حمحمت امي وخر حمد مني ودخلت گالت صباح الخير وفاتت للمطبخ
-انه راح اروح للقصر ابدل واروح للديوان
- عندك هنا دشاديش مكويه وغتر معلگتهم بالكنتور تريگ واسبح واطلع .
- يمته كويتيهم؟
- من قبل انه اكوي دشاديشك كلهم واعلگهم بس الواضح انت ما طالع .
- اي والله .
- خطيه عمو هسه تلگا متبهذل .
- اروح ادل ..
- يمكن جاي اشم حمس شي بدهن الحر تريگ وبدل .
اشوي جابت امي صينية الريوگ مسوية باگلة بالدهن الحر وبيض تريگ وطلع
رحت لغفتي اطلع لروحي ملابس ارد اسبح گالت الممرضة عادي اسبحين بس كون ما يلوح العملية على ما نظفت البيت انوب دخلت وياي خطية حيل تعبتهة وياي وحيل انقهر من اشوفهة تشتغل طلعت من الباب اشعر بالنظافة انه مطلعة مخمريت الشعر ومشطي ودهن گالتي انة امشطچ ما خلتني امشط
همزين تمرضت يعني هاي طيحتي شگد قربتني من امي گعدنه نسولف على اشياء صايرة وياهم بالبصرة وانه هم اسولفلهة على العمارة وعلى اعراسهم من رحت بعرس جيرانهم.
- اي سولفيلي هاي السالفة ما اعرف ليش راح اضحك بيهة.
- ههههههههههههه اي والله من اذكر انه هم اضحك
- يمكن الباب يندگ ؟
- اي
- اگوم اشوفة
طلعت امي وچانت جاية عمات حمد وياهم خواته الكرياهت وفاطمة خطية راحت للمطبخ هية اسوي جاي احس شحنات كهربائية متطايرة بالمكان شي تبز بشي وانه وامي وحدة تباوع لثانية خوات حمد وحدة مزوجة ابن عمة وثنين مزوجين اخوان خولة وجايات يشمشمن اخبار وعماتة مبينات حيل ايحبن ام حمد بس عاد عليمن على سعدة خانم ضلت تعد وتصفط الى ان اطرقت ام كريم عمتة لموضوع ابوي
- ام كريم : صدگ يا ام وسام سلطان يشتغل عندچ؟
- ام بلقيس: باستغراب .. ما فهمت سؤالج!!
- ام حمد : استغفر الله خية انتي جاية اسوين مشاكل بس گليلي.
- ام كريم : لا عليمن كلهة تگول سلطان تزوج بالولاية وصار يشتغل بحلال مرته.
- ام بلقيس: لا عيني انتم فاهمين الموضوع غلط بابة شغل سلطان ويا قبل لا يخطبني لان كلش وثق بي وانطا محل ودتينه يملي وبدة سلطان بتكوين روحة وبقة يشتغل وية ابوي واملاكي حالين يمشوهة وسام وحسام وچانت بلقيس وياهم تراجع حسابات سلطان شغلة بحد وطبعاً انه اتوسل بي يدمج الشغل ما يقبل يگول هذا حقچ وما يصير واذا بعد تريدين تسألين اذا ادري بالمواضيع القديمه او لا ؟ فأدري بيهة وخلاص الماضي خلينا ورة ضهرنه ونسينا والدليل زواج بلقيس من حمد وگعتي انه بيت شيخ عزام .
- فتنة : يا ريتكم ما رديتو من شفنه وجهكم ما شفنه بس الضيم .
- ام حمد : ولا الضيم ما شفته اله من لفيتي انتي غراب ومزوجتلج غراب مثلج امشي ولي طلعي برة لا وعلي اخلي اخوتج يسحلونج سحل .
- بلقيس: لا عمه ليش اطرديهة مو هية جايه اسلم علي اگولج فتنه احنه ما اخذنه شي من احد بس الورث الي رجلج مكوش علي هوة وابو وزعنا وانتم اخذتو حقكم وبعد البيت ابوي وعمي محسن مخلينكم بي بس علمود امهم من تموت هم ياخذو فحبيبتي تمعني بوجهي عدل راح اشوفي كلش هواي بما انو تتفائلين بي .
- فتنه : ما بقت بس ام السحورة تحجي وياي .. بعد الله شيسوي بيج حته بزريه موتهة
هية هيج حجت وامهة نگدتهة بالعوجية على راسهة ترد تگوم رجعت طگتهة مره ثانية ظل الدم يصب من گصتهة وصحت لفاطمه سحلتهة برة وبكل عصبية كالت
- خلصت الزيارة البت تعبانه وتريد ترتاح وانتن كفيتن وفيتن
- ام كريم : اطردينه ام حمد .
- ام حمد : ما طردت احد امشن للقصر البت تريد ترتاح شني ما تحسن على روحچن.
خلن وطلعن زعلانات حته ما گامت وراهن صاحت بصوت مسموع دفعت مردي والهوة شرچي
امي خطية ظايجة بس ساكته وانه اخاف احجي لان عمه موجودة بس هية كفت وفت ردت اغير الجو لان امي انغثت من حجي فتنه وشماتتهة وعمتي اتفشلت هم
- ويگولون بلقيس مشرشبه وانتي عمه اضرب بس عندي سؤال هاي العصة مالتچ جبتيهة من شعلان ابو الجون.
امي ظلت تضحك وعمة ام حمد تباوعلي بتك عين.
- عمه بشرفج اريد وحدة مثلهة اضمهة لاوقات الحاجة.
- ام حمد : والگه السلف كله مفشخ.
فاطمة: يمه ناصر يريد يدخل علمود دوة لبلقيس.
- بلقيس: يمه بس انطيني حجابي يمج.
لبست حجابي ودخل
- ناصر : سلام عليكم شلونج بلقيس شلون صرتي؟
- وعليكم السلام.. الحمد لله يعني فرق كلش هواي چنت ما اگدر اتحرك .
- اي بسبب الالتهاب صاير بالجرح ومخزن هاي شنو ليش شايلة الكانونه؟! ومنو شالهة؟
- ام بلقيس: انه شلتهة علمود تسبح ماقبلت تخليهة.
- بلقيس: ناصر صرت زينه ما يحتاج علاج.
- يابة هوة كورس لازم تخلصي هسة لازم احطلج كانونه جديدة.
- حباب ما اريد مغذي ينومني .
- احسن تنامين علمود الجرح يلتأم بسرعة وهم بي علاج ومن باجر تاخذين ابر التهابات بالعضلة بعد ماكو مغذي .
- امي : يمهة سمعي حجي ناصر هوة افهم منج.
- ام حمد : چا غير دغتور.
حطولي معذي وغطتني امي وام حمد بقت اسولف وية امي لحد ما نمت اكره هذا المغذي فزيت على ادين تلعب بشعري
- مامه بلقيس ماتگعدين تاكلين لگمه.
- اي مامه گايمه
- گعدي بمكانج انه اجيبلج الاكل
- لا ارد اغسل
گمت غسلت وجهي ورحت للحمام گعدت وبقيت افرفر بالبيت وامي وراي گعدي موزين عليج .. انه حركتي احسن بهواي يعني مو مثل قبل حته الم قليل حيل بس خدر بجسمي بسبب ماكو حركة شفت الساعة چانت الساعة ب9 اف كل هل وقت نايمه صبت امي شوربة اكلت وشالت الصينه انوب گعدت وياهة سولفلي شنو صار من نمت
- ام حمد بقت يمي وتتعذر مني على الي سونه بنات عم ابوج والسبب اكيد لان جانو رايدات ابوج وعافهن عفية سلطان كلهة تريدة .
- مثل حمد يحسسوني بايگته
- على طاري حمد من الصبح ما بين .
- يجوز راح يم خولة .
- هيج عادي تحجيهة ؟!
- يمه يا عادي تردين الصدگ مجرد اتخيله يمهة انجلط والله لو اشوفهة يمة دمي يفور بس مرات احاول اكبر عقلي بس هم ما يفيد يمة من دريت بيهة حامل حبست روحي بالبيت وكارهة الذنية وحته حمد ما حجيت ويا .
- الله ايساعدج يعني تخيل من اتخيل ابوج يزوج علي انتهي .
- الله يساعدهة هية لان انه الي اجيت عليهة ضرة واحد خل يحجي مالت الله يعني خولة تكسر خاطر مرات وحمد دايس عليهة بزيادة وفوگ هذا اهلة من عافتهم طردوهة وبقت محد الهة غيرة وهوة يعني ابد ما معبرهة .
- شلون ما معبرهة ولهسة ماكو .
- هههههههههههه ولج يمه ادري يهش ذبان يمي ما تشوفين حالتي .
- لا والله على الاقل يسأل .
- صدگ مو من عوايدة يجوز ما راجع للبيت بعدة
- ما سولفتيلي شصار بالعرس الي رحتيلة رگصتي ؟!
- شوف امي اتگلي رگصت هههههههه عشتو بدلت ولبست فوگ ملابسي عباية وحجاب همة گالو اجت ام حمد ونسوانه وهنة النسوان كلهة لتمت علينه ايسلمن چا غير عافو العروس وگعدو گبالي .
- عود صدگ.
- بس نزعت العباية احس النضرات صارت وحدة تأشر للثانية عشتو گلت انزع العباية والحجاب رجعت حطيت العباية على چتفي وگعدت والناس ملتمه علية لا وازيدج من الشعر بيت هنا بالعرس اصير جبهة من الرمي وبطلعتي علگت يمهة وانه صار بيه خطية حمد شبگني ومشاني گبال امت محمد كلهة خاف ناقصة احد يحجي علي .
- ههههههههههه .
- ورجعنه والدنية ضلمه وامشي واعثر بالعباية اخر شي گضيت العباية ولفيتهة مثل ام الروبة 😂 والتصنيف علگ .
- والله دنية .
- اي والله صدگ الي شوف حالي بذاك اليوم ما يصدگ حالي قبل سنه.
- صدگ اجة ناصر راد يسلم عليج گال ارد اروح لبغداد عندة دوام بس گتله نايمه بعدة عاف ابر وگال تجيهة ممرضة تبزهة ابرة كل يوم لاربع ايام وانشالله تگوم على حيلهة .
- والله هل ناصر درة من الله .
- اي والله كلش خوش ولد الله يحفضة
- يعني يمه فرضاً اذا اجة وخطب انسام شنو رايج؟
- ليش هيج تحجين؟
- اشوفة خوش ولد بصرحة و حمد يعني قبل حاول يوصلي هاي الفكرة بس ما صار عندي مجال احجي وياكم .
- بصراحة الولد مابي عيب بس هم اجيب الي بنية بالعمارة صعبة علي هاي بعد ما اتحمل .
- ناصر يريد يسكن بغداد .
- يا امي الطبيب ما تتحدد اقامته كل فترة بمكان يعني حتلو بغداد وحدة بالعمارة والثانية بغداد ابوج ما يقبل بعد وحدة من بناته بعيدة عنه ولا انه .
- بس ركضتو شمرتوني بالعمارة بحدي حته محد يسأل علي.
- ما شمرناچ اجت قسمتج هنا.
- لحظة يمه انتي مقتنعة انو هية جانت قسمة لو تبير منج واللهمو الومج لو فد شي.
- انه اللوم وتأنيب الضمير يريد يذبحني كل ما اشوفچ الي مصبرني بس حمد .
- بصراحة لحد هذي الساعة ما مقتنعة انتم شلون اقتنعتو عوفج من كلشي وعوفج من الضروف بس هوة مزوج وعندة 2جهال شلون طاوعكم گلبكم تخلوني ارتبط بحمد ومجتمهم غير مجتمعنه .
- مو اگلج قسمه لا وانوب اجتكم خولة للبيت وشفتوهة ..
- هسة انتي بعدج ندمانة ؟
- يمه انه احبه لحمد وكلش احبه بس سالفه الشرج صعبه وبعدين انه اخذت الرجال من مرته حطي روحج مكانهة وشوفي.
- اسم الله .. اگلج ارد اخابر لابوج بس استحي احجي ويه حمد .
- انشالله بس يجي اگله عدهم تليفون بس المشكله من اتخابرين كلهة تلتم عليج مو تگولين ما گتلج.
- بس اسأل عليهم واطمنه عليج .
- اي مامه هواي طمني علي ولا تگليه جان جرحهة ملتهب گليلة زينه واحسن من الاول .
- شعجب ما حاطة تليفون يمج؟
- خفت لا احد يحجي علي تدرين شلون يفكرون وحمد مو كل يوم يمي لا انوب واحد منهم يذب علي بلوة ويگول عدهة شي عود عشتو گلت ورة ما اجيب افاتح حمد بالموضوع .
-انه احجي وية ابوج ايحاجي.
- ماله داعي انه احجي وية حمد نفسة .
بقينه نسولف لحد ما اندگ الباب فتحته امي دخل حمد مبدل هدومه يعني جان اهناك مثل ما توقعت امي گالت
- انه راح انام تعبانه بلقيس اذا تردين شي بس صيحيني .
اجة حمد وگعد يمي باسني من راسي ياربي من يجي مناك اضوج الزمه استغفر الله صاير هوسة بعقلي كل اشوي راي
- يمته گعتي ؟
- مساع .
- وشلون صرتي .
- الحمدلله احسن.
حس انه ضايجة
- انه رجعت المغرب مريت اشوف ولدي صارلي فترة ماشايفهم ولا حته رايح لذاك البيت گلت امر عليهم وانتي جنتي نايمه خوما ضجتي؟
- لا ما ضجت واذا تريد تبات هناك عادي ما عندي مشكلة .
- بوية عليمن ضايجة اگلج من طيحتج بالمستشفى ما شايف احد ...
- ما ضايجة بس اشوي يعني بالي ضل يمك لو جاي وگايل راح تروح هناك ماكو مشكلة حتلو تبات بس لان طلعت وبعد اختفيت .
- اي هاي حقج علي بس متلوه هل فترة.
- وين رحت الصبح سولفلي .
- تحقيق .
- حمد شبيك يعني تريدني اسكت الواحد يبتلي يحجي وياك شي .
- بوية اتمزهد وياج .
- شقاويش هذ يعني گلت اخفف عليك اشوي جاي حاد سنونك عليك عمي شدعو .
- اكلتينه بكشورنه هههههههههههه
- على شنو تضحك هاي رحت يمهة كم ساعة گلبت علي شفتني مريضة وانت استغليته فرصة بحجت مريضة وادري بعد كم يوم تگلي انه شعندي باقي هنا اروح يم مرتي وبعد ...
- ولج كافي نهديتي علي والله تعبان من الصبح على هل فرة من مكان لمكان وما بقيت هناك لان انه محتاج ابقة يمج مو انتي محتاجتني بلقيس تعبان والله تعبان.
- اسم عليك من التعب خل نطلع برة شوي نغير جو .
- ما تگدرين تمشين .
- لا اگدر بالكرويته البرة نگعد انه وياك هم انه مختنگه .
گمنه وطلعنه انه ويا گعدت بطرف القنفة واشرتله يتمدد على رجلي هوة نام على جلي ويباوع علي وانه اللعب بشعرة
- سابحة اليوم جا انه ناقص .
- حته انت سابح هناك.
- ههههههههههههه.
- سكتت سكتت اگلك شي حمد مساع اسولف لامي واگلهة انه صايره كلش مزاجية وكل شوي راي
-موش جديد عليج تعودت.
- والله!!! مقبولة منك بس ما گتلي شنو الي مضوجك ومتعبك؟
- اخاف احجي واظوجين.
- انه متعبتك؟!
- لا يا بوي مو هيج بس بلقيس ما اعرف شلون انظم الوقت بين الشغل والواجبات الديوان والشيخة منصور صح ما يفيد بالديوان بس چان شايل هم المزارع والمحاصيل والحلال كلهة هسة كلهة طاحت على راسي وما اگدر احجي لو اذمر لان انه الي طردته.
-خل اسولفلك سالفة جدي ابو امي الله يرحمه من مات عاف املاك لامي من بغداد للبصرةامي خلت ابوي يدور بهذا الشغل من مزارع ومن محلات بالعشار ومخازن وسيارات ابو اول ما كبرو وسام وحسام گعدهم وصاح لمي وبدة يشرحلهم على شغله وگلالهم هذا حلال امكم انتم اديرونه انه علي بس اعلمكم واذا تحتاجون شي موجود صدفه جنت انه موجدة واسمع حجع حجي ابوي وهوة يعلمهم على كل شغله وانه استمع اگول بداخلي وسام وحسام شلون راح يدبروهة واصلاً ابوي شلون ابحدة چان يلحگ بدو اول وها بشرط كون يكملون مدارسهم وجامعاتهم هذا شرط امي خطية بدو يرحون للشغل اول شي ما عرفو وتعبو وملو بس كل ما يجعون يستحون يگولون لابوي هذا الحجي لان هم كبر وبحدة لازم يعتمد على ولدة فتفقو وسام علي العمال وحسام الحسابات ومشه الشغل وكل جرد حسام يطيح حظة وذاك اليوم تعاركو حسام وسام بسبب الجرد وسام يگله حسابك غلط وهذا ايگله انت ما تعرف تمشي الشغل حسام عاف وسام بحدة وراح يشتغل وية ابوي گعد وسام مثل هاي گعتك وظل يفر بذاناته ما يريد يروح لحسام ويذل روحة ولا يگدر يدبرهة بحدة رحته احجي ويا فسولفلي كل السالفة ..
گتله ابوي شلون جان يشتغل بحدة لازم تعرف علمود تنجح
گلي جوة ايدة ناس تشتغل
گتله جيب ناس ثقة وتعب اكثر وانه بالجرد تساعدك بالبيت
شغل وسام حميد بن خالتي ويا وظل يطلع من الفجر بس علمود يثبت انو هوة احسن من حسام بس هذا العناد مالته خسر حسام هواي لان وسام ثبت لابوي بحدة يگدر يدير كل الحلال وانو هوة گد المسؤلية والغلطان چان حسام صح رجعو يشتغلون سوه بس كلشي بيد وسام بالمختصر
شوفلك ناس تثق بيهم وشغلهم وياك وابدي اخذ حمزه وياك علمود تخلي الناس تتعود علي حتلو صغير بس لازم اطلعه ويك انت ابو لازم يطلع ويك مو ويه جدة تره يظل يحقد عليك وتبعد ابنك عنك .
تتعب فترة بس تحصل احترام العمر كله لا اتخلي احد يگول ياريت بقة منصور وحتلو بعد فترة يرجع منصور تبقة انت الكل بالكل .
- الله كريم.
- ربك كريم ويعرف قدرت كل انسان وهذا اختبار من عندة النه
جر حسر وسكت
- تره مو هذ حمد الي حبيته حمد الي حبيته اذ راد شي يسوي وماكو شي يكسروين راح شيخ حمد ليش تخليني دائماً بحل ملامه الكل يگول شيخ حمد من ازوج مره مو من ثوبه تغير ليش ما تخليهم يگولون شيخ حمد غير مرته وخلاهة من ثوبنه.
- تردين الصدگ محد يبهذل شيخ حمد بس انتي يا بلقيس وانه محد خربط وظعي بس يوم ردتي تموتين بيدي هنا ما بقة عقل براسي بلقيس انتي تعرفين شگد انه متعلق بيج
- شگد .
- بگد رحمت الله ولج انه من طلعت من بيت عمي محسن رديت گتلهم راح اعوف الديرة الكم واطلع عفت كلشي علمودچ لان اعرف ماكو حياة من بعدچ.
- هية الحياه اذا انت مو بيهة ما تنراد ابوي ما قتنع اله اطلگ گلت لامي گلي لابوي انه ما اعصي شورة واكسر كلمته بس اذا طلگني من حمد ارجع ويا جنازه هنا ابوي خطية بدة يدور عليك علمود يحجي وياك حمد انه حبيتك وتعلقت بيك وچنت اتمنه يصير بينه طفل بس ربك ما قاسم النه هسة .
- اااااااه انتي تتمنين مني طفل والله دنيه تذكرين بداية حملج ما چنتي رايته.
- بعد الشطاره الك خليتني اعشگك واموت عليك و بعد احبك و...
- وكافي لان ما اتحمل وانتي جاي تلعبين على اعصابي .
- يا اخي خلبتلي سلسله افكاري .
- وخوة تخويج منين اجيتج اخوج .
- ههههههههههههههه يعني هسة انه وياك اخوة والله ما اعرف المن جاي يمي لا اهش ولا انش .
- چا هية بس الگعدة وياچ ترد الروح.
- امشي گوم انام لان وراك گعده من الصبح ماطول ارتاحيت مايهون علي تنام متكدر
گعد باسني من راسي انطاني ايدة علمود اگوم لزمته وگمت
- ترة صرت زينه والله
- ستري على روحج نسيتي قبل كم يوم من التهب الجرح شصار بيج .
- نام على جربايتك .
- لا بويه خليني على هاي الخشبة اريح من النومه بصفچ.
- ليش ؟!
- بلقيس روحي نامي منا انتي مريضه ومنا انه اشوفچ بحضني واضل الوب ومنا عمتي ما ترهم.
- هههههههههههه ماشي راح اجيبلك فراش على القل .
- انه اجيب فراش مالج غرض روحي نامي انتي
- حمد امي تريد تحجي بالتليفون بيتكم ويه ابوي باجر .
- اي عادي بس تروح تگدر تخابر وانه هم ذكريني اسويلنه تليفون هنا .
- يا عمري انت اموت عليك..
- دروحي نامي يله .
- تصبح على خير.
—————————-
تعليقاتكم وتشجيعكم
En.Zahraa