" ငါတို့ ၃ယောက်ဒီလိုတစ်ခါလေးတွေ့ရဖို့အရေး အတော်လေးကို ချိန်းလိုက်ကြရတယ်နော်.... "
ဇာလီတင့်ကပြောတော့ ဇွဲ ကထရယ်ပြီး
" ဟုတ်ပါ့ကွာ .... ငါက အားပြန်တော့ နင်တို့ ၂ယောက်က မအားပြန်ဘူး ... ဒီတစ်ခါလေးတွေ့ရဖို့အရေး ၄ခေါက်လောက်ချိန်းလိုက်ရတယ်.... "
စကားလေးပြောလိုက်ရှေ့ကအာလူးချောင်းကြော်လေးတွေကောက်စားလိုက်နဲ့ သူငယ်ချင်း ၃ယောက်သား ကန်ဘောင်ဘေးက ဆိုင်တစ်ဆိုင်မှာထိုင်ရင်းလေညှင်းခံနေကြသည်။
" ကန်ဘောင်က ဒီလိုညနေစောင်းလေးဆို ထိုင်လို့ကောင်းတယ်ဟ ....လေလေးတဖြူးဖြူးနဲ့ရှယ်ပဲ .... "
ဇာလီတင့်ပြောတော့ ဇွဲကခေါင်းလေးညိမ့်ပြီးထောက်ခံ၏ ။
" ငါကတော့ ဒီကန်ဘောင်ကိုမရောက်ဖြစ်ခဲ့တာ ၁၃ နှစ်တောင်ကြာခဲ့ပြီ .... အရင်ကထက်တော့ နည်းနည်းပြောင်းလဲသွားသလိုပဲ ..... "
မိုး ကန်ရေပြင်ကို မျက်စိတစ်ဆုံးငေးကြည့်ရင်းပြောလိုက်တော့ ဇွဲ က
"အေးလေ ကန်ဘောင်လျှောက်လမ်းတစ်လျှောက်မှာအုတ်ဘောင်တွေလုပ်လိုက်ပြီလေ .... "
" ဟက်.... ဒါလေးပဲပြောင်းလဲသွားတာပါ ..... "
ဇာလီတင့်ရယ်ပြီး အာလူးချောင်းကြော်တွေကို ဝါးစားနေပြန်သည်။ ပြီးတော့ရှေ့ချထားတဲ့ အအေးပုလင်းကိုမော့သောက်နေ၏ ။
" နင်ဆေးရုံမှာ အလုပ်ဝင်နေတာ အဆင်ပြေရဲ့လား မိုး ? "
ဇွဲ ရဲ့မေးခွန်းကို မိုးခေါင်းလေးညိမ့်ပြီး ပြန်ဖြေလိုက်သည်။
"အော်ဒါနဲ့ ..... နင်တို့ကိုပြောရဦးမယ်.... "
"အေးပြောလေ ... "
" ဘာများတုန်း မိမိုး ? "
သူကပြောစရာရှိတယ်လို့ပြောလိုက်တော့ ၂ကောင်သား သူ့ကိုသေသေချာချာ ကြည့်နေလေရဲ့ ။
"နောက်၃ ရက်နေရင်ငါ မ ရဲ့သမီးအကြီးလေးနွေးနေခြည်သော်လေးကို operation လုပ်ပေးရမယ်.... "
သူပြောလိုက်တော့ ၂ယောက်လုံး ပြူးတူးပြဲတဲ ဖြစ်ကုန်ကြသည်။
" ဟမ်တီချယ်လင်း ရဲ့ သမီးကြီး ? ဟုတ်လား မိမိုး ? "
" ဟုတ်တယ်ဇာလီ .... ပြီးခဲ့တဲ့ နှစ်ပတ်လောက်က မ ရဲ့သမီးနွေးလေး ငါတို့ဆေးရုံရဲ့ အရေးပေါ်ဌာနကို Heart attack ဖြစ်ပြီးရောက်လာတယ်...နွေးလေးကမွေးရာပါနှလုံးအဆို့ရှင်မကောင်းတာလေ ... "
" သနားပါတယ်ကွာ .... ငယ်ငယ်ရွယ်ရွယ်နဲ့ .... ငါတို့ တီချယ်လင်းတော့တော်တော်လေး စိတ်မကောင်းဖြစ်နေမှာပဲ .... "
" ဟုတ်တယ်နော်ငဇွဲ ...အေးဟာ ငါတို့ ၂ယောက်လဲ တီချယ်လင်း နဲ့ လာတွေ့ဦးမှပါ ... အခု နင်တို့ဆေးရုံမှာပဲလား ? "
" ဟုတ်တယ်..... "
" ဒါဆို နင်အခု တီချယ်လင်း နဲ့ပြန်ပြီး စကားအခေါ်အပြောရှိနေကြပြီပေါ့နော်မိမိုး ? "
ဇာလီတင့်မေးတော့ မိုးခေါင်းလေးပဲ ညိမ့်ပြလိုက်ပြီး
"အင်း .... "
သူပြောတော့ ဇွဲ ကသူ့ကိုသေချာလှမ်းကြည့်ရင်း
" နင်အဆင်ကောပြေရဲ့လား မိုး ? "
မိုး ခပ်သဲ့သဲ့လေးတစ်ချက်ပြုံးပြရင်း
"ပြေပါတယ်.... ငါအခုအချိန်မှာ သူ့သမီးလေးကို အကောင်းဆုံးကြိုးစား ကုသပေးဖို့ပဲခေါင်းထဲရှိတယ်.... သူ့သမီးလေး ပြန်ကျန်းမာလာတာကို ကြည့်ပြီး မ စိတ်ချမ်းချမ်းသာသာ ဖြစ်နေတာကိုပဲ ငါမြင်ချင်တယ်ဟာ .... "
ရှေ့က အအေးဖန်ခွက်ထဲကို ကိုကာကိုလာ ထပ်ဖြည့်ထည့်ပြီးမော့သောက်နေတဲ့ မိုး ကို ဇွဲ နဲ့ ဇာလီ တို့ ၂ယောက်ကြည့်ရင်း ရင်မောမိကြရပြန်သည်။
X X X X X X X X X
တစ်ယောက်ထဲ ကုတင်လေးပေါ် ငုတ်တုတ်ထိုင်နေတဲ့နွေးလေး အနားသို့ လက်ထောက်ဆရာဝန်မလေး ချယ်ရီမေရောက်လာပြီး
" တစ်ယောက်ထဲလား ? ဘယ်သူမှ မရှိဘူးလား? "
" ဟုတ်ကဲ့ဒေါက်တာ ......မေမေက အိမ်ခဏပြန်သွားတယ်...ဖေဖေကတော့ဆေးဝယ်စရာရှိလို့ အောက်ထပ်ခဏဆင်းသွားပါတယ်ရှင့်.... "
"အော်ဟုတ်လား ... ဒါဆို ညီမလေးဖေဖေ ပြန်ရောက်လာတဲ့အခါ မမ ဆီကိုလွှတ်လိုက်နော်.... သန်ဘက်ခါ ခွဲစိတ်ဖို့အတွက်လိုအပ်တာလေးတွေပြောချင်လို့ .. "
"အော်ဟုတ်ကဲ့ ...... "
ဆရာဝန်မလေး လာပြောသွားပြီး သိပ်မကြာလိုက်တေဇာ သူ့သမီးငယ်လေးလက်ကိုဆွဲပြီး ပြန်ရောက်လာသည်။
" မမရော့ ..... "
ပြည့်လေးကသူ့လက်ထဲကရေခဲမုန့်ခွက်ကလေးတစ်ခုကို သူ့အမကိုလှမ်းပေးနေသည်။
" မမ မစားတော့ဘူးနော်ပြည့်လေးပဲ ဝအောင်စား.... "
သူ့ညီမလေးကို ပြုံးပြုံးလေးပြောလိုက်ပြီးနောက်
"ဖေဖေစောစောက သမီးကို ဟိုကောင်တာမှာ ရပ်နေတဲ့ ဆရာဝန်အမကလာပြောသွားတယ်...ဖေဖေ့ကိုခဏလောက်လာတွေ့ခိုင်းတယ်.... "
"ဟေ ဟုတ်လား .... ဘာလို့တဲ့လဲ သမီး ? "
" သမီး သန်ဘက်ခါ ခွဲစိတ်ဖို့အတွက်လိုအပ်တာလေးတွေပြောထားမလို့တဲ့ ..... "
"အော်အေးအေး ... ဒါဆိုဖေဖေသွားလိုက်ဦးမယ်.... ပြည့်လေး ဒီမှာပဲ မမနဲ့အတူတူနေခဲ့နော်... "
သူ့သမီး ပြည့်လေးကိုနွေးလေးရဲ့ ကုတင်ခြေရင်းပေါ်သို့ တင်ပေးလိုက်ပြီးတေဇာ ထိုနားမှ ထွက်လာခဲ့သည်။
"ဒေါက်တာ ... ကျွန်တော်နွေးနေခြည်သော်ရဲ့ အဖေပါခင်ဗျ .... "
တေဇာဘေးမှာလာရပ်ပြီးပြောတော့ ချယ်ရီမေဘေးသို့လှည့်လိုက်ပြီး
"အော်ဟုတ်ကဲ့ ..... တစ်ခြားတော့မဟုတ်ပါဘူး ... သန်ဘက်ခါနွေးနေခြည်သော်operation လုပ်တဲ့ခါကျရင်လိုအပ်မဲ့သွေးကိုအခုထဲက တခါထဲ အလှူရှင်ကြိုရှာထားဖို့ပြောမလို့ပါ .... လူနာအတွက်သွေးပေးမဲ့လူကိုလဲ လိုအပ်တဲ့သွေးစစ်ချက်တွေ ကြိုလုပ်ထားရမှာမို့လေ ... "
"အော်ဟုတ်ကဲ့ ခင်ဗျ .... သမီးလေးက Bသွေးဆိုတော့ သူ့အမေကိုယ်တိုင်ပဲပေးဖြစ်မယ်ထင်တယ်ဒေါက်တာ ... "
တေဇာ အဲ့လိုပြောတော့ ချယ်ရီမေကြောင်တောင်တောင်လေးဖြစ်ပြီးခေါင်းကုပ်လိုက်မိသည်။
" ရှင်!နွေးနေခြည်သော်က Bသွေးမဟုတ်ဘူးရှင့်...... Aသွေးပါ .... ဟိုတစ်နေ့ကပဲ ခွဲစိတ်ဖို့အတွက်လိုအပ်တာလေးတွေ ထပ်စစ်ဆေးထားတဲ့အထဲမှာတောင်မှ သေချာအောင်ကလေးရဲ့သွေးအမျိုးအစားကိုပါ ထပ်ထည့်စစ်ထားသေးတယ်လေ ..... "
" ဗျာ ....... "
တေဇာ ရုတ်တရက်မထင်မှတ်ထားတဲ့ အကြောင်းအရာတစ်ခုကို ကြားသိလိုက်ရတာမို့ မျက်လုံးပြူးသွားခဲ့သည်။
ပြီးတော့ ဇဝေဇဝါဖြစ်နေသည့်ပုံဖြင့်
" မဟုတ်သေးဘူးနော်ဒေါက်တာ တခုခုတော့ မှားနေပြီထင်တယ်.... ကျွန်တော်တို့မွေးကတည်းက သမီးလေးရဲ့သွေးကို စစ်ခဲ့ဖူးတာ Bသွေးပါ .... သမီးရဲ့မှတ်ပုံတင်ထဲမှာလဲ Bသွေးပဲဗျ .... "
တေဇာ တရစပ်ပြန်ရှင်းပြနေသည်ကို ချယ်ရီမေ မျက်မှောင်ကြုပ်ကြည့်ရင်း
" ကျွန်မတို့ဘက်ကလဲသေချာစစ်ဆေးပြီးသားပါရှင့်... ဒီကအကိုမယုံရင်ကလေးရဲ့စစ်ဆေးချက်မှတ်တမ်းမှာ ပြန်ကြည့်လို့ရပါတယ်...... "
ချယ်ရီမေ ဘက်ကလဲသေချာခိုင်လုံစွာ မှတ်တမ်းနဲ့ပြမယ်ဆိုတော့တေဇာတော်တော်လေး နားလည်ရခက်နေလေသည်။နွေးလေးမွေးတဲ့အချိန်မှာတေဇာ အနားမရှိခဲ့ပေမဲ့ သမီးလေးရဲ့သွေးအမျိုးအစားဟာ Bသွေးမှန်းတော့ သူသိပါသေးတယ်။ သမီးဖြစ်သူရဲ့သွေးအမျိုးအစားကို မှားသိရလောက်မည့်ဖခင်တစ်ယောက်တော့ အဖြစ်မခံနိုင်ပါ ။ သူ့ဘက်ကလဲ ကျိန်းသေပါသည်။ ဘာလို့လဲဆိုတော့ သူ့သွေးက Oသွေးဖြစ်ပြီး သူ့မိန်းမရဲ့သွေးက Bသွေးဖြစ်သည်။ ဒါ့ကြောင့်သမီးကြီးနွေးနေခြည်သော်ရဲ့သွေးအမျိုးအစားဟာ ဘယ်လိုနည်းနဲ့မှ Aသွေးမဖြစ်နိုင်ပေ ။ မှားမဲ့မှားဆေးရုံကစစ်ဆေးချက်သာ မှားနိုင်မည်ဟု မုချတွေးထင်နေမိသည်။
"ဒေါက်တာကျေးဇူးပြုပြီးကျွန်တော့ သမီးလေးရဲ့သွေးအမျိုးအစားကိုနောက်တစ်ကြိမ်ထပ်စစ်ဆေးပေးပါဗျာ .... "
တေဇာ အတင်းထပ်တောင်းဆိုသဖြင့်ချယ်ရီမေ လဲခေါင်းကုပ်နေမိသည်။ ထိုအချိန်အနားသို့ မိုးရောက်လာကာ
" ဘာဖြစ်လို့လဲ ချယ်ရီ ? "
မိုး အသံကြောင့်ချယ်ရီ ချက်ချင်း မိုး ကိုလှည့်ကြည့်လိုက်သည်။တေဇာ့ရဲ့အကြည့်လဲ မိုး ထံသို့ရုတ်ချည်းရောက်ရှိသွား၏ ။
" မမ ... ဒီကအကိုကနွေးနေခြည်သော်ရဲ့သွေးအမျိုးအစားက Bသွေးလို့ပြောနေတယ်.... ဒါပေမဲ့ ဟိုတနေ့ကပဲ မမ operation အတွက်တိကျတဲ့ result ရအောင်ဆိုပြီး ထပ်စစ်ခိုင်းလို့ ညီမတို့သေချာစစ်ဆေးပြီးပါပြီ .... ဓာတ်ခွဲခန်းကပို့တဲ့ result က A ပါ မမ ..... "
" အင်း ........ "
မိုးခေါင်းလေးတစ်ချက်ညိမ့်လိုက်တော့တေဇာ က
" မဟုတ်သေးဘူး ညီမလေး Hanna ....ဆေးရုံက စစ်ဆေးချက်အဖြေက တခုခုလွဲမှားနေတယ်လို့တော့ အကိုထင်တယ်... အကုိ့သမီးလေးက Bသွေးပါ .... Aသွေးဖြစ်စရာမကြောင်းလဲ လုံးဝမရှိဘူး ညီမလေး .... "
တေဇာ့ ဘက်ကလဲ ယုံကြည်မှုအပြည့်နဲ့ သူတို့ဆေးရုံက result မှားနေသည့်ပုံစံဖြင့်ကျိန်းသေပေါက်ပြောနေတာမို့ ချယ်ရီမေ သက်ပြင်းထပ်ချမိပြန်သည်။ မိုး ကတော့ ဘာမှထပ်တွေးမနေပဲ
" ချယ်ရီ .... "
" ဟုတ်ကဲ့ မမ .... "
" ထပ်စစ်ကြည့်လိုက်ပါ .... ပိုပြီးတော့ တိကျသွားအောင်လို့ ..... "
မိုး ရဲ့စကားတစ်ခွန်းထဲကြောင့်ချယ်ရီမေခေါင်းလေးညိမ့်လိုက်ရလေသည်။
" ဟုတ်ကဲ့ပါ မမ ..... "
ဒါနဲ့ပဲ ဓာတ်ခွဲခန်းက ကျွမ်းကျင်သူတစ်ယောက်ကိုခေါ်ပြီး စစ်ဆေးမှုထပ်မံပြုလုပ်ခဲ့ရသည်။ သို့ပေမဲ့ ထပ်ထွက်လာတဲ့ အဖြေကလဲတေဇာထင်ထားသလို Bသွေးမဟုတ်ပဲ Aသွေးဖြစ်နေတာမို့တေဇာတော်တော်လေး အံ့သြတုန်လှုပ်သွားရသည်။
သမီးရှေ့မှာတော့ သူ့ရဲ့ကိုယ်ထဲကဖြစ်ပေါ်နေတဲ့ စိတ်ခံစားချက်တွေကို ဖုံးဖိထားလေသည်။
" လုံးဝမဖြစ်နိုင်ဘူး .... သမီးရဲ့သွေးက Bသွေး မဟုတ်ပဲ Aသွေးတဲ့လား ... "
" ဟာ မဖြစ်နိုင်ဘူးကွာ ..... ဘယ်လိုမှ မဖြစ်နိုင်ပါဘူး .... သူတို့ result မှားတာ .... ဟုတ်တယ်.... "
ယောကျာ်းလေး သန့်စင်ခန်းအတွင်း၌တေဇာ တစ်ယောက်ထဲ အရူးတစ်ယောက်လို ဂယောက်ဂယက်ဖြစ်နေပြီး တစ်ယောက်ထဲသွေးရူးသွေးတန်းတွေလျှောက်ပြောနေမိသည်။
" တကယ်လို့များ ...နွေးလေးသာနွေးလေး သာတကယ်Aသွေးဖြစ်ခဲ့မယ်ဆိုရင်??? Aသွေးသာဆိုရင်နွေးလေးကငါ့ရဲ့ ... ငါ့ရဲ့သမီးမဟုတ်ဘူးပေါ့ ???? ငါ့သမီးမဟုတ်ဘူးဆိုရင်... ဝတ်ရည်... ဝတ်ရည်ငါ့ကို .... ငါ့ကို အဲ့အချိန်တုန်းက လက်ခံခဲ့တယ်ဆိုတာက ???? "
တေဇာသွေးပျက်သွားသည့်ဟန်ဖြင့်မျက်နှာကို လက်ဖဝါးနှစ်ဖက်နဲ့ ဖိအုပ်လိုက်ပြီး
" ဟင့်အင်း .... ငါယုံတယ်... ငါ့မိန်းမကို ငါယုံတယ်.... ဝတ်ရည်က ငါ့အပေါ်အဲ့လိုလုပ်မဲ့ မိန်းမမျိုးမဟုတ်ဘူးလေ ...... "
အချိန်အတော်အတန်ကြာအောင်ဘိုထိုင်အိမ်သာပေါ် ငုတ်တုတ်ထိုင်ပြီး အရူးလို ချာချာလည်အောင်တွေးတောပြီးတဲ့နောက်
" DNA စစ်ကြည့်လိုက်ရင်သိရမှာပဲ .... ဟုတ်တယ်ဘာပဲဖြစ်ဖြစ်စိတ်ထဲရှင်းသွားရအောင်DNAတော့စစ်ကြည့်လိုက်တာကောင်းတယ်.... "
X X X X X X X X X
မလုပ်စဖူး လုပ်စဖူး သူ့အဖေကကိုယ်တိုင်ကိုယ်ကျ သူ့ကိုခေါင်းဖြီးပေးနေသဖြင့်နွေးလေး သဘောကျနေမိသည်။
" အ ...."
" Oh sorry သမီးရေ ....ဖေဖေ့လက်က နာရီနဲ့ သမီးဆံပင်ငြိနေတာဖေဖေ မသိလိုက်လုိ့ ..... "
တေဇာ ကပျာကယာပြန်ပြောလိုက်ပြီး သူ့လက်ထဲ ဆံပင်ချည်အား အကျီအိပ်ကပ်အတွင်းသေချာထည့်လိုက်၏ ။ နွေးလေး ကတော့ မသိရှာပဲရယ်လိုက်ပြီး
" ရပါတယ်ဖေဖေရယ်.... အခုလို သမီးကိုခေါင်းဖြီးပေးတာနဲ့တင်ကျေးဇူးတင်လှပါပြီ ..... သမီးကို ဒီလိုဖေဖေ ကိုယ်တိုင်ခေါင်းဖြီးပေးတော့ သမီး တကယ်ပျော်တယ်သိလား .... "
နွေးလေးပြောလိုက်တော့တေဇာ တစ်ချက်ကလေးသာ ပြုံးနိုင်ခဲ့သည်။ ရင်ထဲမှာတော့ ပူလောင်မှုတွေ အပြည့်နဲ့ပါ ။
ဘေးနားက ဝက်ပေါက်လပြည့်ဝန်းလေးကတော့ အပူအပင်ကင်းမဲ့စွာရေခဲမုန့်တွေ ထိုင်စားနေသလိုနွေးလေး ကလဲသူ့ကိုပြုံးပြုံးလေး ကြည့်နေလေသည်။
X X X X X X X X X
ညနေဆေးရုံသို့ လင်း ပြန်ရောက်လာတော့ သမီးလေး ၂ယောက်ရဲ့ မျက်နှာက ပြုံးရွှင်နေသော်လည်းတေဇာရဲ့ မျက်နှာကတော့ သုန်မှုန်နေသည်။
တစ်ချိန်လုံး လင်း ကိုသာစိုက်ကြည့်နေတာမို့
" ဘာဖြစ်နေလို့လဲ အကို ? "
လင်း လှမ်းမေးလိုက်တော့တေဇာ သူ့ကို စိုက်ကြည့်မြဲ စိုက်ကြည့်ရင်း
" ကိုယ်အပြင်ခဏသွားလိုက်ဦးမယ်.... "
" ဘယ်ကိုလဲ ? "
" သူငယ်ချင်းတစ်ယောက်ဆီပါ ... ကိစ္စလေးတစ်ခုပေါ်လာလို့ ... "
"အော်အင်းပါ ..... မြန်မြန်တော့ ပြန်လာနော်... လပြည့်လေး ကိုလဲ အကိုပဲ အိမ်ပြန်ခေါ်သွားပေးမှ ရမှာမို့လို့ .... "
" အင်းပါ ..... "
ခပ်သွက်သွက်ထွက်ခွာသွားတဲ့ သူ့ယောကျာ်းကို လင်း ဒီတိုင်းသာ လှမ်းကြည့်နေမိသည်။
သိပ်မကြာလိုက်ဆေးရုံရှေ့သို့တေဇာ့ ရဲ့အဖေနဲ့မေမေလေး တို့ရောက်နေတယ်ဆိုတာမို့ လင်းဆေးရုံအောက်သို့ သွားဆင်းခေါ်လာပေးခဲ့ရသည်။
"ဆေးရုံက တစ်ယောက်ထဲသီးသန့်အထူးခန်း မရတော့လို့လား ? "
တေဇာ့ ရဲ့အဖေက ပိုက်ဆံအိတ်ကြီး ချိုင်းကြားညှပ်ပြီးမေးတော့
" ဟုတ်ကဲ့အဖေ ... ဒီနှလုံးဌာနမှာ ၁ယောက်ထဲအခန်းက မရတော့လို့ပါ ..... သီးသန့်special ခန်းတော့ ရှိပေမဲ့ အပေါ်ဆုံးထပ်မှာဆိုတော့ သိပ်အဆင်မပြေဘူးလားလို့ ... ဒီမှာဆိုရင်အရေးပေါ်တစ်ခုခုဖြစ်တဲ့အခါဆရာဝန်တွေကလဲ အနီးကပ်မှာ အသင့်ရှိနေကြတာဆိုတော့ ပိုပြီးအဆင်ပြေလို့ပါအဖေ ... "
လင်းထိုသို့ပြောလိုက်သော်လည်းတေဇာ့ အဖေမျက်နှာကကျေနပ်သွားပုံမရ ။
"အေးပေါ့လေ သမီး အဆင်ပြေတယ်ဆိုတော့လဲအဖေ ဘာမှ မပြောလိုပါဘူး ..... "
" ဒီနေရာလေးလဲကောင်းပါတယ်အကိုရဲ့ ..... ၄ယောက်သီးသန့်တစ်ကန့်လေးပဲဟာ ...... "
မေမေလေးက ကြားကဝင်ပြောတော့တေဇာ့အဖေက သူ့မြေးမနားသို့ တိုးသွားပြီး
" အရေးကြီးတာနွေးလေး အဆင်ပြေဖို့ပဲ .... ဒီမှာနေရတာ အဆင်ပြေရဲ့လားနွေးလေး ? "
အဘိုးကမေးတော့နွေးလေးခေါင်းအမြန်ငြိမ့်ပြလိုက်ပြီး
" ဟုတ်ပြေပါတယ်ဖိုးဖိုး ... သမီး ဒီနေရာလေးကို သဘောကျတယ်.... "
"အေးပါနွေးလေး အဆင်ပြေရင်ပြီးတာပါပဲ .... ဒါနဲ့ လင်း .. သမီး ... "
" ဟုတ်အဖေ ? "
" သားတေဇာကော ? "
" ကိစ္စလေးတစ်ခုပေါ်လာလို့ ဆိုပြီး အပြင်ခဏထွက်သွားတယ်အဖေ ..... "
" အိုကွာ .... သားကလဲ ဒီလိုအချိန်မျိုးမှာ ကလေးနား ရှိနေပေးသင့်တာကို .... "
ပြောပြီးနွေးလေး ရဲ့ဘေးမှာကွေးကွေးလေး အိပ်နေတဲ့ ပြည့်လေးကို သူ့အဘိုးသဘောကျစွာ လှမ်းကြည့်ဦး
" ကြည့်စမ်းပါဦး မိန်းမရေ .... မင်းမြေး လပြည့်လေး သူ့အမနားကပ်နေလိုက်တာ တကယ်တည်း ..... "
" ဟုတ်ပါ့ အကိုရယ်..... လူနာကုတင်ပေါ်သူက တက်ပြီးအပိုင်သိမ်းထားလေရဲ့ .... "
အဘိုး နဲ့ အဖွား ကသူတို့မြေး ၂ယောက်ကိုကြည့်ပြီး တခါတည်းကို ပြုံးရွှင်နေကြလေရဲ့ ။
X X X X X X X X
ဒီနေ့အဖေဆေးရုံမှာ ပြန်လာပြရမဲ့ ရက်ချိန်းဖြစ်တာမို့ မိုး ကိုယ်တိုင်အဖေကိုအိမ်ပြန်သွားခေါ်ပြီးဆေးရုံသို့ခေါ်လာခဲ့သည်။ ပြီးတော့ ဆရာဝန်ကြီး ဦးနေမျိုး နဲ့လိုက်ပြပေးပြီးတဲ့နောက်မှာတော့ အဖေကသူ့ရဲ့ ရုံးခန်းနဲ့ ဌာနကိုလိုက်ကြည့်ချင်တယ်ဆိုတာကြောင့်မိုးခေါ်လာခဲ့ရသည်။
ဌာနသို့ရောက်တော့ မထင်မှတ်ပဲ သူနဲ့တစ်ချိန်က လုပ်ငန်းပါတနာတွေဖြစ်ခဲ့ဖူးတဲ့တေဇာ့ရဲ့ အဖေနဲ့တွေ့ဆုံကြပြီးနောက်
" ကိုကောင်းထက်....ဆေးရုံဘာလာလုပ်တာလဲဗျ ... ဘာလဲ ခင်ဗျားနေမကောင်းဘူးလား ? "
"အေးဗျာ ..... ကျွန်တော့အသည်းက သိပ်မကောင်းလို့ ဒီမှာလာလာပြနေရတာတော်တော်ကြာပြီလေ ..... ခင်ဗျားကကောဗျ ? "
" ဒီမှာဗျာ ... ကျွန်တော့မြေးမလေးလေ သန်ဘက်ခါ operation လုပ်ရမှာ .... အဲ့ဒါမလုပ်ခင်လာအားပေးတာဗျာ .... "
" ဟုတ်လား .... ဘာဖြစ်လို့ operation လုပ်ရမှာလဲဗျ ? "
ဦးကောင်းထက်မေးလိုက်တာကိုတေဇာ့ အဖေ ပြန်မဖြေရသေးခင်မှာပဲ အနောက်မှာရပ်နေတဲ့ မိုး က
" နှလုံးအဆို့ရှင်မကောင်းတာ daddy .... သန်ဘက်ခါကျ သမီး မသူဇာခိုင်နဲ့အတူတူ operation လုပ်ပေးရမှာ .... "
မိုး ဝင်ပြောလိုက်တော့တေဇာ့ အဖေနဲ့မေမေလေး ရဲ့ အကြည့်တို့က မိုး ထံသို့ရောက်သွားကြသည်။
"အဖေ နဲ့အမေ ... ဒါနွေးလေးကို ကုသပေးနေတဲ့ ဆရာဝန်ပါ ..... "
လင်း ကြားကဝင်ပြောလိုက်တော့ ဦးကောင်းထက်လဲအခုမှ လင်း ကိုသတိထားလိုက်မိ၏ ။ လင်း ကိုမြင်လိုက်တော့ ဦးကောင်းထက်တအားအံ့သြသွားသလို သူ့သမီးလေးအတွက်လဲ အနည်းငယ်စိုးရိမ်သွားရသည်။ တစ်ချိန်က ဒီဆရာမလေးကြောင့်သူ့သမီးလေး အရူးတစ်ပိုင်းခံစားခဲ့ရတာ မဟုတ်ပါလား ။
အခုကျပြန်တော့လဲ ဒီဆရာမလေးရဲ့ သမီးကိုမှ ခွဲစိတ်ပေးရမယ်ဆိုပြန်တော့ ဘယ်လိုတောင်တိုက်ဆိုင်တဲ့ရေစက်ပါလိမ့်ဟုတွေးနေမိသည်။
" ကျွန်တော့မြေးလေးကိုခွဲစိတ်ပေးရမဲ့ ဆရာဝန်က ကိုကောင်းထက်ရဲ့ ... ? "
" ကျွန်တော့ သမီးလေးပါ .... Hannaလေ ..... "
ဦးကောင်းထက်ဝင်ပြောလိုက်မှနွေးလေး ရဲ့အဖိုးက မှတ်မိသွားဟန်ဖြင့်
"အော်Hannaလေးလား ... အဲ့တာကြောင့်မြင်ဖူးသလိုလိုပဲလို့ ထင်တော့ထင်သား ... ကြည့်ပါဦးကွာ ..... Hannaလေးတောင်ဆရာဝန်မကြီးဖြစ်နေပြီပဲ ....တော်လိုက်တာ သမီးလေးရယ်....အေးကွယ်... uncle ရဲ့မြေးလေးကိုအပ်ပါတယ်ကွာ ....သေချာ ဂရုစိုက်ပြီး ခွဲစိတ်ပေးပါနော်.... "
" စိတ်ချပါ uncle .... မိုး တို့အကောင်းဆုံး ကြိုးစားပြီးတော့ ခွဲစိတ်ပေးမှာပါ .... "
မိုးပြောပြီး သူ့မမရဲ့ မျက်နှာအား တစ်ချက်ကလေးစောင်းငဲ့ကြည့်လိုက်မိတော့ဘေးက ဦးကောင်းထက်က သမီးဖြစ်သူအရိပ်အချည်ကိုသာသေသေချာချာလိုက်ကြည့်နေလေသည်။
X X X X X X X X X
အိမ်ပြန်ရောက်ကြတဲ့ အခါမှာတော့
" သမီး အပေါ်မတက်ခင်ခဏလောက်ထိုင်ပါဦးကွယ်... "
" ဟုတ်ကဲ့ daddy .... "
ဧည့်ခန်းက ခုံမှာ သားအဖ နှစ်ယောက်လုံးဝင်ထိုင်လိုက်ကြသည်။
" သမီး ဆရာမနဲ့ ပြန်တွေ့တာကိုdaddy ကိုလဲ သမီးမပြောပါလားကွယ်.... "
" ဟုတ်မပြောဖြစ်ဘူးဆိုတာ စကားမစပ်လို့ပါ daddy .... "
" ဟိုတစ်လောက အရေးပေါ်ရောက်လာတဲ့ လူနာကို စိတ်မချလို့ ညစောင့်အိပ်ပေးမယ်ဆိုတာက .... အဲ့ဒါ သမီးဆရာမရဲ့ သမီးလေး မဟုတ်လား ? "
အဖေမေးတော့ သူခေါင်းလေးသာ ပြန်ညိမ့်ပြနိုင်ခဲ့ပါသည်။
" ဟုတ်ပါတယ်daddy .... "
"အေးကွယ်.... ဘာပဲဖြစ်ဖြစ်ပါ daddy ကတော့ သမီးလေးပျော်ရွှင်ပြီး အဆင်ပြေနေတာလေးပဲ မြင်ချင်တယ်ကွယ်..... daddy ပြန်ခေါ်လိုက်လို့ ဒီပြန်လာရပြီးမှ သမီးလေး အဆင်မပြေမှာကိုလဲ daddy စိုးရိမ်တယ်.... "
စိုးရိမ်နေတဲ့ အကြည့်တွေနဲ့ ကြည့်ပြီးပြောနေတဲ့ သူ့အဖေရဲ့ မျက်နှာကို မိုးသေချာကြည့်လိုက်ပြီး
" စိတ်မပူပါနဲ့daddy ရယ်... သမီးအခု ရင့်ကျတ်နေပါပြီ ... အရင်ကလိုပျော့ညံ့တဲ့ လူတစ်ယောက်မဟုတ်တော့ပါဘူး .... အဲ့ဒါကြောင့်သမီးအတွက်daddy မစိုးရိမ်ပါနဲ့နော်.... "
သူ့သမီးလေးက သူ့မျက်နှာသေသေချာချာကြည့်ပြီးပြောတော့မှ ဦးကောင်းထက်အနည်းငယ်စိတ်အေးရသည်။ သို့ပေမဲ့ အပြည့်အဝတော့ စိတ်မအေးနိုင်သေးပါ ။
X X X X X X X X
" ဒီနေ့ pressure နည်းနည်းတက်နေပါလား ... မနက်ဖြန်အတွက်စိတ်လှုပ်ရှားနေလို့လားနွေးလေး ? "
မနက်ပိုင်း round လှည့်ချိန်နွေးလေး ရဲ့နေ့စဉ်ဆေးမှတ်တမ်းစာအုပ်ကို မိုး လှန်ကြည့်နေရင်းပြောလိုက်ခြင်းသာဖြစ်၏ ။
" ဟုတ်နည်းနည်းလေး စိတ်လှုပ်ရှားနေမိတယ်မမ .... "
မိုး ပြုံးလိုက်ရင်းနွေးလေးရဲ့ခေါင်းလေးကို ပုတ်ပေးရင်း
"စိတ်ကိုအတတ်နိုင်ဆုံးလျော့ထားနော်.... ဘာမှလဲကြောက်စရာမရှိဘူး .... ခွဲခန်းထဲမှာ မမကိုယ်တိုင်ညီမလေးရဲ့ဘေနားမှာ ရှိနေပေးမဲ့ဥစ္စာ ... "
" ဟုတ်ကဲ့ ...ကြောက်တာတော့ မကြောက်ပါဘူး ဒီတိုင်း စိတ်လေးနည်းနည်းလှုပ်ရှားနေမိရုံပါ မမ ...."
"နွေးလေး ကြိုက်တဲ့ ရုပ်ရှင်လေးဖြစ်ဖြစ်သီချင်းဖြစ်ဖြစ်ဖုန်းနဲ့ ကြည့်ပြီးနားထောင်နေလေ ... ဒါမှ ကုတင်ပေါ်လှဲနေရင်းနဲ့ မျက်လုံးလေမှိတ်ပြီး ဝင်လေထွက်လေလေးကို မှတ်နေကြည့်..... အဲ့ဒါစိတ်ကိုတည်ငြိမ်စေတယ်..... တရားမှတ်တဲ့နေရာမှာတော့ မမထက်ဆရာမ ကပိုပြီးကျွမ်းကျင်တယ်...မေမေ့ဆီက ပြန်သင်နော်.... "
မိုး သူ့မမကိုလှမ်းကြည့်ပြီး ရယ်ရယ်မောမောနဲ့ပဲပြောလိုက်တော့ လင်း လဲပြုံးလိုက်မိသည်။
"မေမေသင်ပေးထားလို့နွေး ငယ်ငယ်လေးကတည်းက တရားမှတ်တတ်ပါတယ်မမ .... မမပြောသလိုပဲမျိုးနွေး လုပ်ကြည့်ပါ့မယ်နော်.... "
နွေးလေး ပြုံးပြုံးလေး ပြန်ပြောတော့ မိုး လဲပြုံးပြလိုက်ပြီး
"နေ့လည်ကျ မမလဲ စကားလာပြောပေးမယ်နော်... အခုတော့ မမ round ဆက်လှည့်လိုက်ဦးမယ်.... "
" ဟုတ်ကဲ့ပါ မမ ... "
X X X X X X X X
" ချယ်ရီချက်လာတဲ့ ဟင်းက မကောင်းလို့လားဟင်မမ ? "
ချယ်ရီ့ရဲ့ အတင်းဖိတ်ခေါ်မှုကြောင့်နေ့လည်စာကို မိုး သူနဲ့အတူတူစားဖြစ်ခဲ့သည်။
" Ahh မဟုတ်ပါဘူး ချယ်ရီ ရဲ့စားကောင်းပါတယ်..... "
" အဲ့ဒါဆို များများထည့်စားလေ မမ ရဲ့ .... "
ပန်းကန်ထဲ ဟင်းတွေထပ်ထည့်ပေးနေတဲ့ ချယ်ရီကြောင့်
"တော်...တော်ပါတော့ ချယ်ရီရယ်.... ကိုယ်... ကိုယ်က အရင်ထဲက အစားနည်းလို့ပါ ..... "
"သြော်ဟုတ်လား ... ဒါဆိုလဲ မမ ကုန်နိုင်သလောက်ပဲစားနော်သိလား .... ချယ်ရီ့ကို အားနားလို့ဆိုပြီး အရမ်းကြီး ဖျစ်ညှစ်စားမနေနဲ့ဦးနော်မမ .... "
"အင်းပါ ချယ်ရီရယ်.... "
သူထည့်ပေးတဲ့ ဟင်းတွေကို တို့ခနဲဆိတ်ခနဲ စားနေတဲ့ မိုး ကိုကြည့်ပြီး ချယ်ရီ အားရပုံတော့ မပေါ် ။
ရုတ်တရက်မိုး တစ်စုံတစ်ခုကို သတိရသွားကာ
" ahh မနက်ထဲကမေးမလို့ .... ဟိုနေ့ကနွေးလေးရဲ့သွေးအမျိုးအစားထပ်စစ်ဖြစ်သေးတယ်မဟုတ်လား ? "
" ဟုတ်ကဲ့ မမ ... ထပ်စစ်ဖြစ်ပါတယ်.... "
" A ပဲလား ? "
" ဟုတ်A ပဲ မမ .... ညီမတို့ဆေးရုံက မှားစရာအကြောင်းအရင်း ရှိကိုမရှိဘူးဆိုတာ ညီမ အစောထဲကသိပြီးသားပါ .... ဒီလူကြီးကိုက ဇဝေဇဝါနဲ့ ကိုယ့်သမီးဖြစ်သူရဲ့သွေးအမျိုးအစားအမှန်ကိုတောင်သေချာမသိဘူး .... ဒါနဲ့များ သူ့ဘက်ကသေချာပါတယ်မှားစရာအကြောင်းမရှိပါဘူးဆိုပြီးပြောသေးတယ်.... "
ချယ်ရီမေမျက်မှောင်လေးကြုတ်ပြီးပြောနေတဲ့စကားတွေကို မိုး တည်တည်ညိမ်ညိမ်နဲ့သာ နားထောင်နေမိသည်။တေဇာကလဲ မှားစရာအကြောင်းမရှိဘူးလို့ပြောခဲ့တဲ့စကားတစ်ခွန်းကြောင့်မိုးတွေးစရာလေးတွေ ဖြစ်နေသည်။
အဲ့အချိန်တုန်းကတေဇာထိုစကားပြောနေစဉ်သူ့မျက်ဝန်းတွေဟာ ယုံကြည်မှုအပြည့်နဲပြောနေခြင်းမှန်း မိုး ကိုယ်တိုင်လဲတွေ့ခဲ့တာမို့ ထူးဆန်းသလိုလိုတော့ ရှိနေသလို ခံစားနေရပါသည်။
X X X X X X X X
မိုး ပျားလိမ္မော်သီးလေးတွေ လက်ထဲကိုင်ပြီးနွေးလေးရဲ့ကုတင်နားသို့လျှောက်သွားလိုက်သည်။
"နွေးလေး .... "
"မမ .... "
" ဘယ်သူမှ မရှိဘူးလားနွေးလေး ? မမစောစောကတောင်ဆရာမကိုတွေ့မိသေးလိုပဲ ... "
"မေမေ သန့်စင်ခန်းခဏသွားတယ်မမ ... "
"သြော်..... "
ကုတင်ဘေးက ခုံတန်းလေးမှာ မိုး ဝင်ထိုင်လိုက်ပြီး
"နေ့လည်စာ စားပြီးပြီလား ? "
" ဟုတ်ကဲ့ ပြီးပြီ မမ .... မမကော ? "
သွားထက်လေးပေါ်အောင်ရယ်ပြီး သူ့ကိုပြန်မေးနေသောနွေးလေးအား မိုး ပြန်ပြုံးပြရင်း
" မမ လဲစားပြီးပြီနွေးလေး ... ဒီမှာနွေးလေးအတွက်ပျားလိမ္မော်ချိုချိုလေးစားရအောင်ယူလာတာ .... မနက်ကနွေးလေးရဲ့ သွေးအချိုဓာတ်စစ်ကြည့်တော့ လိုအပ်တဲ့ပမာဏထက်လျော့နေတယ်... အဲ့ဒါကြောင့်ဒီလိမ္မော်သီးချိုချိုလေးစားလိုက်နော်....နေဦး မမ အခွံနွှာပေးမယ်.... "
မိုး သူကိုယ်တိုင်ပဲ အခွံနွှာပေးပြီးနွေးလေး ရဲ့လက်ထဲသို့ လိမ္မော်သီးစိပ်လေးတွေ ထည့်ပေးလိုက်တော့နွေးလေး ကပြုံးပြုံးကလေးဖြင့်
"ကျေးဇူးပါ မမ ... "
တစ်စိတ်ပြီးတစ်စိတ်ပါးစပ်ထဲထည့်ပြီး အားရပါးရဝါးစားနေသည့်နွေးလေး ကိုကြည့်ကာ မိုး ပြုံးမိပြန်သည်။
" ကြိုက်ရဲ့လား ? "
" ဟုတ်ကဲ့ ကြိုက်တယ်မမ ... ချိုနေတာပဲ .... "
ရယ်ပြနေတဲ့နွေးလေး အား မိုး ပြုံးပြုံးလေးကြည့်နေရင်း လိမ္မော်သီးအခွံနွှာနေစဉ်လင်း ပြန်ရောက်လာလေသည်။
"အော်ကလေးရောက်နေတာပဲ .... "
" ဟုတ်ကဲ့ .... လာ ဆရာမ ထိုင်.... "
လင်း သူ့ဘေးနားမှာ ဝင်ထိုင်လိုက်တော့
" မမက သမီးကို လိမ္မော်သီးလာကျွေးနေတာမေမေရဲ့ .... အရမ်းချိုတာပဲ ....မေမေလဲ စားကြည့်.... "
"နေပါစေ သမီးလေးပဲ များများစားနော်.... "
လင်းခေါင်းလေးခါလိုက်တော့
" ရှမ်းပြည်က ပျားလိမ္မော်ဆရာမရဲ့ ....daddy တပည့်တစ်ယောက်လှမ်းပို့ပေးလိုက်တာ .... နည်းနည်းစားကြည့်အရမ်းချိုတယ်.... "
ပြောလဲပြော လက်ကလဲသူအခွံနွှာပေးထားတဲ့ လိမ္မော်သီးစိပ်လေးတွေကို သူ့မမ လက်ထဲ အတင်းထည့်ပေးလိုက်လေသည်။ လင်း လဲသူ့ကလေးလက်နဲ့ ကိုယ်တိုင်စေသနာပါပါအခွံနွှာပေးထားသည့်ပျားလိမ္မော်လေးတစ်စိပ်ကို ပါးစပ်ထဲထည့်လိုက်မိသည်။ သွားနဲ့အသာလေးဖိဝါးလိုက်တာနဲ့ ထွက်လာတဲ့အရည်ချိုချိုလေးတွေကြောင့်လင်း ပြုံးလိုက်မိသည်။
" အင်း ချိုလိုက်တာနော်.... "
သူ့မမရဲ့ မျက်နှာအမူအယာကို မိုး ကြည့်နေပြီးနောက်
" ကြိုက်ရင်မိုး မှာအများကြီးရှိသေးတယ်ထပ်လာပေးမယ်နော်.... "
" ahhh ရပါတယ်ကလေးရယ်.... ဒီလောက်ဆိုတော်ပါပြီ ကလေး ပဲစားနော်.... "
" တကယ်အများကြီးကျန်သေးတာပါ .... မနက်တုန်းက ဌာနထဲက လူတွေအကုန်လိုက်ဝေပေးတာတောင်မှ ကျန်နေသေးတယ်.......အော်ဒါနဲ့ ....နွေးလေး .... "
လင်း ဘက်ကိုကြည့်ပြီးပြောနေရာမှာ ရုတ်တရက်နွေးလေးဘက်ကို လှည့်ကြည့်ပြီး နာမည်ခေါ်လိုက်တာမို့
" ရှင်မမ .... "
" မနက်ဖြန်ခွဲခန်းဝင်ရမှာမို့လို့ ညကျရင်၁၀ နာရီနောက်ပိုင်းထဲက အစာလဲ မစားရတော့ဘူးရေလဲ မသောက်နဲ့တော့နော်..... "
"အော်ဟုတ်ကဲ့ ....စောစောက nurse မမတစ်ယောက်လဲ လာပြောသွားသေးတယ်.... "
" အင်း ...... ပြီးတော့ ဆရာမ ....နွေးလေးကို မနက်ဖြန်သွေးပေးမဲ့သွေးအလှူရှင်ကို ဒီနေ့ထဲကရှာထားမှ ဖြစ်မယ်နော်..... အဲ့ဒါမှ မနက်စောစော သူတို့ကိုသွေးစစ်ဖို့အချိန်ရမှာ ..... လှူမဲ့အလှူရှင်က B ပိုး C ပိုး နဲ့ HIV ပိုးရှိမရှိဆိုတာ အကုန်စစ်ဆေးဖို့ လိုအပ်တယ်..... "
" မနက်ထဲကအဲ့ nruseလေးလာပြောသွားလို့ မကျောင်းကိုဖုန်းလှမ်းဆက်ပြီး အကူညီတောင်းထားပြီးပြီ .... ဂျူနီယာ ညီမလေးတစ်ယောက်နဲ့ ဆရာတစ်ယောက်က လှူပေးမယ်တဲ့ ... မနက်ဖြန်မနက်၈ နာရီလောက်ထဲက အရောက်လာကြမယ်ပြောတယ်ကလေး .... "
"အော်ဟုတ်... ဒါဆို အဆင်ပြေသွားပြီပဲ ...... "
နွေးလေး မျက်နှာကို မိုးသေချာကြည့်လိုက်ပြီး ကလေးရဲ့လက်လေးတွေကို ဆုပ်ကိုင်ပေးလိုက်သည်။
" မနက်ဖြန်အတွက်ကြောက်ဖို့ လုံးဝမလိုဘူးနော်ညီမလေး ..... မမ ကညီမလေးဘေးမှာပဲရှိနေမှာ .... ပြီးတော့ ညီမလေးရဲ့ case ကအရမ်းကြီး ခက်ခက်ခဲခဲခွဲစိတ်ရမဲ့ဟာလဲ မဟုတ်ဘူး .... ဒီတိုင်း စက်ကလေးတပ်လိုက်ရင်ပြီးပြီ ....မေ့ဆေးပေးထားမှာဆိုတော့ အိပ်ပျော်နေသလိုပဲ ဘာမှသိလိုက်မှာတောင်မဟုတ်ဘူး ..... "
သူပြောပြနေတော့နွေးလေး ကသေချာနားထောင်ပြီး သူ့ကိုရယ်ပြလေသည်။
"နွေး မကြောက်ပါဘူး မမ ရယ်.... "
" ဒါပဲပေါ့ မမ ရဲ့ညီမလေးက အာဂသတ္တိခဲလေးဆိုတာ မမသိပြီးသားပါ .... fighting babe .... "
မိုး မျက်စိလေးတစ်ဖက်မှိတ်ပြရင်းပြောတော့နွေးလေး ကရယ်လို့မောလို့ပါ ။
မနက်ဖြန်သူ့သမီးလေး ခွဲစိတ်မှုအတွက်မိခင်တစ်ယောက်အနေနဲ့ စိုးရိမ်စိတ်အပြည့်ရှိနေသော်လဲပဲ အခုလိုသူ့သမီးလေး ပြုံးပြုံးရွှင်ရွှင်လေးရှိနေတာမို့ နည်းနည်းတော့ စိတ်သက်သာရာရခဲ့သည်။ သူ့သမီးလေး ထိုကဲ့သို့ ပြုံးပြုံးရွှင်ရွှင်ဖြစ်လာအောင်လုပ်ပေးတဲ့ သူ့ကလေးလေးကိုလဲ စိတ်ထဲက ကျိတ်ပြီးကျေးဇူးအခါခါတင်နေမိပါသည်။
X X X X X X X X X X
" လင်းရေ ..... "
"အော်အန်တီတင့်...ရောက်လာပြီလား .... "
ခြင်းတောင်းတစ်ခု စတီးလ်ချိုင့်တစ်ခုနဲ့ရောက်ရှိလာတဲ့ အန်တီတင့်က
"အေးကွယ်... Taxi ဌားလာပေမဲ့ ကားလမ်းတွေက ပိတ်နေလို့ အခုမှရောက်လာတာ ... "
ခြင်းတောင်းနဲ့ စတီးလ်ချိုင့်ကိုဘေးကစားပွဲပေါ်သို့ အန်တီတင့်တင်လိုက်ပြီး ကုတင်ပေါ်အိပ်ပျော်နေတဲ့နွေးလေး ကိုကြည့်လိုက်သည်။
" သမီးလေး အိပ်ပျော်နေတာလား လင်း ? "
" ဟုတ်တယ်အန်တီတင့်... ညကသမီးလေး ကောင်းကောင်းအိပ်မပျော်ဘူးလေ ... "
"အော်...အေးပေါ့ဆေးရုံဆိုတော့သေချာကောင်းကောင်း ဘယ်အိပ်ပျော်ပါ့မလဲ ....နွေးလေး ကအစထဲကမှနေရာသစ်မှာဆို မအိပ်တတ်တဲ့လူဆိုတော့ .... "
" အင်း ဟုတ်တယ်အန်တီတင့်.... "
ဘေးနားက ခုံအလွတ်တစ်လုံးမှာ အန်တီတင့်ဝင်ထိုင်ရင်း လင်း ကိုကြည့်ကာ
"လင်း အိမ်ပြန်ပြီးရေမိုးချိုးလိုက်ပါလား ... မနေ့ကလဲ မချိုးထားရဘူးမဟုတ်လား .... သမီးလေးလဲ အိပ်ပျော်နေတုန်းပြန်ချိုးလိုက်လေ ... "
အန်တီတင့်ပြောမှ လင်း သူ့ကိုယ်သူငုံ့ကြည့်လိုက်ပြီး
" လူကနည်းနည်း ညည်းစီစီတော့ဖြစ်နေတယ်... "
"အေးလေ ... အဲ့ဒါကြောင့်ပြန်ချိုးလိုက်လို့ ...ရေချိုးလိုက်တော့ လူလဲ နည်းနည်းလန်းသွားတာပေါ့ ... ဒီရက်ပိုင်း လင်း လဲညဘက်တွေစောင့်အိပ်ပေးရတာ များတော့ ပင်ပန်းလှပါပြီ .... ဒီည အန်တီတင့်ပဲစောင့်အိပ်ပေးမယ်လေ ..... "
" ဟာ ရပါတယ်အန်တီတင့်ရယ်... ညကတော့ လင်း ပဲစောင့်အိပ်ပါ့မယ် ... မနက်ဖြန်လဲ သမီးလေး ခွဲခန်းဝင်ရမှာဆိုတော့ လင်းဘေးမှရှိပေးမှ ဖြစ်မှာ .... လင်း မြန်မြန်ပြန်ချိုးပြီးတာနဲ့ ပြန်လာခဲ့ပါ့မယ်နော်..... "
"ရပါတယ်ကွယ်ဖြည်းဖြည်းပဲလုပ်ပါ .... အန်တီတင့်နေ့လည်စာလဲ စားခဲ့ပြီးသားပါ .... "
လင်း ကားသော့နဲ့အတူ ပိုက်ဆံအိတ်တယ်လီဖုန်း တို့ကိုလှမ်းယူလိုက်ပြီး
" ဒါဆို လင်း အိမ်ပြန်လိုက်ဦးမယ်နော်.... သမီးလေးနိုးလာတဲ့အခါ လင်းရေချိုးပြီးတာနဲ့ ပြန်လာခဲ့ပါ့မယ်လို့သေချာပြောပေးနော်အန်တီတင့်... "
"အေးပါအေးပါ ... စိတ်ချသာပြန်အန်တီတင့်ပြောထားမယ်နော်.... "
" ဟုတ်ကဲ့ .... "
" ကားကို ဂရုစိုက်မောင်းဦးနော်လင်း .... "
" ဟုတ်ကဲ့ပါ အန်တီဝင်း .... "
ဒီလိုနဲ့ပဲ လင်း ခပ်သုတ်သုတ်နဲ့ပဲဆေးရုံအောက်ထပ်ဆင်းခဲ့လိုက်သည်။
🌧️ 🌧️ 🌧️