▪︎في بيت ابو ضاري :
طلعوا بنات ابو ضاري وعياله وراحوا لبيتهم يتروشون ويخلصون وبيمشون على طول ع المزرعه .
نطقت وعد وهي تسند رأسها على الطاوله : يعني مكتوبه علينا نتعب !! ، لفت عليها ترف مستعجله : اخلصي بسرعه عشان ابوي بيصارخ.
طلعت تركض ونزلت تحت حق امها : ترف قولي لاخواتس بنطلع الحين ، هزت رأسها ورفعت جوالها وقالت لهم ، ضاري : يمه وين شماغي؟ ، يسرى : شوفه يمكن مع ايمن .
ايمن : والله ما أخذته يمه ، دخل مشعل ونطق : يا أهل البيت ، فزت له ترف بسرعه وقدمت شماغ ابوها ونطقت : سم يبا ، ابتسم ابوها وسحبه من يدها : سم الله عدوتس صدق .
ابتسمت وتحركت تجيب العود تبخر فيه اخوانها وابوها ، أعطت ابوها العود يبدأ يتبخر ونطق بضحكه : بزواجتس ان شاء الله من سلطان ، صدت منزعجه وهزت راسها رفع ضاري راسه : يبا مابغيت تزوجها الا ذا الوصخ .
ابو ضاري بغضب : ما الوصخ الا اشكالك ولا ولد اخوي كيف تقول عنه كذا ، ضاري : يبا وهو صدق كذا ، ابو ضاري بغضب : وانت ايش؟ اقول خلني ساكت عن رجعتك للبيت متأخر مع وجهك .
تقدمت ترف ونطقت بهمس : بس خلاص اقطع الشر ، سكت ضاري وهمس لاخته: وانتي راضيه ؟ ، رفعت اكتافها: حيل الله اقوى ، ضاري : طيب ماتبينه ارفضيه ! ، ترف : على بالك ابوي بيرضى؟ خلها على الله .
دخلت شذا ووعد للصاله ونطقت شذا: يبا خلاص خلصنا، فز مشعل ونطق : يالله البسوا عباياتكم واطلعوا نحتريكم في السياره ، طلع وطلعوا أولاده ومعهم بناته .
▪︎في بيت ابو ياسر :
فزت إسراء وهي ترتب شعرها بيدها ونزلت بسرعه سحبت العود وشغلته وطلعت ونطقت : ياسر برق وينكم؟ ، نزل ياسر وهو يعدل شماغه ونطق: هذاني بس اخوتس الخبل وينه ، لفت بضحكه ونطقت : والله مدري بس امسك تبخر ياخوي .
اخذه وبدأ يتبخر وهي واقفه تحتريه، خلص ومده لها، إسراء: وين هيا وسما؟ اليوم ما عيدوا معنا !! ، ياسر بتعب : حاولت أقنعها بس قالت بتعيد مع اهلها .
هزت رأسها وهي تتمتم: براحتها ، لفت بسرعة على برق اللي كان مخلص بس كان يكلم بجواله برا وتقدمت له إسراء: خذ تبخر بسرعه باقي ابوي اللي مدري وين اختفى ، ضحكت نوره اللي توها طالعه ونطقت : لا تتعبين نفستس ترى بخرته.
برق : ماقلت لكم ياحظ مطلق بنوره ، ماحس الا بضربه على ظهره صرخ منها بألم وانفجرت إسراء ومعها نوره وياسر يضحكون ، مطلق : صاير قليل حيا اشوف.
ضحك وهو يمسح على ظهره : تمون يالغالي تمون ، تقدم مطلق ونطق : يالله اخلصوا خلونا نمشي ، لفت إسراء ونطقت : لا يبا باقي لي ماخلصت مكياجي! .
قطب ياسر حواجبه ونطق : وش عندتس بعد؟ اشوفتس حاطه كل شي ، لفت لياسر : اصبر باقي العدسات ، مطلق : اعجلي طيب .
YOU ARE READING
البَرْق يَبْرُقْ وَالتْرَفّ هَمْاَلِيٍ
Poetryدَفتري الأول ورِوايتيّ الأولى بأقلامِ الرصاص . 《مُستمِرّة》 كُتِبتْ بِواسِطة : سُلاف آل حمدان ✍️🏻. حسابي التيّك : sul_afah 《لا أُبيح نقل الرواية او الاقتباس منها》
