عشق في بلاد حروبها لا تنتهي 4 ( 2017 )

البــ التــاني ــارت

_
_
عِــشق فـي بِـلاد حُـروُبِهـــا لا تنتّٰــهي 4
{ 2017 }
.
في البارت السابق
الصقر:كلب من يومك ياخوان
القَـاسي أشر بـ صبعه بـ معني لا :لالا ياصحيبي الخونه مش من طبعي ومانبيع الا اللي ناوي يبيعني ، حطها في راسك ياحبي باش مانبيعكش زي مابعته ليك
الصقر:مش اني لنتهدد رد بالك ياالقَـاسي
القَـاسي:ههههههه ياحبوب انت ساعه بـ ساعه مره بصاره ومره تلقيحه مشي الامور ياصقر ماخاطريش نتعارك وربي قعد مش راقد من امس بنموت من النوم
الصقر هز راسه :ههههه والمشكله الواحد مايعرفك لا تبصر لا تلقح ، هي امالا نتلاقو
هز القَـاسي راسه وقعد واقف يشبحله بـ ضحكه لين ركب السياره وتلاشت الضحكه من مبسم القَــاسي لـ همس:نذل

قراءة ممتعة 💛
البــ التــاني ــارت
.
.
أصعــب شُعــور ، حِيـن تكتشف أن من يُسـاندكـ في محنتــكـ هوا نفسـه من سببهــا لكـ ❌
.
.
بَـحر :ناجي محمد الـ###
هزت البنت متع الرسبشن راسها :لا للاسف ماعندناش حاله بـ هدا الأسم
خدي بَـحر نفسه وهوا يتلفت يطلع من المستشفي وحاس الدنيا صغرة بيه .
طلع تليفونه لـ شرين من جيبه ورد :ايوه عمي
عمه :شني صار
بَـحر:ماصر شي وانتم
عمه:مافي مستشفي ولا عياده مالقيتها قدامي وماخشيتلها
تنهد بَـحر وبعد التليفون من علي ودنه وهوا يشبح في من خش عليه انتظار وبعدها رد علي عمه :الحمدالله مهم مش مداير حادت تو نتصل بـ جمعه نعرفهم بالك شادينه في مكان ولا محبوس
عمه :وحني تو نزيدو ندورو واتصل بـ حاتم وينه ماشفتاش
بَـحر :حتي هوا يدور ياعمي ، هي ماشي كان في شي جديد كلمني
عمه :تمام
سكر بَـحر من عمه وفتح الخط :ايوه (باسم)
باسم :ها شن لخبار بَـحر
بَـحر :لخبار عندك شني مالقيت شي عليه
باسم :لا والله شفت كل المساجين لشدينهم ليومين لفاتو مافيش حد بـ أسم بوك عندنا
بَـحر :وراس الغالي زيد شوف بالك في الشيلات ولا في مقر تاني
باسم:بـ أذن الله نزيد ندور واليوم ماشيين للمقر التاني نزيد نشوف
بَـحر:وكان تعرف جمعه يخدمو عند الصقر باللهي قلهم يشوفو غادي
باسم :تم تم ياصاحبي بـ أذن الله نلقوه
.
.
.
قعمز علي الدرجات وعيونه في تليفونه لـ شاشته معلنه عن أتصال ( أم العيال يتصل بك ) .
سكر نَــاصر الخط عليها ، وخش اتصل بـ رقم وحط التليفون في ودنه وهوا يراجي في الرد لجاه بعد لحظات :الو نَــاصر
نَــاصر :خلاص تمو انثايات ومالقيت الا (إسراء) ياكلب
خدي ( مُحسن ) نفسه بـ رهبه وقال :تي شن تقول ياراجل راني مش فاهم عليك
نَــاصر:انت فاهم عليا ياكلب هدا غير صاحبي وسميتك خوي ، تخوني وتبيعني علي خاطر نثايا
مُحسن: من لكاذب عليك عارفني مستحيل نديرها
نَــاصر : حتي اني قلت مستحيل اديرها ، لكن مستحيل عيوني يخدعوني زيك يا.....
حط محسن يده علي راسه بـ توثر وقال :وربي يانَــاصر فاهم غلط وكان تبي توا نجيك ونحلفلك علي المصحف
ضيق نَــاصر عيونه :ماتخافش ربك انت خليك راجل ياكلب خليك راجل وقولها
محسن :تي شن بنقول قتلك فاهم غلط غر خليني نحكيلك وانت احكم
هز نَــاصر راسه :اي اي بتحكيلي تعالالي تعالالي عند سامح ، وتعالا يامحسن بـ كرامتك ومتخلينيش نديرلك العار وانت عارف لما نحط حد في راسي شن نديرله
وسكر الخط في وجهه وهوا يقيم في راسه لـ باب العماره لـ نفتح وخش مؤيد لـ ضيق عيونه :خيرك مقعمز هني
وقف نَــاصر :ماخيرنيش ، اني طالع
مؤيد:وين
فتح نَــاصر باب العماره :دوره وجاي
.
.
.
نفخت جوري :يعطيك بكشه يابنية خالتي ياعطيك حسكه يا(ريهام)
رفعت ريهام كتافها :زلقت السان ماقصدي شي هيا نفسيه شكلها
تنهدت جوري وناضت لحقت إيناس وريم لشدتها علي الباب :امسحيها في وجهي بالله ريهام ديما هكي السانها متبري منها
هزت إينـاس راسها :لا عادي ولا تهمني اصلا
قربت منهم جوري :كدابه كان ماهماتكش علاش نايضه تي زودي فرحانه بـ كيكتي مدايرتها بـ قلب
ضحكت إينـاس :ههههه باهي غر ارد علي تليفوني
ريم :بسرعه ها
هزت إينـاس راسها وتلفتت خشت لـ المطبخ وردت علي تليفونها :انعم ياسما شن تبي
سما:خزي هكي الناس ترد علي التليفون
إينـاس: تكلمي قبل مانسكر الخط بسرعه
نفخت سما :حبيبتي انوسه اختي روحي مش فاهمه الرياضيات هدا وغدوه عندي امتحان بالله عليك تعالي قريني كلمتين بنموت خلاص منه
إينـاس :حبيبتي نصححلك معلوماتك اني مش حفيدت الخوارزمي ره ويادوبي دافيني من لعدادي بشهاده مقبول لمقايلك عبقريه غالط فيا ره
ضحكت سما :ههههه بلا جو لأنو حبي عارفاتك عبقريه في الرياضيات
نفخت إينـاس:اقلبي وجهك شوي ونجيك وانتي حصله
وقبل ما سما تزيد تتكلم سكرت عليها الخط وتلفتت لـ ام القَـاسي ( سعاد)  وبتسمت:هاتيي منك
وقربت إينـاس منها خدت صفرت الشاهي و حطتها علي الرخامه ورجعت شبحت لـ سعاد لقالت :خيرك قعده بروحك هني خشي جنب لبنات
إينـاس نساعدك في غسل لماعين وبعدين نمشي
هزت سعاد راسها :لالا واللـ.....
قصت عليها إينـاس:والله لما نغسلهم هي انتي بري رتاحي ومش هلبا هما اصلا
سعاد:وانتي حشيشتك تحلفي طول
ضحكت إينـاس وتلفتت بدت تغسل في الماعين وهيا مبتسمه وعيونها في تليفونها اللي حاطاته علي الطاوله مره مره تتلفت تشوف في الساعه لين سرحت وقعدت منتبها في الماعين ومانتبهت علي باب الحوش اللي انفتح وخش القَـاسي اللي خشش بضعه وشكاير للمظبخ خلوها تستاقض بـ روحها وتتلفت تشبحله كيف قعد واقف تابت يشبحلها ويشبح لـ شعرها القسطلي لرابطاته فوق ، ومالحظش علي روحه الا لما شهقت وحطت يداها علي شعرها .
نزل القَـاسي عيونه بـ بتسامه :مافيش باس عادي زي وخيتي هههه
وطلع من المظبخ وخلاها تنزل في يداها من علي شعرها وتنهدت بـ بتسامة هزوه علي روحها :زي وخيته
ورجعت تلفتت سكرت الشيشمه لميه وخدت تليفونها وكيف بتطلع من المظبخ شافاته واقف في الممر علي جوري وريهام لشاد يدها ويبصر عليها وهيا تضحك .
قعدت تشبحله لـ لحظه ، لحظه زادت اقنعتها وأتبتتلها انه انظره ليه اكبر شي مسموحلها ، نزلت عيونها لدمعت ومشت لصاله .
.
.
شَعــلة نــار الغــدره من صديـق خـوان ، فاقــة خيـانـه مـن عطيتهــا قـلبي 💔
.
.
طلع صوتها المليه العبره بـ خنقه :والله والله فاهم غلط يانَــاصر واللهي مافي حاجه بيني وبينه
نزل نَــاصر من السياره وسكر الباب وهوا يشبح لـ سامح لنزل وهوا يتكلم في التليفون .
اتكي بـ ظهره علي السياره وهوا يسمع في كلامها لـ كملاته من بين شهقاتها :نَــاصر وينك نَــاصر باللهي عليك ماتقعدش ساكت ماتظلمنيش
نَــاصر :ياريتك حتي درتيلي قدر وماخنتينيش مع رفيق عمري
إسراء:نَــاصر اني ماخنتكش اني مش ......
واول ما نَــاصر سمع كلمتها لـ برغم توصفها بس ماتحمل يسمعها طالعه من فمها سكر الخط في وجها وتلفت بـ عصبيه حدف التليفون من الروشن السياره ورفع يده بـ يضرب مرش السياره بس شبح مُحسن اللي درس السياره ونزل وهوا شاد شي في يده .
لفله ناصر وقرب منه وهوا يتخطا في سامح لقال :شوي يانَــاصر خلينا نفهمو قبل
نَــاصر وقف قبال محسن اللي زمط ريقه وقال :وربي مافي حاجه بيني وبينها واهو جايب القرأن وحـ نحلفلك عليه
سامح :تي شن تحلف تحساب الحلف علي القرآن ساهل
نزل نَــاصر عيونه لـ القرآن ، بعد خطوه لـ الورا وحول جيبوطيه وشده بين يديه وقال :حطه
ضيق محسن عيونه وشبح لـ يدين نَــاصر لمادهم قدامه وفوقهم الجيبوطي بـ عدم فهم بس رجع نَــاصر صيح :حطه قتلك
حط محسن القرآن بين يدين نَــاصر اللي لف الجيبوطي علي القرآن وتلفت حطه فوق السياره ورجع تلفت لـ محسن لقال:من لكاذب عليكم نبي نفهم بس تي ياسامح انت تعرفني مستحيل نديرها
سامح :ماحد كادب علينا شبحناك بعيونا يامحسن ماعاش تنكر وتصغر في روحك قدامنا
خدي محسن نفسه :كيف شبحتوني انتم اكيد فاهمين غلط
نــاصر :من لما جيت لـ طرابلس وانت معاي عتبرتك اخ قبل ماتكون صاحب
نزل سامح راسه وبعد اتكي علي السياره ورجع رفع راسه وشبح لـ نَــاصر لـ زاد قرب من محسن لنزل راسه وهوا يسمع في كلام نَــاصر :علاش مافيش غيرها ، ربي مامكتر غير انتايات علاش ياصاحبي اه ، علاش تخلي فيا نقطع علاقتي بيك علي خاطر نثايه علاش تخلي فيا نغلط معاك علي خاطر نثايا
محسن :غلطه وربي غلطه
نَــاصر :غلطك كبيره ، تي ياريتك جيتني وربي هي وربي يامحسن كان جيتني وقتلي نبيها وتبيني وربي لما نسيبها ، مدام سترخسة حبي وفضلاتك عليا وكان روحي فيها نخليهالك وماتغلا عليك وتقعد صاحبي وخوي علاش درتها بـ الخونه
محسن زمط ريقه بـ توثر اكبر من خوفه ومن كلام نَــاصر لخلا قلبه ينقبض وقال :غرتني ياصاحبي
نَــاصر :عمره الراجل ماتغره النثايا العيل بس ينغر عملتك عمرها ماتجي من راجل تشوف في صاحبك دايب فيها سنه نجري وراها وانت شاهد عليا وكنت معاي كل يوم نحكيلك عليها نقولك ناويها حلالي متمنيها يامحسن في الاخير تنسي كلامي وتستغفلني
وغمظ عيونه وخدي نفسه وبعد خطوه :مانمدش ايدي علي ذكر علي خاطر نثايه لكن اندمك علي خونتك ليا
وتلفت لـ سامح ومد يده :هات تليفونك
ضيق سامح عيونه :شني
نَــاصر :هاته
طلع سامح تليفونه وفتحه ومده لـ نَــاصر بـ عدم فهم وهوا يشبحله كيف رجع تلفت لـ محسن اللي يشبح بـ عدم فهم اللي تحول لـ رعب وعيطه اول ماشاف نَــاصر طلع السلاح من خصره وهوا يصوب فيه عليه وفي يده التانيه التليفون  مفتوح علي الكاميره وقال :ارمي حوايجك
سامح قرب بـ صيحه :تي شن ادير ياراجل نزل سلاحك بلا لعب فروخ نزله
محسن عيط :تي كلمه خيره قوله ينزل السلاح قوله
صيح نَــاصر :ترمي ولا رصاصه بين عيونك
سامح زاد قرب وكان بشد يده لـ فيها السلاح بس نَــاصر خطي يده وضرب رصاصه تحت رجلين محسن لـ عيط بـ خوف مع عيطت نَــاصر :مانبيش نعاود كلامي الف مره
صيح سامح وهوا شاد راسه بـ يديه :ارمي ياعنشكلك ارمي قبل مايرتكب فيك جريمه
زمط محسن ريقه بـ دقات قلب مسموعه من الرعب وهوا يحول في جيبوطيه وفي حوايجه بـ شوي شوي تحت نظرات نَــاصر والتليفون لـ يصور فيه .
.
.
.
نزل راسه وشده بين يديه وقال بـ تنهيده :ماخليت مقر ياعمي مادورت فيها
طبطب عمه علي كتفه وهوا يتلفت لـ جميله لـ جتهم :حاتم امبكري قال يدور في الكتيبات بالك القاه غادي محبوس اتصلو بيه
رفع بَـحر راسه :كنت معاه مالقينا شي يمه
عمه تلفت لـ ولده (مُهيب) : نوض جيب السياره هيا بالك ليل
مهيب :مصطفي مشي يجيب فيها
رجع بوه ( فوزي ) شبح لـ بَـحر :توا ماعاش عندنا مانديرو سجلنا اسمه في مراكز الشرطه كان لقوه يتصلو وصباح رباح نولو اندور عليه
جميله خبطت علي رجلاها :زعمه وينه هـ الراجل وينه
فوزي وقف :ان شاءالله خير وخلاص
وقف بَـحر مع عمه وولد عمه ووصلهم لا برا ، وقعد واقف وهوا يطلع في تليفونه لـ شرين واول ماشاف الرقم الغريب لـ ليه اسبوع يتصل بيه ، ضيق عيونه ورد بـ أعصاب:وراسكم بطلو تسهويك ياردو علي امي يااخطوني
وقبل مايسكر التليفون جاه صوتها :أني اسفه
زاد ضيق بَـحر عيونه ورجع التليفون لـ ودنه :مني
سمع تنهيدتها ولـ صوتها :اممم اني ، (إلهَــام)
بَـحر :غالطه وخيتي ره
إلهَــام :لا مش غالطه انت خو (نجوي) مرت خوي صح
سكت بَـحر وهوا مش فاهم وقبل مايتكلم خش عليه حاتم انتظار ، واول ماشاف رقمه قال :سكري سكري تو نعاودلك
وماعطاهاش فرصه حتي تتكلم وسكر الخط في وجها ورد علي حاتم :وينك
حاتم :قعد اندور
بَـحر :روح خلاص سجلنا اسمه في كدا مركز شرطه ونعرف وليد يخدم في القضائيه قعد يدور عليه في الشيلات وبشوف كان عند الصقر
حاتم :باهي مليح بكل ، اني بايت برا بنقعد ندور
بَـحر مسح علي وجهه وهوا مش قادر يناقش ولا يزيد الدوه وقال :تمام تمام دير لتبيه
وسكر منه وهوا يشبح لـ رقم البنت اللي مش فاهم سبب اتصالها ، وقبل مـايرجع يتصل بيها جاه صوت اخته نجوي :بَـحر خش باللهي عليك كول مع امك فمين قعده من غير ماكله وبنضربلها يبرت السكر مش قادره
نفخ بَـحر :باهي جاي هي
.
.
.
حطت بُـتول راسها علي لمخده وقامت الورقه قدام وجها وهيا تشبح لـ الرقم لـ لحظات بـ بتسامه قبل ماتتلفت تاخد تليفونها من علي الكمادينو بـ تنهيده :ااااه خلينا نشوفو اميتك الي أين تصب ههههه
انفتح عليها الباب اللي خلاها تنزل التليفون والورقه لوطه وهيا تشبح لـ حناها (امباركه ) :تعالي كولي يابنتي حاجه
هزت بُـتول راسها :لالا والله ماخاطري كولو انتم اني بنرقد غدوه عندي جامعه
امباركه :تبي نخليلك
بُـتول :لالا كولو صحتين
بتسمت امباركه :علي راحتك يابنيتي
وقبل ماتسكر الباب رجعت فتحاته لين خلت بُـتول اضيق عيونها :خيرك ماما
امباركه:امك ماتصلتش بيك
هزت بُـتول راسها :لالا علاش
امباركه :قالت غدوه بتجي تاخدك تبيك تقعدي عندها يومين
ناضت بُـتول قعمزت زين :علاش ان شاءالله شن خاطرها واحد من مفرخها اللي مش مربيتهم يموت ولا كيف
امباركه :عيب يابُـتول عليك هدم خوتك
بُـتول :لا خوتي لا ودان تره فكيني ياماما تعرفونا اني وياهم مانتعاشروش علاش تكبر في راسها ، قوليلها بُـتول ماتبيش تمشي معاك ، ومرتاحه هني ماخطري لا في صغارها لا في راجلها
تنهدت امباركه :غدوه تجي وتفاهمي انتي وياها مانخشش في مخاشيشكم اني
وسكرت الباب وخلت بُـتول اللي ضربت يداها علي السرير بـ غل وهيا تنفخ .
ورجعت شبحت لـ تليفونها ولـ الرقم اللي خداته مع التليفون وسجلاته وهيا تاخد في نفسها وطلع فيه واتصلت .....
.
.
.
طلع فَـاتح تليفونه لـ شرين من جيبه وقال :اني رعد) طلعوني من مخشيشه مايتفاهم مع حد وبدات معاي
علاء :خلوه عليا
وقف السِـيفاو :لا عليك ولا عليه خلاص اخطوه
رفع علاء حواجبه وتلفت لـ فَـاتح لـ ضيق عيونه :كيف يعني بتخليه دايح بعيد علينا وانت عارف الصقر قعد حاطنا في راسه ، تي كان يلقاه يدير فيه لـ مقدر يديره في ( رائد) الله يرحمه
السِـيفاو :لالا وراه ناس ماحد يقدر يمسه ، خلوه علي راحته وماتخلوشي يزيد يكرهنا ياسر مادرنا في رائد ومن ورا عمايلنا قتلوه مانبوش نخسرو حتي رعد
فَـاتح ضحك :ههههه باه وحني هههه شني حني صبيان عندك وعند بوك بنقعدو طول عمرنا غر ارفع حشيش جيب حبوب هات تريمادول نبو روج فيه طلبيه يافاتح برا ياعلاء جيب ، شني مني حتي حني عندنا حياة ياسِـيفاو مش رعد بس
ضرب السِـيفاو الكرسي لـ كان مقعمز عليه بـ رجله وقال :برا برا من شادك برو اني ماعاد شاد حد
وتلفت طلع وخلا فَـاتح لتلفت خبط يده في الحيط بـ عصبيه.
علاء:خيرك ياراجل انقلبت عليك ، من امتي مضايق من خدمتنا
فَـاتح تلفتله :مش مضايق لكن نبي ندير حد ، عيت خلاص ، رعد عنده حق لا امتي بنقعدو هكي في لحرام غارقين لا روسنا
علاء هز راسه :وين كلامك انت وسي رعد لما تنغنغتو بـ الفلوس لحرام لـ واحد تزوج بيهم وانت قعد تصيع بيهم
فَـاتح صيح :صعنا كلنا صعنا بيهم لكن في حاجه اسمها حياة في حاجه اسمها ياسر خلاص تعبنا فدينا
وتلفت طلع وهوا يخبط في باب المستودع بـ غل مع تشرين تليفونه لـ رجع تعلا وخلاه يفتح الخط من غير مايشوف من ورد بـ صياح :ها شن تبو
نخلعت بُـتول اللي سكرت الخط طول وخلاته يضيق عيونه وهوا يبعد في التليفون ويشبح لـ الرقم لـ لحظه وبعدها رجع اتصل وهوا يقرب من سيارته لفتحها وقعمز وهوا يراجي في الرد اللي جاه في اخر لحظات المكالمه ..
قعد فَـاتح ساكت لـ فتره وبعدها قال :شني ماتبوش تتكلمو ولا شني
تحمحمت بُـتول وقالت :شن تعطي في رقمك وبعدها تصيح وتعيط
ضيق فَـاتح عيونه :مني
بُـتول نفخت :شكله لحمار عاطيني رقم غلط
بتسم فَـاتح :وانتي حماره ولا فاضيه تاخدي في ارقام الشباب
ضيقت بُـتول عيونها :وانت شن خصك ، خلاص غالطين ياخونا تصبح علي خير
صيح فَـاتح :تي تعالي جاي شن تحسابي دخول الحمام زي خروجه
بُـتول :بـ العكس خروجه اسهل من دخوله تبيني نوريك كيف
ضحك فاتح :ههههه لا شكرا ، شني اسمك يامتعصبه انتي
بُـتول :ياربي كلكم هكي لحمار لـ عاطيني رقمه يبي يتعرف وتوا انت تبي تتعرف وهداكا يبي يتعرف وكلكم تبو تتعرفو ولما توصل للجديات بوم اسف انتي تستاهلي خير مني
فَـاتح :غر بشويه شن اني قتلك نبي علاقه ولا نحبك واني مانندريش عادي سألتك علي اسمك بس وانتي جبتيلي اسطوانه هك كبريتها بلاش ماعاش نبي نعرفه خلينا علي أبله متعصبه
سكتت بُـتول بـ خجل لين جاها صوت فَـااتح لـ رجع قال :وين مشيتي ابلة متعصبه
بُـتول:قبل شوي قصفتني قصف تلاتي لبعاد شن تبيني نقول يعني
ضحك فاتح عليها وهوا حاس بـ خجلها اللي خلاها شاده فمها تحاول تمنع ضحكتها لـ زارتها .
.
.
.
طلعت مـريم من باب الشقه وهيا تشبح لـ السِـيفاو لراكب قبلها ومانتبهش علي طلعتها من حوشهم .
تلفتت مـريم وهيا ترسم في بتسامه علي مبسمها :خلاص حنون خشي تو نركب بروحي مش حـ تجيني الغوله يعني هههه
ضحكت (حنين):تمام ههههه اصلا صقع هلبا
مـريم :ههه تمام تصبحي علي خير
حنين :وانتي من اهله
خشت حنين وخلت مـريم لـ ركبت وهيا اطلع في مفاتيح الحوش من جيبها بس تلفتت فوق وشبحت لـ السِـيفاو لمكمل وراكب فوق ، ضيقت عيونها وقعدت تشبحله لين ختفي عن نظرها .
ضيقت مـريم عيونها :وين راكب هدا
ونفخت وهيا تهز في راسها وتقرب من باب شقتهم :وشن خصني فيه اني
وركبت المفتح لقعدت شاداته لـ لحظه وهيا تفكر ، وبعدها رجعت نفخت :اووف مني اوووف
ورجعت سحبت المفتاح وتلفتت ركبت وراه وهيا تميل في راسها وتشبح الفوق وهيا تسمع في صوت باب ، لعرفاته انه صوت باب السطح ، كملت ركوب لين وصلت لـ السطح .
قربت وقفت قدام الباب اللي اول ماوقفت قدامه جتها نسمه مسقعه خلتها تتكمش في بعضها وهيا تزيد تميل في راسها وتشبح لـ السِـيفاو اللي كان واقف علي حاشيه السور وهوا يولع في السبسي لـ بين شفايفه ويشبح لـ المسافه اللي تهز القلب من علوها .
زمطت مريم ريقها وزادت قربت بـ صمت وعيونها فيه .
جبد السِـيفاو من الدخان لـ بين صوابعه ونفخه بـ تنهيده طلعت من وسط قلبه قبل مايقعمز علي الحاشيه وعيونه قعدت لوطه يشبحو في الناس لـ قعدين يتحاوسو ، وماحس بـ خطوات مـريم اللي قربت منه بـ صمت وهيا لافه يداها علي روحها بسبب السقع لـ يجمد وهيا  تشبحله كيف يدخن بـ هدوء ويشبح لوطه وماركزش فيها الا لما كحت .
تلفت السِـيفاو طول واول ماشبحها ضيق عيونه وهوا يلوح في الدخان ويتلفت ينزل من علي الحاشيه :شن فيك خيرك
رفعت مـريم كتافها ونزلت يداها وقالت وهيا تحاول تتحكم في سنونها ماينسكو علي بعض من السقع :شي مـ ـا مـ ـافيا شي بنشم هواء
وتخطاته قربت شدت في حاشيه السور ورفعت روحها علي صوابع رجلها وهيا تشبح لـ المسافه لـ خلتها ترجع تنزل توقف زين من العلو لـ خلاها تزمط ريقها بـ خوف وهيا تتلفت تشبح لـ السِـيفاو لـ جي وقف جنبها وقال :عالي هلبا وله
شدت مريم علي سنونها اكتر وهيا تحاول ماديرش صوت وماردتش علي السِـيفاو اللي كمل :خوتي رعد ورائد كان هدا مكانهم ، ومايقعمزوش الا علي الحاشيه
وبتسم بـ خفه وكمل :مره لما كانو صغيرين كانو مقعمزين مع بعضهم وهما يتنابشو ورعد من دون قصد دف رائد بس طول شده من يده وقعد يعيط ينادي فينا ، ههههه ماننساهاش وهوا بين الحياة والموت يشبح لـ رعد ويقوله كان ماتبيش تمشي معاي غدوه لـ المدرسه اطلق يدي
وضحك بـ دموع ملو عيونه :ورعد يصيح يقوله لالالا نمشي معاك نمشي
وتلفت لـ مـريم اللي رفعت حواجبها اول ماشافت دموعه معبين عيونه وهوا يكمل في كلامه :روحهم كانت في بعض كلنا كانت روحنا في رائد ، هما صغاري مش خوتي اني لربيتهم وكبرتهم ، كنت شاهد علي كل حياتهم نعرف اصغر واكبر تفصيل عليهم ، ولما مات حسيت بـ ولدي مات قلبي انجرح علي فراقه يامـريم ، ماتقدريش تلوميني وقتها ماتقدريش تلوميني علي خطفك كنت مانشبح في حد ومانستوعب في شي الا في خوي انه بين يدين اكبر عدو ليا وممكن يديرله اي شي
نزلو دموع مـريم :باهي واني شن دنبي
قرب السِـيفاو منها ورفع يده بـ تردد لـ وجها ومسحلها دمعتها :ذنبك كنتي تعرفيه ، لما خطفتك كنت نبي نساوم خوي بيك نحسابه خطيبك وربي نحسابه خاطبك قلت اكيد عرضه وشرفه مش حـ يرخي بيك بس طلع نذل خلاني نغلط معاك وخسرني خوي
ونزل بـ طوله علي طولها وقال :خوي مات واني غالط في حقه هلبا مات قبل مانصلح أغلاطي معاه ، وانتي مش راضيه تعطيني الفرصه نصلح اغلاطي معاك ، خليتيني واحل وضميري كل يوم يقتل فيا يامـريم كل يوم
قعدت مريم تشبحله ، تشبح لـ عيونه لـ مبين فيهم جرح ، وألم ، وذنب ، بس مش عارفه من شن ، مش عارفه ذنبه كبير ، لدرجه مش حـ تتخيلا .......
.
.
.
#يتبـع لـ البـــ3️⃣ـــارت
#كتـــابـة_اليَــاقُــوت

________________________________
بداء كتابة الرواية في تاريخ 5 / مـــــــ5ٰــــــايـو / 2020
تم انهاء كتابة الرواية في تاريخ 12 / اكتـــ10ٰـــوبر / 2020