عشق في بلاد حروبها لا تنتهي 4 ( 2017 )

البــ الـــخامـس والعـــشريــن ــارت

_
_
عِــشق فـي بِـلاد حُـروُبِهـــا لا تنتّٰــهي 4
  { 2017 }
.
.
في الحلقة السابقة
شبحت إلهَــام لـ يدها المجروحه بعد محاولتها للإنتحار وقعدت تمسح عليها بصبعها ومسمعها مع سميح لكمل :وقالي نوصلك قلت سماحه
رفعت إلهَــام عيونها فيه طول بـ كسرت قلب ورعشة خاطر وبـ دموع ملو عيونها ، وهيا تشبح لـ سميح لـ نزل عيونه منها وكمل :وقالك حوشي ماعاد يبيك تخشيله اما اني اختي علي عيني وراسي وحوشي مفتوحلك لكن الساني ماعاش يخاطب السانك
وناض وهوا يشبحلها كيف الدموع سالو علي خدودها بعبره وكمل :والخيار ليك وشوفي شن ينفعك

قراءة ممتعة 💛
البــ الـــخامـس والعـــشريــن والأخــير ــارت
.
.
لا صــديق ولا حَـبيب سـ ينفعــكـ يـوم الغـد غيـر أعمــالكـ الصــالحـه 🍃
.
.
قعمز السِـيفاو علي ركابه قدام القبر وعيونه مليانه دموع وهوا يقرا في المكتوب علي اللوحه ( علاء سعد الـ### ) ، لـ قراها فَـاتح بدموع سالت علي خدوده وهوا يدكر في اخر مكالمه معاه ( قال بصياح :دماغك الـ ..... شن فيه اه شن فيه ماكفاك لجانا من لعفن هدا ماكفاك موتت رائد مزال خاطرك يموت واحد منا ، واسمع من الاخير الله لا يردك خليك مصيرك اصلا زي بوك وجعلك ماعاد روحت
وقبل مايسكر جاه رد علاء :كمشه كلاب زيكم رخو بـ بوهم مايستاهلوش كلامي اصبرو ربع ساعه بس وشوفو شن يصيرلكم وغر تفيدكم توبتكم ياالاولاياء الصالحين ) .
رفع فَـاتح يديه وحاوط بيهم وجهه وهوا يتمني يرجع الوقت ويدوي معاه بشويه وبسياسه ويهديه ، يقوله رانا حني خوت ، عزوت بعض ، روح بعض .
وقف رعد ورا السِـيفاو وفَـاتح وقال: سامحوه وخفافو عليه عدابه
وتلفت رعد طلع بخطوات بطيئه من المقبره ، بيطلع بكمل حياته ، بيمشي لـ مرته ولصغاره ، خوه ايه واجعه ايه وموته كسرت حيله وجهده ايه ، لكن ماحد يموت علي حد ، ماحد بتوقف حياته علي خاطر فلان مات او علان مات ، صح بتقعد وغزه في القلب والروح بس بنكملو .
حطو في راسكم ماحد بيحس بيكم ماحد بموت عليكم ماحد بوقف حياته علي خاطركم مش لانه مايحبوكمش او انهم قليلين الخير والاصل لا لانه الحياة هكي تطلب ، لانه الدنيا الوسخه هكي تركيبتها ، اللي بينفعك واللي بموت معاك وبـ يوقف معاك هيا اعمالك الصالحه فقط ، دعوت الناس لدرت ليها الخير ، ولو كنت انسان محظوظ وربي يحبك وتوفاك قبل والديك حـ تنال النصيب من الدعاء من قراءة القراءن لروحك منهم لانه والديك هما بس اللي حـ يحسو فيك بعد موتك حتي لو كان يكملو حياتهم بس حـ تقعد ذكراك في قلوبهم وخيالك بين عيونهم لا حين ماماتهم.
.
.
وفي لـحظه نتمنـو رجُعونــا الـي ذاكـ الرحـم الحنــون الدّي كـان حــامـل علينـا مواجـع المُستقبــل 🍂✨
.
.
فــــي الليـــل ......
وقفت مـريم قدام باب دار لبنات وهيا تشبحله بـ عيون تنزف بدموع وهوا يحضن في امه لـ تبكي بـ قهر بـ لوعة قلب زاد علي جرحه جرحين بـ فقد ظناه التاني ، تبكي وهيا حاضنه بكرها وتشكيله بدموعها علي خوه لراح ولحق خوه .
بعد السِـيفاو من عليها وباس راسها وقال بعبره مكبوته :الله يرحمه ياامي الله يرحمه كفي علي بكاك ودعيله ماتزيديش علي عذابه عذاب برحمة رائد ماتزيديه
وتلفت طلع بدموع سالو علي خدوده وخلا فَـاتح لـ حضن امه لـ تشبتت فيه وتهمسله من بين بكاها :اخخخخ ياولدي اخخخ مشي وخيك مشي ولحق وخيه
ماقدرش فَـاتح يشد دموعه زي السِـيفاو وستسلم ليهم بين حضن امه ، استسلم وهوا يزيد في حضن امه وكـ انه يقولها رجعيني لـ رحمك ياامي رجعيني وخليني فيك راهو حمل لحياة ماقدرتاش حمله واعر وصعيب عليا .
.
ولا الحَمــد لـ غيـره ، ولا الشُكــر لـ غيـره ، فَهـوا المَنــان ، الـرزَاق ، الـمُجيب ، فـ كمـا يـأخُـد يُعطـي " الـحـمداللّٰـه حـتي يـبلـغ منتـهـاه " 💛🌱
.
سكرت مـريم باب الحوش وهيا تخش لـ الدار وتشبح لـ باب الحمام المفتوح وصوت الدوش المفتوح ، فكت وشاحها لـ لوحاته علي السرير وقربت من الحمام وطقت علي بابه المردود :سِـيفاو
طقت مره تانيه وهيا تراجي في الرد لـ ماجاهاش وخلاها تفتح الباب وتخش وهيا تشبح فيه كيف واقف تحت الدوش المفتوح عليه بـ حوايجه المبلوله بـ الكامل وهوا متكي راسه علي لقزاز .
قربت مـريم بفزع وخوف : سِـيفاو خيرك
جبدها السِـيفاو من خصرها ودخلها معاه تحت الدوش وتكي بجبهته علي جبهتها بشهقه منها خلاها ترفع يداها وتحطهم علي كتافه مع همساته :حاس روحي نخسر في صغاري واحد ورا واحد يامـريم حاس ربي يعاقب في بوي فيا اني
رفعت مـريم يداها ومسحت علي خده وعيونه لـ تنزف في الدموع لـ ختلطت مع لميه وقالت :هدا قضاء وقدر هدا حال الدنيا كلنا فانيين ياحبيبي كلنا
فتح السِـيفاو عيونه فيها :كلنا وله باهي نبي حقي اني نبي نّنفني توا ماعاش قادر نتحمل
نزلو دموع مـريم بغصه وخوف وقربت باساته بخفه علي جبهته وبعدت وهيا تفتح في عيونها مع همسها :ولمن بتخلينا حني اه ، علاء مشي بس في حد بجي غيره حد يموت وحد يولد هدي الحياة
وفتح السيفاو عيونه لـ تلاقو بـ عيونها وهيا تحاوط في وجهه بين يداها وقالت :حد يطفي النور علينا بموته زي علاء ، وحد يولع النور بـ ولادته زي ولدك لجاي
قرن السِـيفاو حواجبه وسكر امية الدوش وهوا يضغط بديه علي خصرها:ولدي
بتسمت مـريم بـ هزت راس :ايه اني حامل
نزلو دموع السِـيفاو لـ خلو مـريم تمسحهم وتبوسه علي خده قبل ماتلف يداها علي رقبته وتحضن فيه وقالت :احمد ربي احمده لانه زي ماياخد يعطي
حضنها السِـيفاو وهوا يدفن في وجهه في رقبتها :الحمدالله ، الحمدالله حتي يبلغ منتهاه
.
.
أخـتـار بـنـت الـاصـل الـبـيـتـيـه ، الـلـي تـمـلا عـيـنـهـا كـلـمـة حـلـوه مـنـكـ ، تـرضـي بــ بـتـسـامـتـكـ لـيـهـا ، الـلـي تـحـن عـلـيـكـ ، تـصـبـر عـلـيـكـ ، وتـوقـف مـعـاكـ فـي الـمـره قـبـل الـحـلـوه 💛🥀
.
.
حطت إينـاس راسها علي لمخده وهيا تشبح لـ التليفون لشالع ضيه معلن علي مكالمه من القَـاسي لـ خلت دموعها ينزلو وهيا تدكر في كلامه ( ....:تاجر مخدرات ومهرب اسليحه غرقت وماحد سما علي يابنت الجيران غرقت وماحد شد بيدي وطلعني)
شدت التليفون وفتحت الخط وحطت التليفون علي ودنها وقالت قبل مايتكلم :تعرف انه اني نحبك من لما كنت صغيره
وغمظت عيونها علي صوته الهادي لجاها :للاسف لا
إينـاس:نحلم بيك في نومي ويقضي ، بس لما كبرت استوعبت انه مستحيل تكون ليا
القَـاسي :وعلاش مستحيل
نزلو دموع إينـاس:لانه اني مش كامله زي مايقولو عليا
ضيق القَـاسي عيونه بـ غصة قلب من كلمتها :ماحد فينا كامل الكمال لله عز وجل
إينـاس هزت راسها :بس الناس ناسين هدي الحقيقه وشايفين روحهم كاملين وحني اللي عندنا اعاقات لا ، وناقصين حرام نحبو وننحبو ، هدا علاش لما كبرت بديت نستوعب انك حلم حلو وحـ تقعد حلم حلو ، وياريتك خليت روحك حلم ياريت ماقربت منك ولا عرفتك زين
القَـاسي :كرهتيني
فتحت إينـاس عيونها بعيون ماليتهم الدموع :أبـداً ، كيف نقدر نكره قلبي
القَـاسي بتسم :حتي بعد ماعرفتي عليا كل شي
إينـاس:وهدا لـ واجعني انه حتي لما شفت بعيوني كدبت وحطيتلك تبريرات واعذار ولـ قهرني حتي لما اعترفتلي بعضمة السانك قعده نحطلك في الاعذار قعده نحس انك انسان مافيش زيك
رجع القَـاسي راسه التالي وهوا يحط في السبسي بين شفايفه ويولع فيه :تحرقي فيا انتي
إينـاس:وقلتهالك من قبل اني انحرقت
نفخ القَـاسي الدخان في السماء ليشبحلها وقال :تعرفي شن نشبح اني توا
وسكت شوي وهوا يجبد من الدخان وينفخ فيه في السماء وكمل :نشبح في الدنيا كلها انتي ، انتي وبس يابنت الجيران ، نبيك بالهبل ، نبيك ولو كان نعطي في إيخادك روحي
إينـاس:مانبيش روحك اني ، نبيك تسيب هدا كله نبيك نظيف اني راضيه نعيش معاك في دار وحده راضيه نعيش معاك علي خبزه وميه بس بـ الحلال ، مانبيكش تمس لحرام بكل ولا تعيشني فيه
بتسم القَـاسي :بنت اصل وربنا بنت اصل ، ونعتبر هدا شرطك وحـ يتنفذ
مسحت إينـاس دموعها بـ تنهيده وصلت لـ القَـاسي لـ رجع وتكلم بس بصوت اهداء :يابنت انتي
رشفت إينـاس دموعها وقالت :نعم
القَـاسي :وربنا غرقت في حبك
رفعت ايناس حواجبها بـ بتسامه رتسمت علي شفايفها بعبره نستها كل وجعها وخيبت املها اتجاهه .
.
.
نِهـايـات بعض الأشخــاص مُـألِـمه لـدرجه تَجعـلـكـ تتَـزن وتـستقيم كـي لا تتــلقي نـفس نهـايــاتهـم 🍁🌓
.
.
شبح فَـاتح لوطي لـ علو المكان لـ يهز القلب وهوا يشبح لـ الناس المقضته في الشارع ، الناس لـ عايشه ومكمله حياتها برغم الاحزان والهموم لـ تهز الحيل .
قعمز علي حاشية المبني وهوا يخلي في رجليه يدرجحو في الهواء وتلفت يمينه وبـ خيال بصيرة ياقضه شبح رائد ورعد وهما مقعمزين زي تقعميزته او زي عادتهم وهما يتسهوكو علي بعض ويضحكو بـ صوت عالي خلت بتسامه ترتسم علي شفايف فَـاتح لـ تلفت بـ راسه التالي وهوا يتخيل في علاء لـ واقف مع السِـيفاو ويهدرزو بـ بتسامه علي شفايفهم خلت بتسامته تزيد اكتر واكتر ، ابتسامه اظمن فيه انه خوته جنبه ، خوته الاربعه قعدين ، ومافقد منهم حد ، بس بـ لمح البصر تبخر كل خياله ورجع لـ الواقع المر الواقع لـ فقد فيه خوته الزوز ، واصبحو من خمس خوت الي تلاته بس ، تلاته بـ مصير ممكن احسن والله وعلم ، بس لـ راحو واحد حبه ربي وخداه بتوبه ونظافه وترك وراه سمعه طيبه ، والتاني بـ معصيه وغضب من الله ، وترك وراه سمعه بشعه زي موته .
رفع فَـاتح راسه لـ السماء وخدي نفسه وطلعه وهوا يطلع في تليفونه لـ شرين من جيبه ، واول ماشاف رقمها فتح الخط طول بشوق كبير تلاقاه بـ عياط منها :الحمدالله طيب فينا لفتحت تليفونك هدا غير يابُـتول اصبري وحـ ناخدك يعني حـ ناخدك من اول المشوار هكي تسيبني هكي ترخي بيا ولا فوقها تسكر في تليفونك اصلا اني الحيوانه اني اللي غبيه وطلع كلام امي وخوي صح و....
قص فَـاتح عليها وقال :كنت محبوس
زمطت بُـتول باقي كلامها بـ رفعت حواجب وهيا تبي تتكلم بس فَـاتح سبقها وكمل :وطلعت علي خبر وفات خوي التاني
حطت بُـتول يدها علي فمها بصدمه وماعاش عرفت شن تقوله وكتفت بـ الصمت لين جاها صوت فَـاتح :اني محتاجك يابُـتول محتاجك هلباااا وفي نفس الوقت ماعنديش حيل علي صد عيلتك ليا ماعنديش حيل توا انه نحاربهم باش ناخدك اني ضعيف وضعيف هلبا
ملو عيون بُـتول بـ الدموع وقالت :اني جنبك وليك وماتخافش ماحد حـ يصدك تاني ومش محتاج انك تحارب
غمظ فَـاتح عيونه وهوا يحس بـ نسمه بارده غمراته نسمة جايه من الشتاء لـ قرب وقال :اني نحبك يابنت الناس نحبك هلبااا وربي يابُـتول
مسحت بُـتول دموعها وقالت :حتي اني نحبك ونحبك هلباااااا
.
لـن يتقبـل عُيـوبـكـ إلا من أحبهـم ، فـ سِـر إلـي حيـن تُـلاقـي بـ مـن يـُحبـكـ كَمـا أنـتَ 🌻💛
.
.
ولــو قلبي لا يـنبض الا معــاه ، لا تُخيرونـي بينــه وبيــن عـائلتـي ، فـ بتــأكيد سـ أختــار تـوقف نبضــات قـلبي علي كسـر خـاطر ذاكـ المُشيب العزيز وتلكـ الـدَّي الجنـه تحت قدميهــا 🥀💔
.
.
سندت إلهَــام جبهتها علي حاشية السرير بـ صوت تعلا بـ عبرة بكي مقهوره ، وبـ وجع قلب مكسور ، وبـ روح تريد ربها ، تريد تفني تريد رجوعها لـ اصلها .
شدت يدها المجروحه وضغظت عليها بـ القصد وهيا تبي تحس بـ ألم جرحها بـ تمني انه ينسيها ألم قلبها الرهيب ، ألم العشق المستحيل ، العشق المُحرم والمطلوب بـ الإباده.
فتحت عيونها وهيا تقيم في راسها علي صوت اتصال تليفونها اللي رفعت يدها لـ الدم طلع من الشاش الملفوف علي معصمها ، خدت التليفون وهيا تشبح لـ رقمه لـ خلا الشوق يزيد يوجع قلبها ، يوجع فيه لـ خذلانه لـ الحبيب ، لـ خذلانه لـ اللي ماتمني خذلانه .
فتحت الخط وحطت التليفون علي ودنها وهيا ترجع تسند في جبهتها علي حاشية السرير وقالت :انـ ـي اسـ ـفه ، اني اسفـ ـه
ملو عيون بَـحر بدموع لا ارادياً منه ، وهوا حاس بـ الخدلان قبل حدوته ، حاس انه مسار طريقه لا مجال انه يدخله الفرح او الحب ،لا محال يابَـحر لا محال انك تعشق في بلاد بتكون سبب حروبها ، لا محال تعشق وانت بتحرم غيرك من عشقه ، لا محال تتزوج وانت خليت غيرك عريس قبور ، لا محال تعطي الحياة لطفلك وانت تاخد في الارواح وتقتل ، لا محال يابَـحر ليك السعاده حتي لو كنت مظلوم ، لانك ماوثقتش في ربي ماقتنعتش علي قدرته في الحساب ، ماستمسكتش في عروته وغرقت في وسخ الدنيا وجرمها .
رجع راسه التالي وتكي علي كرسي السياره وقال :قتلك كان رخيتي بنقتلك
طلع صوت إلهَــام بوجع من بين دموعها :وانــي واتيـ ـه نمـ ـوت عـ عـ ـلي يديــ ـك
بَـحر :مانقدرش لانه برخيتك بيا زدتي في بنج القلب وقتل الضمير
فتحت إلهَــام عيونها بدموع مغبشه عليها الرؤيه :اني اسـ ـفه والـ الـلـ ـهي مـ ـابيـ ـدي حـ ـطوني في امـ ـر الواقـ ـع خيرونـ ـي بينك وبيـ ـنهم واللـ ـهي كـ كـ ـسرولي ضهـ ـري وحقـ ـربي قتـ ـلوني
بَـحر :الله يسامحك اصلا من الاول مش مراجي منك شي ومانبيكش في حياتي ، قتلك من الاول مانصلحش بيك وعيلتك ادرا بمصلحتك بري يابنت الناس وعيشي حياتك وماتوقفيهاش علي خاطري راهو مانستهلش
مسحت إلهَــام دموعها بـ عبت بشهقات خلت صوتها يطلع بصعوبه :تـ ـستاهـ ـل ولا لا بـ بـ ـس حيـ ـاتي وقـ ـفت من غيـ ـرك يابَـحر مسـ ـتحيل نكـ ـون لغيـ ـرك مستـ ـحيل نـ ـاخد غـ غـ ـيرك مش حـ نـ نـ ـكون لـ ـيك بس مش حـ نكـ ـون لـ ـغيـ ـرك ولا حـ نـ نـ ـعطي مجـ ـال لروحـ ـي نحـ ـب غيـ ـرك بكـ ـل بكل
نهض بَـحر روحه وطبس راسه وهوا يمسح في دمعه في مدمع عينه وقال :ياريتك في حياتي قبل لصار ياريتك ياحاجتي الحلوه جيتيني قبل ماننكسر كسرت عمري
إلهَــام:انـ نـ ـي نحبـ ـك هلـبا يابَـحـ ـر خليـ ـها في بـ بـالك قد مـ ـادير وقد ماتـ ـكون شريـ ـر وقاسـ ـي وغـامض إلهَــام حـ تقعـ ـد تـ تـ ـحبك زي ماأنت وكيـ ـف ماأنـ ـت
سكت بَـحر لـ لحضات بـ قلب موجوع علي فقدها وبعدها قال :وحتي بَـحر حبك وتمناك هلبااا
سكرت إلهَــام عيونها بـ القوة وبـ عبره تعلت عندها وهيا تحس انه عطاها شي مراجياته ليها سنين اعتراف كانت تتمناه في ظروف غير هكي بس حتي في الظروف القاسيه هدي حبت اعترافه لـ خلا دموعها يقسو عليها ويزيدو من سيلهم وصوت بكاها يعلي اكتر وخلاه يكمل كلامه :سامحيني وسامحي قلبي لحبك امخر ورد بالك توقفي حياتك عليا راني مسامحك ومش شايل عليك عيشي حياتك و ولاد لحلال هلبا وربي يرزقك باللي يسعدك ويفرحك ياحبي انتي
خشت إلهَــام في هستيرية بكي وهيا تنزل في التليفون بعد ما بَـحر سكر الخط بغصة قلب منه خلاته يحط التليفون جنب الفودره وهوا يمسح علي وجهه بـ يديه الزوز لـ خلاهم عليه لـ تواني وهوا يحاول يستاعيد رشده يستاعيد قوته وشره ونتقامه اللي حرمه من حبه وحـ يحرمه من اخرته .
وحول يديه وهوا يرفع في راسه يشبح قدامه بـ عيون رجعت لـ حقدها ولـ شرها ولـ جرمها .
هدي الحياة ياتكمل بطيبه تحرمك في الدنيا وتكسبك في الاخره ، ياتعييش بشر تحرمك برضو من اعز اشيائك في الدنيا وتكسبك بعضها وتحرمك من اخرتك ، وهدا اعظم الحرمان 💔🚫
.
ومــا الخــدلان إلا مُضــاد لـ صدمــات الحيــاة 🥀
.
.
حيـن تَــود التوبـه لا تُتَــاجر في دنُوبــكـ ، أشعــل النِــران فـي جميــعها وقل أنــا توبــة بـ رأس مرفــوع 🤚🏻✨
.
.
نزل من سيارته وهوا يمشي بين الزناقي لين وصل قدام المخزن لـ وقف قدامه وهوا يشبحله لـ لحظات قبل مايطلع المفتاح من جيبه ويقرب يفتح قفل الباب لـ دفه وخش وهوا يشبح في الاسليحة والكلاشنات والذخائر لـ بعض منها برا وبعضها في صناديق كرتون زاد خش وهوا يتلفت يشبح لـ كميات الهائيله من الممنوعات ( المخدرات ) لـ قعد متبت عيونه فيها وهوا يطلع في الكبريت من جيبه لـ نزل عيونه وشبحله بسرحان دكره في جمله إنقالتله ( .....:لما تبي التوب توب علي صح ، احرق كل لوراك ،غلط تبيع الغلط وتقول توبة)
فتح القَـاسي باكو الكبريت وطلع منه واحد و ولعه وبعد خطوتين التالي وحدفه علي الممنوعات اللي اول ماطاح عليهم الكبريت ولعت النار فيهم بـ سهوله وخلت القَـاسي يتلفت وهوا يطلع في عود كبريت تاني و ولعه وحدفه وراه وقعد يكرر في نفس الشي لين وصل قدام باب المصنع لـ تلفت وهوا يشبح في النار لـ بدت توصل لـ الاسليحه والذخائر وسكر الباب وهوا يبعد بـ خطوات سريعه وهوا عارف انه اول مابتوصل النار لـ الدخائر حـ يصير انفجار في المخزن لـ اول ماسمعه تلفت وهوا يشبح لـ المخزن لـ بعيد عن لحياش بـ مسافه بعيده وعن المخازن التانيه لـ خلا ناره ماتمس شي غيره ناره لـ طيحت السقف وطلعت منه تحت انظار القَـاسي لـ بتسم وهوا يطلع في باكو الدخان لـ طلع منه سبسي وحطه بين شفايفه وخدي عود كبريت و ولع بيه السبسي لشده بين صوابعه وهوا يشبح لـ نار المصنع لـ كلت ملايين ممكن يجوه ، ملايين من لفلوس لحرام لـ خلت قلب القَـاسي ماعاش يتمناها لدرجه النار لوالعه في الملايين خلات بتسامته تتحول لـ ضحكه .
.
الـضَـمـيـر نـعـمـة ، يـخـلِـيـكـ تـخـاف مـن الـغـلـط ، ولـو غـلـطـت تـنـدم ، تـحـس بـغـيـركـ ، ولـو جـرحـتـهـم تـنـكـسـر ، تـحـتـرم ذاتـكـ ، وتـحـتـرم الـلـي حـولـكـ ، وتـثـق بـقـضـاء وقـدر الـلّٰـه _ عـز و جـل _ ، ويـنَـجـيـكـ مـن إرتـكـاب ذنـوب ، ويـخـلـيـكـ تـسـتـغـفـر عـلـي دنـوب إرتـكـبـتـهـا 🌿
.
.
.
بعــــــــــد مرور شهــــــــ2ٰـــــــرييــن
فتح القَـاسي باب شقته وهوا يسمع في رد لجاه من سماعة التليفون :ايوه ياعريس
القَـاسي بتسم وهوا يتكي علي باب الشقه :العقبه ليك ياصحيبي
ضحك محمد :ههههه لتانيه ان شاءالله
تعلت ضحكت القَـاسي:ههههه يامسخ حني مالحقنا علي الاولي لين ريقنا شاط وانت تعول علي التانيه
محمد :هههه تي يارا صلي علي النبي والهي في روحك
القَـاسي :ههههه عليه افضل الصلاة والسلام
محمد بتسم :ربي يهنيك يارفيق وبرفاق والبنين ان شاءالله مغير ربي يهديك علي مابلاك
القَـاسي رفع يديه :هداني والحمدالله وعلي قولتك احرق كل لوراك وله واني حرقت ياصحيبي
زادت بتسامة محمد :راجل وربي وان شاءالله الهيدايه تمسني كيفك ، المهم مانعطلش عليك ياعريسنا
القَـاسي :تي عذبتني مش عطلتني انت هي هي تسقد
ضحك محمد وسكر من القَـاسي لـ خش من الممر وهوا متجه لـ دار النوم اللي اول ماخشلها وشافها كيف واقفه قدام مراية الحائط بـ الفيلو لـ مخليها زي الاميره مع شعرها المرفوع ومخلي ضهرها العاري امبين ، ومع مكياجها البسيط والحلو مع رقة ملامحها لـ خلت القَـاسي ينسحر فيها اكتر وهوا يقرب منها من دون ماتحس عليه وهيا لاهيا في تليفونها وتنفخ واول ماحست بـ لمساته علي خصرها تلفتت طول شبحتله كيف طبس علي طولها وباسها بـ خفه علي جبهتها وبعد همس :و وليتي حلالي يابنت الجيران
بتسمت إينـاس وحاوطت خدودها بـ يداها بخجل منه وقالت:قعده مش مصدقه
لف القَـاسي يديه علي خصرها :وشن وضيفتي اني هني ، وضيفتي نخليك تصدقي
وميل راسه وهوا يحرك في خشمه علي خشمها :نخليك تصدقي ؟!
ضحكت إينـاس بخجل وقالت :بنصلو
رفع القَـاسي حواجبه وهز راسه بـ تنهيده :ايه ونصلو
وقرب باسها علي خدها وقال :تبيني نساعدك في حاجه يالقلب
هزت إينـاس راسها بـ معني لا :شكراً
ضيق القَـاسي عيونه :غير بالك تبي
تعلت ضحكت إينـاس بخجل حد الموت :بـالـقـاسـم
عض القَـاسي علي شفه ورجع قرب منها :تي يالب قلبه انتي نعم نعم ونعم بتلاته
لفت إينـاس يداها علي رقبته وقالت بضحكه :نحبك هلباااا
تنهد القَـاسي ورجع لف يديه علي خصرها وباسها علي خدها وحضنها ليه :واني دايب فيك وربنا دايب وماحد سما علي
.
.
اللـٌهم جَبـر كُســور قــلبي فـ كَسرتـه لا أحـد مُــلام عـليهـا غَيـره 💔🤚🏻
.
.
تـــــاني يـــــــــوم ....
وقفت أيه ورا نَــاصر اللي فتح الخط ورد :ايوه
جاه صوت جوري :اهلين
تحمحم نَــاصر:اهلين بيك شن جوك
جوري تلفتت لـ سما لـ خشت لـ دار بهار وهيا ترد علي تليفونها وخلتها تتلفت تطلع للبلكونه وترد علي نَــاصر:الحمدالله وانت شن حالك مغيب
نَــاصر :شي اهو لاهي في عرسي وانتي
تجمدت جوري في مكانها بصدمه خلت لسانها يتقل وماعاش قدرت تتكلم لين جاها صوت نَــاصر تاني :الو جوري
تحمحمت جوري بـ عبره ملت صوتها :مـ مـعاك الف الف مبروك ان شاءالله ربي يكمل عليك
هز نَــاصر راسه وهوا يحط في يده في جيبه وتلفت خطف بس اول ماشف أيه لـ واقفه وراه وهيا لابسه الردي البودري ودموعها في عيونها قال :الله يبارك فيك نستأذنك
وسكر الخط وهوا يشبح لـ أيه لـ تلفتت بتخش بس قرب نَــاصر منها بسرعه وشد يدها ولفها ليه :وين ماشيه
حاولت أيه تفك يدها منه وقالت بعيطه :حول من عليا
شد نَــاصر يدها التانيه ولفها ورا ضهرها وقربها ليه بـ بتسامه:غرتي ههه
هدت أيه بين يديه شوي وقرنت حواجبها بعيون ماليينهم الدموع :ومن انت باش نغار عليك
رخي نَــاصر يديها ولف يديه علي خصرها وزاد قرب منها وقال :من اني صار
ضرباته أيه علي صدره بغل :حول
نَــاصر :عيب تكلمي راجلك هكي ره
هدت أيه شوي ودموعها نزلو بغيره مست قلبها منه :مني هدي
ضحك نَــاصر ونزل لمستوي طولها وميل راسه و باسها علي خدها بخفة وبعد مسح دموعها وقال :محلاها مرتي وهيا تبكي هههه
شدت أيه علي سنونها وهيا تبي تصيح بس سبقها نَــاصر وقال :اششش مانبوش نتعاركو ونبي أجلي لعراك لا ....
وسكت شوي وهوا يفكر لـ لحظه وكمل :لا بعد غدوه الساعه 7 تمام
قرنت أيه عيونها :علاش
رجع نَــاصر قرب وباسها علي خدها التاني وبعد وهمس :لانه الفتره هدي عاجبتيني لا ترليون
شدت أيه بتسامتها وهيا تحاول تخلي ملامح الغضب علي وجها بس ماقدرتش اول مانَــاصر حرك يديه علي بطنها ودغدغها وخلاها تضحك وهيا تشبح كيف قال :فكيها واضحكي راهو في اي لحظه نولي نَــاصر لقديم ونبدو فيها حرب ليه ليه
خفت ضحكت ايه وقالت :نَــاصر
رفع نَــاصر حواجبه بدون مايتكلم وهوا يرفع في يده يرجعلها في خصلت شعرها ورا ودنها وخلاها تكمل :هدي نفسها لشبحتك معاها في الجامعه
هز نَــاصر راسها بـ معني ايه وقرب طبع بوسه علي جبهتها وخلاها تغمظ عيونها وكملت كلام :حبيبتك ، اني فرقتكم علي بعض وله
بعد نَــاصر شوي وشبحلها :مش حبيبتي
هزت أيه راسها بـ معني امالا من ، خلت نَــاصر يرفع كتافه وقال :مش عارف صديقه صاحبه مش عارف شن بنقول عليها بس عيب عليا لو مارديتش عليها وعطيتها علم انه اني تزوجت خلاص
بتسمت أيه:اممم وقلتلها
هز نَــاصر راسه :امالا شن وتعرفي شني قتلي
أيه:شني
نَــاصر :قتلي لااا ياناصر لا راني نحبك ومانقدرش بلاك وسكرت وخليتها بتمشي تنتحر
ضحكت أيه:ههههههه لا ياراجل
رفع نَــاصر حاجبه :عندك شك
هزت أيه راسها :ايه عندي
ضيق نَــاصر عيونه وقرب منها وهوا يضغظ علي خصرها :غير اصبري لغدوه بس غير اصبري وتو نوريك علي طولت السان
ضحكت أيه وهيا تضرب فيه علي كتافه :حول حول ههههه طلقني ماعاش نبيك هههه
باسها نَــاصر بضحكه علي جبينها وبعد حط عيونه في عيونها :نطلقك عينك يابنت العم حصلتي فيا خلاص وماتحلميش حتي بـ حرف الط تجيبيه علي السانك معاي
بتسمت أيه وتنهدت بخجل وهيا تشبحله كيف تكي جبته علي جبهتها وهوا لاف يديه علي خصرها .
.
رايــدكـ يااللي روحـي فيــكـ ، قـلبي بـ عُمــره يفـديـكـ 💛🤭
.
.
تُحكــي أنهـا دائمــاً مــا تُغضـب منـه وتَظــن في كُـل مـره أنهـا نهــاية علاقتــهم ولــكن فــي كـل مـره يتبث لهـا لا نهايــه لـ عــلاقتهم  🍃💛
.
.
سكرت سما التليفون بـ عيون سالو علي خدودها وهيا تتلفت لـ بهار لـ خشت عليها وقالت :خيرنا عاد سما غر اسمعيه انتي قبل
رجعت سما رفعت تليفونها وقالت من بين دموعها :لو سمحتي ماتكلمنيش بكل
بهار :سما باللهي عليك ماديريش هكي اني شن خصني
شبحتلها سما وعيطت :شن خصك تي كله منك انتي خليتيني نكلمه ونتعلق بيه ولا جايبتيني لي هني باش نندصم انه يلعب بيا ويكلم في ستين الف وحده ويضحك عليا
بهار زمطت ريقها :نحسابه يبيك وحقربي هي اني اسفه واللهي آسفه
اتصلت سما بـ بوها وحطت التليفون علي ودنها وقالت وهيا تتلفت :حولي من عليا
وقبل مابهار تتكلم انجبد التليفون من علي ودن سما لـ تلفتت بعياط :قتلك خلاص يابها......
واول ماشفاته قدامها زادو دموعها وبرغم غضبها وتعصيبها خجلت برغم كسرتها منه وقالت من بين شهقاتها وهيا تبعد خطوتين التالي :هـ هـ ات التليفون لو سماحت هاته
منذر شبح لبهار لقالت :منذر خلاص كلهم برا تو تبدا تصيح
منذر :غر اطلعي شوي
سما عيطت :بهار
منذر :اطلعي
نفخت بهار وهيا تشبح لـ سما وقالت :اسفه
وتلفتت طلعت وسكرت عليهم الباب لـ خلات سما تخاف وهيا توخر تلصق في الحيط ودموعها يزيدو ينزلو بخوف حست بيه وخلت منذر يحس بشعور بايخ خلاه مايتحركش من مكانه :اني اسف
سما :خـ ـليـ ـني نطلع وخليني في حالي
زمط منذر ريقه ومسح علي لحيته :باهي اسمعيني شوي واطلعي
عيطت سما بدموع زادو من سيلهم :شن بنسمع مزال خليني في حالي يامنذر سيبني ياسر لسمعته
ومسحت دموعها بـ عبت وكملت بشهقه :انت مريض مش طبيعي مستحيل تكون طبيعي خليتني نحبك ونتعلق بيك باش تكسرني وانت تكلم في مية وحده غيري انت مريض مريض
قعد منذر يقرب منها بشويه وهوا يتكلم :سامحيني اني اسفه كنت حمار وغبي ومريض بس توا وربي هي نبيك وربي حتي اني نحبك ياسما
عيطت سما بشويه :ماتخلينيش نعلي صوتي وبعد عليا بعد وماعاش تكدب عليا ماعاش تكدب
وقف منذر قدامها وقال :وقسم بدين الله نحبك وحقربي وحق الله مانكدب عليك
رفعت سما عيونها فيه كيف رفع يديه فوق كـ استسلام :ها اني قدامك لتبيه ديريه فيا بس باللهي عليك باللهي عليك ماتسيبينيش اني ماعنديش الوقت نرضيك تاني ولا نشوفك تاني ونلحقك بنخش للكليه والله اعلم امتي عطلتي ماتكسريش قلبي وخليك احسن مني وعطيني فرصه تانيه
رشفت سما دموعها لتمسح فيهم بـ عبت ونزلت عيونها لوطه وقالت :مانبيش اني مانبيكش
منذر :سما اشبحيلي
رفعت سما راسها فيه وشبحتله وخلاته يقرب خطوه منها وكمل كلامه :وحقربي نحبك وقسم بالله صح صغيرين بس نبيك بـ الحلال نبيك مرتي نبي نديرو مع بعض عيلة نبيك بنتي وصاحبتي ورفيقتي اعطيني فرصه تانيه نتبتلك فيها حبي
مسحت سما علي خدها وقالت :وكان طلعت تكدب عليا
منذر :مانعرفش توا كيف بنتبتلك انه مانكدبش لكن
وسكت بـ بتسامه وقال :لكن نوعدك مانقربش منك توا ولا نحضنك لين تولي خطيبتي ههههههه
تنهدت سما :ياربي كيف تبيني نصدقك وانت قعد تتسهوك عليا
ضحك منذر :عهههه وحقربي مانتسهوك هي
وفتح يديه ورفع كتافه :تي تشوفي فيا كيف واقف بعيد عليك بسيف تي معجزه هدي احلي واجمل بنت في العالم واقفه قدامي ومش منقض عليها
ضمت سما فمها وهيا تكتم في غضبها وعصبيتها لـ خلو من ضحكت منذر تزيد وهوا يرجع يرفع في يديه كـ استسلام :تمام تمام يااميرتي انتي اهدي وخلاص اهو طالع ههههه
وتلفت وخلاها تبتسم من بين دموعها لـ تمسح فيهم وهيا تشبحله كيف قبل مايسكر باب الدار رجع تلفتلها وقال :سما
رفعت سما حواجبها كـ رد علي مناداته ليها وخلاته يرسم في بتسامه علي شفايفه وكمل :اسف علي دموعك لنزلو بسببي
بتسمت سما بتضيقت عيون وخلت منذر يكمل وهوا يبعتلها بوسه في الهواء :نحبك
وتلفت طلع وخلاها تحط في يداها علي وجها بضحكه .
.
.
تنتــهي بعض الـقصص كـي تبــداء غيـرهــا 🥀
.
.
وقفت بُـتول قدام جوري لمسحت دمعه في مدمع عينها بكسرت قلب وفي نفس الوقت بـ فرحه لـ صاحبتها لـ واقفه قدامها في اجمل طله ليها وخلتها تبتسم :تهبلي
شبحت بُـتول لـ روحها في مراية الزيانه ولـ شعرها الملوي ومرفوع بـ بساطه ومطروح علي كتافها ولـ مكياجها البسيط زي قفظانها الوردي بـ كمام طايحات و مبينات كتافها وضهرها لمشبك وطوله حاير بـ نفخه بسيطه .
تلفتو لـ سما و بهار لـ خشو عليهم ، وقالت بهار :قالو بخش لصاله بلبسك الدبله بروحكم
هزت بُـتول راسها :اي قالي اهو طالعه
طلعو سما وبهار وخلو جوري لـ رفعت حاجبها :علاش مايبيش يخش اصلا من فيه هوا غير خواتك وخواته ونساوين خوته
بُـتول رفعت كتافها وهيا تبخ من العطر :حشومي بسلامته
ضحكت جوري :يامامي هههههه
شبحتلها بُـتول :من غير تسهويك يابنت
جوري :اوك اوك غر هيا اطلعي
طلعت بُـتول سلمت علي حنان خالت فَـاتح لـ مش عاجبها الجو من معاملة سميه الجافه ، وسلمت علي ساجدة وحنين لـ عرفوها علي مـريم ورنيم لسلمو عليها وقعدت مقعمزه شوي جنبهم وبعدها وقفت مع ساجدة وحنين لـ رفعوها لـ فَـاتح و قعدو قدام باب الصاله لانه فَـاتح كان مقعمز معاه منذر اللي اول ماشاف بُـتول بتسم وقرب منها وباسها علي جبهتها وبعد قال :ربي يسعدك
بتسمت بُـتول ورفعت روحها وباسة راسه :وربي يحفظك ليا والعقبه ليك
ضحك منذر :قريب قريب
خلا بُـتول تضحك وهيا تشبحله كيف تخطاها وقال :نخليكم علي راحتكم
قربت بتول من فَـاتح اللي مدلها باقت الورد وخلاها تضحك :شكرا
بتسم فَـاتح :حوريه انتي
زادت بُـتول من خجلها:فَـاتح بطل راني بنموت من الخجل
ضحك فَـاتح وقرب باسها علي جبتها وبعد شد يداها باسهم :ربي يتمملنا علي خير ياقلبي وتولي عروستي
بتسمت بُـتول :ان شاءالله
طلع فَـاتح باكو الدبل من جيب بدلته الرسميه وفتحه حطه علي الطاوله وخدي الدبله ولبسها في صبعها وباس يدها وشبحلها بغمزه :شن رايك نقرو الفاتحه مره وحده
بُـتول :واللهي مانقول لا هي هههههه
ضحك فَـاتح وعطاها الدبله لـ لبستهاله وقربت منه باساته بين عيونه وبعدت مسحت الروج لنطبع بين عيونه بضحكه :حي عمله ههههه
فَـاتح :حي عليك تحشميني امسحي العازي
زادت ضحكت بُـتول :هههههه خلاص مسحته مسحته
بتسم فَـاتح وقرب باسها علي خدها وبعد باسها علي خدها التاني وهمس في ودنها:شن رايك نمسحهولك وتبوسيني علي راحتك
همست بُـتول :لا شكرا مزال نبي نصور
بعد فَـاتح وشبحلها بقرنت حواجب :بتصوري
هزت بُـتول راسها وتلفتت عكسه وهيا تشد في يديه وخلاته يلفهم علي خصرها ورفعت تليفونها وهيا تفتح علي الكاميره وقالتله :هيا اشبح هني نبي نصور
باسها فَـاتح علي كتفها وهمس في ودنها :اغواء علي اصله هدا تي اما صور تحكي انتي
تلفتتله بُـتول براسها بـ قرنت حواجب:فَـاتح
شبحلها فاتح :يانور عيونه
شدت بُـتول بتسامتها :انتبه معاي بنصور
فَـاتح بتسم وباسها من خدها وهوا يخلي في خده يلمس خدها وقال :هي صوري هي
بتسمت بُـتول وهيا حاسه روحها بطير من الفرح وقعدت تصور وتضحك هيا وياه بـ فرحهم بـ بعض فرحه مش سايعه قلوبهم ، فرحة البدايه الحلوه ، فرحه لسعيهم للوصول لبعض لين نالو بعضهم ، بـ الحلال ، بـ الشرع ، وقدام الناس ، والاهل 💛
.
فـــاز قــلبي بـكـ وفُــزت بـ عِشقـي لـكـ 💛
.
.
مــاذا ،ولمــاذا ،سؤاليـن لا أعـرف إجــابتهم....
مــاذا حـدث لـي حيـن رأيتهـا ، ولمــاذا أنـا هُنـا معاهــا 🍭
.
.
فـــــي الليــــل
وقف قدام الباب بتبات وهوا يتلفت لمجموعة الشباب لوراه وقال بصوت اجش غليط متعصب:حوطو الحوش كويس
رد واحد منهم:اي يافندي
تلفت للباب وخبط بيده عليه ودفه برجله بالقوه لين كسره وخش وهوا يطلع في سلاحه ووراه زوز شباب ملتمين وجوهم زي باقيتهم خشو معاه اللي رفعو سلاحهم اول ماشافو مراة كبيره في العمر وولد واقف قدامها وباين علي وجهه الصدمه وقال بخلعه:شن فيه هدي حرمة حوش م...
وقبل مايكمل كلامه قرب الأفندي منه و شبحله بعيونه الباينات من إلتام وضربه بالمسدس من التالي علي جبهته لين طاح لوطه عيطت لمراه وخبطت ع وجها وهيا تبي اطبس للولد بس بحركه سريعه من الافندي طبس قبلها وشده من شعره وقامه وهوا يقول بصوت عالي:خدوه
عيطت لمراه بالقوه وهيا تخبط علي خدودها وتبكي وكانت تبي تشد الولد بس دفها الافندي التالي وقبل ماطيح طلعت بنت من الدار بسرعه وشدتها وقبل مايركز فيها الافندي عيط الولد عليه:ياحيوان ماتمسهاش
تلفتله الافندي بكل قوه وزاد ضربه بالمسدس من التالي من قوتها لين طاح هوا والشاب اللي شاده من علي يمينه وقال:خودوه خير تو مانقتله قدام امه
قاموه وهوا شبه فاقد للوعي وقبل مايطلع وقفاته جملة:حسبي الله ونعم الوكيل فيكم الله لا تربحكم ولا تختم عليكم حسبي الله ونعم الوكيل فيك انت
تلفتلها وشبحلها بنظره لين خلت قلبها يوقف للتواني من النبض وقال:خيطي فم بنتك ياحاجه خيرلك وخيرلها
وطلع بخطوات سريعه تابته وركب السياره لمصفحه الكحله وتحرك وتحرك وراه رثل من السيارات لمصفحه.........#الفثنة_والثأر
.
وإن الفثنــه أشــد من القَتــل ، و ويـل من فَـثن وجعـل الأنهــار ترتَــوي بـ دمــاء الثــأر 💔🚫
.
.
.
ولا لـ النهــايــات في بِـلادي ، فهي بِـلاد حُروبِهــا لا تنتّٰـــهي
.
.
.
#قَفلة_الرواية
نلتقي في جزاء أخر قريبــاً ....
#عشق_في_بلاد_حروبها_لا_تنتهي 4 ( 2017)
كتابــة #الياقوت
________________________________
بداء كتابة الرواية في تاريخ 5 / مـــــــ5ٰــــــايـو / 2020
تم انهاء كتابة الرواية في تاريخ 12 / اكتـــ10ٰـــوبر / 2020
حسابي الانستا alyaqut.ly_
حسابي الفيسبوك AL Yaqut