حبايبي مو رتو البارت چبير ظليت ادمج بارتين وانزل بين يوم ويوم وانشالله خلصت القصة هاي اخر بارتات اتمنة تعجبكم🌹🌹🌹
———————————-
فاتن: من گتلهة بلقيس راح تنخطب انخف لونهة رحت لبلقيس اشوفهة بعدهي قافلة
- بلقيس يمه لا تضوجين وداعتج شيطتهة شيط .
- ؟؟؟
- گتلهة بلقيس انخطبت ورة العدة تصير رسمي.
- ليش هيج سويتي .
- علمود حمد يعرف ويتاكد انو الخبر صار صدگ هسة الي اريدة منچ تلبسين ملابسچ الجدد وتتكشخين على اخر حبة وحجابچ وشعرچ فتحي ونزلي رگصي وية البنات خل نحرگ دمهة مثل ما حرگت دمج.
- هاي منو امي ؟!
- اي يمه حته البزونه من ايأذون بزرهة تخرمش... وهاي ام حمد جاية اسقاط واجب اعرف هاي السوالف عود گبال ابنهة انه اجيت وردت ارجع مرتك
- ههههههههههه بس عجبتني الخطة.. انه الاعرفهة علمود تگلة ترة هية لو تريدك چا رجعت وياك وتگعد تحش براسهة والله اله اخلي يصير فرعون عليهم.
صدگ بدلت وفتحت شعري على طولة وجسمي صاير سمبتيك نزلت انه عيني بعين ام حمد الي تخزني من فوگ الي جوة بحقد سلمت على الماشي بدون ما اگعد يمهة ولا انطيهة مجال تفتح اي موضوع
خالة سليمه فهمت الباص گالت للداگوگات يدگن ونزلت يمكن من قبل عرسي ما راگصة من رگصت كلهة وخرت
لحد ما خلصت الغنية وگفت
چان خالة سليمه گالت
- هاي بلقيس النعرفهة .
- هههههههههههه
گالو حضرو روحكم لبست سترتي وشمرت منفع شمر وشعري كله طالع طبعاً انه ما نزعت الحجاب بس ردت اغثهم وادري بي برة رتة يشوفني وشگد حلو من ما يگدر يدخل بية طلعنه كلنه چنت امشي وية انسام وامي ونضحك طبعًا تصنع هاي خطت امي لان وجهي بالحقيقة ما يگصة السيف بس من اذكر اذيته الي مو بس اتصنع حته امثل .
ونلگا قريب من الباب صاح لامة وشافني وهوة تمجمد بمكانه واحس نار تطلع من عيونه وما يگدر يسوي شي صعد بالسيارة ورحنه هناك الكل چان فرحتن وصدگ فوحت من كل گلبي لان وسام الة معزة بداخلي خلصت الخطبة ولبسو الحلقات رجعنه للبيت والفرحة ما سايعتنه.
ابوي جايب طباخ گبل صبو عشة من صبو عفت الناس كلهة وگعد يم ام حمد الي من رجعنه مخلصتهة بس ساكته طبعاً انه بدلت لبست دراعة عندي جايبهة ابوي من الكويت قبل الحرب
هية باوعت علي وگالت
- مبين عليچ الراحة.
- تسلمين.
- يگولون انخطبتي؟
- اي صح بس باقين على العدة.
- شني حاطينه جوة الدوشك بس اطلگتي اجة خطب.
- شنو اغشكم ما تشوفني مثل الگمر.
- وحمد نسيتي انه الي اعرفة انتي تعشگي وين راح هذا العشگ.
- راح من يوم الي مد ايدة علي تذكرين من حرضتي علي .
- اذا عرف بيج حمد معرسة ينط ويموت .
- مو انه الي هجمت بيتي عساهة بحضة وبخته.. واذا تخبل يرجع على اهلة مو هذا الي رتو
- قصدچ علي .. حمد وصلي رسالتچ من رجعتيلي ابني رجعتي بس جسد بلة روح انتي اخذتي روح وياج .
- عمة ماله داعي لهذا الحجي بعد هذا الشي صار ماضي .. وانه قررت ابدي حياة جديدة
- خوش عاقبتيني عقاب .. ضيعتي ابني حمد چان شيخ مشايخ صار تايه بالبساتين ومحد يعرفلة ديرة .
- الله يصلح حالة .. من رخصتج عمة اسوي جاي
رحت للمطبخ انسوي الجاي وطفت القنينه واحنه القناني برة لازم ابدلهة برة طلعت ورة البيت ابدل القنينه وما احس اله ضل وراي درت والگا حمد گمزت گمزة
حط ايدة على حلگي بمعنة سدي حلگچ وسحني سح ورة البيت
ارد اوخر ادي ماكو
لحد ما وخر هوة
- انت شلون تمد ايدك علي هيج اذا ما گلت لابوي
- امي گالتي مخطوبة؟
- اي مو چنت موجود بيوم الجة جابر ..وحجة وية اهلي .
- قبلتي؟
- شنو الشي الي يخليني ارفض .
- يعني قبلتي؟
- اي قبلت وعينك اتشوف راح اصفة بحضن غيرك
اسمع صرير اسنونه مبين معصب
- انت الي ضيعتني من ايدك لا اتلوم احد .
- وانتي ما عولتي رحتي ركضتي الة .
- اي من تعاركتو بالشارع واسمي صار من واحد لواحد ما فكرت شنو راح يصير.. انت شلون تحبني وتشهر بية
رگع الحايط بيدة
- يا حايط عمي گالي وسولفتلة من طردنه برة اثنينه رحنه ما تعركنه خفت لا واحد يشوفنه ويحجون عليج بلقيس ادري بيج ترديني وجاي تكابرين اترجاچ خلينه نرجع...
- عندك ثقة بنفسك كلش هواي .. تراني هم چنت احب جابر قبلك شفتني نسيته مثل الورد بكل بساطة اگدر انساك..
- بلقيس ليش تتعمدين دوسين علي بالحجي ولج والله اموت ما انحمل واحد يلزم اظفر منج تگليلي تنسيني گلبچ يطاوعچ حمد ظايع بلة بلقيس تايه.. مو گلتيلي اذا تنغث لو اضك عليك الدنية تعالي .
- هذا الحجي من چنت على ذمتك قبل ما اطلگني على العموم هذا الحجي ماكول خيرة الفات مات والله يوفقك بالجاي عوفني ارد ادخل
- بلقيس لا تقبلين ومستعد اسوي كلشي تردي.
- ما سويت قبل ما نطلق جاي هسة حمد حبك كله دغش وياي ما اصدگ.. وخر ارد اروح .
- بلقيس لا تكسريني بعد اكثر ولج خليتيني بحلگ كل شماتي ..
- انت خليت روحك مالك حق اتلوم اي احد .
- گلبچ صار قاسي وياي .. صح استاهل الي صار وياي چنت مغشوش بهواي عالم .
- تعلمت القسوة منك .. شفتها بعيونك من چنت تطگني بكل غل وحقد .
- يا ريت ادي انگصن وما مدهن عليج .. ياريتني ميت على الاقل ارحم من هاي الاهانه الي انه بيهة .. ليش ما ترحمين حالي ولج انه عشگتچ وادري بداخلج رجال ثاني گلت بلكي تنسى گلت بلكي تحبني وفرتلج كلشي ما تلگين مثلي يعشچ .. لا جابر لا عشرة .
- انت الي مراح تلگه مثلي انت الي راح تعض اصابيعك ندم انت الي خسرتني .. لك انه قبلت بيك وانت متزوج وعندك جهال وحبيتك وفوگاهة انه قبلت اعيش وية اهلك بس علمودك .. انت مراح تلگه ذاك البيت والفراش الدافي .. حمد انت الخسران انت مستوعب ماكو بعد بلقيس بحياتك . عود من تضكك الدنية وتحتاج احد يخفف عليك روح لهلك يسحبون همك ويحولو لضحكة .. على العموم الفات مات وخر لا احد ينتبه علي ماكو
- ما اخليج مو بكيفج اخذچ عصب عليج.
- ههههههههه حمد انه بلقيس ما تگدر اسويهة لان ساعته اموت بين اديك والندم يصير اضعاف.
- بلقيس انطيني حل شنو تردين اسويلج .
- من رخصتك ابو حمزة
دفعت ادي وخرت اصعب شي اتماسك يمه حمد نقطت ضعف مالتي چان يحجي ويا مگابل صح ظلمه بس احس بقربة جسمي يطخ بجسمة صوتة وهوة محترك داخلة بين الريحني وبين الي انقهرت علي .. دخلت للمطبخ والابتسامة شاگه وجهي والعب بشعري خلاص اخذت انتقامي منة و اهله انكشفو اله
- امي: وين چنتي؟
- برة.
- شسوين ؟
- ابدل القنينه.
- ما جاي تشتغل خاف ما مركبتهة عدل.
- هسة ارجع اشوفهة
رحت باوعت ما لگيت احد بدلتهة ورجعت
بلقيس: يمه ارد اصعد ارتاح يمج نسوان ساعدج بعد ما تحتاجيني.
- امي : ولج منا ناس وعالم وانتي صعدين فوگ.
- يمة مابية بعد اجامل
- لا اجاملين بس گعدي وسكتي
- تمام.
رحت اخذتي جهة بحدي وگعدت چانت البسمة شاگه وجهي واضحة للكل احس رجعلي اعتباري بحمد لان انه حلفتلة الة اخليك تحفة وما تنولني وهوة ..
الناس خفت وطلعت وانه على گعدتي اجتني هديل
- بلقيس خوفتينه گاعدة وتتبسمين چنج مسودنه خية خو ما لبسج جني؟
- ياهه ضحكيني ترة بايجة راح اصعد انام تعبانه
- ام حمد: بعد وكت گعدي يمنه.
- بلقيس: اعتذر بس گاعدة من الفجر وجسمي تعبان تصبحون على خير
صعدت بدلت ملابسي وتمددت گلت ارتاح اشوي وانزل من تخف الناس وعفيت صحيت على انسام تگعد بية بلقيس بلقيس بلقيس
- شكو !!
- يردوج جوة.
- منو وبيش الساعة؟
- ب9 ابوي يريدج
نزلت وانسام اتسولفلي انو حمد جاي يحجي وية ابوي علمود ايرجعني واهلة هنا هم على هذا الموضوع ويردون ياخذون راي
دخلنه للدوانيه موجودين كلهم وحته خواني كعدت بحد على جهة چنت اثاوب وافرك بعيوني گلت السلام عليكم بلگوة
ابوي گال
- شنو جنتي نايمة؟
- اي والله.
- بلقيس بوية عمج ابو حمد وحمد وام حمد جايين يرجعوج ويگولون نعزلهة بمنطقة بعدية عنه بالعمارة.. شنو كلتي.
- بابة انت كتلهم انه مخطوبة ؟
- بابة: بس انتي ما رجعتي خبر الي بموفقتج من جابر.
- ابو حمد: احنه ما نعرف بيج انخطبتي بعد ابوج.
- بلقيس: ليش حمد ما كلكم .. انه ما مقررة اوافق او لا بالنسبة لرجعتي من حمد فهاي شبه المستحيل لان ما اامن على روحي بالعمارة طول فترتي يمكم سمعت انواع الحجي من كل الجهات وحتة الافعال المؤذية لنسوان و وعشتو للزلم هم .. من رخصت ابوي اروح اذا ما عدكم شي؟
- حمد : مستعد اشتريلج هنا بيت يم اهلج وكعدي بي.
رفعت عيني بعين امة وابتسمت ودرت على حمد
- حمد ما سويت هذا الشي من البداية هسة يلة بعديش
- ابو حمد: انه ما اقبل بهذا الشي سلطان.
- ام حمد: شني تردين تاخذين چبيري يمج؟
- بلقيس: صراحة جيتكم ما اعرف شلون اوصفة انتم تدرون بية مراح اقبل ارجع وياكم بالعمارة ترحون وترجعون ليش ما ادري عود اسقاط واجب على العموم الحجي ما ايفيد
- سلطان: عزام رضيت من جنتك هجمت بيت بتي ورضيت من ابنك كتل بتي وطيح طفلهة ورضيت من كل مرة يتجاوزن على بتي ورضيت من ابنك هجر بتي ورضيت من حمد تجاوز وضربهة وكلشي ترضة ما دامة يهين بلقيس بس من بتي طلبت حقة رفضت اشو انه ما ارضة برجعتة واريدكم تعذروني.
- حمد: عمي انت شلك غرض باحد انه حبلي على گروني ومرتي اريدهة وين ما تريد بيت اشتري .. وخل تفرض علي شروط
- امه: ومرتك وجهالهة وين توديهم لو تشمرهم.
- حمد: اجيبهم وياي واستقر بالبصرة.
- عزام : مثل ما سوة عمك سلطان راح تخلي ايدك بيدة وتهج من ديرتك.
- حمد: انه اتنازلت عن الشيخة لمنصور بقة حلالي وگيعاني اذا تريد تشتريهة يا بوي اخذة لان راح ابيع گيعاني كلهة واجي للبصرة.
هنا گببهة بمعنه الكلمه.. ام حمد ظلت ادعي واتشمر بالحجي غلط وابو ما قبل ويصيح على حمد
انه بكل برود طلعت من الوانيه وخليت نارهم تاكل حطبهم امي چانت واگفة تستمع وابتسمتلي بمعنه عاشت ايدج.. رفعتهة حاجبي وابتسم .
ورة ما طلعو اهل حمد وهمة ضايجين من ابنهم واتعاركو وية ابوي صاحلي ابوي لان ما جان راضي على تصرفي الكل كاعد گالي
- انتي مقتنعه بحجيج يعني لنفرض حمد اجة للبصرة شنو راح يگل لهلة بالمستقبل
- بابة انت مو اجيت علمود امي لان تحبهة حمد ليش ما ايسوي نفس الشي علمودي.
- وضعي يختلف انه اهلي ما قبلو ازوج امج ورفضو هذا الشي رفض قاطع.
- بمرور السنين اكتشفت انو عمامي احسن من اهل حمد .. اهلك چانو صريحين وما لبسو قناع الود گبالك وبضهرك يطعنون بامي احسن شي من البداية كالو ما نريدهة مو مثلي قبلو بامل حمد يمل مني ويعوفني ومن شافو هذا الشي ما صار حاربوني .
- بلقيس عوفج من كلشي حمد ما راح يظله تقدير بين اهلة بعد محد يحترمة .
- بعد احسن علمود ما يروح يمهم.
- يعني هذا الشي يرضيج؟ يبقة رجلج بلة اهل تردين الي صار بأبوج ينعاد برجلچ.
- اي.. ياريتك ما رجعت لاهلك من رجعتك ولهذا يومك ما شفنه منهم اي شي براسه خير ما عدة عمي محسن.
حمد : خابرونه وعزمونه على خطبت وسام انه چانت الگاع ما سايعتني ارد اشوفهة ودة علي ابوي .. وگلي نروح لخطبة وسام وبلكي نحجي وية عمك يرجع بلقيس لاك انه ادري مراح تقبل لان هية قبلت تطلق وما تنازلت على شرطهة .. رحنه وگعدنه بالديوان الولد چان سلامهم وياي رسمي وحجيهم على كد الحجاية كالو راح اصير المشية مال الزلم والنسوان كلمن يروح يم سيارته النسوان بدو يطلعون وانه طلعت على امل اشوفهة وياريت ما شفتهة ... طلعت ام بلقيس وراهة انسام بصفهم بلقيس شامرة الحجاب والشعر كلة مفتوح وطالع من ورة شعرهة فاتحته على طولة وانزل من ضهرهة ولابسة نطرون وسترة ومخلية زواگة وصوت ضحكتهة يطن باذني بساعتهة عيوني احس تطلع منهم نار العيون عليهة تريد تاكلهة لا اگد احجي ولا اسوي شي لان مو على ذمتي صعدت امي وابوي بالسيارة وصعدت ارگع بالستيرن وادخن.
- امي : شفتهة.
- ابوي: هذا ثوبهم وانت مالك شي بيهة ما من حقك تحجي.
- ادري هذا الذابحني.. فوگهة تضحك.
- امي : يمة حميد بلغيس مو من نصيبك بعد لا تفكر بيهة.
- حمد: يمه شتحجين ؟
- امي: بلغيس انخطبت ويگولون انت تدري.
- حمد : منو الي خطبهة؟
- امي : وين اعرفهة لجن يگون حمد چان موجود
- حمد: لا تخافين بلقيس ما تقبل.
- امي : يمه مو شكلهة مال وحدة ما قابلة خلصته بس تتمرگص چنك حمل وانزحت منهة.
معقوله الي بينه ما چان حب معقولة من شافت جابر گلبهة حن ..يعني شني بلقيس صير لغيري اموت ما اخليهة تروح لحظن غيري وصلنه وتمت الخطبة وانه بس ساكت وحسبة تاخذني وحسبة جيبني لازم اعرف منهة اذا قبلت لو لا رجعنه ما چنت اسمع من اي احد شي چنت بس بالي شي واحد شلون اشوفهة بقيت واگف يم باب الدوانية والي هوة قريب على المطبخ بحجت التدخين لحد ما حسيت عليهة طلعت ورة البيت وانه مشيت وراهة بدون محد يحس حطيت ايدي على حلگهة ودفهتهة جوة ما جان مبين شي منهة المكان ظلمه بس ظلال وصوتهة الي معصب مني اسألهة اذا قبلت بجابر .. تجاوبني اي راح اصفة بحضن غيرك ...ايعني جابر يمد ايده عليهة يتمي ما تصير حلالي بعد وازودهة علي من اتگلي راح تتندم انت ماكو بلقيس بعد بحياتيك.....) حجيهة كلهة صحيح من بلقيس عافتني بقيت بحدي محد الي حته خولة قبل چانت تهتم الي ظلت ما تهتم وكانو ما موجود اخواني احسهم يشمتون والحجي گبالي وراي اسمعه انواع واشكال حته امي ما ظلت تسأل علي ..چانت هية دوة لعلتي لو حمل الدنيه كلهة على ظهري كله طيرة وتحول الهم لضحكة من فاركتهة
راحت وحجيه يطن براسي گاعد وطول الكعدة حجية بالي لحد ما الكل طلع بقينه بحدنه والكل التم امي اجت وابوي فتح موضوع بلقيس وانو تعزل بيت بعيد عنهم انه اسمع چنت متاكد مراح تقبل صاحولهة واجت شفتهة بالضوه الضعف مبين عليهة ومزغرهة حسبالك بت بيوت چانو عيونهة مورمة من النوم ومابيهة تحجي اخخخ والله مشتاقلهة من سمعت حجي اهلي عدلت گعدتهة وگالت لابوهة ليش ما گتلهم بخطبتي.
حسيت عمي سلطان مستغرب كالهة انتي ما رجعتي خبر
انوب كالت ليش حمد ما كلكم .. انه ما مقررة اوافق او لا بالنسبة لرجعتي من حمد فهاي شبه المستحيل لان ما اامن على روحي بالعمارة انة اول فترتي يمكم سمعت انواع الحجي من كل الجهات وحتة الافعال المؤذية لنسوان و وعشتو للزلم هم .. من رخصت ابوي اروح اذا ما عدكم شي؟
ما عجبهة الحجي لان هية شرطت علي من البداية عرفت هاي اخر فرصة الي اذا ما احجي اخسر بلقيس العمر كله لان هية راح تسويهة عناد وتزوج جابر حتلو ما تحبة
گتلهم مستعد اشتريلهة بيت واعزل بيهة هنا ..
ابوي ما قبل وامي هم باوعتلهة هية هذا الي رادتهة من البداية ومشت حجايتهة علية اخ يا گلبي شراح يسوي بيه .. اكو حقد بعيون بلقيس اول مره اشوفهة من اتعارك وية اهلي احسه تشمت احسة ينشفي غليهة سكتت
رجعنه الطريق كلهة عرك انه وامي وابوي انواع الغلط والاهانات
- امي: انت طممة عمرك ما اصير رجال ما دامك تمشي ورة هاي الحية.
- ابوي: عاجبة درب عمة سلطان يريد يمشي بي يريد اهلة يتبرون منه.
- حمد : انتم وينكم من راحت بلقيس ولا احد اجة وسأل علي حته خولة من شافت بلقيس راحت رجعت لطبعهة القديم وامي الي عشتو امي ما يوم اجتني وگالتي يمه شبيك شنو الغاثك .. بوية بلقيس ما چنت بس مرة چانت صاحب استشيرة من اطيح مصيبة ..ام اذا اضايقت توخر عني همي ..اخو يسندي بعازتي بلقيس بدون علم احد باعتلي گلادتهة علمود اسد عازتي علمود لحد يدري بلقيس چانت كل دنيتي ضحكتي فرحتي كلشي هية حمد مو حمد اله بلقيس.
- عزام: قبل لا تزوجهة چنت شيخ حمد.
- حمد: شيخ حمد بس حمد ماله وجود چنت اخر مرحلة من الجزع من الدنية كاره دنيتي مالي وجود بيهة بس طلايب الناس هية من دخلت بدنيتي گلبتهة بوية خليني اروح للبصرة برضة احسن لان مالي موجود بالعمارة.. لمنو ابقة لخواني الي محد يحترمني لو لمنو .
- ابوي:واحنه بوية مانهمك.
- امي : غزام عوفة مغسول مخة
- حمد : تريد ابقة يمك بهذا حالي العمر كله ما ودك تشوف ابنك سعيد.
- ابوي: الي تريد سوي بس انه ما راضي وبالنسبة لبيعت گيعانك ما تبيع منهن ولا شبر .. شگد تريد فلوس انه انطيك وخليهن انت هاي الگاع اشتريتهة بتعبك خليهن وانه انطيك فلوس اشتريلك بيت هناك
- امه: ولدلك شراح تگلهم امشي وياي للبصرة عبن مرت ابوكم ما ترضة الة نشيل للبصرة؟؟ لو خولة شتگهة.
- حمد: يمة خولة بقندرة مكرم السامع ما اشتريهة ما ناسيلهة سالفة السحر تحمد الله ما مطلگة والي يريد يجي وياي كيفة والي يريد بقة هم بكيفة.
- أبوي: بعت ولدك .. اخذهم وياك بلكي يتحضرون يصير براسهم خير مثل ولد سلطان.
- حمد : الله كريم .. احجي وية حمزة واشوفهة.
بلقيس:3 ايام ماكو خبر من حمد .. انه مسوية روحي ما مهتمة ولا ابين .. امي گالت فتحي موضوع مخلص وية اختج علمود يجون ويخطبون .
چنه كاعدين بالحديقة انه وياهة وامي فگلت لامي
- اگلج يمة شخبار مخلص بعدة ما مزوج؟
- امي: اي ما مزوج ليش؟
-اذكر چان يريد انسام.. اجة على بالي .
- امي: غير گطعت روحهة على ناصر وعافتهة.
- بلقيس: يمه هسة عوفج من ناصر ترة مخلص والله يحبهة... سمعت ابوي يگول يريد مرة يزوجهة.
- امي: اختج ما تقبل .
- بلقيس: لا يمه انسام اتخطت ناصر ما تهتملة .. مو صح انسام؟
- انسام: انتم تخططون لشي عمرة مراح يصير مخلص اجة راد يحجي وياي گتله ابن عمي ناهي علي انتم حسبالكم بعد يريدني.
-امي: هم صحيح.
- بلقيس: انسام لنفرض اجة وخطبج تقبلين؟
- انسام: ما يجي بلقيس فشلته ما يجي.
- بلقيس: جاي اگلج لنفرض.
- انسام: تردون الصدگ انه ندمانه لان عفته علمود ناصر .
- امي: يعني تقبلين بي.
- انسام: يمه شبيج هوة اجة يخطبني وجاي اتسأليني؟!
- بلقيس: اكو هيج شي تقريباً بس يردون يتاكدون انو انتي توفقين بالاول.قبل ما يجون النسوان... شگلتي؟
- الصدگ صدمتوني يعني معقولة مخلص يجي مرة ثانية يخطبني!!
- بلقيس: خطية تلگي يحبج.
- امي: هذا هم حظة الاغبرعرفة بيهة.
-انسام: شبيج يمه ليش تحجي علي .
- امي: هسة تقبلين لو اگل لابوج يسد الموضوع.
- انسام : لا يمه لا اسدو.. اقصد يعني .. .
- بلقيس: ههههههههههههه
- امي: خوش فهمنه تردي هههههه
عافتنه وراحت اخطية خجلت وانه ومي ضحكنه علية چان ادور امي علي
- وانتي؟
- انه شنو ؟
- لا تغشمين روحج انتي وحمد وين تردين توصلين ؟
- يمه انه كتلهم ما عندي غير هذا الحل مالت ايخليني يم اهلة ما ارجع لو اموت.
- تتحملين بلا!!
- اذا هوة يتحمل انه ما اتحل ليش ما عندي كرامه.
- لنفرض نفذ وعدة واجة هنا هوة ومرته وجهالة كلهم شراح اسوين؟
- يمه خولة مكدور عليهة اذا محد يحرض بيهة هية مثل العربانه منو يكظهة يدفعهة.
- واذا سوتلج سحر مرة ثانية.
- ما تندل شي بالبصرة.
- يعني مخططة لكلشي.
- لا مو لكلشي... صراحة حمد بعدني شايلة بگلبي علي كل ما اغمض اذكر من يطگني .
- تنسين من ترحين يمة تنسين.
- لازم الولد هم طاگج؟
- ابوج ما يحب سلوب الطگ كلش ..وما يتعامل بي واذا اذيته يهجرني .
- اف اف يمته ما شفانكم تتعاركون.
- گبالكم ما يبين شي بس نبقة بحدنة بعد ما يحجي وياي ويفرشلة بالگاع ويدور وجهة وينام... ابوج زعلة حيل مؤذي .
- يمه علكيفج ابوي حنين وياج ويموت عليج .
- اي حته حمد يحبج وحنين وياج ويموت عليج .. شعندج مگابلتني اذا هيج.
- هههههههههه صايرة ما تتحاجين .
- اروح اكل لابوج اختج موافقة احسلي
انسام : معقولة انخطب لمخلص كلش خايفة من هذا الشي يعني اخاف لا يريد ينتقم مني لان رفضته اول مره اخاف لا يعاقبني چنت هذا الشاغل تفكير
- بلقيس: شبيج انسام لامة وجهج گبال الناس هسة يگولون مجبور.
- انسام: بلقيس حيل خايفة من مخلص .
- بلقيس : لا تخلين هذا الشي بالج ترة الرجال مبين شاريج وانشالله رب العالمين يعوضج راح يدخل يلبسج الحلقات حسسي انتي فرحانه.
- انسام : خوش.
دخل مخلص علمود الحلقات والنيشان الكل ايهلهل جابت امه الذهب والحلقات لبسني الحلقة وانه لبسته چنت مدنگة مستحية منه حيل چان گلي رفعي راسج بس البسج التراجي رفعت راسي دنه يمي وبيدة ترجية فر شعري على جهة ولبسني الترجية من خلص حسيت ايدة مشت من اذني على رگبتي دار على الجهة الثانية صار ظرة للناس بس انه شوفه يلبسني وگال
- لا اتخافين مراح اكلج بس تراجي.
- مخايفة بس ما احب احد يجيس رگبتي.
- طبعاً محد يجيسة هاي مالتي انه
سكتت بابتسامه مجاملة
- صدقة لله فدوة لهل ضحكة.. ولج اموت عليج انه
صاح لامه علمود الگلادة ما يعرف شلون يفتحة ولبسني اياهة انوب جايبلي ملوي هم لبسني اياهم انه گتله بدون قصد
- حباب كافي تلبس توتر كلهة تباوع علينه.
- جا خلي يباوعون صرتي حلالي .. اذا ما مرتاحة لوجودي اطلع.
- لا مو هيج انت شوف شلون كلهة ملتمة علينه ويباوعون اتوتر انه هيج .
- يعني اگعد عادي.
- مخلص ..
- عيونه.
النسوان ظلو يصفگون ويگون " حبهة ولا تخاف من امهة" اشو هذا دنگ وباسني من ركبتي كمزت گمزة بقيت ارمش بعيوني وانوب نزل وية امه يرگص وانه بعدني ما متخطية الصدمة.. صح انخطبت من ناصر بس ما مد ايدة علي ما خليته ابد هذا شلون هيج يسوي
بلقيس اجتني
———————
رايكم بالبارت
En.Zahraa