عشق في بلاد حروبها لا تنتهي 4 ( 2017 )

الـــمُقدِمـــه

_
_
عِــشق فـي بِـلاد حُـروُبِهـــا لا تنتّٰــهي 4
تعود ولـ المره الرابعه ، عادت ومعاها محتوي حقيقي واقعي حدث في سنة واحده جعلتها عنون الجزاء....
{ 2017# }
.
.
الـــمُقدمـــه
تم كتـابتها فـي ، 2020 / 5 / 5
عَــذاب ،و شَــوق ، وقَــلق ، هـدا مــا تُعنــيه حُـروُف العِشــق ، فـي بِــلاد حُــروُبهــا لا تنتّٰــهي 🥀
.
.
اتكه علي السياره وحط يديه في جيوبه وهوا يشبح لـ الشباب لـ ينزلو في البضعه للمحل ، لـ اول ماكملو طلع صاحب المحل لـ قرب منه ومدله لفلوس :المره الجايه نبو مشروب وعصائر
خدي لفلوس منه وضيق عيونه :تي ياسركم ياراجل المحل قريب يرجع من كثر مامعبي
ضحك الشاب:تي خلينا نسترزقو (ياالقَـاسي)
ضحك القَـاسي وفتح باب السياره :سترزق سترزق مدبيا راهو اني حاجه تجيبلي المني هي ياطيب نتلاقو
وركب سيارته وطلع وهوا يرفع في تليفونه لـ شرين ، ورد :ايواً ، تمام ياصحيبي نمر عندي شغلانه خت فت وقيس المغرب تلقوني قبلكم
وسكر القَـاسي التليفون وهوا يلوح فيه علي الكرسي لـ جنبه وشبح قدامه لـ طريق...
.
.
رفعت حاجبها بـ تكبر ، وقالت :اخخي مشناها الصراحه يعني صاحبتك مافيها ماينشاف انقولهالك في وجهك ، ياحنه (بالقاسم) زي لغزل يستاهل لزيه
ضحكت وهيا تتلفت لـ اختها لقالت بـ ضحكه :انتي من عاجبك اصلا
رفعت (إينـاس) كتافها :شينه صاحبتك شينه شن بيعجبني فيها مانقدرش مانعجبش
تعلت ضحكاتها :اصلا انتي كلهم عندك شينات
وضيقت عيونها بـ ضحكه:زعما مطلعتيني حتي اني و (ريم) شينات
ريم :بنسبه ليا معترفه بـ روحي شينه عجبي لين تعيي ماتفرق معاي ، بس (جُـوري) تحب روحها هلبا هههه
خفت ابتسامت إينـاس اللي شبحت لـ رجلها :الجمل عمره مايشبح لعوج رقبته اني عرجه و نعجب في الناس هههه
شبحو جُـوري وريم لـ بعض ورجعو شبحولها كيف وقفت بشويه :اني بروح تو امي اديرلي النهار لحرف طلعت ونسيت ماسكرتش الحوش
وقفت جُـوري :ستني نجيبلك من الكيكه عمي (رجب) يحبها
إينـاس:بسرعه هي
مشت جُـوري للمظبخ اللي اول ماخشت صيحت :ريم تعالي تليفونك يشرين
ريم وقفت و مشت جري وخلت إينـاس اللي طلعت من الصاله ومشت بشويه وهيا تعكز بـ رجلها لين وصلت قدام الباب وطبست بشويه لبست سبيدروها واول ماوقفت وتلفتت انفتح الباب وجي وجها في وجهه .
وخرت إينـاس خطوتين التالي بـ خجل من الموقف وخلاته يخش بـ بتسامه :السلام علي بنت الجيران
بتسمت إينـاس :شن حالك
هز راسه :الحمدوله انتي شن حالك وشن حال عمي وعمتي
إينـاس :الحمدالله بخير
طلعت جُـوري من المظبخ:روحت
القَـاسي:لالا قعد في الطريق
ضحكت وقربت مدت لـ إينـاس الصونيه لـ خدتها وعيونها علي القَـاسي اللي خش وهوا يحول في سبيدروه لحطه علي الجنب وخش علي ريم في المظبخ :السلام عليكم ورحمة الله
سكرت ريم التليفون بـ بتسامه :وعليكم السلام ورحمة الله ، تعالا تعالا حماتك تحبك فضل طرف كيكه مدايرتها جُـوري زي لعسل
رفع القَـاسي حاجبه وقال :(بالقَـاسم القَـاسي) ياكل فضله ، وحياتك انتي وختك اديرولي واحده جديده
ضحكت ريم :من عيونااا
ضحك القَـاسي وقرب خدي طرف الكيكه ونتش منه :سلملي عيونكم ، مايخلف ناكل فضلة وخياتي ، ايه وين امي و(مهيمن)
ريم :توا كيف مشت عند الجيران ، وعبدالمهيمن عند (وليد) ولد خالتي قال بـ بات عندهم وغدوه بجي معاهم
هز القَـاسي راسه ومسح يديه من الكيكه :باه امالا اني بايت برا ماتنشغلوش عليا اليوم
.
.
.
مسح جبهته بـ قفا يده وهوا ينفخ ويتلفت وراه علي الصوت لـ ناداه : (بَـحر الدين)
بَـحر:انعم يامعلم
بتسم الشاب:شن كملت
بَـحر :مزال طانطه قزه وشرشور لكن غدوه بنكملوهم صاحب الطانطه ابصر شن عنده قال
الشاب:اه ماهو فيه حتي طلبية زوز طانطات قزه
بَـحر :مش مشكله نأجلوهم لـ غدوه وتو نتموهم اني والشباب
الشاب :تمام يامعلم
رفعله بَـحر يده ، وخش غسل وجهه ويديه من القزه والغبره وطلع خدي مفاتيحه وتليفونه وطلع لـ سيارته اللي فتحها وهوا يشبح لـ تليفونه لـ شرين بـ رقم غريب من امبكري ، ركب سيارته ورد :ايوه ، من معاي
تسكر الخط في وجهه طول من غير رد ، لين خلاه يضيق عيونه بـ ستغراب وهوا يحدف في التليفون في الكرسي لـ جنبه من غير اهتمام ويولع في السياره ويتحرك .
.
.
ولع ضي التليفون معلن عن مكالمه التالته لـ خلتها تقرب وهيا تشبح لـ الأسم ( فَـاتح ) ، وبعدت اول ماكملت المكالمه وقبل ماتتلفت وصلت رساله خلتها ترجع تقرب وهيا تشد في التليفون وتقرا في الرساله من الاشعارات (تي وينك ياراجل الشاحنه قريب توصل )
ضيقت عيونها بـ حيره ، وماقطع تفكيرها الا صوته لخلعها : (مـريم)
تلفتتله مـريم بـ خلعه وقالت بـ توثر واضح من صوتها :تلـ ـيفونك مـ ـن من امبكري يشرين
ضيق (السِـيفاو) عيونه وقرب خدي منها التليفون وتخطاها و قرب من الزيانه وهوا لاهي في تليفونه ، وقال :اني طالع
مـريم رفعت حاجبها :معطل
تلفتلها السِـيفاو وبتسم بـ هزوه :من امتي هامك كان عطلت ولا لا
زمطت مـريم ريقها وهيا تحول في عيونها منه وقربت من الزيانه وهيا حاسه بـ عيونه لـ اتبع فيها :سألت اني بس ، وعلي كيفك كان بتعطل ولا بتبات برا ماخصنيش فيك اني
قعد السِـيفاو يشبحلها لـ لحظات بـ صمت وبعدها خبط العطور اللي علي الزيانه بـ غل لين خلعها وخلاها تبعد بـ صدمه تشبح لـ العطور لطاحو تكسرو علي ارضية الدار ورفعت عيونها ليه كيف خدي مفاتيحه وتليفونه وتلفت طلع وخلاها تاخد في نفسها لهرب من الخلعه .
.
.
.
حط راسه علي لمخده ورد :ريت بُرج إيفل اللي في فرانسا ، عهد عليا نجيبه كان قدرت تجيب (نور) لـ طرابلس
جاه صوته لـ ضحك من التليفون :هههه خلاص امالا دبر كيف تجيبه ونبيه في نص .....
رفع حاجبه :تي برا ياراجل عمي (المهدي) مستحيل يخليها تجي هني ومعاها (غيث) وبدات هيا حامل تي في سابع المستحيلاتـ...
وسكت وهوا ينزل بـ الكرسي التالي ونزل التليفون من علي ودنه :(مؤيد)
طبس مؤيد لبس سبيدروه :خيرك
ضيق عيونه :وين في الليل
مؤيد:دوره في الميدان وجاي
ورجع وقف ، وتلفتله :تبي شي
هز راسه ورجع شبح لتليفون وهوا يرجع فيه علي ودنه ويسمع في الصياح :يا (نَــاااصر) ازح تي وين مشيت
نَــاصر:ايوه (عمر) معاك معاك قعد
عمر :المهم شن جو مؤيد
نَــاصر:ماشيه علي الحاشيه زي حالكم وحالنا كلنا
بتسم عمر :مكثر دوتك ، دير لقتلك عليه ودورلهم حوش غادي
نَــاصر:نبي نفهم علاش مايولوش لحوشهم الاول وتريحني من هشغلانه
عمر :مايصيرش مرت وصغار (#جبـَار) يعيشو في حوش ورث ، وعندهم فلوس بوهم الله يرحمه تعيشهم في قصر ، دورلهم علي حوش ملك ، ناخدوهولها تعيش فيه هيا وصغارها
هز نَــاصر راسه :تمام اعتبره واتي
عمر:سلملي علي مؤيد وهي تصبحو
نَــاصر:يوصل يوصل ، هي تصبح علي خير
وسكر منه وهوا يوقف يقرب من المسجـل اللي قواه علي لغنيه لكيف باديه ......
نحكُــو في الواقـع ، نحكُــو في la vérité (الحقِيقَـه)
نكتب ونغنـي ، وخنقتني العبـرة
سامحينـي يا أمي تفكيــري في الهجــرة
تمـــا طُموُحـي في العِيشه بـــرا
بلكـي نتهنــا ، وجرُوحـي تبــرا
يا أمي désolé (أسـف) ، في بـلادي شُفـت الويـل
المعيشيه صعبـه ، ومــانرقدش الليـل
عــايش في بـلادي ، عيشـة عابـر سَبيــل
غروُنــي بـ كلمـة { المُستقبــل جميــل }
حالـي هو حـالك ، هو حــال الليبيين ......
نقص مسجل السياره ، ورفع تليفونه لـ يشرين ورد :ايواً
جـاه صوته :شني وصلتو ياطيب
القَـاسي:حني واصلين من امبكري ياطيب
السِـيفاو:سامحني صارت تلخبيطه ، لكن الشباب شوي ويصلو فيك
القَـاسي:ياصحيبي شاحناتي مايوقفوش اكتر من ربع ساعه ، ياتوصلو تاخدو بضعتكم ، يا اضيع عليكم هيا وفلوسكم
ضيق السِـيفاو عيونه :يلحقو يلحقو ، هدي اول عماليه مع بعض وان شاءالله مش الاخيره
القَـاسي تنهد بـ ضحكه :ان شاءالله ، امالا سكر سكر وستعجلهم ياصحيبي باش نسترزقو من بعضينا مستقباً
سمع القَـاسي ضحكت السِـيفاو لسكر منه و رجع اتكي بظهره علي الكرسي السياره ، وقوي المسجل علي لغنيه ...
مُستقبــل زاهـر يلـزم حـاجه من الأثنيـن
كثُـوف الرجـاله تبقـى من اللي رقييـن
يا ولا باتــك واحد من المسؤُولييــن
ماتـوُ الرجـاله ، وعاشـو رُوس المفيـات
راح اللي راح ، وعـاش بزناس العقــارات
ضحي الشَهيــــــــد ، في شــان بـلاده مات
وغِيـره حــاير وين يدس المِليــارات
تمُــو رجــاله ، بعـد ماتــوُ لبطــــال
‏la guerre ètait ( كانت الحرب ) ، في صــالح الانذال
بعد الدَواعـش ، جُـونا داعـش لمــوَال
باعــوُ القضِيـه ، ويــاما نشُوفُـو مازال
خدي لفلوس من يده وبعد يعد فيهم ومسمعه عند اللي واقف قدامه وهوا يأشر علي الافارقه لواقفين وراهم :ولا واحد عنده جواز ، رد بالك من البوابات ، بدو الامن متخوفين من المهاجرين
هز راسه وحط لفلوس في جيبه :مش جديد عليا يابرنس والفلوس ناقصات هات الباقي
تحمحم وقال :شن ناقاصت يا(يُـوسف) قتلك من الاول بـ النص
يُـوسف مد يده وأشرله :هات حقي ياحبيبي النص كان ألفين بـ ألفين وانت عاطيني 1500
مسح الشاب جبهته بـ كم سوريته وطلع لفلوس من جيبه وعد المبلغ ومده لـ يُـوسف لفكه منه وقال بعد ماعدهم وتأكد منهم :ألعبها علي غيري مش عليا ياشامخ
وتلفت صيح علي الافارقه :هيا انت وياه اركب
وركب السياره وهوا يرد علي تليفونه بـ بتسامه :ها فتوحه شني مني مشيت للـ.....
فَـاتح :هههه كلب من يومك حشيتشك النثايات
يُـوسف:زيك ياكلب شني مشيت للاستراحه
فَـاتح :لا عندي تسليم بضعه اليوم نكمل ونمشي
يُـوسف:تمام يابرنس تلقاني قدامك
سكر يُـوسف الخط من فَـاتح ، وفتح الروشن وهوا يقوي في المسجل .....
باعــوُ الـ Rottame ( الخُـرده) ، باعــوُ حتي الوُقُود
بزنـس في الهجــره ، كُر وهــلب لحـدود
والشعب يعــاني من الدخـل المحـدُود
يــادرتُو فينــا ، كيف مــايبُو ليهُــود
مرنْ أيــام ، أشهُـور وسنَـوات
اللي خانُـو وباعــوُ ، تمُــو من ضمن السُـلُطــات
‏Propulsés par (مشَغل بواســطه )، راعـي المِيــليشيــات
وراء الكواليس ، سرقه وأفـارِيــات
حتي الريــاضه لكـانت لمتنَـا
فيهـا الـ Respiro (النفـس) ، وفيهـا مُتعتنــا
خششتُـو فيها السيــاسه إتشتتنـا
الأحقــاد كثرتُـو، و فرقتُــو كلمتنــا
هدي الحقِيقـه مهمــا كــانت مُـره
لازم يعرفهـٌا اللي جُـوا وبَـرا
الشعب الليبي تمُـو الاخـوة الأعــداء
بــلادي وداعــاً ، #ومش_إلي_اللقــــاء
.
.
حـين تكُـون العـوده أصعــب من الفُـراق 🥀
.
.
#يتبـع لـــ البـ1ــارت
مـن سلسيــلة عِــشق فـي بِـلاد حُـروُبِهـــا لا تنتّٰــهي الجزاء الرابع تحت عنوان ( 2017 )
#من_كتــابة_اليَـاقُـوت
________________________________
بداء كتابة الرواية في تاريخ 5 / مـــــــ5ٰــــــايـو / 2020
تم انهاء كتابة الرواية في تاريخ 12 / اكتـــ10ٰـــوبر / 2020
اسم الاغنية / روس المافيات