گعدت من الفجر طلعت للطارمة غسلتهة اشوي وگعدت امي لگيته اتسوي بالريوگ اكلنه لگمه على السريع وسام طلع يجيب الذبايح للعشة وانه بالبيت وامي وية انسام واحت للصالون انه ما ردت اروح ما انحس بالوقت الة وگالو وصلو وصلو دخلو الزلم للدوانيه والنسوان للهول شي اصفك وشي تهلهل وكلمن جهة انه وهديل وخالة سليمه ويانه جيرانه هم خطية جاين وانكربو ركضهة ركضهة امي بقت يم النسوان واحنه نوزع اشوي وصاحلي وسام على عصير للزلم صبيت بصواني وهمة ينگلون تمت خطبت الزلم گالو رايح يدخل العريس يلبسهة الحلقة دخل لبسهة الحلقات ابوي صاحلي بالمطبخ
- ها بوي؟
- بلقيس بس يخلصون حلقاتهم مدي سفرة لان يردون يطلعون للعمارة هسة.
- وحمد ؟
- حمد گال خل تحضر نفسهة .
- بابة عادي تصيحة اريدة .
- بوية ستعجلي عدنه خطار هسة وامج مدري وين
- انشاء الله.
دخلت اشرت لامي انطيتهة خبر غربت الدنه واحنه صبيه اكل انه بالمطبخ گاعدة على الكرسي احس رجلي تگطعت من الوگفة متانيه الجاي يفور وافرغة بترامز الكل ياكل الة انه اشوي وامي اجت
- كومي اكلي اشوي.
- لا ما اريد انه عود فد اشوي اكل شي خفيف
- خلصتي الجاي ؟
- بس انصب .
- هلكتي اليوم والله ما اعرف شسوي بلياج انتي واختج ؟
- زوجي ولدج واتخلصين .
- اي انشاء قريب اعرسلهم اثنيهم سوة.
ما احس اله احد حمحم درت واشوفه حمد .. ابتسامتي لا ارادية شگت وجهي گمت سلم على امي وانة وراهة ماك بس وجهة تعبان ومالة خلگ
حمد - بلقيس حضري غراضج نريد نروح .
- حمد عندي موضوع وياك..
- بلقيس جاي اگلج حضري غراضچ تعبان ومابية افتح اي موضوع.
- حمد شبيك .
- استغفر الله .. تردين تبقين يم اهلج؟
- لا هسة احضر غراضي بسرعة ما عندي شي .
دار وجهة وطلع امي سمعته استغربت
- بلقيس هوة هيج يعاملج ؟
- لا بس ما اعرف شبي اكيد صاير ويا مشكلة حمد مو طبعة يصيح علي ابد !!
- ابقي لا ترحين .
- لا يمه ما اگدر اعوفه هيج والله صاير ويا شي .
عفتهة وصعدت الم غراضي بسرعة الهوسة جوة نزلت غراضي بعدهم يشربون جاي عمتي احسة ما طايقة انسام اكو فرق بين جيتهة هذيج المرة وهل مرة احسهة تكرهة المهم طلعت غراضي ورجعت اساعد اعد البنات بالماعين خطية بحدهم وانسام مخطوبة عشتو لحد ما صاحو يلة ركضت بدلت بسرعة ولبست عبايت الراس سلمت على امي الي مبينه قلقه علي وسلمت ابوي الي هم مبين قلقان
- بوية مو گلتي ترحين للدكتور ؟
- غير مرة نجي انه وحمد .
- خو ما صاير شي؟
- لا بابة ماكو شي بس حمد گال تعبان انه اجيبج غير مرة.
- خير انشاء الله ديري بالج على روحج هاج خلي هذول مصرف الج
خلة بيدي مصرف
والولد كلمن سلم علي خلالي مصرف خطية ما ردت اخذ بس گالو احنه شغلنه وحد عن ابوي ومصرفج منه يختلف .. طلعت وبالي كله يم حمد الي من صعدنه بالسيارة مابطل تدخين انه ورة وبصفي عمتي وفاطمه وعمي بالصدر ..
اختنگت مديت راسي عود احجي ويا
- حمد على كيفك وية الجگاير.
- ما لج غرض
حجاهة بنرفزة سكتت منه غطيت وجهي بالحجاب وانتجيت على الجامه ونمت لحد ما وصلنه گعدتني عمتي
لگيت روحي متبخرة فد مرة نزلت حمد گبالي ودة الجنط
- عمة شبي حمد ؟
- سألي انتي ..موش رجلج!
- صاير مشكلة من جنت ما موجودة ليش گالب علي ؟
- مو بس عليج على الكل ارد اروح انطمر .
عافتني وراحت دخلت للبيت جان ينگل بالغراض اخر علاگه عافهة وراد يطلع جلبت بي
- وين رايح ما تطلع اله تفهمني شصاير شبيك مكلوب علي صاير شي سامع شي اذيتك بحجاية وبعدين اذا ضايج عن سالفة الي صارت بيت اهلي ترة انت الي صيحت علي ...
- بلقيس تعبان مالي خلگ نگت نسوان وكلش مختنگ من البيت .
- حمد بس اشوي تعال اگعد والله تعبانه من الوگفة الصبح كلة.
- روحي نامي منو كاظج انه عندي شغل ما اجي اليوم هنا احس روحي جاي تطلع
- على راحتك وين ما تبات بس فهمني ليش ضايج .
- متعارك وية خواني انتي مالج غرض باسالفة .
- گلبي عادي كل الخوان يتعاركون ويصالحون وانت الجبير لازم تتحمل والله لو تدري بانسام شگد اسويلي مشاكل.
- هية كله من الطرگاعة انتقام.
- انسام ؟!!!
- اي لا تستحي ولا تخجل وشمالهة هاي مستخفة مابقية سالفة خايسة عليج ما حاجيتهة
حمد من گال هيج گلبي وگف يعني انسام معقولة اسولف لناصر عن سالفة جابر اي اكيد مسولفتلة وهيج حمد گالب علي
- صالج چم سنه مزوجين ما فد يوم جبتيلي طاري اهلج بسالفة شينه شبيهة هاي محد مربيهة
- حمد شگايلة
-كايلة لناصر بلقيس ماتريد اخوك واحنه جبرناهة اخوك ما عندة كرمه يركض وراهة مثل الاثول شنو اتگله ايگلهة تم مسولفتلة الخطوبة كلهة مسولفته عن الحزبي مابقية شي ما سولفتله عن مشاكلكم انتي واهلج بداية عرسنه .
- حمد انه متعاركة وياهة بالقران لان هم اجاوزت وياي وهذا الاسبوع كله ما جنت احجي وياهة ومجنبتهة ما اعرف البنية من عرفت ناصر انگلب حالهة .
- هية ما عدهة اخلاق ولة وين اكو وحدة تحجي وية واحد بالتليفون ومجلبة بي ...
- حمد ماله داعي التجاوز يعني مع احترامتي الك بس حته اخوك ما مربة انت من اجيت وشفتني وحبيتي ما اخذت رقم تليفون وبقيت اطب وتطلع بحجت اشوف عمك اجيت دگيت الباب وخطبت وما سمعتني حجاية لحد ما صرت مرتك واتحة واحد يعشگ مثلك
باوعلي وجهة كله حزن بابتسامة
- حمد ادري باهلك يسموعك حجي يغثك وانه السبب وادري هاي ضوجتك لان خوانك شمر عليك حجي بسببي بس يا حمد شنو الي بيدي يعني انه هم فد يوم قللت احترامك گبال احد او حته بينه يجوز مرات نتعارك بس بينه ونرجع نصالح وكلشي تگلي علي يصير امر علموك وعلمود لحد يجيب طارك بحجاية لبست ثوب مو ثوبي وجاملت ناس ما طايقتهم بس علمود لا يگولون مرت الشيخ حمد مو من ثوبة كلشي سويت بس علمود خاطرك ..
- بلقيس تعبت منهم اخواني احسهم ما طايقيني من يوم الي اخذتج وانه المشاكل وياهم ما تخلص.
- يعني انه شلي غرض؟
- بلقيس ارتاحي انتي انه طالع .
عافني وطلع
هذا شبي مو صوجة صوجي انه الي مجلبة بي اشوي بحدك تجي وتتوسل بس صالحيني
طبيت جفت لغرفتي نمت ميته تعب
فتنة: ها شفتي مو گتلج خوش سحار صارلة اسبوع ما رايحلهة ولا طايق رگعت وجهة .
- خولة: خية بس شكلة تعبان ويكسر الخاطر.
- ضلي انتي مكسور خاطرج علي وهية ماخذته حاصل فاصل .
- لا لا سكتت بس اخاف منه لا يحن ويرجعلهة.
- اهم شي اسوين حجي الصبي وما يرجعلهة .
بلقيس: حمد مدري شبي اذا شافني كانو شايف ابليس كل مارد احجي ويا يتحجج باي شي ويشرد حيل قهرني يعني حملني مسؤولية عركت خوانه وانه مالي ذنب باي شي صح بالبداية مو زينه ويا بس هذا الحجي قبل كم سنه وانسة وراح بعد همة ليش مجلبين بهل الحجي ...
اسبوع وانه اركض ورا ماكو فايدة اخر شي گلت اخابر على ابوي يجي ياخذني ماعندي تليفون فا لازم اروح للقصر
لبست حجاب ورحت سلمت اتلگتني خولة من الباب
- خير شجابج .
- العفوو ليش هوة بيتج بلة زحمة؟؟
- بيت رجلي .
- خولة ولي من وجهي احسلج مالي خلگج كلش.
- اي طبعاً لان حمد ما مگلبج وما ودة يشوف رگعت وجهچ ايگلي كل ما اشوفهة اختنگ متحسف لان اخذج ورجعلي هسة متندم
عفتهة ودخلت احس نار گبت بيه بس ما بينت انه اعلمهة الخايسة هاي دخلت لغرفت عمتي ليگت عمي يمهة همة باوعولي باستغراب لان دخلت چفت اعتذرت
- سلام عليكم.
- وعليكم السلام!!!
- اعتذر بس ما ادري بعمي هنا .
- ابو حمد : بوية انه رايح چانت عندي اشغيلة يم عمتچ ورايح اخذو راحتكم.
طلع وعافنه
- ام حمد : خايبة ورمي شمالج؟!
- عمة بس فد سؤال بلة ما اضوجين هذا البيت لمنو؟
- باستغرب ..عليش اسألين؟!!
- اخذيني على گد عقلي وجاوبيني.
- لشيخ عزام.
- رحمة لامج وابوج .. بعد خولة تتلگاني من الباب اتگلي شعندج جاية ليش بيتهة مثلاً متعدية عليهة واستلمتني ذاك الحجي الي ايغث والله اذا ما طلعين حقي منهة ايگولون اخليهة عايشة.
- خولة هيج گالتج ؟
- صيحيلهة وسأليهة والكل بالمطبخ يسمع... تگلي والله بيت رجلي
- انه اعلمه
گامت طلعت من الغرفة وصاحت بصوت رج البيت
- خووووووولة
اجت تركض وگفت بصف عمتي
- اسمعيني زين يا لطمة هذا لا بيتچ ولا بيت الخلفچ هذا بيت الشيخ عزام منهي انتي حته تگلين لبلغيس شجابج گبال الكل تعتذرين منهه لا بالعباس اطردچ انتي ورجلج.
- عمة هية دشت اتصيح .
- راح اسأل النسوان الي بالمطبخ اذا چذبنچ اهينچ اهانه ما تنسيهة كل عمرج.
طبت للمطبخ صاحت لام جاسم مرة ما اچذب خطية فقيرة.
- ام جاسم بلقيس شنو گالت من دخلت.
سولفتلهة كلشي عمتي شاطت وگالتهة تروح لغرفتهة ما تريد اشوف رگعت وجهة
ورجعنه للغرفة
- شخلف النباح كلباً مثل اباه. .. بت حاتم تريد تشيخ علي اخخ بوية انه اعلمه اذا ما خليت حمد يربيهة .. وانتي شمالج وية رجلج انه مو گتلج اذا تكاونون تجين تخبريني .
- عمة والله ما متحاجين من رجعت من بيت اهلي هوة لا يجي ولا يمر.
- حميد ما يجيچ؟؟!!
- اي .
- عليش؟
- ما اعرف بس اخر شي حجة على عركت خوانه وذابهة براسي.
- چانتي ما تعرفين تسولفين عدل؟
- عمه عندج ابنچ وسألي عود من تفهمين ياريت تفهميني .
- ما تعرفين تحجين ويا ؟
- خل يباوع بوجهي بالاول وبعدين يحجي وياي بس يسمع صوتي يشرد.
- اسم الله شصابة .
- عمه بس ردت اخابر لاهلي ارد احجي وياهم.
- لا ترحين .
- وين ؟
- لهلج خل اشوف سالفت رجلج وبعدين خابريهم.
- عمه ما ارد اروح بس ..
- چانه ما اعرفج خاف جاية اسلمين علي ادري تردين اهلج يجون عليج.
- عمة تعبتنه بس فترة يرتاح حمد وانه ارتاح .
- من شنهي ترتاحين خير شصابكم طگتكم عوينه .
- انه هسة انده علي واشوف شصابه
دزت على حمد انه بقيت گاعدة وهية تسولفلي عن عرس لقرايبهم بمكان بعيد عنهم وهيج ولازم يرحون گالت لازم تجين انه هزيت راسي بالموافقة اشوي ودخل حمد وجهة اصفر وعيونه سود كانو ما نايمهوة من شافني حسبالك شاف جني گمز
- انتي شجابچ هنا.
- امة: شمالك انت ومريتك؟
- حمد : مابيه شي يمه راح اطلع اختنگت.
- بلقيس: هاي كل ما يشوفني ايگلي اختنگت عمة من رخصتچ..
- امه ولا تتحركين اشو اگعد يم مريتك .
- حمد : يمه كل ما تقرب منه اختنگ اكثر ماريد
- بلقيس: ولا اريد قربك انه بعد وديني لاهلي ما ارد ابقة يمك كلش.
عفته وطلعت ما ارد اسمع منه اي شي بعد مصخة شبي هذا رجعت
امة: خايب ليش مريتك هاي مو عشتو تحبهة وما ترضة على زعلهة؟
- يمه ما اگدر ابقة وياهة بنفس المچان اختنگ ويضيگ سدري وخاصة بيتهة ما اطيق اشوفهة مو تريد تروح لاهلة خل تروح .
- يمة اسم الله ولك حميد شسوتلك البت وهيج تحجي عليهة الله شاهد ما شفنه منهة شي .
- ماسوت شي بس ما اريدهة.
- حميد خاف ربك يمه .
بلقيس :وبقة الوضع على حاله الى ان اجت عمتي وگالتي مو ما ترحين ويانه للعرس والمهم بدلت بس من غير واهس بدت علامات الضعف تبين من ملابسي عشتو گاطعة الاكل علمود الخلفة من الافندي وهوة حته مايسأل باوعت على روح لبس العباية وطلعت لگيتهم مجمعين سيارتين سيارة عمي وسيارة حمد .. حمد اول ما شافني صاح
- بلقيس تروح وية ابوي وامي وخولة وياي .
- اباوع كلهة مستغربة وخولة تبتسم .
- عمتي : حمد يتگشمر شمالكم كلمن وية مريته .
- حمد : لا يمه ما اتگشمر اذا ما تردين تمشين وياي اخذي ..بلقيس وياج .
- بلقيس: ما يحتاج اروح ويه احد ... من رخصتكم .
حمد مو حمد نفسة انه امشي واحاول اصنع القوة گبالهم بس دموعي بحدهم يطيحون
عمتي اسمعهة تصيح عليه وهوة يگلهة يمه من اشوفهة والله اختنگ خل تروح لاهلة ما اريدهة اختنگ من اشوفه چان يصيح وصوته مسموع على الكل .
رجعت لبيتي لميت كل ملابسي وغراضي وانه القهر ماكلني شغيرة حمد شنو الي غيرة بليلة ويوم ليش هذا الكره بعيونه احسة مايريدني كانو يشوف شيطان يتهرب من النظر الي ..
گاعدة واباوع على كل مكان بالبيت وانه دمعي تنزل .. رحت خابرت على عمي محسن يجي علي ردت علي مرته گالت رايح للعرس من يرجع يجيج .
بقيت گاعدة اذكر صدة الي وابجي شلون فشلني گبال اهلة
من گد ما بجيت نمت على الكرويته ..
اسمع صوت الباب يندگ فزيت فتحت الباب چانت مرت عمي محسن خطية اجتي سلمت علي جبتلهة ماي
- تعالي عمة انه مو وكت الجاي بقة عگلي يمچ ما گدرت اتحمل خفت لا يصير بيچ شي .
- اريد عمي محسن يوديني لهلي ما ارد ابقة بعد هنا.
- يمه سم الله عليش؟
گعدت اسولف لمرت عمي وهية صافنه علي
- عمة چا هية ما يرادلة تفكير رجلج مسحور .
- شنو مسحور عمة اگلج ما ايويدني اتگليلي مسحور.
- اي عمة انتي من تلزمي شنو يصير بي؟
- كانو نار لزمته كانو كهرباء اگلهة ما يباوع بوجهي.
- اسم الله عمة مسويلكم عمل وحمد ما جاي يشوفچ بلقيس مرته يشوفچ بشكل يخوف ويتجنبه عمة انتي ما شايفة خبث النسوان .
- وشنو الحل ؟
- الحل ما تعوفين بيتج عبن هنه يردنج اطلعين ويرتاحن منج والمسكين حمد الطايح بيهة تره السحر ايأذي صحته .
- وشلون عرفتي الي مسويلي سحر مرة يجوز منصور من الاساس هوة كارهني.
- لا هاي سوالف فتنه انه اعرفهة واعرف سوالفه .
- وخوله؟
- شوفي بلقيس اذا تحبين رجلج لا تعوفي تراه هوة الي متاذي.
- ما ادري ما معقولة يعني حمد هيج مگلوب بسبب شعوذة.
- ولج عمة السحر هجم يامه ابيوت واكو ناس اتخبلو من السحر .
- اسم الله. شراح انسوي هسة.
- خل نعرف وين مسوين السحر ونروح الهم ونبطلة .
- ههههههههه والله يا عمة خيالج واسع يعني سويتي سحر وانوب كلتي فتنة وانوب تردين تعرفين وين وتبطلي .
- انه متاكدة فتنه يا عمة انتي ما جنتي موجودة قبل لا تزوجين صارتلج ذيج الطلابة من ورة فتنه وسحورتهة .
عمته ام رجلهة لزمتهة ترشرش ولا كية حجابات وبخور مو بس مرة تجي بهلة زعلانه من ورة السحورة چانتي ما اشوفين رجلهة جنه خاتم بصبعهة.
- والعياذ بالله .
- شوفي خل يجي عمج واكلة السالفة .
- خل انگل لام حمد ترة ما تقبل هية باذيت ابنهة .
- مراح اصدك وانوب تگلج تتهمين بتي ومن هل سوالف .
- اكلج عمة هوة الي يسوي سحر مو ايخلي ورقة لو فد شي ؟
- اي وعلي دگومي خايبة خل ندور طراگيعهن
———————-
🌹🌹🌹🌹
En.Zahraa