صلى الله على نبينا محمد
______________________
•في مخيم العائلة:
دخّل ياسر عليهم وكان معصب وذا الشي خلى برق يبدأ استفزازه : شكل الحلوه زعلانه ، ياسر: والله ان ما سكت يابريق والله لتشوف شي عمرك ماشفته .
برق بإستهزاء : مثل ايش مثلا؟ وبعدين تدري ان محد يزعلك الا السنيوريتا هيا ، ركض له ياسر بخطوات سريعه ووصل جنبه ورفع يده وده يضربه بس تصلبت ملامح وجهه اول ماشاف جده دخل.
ياسر : ج-جدي؟ ، الجد متعب : ايه جدك يا ياسر ايه جدك بالله قلي انت ماتستحي على وجهك ترفع يدك على اخوك ، ياسر : جدي انا ... الجد متعب: اسمع يا ياسر برق هذا مثل ولدي الصغير ولا تطاوعك نفسك وتفكر ترفع يدك عليه والله انك بتشوف نجوم الليل بعز الظهر.
ابتسم برق ان فيه احد نصره وقال : جدي متى جيت ؟ ، الجد متعب : قبل شوي محد جاء معي ، ابتسم برق وقال : بروح اتأكد من الضو شبت ولا لا.
ركض برق لرائد اللي وجهه انحرق من شبت الضو ،رائد: تكفى يابرق ساعدني انا ابيض الحين بطلع محروق ، ضحك برق واخذ من يده الولاعه وبدأ يشغله وأول ماخلص وقف والضحكة مافارقت وجهه.
رائد : وش بلاك؟ ، برق : ياسر تهزئ بسبتي ، ابتسم رائد وقال : صراحه يستاهل شايف نفسه على مدري ايش وهو حتى شغل مايشتغل ، برق : شوف يعني شايف نفسه على أنه الحفيد الكبير ، رائد : انا يطري علي اوقات احس آلكاسر هو الكبير، ضحك برق : كيف اصارحك اني بعد مثلك احس زي كذا .
رائد : بروح اتأكد إذا الحلال موجود ولا ، هزّ برق راسه وراح رائد ، نزّل برق الولاعه وعيونه على النار وتمتم بحزن : ليه يا اخوي ليه ياعضيدي؟
•في بيت الجد متعب (في الحوش ):
وقّف العم مطلق وهو يتكلم مع العمه نوره عن ان السياره ماتكفي الا البنات لفّ عليه الكاسر وقال : ابوي جاي بالطريق يقدر يركب الحريم معه، مطلق : بس ما اتوقع تكفي سيارتي البنات كيف اخليهم يتزاحمون وبعدين انت وين بتركب .
نطت العنود وقالت : ياعمي حتى لو نخلي الكاسر يدقها كعابي عادي مراح يقول شي ، ضحك آلكاسر وسحبها على ورا وقال : ياعمي وهي صادقه اهم شي البنات يكونون مرتاحات.
جات المُزن ونطقت : طيب ليه ماتركبون مع ابوي بسيارته ، محمد : الله يصلحك يا المُزن تفكرين سياره ابوك باص؟ ، ضحك عبدالرحمن اللي توه جاي : وهو صادق اصلا سيارته قرمبع تعبت اقول له اشتر لك جديده بس مايسمع .
محمد : عبد الرحمن ماطلبت رايك انت اللي كل مانزلت سياره جديده بالسوق اشتريتها ، مطلق : وش دعوه صراحه أوقف بصف عبد الرحمن بعدين طريق الديره يهد السياره .
طلعت الجده اسماء وابتسمت وهي تشوف النقاش اللي يصير بين أولادها وقالت : يالله ياعيالي يالله خلونا نمشي ليأذن المغرب ، والبلفعل ركّب محمد الأغراض بسيارته وعبد الرحمن ركبَ الحريم بسيارته لأنها اكبر ، والبنات تفعصو بسياره مطلق .
مشى محمد وعبد الرحمن ولاباقي الا آلكاسر ومطلق والبنات، وقف مطلق وناظر بإسراء وقال: يالكاسر ركّب إسراء اول وحده ، لفّ آلكاسر على إسراء وقال : يالله تعالي .
تقدمت إسراء ومدّ لها الكاسر يده عشان يمديها تركب لان السيارة كانت بالحيل رفيعه عليها ، ركبت ولزقت بجنب ابوها ، وكان بيركب المُزن بس قال مطلق : خلني يا آلكاسر اركب هيا ، آلكاسر: ابشر.
ابتعد الكاسر عشان تركب هيا ولف على العنود وغزيل اللي واقفات ونادته غزيل ، الكاسر : هلا وش تبين؟ ، سحبته غزيل عشان يقرب وهمست له : تكفى خاطري اركب بالصندوق ، آلكاسر : ليه مو من عوايدك؟ ، غزيل : اذا ركبت قدام انت بتضطر تمشي عشان كذا ابغى اركب ورا.
بعّد عنها وكان الرفض على لسانه بس تجمعوا عليه العنود والمُزن والجود كلهم يبغون يركبون بالصندوق ، لفّ بتوتر وهو يناظر عمه اللي توه مركب هيا وقال : طيب بستأذن وبجي.
ابتسموا كلهم وهم يدعون ان عمهم مايرفض ، تقدم له وقال : ياعمي البنات يبغون يركبون بالصندوق اذا تسمح ، لف مطلق يناظرهن ونطقت إسراء: تكفى يبا تكفى .
تنهد مطلق وقال : تمام اركبوا بس لاتنطنطون لي كنكم قرود ، نطت إسراء من الجمس وركضت معهم عشان يركبون وفتح لهم الكاسر باب صندوق السياره وركبوا كلهم حتى هيا .
فزّ مطلق وقال: هيا انتي حامل تعالي اركبي قدام ، هيا : لا يايبا ابي اركب ورا تكفى، غزيل : لاتخاف ياعمي بننتبه لها ، سكّر آلكاسر الصندوق عليهم وراح يركب قدام مع عمه .
▪︎في المخيم :
لفّ الجد متعب وتقدم لِبرق ورائد وياسر وقال : يالله انت وياه روحوا اعزموا الجيران وقولوا لهم عشاكم اليوم عندنا ، ناظره برق وقال : جدي ليه اليوم تونا واصلين للمخيم والناس مراح يطيرون ؟ .
الجد متعب : اسمعني يابرق وافهم الموضوع موضوع كرم وجود مو موضوع تعب وانهم بيطيرون روح يالله .
فزّوا يمشون والتعب مليار فيهم وبدأوا ينادون ، وقف رائد وقال بضحك : لازم نعزم ابو ضاري؟ ، لفّ برق وقال : ياخي لو على تكلاي كان حتى عمامي ماعزمتهم .
لفّ برق وهو يشوف سيارات عمامه وصلوا، راح يركض لهم ووقف بجنب سياره ابوه وهو يساعده ينزل ، محمد : برق تعال وانا عمك شّل الأغراض، تنهد برق بتعب وتقدم له يشيل معه.
اما عند الكاسر اللي نزل وفتح الصندوق للبنات وتفاجأ من ياسر اللي تقدم يركض وسحب هيا بشويش عشان لاتطيح وهو يقول : ياقلبي لاتطيحين .
ناظرته العمه نوره وهي اللي كانت توها نازله من سياره عبد الرحمن وقالت : يع يداريها كنها يادهينه لاتنكتين ، ابتسم آلكاسر على كلمتها ومدّ يده للعنود ونزلت ونفس الشي مع غزيل والجود والمُزن وإسراء ، اول ماخلص سكر الباب وقفله وراح يساعد عمه محمد وبرق .
وعند الحريم اللي اول مادخلوا حطوا اغراضهم وفصخوا عبايتهم وكل وحده بخمارها ، دخلوا كلهم للمطبخ اللي تجهز القهوه والشاهي وتشوف هل طعمهم حلو ولا واللي تنظف الصحون واللي راحت تكلم العيال والكل توزع على شغله.
في الحوش واللي ماكان فيه الا برق والكاسر ورائد ، ارتمى برق على الارض بتعب وارتمى بجنبه رائد وهم يناظرون الغروب ، آلكاسر: علامك انت وياه وش بلاكم ؟ ، رائد : ياخوي ماعاد فيني حيل حتى احرك عيوني .
ضحك برق: عاد آلكاسر الحين اكيد بيقول اننا نبالغ ، ضحك آلكاسر وجلس بجنب رائد وهو يقول : ما الومكم صحيح اننا نجي بالسنه حسنه بس التعب عن سنه.
الجد متعب : قم انت وياه قامت عليكم القيامه قم يالله نصلي المغرب، كلهم فزّوا لصلاه المغرب لأن بعد صلاه المغرب الضيوف بيجون .
▪︎في المخيم (عند الحريم ) :
العمه شريفه : يابنات خفّو يديكم يالله الحريم على وصول ، الجود : ابشري ياعمه ، فزّت إسراء وهي راحت تخبط كتف الجود وهي تقول : جويده وين حليب النياق ؟.
الجود: يمكن غزيل تدري بمكانه، غزيل اللي توها داخله : ما ادري بمكانه انا قلت لك عنه وبس، العنود : لايكون ماجبتيه بس؟ يالله اصدميني؟.
الجود : ليه محد شاله من على الطاوله ، كلهم نطقوا : لا ، الجود : اجل اليوم بإذن الله عزيمه بدون حليب النياق ، المُزن بإمتعاض : لا وفرحانه بعد؟ اقول دوري لنا حل عشان نقنع فيه جدي .
الجود : ماله داعي بقول له ان حفيدتك الحلوه نست حليب النياق وما اتوقع انه بيصرخ علي ، العنود : صدقيني جدي اسوء مما تتخيلين ، العمه أسماء : يابنات بسكم كلام عن جدكم يالله اشتغلوا.
العنود : يمه كيف نشتغل ومافيه حليب النياق ، لفت اسماء على الجود : يالجود انا ماقلت لك حطي حليب النياق؟ ، الجود : ياعمتي والله نسيت.
أسماء : طيب مو مشكله الحين اكلم آلكاسر يجيب حليب ، العنود : يمه تكفين بروح معه ، أسماء: انتي خلصي شغلك بالأول، ضحكوا كلهم وكملوا شغلهم .
▪︎في المخيم (عند الرجال ):
واللي كان عند الرجال حكايه ثانيه بحكم ان من بعد صلاه المغرب الكل بدأ يجي للمخيم والأولاد يركضون عشان يقهوون اللي ماسك دله الشاي والثاني دله القهوه ، والثالث دله حليب النياق ، وواحد كان يستقبل الحضور .
ومن بين الحضور تقدم ابو تركي وجلس بجنب الجد متعب بحكم علاقتهم الوطيده وجلسوا عيال متعب بجنب ابوهم متفرقين ، كان الجو حلو ومفعم بالحيويه ، وضحك العيال والبزارين وسوالف الشياب والكبار كان معطي جو رهيب للجميع.
لفّ ابو تركي على متعب وقال له : والله ياعيال متعب اني جاي ومتعني وخاطري بالقرب منكم ، لفّوا هم كلهم والإبتسامه على وجوههم وابتسم متعب وقال : الشرف لنا يابو تركي بس من ودك بها ؟.
نطق ابو تركي وهو يناظر عبد الرحمن : والله من بنات ابو آلكاسر ودنا لولدي تركي ، ابتسم عبد الرحمن وقال : لك ماطلبت ، لفّ بابتسامه وهو يناظر تركي .
تركي اللي كان اخر همه الزواج كان جدي بما تعنيه الكلمه ماكان يضحك كثير الوحيد اللي يقدر يضحكه هو برق بسخافته .
وتركي اللي كان منحرج شوي لان اغلب الرجال كانوا يطالعونه ، وبالفعل مرت الساعات ونزلوا المفطح باللحم وبدأوا ياكلون ومرّ الوقت بسرعه وكان عدد الرجال بنقصان .
انسدح برق ورائد بتعب وآلكاسر اللي كان يقهوي جده وياسر اللي كان مشغول كل شوي يلتفت على باب خيمه الحريم ، الجد متعب : يالله ياعيالي يالله على النوم كلها كم ساعة ويأذن الفجر ونبدأ يوم جديد .
فزّ مطلق وقال : ابشر يبا يالله ياعيال ، وقف ياسر مع ابوه وقامو عمامهم ، عبد الرحمن قرب جنب آلكاسر وقال : تأكد من خواتك وامك اذا يبون شي ولا ، آلكاسر: إن شاء الله يبا .
راحوا عمامه ودخلوا لخيمه النوم وكان على العيال يفرشون بالخيمه اللي هم فيها وينامون ، وقف ياسر وفتح الخزانه اللي فيها الفرش وطلع فراشه وفرشه .
سحبه برق وقال : منجدك بتنام ورانا سهره! ، ياسر : وش سهرته ؟ انا دايخ وبعدين وشذا الجسم اللي ما انهد حيله ، وقف آلكاسر بيطلع بس سحبه رائد وقال : وين؟ ، لف آلكاسر وقال : بروح اشوف امي او خواتي يبون شي ولا، رائد : تأكد من امي بالله ، آلكاسر: ابشر .
▪︎في المخيم ( عند الحريم ):
انسدحت إسراء وجنبها العنود والجود والمُزن وكلهم تعبانين وجلست غزيل على الارض بتعب وهيا اللي ماكان فيها حيل لشي ، ياسمين : حسبي الله وش قاعدين تسوون ؟ قومو روحو ناموا!.
طلعت الجده ساره وقالت : خلاص بلا لعب يابنات يالله على النوم ، الكل : ان شاء الله ، وبالفعل دخلوا الحريم خيمه النوم والبنات نفس وضع الاولاد بيفرشون بنفس مكانهم وينامون .
فزّت العنود وقالت : يابنات طفش مو منجدكم بتنامون صح؟ ، تكورت إسراء باللحاف وقالت : والله انتوا ماعندكم شي عشان كذا بنام جيبي لي فعاليه واقوم ، الجود : ياخي العيال ماعندهم شي نقدر نتسلى فيه ؟.
غزيل : تعرفين تلقين العيال الحين دايخين من قوه التعب ، هيا : والله ماينلامون عاد حبيبي تعب حيل ، همست إسراء: حبتك القراده ، ضحكت الجود وجلست بجنب إسراء تلعب بشعرها اللي كان ناعم وقالت : تدرين احسدك عندك اخوان يحبون من قلب.
إسراء : حبهم زي وجههم خليني ساكته ، العنود : بنات لقيت فعاليه ، كلهم لفو على العنود ينتظرونها تكمل، العنود : بنات كلكم تعرفون ان آلكاسر عنده الدفتر حق الشعر صح؟ .
فزّت إسراء بحماس وقالت : لاتقولين بناخذ الدفتر ونقرأ اللي فيه ، هزت رأسها بحماس ، وقف غزيل وقالت : عنيده انتي مجنونه ؟ تفكرين بيرضالك؟ ، العنود : من قال اننا بنستأذن اصلاً .
المُزن : بس اخاف يعصب ، العنود : بالطقاق، غزيل : هيه ما ارضى على اخوي ، ضحكت الجود وهي توقف : تحسسيني انه ماهو اخوك يالعنود ، ضحكت العنود وقالت : محد يدري يابنات لو خلينا ذا الشي بيني وبينكم .
هيا : طيب مين بيضحي بنفسه؟ ، إسراء : اكيد العنود ، ناظرتها العنود وكانت تحس بالغدره وصرخت : طيب ليش انا ؟ ، غزيل : لأن حضرتك هي اللي مخترعه الفكره .
العنود : طيب ابغى معاون ، فزّت الجود وقالت : انا موجوده، المُزن : انتي صاحيه بتروحين اقعدي احسن لك ، الجود : اقول اسكتي احسن لك ، وقف العنود والجود وطلعوا وكانوا متجمدين من الخوف .
ركضوا لسياره عبد الرحمن وفتحوها لان عبد الرحمن ماكان يقفل سيارته في المخيم ، فتحتها العنود وركبت المكان اللي دايم يركب فيه آلكاسر وفتحت الدرج وشافت الدفتر سحبته بضحك ونزلت تركض مع الجود بس تجمدت وهي تشوف آلكاسر واقف قدام خيمه البنات .
عند آلكاسر اللي كان يكلم غزيل اللي كانت متوتره وتحس انها بتموت من قوي التوتر ناظرها بإستغراب وكرر عليها السؤال : متأكده ماتحتاجون شي؟ ، غزيل : ايه مانحتاج يعطيك العافيه .
لفّ يناظر المُزن وإسراء اللي كانوا واقفين مرتبكين و نطق : إلا اقول لك وين العنود؟ ، غزيل : راحت الحمام وبترجع ، آلكاسر: والجود؟ ، المُزن : معها ، كلهم ناظروا المُزن بوهقه لفّ آلكاسر بشك وقال : من داخل غيركم ، أسراء: هيا داخل.
نطّ برق ووقف بجنب آلكاسر وكان معه رائد وياسر اللي سحبوه تسحب عشان يجي معهم ، آلكاسر: تغطي غزيل ، لفّت غزيل تدور خمارها ودخل برق وياسر ورائد ومحسن اللي كان شوي وينام.
بذي اللحظه حست العنود انها بتموت من الخوف، الجود: هيه اقول رجعيه وخلينا نرجع طبيعي ، العنود : بما اننا جبناه نروح وندخل فيه يالله ، الجود : متأكده بتضحين بحياتك؟ ، العنود : ايه يالله قومي .
خبّت العنود الدفتر بفستانها وفتحت الجود الباب ، رفع راسه آلكاسر ونطق : ليه ماقلتي لي اجي معك يالعنود ؟ مدامك تعرفين ان الحمام بعيد عن المخيم، العنود : اسفه بس ظنيت انكم نايمين .
برق : مستحيل آلكاسر ينام بما اني موجود ، ضحكوا كلهم وكان ترتيبهم كالآتي ،برق وبجنبه إسراء اللي كان جنبها ياسر وبجنبه هيا وبعدها غزيل وبعدين الجود والعنود والمُزن وبعدين محسن وبعده رائد وبجنبه آلكاسر.
وقف برق وقال : ياشباب ترى عددنا بينقص ، لفّت إسراء وقالت : ليه وش بيصير ، برق : اعطي آلكاسر شرف القول، آلكاسر : ابشرك ياغزيل ترى تركي ولد ابو تركي خطبك من ابوي وهو وافق ماباقي إلا انتي توافقين وخلاص .
فزّت العنود وقالت : ليه يا اختي بتروحين ؟ ارفضي بسرعه ، طاح الدفتر مع فزتها وسحبته الجود وكانت متوتره رفعت رأسها وشافت آلكاسر يناظرها وهو مقطب حواجبه .
غزيل : صدق؟؟ ، لف عليها آلكاسر: ايه وحتى جدي تحمس يعني لو بترفضين يبغى لك سبب قوي ، آلكاسر وقف وهو متوجه للعنود اللي اصفر وجهها وقال : وش عندك ياعنيده؟ .
ابتسمت بتوتر وقالت : ماعندي شي ، آلكاسر: اجل ايش اللي ورا ضهرك؟ ، رائد : وش فيك ؟ ، تقدم ومد يده ورا العنود ، والعنود بحركه لا إراديه رجعت ظهرها ، استوعب آلكاسر ان شكوكه صحيحه .
ابتسم بهدوء وحط يده تحت رجلينها وشالها بسرعه وتوسعت عيونه اول ماشاف دفتره : دفتري ياحقيره!! ، صرخت العنود وقالت : جويده شيليه ، وبسرعه الجود سحبته وبتطلع بس مد برق رجله وسكر الباب .
وقف رائد ومسك يدين الجود اللي رمته لإسراء ، فزّت إسراء وركض وراها برق ونط عليها من ورا بس رمته لالمزن، أخذته المُزن وفتحت الباب وراحت تركض برا وهي تضحك ، لحقها آلكاسر اللي قام يركض بكل قوته وراها بس ماكان وده تطلع من حدود المخيم .
مد يده وسحبها على ورا وصرخت بقوه وهي تضحك صقعت فيه وطاح الدفتر، نزل ياخذ الدفتر وكان الكل مستمتع بالمطارده والكل يضحك ، لف آلكاسر على العنود وقال : الوعد مو هنا ياعنيده الوعد بالبيت ، ضحكت العنود وبقوه وكالعاده مع ضحكتها الفضيحه اللي صحت الجد .
الجد متعب: حسبي الله عليك انت وياه ماحلا تلعبون الا الحين روحوا ناموا والله لو ادور عليكم الفجر واشوفكم ماصحيتوا والله بالعصا اعلقكم على الشجر ،فزوا يتراكضون البنات لخيمتهم والعيال لخيمتهم وانطفت اللمبات وعم الهدوء بالمخيم .
______________________
صلى الله على نبينا محمد
انتظرونا بِ بارت 3