عشق في بلاد حروبها لا تنتهي 4 ( 2017 )

البــ العـــشريــن ــارت

_
_
عِــشق فـي بِـلاد حُـروُبِهـــا لا تنتّٰــهي 4
{ 2017 }
.
.
في البارت السابق
بَـحر :حوثه
جمال :اي من معاي
بَـحر :زبون ، نبي هروين
جمال :اممم من وين جبت رقمي
بَـحر :ناس دلتني عليك
جمال:تمام قولي مكانك ونبعتلك واحد يوصله لعندك
بَـحر :لالالالا نبي كميه كبيره اني نبي نقابلك وجهاً لوجه
جمال :تمام غدوه نكلم التاجر لنخدم عنده ونقولك وين نتلاقو
بَـحر :تمام

قراءة ممتعة 💛
البــ العـــشريــن ــارت
.
.
.
نفخت مـريم وهيا تحط في ريموت التلفزيون جنبها بغل وقبل ماتنوض انفتح باب الحوش لـ تلفتتله وهيا تشبح في السِـيفاو لخش وهوا يتكلم في تليفونه:تمام شوي ونجيكم
سكر الخط وخش لدار وهوا يفتح في الدولاب لـ جبد حوايجه لمعلقه علي جنب وفتح الخزنه لطلع منها السلاح لسحبه وحطه في خصره وسكر الخزنه ورجع لحوايج عليها واول ماسكر الباب شبح مـريم لقالت وهيا تزمط في ريقها بخوف :علاش السلاح
قام السِـيفاو جيبوطيه فوق السلاح لخباه تحته وهوا يتخطاها بدون مايرد عليها ويقرب من الزيانه وطلع تليفون لـ علن عن وصول رساله ، بس قبل مايقراها جاه صوت مـريم لرجعت تكلمت بس هدي المره بـ غضب :نكلم فيك اني
تلفتلها السِـيفاو :مش متهمكش حياتي علاش السؤال هدا
مـريم :خيرك تتكلم هكي
السِـيفاو رفع كتافه بضحكة هزوه :الله عليك دوينا باللين ماعجبك دوينا بالجفا برضو ماعجبك ، قوليلي من الاخير كيف تبيني ندوي معاك
مسحت مـريم جبهتها بـ يدها بـ توثر وضح عليها وقالت:مش موضوعنا هدا موضوعنا السلاح لشن
السِـيفاو :مــا لشي ماتشغليش روحك عليا
وتلفت خدي تليفونه من الزينه وتلفت علي صوتها لعلاته:مانشغلش روحي عليك ؟!
السِـيفاو :خيرك انتي
مـريم :اني لخيرني ولا انت لخيرك ، متغير وتدوي بطريقه مستفزه ومانعرفش شن جاك هكي فجأة
قرب السِـيفاو ونزل بطوله علي مستوي طولها وقال :جربت نقرب لقيت مش عاجبك قربي ومنقرفه مني قلت نبعد ونجافي
مـريم :منقرفه
هز السِـيفاو راسه ورجع وقف علي طوله وهوا يتلفت بيمشي بس شدت مـريم يده ، واول مارجع السِـيفاو تلفتلها رفعت مـريم روحها علي روس صوابعها علي طوله وقربت شدت خده وبساته عليه وبعدت وهمست :انت غريب هلبا لما كنت منقرفه منك حق قربت مني ولما حبيت قربك بعدت
لف السِـيفاو يده علي خصرها وهوا يزيد يقرب فيها ليه: سوا بعدت ولا قربت قلبي معلق فيك
وقرب ردلها بوسه علي خدها وبعد تكي جبهته علي جبهتها وهمس بـ بتسامه :بوستك احلي من بوستي
ضحكت مـريم وهيا تبعد في جبهتها من عليه وتخلي فيه يميل في راسه وعيونه ماحولهمش من علي ضحكتها لخدت لب قلبه وقال :ماعمري تخيلت بتضحكيلي
خفت ضحكت مـريم وتحمحمت :اممم تبي نضحك تاني قولي علاش واخد السلاح
ضحك السِـيفاو وحطها علي الارض وهوا يقرب يبوس فيها من خدها وبعد :سلاح صاحبي بنعطيهوله ونجي
رفعت مـريم راسها :مافيش حاجه تانيه
السِـيفاو :خايفه عليا
هزت مـريم راسها بـ معني لا وهيا بتتكلم بس قطع عليها السِـيفاو :تمام تمام فهمت مافيـ...
قصت عليه مـريم وقالت :اي خايفه عليك
ضحك السِـيفاو :هههه انتي تناشبي يابنت وتبيني نبطل مشي
حطت مـريم يدها علي عيونها بضحكه خلت السِـيفاو يقرب ويطبع في بوسه علي جبهتها وبعد قال :شوي وجايك ونوريك التناشيب علي شن يودي
وتلفت بيطلع بس مـريم قالت :سِـيفاو
تلفتلها السِـيفاو :عيونه
بتسمت مـريم بس فيسع ماختفت بتسامتها وقالت :بعدين في حاجه بنقولهالك
ضيق السِـيفاو عيونه وكان بولي يفهم منها بس شرين تليفونه وخلاه يشبحله ويرجع يرفع في عيونه ويشبحلها :حاضر اروح ونتكلمو
وتلفت طلع وخلاها تتنهد ببتسامه طلعت من وسط قلبها وهيا تتحسس علي خدها.
.
.
أستحلفـــكـ بـ الله _ عـز وجـل _ لا تقتربـي فــ أنــا الجَحيـم الـذّٰي ســ يلتهمــكـ 🌿💔
.
.
نفخت ابتهال :اني بنخش تجمدت
إلهَــام:خشي خليني بروحي وانتي نفختيلي راسي
وقفت ابتهال :الظلم فيا نساير فيك اقعدي فيها انتي ونكدك
إلهَــام تلفتتلها :رد بالك تسكري عليا الباب
ورجعت شبحت قدامها بـ تنهيده وهيا تدكر في امبكري كيف شبحاته واقف قدامها وكـ انه حلم وتحقق ، رجعت تنهدت وهيا تهز في راسها وتغمط في عيونها بالقوه تحاول تبعده علي تفكيرها ، خلاص يا إلهَــام خلاص انسيه ، هوا بداته قالهالك مايبيكش خلاص حبك فاشل حبك ماليشي بدايه اصلا .
ورجعت فتحت عيونها وهيا توقف وطلع في تليفونها من جيبها وحطت علي رقم وتصلت وهيا تراجي في رد وعيونها في المربوعه وفي عقلها اكيد في المربوعه تو كان يشوفني يحسابني جاياته ويفهم غلط .
رجعت لفت وقعمزت علي درجات باب الرئيسي للحوش وهيا تسمع في رد صاحبتها :هاي ياعاشقه
إلهَــام:قصدك المكسوره
ضحكت سمر :حالنا معوج من بعضه ياصاحبتي هههه
إلهَــام:طلع من الحبس
سمر :حقااا مسرع ، اوه قصدي غريبه ، المهم شفتيه كلمتيه كلمك
إلهَــام تنهدت :قالي حلي عن سمائي ، شن معناها فهميهالي بطريقه غير لفهمتها بيها باللهي عليك
سمر رفعت حواجبها :للاسف مافيش تفسير غير لفهمتيها بيها
إلهَــام:باهي اني نحبه ، قابله بيه هوا ومشاكله ، علاش مايحسش بيا
سمر :حياته صاعبه ياإلهَــام ره اللي زيه مانقدروش اللوموه علي شي لانه باله لا في حب لا كلام الفاضي لندو فيه اني وانتي
إلهَــام:بس بَـحر يلزمه شخص زيني يخفف عليه يواسيه ويوقف جنبه ويحبه
سمر :اللازم مرفوض احيانا ياصاحبتي
إلهَــام هزت راسها :وحبي مرفوض
ونفخت وهيا تتلفت وراها اول ماحست بصوت حركه بس مالقت حد برغم الريحه لغمرت المكان وخلتها ترجع تتلفت قدامها وهيا تشبح لـ يسارها بخلعه اول ماشفاته مقعمز وشاد المسدس لخلاها تاخد نفسها وهيا تزمط ريقها بخوف ورهبه خلوها اطلع صوتها المبحوح :شـ شن هـ ـدا
خبا بَـحر السلاح في خصره وتلفتلها بصمت دام مع نظراتهم لـ لحظات وبعدها قال :ماننفعش بيك اني ، طلعيني من راسك راهو حياتي صاعبه
ارتخت إلهَــام من تشنجها شوي وهيا تنزل في عيونها منه وقالت بـ توثر صار معتاد منها في قربه :كلنا حياتنا صاعبه
بَـحر ضحك بهزوه :ياريت مصاعب حياتي زي مصاعب حياتكم
إلهَــام:هدا قدر الله وامتحان منه
بَـحر :امتحاني واعر اني وشكلي منسقط فيه
إلهَــام رجعت رفعت راسها وشبحتله :اني نساعدك باش تنجح
قعد بَـحر يشبحلها بصمت للحظات وهوا يتأمل فيها وفي جملتها لخشت لقلبه من صدقها ولهفتها وعفويتها ، وبعدها قال :مش حـ تقدري
إلهَــام رفعت كتافها وشبحت قدامها :نحاول علي الاقل متأكده من روحي مش حـ نرخي بيك
بتسم بَـحر بسهوه واعيه منه :متأكده مش حـ ترخي
هزت إلهَــام راسها من غير ماتشبحله وقالت بـ تقه :اكيد
وتلفتتله بـ بتسامه منها خلت بَـحر يقرب منها وهوا يرفع في حواجبه :وكان رخيتي بيا
مسحت إلهَــام علي خدها بـ توثر مع دقات قلبها لـ علو من قربه :مش حـ نرخي بيك الا كان لو صارتلي حاجه او متت
واول ماكملت جملتها قرب بَـحر وباسها علي خدها بخفه وبعد شوي وهوا يشبحلها كيف غمظت عيونها لـ رفع يده ومسهم وهوا يمشي في يده في وجهه وقال :كان رخيتي اني لبنقتلك
فتحت إلهَــام عيونها طول وشبحتله ، شبحت لعيونه لـ عنت تماما شن قال ، حست بخوف منه ، ورهبه ورعب ، سري في جسمها لـ أقشعر ، بس في نفس الوقت من داخلها ومن اعماقها وافقت ، وعندها عادي ويقتلها ، ومن يمانع يكون اجله علي يدين محبوبه .
.
خــوفي من البُعــد ، فَــاق خــوفي من دمــاريِ الــدَّي سـ أتلقــاه شَــر مُــلاقــة عــلي يـديــكـ 🌧🍃
.
.
حــين ترغـب في الثوبــه ، لا تستتمـر بـ ذنوبــك 🤚🏻
.
.
مد السِـيفاو يده لـ القَـاسي وقال :بالصحه عليك
ضحك القَـاسي وصافح يده :ومربوحه ان شاءالله في طريقك الجديده ههه
تحمحم محمـد:العقبه لكي
هز القَـاسي راسه :ان شاءالله يارب
ضحك السِـيفاو وهوا طلع في تليفونه من جيبه وقال :نستأذن شبيبا شوي ونجيكم
ومشي وخلا القَـاسي لـ قال وعيونه فيه :وربنا راجل
اتكه محمـد علي السياره وهوا يطلع في باكو الدخان من جيبه وياخد منه في سبسي وحطه في فمه وقال وهوا يولع فيه :عليش
شبح القَـاسي لمحمــد:دار لماقدرت نديره ليا سنين
محمـد:ودير كيفه
القَـاسي :الظروف تحكم
محمـد:مافيش الظروف تحكم فيه انت ماتبيش
وسكت وهوا يتلفت يشبح لـ السِـيفاو وقال :تعرف
ورفع راسه ونفخ الدخان في سماء وكمل : لو كان مشنوق من هدب عيوني والديون هالكتني من راسي لا ساسي والظروف تحكم علي بالاعدام ومافيش غير سكتكم ولا سكت الموت اكيد نختار سكت الموت ولا نعلق راقبي ناس في رقبتي بيش نحل مشاكلي
القَـاسي :غر انت مش مجرب
محمـد:نا لمجرب نا ، مغير الفرق لبيني وبينك ، انت خترت الطريق الساهله ، ونا خترت الطريق التمرميد و نلت
مسح القَـاسي جبهته بـ قفا يده وهوا يشبح لـ السِـيفاو لـ جاي جيهتهم :قريب بـ أذن الله ندير لداره
وقف محمـد علي حيله وقرب من القَـاسي وهوا يطبطب علي كتفه وقال :لما تبي التوب توب علي صح ، احرق كل لوراك ،غلط تبيع الغلط وتقول توبة
قرن القَـاسي حواجبه وشبح لـ محمــد لـ تلفت لـ السِـيفاو لـ قال :شني راهي الإستراحه تراجي
محمــد:لالا نا تصبحو وتربحو
السِـيفاو :تي خيرنا عاد ياراجل
محمـد:مره اخرا ان شاءالله
بتسم السِـيفاو :تمام اللي يريحك ، وشكرا ماقصرت ياصحيبي
محمـد بتسم :هضا واجبي اتجاه رفاقي ، هي تصبحو علي خير
ومشي وخلا القَـاسي سارح فيه وفي كلامه لقعد يلعب في دماغه ، انسان بليغ عن الوصف ، وكـ انه يختار في كليماته قبل مايقولهم، او يحضر فيهم قبل مايلفظ بيهم ، يختار في كلماته بدقه عاليه ، دقه تخلي الشخص لقدامه مايقدرش يتجاوزه وهوا يفكر فيه مالياً وبتكرار ، يفكر فيه في عقله وفي قلبه ، ويخلي ضميرك الميت يفيق وهوا يأنب في روحه علي احدات صارت في الماضي القريب احدات كان فرحان بيها ومقتنع بيها ابلغ قناعه .
.
.
.
ضحكت جوري :أحلفي
حطت بُـتول يدها علي خدها وهيا تهز في راسها :وحقربي
جوري :هههه شكلي ظلمته وحكمت عليه غلط ، لكن شكله يوضح انه واحد رديف
بُـتول :باش تتعلمي مره تانيه ماتحكميش بالشكل
جوري :خلاص ماعاش فيه مره تانيه انتي وبتاخدي وبنتفكه من هبالك
بتسمت بُـتول :ياالله محلاها كلمت بتتزوجي
دارت جوري الحوله بعيونها :اني ماقلتش بتتزوجي قلت بتاخدي
نفخت بُـتول وهيا تضرب فيها بخفه علي كتفها :مبردك
ورجعت اتكت بضهرها علي الكرسي وتشبح في اسراء لجت قعمزت في الطاوله لمقابلتهم وقالت برفعت حاجب :شن جابها هدي نحسابها حتي سيبت
واول ماتلفتت جوري جو عيونها في عيون اسراء لـ بتسمتلها وهيا تشاورلهم بـ يدها خلت جوري تقول من بين بتسامتها ليها :ان شاءالله ماتجيناش بس ماخاطريش في الدراه الكبد
نفخت بُـتول برفعت حاجب ولا عبرتها ولا بتسمتلها وهيا تتلفت للجيها التانيه وقالت ببتسامه :نصوره شكله جايك ههه
تلفتت جوري طول وهيا تشبح في نَــاصر لـ جاي جيهتهم وهوا مبتسم بس اول ماجت عينه في عين اسراء انطفت ابتسامته وهوا يغير في مسار طريقه ويطلع في تليفونه لشرين من جيبه ويرد :ايوا عمر
عمر :انت في الجامعة
نَــاصر :لا في الملهي نرقص امالا وين عارفني
عمر تنهد :لا حولي ولا قوة الا بالله ، جبتلك ملف أيه
نَــاصر رفع حاجبه :موافق يعني
عمر ردهاله :لا رافض غر نتسهوك عليك
ضحك نَــاصر :هههه ايوا حني ولد عمي اطورت في المزاح
عمر :ههههه اهو نتعلم منك
نَــاصر :هههه تمام نبي لستماره الاصليه لشهاده الثانويه واربعه صور شمسيه ليها وصوره من كتيب العائله الصفحه الرابعه
عمر :ايح هدا ماقتليش عليه
نَــاصر :ياودي انت ماسألش
عمر :تمام تمام خليها غدوه نجيبهملك كاملات وعلي الصور الشمسيه كمل عقاب جميلك وطلع صورها
نَــاصر :هوا هدا لمانبيشي اني ارفع جيب زبر
عمر :هههه واللهي انت لعرضة خدماتك
نفخ نَــاصر :ملك خدمه شكلها منيله وبنندم عليها باقي عمري لمنيل هي تشاو تو
عمر :هههه تمام
.
.
هَــل حُـب ذالكـ الخَــاطف وإذمانــه يجـوز ❔
.
.
عقدت مـريم حواجبها بضيق وهيا تحس بـ نفس يضرب علي وجها ولـ لمسات خلوها تفتح عيونها شوي شوي واول مافتحتهم وشفاته نهضت روحها وهيا تمسح علي عيونها وقالت :روحت
وقف السِـيفاو من علي الارض وقرب قعمز علي السرير قدامها وهوا يحول في ساعة اليد متعه :كانت عندي خدمه وطرية نبات برا
مـريم :خدمة شني
حط السِـيفاو ساعته علي الكمادينو وشبحلها بـ بتسامه :نهيت فيها خدمة قديمه كان لازم ننهيها من زمان
ضيقت مـريم عيونها بعدم فهم وقبل ماتتكلم قرب السِـيفاو منها وهوا يبعدلها في خصلات شعرها من علي وجها وخلاها تتوثر وهيا تنزل في عيونها من عيونه بخجل خلا السِـيفاو يضحك بـ خفه وهوا يميل في راسه يطبع في بوسه علي خدها وبعد قال :فكينا من النكد وخلينا في حلاوتك
غمظت مـريم عيونها بضحكه وهيا تبعد فيه وترجع تفتح في عيونها :اكيد جعان خليني انوض انديرلك فطور
شد السِـيفاو يداها ورجعهم ورا ضهرها وقربها منه :اني جعان فيك انتي الحق
مـريم نفخت بخجل وهيا ترجع تغمظ في عيونها بالقوه :سِـيفاو
باسها السِـيفاو بخفه علي خدها وقال :ياقلبه وعيونه وروحه وكل شي فيه ها
فتحت مـريم عيونها بضحكه وقعدت تشبحله للحظات بصمت لين خلاته يرجع يقرب وهوا يحرك خشمه علي خشمها وهمس :خيرك
مـريم :محلاك
ضحك السِـيفاو :لا هكي فيها اغراءات وجو لا استطيع ان اقومه
تعلت ضحكت مـريم وهيا تبعد فيه :سِـيفاو هههههه بعد بعد باهي بنحكي معاك في موضوع ظروري
تنهد السِـيفاو وبعد ساوي تقعميزته علي السرير وجبدها قعمزها في حضنه وهوا لاف يديه حولينها :هي قولي
مـريم قالت بضحكة خجل :هكي
هز السِـيفاو راسه :لا في وضعيه تانيه احلا قعده
مـريم هزت راسها وشداته من كتافه :لالالا هههههه هدي حلوه خلاص
ضحك السِـيفاو ورجالها شعرها ورا ضهرها وقال :هي قولي شن هوا الموضوع
تحمحمت مـريم وتلاشت لبتسامه بس الخجل والتوتر قعد حائط بيها منه ومن قربه ولمساته ونظراته لخلتها ترجع تتحمحم وهيا ترفع في عيونها فيه وقالت :سامح خوي امس لما جي سألني شن تخدم
ضيق السِـيفاو عيونه وقال :باه
رفعت مـريم كتافها :قتله انك تخدم في مستودع الغاز وسألته علاش يسأل قالي جمله حسيته كأنه يعرف شي عليك
السِـيفاو :شن قالك
مـريم :قالي نحسابه يخدم تاجر مخدرات
رفع السِـيفاو حواجبه وهوا يمسح علي لحيته :حكيتيله حاجه انتي
مـريم هزت راسها :لا ماحكيت لحد ولا لواحد علي الشي هدا
السِـيفاو تنهد ببتسامه وهوا يقرب يحضن فيها :ماعلينا اللي كاتبه ربي بصير ، نقولو خير وخلاص
مـريم لفت يداها عليه وحضناته ببتسامه وفرح وبقلب يدق بسرعه من قربه .
.
.
.
رفعت إينـاس حاجبها :ومن هدا بسلامته
فاطمه :ولد صاحب بوك ويعرفه وسام ، بوك يشكر فيه وعاجبه لين خلاص ، وقال غر يجو اماليه ونشوفوهم ويشوفونا مرات يصير نصيب
إينـاس:بس اني مانبيش نتزوج
فاطمه تلفتتلها بشهقه:وعلاش يابنتي ماتبيش تتزوجي ، ره ماليك غير حوشك وراجلك والباقي رايح
إينـاس:علاش وليت هم علي قلوبكم
فاطمه :اشي فاش تفكر اشي ، هم ياكلك مش هم ، اني مدبيا تقعدو جنبي وجنب بوكم وتعانونا لين ربي ياخد امانته، لكن بنياتي نبيلكم الخير فكري في بعدين سيورنا راجعين لـ اصلنا ولربنا علي الاقل تلقي سند تستندي عليه ولا ولد ولا بنت تكبري وهما جنبك
إينـاس :بعيد الشر عليكم
فاطمه سكرت الغاز وحولت طاجين لفطيره لـ حولت منها في كيسه وحطتها في صونيه وتلفتت حطتها قدام إينـاس وقالت :وبعدين ماحد غاصب عليك حني قلنا يجو ونشوفوهم مدام الراجل تقدم وطلب يناسبنا مش باهي نقولو لا ونسكرو في النصيب
هزت إينـاس راسها بتنهيده وفاطمه كملت كلام :نوضي ارفعي لعمتك سعاد من لفطيره
إينـاس رجعت هزت راسها بالقوه :لالا يمه فكيني وبعدين برا نو حنحاطي وضي هارب
فاطمه :تي نوضي منوض حتي هاني وسما قعدين ماروحو من بنبعت امالا نوضي هيا خير ماناديلك بوك
نفخت إينـاس وناضت بـ غل وجبدت الصونيه بـ تقربيع وهيا تتلفت تلبس في وشاحها لـ لفاته وطلعت وهيا اتمتم لين وصلت .
وقفت قدام الباب وهيا تتلفت تشبح لـ سيارته ورفعت تليفونها شبحت الساعه لقتها الـ 11 تنهدت وقالت :اوووف منك ياماما اوووف
وخشت وهيا تشبح لـ عبدالمهيمن لـ رفع يده :شفشا
بتسمت إينـاس:تحشم اكبر منك
عبدالمهيمن :غر اسكتي راه يسمعك حد يصدق
ضحكت إينـاس:هههه تبي فطيره
عبدالمهيمن :اكيد خشي خشي اهو لاحقك
وقبل ماطق الباب فتحت ريم الباب بشهقه :وااه خلعتيني
إينـاس:الله شن تشبحي فيا غوله
ضحكت ريم :غوله حلوه هههه كيف بنمشيلكم ماما مدايره سفنز
إينـاس:خلاص خلاص هاتي نديرو عملية تبادل
مدتلها صونية لفطيره وخدت منها صونيه السفنز وقالت :تمت العمليه بنجاح هي صباح الخير تصبحو علي خير
زادت ضحكت ريم وشدتها :عينك ياكلبه والله ماك ماشيه اقعدي افطري اهي جوري قريب توصل مروحا بيها بُـتول بتفطر عندنا
إينـاس:لالالا نو وضي هارب ماخاطريش
ريم :خزي خيرك هكي خشي هيا
نفخت إينـاس وهيا تتلفت لـ جوري وبُـتول لـ خشو بدوشتهم وهما يصيحو علي عبدالمهيمن لـ قرب قعد يهدرز علي بُـتول وجوري جت تجري لـ إينـاس:اووو القمر زايرنا الصبح
إينـاس نفخت :القمر ماخاطراش فيكم لكن هي بيساير ويبي فطور ملوك
ريم :خشي باهي هي
خدت إينـاس منها صونية لفطيره :هاتي هدي امي من عشقها فيكم بعتتني نجيبها قبل مانذوقها
جوري :ماد كراع وباله فاها
إينـاس:ماخصكش
وخشت وخلتهم وهما ينادو علي بُـتول لفتحت معاد مع عبدالمهيمن .
خشت إينـاس وقبل ماتخش للمظبخ سمعت صوته ، شدت نفسها وهيا تبي تولي بس جت في ودنها كلمته :وخيرها يمه اخلاق وزين تبارك الله خير من بنت اختك
رجعت إينـاس تلفتت وهيا تقرب تسمع في رد سعاد لـ أكدتلها انه لكلام عليها :والله الحق جميله وخلوقه ورزينه وكفايه بنت فاطمه ورجب ، لكن شن ناقصك ناخدلك وحده معاقه وبعدين تعالا جاي شن ناقصها بنت اختي حتي هيا زينة الزينات
ضحك القَـاسي بهزوه وقبل مايتكلم لمح حد واقف علي الباب لـ خلاه يميل راسه وهوا يبي يوقف بس خشت إينـاس بدفه من ريم لصيحت :تي خيرك واقفه قدام الباب
تحمحمت إينـاس بـ حشمه ممزوجه بـ عبره حبستها بلمعة دموع لاحظها القَـاسي لقعد يشبحلها كيف قربت حطت صونيه لفطيره قدام سعاد وقالت :صباح الخير عميمه هدي بعتتها ماما
سعاد :ياسلمها هيا وفطيرتها والله ستاحشناها
بتسمت إينـاس بغصه وهيا حاسه بـ نظرات القَـاسي لخلوها تتلفت لـ ريم لقالت :هي ارفعي معاي لطاوله لبرا
هزت إينـاس راسها وقربت خدت صفرة الفطور وطلعت وهيا تخلي في ريم لقالت :البنت جت ياماما اطلعي سلمي عليها
سعاد :باهي غر طلعو لفطور انتم
.
وما وجود لـ الإعاقات غير إعاقات تفكير بعض البشر 👌🏻
.
.
.
حنين بتسمت :العقبه لـ علاء
احلام:ان شاءالله نتهنا عليه حتي هوا
ساجده :واااه واخيرا بنتفكه منهم وبناخد راحتي في الحوش
حنين ضربتها علي راسها :نقصي صوتك خير مايطلعلك فَـاتح من الدار يوريلك الراحه كيف شكلها
احلام :نوضي جيبيلي التليفون غر نكلم خالتك باش توتي روحها غدوه
ساجده :بتمشي انتي
احلام :لالا خوتك كلهم زي بعض زي مامشيتش في الاولين حتي هوا لا تمشي وحده منكم مع خالتها وخلاص وتو تجي هني ونشوفها اصلا هدا حالتي لا خترت لا دورت كل واحد جابها بروحه واني زي الزينه
ساجده تنهدت :ريتي مايطلع منهم كنت نحساب وجوهم مش وجوه حب طلع وجهي اني لـ مش متع حب وكلهم خدو علاقه
ضحكت حنين وقرصتها وهيا تهمس :اسكتي فَـاتح
تلفتت احلام لـ فَـاتح لـ طلع من داره وقالت :شن طالع
فَـاتح :ايه يمه تبي حاجه
احلام :اتصل بـ علاء شوفه وين ليه دايح اربع ايام ماروحش
فَـاتح :تمام تو نكلمه
وفتح باب الحوش وطلع وهوا يطلع في تليفونه وجرب اتصل بـ علاء مره تنين تلاته بس شي شي مايردش ، تنهد واتصل بـ بُـتول اللي اول ماشرين تليفونها ستأذنة وناضت بعيد عليهم وهيا ترد عليه بـ بتسامه :صباح الخير
فَـاتح :صباح الورد بـ نور العين
بُـتول :شن الجو
فتح فَـاتح سيارته وركب وهوا يرد عليها :تمام ماشيه وانتي
بُـتول :الحمدالله انت برا
فَـاتح :ايه قعده في الجامعه
بُـتول :لا روحت من امبكري لحوش صاحبتي
رفع فَـاتح حاجبه :علاش لحوش صاحبتك
بُـتول :شي عازمتني علي لفطور مشي جيت
فَـاتح :اها ومن مني ستأذنتي
بُـتول رفعت كتافها :من حد لانه ماحد حـ يقولي لا
فَـاتح :اني نقول لا
بُـتول رفعت حواجبها :واللهي
فَـاتح :واللهي الله ، راني مانحبش البنت لـ تتصرف من راسها
بُـتول :لا يابابا اماليك قعدين ماجو وقعد تتمادا امالا لما يجو شن ادير
فَـاتح ضحك :غدوه لما يروحو نبعتلك رساله بـ القوانين الجدد لتمشي عليها
بُـتول :هههههه خلاص امالا خليك انت وماليك في حوشكم واني خليني في حوشي
فَـاتح :ههههه تحسبيها ساهله امالا خلاص ياعيوني ادببستي فيا وفات
شدت بُـتول خدها وتلفتت علي صوت إينـاس لصيحتلها :بثو
بُـتول :عيونها
إينـاس:سلملي عويناتها هههه تشربي شاهي اخضر
بُـتول :كان من تحت ادياتك مانقولش لا
إينـاس:علي عويناتك الحلوات اني نديره
بعتتلها بُـتول بوسه في الهوا خلت إينـاس تضحك وهيا تتلفت لـ جوري لـ طلعت من الحوش :اشيه اشيه شن هالنفاق الاجتماعي
إينـاس جبدتها برا :كانك منافقه ماظنيش الناس كلها زيك
فتحت جوري فمها :واااه في منتصف الجبها
ضحكت إينـاس :تعالي معاي بندير شاهي
جوري :خشي اهو جايه غر نرفعلها السفنز
خشت إينـاس وهيا اطلع في تليفونها لشرين واول ماردت ورفعت راسها شبحت القَـاسي لـ كيف طالع من المطبخ ، تلفتت طول وكانت بترجع تطلع بس جبدها القَـاسي من يدها وخش بيها للمظبخ وسكر الباب لـ تكاها عليه بشهقه منها خلتها تفتح عيونها علي وسعهم بملامح مصدومه خلت القَـاسي يتحمحم وهوا يوخر ويبعد في يديه منها وهوا يرفع فيهم كـ استسلام وقال :حقا نسيت ممنوع نمسك
زمطت إينـاس ريقها وهيا تاخد في نفسها لهرب من قربه وعيونها فيه كيف تلفت وهوا يحول في الدبله اللي حطها علي الطاوله وتلفتلها وقال :وتوا عادي
وقبل مايقرب زادت لصقت إينـاس في الباب وقالت :لو سمحت خليك بعيد عليا
ورفعت عيونها لملوهم الدموع وخلو القَـاسي يوقف مكانه وهوا يقول :باهي علاش الدموع توا علاش
وحط يده في وسطه ومسح بـ قفا يده التانيه بتوتر:كيف تبيني نتعامل معاك اه قوليلي كيف
ورجع شبحلها كيف دموعها ينزلو بصمت قرب وقف قدامها وقال :تو تشدي فيهم قدام الكل وتبتسمي ولما تشوفيني يحلالهم النزول علاش هكي
مسحت إينـاس دموعها بـ عبت وتلفتت بتفتح الباب بس حط القَـاسي يده فوق يدها لـ علي المنيلية الباب ويده التانيه حطها علي الباب وخلها محاوطه بين يديه وقرب من ودنها وهمس :مش تحبني
سحبت إينـاس يدها من تحت يده وقالت من بين دموعها لمسحتهم :شن تبي مني انت
القَـاسي :نبيك انتي
تلفتتله إينـاس وهيا مضيقه عيونها المليانه دموع لسالت علي خدودها لـ رفع القَـاسي يده ومسحهم :نبي ننحرق في نارك زي مامحروقه بناري
غمظت إينـاس عيونها بـ القوه وشدت راسها بين يداها وقالت :حلم حلم حلم خلاص نوضي يا إينـاس افتحي عيونك هدا حلم ولازم تنوضي
ضحك القَـاسي وقرب باسها علي خدها و همس :ماتوقعت نكون حلم لبنوتة الجيران
فتحت إينـاس عيونها وهيا تبعدله في يده لـ علي وجها :تو يجي حد حول
القَـاسي :خليهم يجو هدي المره نبيهم يفهمو غلط
إينـاس :حـ ، حـ يفهمو غلط ، واللي حـ يفهموه انه اني وحده ماننفعش نكلم في خوهم الخاطب من يومين
القَـاسي :اي هما اصلهم يتمنو انتي لخطبتك
إينـاس بعدت من عليه وهيا تلف علي الطاوله من الجيها التانيه تحاول تاخد نفس نظيف من ريحته وقالت :بس عمتي سعاد ماتتمنانيش لو سمحت خليك بعيد خليك حلم واطلع من هني
القَـاسي :لكن اني خاطري نحقق الحلم
شبحتله إينـاس:الحلم هدا مايتحققش
القَـاسي:نجربو شن ورانا حني
إينـاس :قلبي مش لعبه
سكت القَـاسي للحظه وهوا يشبحلها وبعدها قال :علاش تسكري فيها
إينـاس:لانه اني عندي كرامه مانسمحش لحد يخليني كرت احتياط زي مابدير انت
القَـاسي رفع حاجبه :كرت احتياط ، هدي نظرتك عليا انتي
إينـاس:انت لخبطني فيك ماعاش عارفه بـ اما نظره نشبحلك
هز القَـاسي راسه :تمام تمام
وتلفت خدي القيله ورجع فتح الباب لـ اول مافتحه نخلعت جوري لضيقت عيونها :بالقاسم
طلع القَـاسي وتخطاها بـ غضب مكبوت في ملامحه لنتبهتلها جوري لـ تلفتت شبحتله كيف مشي وخلاها من غير مايتكلم معاها ولا كلمه ، ورجعت شبحت لـ إينـاس لـ تلفتت وهيا تمسح في اثار دموعها ، قربت منها وهيا تتلفت تشبح لـ الدبله لخلاها القَـاسي علي الطاوله ، تنهدت جوري وقالت :لا كدا اني تلخبطت
.
أحيانــا الإنســان يصنـع لنفســه بعـض التعقيـدات والظُـروف كــي لا يصـل لـ هدفـه خوفــاً من خسارتــه فِمــا بعــد 🥀
.
.
.
ضحكت أيه وهيا تشبح لـ هنيده ورجعت شبحت لـ عمر :وبابا وعمامي شن قالو
عمر اتكي بضهره علي الحيط وشبح لـ الباب لنفتح وخش نَــاصر وهوا يطبس ياخد في غيث لجاه يجري بفرحه ورجع شبح لـ أيه وقال :ماحد يندي غر ابدي في القرايا وبعدين نمشو امورهم
صفقت أيه بفرحه وقربت حضنت هنيده لضحكت عليها :اخنقتيني ههههه حولي
بعدت أيه بتنهيده وهيا تتلفت لـ نَــاصر لقال :خيره بو عجيله عفاريت الحنان نايضات عليه
ضحكت أيه بـ تسهويك لـ لحظه واللحظه لبعدها غيرت ملامحها لـ غضب وقالت :بعد عليا وخليني نتهنا في فرحتي
نَــاصر :اه باه خلاص بلاش من جميلي امالا
ضيقت أيه عيونها وشبحت لـ عمر لقال :حي عليك من غيره مافيش قرايا
هنيده رفعت حاجبها :علاش شن خصه
عمر :تي دبارة قرايتها كلها من تحت راسه
تلفتت أيه لـ نَــاصر بـ تضيقت عيون :كيف
نَــاصر :لا خلاص ماكيفاش ماعاش صارلي عمر فوت الموضوع
سكتت أيه بـ ملامح غصه وهيا تشبح لـ هنيده لضحكت :مصح وجهك ياكمل جميلك يامتعشمش البنت من الاول
عمر :خليه اصلا من الاول ماخاطراش
ناضت أيه بقرنت حواجب ومشت خشت للمظبخ وخلت هنيده تحدف في المخده علي نَــاصر لعيط :اه اه خيرنا
هنيده:اه لتقطعك
عمر ضحك عليهم وهوا يمد في يديه لـ غيث لـ يجبد في روحه من نَــاصر لـ يعافر فيه في حضنه لين درهله كبده .
جبد عمر غيث من نَــاصر وضربه برجله لين نَــاصر قرن حواجبه وهوا يشبح لـ هنيده لضحكت عليه بتفنيصه خلتها تحط يداها علي فمها .
عمر :وين مؤيد
هنيده :رفع نور لـ رنيم وقال بيتغدا غادي
نَــاصر :كان بتمشي معانا نوضي
عمر :علي خير
نَــاصر :بنمشي نصور مخويتك
عمر رفع حاجبه :مش ماصارلكش
نَــاصر :الله غالب قلبي لحنين مايطاوعني مانكمل جميلي لكبير لماتقدرو تردوه
هنيده :ماد كراع وباله فيها دير جميلك وسكت
نَــاصر :سكري فمك وكان بتنوضي هيا
هنيده :لالا برو ماخاطريش وبعدين بندير لغدي
نَــاصر :تمام
وتلفت مشي للمظبخ وهوا يخش علي أيه لـ مقعمزه وهيا سانده مرافق يداها علي الطاوله ومحاوطه وجها بكفوف يداها ومابتش تعدل علي نَــاصر لـ خبط علي الطاوله :نوضي وانتي تقول ارمله وفي رقبتك عشره صغار
أيه نفخت وشبحتله :ماخصكش فيا خليني في حالي باللهي عليك
نَــاصر :باهي نوضي هيا بنطلع نصورك للجامعه
رفعت أيه حواجبها :مش ماصارلكش
نَــاصر شد بتسامته من ملامحها العفويه وقال :نوضي بدلي بسرعه قبل مانغير رايي بجديا هي نراجي فيك في السياره
بتسمت أيه ووقفت :هي خمس تواني وتلقاني قدامك
وخشت تجري وخلاته يبتسم وهوا يطلع وراها من المظبخ .
.
.
.
ضحكت نجوي :هههه والله قبل ماتصير هالمصايب هدي كلها كنت نبي ندويلك عليها ونبي نخطبهالك ، خلاص تو نحكي مع سميح عليها اليوم
بَـحر :لالا ستني مش توي خلي علي الاقل اللم باش ناخد حوش وسياره
نجوي تنهدت وشدت يده:ربي يصلح حالنا وينسينا في اللي صار
هز بَـحر راسه ووقف :امي قعده راقده
نجوي :اي غديتها ورقدت انت بتطلع
بَـحر :ايه اليوم مرات نتعطل برا بندور علي خدمه
نجوي :ربي يعاونك ياوخيي ويفتحها قدامك
بتسم بَـحر وتلفت طلع وهوا يطلع في تليفونه ويطلع في رقم جمال ، بس قبل مايتصل بيه رفع عيونه وشبح لـ حوش إلهَــام ورجع نزل عيونه في تليفونه واتصل بيها وجاه ردها من اول رنه :الو
بَـحر :شن التليفون ديما في يدك شكله
إلهَــام:اممم لا بس توا شاداته صدفه
بَـحر رفع عيونه في الحوش وقال :قعده علي كلامك متع امبارح
بتسمت إلهَــام وهيا ترفع في يدها لمست خدها لباسه عليها وقالت :اي
بَـحر :بتتعبي معاي ره
إلهَــام:تعبك راحه
ضحك بَـحر :هههه مصره
إلهَــام:هلبا
بَـحر بعد التليفون وهوا يشبح في من خش عليه انتظار واول ماشاف رقم جمال رد علي إلهَــام:تو نكلمك بعدين
وسكر عليها قبل مايراجي ردها ورد علي جمال :ايوه .....
.
.
لا تُعطــي أمـل في أي شيء اكتــر من حده ، كــي وقعتــكـ لا تــأتـي قويــه 💔🌿
.
.
خشت ساجده لدار وهيا تسكر في الباب لتكت عليه وترد بـ بتسامه ودقات قلبها قريب تطلع من قفصها الصدري اول ماسمعت صوته:الو
ساجده :ايوا
سامح شبح لـ معاذ لمقعمز قدامه ويشبحله ورد علي ساجده :شن الجو
ساجده :الحمدالله وانت
سامح :الحمدالله ، ايه شن امورك وشن مدايره
ساجده :شي قعده في الحوش وخلاص
سامح :ماتقريش
ساجده :لا امبطله
سامح :علاش حرام هكي هدا مستقبلك
ساجده :اممم خوتي مايبوش
سامح :غلط هكي وين بوك المفروض مايخليهمش يهدموا مستقبلك
ضحكت ساجده بهزوه :بابا لديروه خوتي هوا الماشي المهم يمشوله خدمته واللي يبوه حاضر
سامح ضيق عيونه :اها وشن هيا الخدمه لمشوله فيها
تحمحمت ساجده وبدت تركز علي كلامها وقالت :قصدي مسؤوليه الحوش وخدمتهم وهكي
وشوشله معاذ :بينلها انك تعرف باش تحكي
اشرله سامح بيده بـ معني اسكت وقال:اه هوا مايقدرش ينزل طرابلس وله
ساجده :ايه يحب يقعد في ..... اكتر
سامح :ايه ايه فاهم مقايلي السِـيفاو انه مايقدرش ينزل هني فـ ديما قعد في ..... علي لعيون
رفعت ساجده حواجبها :بالحقا حكيلك السِـيفاو
سامح شبح لمعاذ لقرب منه وقال :ايه حكيلي علاش ستغربتي
ساجده هزت راسها بستغراب :لا شي بس هوا
قص عليها سامح :ماتخافيش نعرف كل شي
ساجده حست بـ غصه في صدرها وقالت :اممم يعني حتي انت تخدم معاهم
سامح :حاجه زي هكي
ساجده :اه اني لازم نسكر
سامح :خيرك خفتي ، ولا خفتي علي خاطر نخدم مع خوتك
ساجده :لالا بنسكر اني
سامح :غر ستني خيرك شن فيه
ساجده :ياسر الخوف لعايشه فيه مانبيش نكلم واحد متع مخدرات ياسر التجار لعايشه معاهم نستأذنك
وسكرت الخط في وجهه وخلاته وجهه احمر اصفر اخضر وهوا يرفع فيه لـ معاذ لقال :شني قتلك
خدي سامح نفسه :طلعو تجار حق طلعنا عاطين اختي لمنبع مخدرات
.
.
.
.
#يتبـع لـ البـــ2️⃣1️⃣ـــارت
#كتـــابـة_اليَــاقُــوت

________________________________
بداء كتابة الرواية في تاريخ 5 / مـــــــ5ٰــــــايـو / 2020
تم انهاء كتابة الرواية في تاريخ 12 / اكتـــ10ٰـــوبر / 2020