မိုး အိမ်သို့ပြန်ရောက်သော အခါသူ့အဖေကိုတွေ့လိုက်ရသဖြင့်ဝမ်းသာအားရပြေးဖက်လေတော့သည်။
" Daddy ...... "
" Hanna သမီးလေး ...... "
သူ့အဖေက သူ့ကို အမေခေါ်နေကျနာမည်အတိုင်း Hanna ဆိုတဲ့ ဂျပန်နာမည်လေးကိုသာ ချစ်စနိုးနဲ့ခေါ်နေကျဖြစ်သည်။
" Daddy ဒီတစ်ခေါက်ပြန်ရောက်တာစောသားပဲနော်.... "
" ဟုတ်တယ်သမီးလေးရဲ့ Daddy ရဲ့ လုပ်ငန်းကိစ္စတွေမြန်မြန်အဆင်ပြေသွားတာနဲ့စောစောပဲ ပြန်လာဖြစ်သွားတာ .... "
အဖေက သူ့သမီးခေါင်းလေးကို ပွတ်ပေးရင်း
" သမီးကျောင်းစတက်နေရပြီမဟုတ်လား ... ဘယ်လိုလဲ အဆင်ပြေရဲ့လား ?ကျောင်းစာတွေကောလိုက်နိုင်ရဲ့လား ? "
" ဟုတ်... ဒါနဲ့လေ Daddy ကိုလေ သမီး requestလေးတစ်ခုလောက်လုပ်ချင်လို့ .... "
" တစ်ခုမဟုတ်ဘူး ကြိုက်သလောက်သာပြော Daddy အကုန်ဖြည့်ဆည်းပေးမယ်..... "
" ဟိုလေ သမီး ဆရာမတစ်ယောက်လောက်အိမ်မှာခေါ်ပြီး ကျူရှင်သင်ချင်လို့ အဲ့ဒါ Daddy ဆရာမကိုပြောပေးပါလား .... သမီး အိမ်ခေါ်ခဲ့မယ်လေ ..... "
"ခေါ်ခဲ့လေ သမီး .... Daddy လုပ်ပေးမှာပေါ့ ... ဒါနဲ့တစ်ယောက်ထဲပဲလား သမီးရဲ့ .... သမီးလေးက အခု ၁၀ တန်းတောင်ရောက်နေပြီပဲဟာ ..... ၆ ဘာသာ ၆ယောက်လောက်တော့ခေါ်ရမှာပေါ့ ... တစ်ဘာသာတစ်ယောက်ပဲ သင်ကြတာမဟုတ်ဘူးလား ... "
မိုး ရယ်ကာခေါင်းခါလိုက်ပြီး
" သမီးက ဆရာမဒေါ်လင်းဝတ်ရည်သော်တစ်ယောက်ထဲနဲ့ပဲသင်ချင်တာ Daddy ရဲ့ .... အဲ့ဆရာမကလေ တအားတော်တာ .... Daddy ကြည့်နေ သမီး ဒီနှစ်All D ထွက်အောင်ကြိုးစားပြမယ်.... "
သူ့သမီးလေးကိုယ်တိုင်ကိုက ပညာရေးကိစ္စကို လိုလိုလားလားနဲ့ အားတက်သရော်မပြောစဖူးတွေ စပြောနေသည်မို့ ဦးကောင်းထက်မိုး ပီတိတွေဖြာဝေနေချေပြီ ။ သူတအားလဲ အံ့သြလို့နေသည်။ သူ့သမီးလေးမှာ အရင်ကနဲ့မတူတော့ပဲ ပိုတက်ကြွသွက်လက်လာတာတော့ အမှန်ပင်။ အထူးသဖြင့်အရင်ကမပြုံးမရွှင်တဲ့ သူ့သမီးမျက်နှာလေးမှာ ပြုံးရွှင်နေသည်မုိ့ သူလဲ အပျော်ကြီးပျော်နေလေပြီ ။
ထိုအချိန်တွင်ဒေါ်မူယာသွယ်အခန်းထဲမှထွက်လာသဖြင့်မိုး ရဲ့မျက်နှာချက်ချင်းပြန်တည်တံ့သွားကာ
" Daddy သမီးအပေါ်တက်တော့မယ်နော်.... "
ထိုင်ရာမှထလိုက်ကာလှေကားပေါ်တက်မယ်အလုပ်အိမ်ဖော်အဒေါ်ကြီးဘက်လှည့်ကာ
" အန်တီရေ ညစာကိုလေ ၇ နာရီလောက်မှပဲ သမီးအခန်းထဲ ယူလာပေးပါနော်သမီးအောက်မဆင်းတော့ဘူး .... "
"အေးပါကွယ်သမီးရယ်အန်တီကြီး ပြင်ဆင်ပြီး လာပို့ပေးမယ်နော်.... "
" ဟုတ်.... "
မိုး ပြုံးပြပြီးအပေါ်တက်သွားတော့ အဒေါ်ကြီးကလဲ သူ့တူမလေးလို ချစ်ရတဲ့သူလေးက ပြုံးရွှင်နေတာမြင်၍ စိတ်ထဲ ဝမ်းသာနေမိပေသည်။ ဝမ်းမသာနိုင်သူကြီးကတော့ဒေါ်မူယာသွယ်ပဲ ဖြစ်ပေတော့၏ ။
" မူယာရေ .... "
"ပြောလေ ကိုကြီး .... "
" ကို ဒီတစ်ခေါက်ပြန်လာတာ သမီးလေးအရင်နဲ့မတူတော့ပဲပြောင်းလဲလာတယ်လို့ ထင်မိတယ်.... ကြည့်စမ်းပါဦးကွာ ပြုံးလို့ရွှင်လို့ ..... "
" ဟုတ်တယ်ဆရာ .... သမီးလေး အခုတလော မျက်နှာလေးပိုလန်းလာတယ်.... "
ဦးကောင်းထက်မိုးပြောတော့ဘေးနားက အဒေါ်ကြီးကပါ ပြုံးရယ်ပြီး ဝင်ပြောလေသည်။
" ကိုကြီးသမီးကျောင်းမှာ ရည်းစားရနေပြီလားမှမသိတာ .... "
ဒေါ်မူယာသွယ်က ခနဲ့တဲ့တဲ့ပြောတော့ အဒေါ်ကြီးက သူ့ကိုမျက်မှောင်ကြုတ်ကာဖြင့်
" အို မဟုတ်ပါဘူး .... သမီးလေးက စာကလွဲပြီး စိတ်ဝင်စားတတ်တဲ့လူမှ မဟုတ်တာ .... "
ထိုအခါ ဦးကောင်းထက်က ရယ်ရင်း
" ရှိရင်တောင်မှ ကိုတော့ သမီးလေးပျော်ရွှင်နေတာမြင်ရမယ်ဆိုရင်တော့ကျေနပ်သကွ ...... အခုသမီးလေးကပြောတယ်ဆရာမတစ်ယောက်ကို အိမ်မှာခေါ်သင်ချင်လို့တဲ့ မူယာရေ .... "
"အော်ဟုတ်လား .... "
မိုး က စာပေဘက်ကို ပြန်စိတ်ဝင်စားလာပုံရနေတာကြောင့်ဒေါ်မူယာသွယ်မချိုမချဉ်ပြုံးရင်း စိတ်ထဲအကုသိုလ်ပွားနေမိပြန်လေသည်။ သူကတော့ မိုး အဆင့်ဘိတ်ချေးရလေ ကြိုက်လေ ပဲ ဖြစ်သူကြီးပါ ။
X X X X X X X
မိုးဝသန်လွင်တစ်ယောက်ထုံးစံအတိုင်းကျောင်းတစ်ဖက်က ကားလမ်းဘေးဖြစ်သည့်Bus ကားမှတ်တိုင်မှာ သူ့ဆရာမလေးဒေါ်လင်းဝတ်ရည်သော်ကိုစောင့်နေမိပြန်သည်။ သိပ်မကြာလိုက်ခဏနေတော့ Bus ကားတစ်စီးပေါ်မှ သူရင်ခုန်ရပါသော ဆရာမလေး ဆင်းလာလေပြီ ။
သူချက်ချင်း လင်း ရဲ့အနားကိုပြေးသွားပြီး
" ဆရာမ ... Morning ! "
မျက်လုံးလေးနှစ်ဖက်မှိတ်သွားသည်အထိ သူပြုံးရယ်ရင်း လင်း ကိုနှုတ်ဆက်လိုက်တော့ လင်း ကလဲ ထုံးစံအတိုင်းပဲ သူ့ခေါင်းလေးကိုပွတ်ကာ
" Morning ပါ ကလေးရယ်.... မနက်စာ ဘာစားလာလဲ ? "
" အာ ....ကော်ဖီနဲ့ပေါင်မုန့်စားလာတယ်။ ဆရာမကောဟင် "
" လမ်းမှာ မုန့်ဟင်းခါး စားလာတယ်ကလေးရဲ့ .... "
" ဟုတ်လား ... ဆရာမက မုန့်ဟင်းခါးကြိုက်တာလား ... "
" အင်း ကြိုက်တယ်ကလေးကော ? "
မိုးခေါင်းလေး ကုပ်ကာဖြင့်
" အဲ ဟို မိုး ငယ်ငယ်လေးထဲက မစားဖူးဘူး ... အနံ့မခံနိုင်လို့လေ .... ဆရာမ ဆွဲခြင်းပေး သမီးဆွဲပေးမယ်... "
မိုး ကြိမ်ဆွဲခြင်းတောင်းကို လှမ်းယူမယ်လုပ်တော့ လင်း အားတုံ့အားနာဖြင့်
" ရတယ်ကလေးရဲ့ .... ဆရာမခြင်းတောင်းကလေးတယ်... "
" ရပါတယ်ဆရာမရယ်... သမီးဆွဲပေးချင်လို့ပါ ...ပေးပါနော်... "
မိုးပြောပြီ အတင်းဆွဲယူတော့ လင်း လဲရယ်ပြီးပေးလိုက်မိသည်။ ထို့နောက်လင်း မိုးရဲ့လက်ဖဝါးနုနုလေးအား သူ့လက်ဖြင့်ဆုပ်ကိုင်လိုက်ရင်း
" လမ်းကူးကြစို့နော်... မကြောက်နဲ့ ဟုတ်ပြီလား ... "
လင်း ကသူ့လက်ကိုဆုပ်ကိုင်ပေးထားချိန်တိုင်း သူ့ဘဝလေးဟာ အရမ်းကိုနွေးထွေးနေပြီး လုံခြုံမှုရှိတယ်လို့ မိုးအမြဲခံစားမိရပါသည်။ သူ့ဆရာမက သူ့လက်ကို ကိုင်ပေးထားချိန်တိုင်း သူအရမ်းပျော်ရွှင်ရပါသည်။
" ကားလမ်းကူးမယ်ဆိုရင်အရင်ဆုံး ဘယ်ကိုကြည့်ညာကိုကြည့်ပြီးရင်ပြန်ပြီးတော့ ဘယ်ကိုပြန်ကြည့်ညာကိုပြန်ကြည့်လုံးဝရှင်းပြီဆိုတော့မှ ကူးရတယ်ကလေးရဲ့ .... မလောရဘူး ... ပြီးရင်လဲ အခုလို ကိုယ့်နားမှာ Bus ကားကြီးတွေ ပိတ်ရပ်ထားရင်လဲ မကူးနဲ့ဦး အနောက်ကကျော်တက်လာတဲ့ ကားတွေရှိတတ်တယ်လေ .... "
" ဟုတ်မိုး မှတ်ထားပါ့မယ်ဆရာမ .... "
မိုး မျက်လုံးလေးကွေးအောင်ထပ်ရယ်ကာပြောတော့ လင်း ကချစ်စနိုးလေးနဲ့ မိုးရဲ့ပါးလေးကို ခက်ဖွဖွလေး ဆွဲလိုက်မိလိုက်၏ ။ ထိုတွင်တော့ မိုး ရဲ့ရင်တွေ ဒုန်းဆိုင်း ခုန်ပေါက်ပြေးလွှား မိပါတော့သည်။
သူတို့ ၂ယောက်ကားလမ်းတူတူကူးခဲ့ကြပြီးသောအခါကျောင်းလမ်းတစ်လျှောက်သွားနေကြတဲ့အထိ လင်း မိုးကို လက်တွဲ မဖြုတ်သေးချေ ။
" ဒါနဲ့လေ ဆရာမ ကျူရှင်တွေ ဘာတွေသင်လားဟင်? "
" ဟင့်အင်း မသင်ဘူး ကလေးရဲ့ ဆရာမက ဒီနှစ်မှ ရန်ကုန်ပြန်ပြောင်းလာတာလေ ... လွန်ခဲ့တဲ့ ၂ နှစ်က နယ်မှာ တာဝန်ကျတာ ... ဆရာမစဖြစ်ကတည်းက နယ်မှာတာဝန်ကျတာလေ .... အဲ့က ကလေးတွေက တအားရိုးသားကြတယ်ဖြူစင်ကြတယ်ပြီးတော့ သူတို့ဆီမှာ ကျူရှင်ဆိုတာလဲ မရှိကြဘူးလေ ...ကျောင်းတောင်အနိုင်နိုင်တက်ကြရတာ ကလေးရဲ့ ....ကျောင်းမှာကလဲ ဆရာမကကျောင်းအုပ်ကြီးနဲ့မှ ၄ယောက်ပဲ ရှိတာ ..... အထက်တန်းပြဆိုလို့ ဆရာမတစ်ယောက်ပဲရှိတာလေ .... "
" ဟုတ်လား ဒါဆို ဆရာမ ဘာသာစုံပြပေးရတာပေါ့နော်... ? "
" အင်းပေါ့ ကလေးရဲ့ ဆရာမလဲ အကုန်သေချာ ဘာသာစုံသင်ပေးနိုင်အောင်စာတွေပြန်လေ့လာခဲ့ရတာကို မပြောပါနဲ့တော့ ...... အဲ့တုန်းက ဘာသာစုံကိုင်ခဲ့ရပေမဲ့ အခုလို တစ်ဘာသာပဲ သင်ပေးနေရတာလောက်တောင်မပင်ပန်းဘူး ..... "
" ဒါဆို ဒီကျောင်းမှာသင်ပေးရတာက ပိုပင်ပန်းတယ်ပေါ့နော်? "
" အင်း လူပင်ပန်းတာထက်စိတ်ပိုပင်ပန်းတယ်.... ဒီက ကလေးအများစုက နယ်က ကလေးတွေနဲ့မတူကြတာတော့ အမှန်ပဲလေ ..... "
" ဒါဆို မိုး ကကောဟင်? "
မိုး ရယ်ပြီးမေးတော့ လင်းမိုး ရဲ့ခေါင်းလေးကို ပွတ်လိုက်ကာ
" မိုး က နယ်က ကလေးတွေလိုပဲ။ ဖြူစင်တယ်ရိုးတယ်အေးတယ်ချစ်စရာလဲကောင်းတယ်.... "
လင်း ရယ်မောပြီးပြောနေသောစကားကို မိုး သဘောကျသွားမိတော့သည်။
'ချစ်ဖို့ကောင်းတယ်တဲ့လား မ ရယ်´ လို့စိတ်ထဲကပြောလိုက်မိတော့သည်။
ကျောင်းဆောင်ပေါ်သို့ရောက်တဲ့အထိ သူတို့ ၂ယောက်စကားတွေပြောခဲ့ကြသည်။
" အတန်းထဲဝင်တော့နော်မိုး။ ဆရာမ လက်မှတ်သွားထိုးလိုက်ဦးမယ်နော်.... "
" ဟုတ်မိုး ဆရာမရဲ့ဆွဲခြင်းကို အပေါ်ထပ်က ဆရာများနားနေခန်းထဲမှာပဲ ထားခဲ့ပေးမယ်နော်.... "
" ရပါတယ်ကလေးရယ်ဆရာမ ဘာသာ ... "
စကားမဆုံးခင်မှာပဲ မိုးလှေကားပေါ်တက်လိုက်ပြီး
" ဟီး ယူသွားပြီ ဆရာမရေ .... "
လှေကားပေါ်ပျော်ရွှင်စွာပြေးတက်သွားတဲ့ သူ့ရဲ့တပည့်မလေးကို ကြည့်ပြီး လင်း သဘောကျစွာ ရယ်လိုက်မိတော့သည်။
အတန်းထဲရောက်ပြန်တော့လဲ မိုး တစ်ယောက်ပထမ ၂ ချိန်ကို မြန်မြန်ပြီးဖို့ပဲ ဆုတောင်းမိနေတော့သည်။ ၃ ချိန်မှာ သူ crush ရတဲ့ ဆရာမလေး လင်းဝတ်ရည်သော်အချိန်ဆိုတော့ ၂ အချိန်ပြီးလို့ခေါင်းလောင်းထိုးတာနဲ့ အပေါက်ဝသို့သာ လှမ်းမျှော်ငေးကြည့်နေမိတော့သည်။
၂ မိနစ်လောက်နေတော့ သူမျှော်နေရတဲ့ မမ အတန်းထဲသို့ ဝင်လာလေပြီ ။ သွားလေးဖြီးပြီး တခြားလူထက်ကိုရင်ဦးအောင်ထပြီး နှုတ်ဆက်ဖို့ ထရပ်လိုက်သူကတော့ မိုး ပဲဖြစ်တော့သည်။
သူ့တပည့်မိုးဝသန်လွင်ရဲ့မျက်နှာကိုကြည့်ပြီးဆရာမလေးဒေါ်လင်းဝတ်ရည်သော်မှာလဲရယ်မိလိုက်သည်။
" မင်္ဂလာပါ ဆရာမ ..... "
" မင်္ဂလာပါ ကလေးတို့ ..... "
လင်း သင်နေသည့်စာသင်ချိန်ကိုကျတော့ အချိန်တွေကုန်တာနှေးပါစေလို့တောင်စိတ်ထဲကြိတ်ဆုတောင်းမိနေပါသေးသည်။ လင်း ကသူ့အနားမှာ နီးနီးကပ်ကပ်ရှိနေချိန်ဆို မိုး တအားကိုပျော်သည်။ သူ့ကိုယ်သူ အရင်ကနဲ့မတူပဲ လင်းကြောင့်ပြောင်းလဲလာပြီဆိုတာလဲ သတိထားမိနေပါသည်။
လင်း ကလဲစာတွေရှင်းပြချိန်တွေ စာတိုင်ပေးချိန်တွေမှာတောင်မှ မိုး ရှိနေသည့်ဘေးဘက်အစွန်ပြူတင်းပေါက်နားက ခုံတန်းရှေ့မှာပဲ အမြဲရပ်ပြီး စာရှင်းပြ စာတိုင်ပေးလေ့ ရှိ၏ ။
ပြီးရင်လဲ အကြည့်ချင်းဆုံတာနဲ့ကို ဆရာတပည့်၂ယောက်တပြုံးပြုံးနှင့်။ မိုး ရဲ့ဘေးနားကခုံမှာထိုင်နေတဲ့ မိုး သူငယ်ချင်းဖြစ်တဲ့ မန္တလေးသူလေး ဇာလီတင့်ပေလျှင်ထိုဆရာတပည့်၂ယောက်ကို သဘောကျတဲ့အကြည့်တွေဖြင့်ငေးကြည့်နေမိသေးသည်။
Black board မှာမေးခွန်းအဖြေတွေ လင်း ချရေးပေးပြီးကလေးတွေစာကူးရေးနေကြချိန်မှာတော့ လင်း မိုးအနားသို့လျှောက်လာသည်။ မိုး လဲမော့ကြည့်လိုက်မိတော့ လင်း ကခါးလေးကိုင်းကာ မိုး ရဲ့အနားကပ်၍ တိုးတိုးလေးပြောသည်။
" မုန့်စားဆင်းရင်ကျောင်းဆောင်ဘေးနားက ခရေပင်ကြီးအောက်မှာရှိတဲ့ ခုံတန်းရှည်လေးမှာစောင့်နေနော်.... ဆရာမလာခဲ့မယ်...ကလေးကြိုက်တဲ့ပေါင်မုန့်ကြက်ဥတွေ အများကြီးကြော်လာပေးတယ်သိလား ..... "
" ဝိုး .... အခုထဲက ဗိုက်တောင်ဆာလာပြီ အဟိ .... "
မိုး ကဗိုက်ကလေးပွတ်ကာ ဖြီးတီးတီးနဲ့ပြောတော့ လင်းသူ့တပည့်ခေါင်းကို အသာလေးပုတ်လိုက်ပြီး တခစ်ခစ်နဲ့ရယ်တော့သည်။
" ခဏအောင့်ထားဦး ...ရေသောက်ထားနှင့်ရေသောက်ထား .... "
မိုး ရဲ့ကျောပြင်လေးကို သပ်ပေးကာ လင်း တိုးတိုးလေးစနောက်လိုက်၏ ။
အတန်းချိန်ပြီးသွားတော့ လင်းလဲ အခန်းထဲမှပြန်ထွက်သွားသည်။ ထိုအခါဘေးမှ ဇာလီတင့်ကမိုး ဘက်သို့လှည့်ကာ
" ဟဲ့ မိုး ... "
" အင်းပြောလေ ဇာလီ ..... "
" နင်နဲ့ ဆရာမဒေါ်လင်းဝတ်ရည်သော်နဲ့က ဟိုးအရင်ထဲက ခင်ကြတာလားဟင်? "
" ဟင့်အင်း မဟုတ်ပါဘူး .... ဆရာမက ဒီနှစ်မှ ငါတို့ကျောင်းကိုပြောင်းလာတာလေ .... ငါနဲ့ဆရာမနဲ့ကလဲ ဒီနှစ်မှ စသိကြတာပါ .... "
"အော်ဟုတ်လား .... ဒါနဲ့ နင်သိလား ? "
" ဟင်ဘာလဲ ? "
" နင်လေ ဆရာမနဲ့ဆို အမြဲတမ်းပြုံးနေတတ်တယ်အရမ်းချစ်ဖို့ကောင်းတာပဲ နင့်မျက်နှာလေးက ပြုံးရယ်နေတဲ့ အချိန်တွေဆိုရင်လေ ..... "
ဇာလီ ရဲ့စကားတွေကြောင့်မိုး သဘောကျစွာ ရယ်လိုက်မိ၏ ။
🌧️ 🌧️ 🌧️