عشق في بلاد حروبها لا تنتهي 4 ( 2017 )

البــ الـــتانـي والعـــشريــن ــارت

_
_
عِــشق فـي بِـلاد حُـروُبِهـــا لا تنتّٰــهي 4
{ 2017 }
.
.
في البارت السابق
وقبل مايسكر جاه رد علاء :كمشه كلاب زيكم رخو بـ بوهم مايستاهلوش كلامي اصبرو ربع ساعه بس وشوفو شن يصيرلك وغر تفيدكم توبتكم ياالاولاياء الصالحين
وسكر الخط في وجه فَـاتح اللي قرن حواجبه بعدم فهم خلاه يخش من البلكونه وهوا يمشي لدار ويحول في تشرته لـ لوحه علي الارض وفتح الدولاب لبس تشرت تاني وتلفت وهوا بيطلع من الشقه لولا صوت سيارات الشرطه لـ خلاته واقف تابت مكانه يحاول يكدب ودانه وتلفت بشويه وهوا يشبح لـ امه وخواته لطلعو من ديارهم بصمت زي صمته دام دقايق قبل مايتحرك ويرجع يمشي للبلكونه وهوا يشبح في سيارات الشرطه والدوريات لحاوطو العماره والعمارات لجنبهم خلاته ياخد نفسه بصدمه عكس السِـيفاو اللي رد علي تليفونه لشرين وعيونه لوطه في الشرطه لتحاوسو في المكان ويسمع في صوت بوه لجاه :اني لجبتكم علي هدي الدنيا ياصرصريه وعشتو بخير لدميتوه وتكبرتوا عليه واني لنطيحها بيكم وندفنكم لا نعرف لا ولدي لا دمي
السِـيفاو :شكرا يابوي

قراءة ممتعة 💛
البــ الـــتانـي والعـــشريــن ــارت
.
.
يـــاما سهرنا ليالي في داخلنا أماني ضاعت في نهارنا القَـاسي 💔🍃
.
.
وفي يوم جديد غَير في ليله مسارات وطرق ناس وهوا حامل ليهم في صبحه هلبا تغييرات جديده ومختلفه زي تغير مناخه .
نفخت جوري وهيا تمل من الاتصال بـ بُـتول من غير فايده ، طلعت من المدرج وهيا تتصل بـ عبدالمهيمن لـ رد عليها في اخر لحظه :ايوه
جوري :اوووف خيرك ماتردش علي طول
نزل عبدالمهيمن التليفون وهوا يتلفت يشبح في القَـاسي لـ طلع وهوا يرد علي تليفونه لشرين وخلا امه لـ تصيح وريم لـ طلعت وخلتها وهيا تشبح لـ عبدالمهيمن لقال :وين مشي
ريم ضحكت :هج هههه
نفخ عبدالمهيمن :وقت ضحك هوا مه
ورجع رد علي جوري لتصيح :الووو مهيمن ياكلب وينك
عبدالمهيمن :تي باهي اهو جايك
جوري :باهي خيركم حسه دوشه عندكم
عبدالمهيمن :ونبي فكيني من تقصقيصك سكري اهو جاي
وسكر عليها الخط وخلاها تقرن في حواجبها :كلب والله كلب
وتنهدت وهيا تلود لـ الجردينه لـ اول ماوصلتلها شبحت نَــاصر لـ واقف مع بنت خلتها ترفع حاجبها وهيا تقرب من وحده من الطاولات وتحط في شنطتها وشيتاتها وعيونها فيه كيف وقف علي أيه لـ نفخت وهيا تقعمز :اووف رجليا تكسرو جيتك من القانون لهني والله ماعاد متحركه
خدي نَــاصر نفسه وهوا يشبح لسماء وقال :شن هـ البلوه ياربي لـ بليت روحي فيها
ورجع شبحلها وضربها علي راسها بخفه :نوضي
قرنت أيه حواجبها وشدت راسها وقالت :ماعاش ادير هكي الناس تشبحلنا
نَــاصر شبح حولينه بعدم اهتمام بس اول ماشاف جوري لـ اول ماجت عينه في عينها نزلت عيونها طول منه وخلاته يتنهد وهوا يرجع يشبح لـ أيه وقال :انطمري هني نمشي نجيب الشيتات من الولد ونجي ماتتحركيش
دارت أيه الحوله بعيونها وهيا تسند في مرافقها علي الطاوله وتحاوط في وجها بـ كفوف يداها وتشبحله كيف مشي اتجاه جوري لـ تشبحلها خلتها اضيق في عيونها فيها لين حولت عيونها منها وهيا تشبح لـ نَــاصر لوقف عليها وقال بـ بتسامه :يامساء الخير
جوري رفعت حاجبها وقالت بعصبيه غير واعيه منها :تفضل تبي حاجه
نَــاصر ضيق عيونه :خيرك
جوري هزت راسها وبتسمت :لا شي بس عيب خليت لبنيه بروحها وجيتني
رفع نَــاصر حواجبه وتلفت لـ أيه لـ رفعت يدها ليه ودارتله باي مكره فيه لين خلاته يهز في راسه بصبر عليها ورجع شبح لـ جوري وهوا يرجع يرسم في البسمه علي مبسمه وقال :شني مني بديتي تغاري ولا كيف هههه
جوري :هدا ماناقص ماهو
نَــاصر ضحك وهوا يغمزلها :خليك هني نمشي نجيب شيتات ونجي
جوري نفخت وهيا تقعمز وقالت بتكبر :لا تجيني لا نجيك واصلا البنت من امبكري تشبحلك برالها
نَــاصر جبد من قدامها شيت وقال :هدا ظمان انه نلقاك هني
وتلفت علي صيحتها :تي تعالا عندي فيه امتحان غدوه
نَــاصر مشي وخلاها تنفخ بغيط وتضرب في الطاوله بداها بعصبيه وهيا ترجع تتكي بضهرها علي الكرسي وترفع في عيونها في أيه لـ سارحه في المكان بـ بتسامه ، مش عارفتها ابتسامة بداية وصول لـ الحلم ، او ابتسامة فرحه انها واخيرا طلعت لدنيا وبدت تستكشف فيها من غير قيود او قوانين او عادات وتقليد ، حاسه روحها تحررت من قيود الماضي علي يدين السجان متعها ، غريب يكون سجانك هوا نفسه محررك ، تحسي للحظه تكرهيه وفي اللحظه لبعدها ممنونه ليه ، هكي شعورها اتجاه نَــاصر ، لـ اول مافكرت فيه ضحكت زي الغبيه وهيا تدكر في لقطه قبل شوي ، ورجعت شبحت لـ جوري لـ لحظه قبل ماتنخلع من الصوت المألوف لجاها منادي بـ اسمها :أيه
تلفتت أيه لـ اول ماشافت اسراء لواقفه قدامها بـ نفس التكبر نفس الملامح لتجيبلها في الاشمأزاز ، وقفت أيه بقرنة حواجب وهيا تشبح حولينها بضعف نفس الضعف الطفولي حينها ، ورجعت شبحتلها اول ماقالت اسراء :شني اديري هني هههه اكيد ماتقريش هني
خدت أيه نفسها وبتسمت :لا مانقراش هندسه نقرا قانون
اسراء :هههه اممم ماتوقعت ابدا يوم في الايام حـ نلقاك في جامعة طرابلس هههه شوفي الدنيا التافها
سكتت أيه للحظه وهيا تحس بـ تنمر لطالع من اسراء لمتغير فيها بكل ، برغم تغيرها هيا بس عجزت عن الرد علي جملتها لـ كان لو من حد غيرها كانت ردت ألذ الرد اللاسع ، بس معها اكتفت بـ النظر ليها نظرات ماطالتش لـ لحظات قبل ماتحس بـ يد شدت يدها خلتها تتلفت وهيا تشبح في نَــاصر لـ قرب منها وهوا يجبد في شنطتها وشيتاتها من علي الطاوله وقال قبل مايتلفت ومن غير مايشبح لـ اسراء : تافها زي تفاهتك
وجبد أيه بصمت عم عليها وكـ انها ماعندهاش السان وهيا اتبع فيه كيف قرب من جوري وهوا يلوح في الشيت قدامها ومشي وخلاها ترفع راسها بخلعه بس فيسع ماتحولت الخلعه لـ غصه وجعت قلبها وهيا تشبح في نَــاصر لـ شاد يد أيه بـ كل قوته وطالع بيها من الجامعه .
.
التنمــر شكـل من أشكـال الــظلم ، والــظلم ظُـلمات يـوم القيــامه .....
.
.
.
مـرات يـجـيـكـ شُـعـور أنـه الـدنـيـا نـفـس وروُح وجـسـم زيـنـا وحـقُـوده وخـبـِيـثـه وشـرِيـرَه زي بـعـض مـنّـا ، تـسـتـقـصـد فـيـكـ أحـيـانـاً وتـرمـي عـلـيـكـ هـمـومـهـا ومـشـاكـلـهـا فـي مـره وحـده وتـهـد حـيـلـكـ وطـيـحـكـ بَـاش تـرتـاح هـيـا 🥀
.
.
ضيق القَـاسي عيونه ورد :ومن لمبلغ عليه
جاه صوت محمد لـ وقف وهوا يشبح لـ الصقر لـ خاش والضحكه في مبسمه وقال :اعطيني مكان نلقاك ، انت الوحيد لتقدر تساعدني نمسك باتهم
القَـاسي رفع حاجبه بعدم فهم :وشن دخل بوهم
خش محمد لـ المقر وقال :تي ياالقَـاسي اعطيني مكان نلقاك فيه ونفهمك
القَـاسي بعد التليفون من علي ودنه وهوا يشوف من خش عليه انتظار ورجع رد علي محمد بعدم فهم :تمام تمام تو نبعتلك مكان استراحتي تجيني غادي
محمد بعد التليفون وهوا يشبح في رعد لخش عليه انتظار وخلاه يذكره :ازف نسيت ، اسمع نا ربع ساعه ونكلمك ندلك علي شقتي تعالا غادي احسن
القَـاسي:ميه ميه
وسكر محمد من القَـاسي لـ فتح علي لخش عليه انتظار :ايوه نسيم
نسيم :يامعلم لقو جمال مقتول بين المصانع الاماميه متع الشارع
خدي القَـاسي نفسه لـ شده لـ لحظات وهوا يحاول يستوعب كلمات نسيم لـ رجع وقال :والشرطه ماليه المكان خايفين اني والشباب يجو للمصانع متعنا لبضعه كلها قعده علي المكشوف ماعرفناش كيف نتصرفو
طلع القَـاسي نفسه :لا حولي ولا قوة الا بالله علي العظيم ، سكرو المصانع واختفو من غادي
نسيم : تمام يامعلم
سكر القَـاسي من نسيم وقعد واقف مكانه لـ لحظه وهوا حاس بالدنيا لـ لفت بيه بـ المشاكل لجت كلها مع بعضها ، تلفت علي صوت ريم :بالقاسم
مسح القَـاسي علي جبهته بـ قفا يده :مش توا ياريم مش توا
ريم :خيرك فيك حاجه
القَـاسي :بري جيبيلي مفاتيح السياره بسرعه
هزت ريم راسها وخشت تجري وخلاته يرفع في تليفونه لولا يشرين وهوا يشبح في رقمها ، بس سكر عليها وخلاها تحط في يداها علي وجها وهيا تسند في راسها علي الزيانه لـ لحظات هدوء قبل ماتخش عليها سما زي الإعصار وهيا تسكر في الباب :مش مصدقه اني بالحقا بالقاسم خطبك من بابا
تنهدت إينـاس ورفعت راسها لـ سما لـ اول ماشافتها دابله هدت من حماسها وهيا تحط في شنطة المدرسه علي الارض وتقعمز علي السرير :خيرك
رجعت إينـاس تنهدت بس هدي المره من كل قلبها وكـ انه كل الكليمات هربو منها وتجمعو في قلبها المضايق لـ يحاول يهداء من ضيقه بـ التنهيدات لـ الطلع فيهم بحيره كبيره ، حيره بين انها تفرح انه جي خطبها ، او تزعل لانها عارفه حـ تسببله مشكل مع امه ، حيره من تصروفاته لـ من ضمنهم انه جي خطبها ومن ضمنهم كلامه المتعصب متع امس وتسكيره الخط عليها توا .
.
.
.
حرك الصقر راسه بخفه لـ الحارس لـ فتح زنزانة السِـيفاو وفَـاتح لوقف وهوا يشبح لـ الصقر اللي خش عليهم بـ بتسامة نصر ووقف قدام باب الزنزانه اللي تسكرت وراه وهوا يشبح لـ السِـيفاو لـ مقعمز علي الارضيه ومتكي راسه علي الساس ومغمظ عيونه لـ مافتحمش حتي بعد ماخش الصقر لـ قال بضحكه :ماتعرفش قداش فرحااااااان بشوفتك هههههه
وضرب الصقر السِـيفاو بـ رجله علي رجليه لـ مادهم علي الارض وقال بـ تكبر:اوقف
ماباش السِـيفاو يدير اي ردت فعل لين خلا الصقر لـ شبح لـ فَـاتح لـ واقف متكي علي الحيط ورافع رجله ساندها علي الحيط وهوا يشبح لسِـيفاو لـ رجع شبحله الصقر لـ خف من بتسامته ويرجع يقول :شني متت من صدمة طيحتك
ورجع ضربه برجله علي رجليه وهدي المره فتح السِـيفاو عيونه وقال :عتره ومش طيحه
تعلت ضحكت الصقر لـ نزل وقعمز قدامه علي روس صوابع رجليه :هدي المره طيحه وطيحه قويه وحبل المشنقه اني لـ بلفه علي رقبتك ههههههه
ووقف بخفه وقال :اوقف يا.... واحترم اسيادك
ضحك السِـيفاو ضحكه خلت فَـاتح يبتسم وهوا يشبح لصقر لشبحله بـ قرنة حواجب خلت السِـيفاو يقول :تبيني نحترمك
وهز راسه وهوا يشبح لـ رجلين الصقر لـ قبل مايتكلم وبـ غفله منه جبده السِـيفاو من رجليه وطيحه علي الارض ونقز وقف قدام راسه وقال :الاسياد ماعندهمش اسياد ياجرد
وقف الصقر بـ صيحه وهوا بـ يهجم علي السِـيفاو بس شده فَـاتح من يديه لـ لفهم ورا ضهره وخلا الصقر يزيد من صياحه :ياكلاب اللي برا ياحرااااس
وقبل مالحارس يفتح الباب ضربه السِـيفاو بوكس علي فمه قبل مايخشو الحراس اللي شدوه من يديه وبعدو فَـاتح من علي الصقر لـ رد البوكس لـ السِـيفاو لـ ضحك ضحكه خلت الصقر يزيد من استفزازه وغضبه وصيح :ياكلاااب كان ماوريتكم انجوم جهنم ارفعوهم لشيلات بسرعه
طلعو الحراس السِـيفاو لجت عينه في عين محمـد لـ غمزله بضحكه وخلا السِـيفاو يضحك اكتر .
.
.
مُـجتمع تَعلـم أنْ ينظـر نظـرات الشَـكـ إتجــاه الأنثـي ، إن أخطأت يقْتصـو بهــا ، وإن أخطاء عليها أيضــاً يقْتصـو بهــا لكـونهـا أنثـي ويجب تحمـل أخطائها وخطاء من أخطاء عليها 💔
.
.
غمظت مـريم عيونها المنفوخه من لبكي وقالت :سامح خلاص
عيط سامح :مـريم ماتخلينيش نهبل عليك هيا اطلعي
فتحت مـريم عيونها المليانه دموع :وين بترفعني واني راجلي مانعرف علي مكانه وين
مسح سامح علي شعره وهوا يلف في مكانه بـ عصبيه بصمت لـ لحظه قبل مايشبحلها وصيح :ملوح في الحبس الله لا يرده
صيحت مـريم بدموع سالو علي خدودها :ساااامح اعرف شن تدوي
سكت سامح شوي برفعت حاجب وبعدها قال:كيف تبيني ندوي امالا نقولك ياناري ربي يفرج عليه ويطلع يكمل يسربي حشيش وحبوب ولا تبيني نطبطب عليك ونصبرك
وعلا صوته :تي هدو تجار مخدرات مستوعبه شن تجار مخدرات
مـريم :ومن اعطاني ليهم مش انتم بعتوني بـ الرخيص لـ أول واحد
هديء سامح شوي وقال :حني مابعناكش دوت الناس لكلتنا من اللي درتيه
رفعت مـريم حواجبها بصدمه واشرت علي روحها بيداها :من لدرته ؟؟
وضحكت من بين دموعها وصوتها تعلا :ايه عندكم الحق اني مه قلتلهم اخطفوني وجيبو عليا الدوه ايه صح
وسكتت للحظه بـ صوت بكاها لتعلا أكتر وهيا تحاوط في وجها بيداها تحاول تهداء باش تعرف تدوي ، وحولت يداها ورجعت شبحت لسامح وكملت كلامها من بين دموعها :انتم بعتوني بدل ما اطبطبو عليا هنتوني تقول اني لـ هربت مش مخطوفه ، بوك اللي المفروض ياخدني في حضنه ويداوي جروح انوثي لنجرحت زاد ضربني ضرب موت ، ماننساش ابدا لدرتوه فيا ابدا انتم لغصبتوني نتزوجه وله ، انتم لقلتولي أعصري علي جرحك ليم يامـريم وتحملي نتيجت افعالك ، وأي افعال الله وعلم ، تحملي يامـريم وتزوجي اللي يجي باش يستر علي عملتك يامـريم ، وعملت شن برضو الله وعلم
وشرقت بـ بكاها وهيا تشبح لـ سامح لـ قرب منها :سامحيني ماكنتش فاهم شي اسف يااختي
هزت مـريم راسها وقربت حضناته :عارفاتك كنت صغير مابيدك شي عتبي علي بوك لظلمني زي ماظلمونا الناس ، بس افهموني مانقدرش نسيب الراجل لوقف معاي وساندني مانقدرش بعد توبته لجت علي خاطري مانقدرش
حضنها سامح بتنهيده وهوا يطلع في تليفونه لشرين من جيبه ويشبح في بوه ليتصل بيه ويعاود ، بس رجع التليفون في جيبه من غير مايرد وحضن مـريم لـ تبكي بحرقه .
.
.
.
مسحت رنيم دموعها وهيا تاخد في طاسة لميه من هنيده لتنهدت وهيا تشبح لنور لقعمزت قدامها وشدت يدها :اهدي شوي انتي حامل مش باهي لـ العيل
هزت رنيم راسها وهيا ترجع تتصل بـ رعد لـ مايردش :مش مظمنه مش حـ نهداء لين يود عليا
نور :اكيد مش فاضي يجري علي حال خوته
رنيم :تي اما خوت كان يعوفو انه حتي هوا خوهم يشدوه ، ياوبي واللهي كيف تهنينا كيف قلنا يالله لك الحمد
هنيده طبست خدت رائد في حضنها لواقف جنب رنيم لتبكي وهوا مستغرب وخايف وطلعت بيه وطلعت الصغار وخلت نور لتكت بضهرها علي الكرسي وهيا تشبح لـ رنيم لـ رفعت عيونها فيها اول ماسمعت صوت رعد :ايوه
وقفت رنيم :خيوك ماتودش اه خويك تبي تقتلني
وقفت نور وطلعت وخلتها وهيا تسمع في رد رعد :انم يارنين من غير جو زايد قتلك ماتنشغليش عليا الامور ميه ميه
رنيم :باللهي عليك ماعاش تقولهالي ميه ميه هدي واني بنتفجو من الخوف عليك مش حـ نوتاح لين نشوفك قدامي
رعد نفخ :مانقدرش توا نجي لين نشوف وضع خوتي
زادت عبرت رنيم :رعد اني خايفه
رعد :حبيبتي انتي ردي بالك من روحك وعلي اللي في بطنك ورائد واني مافيا شي وبـ اذن الله مافيش حاجه تخوف وفي الليل تو نجيك تمام
رنيم :حتي انت ود بالك علي ووحك احني ولا شي من غيوك
رعد :حاضر هي توا لازم نسكر
رنيم :ماتشغليش كل مانتصل ود عليا
رعد :باهي وانتي عاد مش تشدي امها في جرتي
نفخت رنيم :باهي باهي
وسكرت منه وخلاته يطلع من المظبخ لـ القَـاسي ومحمد لـ تلفتو علي صوته :الحل يامحمد نبي الحل انم ولد الـ .... هوا وبوه الله يلعنهم اني مانقدرش نحبس روحي هني وخوتي الله وعلم بحالهم
القَـاسي :اصبر شوي لين نلقو مكان علاء علي الاقل
حدف رعد تليفونه علي الكنبه بـ عصبيه:الـ...... مايبيش حتي يرد علي شقفته وين بنلقى فيته
محمد قعد يشبح لتليفون رعد لـ لحظه وبعدها شبح لـ رعد :ماعندكش حل مغير الصبر هن يومين تحملهن وقعد في الشقه هنا لين نلقو طريق لباتك
تنهد رعد وقعمز علي الكنبه وحاوط راسه بـ يديه بـ هم :مش عارف كيف حول مكانه بسرعه هدي وكيف اصلا غدر بينا
ورفع راسه شبح لـ القَـاسي ولـ محمد وكمل :مش حني صغاره مش كبده علاش يبي يدمر حياتنا انم علاش
ورجع تنهد بـ وجع من نص قلبه ورجع بضهره اتكا علي الكنبه ورجع راسه التالي
شبحو محمد والقَـاسي لبعض بـ شعور بايخ علي حال الاخوه ، ورجعو شبحو لرعد لقرب منه القَـاسي وقعمز جنبه :ماتخافش اصلا مافيش قضيه متبته لا توا مالقوش ولا طرف حشيش صغير لا في حياشكم ولا في مصانعكم هدي ورقه رابحه ليكم
محمد :هن يومين كان مالقوش حاجه تتبت يطلعوهم برائه
رفع رعد راسه :وكان لقو
محمد :نحنا نخلوهم مايلقوش
تلفت القَـاسي لـ تليفون رعد لشرين واول ماقري اسم علاء قال :هدا علاء
تلفتله رعد وخدي منه التليفون بعصبيه وكان برد بس شد القَـاسي يده ومحمد قرب منه وهوا يقعمز قدامه وقال :هديء ورد بالك تستفزه وتخليه يسكر علي قد ماتقدر طول المكالمه
خدي رعد نفسه وهز راسه بـ معني تمام وخلا القَـاسي يحول يده من علي ايده لشاد بيها التليفون لفتح الخط وعيونه في محمد لـ وقف وهوا يفتح في تليفونه وكلم شخص:تعقبو مكانه رقمه #######091
ونزل التليفون وهوا يشبح لـ رعد لرد علي علاء :وينك
علاء :مقعمز فوق نتفرج عليكم هههههه
شد رعد علي قبضة يده :وتضحك انم تضحك علي عازتك ولا علي رجوليتك لضاعت
هداء علاء من ضحكته وقال بتسهويك :انت تدوي علي الرجوليه هههه وانت هارب زي الجبان من مكان لمكان زي الفار
رعد :يا.... اني ارجل منك يا.... كان ماعنديش عقل ونفكر كيف نطلع فَـاتح والسِـيفاو كنت مشيتلهم طول يا... وانت خليك كلب تتمرغد تحت رجلين بوك ال.... لبجيب اخرتك
علاء بعد التليفون من علي ودنه وهوا يشبح في الرقم لخش عليه انتظار ورجع رد علي رعد :وحتي اني قعد كلب تحته وفرحان اني كلب اصلا خير منكم علي الاقل يا.... عاقين بوكم ههههه هدا مصيركم الحبس ومش بعيد القتل تحت يدين الصقر هههه
وقف رعد وفصل وهوا يسب بالعياط عليه وخلاه يسكر الخط في وجهه وهوا يدفل علي التليفون :كمشه كلاب .....
وكيف بحط التليفون علي الطاوله رجع الرقم لخش عليه انتظار قبل شوي يتصل ، رد علاء طول من غير تفكير :ايوه من معاي
جاه صوته :معاي علاء
علاء :مني انت
بتسم بَـحر :جمال حوته عطاني رقمك قالي طلبي مانلقاشي الا عندك
رفع علاء حاجبه :موقف الفتره هدي شوف غيري
وقبل مايسكر علاء ، علا بَـحر صوته وقال بسرعه :بس نبي كميات كبيره ، والسعر لتبيه اني وجيبي حاضرين وماحد حـ يساعدني غيرك
سكت علاء وهوا يتكي بضره علي الكرسي وقال :اعطيني يومين وبعدين نتصل بيك نتلاقو باش نتفاهمو
بَـحر :تي مافيش وقد ياصحابي نبيهم مدبيا اليوم قبل غدوه واني قتلك الرقم لتحطه جيبي واتي قولي توا انت وين واني نجيك طول
شبح علاء حولينه لشقه وبعدها قال :تمام اني في ###
ضحك بَـحر :ميه ميه مش بعيد عليا بكل
علاء:تمام امالا رابع عماره الدور الاول نص ساعه وعندي خدمه مدبيك تسرع روحك
بَـحر وقف تاكسي وركب وهوا يرد علي علاء :خمس دقايق ونكون عندك هي
.
علن التليفون علي وصول رساله لفتحها محمد وهوا يقرا في محتواها في تواني قبل مايرفع عيونه لـ القَـاسي ورعد وقال :في عمارات الـ .....
ضرب رعد يده علي الكنبه :الكلب كيف ماعرفتش انه غادي
وقف القَـاسي :انت خليك
رعد :رجلي علي رجلكم اني بس لنقدر نطلع منه الدوه واصلا نعرف المكان وين زين
محمد تلفت خدي مفتاح السياره والسلاح لـ حطه في خصره :تمام هيا
.
.
تـحـدث لـنــا مـواقـف مـع أشـخـاص نـرد عـلـيـهـا بـ ردت فـعـل نـاتـجـه رُغـمـا عـن إرادتـنـا ، نـنـصـدم بـ ردت فـعـلـنـا لـ سـاعـات ، ونـنـجـرح لـ أيـام ، ثُـم نـتـقـبـله ونـتـنـاسـاه ، إلـي حـيـن فـقـدان ذاكـ الـشـخـص ويـرجـع لـنـا ذكـرا ذالـكـ الـمـواقـف ، حـيـنـهـا فـقـد ، سـ نـنـجـرح جـرح مـدمـوم ، وسـ نـنـدم نـدم قـاتـل مـسـمـوم ، ولـن نـتـقـبـل ولـن نـتـنـاسـا مـادُمـنـا أحـيـاء 🥀💔
.
.
رفعت بُـتول عيونها في باب الدار لنفتح عليها ولـ منذر لـ خاش بصفرة لفطور ، سكر الباب وراه وقرب حط الصفره علي الكمادينو وقعمز قدامها وشبحلها كيف مقعمزه وعيونها حمر من لبكي .
شد منذر يدها وقال :حاولت نفهم أمي انك ماتعرفيش عليه الشي هدا واني متأكد منك لو تعرفي ماكنتيش خديتي وعطيتي معاه
قعدت بُـتول تشبح لـ يده لشاد بيها ايدها وقالت من غير ماتشبحله :نعرف
رفع منذر حاجبه :شن تعرفي
رفعت بُـتول عيونها فيه :انه صبي مخدرات
رخي منذر يدها وغمظ عيونه ورجع فتهم وهوا يحاول يكدب مسمعه :تعرفي
هزت بُـتول راسها :ايه نعرف ونبيه مش هدي حياتي وهدا مستقبلي وهدي اختياراتي خلاص ماحد خصه فيا
وقف منذر بعصبيه :اما اختيار ومستقبل وحياة لتدوي عليها شن فيه عقلك انتي اه شن ميت فيه ، اما حياة لبتعيشيها مع واحد باني روحه بالفلوس لحرام قاتل ناس بسم الهاري واحد فضل طريق لعفن والوسخ والطريق الساهله علي انه يبني روحه علي الصح
بُـتول :ماتعرفش ظروفه انت باش تحكم عليه لو كان بـ يده ماكان باع مخدر واحد
صيح منذر لين خلع بهار لواقفه ورا الباب : وشن هيا الظروف لتخليه صبي مخدرات اه احكيلي شن هيا ياغبيه ياحماره ياللي ذرة عقل ماتكسابيه
وقفت بُـتول بصيحه منها ملت عيونها بدموع :انت الغبي والحمار وامك لتفكيرها زي تفكيرك السطحي
منذر :انتي السطحيه والتافها انم لهدرجه جاهله يكدبو عليك وتصدقي فيهم ، في شي اسمه عقل يميز بين الصح والغلط كانك تفكري صح راك فكرتي في مستقبلك لتحكي عليه وانك حره فيه ، كيف بتعيشي مع واحد متهدد في اي وقت يموت ينشد ينحبس ، وياريت تاجر انم انهار لحرف باش يكون عنده فلوس يهرب بره كان تهدد ، صبي زي الخادم زي النذل يتهان تحت كمشه كلاب
وأول ماكمل كلامه جاه كف من بُـتول من الروح لا روح صدمه وصدم بهار لشهقات بالقوه مع صوت بُـتول :انت الكلب من تحساب روحك باش تدوي عليه عقاب واحد زيك ، ماخصكش فيا ولا في قراراتي ولا حياتي وماتصدقش روحك انك خوي وبتسترجل عليا حط في راسك اني مش اختك اني شقيقتك من امك يعني لا تدخل فيا ولا تقربني
رفع منذر يده وتحسس بيها علي خده لضرباته عليه وضحك بهزوه وهوا يرفع في عيونه لدمعت في عيونها للحظات طويله شوي وبعدهم قال :اسف سامحيني ، ظنية روحي خوك ولازم نخاف عليك
وتلفت وهوا يشبح لبهار لتخطاها وطلع وخلا بُـتول اللي خدت نفسها وهيا تستوعب في اللي داراته تستوعب في روحها في كلامها لخلو وجع قلبها يزيد وهيا تشبح لبهار لكانت تبي تصيح عليها بس اول ماشافت دموع بُـتول لنزلو وخلوها تزمط في ريقها وهيا تقرب منها :بُـتول
زادو دموع بُـتول مع شهقاتها لتعلو:مـ مـاكنش قصدي
قربت بهار وحضنتها طول وخلت بُـتول تبادلها في الحضن من بين دموعها وشهقاتها العاليه .
.
.
يــاريت القَـانون يـزود بنوده بـ بـند " مُـعاقبة كُـل من سَــاهم فـي جعـل إنـسان مَـدني حُـر مجــرم "
.
.
جبد علاء من طرف لحشيش جبده قويه ونفخ دخانه علي طقة باب الشقه لخلاته يوقف وهوا يحط في طرف لحشيش في الطفايه من غير مايطفيه وقرب من الباب وقال :مني
بَـحر :اني لكلمتك قبل شوي
فتح علاء الباب بـ رفعت حاجب وبتسامه :تفضل
بتسم بَـحر وخش وهوا يشبح حولينه لـ الشقه الصغيره وجت عينه في طرف لحشيش الوالع وتلفت علي صوت علاء لقال وهوا يشبح لساعة يده :عندك عشر دقايق نتفاهمو فيهم علي الكميه والمبلغ عندي مشوار ضروري
هز بَـحر راسه ورجع تلفت وهوا يطبس ياخد في طرف لحشيش بين صوابعه وهوا يشبحله لـ لحظه قبل مايحطه بين شفايفه ويجبد منه ونفخ دخانه مع كحات التجربه الاولي لـ زادت بستغراب من علاء لضحك وهوا ياخد منه في طرف لحشيش ويحطه بين شفايفه وقال :شكله اول مره
مسح بَـحر علي صدره وهوا يحاول ياخد نفسه لـ راح بين كحاته وقعمز علي الكرسي وشبح لـ علاء لقال وهوا يطفي في لحشيش في الطفايه وخدي تليفونه لشرين :قداش الكميه لتبيها
مسح بَـحر علي خشمه وقال :نفسها لـ كان طالبها منك خوي
ضيق علاء عيونه وقال :خوك ؟ من هوا خوك ؟!
طلع بَـحر المسدس من خصره مع الكاتم لطلعه من جيبه وقال وهوا يركب في الكاتم تحت انظار علاء لـ رفع حواجبه وهوا يوخر التالي :خوي حاتم اللي عطيته خطه جهنميه
زمط علاء ريقه وطاح التليفون لشرين من بين يديه :حول السلاح من ايدك هدا مش لعبه واطلع من هني
وقف بَـحر بـ بتسامه ورفع يده لشاد بيها السلاح :بنسبه ليا هدا لعبه
علاء :شن تبي فلوس تبي مخدرات اللي تبيه نعطيك
خف بَـحر من ابتسامته وقال :نبي روحك
.
.
في قــانون تركيبتنـا ، الـشخص لـي مـش هــاضمينه وبنسبـه لينـا دمه تقيـل ، عــادي نشفقــو عليـه و نساعـدوه ، بـس ممنـوع نحبـوه 🚫
.
.
نفخت أيه وهيا تحول في اليرغان من علي وجها وتتلفت براسها لـ جني :خيرك شن تبي جايه تنفخيلي في راسي
رمشت جني برموشها بطفوليه وقالت :ماما دتلك تعالي تولي (ماما قالتلك تعالي كولي )
بتسمت أيه وجبدتها ليها وهيا تبوس فيها :ههههه تولي تولي هههه
تعلت ضحكات أيه وجني لوصلت لـ المظبخ لـ هنيده ونور لعيطت : أيه نوضي كولي حاجه
بعدت أيه من علي جني لخدت نفسها من الضحك ووقفت بـ مساعدت أيه لقالت :بري قوليلهم تغسل وجها وتجي
طلعت جني تجري من الدار وطلعت وراها أيه وهيا تتكسل في الممر بعيون مسكره واول مافتحتهم نخلعت من نَــاصر لطالع من الدار التانيه لخلاها تعيط وهيا تحط في يداها علي قلبها وتفتح في فمها بخوف من اللقطه لخلت نَــاصر يرفع في حاجبه وقال بتعويجة فم :يارسوله شن شفتي عزوز القايلة
تنهدت أيه وهيا تحط في يدها علي فمها أتاوبت وحولتها و شبحتله بهزت راس بعدت فيها خصلات شعرها لـ علي وجها :لا وانت الصادق شباني القايله
ضيق نَــاصر عيونه وقرب منها :حي عليك مصيرك بين يديا ره اعرفي كيف تتكلمي معاي
رفعت أيه حاجبها :ماتخلينيش ندير حاجه نندم عليها ندم عمري وتوصلني للإنتحار
وقف نَــاصر قدامها بتمام وقال :وشن هيا
أيه رفعت روحها علي روس صوابعها باش توصل لطوله وقالت وهيا تحط في عيونها في عيونه بقرنة حواجب :اريحك من الجميل لنفخت فيه راسي وننقبر في الحوش
ضحك نَــاصر عليها وبـ إعجاب خلا قلبه يدق ويخليه يتهور بدون وعي منه ويقرب بـ ميلة راس وباسها علي خدها وقال :مانخليكش اديري هكي اصلا
وبعد وهوا يشبحلها كيف عقدت حواجبها خفت بصدمه من قربه اللطيف زي بوسته لصدمتها وصدماته بعد ماستوعب علي روحه وهوا يتحمحم ويقرن في حواجبه وقال وهوا خاش بعضه ومتلخبط زي دوته اللي قلبها :مبرد وجهك و وجهي اصلك مش متع جمايل حولي من خليقتي حولي
وتخطاها ومشي وهوا يمسح علي لحيته بـ توتر وخلاها واقفه مكانها وهيا ترفع في يدها تحط فيها علي خدها وين ما باسها وتلفتت شبحتله كيف طلع من ممر الديار ورجعت شبحت قدامها وهيا اضم في شفايفها بـ بتسامه رتسمت عليهم .
.
.
.
خشو القَـاسي ومحمد للعماره وهما يتبعو في رعد ليعرف مكان الشقه لـ مشالها طول بغضب وعصبيه وهوا يبي يطق علي الباب بـ تقربيع بس اول ماطق اندف الباب لكان مفتوح لـ دفه بـ تقربيع وهوا يصيح :علاااء ياكلب يا... كـ...
وتبت في مكانه متجمد وهوا يحاول ياخد نفسه لـ غاب عليه من منظر علاء لـ متلوح علي الكرسي جثه هامده وعيونه مفتوحه تابته عن حركتهم والدم مالي وجهه من الرصاصه لـ بين عيونه .
ختل توازن رعد لـ شده القَـاسي لصدمته مافاقتش صدمت محمد لـ تلفت وهوا يحط في يده علي وجهه ويردد :ان لله وان اليه راجعون ، لا حولي ولا قوة الا بالله ، ان لله وان اليه راجعون
.
.
الـلّٰــهم حُـســـن الــخــاتيمه 🤲🏻
.
.
.
#يتبـع لـ البـــ2️⃣3️⃣ـــارت
#كتـــابـة_اليَــاقُــوت

________________________________
بداء كتابة الرواية في تاريخ 5 / مـــــــ5ٰــــــايـو / 2020
تم انهاء كتابة الرواية في تاريخ 12 / اكتـــ10ٰـــوبر / 2020