصدت سهير الها بلسان منشار
: صار اسبوع حاجزين عندج
هسه يله حجيتي گولي مااعرف امكيج وفضيها
ترى الصالونات ضاله لاشغل ولاعمل
فضينا. تشتغلين لولا
سكتت البنيه وسهير استمرت تقصف ارض جو
: والله ياالله امد الحصار الي خله حتى المايقرن ويكتبن يشتغل بصالون
وردتها العامله وصارت حرب
طلعت نتائجه بتنتيف شعري
وتغطيت عيوني بالوان قوس قزح
اما البدله فاضطرت سهير تطلع من الصالون وتاخذها لخياط رجالي يخلي لاستيك على الخصر حتى تجي على قياسي
مع ان البدله ايجار ..، لكن ام الصالون اخذت فلوس زايده مقابل اللاستيك والكنيلكس والاسفنج الي عبنه بالحماله
طلعنا من الصالون بسياره تكسي
لبيت اهلي ..، اسمع هلاهل
ومسجل عالي
وسمعت اوامر سهير وهيه تردد
( لاتبجين وتخرب رسمة عينج )
اذاني صارت توش ... وصوتي اختفى ... وحنجي يرجف
وصوت الهورنات ... نشف كم قطرة الدم الباقيه عندي
مع دخول نجيب بالزفه واصحابه وامه
ركزت بشي واحد واني مغمضه عيوني .. اطلب معجزه الاهيه
تلغي هالزواج ... مثل ميصير بالافلام
وبقيت مغمضه ..، دارت الارض فتحت عيني ... نجيب يااخذني من ايدي ويمشي ... وامشي وياه .... الاحساس توقف ..، والكل يتحرك امامي كانما حركه بطيئه ... ردت التفت على امي واخواتي ..، يمكن وحده تگلي ارجعي
شفتهن گدامي يبتسمن ... وامي تبوس نجيب
قبل لا اطلع. للشارع اجاني انقاذ من ام نجيب وهيه تشمر عليه غطاء ابيض
اتنفست مجرد لامس وجهي
وتمنيت اختفي ... وبقيت ماسكه بالغطى حتى داخل سيارة الزفه
ومااعرف منو بالسياره بس سمعت صوت نجيب والسايق وافتهمت من حديثهم ان السايق شرطي وياه
وهمه يتحدثون عن اسماء الضباط الي الموجودين بالزفه
وعن حادث قتل
بقت السياره تفتر وتوگف شويه
وبعدها تمشي
دخت ..، وصخنت
بعدها بكم دقيقه ... رجعونا لبيت نجيب
وبدخولي. رفعوا الغطى
وگعدوني امي وام نجيب ..، كدام النسوان
اللحظات الي اكرهها .. والكل محدق بيه
واثنين نسوان سمان
جرن ام نجيب من ايدها .. ودخلنها الغرفه ومخنزرات عليه
يمكن بسطنها من شافني
وهالشي افتهمته بعد ماطلعت ام نجيب هنه لبسن عبيهن وتركن العرس
امي بقت ويايه .. واني وياها نسمع الحجي
: العروس ضعيفه
:يا موحلوه العريس يخبل
: حظ الفاهيات گاعد
واستمر الحجي حتى الاطفال تقارني بنجيب وبهذي الليله انضافت عقده نفسيه جديده
لعقدي كانت ناقصتني اسمها ( رجلها احلى منها )
الى ان تقدم الاكل انسدت الحلوگ
منظر اللحم فوگ الرز وهوه مكدس ... وريحته ... خلتني على وشك القيء
صحت البنات اخواته .. جتي ندى تركض ..، متمسكه بدور الاخت الفرحانه ل اخوها ماخذ صوندا .. حتى يسهللها الطريق ل امريكا
: ها شذر شبيج
: راح اتقيء.
سمعت امه وامي .. وقررن
يصعدني لغرفتي حسب قولهن
صعدت الدرج ودخلت لغرفه كانت غرفه البنات ... بس تحولن لغرفة امهن ..، وهذي صارت لنجيب
باوعت على الاخشاب ..، شايفتها ..، ومن ركزت تذكرت ام نجيب گالت غرفتها القديمه النجار صبغها وصارت اليه
الكنتور اربع ابواب ... وميز المرايه دائري ومتناسب مع نقشة السرير
وضايفين كم تحفه ورده ومصباح ..، وزاويه عليها
بطانيه منضوده ... وسهير جابت
مندر اسفنج فرشته
وظلن يضحكن مااعرف ليش
طلعن كلهن وبقت سهير على اساس توصيني
اذا اني من حجي سهير خايفه
الا يستر من الباقي
قبل لتحجي كانت في دولكة مي وگلاص صبيت مي وگعدت على السرير ... اشرب ... لان معدتي نار
وهيه تحجي
: عيني شذر مااوصيج انتي عاقله وحبابه
اسمعي الكلام
هزيت راسي ( اي )
لحد هاي اللحظه اني عايشه
لكن باللحظه الي دخلوا صينيه
مليان لحم ... وياها دخلت امي وامه
وبكلمات ثارت الرعب ...
العريس راح يصعد يتعش ويه عروسته
ورادن يطلعن بسرعه : لزمت ايد امي اريد اطلع وياها
الباقيات يضحكن وانهزمن
امي رجعتني نتر لمكاني
: لاتفضحيني گدام الناس ..،
ماافتهمت قصدها
وخزرتني وهيه تطلع
: اكلي لاتظلين ميته من الجوع
انقطع اي ايعاز للحياة بداخلي
وماعدت اسمع ولااشوف
نبضات گلبي اسرع من خيل بسباق طويل
وگعت دموعي ويه فتحت الباب
ودخول نجيب
—-/——————
باجر نكمل ... بارت عن حياة شذر الزوجيه
باعتبار بقية الابطال كلهم في حالة انتظار
ندى وجهاد ينتظرون السفر
وسهير تنتظر خروج مازن من السجن
:
: