▪︎في المخيم (عند الرجال):
بالقوه برق سحب نفسه وانسدح على الفراش وهو يشوف الساعة كانت ١٢ يمديه ينام لين الفجر ، لف على الجهه الثانيه وهو جفنيه مو قادره تسيطر على نفسها وسكرت بسكينه .
ماصحى الا على شخير محسن واللي كان يحاول رائد يسكته بأشد الطرق، انسدح رائد جنبه ونطق بتعب رائد : يوووههه الظاهر اننا الليله الله لايعوق بِشر اننا بننام على صوت شخير.
ناظره برق بتعب ولف على الجهه الثانيه ونطق بتثاقل : الله يقلع بليسك قم اذبح اخوك اهم شي يسكت ويخمد! ، صد رائد وهو ماله نفس يرد ونطق : الله ياخذ شيطانه تبي امي تذبحني معه ؟ اقول اذلف!.
ارتخت جفون برق وما امداهم ياخذون راحتهم الا والاذان دخل مسامعهم صد يحاول يسوي نفسه مايسمع بس صحى بتثاقل اول ماسمع ( الصلاة خيرٌ من النوم) .
قام وهو يتمتم لرائد : أسألك بالله كيف مر الوقت؟ ، سكت وهو يتثاوب ولف على رائد اللي كان داخل بالعميق.
ابتسم بخفه ونطق: ياحليلك يارائد الحين عمي بيجي ويخرب عليك نومتك، فز برق يتوضى ويغسل ويجهز وكان ناوي يصحي رائد بعد مايجهز .
رجع برق وهو يشوف رائد يتخبط من التعب ونطق بضحكه : علامك يبن العمه؟ ، رائد: انا خلاص انتهيت وبعدين انت كيف فيك حيل؟ ، ضحك برق ونطق : والله مافيني بس دفني تشوفني دخلت بعمق النومه بس الصلاة أولى!.
ابتسم رائد وهو يسحب نفسه يقوم يتجهز قبل لاتقوم الصلاه، طلع برق لعمه محمد اللي نطق: يالله جهز المشب بالحطب بنرجع ونشبه!، ناظره برق بتعب : ياعمي محد صاحي بعد مانرجع الكل تعبان بما فيهم انت خلنا نشبه بعد ماننام شوي .
ناظره محمد بعتب ونطق : ليه شايفني مثلك اكل ومرعى وقلة صنعه؟ ، نطق برق بمزح : ايه ، فصخ محمد عقاله وضرب فيه برق اللي انفجر يضحك : اعنبو ابليسك ياولد ياللي ماتستحي!! .
ضحك برق وهو يبعد بركض عشان مايجيب العيد زياده ، دخل على رائد اللي توه يرش العطر وعيونه ذابله ، رائد استغرب ضحكه برق ونطق : وش مهبب؟.
برق بضحك: لاولا شي بس سبيت خالك! ، فز رائد بضحك ونطق : لايكون خالي محمد؟، برق: ومن غيره الموجود؟ اهههخخخ الله يسعده بس يا أن عليه جلده !.
رائد: اكيد بيجلدك وانت سابّه ! ، ابتسم برق وكان بيرد بس قطع عليهم صوت محمد وهو يصرخ : رائد وعمى اطلع انت والشيطان اللي معك والحقونا بسرعة بتقيم الصلاه!! .
نطق رائد بضحك : لا والله شكله معصب وحاقد ما اقول الا انها راحت عليك يابريق ، طلع برق وهو يشوف ابوه واقف مع محمد ومحمد يهاوش كالمعتاد .
محمد : انت يامطلق شكلك عجزت بتربية ولدك ذا ! ، ناظره مطلق مستغرب ونطق : ليه وش بلاه؟ ، محمد : اعنبو بليسه مايهجع تونا ماقلنا بسم الله الا وناط لي كأنه قرد ؟.
مطلق ابتسم : ايه يامحمد ذي حركات الشباب ومعروفه مو مثلنا شيبان ، ناظره محمد بطرف عين : شيبان هاه؟ ، تدخل برق وهو يضحك : عاد ياعمي انت بانت شيبانك فَمفروض تعقل ! .
محمد : لا والله ابوك الشايب وفوق كل ذا الحمد لله ربي اللي زودني بالعقل مو مثل التيس اللي قدامي ، انفجر برق بضحك ومو قادر يسكت .
طلع ياسر ورائد وهو مبتسم وتقدم له محمد ونطق : تعال يا ولد اختي واترك عننا التيس ذا ، ضحك رائد : ابشر ياخالي ماطلبت شي ، نط برق على محمد بمزح ونطق : افااا ياعمي انا برق تبدلني بذا؟ .
محمد : ايه ابدلك ومن انت عشان ما ابدلك؟ ، ابتسم برق بفخر :انا البرق المُطلق اللي يبرق بسماكم ، ابتسم مطلق ونطق : والنعم والله ماسكتوا الا على صرخه متعب : ياولد وش مقعدك الصلاة بتبدأ .
لف على مطلق ومحمد ونطق : وش ارتجي من الأحفاد دام ابائهم كذا ، ضحك مطلق وهو يخبط على كتف محمد اللي ابتسم بخفه وطلعوا يمشون للمسجد القريب من بيتهم .
▪︎ بيت عبد الرحمن :
قبل ثلاث ساعات صحى آلكاسر من النوم وناظر للساعة وكانت ٢ بالليل ، فز من مكانه ودخل للحمام وطلع وهو يفكر ورجع ينسدح بس ماش ماطب النوم عينه.
فز وهو يستغفر ونطق بخفوت: خلني اصلي قيام الليل بحكم اني صاحي ، فز وتوضى وكبر وأول ماخلص سحب المصحف اللي جنبه وجلس متربع وفتحه وبدأ يقرأ.
وكان يقرأ بترتيل وخشوع ماسمع الا صوت الباب ينفتح وكانت امه وابتسمت ونطقت : مانمت يمه؟ ، ابتسم وفز وباس رأسها: لاوالله اني نمت يالغاليه بس توني صاحي وقلت اصلي ابرك لي .
اسماء: يالله يمه نام عشان وراك الفجر ووراك صلاة الجمعه ، ابتسم وهز راسه برضى وطلعت امه وسكرت الباب بهدوء .
رجع انسدح وهو يفكر واشغله تفكيره وهو قلبه مو مرتاح وكل خليه فيه مشتغله وكان جالس بصمت ، فز وهو ينطق : شكلك منت بنايم .
سحب دفتر الشعر وبدأ يكتب اي شي يخطر على باله وماعجبه شي، سكر الدفتر ولف ينسدح بتعب وخمول وغفت عينه وماسمع الا اذان الفجر .
فز من سريره بعين مفتوحه والثانيه مسكره ونطق : الله يالدنيا صرت تقوم مع الأذان من عقب ماكنت تقوم قبل.
دخل يغسل ويتروش وطلع ، كانوا مطفين انوار بيتهم والبيت هادي ، طلع وقفل الباب عليهم عدل وراح للمسجد يصلي .
دخل المسجد وابتسم اول ماشاف برق قاعد بجنب الإمام يسولف معه ، آلكاسر :السلام عليكم ورحمة الله وبركاته، لف الإمام : وعليكم السلام ورحمة الله وبركاته.
فز برق ونطق : وعليكم السلام، آلكاسر : وين جدي؟ ، رفع برق يده يأشر على جده واللي جالس بجنبه عمه محمد ومطلق وبعيد بالزاوية كان جالس رائد يقرأ قرآن.
آلكاسر : ايييههه يا بو فيصل كم باقي على الاقامه؟ ، ابتسم ابو فيصل واللي كان الإمام وناظر لساعته : ثلاث دقايق خذ مكانك ياولدي .
ابتسم واخذ مكان بجنب برق في الصف الأول وكبر يصلي تحية المسجد، وبدأت الصلاه وخلصت وطلع الكل متوجه لبيته الا عيال متعب .
الجد متعب : يالكاسر بتجي انت و اهلك اليوم؟، ابتسم آلكاسر ونطق : لا والله ماظنتي ياجدي بس ابشر بأني اجي غير كذا ماظنتي لان امي تعبانه واختي بتقعد معها .
ابتسم متعب ونطق : لاخلاص اجل خلّك معهم يمكن يحتاجونك بس تعال سيّر علينا ، آلكاسر: ابشر ياجدي ، متعب : يالله ياولد نرجع للبيت .
ودّع برق ورائد آلكاسر ورجع لبيته منهك وشوي وينفجر من التعب ارتمى على سريره ومو قادر ينام ونطق بتعب : شفيني اليوم؟ ، حاول يغمض إلى أن غفت عينه ونام بتعب .
▪︎ في بيت الجد متعب :
بعد صلاة الجمعه دخل برق لبيت جده وراح لجدته وباس رأسها وجلس : حي الله ام مطلق حي ذا الوجه صدق ، ضحكت بفرح ونطقت : الله يحييك ويحفظك يابعد كُلي .
ابتسم بخفه وجلس عند رجولها ونطق : الله يحفظك يامّيمتي تبين اهمز رجيليناتك؟، ابتسمت وقالت بضحكه: والله ما اقول لك لا تعال اجلس واحكي علي مثل طفولتك.
جلس يهمز رجلها بحب ويسولف عليها ، ساره : هاه ياوليدي ناوي تكمل الجامعه؟، ضحك برق ونطق : يامّيمتي انا وين والجامعة وين؟ ، شهقت بخفه ونطقت : افا ليه؟.
برق : والله مالي نفس بالدراسه ضربت راسه بخفه ونطقت : انت منجدك ؟ كيف بتعرس وتعيش وبتأسس حياتك؟ ، ضحك بصوت عالي وضربته مره ثانيه ونطقت : تكلم ياولد .
برق : والله مقرر ادخل العسكريه مالي بالدراسه وانتي تعرفين بالقوه طلعت من الثانوي بالدّف ، ابتسمت ساره ونطق : اجل على كذا خلاص بس استأذنت من ابوك؟.
برق : لا والله ماقلت لأحد هذا خبر حصري لك يامّيمتي ، ضرت راسه وانفجر يضحك ونطقت : اقول قم قل لأبوك وامك! لايربق ويرعد عندك الجلد، انفجر بضحك وهو يمسح على راسه ونطق : والله شكلي ببرق وارعد عليهم بهالخبر.
دخل آلكاسر وقال : وش عندكم يا أُمي وبريق؟ ، لفت له ساره ونطقت بتعب : تعالي ياوليدي واعتقني من ذا الخبل ، ابتسم وتقدم لها وضحك برق وهو يدف آلكاسر برجله ونطق : وخررر ذي امّيمتي انااا .
فز آلكاسر وهو يدفه ويقول : والله ماهي لك لحالك نطق برق بضحكه : انا ولد الكبير يعني انا اولى لف آلكاسر على ساره ونطق : يا اُمي مين تحبينه وتبغينه اكثر؟.
ناظرته بتعب ونطقت : والله مامنكم رجا انتوا الثنين ، شهقوا مع بعض وجلسوا عند رجولها ونطق الكاسر: افااا يأم مطلق لايكون طحنا من عينك؟ .
ساره : الله ياخذ العدو بس مايطيح الا الرّدي غير كذا مايطيح الصحيح، ابتسم برق وباس رأسها ولف على آلكاسر ونطق : تخاوي؟ .
ناظره آلكاسر بطرف عين ونطق : على وين ان شاء الله ضربه برق على كتفه بمزح ونطق : شفيك نفّست ياحبيب امك؟ ،فز الكاسر ونطق : ماعاش من يزعل اُمي .
ضحكت ساره بحب وفتحت يدينها وقالت : تعالوا يالبرق على يميني وآلكاسر على يساري تعالوا ، فزو يحضنونها وضحكوا مع بعض ، دخل رائد ونطق بزعل : لابالله؟ جالسين بحضن جدتكم وانا مالي رب؟ ولا ولد البطة السودا؟.
ضحكت ساره وقالت : وانت مكانك قدامي يابعدهم كلهم ، تقدم رائد بيحضنها بس دفه برق وقال : وخر ذي جدتنا ، ضربه رائد بالعقال وقال : اص بس لايكثر تراهي جدتي بعد!.
تقدم رائد وباس راس جدته ولف برق على آلكاسر وهمس : يالله قم خلنا ننحش لاينشب لنا ذا الغبي ، ناظره آلكاسر ونطق بمزح : أي والله انك صادق يالله .
تقدم رائد بصراخ بعد ماسمعهم ومسك ثيابهم ونطق : والله ماتروحون بدوني يالخايسين، انفجروا ضحك وفز برق يركض وكان بيقوم آلكاسر بس طب فيه رائد ضرب بالعقال .
ونطق برق من بعيد : اقول راحت عليك يالكاسر، فز الكاسر وهو يقول : لاتتركني مكسور وانا الكاسر ، ضربه رائد برجله بخفه ونطق : اص بس اص اللي يسمعك يقول اني معذبك .
صرخت ساره بضحك وقالت : تعالوا بس كل واحد يقول مستقبله قبل لاتبدأ الدراسه ، لفوا وهم مبتسمين وتقدم رائد وجلس بجنب جدته : ياجده انا قررت اصير دكتور في الجامعه شرايك؟.
شهقت بحب ونطقت : الله يحفظك ياولدي الله يبارك بك منجد ، ابتسم الكاسر وتقدم وباس راس رائد ونطق : الله الله يا دكتورنا مدري استاذنا ، ابتسم رائد وقال : ايه خلاص أحترم نفسك ، آلكاسر نطق : والله تمون يالغالي ! .
ساره : وانت ياقلبي يالكاسر؟، آلكاسر: والله جالس افكر اصير محامي الصدق مالي بالمجالات الثانيه ، ابتسمت وقالت : الله يبارك بكم ، لفوا على برق ونطق رائد : يالله قم لانتأخر على بريق .
طلعوا بعد ماودعوا جدتهم ومشوا مع بعض للأسطبل حقهم ، دخلوا كلهم الثلاثة ونطق برق للعامل: صديق طلّع خيولنا.
ابتسم العامل وهز راسه وراح يطلع خيولهم وكان برق عنده الخيل الأبيض ورائد عنده الخيل البني وآلكاسر عنده الخيل الاسود وكلهم من أفضل أنواع الخيول العربيه .
طلّعهم العامل وراحوا يبدلون ملابسهم ويلبسون البدله بس استوقف آلكاسر رنت تلفونه اللي غيرت كل حياته .
رفع جواله وحطه على اذنه ونطق بهدوء: الو من معي؟، الشخص : انت آلكاسر بن عبد الرحمن آل متعب؟ ، سكت آلكاسر بحيره ونطق : أي نعم ليه من انت؟ .
الشخص : انا الضابط يوسف بن محمد وحاب ابلغك بخبر مايسّرك ، شد آلكاسر على جواله ونطق بهدوء عكس العواصف اللي بداخله : سمّ !! .
الضابط : ابوك يالكاسر، شد آلكاسر على أسنانه بتوتر ونطق : وشبلاه ابوي ؟ انطق يالضابط!! ، الضابط : ابوك يالكاسر يطلبك الحل .
ارتعدت كل خليه بجسم آلكاسر وانتفض جسمه بصدمه وخوف واقشعر كل جسمه ونطق يردد بصدمه : سمّ عد الله قلته ماسمعت ! ، الضابط : عظم الله اجرك في ابوك يالكاسر.
ارتخت ملامح آلكاسر وهو يجر لسانه وينطق : تسلم ، وسكر الجوال ونزله من اذنه وهو يناظر بضياع في التراب وهو للحين مو حاس باللي يصير ولا هو مستوعب حتى ! .
تقدم رائد له مع خيله ونطق بإستغراب: يالكاسر وش بلاك ؟ يالله رح بدل عشان تركب الخيل ، رفع آلكاسر راسه يناظر رائد بضياع وهو بذي اللحظه يحتاج احد يسأله ويتأكد! .
رائد: وش فيك بغيت شي؟ لايكون خالتي فيها شي؟ ، نطق آلكاسر بهمس مصدوم : ابوي ، استغرب رائد ونطق : ايه وش بلاه خالي به شي؟.
آلكاسر: ما ادري ماني مستوعب ، قطب حواجبه ونطق : علامك تكلم ، آلكاسر: ابوي طلبني الحلّ ، ارتعد قلب رائد بصدمه ودموعه تجمعت بعينه وطاحت .
انصدم آلكاسر من ملامح رائد وتوه يستوعب الموضوع وغورقت عيونه بالدموع وبدأ يشاهق بصوت عالي، تقدم برق منهم وهو كان جاهز بس استغرب من وقفتهم.
برق : وش بلاكم؟ ، بذي اللحظه لما سمعه آلكاسر انهار على الارض ، فز برق ركض ومسكه وهو يشد عليه ونطق؛ علامك ياخوي وش بلاك؟ .
آلكاسر: ابوي ابوي يالبرق ابوي ، هز برق راسه : وش بلاه ابوك ، آلكاسر: ابوي يطلبني الحل يابرق ابوي يطلبني الحللل، ارتعد جسم برق بصدمه وشد على حضن آلكاسر ونطق وهو يحارب دموعه لاتنزل بذا الوقت اللي آلكاسر لوحده مكسور فيه : عظم الله اجرك وان شاء الله انه في مكان احسن .
انهارت دموع آلكاسر وشد على ظهر برق ودموعه بللت بدلته ، رفع برق راسه وشاف رائد اللي صد وهو يمسح دموعه واستوعب حجم الموضوع وهو اللي قلبه يحترق.
أسند آلكاسر ونطق : تعالي ياخوي علّم جدي وامك وخواتك وخلّك سندهم تعال ، فز قلب آلكاسر اللي رجلينه ماعادت تشيله ونطق : كيف اصير لهم سند وانا ابي سند استند عليه كيف؟؟ كيف وسندي راح من هالدنيا كيفف؟.
شد عليه برق ونطق : لاتقنط من رحمة الله يالكاسر لاتقنط، شهق الكاسر بقوه وابتعد عن برق وتلطم وفز وهو يطلع من الاسطبل ، راح رائد ركض عشان يبدل ويلحقهم والحال من بعضه لبرق.
وطول الطريق كان آلكاسر ساكت وماتكلم كان المسموع بس صوت بكى رائد اللي كان يشهق بصوت منخفض ، بالنسبه لبرق اللي الله ربط على قلبه وقدر يمسك نفسه بذا الموقف كان الموضوع عظيم عنده .
وصلوا لبيت جدهم ودخل آلكاسر بسرعة ووصل المجلس، رفع متعب راسه ونطق باستغراب : علامكم رجعتوا؟، تقدم آلكاسر وطاحت رجلينه وجلس قدام رجلين جده ونطق بصوت مهزوز : انا في وجهك يا جدي .
ناظره جده ودق قلبه بقوه ونطق : علامك ياولد انطق؟ ، رفع آلكاسر عيونه ودموعه تنزل وشهق وهو ينطق : ابوي يطلبك الحل ياجدي ابوي يطلبك الحل .
ارتخت ملامح متعب بصدمه وحزن ماقدر يتخطاهم وارتفع صوت محمد وهو ينطق : لاحول ولا قوة إلا بالله، ومطلق اللي كان يناظر مفجوع ومصدوم ومو عارف يقول شي او يصيح .
كان واقف بناظر مصدوم ، رائد صد ودموعه تطيح وطلع برا يشم هوا وهو اللي هالمواقف ماتناسبه ابد وهو ابو قلب رهيف ، طلع برق ووقف بجنبه وحط يده على كتفه ونطق بهدوء : الله يرحمه عمي .
انهار رائد داخليا وتلطم ولف على برق وناظره ودموعه تنزل لاشعوريا ونطق : برق رح قل لخالتي وخواته لازم يعرفون ذا ابوهم .
همهم له ومشى متوجه لبيت عمه عبد الرحمن ، مهما بلغت قوة صبر برق كان مايحب يواجه احد بذي المواضيع، مشى بخطوات سريعه ويحاول ماينهار ووصل لبيت آلكاسر وطق الباب.
انفتح الباب من أسماء الله نطقت : برق ؟ هلابك ياولدي اذا تبي آلكاسر فهو عند جده ، ناظرها برق بإنكسار ونطق : لاياعمتي انا ابيكم ، ناظرته مستغربه ونطقت : وش تبي؟.
برق : تعالي معي لبيت جدي في موضوع مهم لازم تسمعينه ، لف برق وصد عنها وهي اللي كانت مستنكره ملامح برق اللي كان دايم مبتهج وهالمره جاها حزين .
طلعت وراه مع العنود وهو يمشي بخطوات سريعه قدامهم ، سمع العنود تقول: ماما بابا متى بيجي مع سيارته يعتقنا من ذا المشي ؟ ، شدت أسماء على يدها ونطقت ؛ كلها أسبوع او اسبوعين بالكثير ويرجع اصبري .
بذي اللحظه بس طاحت دمعة برق اللي مسحها بسرعه وهو يسمع كلام بنت عمه ومايدري كيف يفجعهم بخبر موت ابوهم .
دخلوا لحوش بيت الجد ووقف برق على جنب ونطق بصوته العالي : ياولد عمتي أسماء جات ، فز آلكاسر وقلبه متقطع وهو توه موقف صياح وطلع لأمه الله انتفض قلبها وهي تناظره ونطقت بخوف : يمه ياولدي !!.
تقدم آلكاسر لها بدون مايتكلم وحضنها وحط راسه على كتفها وكانت أنفاسه وشهقاته تنسمع ، فزت أسماء ونطقت بعد ماشافت عيون الجد حمرا ومحمد وجهه منقلب ومطلق متلطم ورائد حاط اللطمة وصاد ونطق: علامكم وش بلاكم؟ .
تقدم الجد متعب وهو يوقف قدام أسماء ونطق : الله يحفظك يابنتي ويحفظ اخر ضنى لك ، أسماء ماكانت مستوعبه ونطقت : وش اخر ضنى؟ .
نطق محمد بصوت متذبذب: عظم الله اجرك في رجلك ، أسماء رجلينها ماكانت تشيلها ابد وكان بتهوي على الارض بس شد عليها آلكاسر كأنه يسندها ونطق : يمه تكفين وقفي .
صرخت أسماء بصوت عالي ونطقت : منجدكمممم؟؟ عبد الرحمننن مااااتتت؟ انتوا صاحين للي تقولونه ؟؟ ، فز رائد وتقدم لها وباس رأسها ونطق : ياخالتي ودي اقول اننا نكذب بس والله ماهو كذب .
اسودت الدنيا بعيون أسماء وطاحت مغمي عليها ، شد عليها آلكاسر وهي تطيح وطاحت بحضنه وصرخ بأقوى ماعنده : يمهههه لاااااا!! .
انتفض عمه محمد ونطق بصراخ : يالكاسر السياره السياره، تقدم برق ورائد يساعدون آلكاسر يشيل امه وبالفعل شالوها وحطوها في سياره محمد وماهي الا ثواني وينطلق محمد بأقوى ماعنده لأقرب مستشفى.
لفت العنود مستغربه على جدها ونطقت : جدي شسالفة؟ ، ناظرها جدها ودموعه تنزل وتحرق خده وصد ودخل داخل المجلس .
لحقه مطلق وهو ساكت ودخل برق يخفف عليهم ، لفت العنود لرائد تنتظر اجابه وابتسم رائد لها بهدوء ودمعته تنزل بسرعة وهو يمسحها بعنف ونطق : ابوك راح لمكان افضل صدقيني! .
ناظرته مستغربه ونطقت : ليه ابوي مو بالدوام؟ ، سكت يفكر بعلقيتها الطفوليه وجلس قدامها ونطق : لا في مكان افضل بكثير من دنيانا .
ناظرته ومافهمت سحبها ودخلها معه لجدته اللي فزت بخوف اول ماشافت عيون رائد حمرا ونطقت : يمه وليدي وش بلاك؟ ، ناظر فيها وشد على كتفها ونطق : يجده مابي بس خذي العنود واهتمي فيها.
اخذتها من يده واشرت لها تدخل ولفت ونطقت : انطق تكلم شكلك مايجوز لي كذا ، سكت رائد بتفكير ونطق : عظم الله اجرك في ولدك .
تهاوت الجده بتطيح بس اسندها رائد وجلسها على الكنب وانهات صياح وصراخ وكان رائد عند رأسها يهديها ويسمي عليها ويقاوم دموعه لاتنزل.
ارتفعت عينه وابتسم بخفه وطاحت دموعه وهو مغدور من منظر العنود اللي كانت تناظرهم من ورا الباب ونطق بصوت خافت: يالله انك تلطف على حال هالبنت!.
▪︎في المستشفى:
ركض آلكاسر وعمه محمد مع المسعفين اللي امسكوا باسماء ودخلوها ، وقف آلكاسر ينتفض برعب وهو ما امداه يتجاوز صدمه ابوه عشآن تجيه صدمه امه وهو مايدري وش فيها .
لف يناظر عمه اللي كان يستغفر بصوته العالي عشان يشغل بال آلكاسر اللي كان مشغول بنفسه وكيف يهتم بأمه وخواته وهو بعمر صغير ؟ .
تقدم لعمه وجلّسه بحكم كبر السن اللي كان فيه ونطق بصوت مهزوز : ياعمي استريح بجيب لك مويه واجي ، لف محمد يناظر آلكاسر واللي كان بالقوه يستقيم وهو بكل مره يحاول ينهزم ويرجف .
جلس محمد وهو يهز رجلينه بتوتر ويتذكر وصية عبد الرحمن له انه يهتم بعياله ويرجعهم لبيتهم خانته دمعته ونزلت على خده ومسحها وهو يقاوم البكاء عشان مايضعف الكل .
رجع آلكاسر وأعطى عمه وجلس بجنبه وبدأ يشرب محمد بهدوء ، انفتح باب الغرفه وطلع الدكتور ونطق : وين زوجها.
فز آلكاسر ونطق بحرقه : انا ولدها انطق وش بغيت؟، ناظره الدكتور بهدوء ونطق: الله يبارك لكم ويتربى بعزكم ان شاء الله ، قلب آلكاسر بدأ يدق بخوف وصدمه ونطق : اخوي؟ .
ابتسم الدكتور ونطق : ايه نعم وتفضل معنا تخلص الأوراق اللازمه بس تراه صغير يعني بيجلس شهرين بالمستشفى ويطلع لانه انولد بالشهر السابع ، هز راسه آلكاسر ولحق الدكتور وقلبه يتقطع على ابوه اللي راح ولا شاف اخوه او ولده الثاني .
______________________
صلى الله على نبينا محمد
" للآن هذا أطول بارت كتبته ، وهذا البارت هو نهاية البدايه وبتبدأ القصه الاساسيه من البارت القادم ، بإذن الله وبتكبر شخصياتنا اللطيفه "
انتظرونا بِ بارت 7