عشق في بلاد حروبها لا تنتهي 4 ( 2017 )

البــ الـــواحـد والعـــشريــن ــارت

_
_
عِــشق فـي بِـلاد حُـروُبِهـــا لا تنتّٰــهي 4
  { 2017 }
.
.
في البارت السابق
ساجده حست بـ غصه في صدرها وقالت :اممم يعني حتي انت تخدم معاهم
سامح :حاجه زي هكي
ساجده :اه اني لازم نسكر
سامح :خيرك خفتي ، ولا خفتي علي خاطر نخدم مع خوتك
ساجده :لالا بنسكر اني
سامح :غر ستني خيرك شن فيه
ساجده :ياسر الخوف لعايشه فيه مانبيش نكلم واحد متع مخدرات ياسر التجار لعايشه معاهم نستأذنك
وسكرت الخط في وجهه وخلاته وجهه احمر اصفر اخضر وهوا يرفع فيه لـ معاذ لقال :شني قتلك
خدي سامح نفسه :طلعو تجار حق طلعنا عاطين اختي لمنبع مخدرات

قراءة ممتعة 💛
البــ الواحد العـــشريــن ــارت
.
.
.
تلفتت آيه لـ نَــاصر لـ ركب وهوا يمدلها في الصور لطلعت وشافتهم:محلاني ههههه
ولع نَــاصر السياره وهوا يشبحلها علي الجنب :رايحه زي خالتي مش هيا
آيه:اني عاجبتني روحي
تحرك نَــاصر بالسياره وهوا يرفع في تليفونه لشرين واول ماشاف رقم جوري بتسم وفتح الخط مع عيطه من آيه:تي اشبح قدامك مزال نبي نعيش ره
نَــاصر شبحلها بتفنيصه بمعني اسكتي خلتها اتمتم بصوت مسموع :ياي وكان سمعت صوتي بتنخدش يعني اوووف
وشبحت قدامها وخلت نَــاصر يرد علي جوري :الو
جوري :اممم شكلك مش فاضي
نَــاصر :نوعا ما تو بعدين نتصل بيك غر توا رافع عبسي صاحبي بصور
شهقت آيه وتلفتتله وهيا اضيق في عيونها وقالت :اني عبسي اني
ضربها نَــاصر علي فمها بشويه خلتها تعيط تقول ضربها بطوبو الغاز :ياحقير ماعاش تضرب
نَــاصر :هي سلام توا بعدين نكلمك
وسكر من جوري وهوا يدرس في السياره بالقوه لين آيه خافت وهيا ترخي في روحها ومن تشنج ملامحها المتعصبه لولت خايفه اول ماصيح عليها نَــاصر :خير امك انتي
آيه شبحت قدامها وتكت بضهرها علي الكرسي بهدوء وهيا تشبك في يداها في بعض ونزلت راسها لوطه وقالت :خلاص سكتت
تلفت نَــاصر قدامه وتحرك بالسياره بعصبيه وبسرعه خلت آيه تشد في راسها بداها وقلبها قريب يطلع من خوف ان السياره تنقلب بيهم .
.
.
ولـ اللّٰـــه دعــوت ، إنْ كُــنت خيــراً لـي فـ اليُــقربكـ منـي ، وإنْ كُــنت شــراً فـ اليجعــلكـ خيــراً لـي 💛🍃
.
.
فــــي الليــل ...
ردت بُـتول باب البلكونه عليها وهيا تقعمز وتحط علي رقمه لـ تصلت بيه وحطت التليفون علي ودنها تراجي في رده لـ جاها :اهلين بنور العين
بتسمت بُـتول :اهلين بيك يانور العين هههه
فَـاتح :كـ أنك موليه حلوه زياده علي اللزوم
بُـتول :هههه شوفتك تبارك الله عيني ماظرك ماتعاني من شي قلت خل نجيبلك السكر من حلاوتي باش يكسر عليك العين
ضحك فَـاتح :ههههه تي انتي جبتيلي السكر والضغط وضربتي قلبي بجلطه
بُـتول :اوووف جلطه مره وحده ههههه
فَـاتح :وجلطة حب فوقها
حطت بُـتول يداها علي خدها بخجل وهيا تضحك :ههههه ياروحي عليك ربي يشفيك ان شاءالله
فَـاتح :هههه الشفي عندك
بُـتول :اممم زعما
فَـاتح :اكيد مش زعما تعاليلي باش نشفي
بُـتول :انت تعالا خودني اني راني مش امانعه ابدا
فَـاتح :ههههه حاضر يانور عيوني ونجو ناخدوك
تلفتت بُـتول لـ منذر لـ شاد تليفونه وهوا واقف ورا باب البلكونه :اممم خوي جاي توا
فَـاتح :تمام خلاص تصبحي علي خير
بُـتول :وانت من اهله
سكرت بُـتول من فَـاتح وهيا تتحمحم :احم احم ياللي خلف الباب
دف منذر الباب وماحولش عيونه من التليفون وهوا يقرب يقعمز علي الكرسي اقبالها لين خلا بُـتول ترفع حاجبها :نهار ابيض انت من قبل نص عقلك هالله هالله وهـ سما زادت تلفت باقيه
سكر منذر التليفون وحطه علي الطاوله بضحكه :هدي مش سما
رفعت بُـتول حاجبها :انت ماتتحشمش ونسونجي
منذر :هههه ماتملا عيني بنت وحده الله غالب
بُـتول :ياناري علاش تعشم فيها ياكلب وانت تكلم في غيرها
منذر :تي تحسبيني مسنجر امالا تي مافيش غيرها واصلا هيا ماكلمتني لين شيطت الريق اكيد مش حـ نكلم غيرها لين نشيطلها ريقها زي مادارت فيا
بُـتول :ياحيوان صاحبة اختك راهي تو ادير مشاكل بينهم
منذر :اوووف بُـتول ماتفسديش عليا فرحتي زي امك
بُـتول :فرحت شني
مندر بتسم وهوا يتكي بضهره علي الكرسي وقام رجليه علي الطاوله :بنحط اوراقيه في الكليه العسكريه مع جمعة الـ 2000 ولا الـ 2001 ولقيت واحد يساعدني
بتسمت بُـتول :ياروحي بتولي عسكري
نفخ منذر صدره وطبطب علي قلبه بيده :ملازم تاني ان شاءالله
ضحكت بُـتول :ربي يكمل عليك فرحتك بس خيرها امي
مندر :ماتبينيش نخش ودارتلي مناحه امبكري غر ان شاءالله ماتعبيش راس بوي واااك كان هدا وربي لما نهج من الحوش ونخليهالها واسعه
بُـتول ضحكت :ههههه هججني معاك باللهي عليك
منذر :ههههه وعريس غدوه من بيستقبله
حطت بُـتول يداها علي خدودها :نسيت هههه
بتسم منذر :طلع راجل ، ان شاءالله ربي يهنيك ياوخيتي
قربت بُـتول بكرساها ليه ولفت يداها عليه وحضناته :نقولك حاجه ماتقعدش شادها وراي
منذر :ههههه شني
بُـتول :نحبك
ضحك مندر :حي حي هههههه زودولي وداني بدو يخرطو
بعدت بُـتول من عليه وضرباته علي راسه :تفوه الحق فيا اني
قرب منذر وباسها من خدها :حتي اني نحبك ياامختشه
بتسمت بُـتول وشبحت لـ تليفونه لشرين وقالت وهيا ترفع في حواجبها :شكلها سما
رفع منذر التليفون بضحكه:اقلبي وجهك توا هي
وقفت بُـتول وقربت قعدت تشفشفله في شعره بعياط منه وطلعت تجري تضحك وخلاته وهوا ينفخ ويساوي في شعره ورد علي سما :اميرتي اتطورت وبدت تتصل بيا
شدت سما ضحكتها :اني مش اميره وتاني شي لقيتك متصل بيا هدا علاش عاودت
منذر تنهد :مش عارف علاش حاس روحي نفرض في روحي عليك وتكلمي فيا بسيف
سما :لا عادي
منذر :كان نزعج فيك قولي باش نريحك من اتصالاتي وماتخافيش مش لصقه اني ره هههه
ضحكت سما وماعاش عرفت شن ترد عليه لين خلت منذر لرجع وقال :هاااا شكلا كلامي صح
سما :قتلك لا عادي يعني مافيش ازعاج واصلا لو كان ماخاطريش فيك ره مارديتش عليك بكل ولا اتصلت بيك
بتسم منذر :اممم نعتبر كلامك عنوان لـ قصة حبنا
ضحكت سما :عينك هههههه
منذر :هههه برغم العنوان طويل حبتين بس عادي من سما ومنذر يأتي الجديد
تلفتت سما للباب الدار لنفتح ولـ إينـاس لخشت والتوتر وضيق واضح علي ملامح وجها المضايقه لخلو سما تخف من ضحكاتها وهيا ترد علي منذر :اممم اني لازم نسكر توا
منذر :مزال ماشبعت اني خليك
ضحكت سما :ليل خلاص وغدوه وراي مدرسه
منذر :باه تمام ارقدي ورتاحي يااميرتي
سما :تصبح علي خير
منذر :وانتي من اهلي ياارب
سكرت سما وهيا تحط في يداها علي فمها وتشبح لـ إينـاس لـ سكرت الدولاب وتلفتتلها وهيا تبتسم علي ملامحها الفرحانه :ههههه شكلك طحتي فيه
سما :يهبللل
ضحكت إينـاس وجت قعمزت علي سريرها قبال سما :ردي بالك الشباب مافيهمش امان مدبيك ماتتعشميش فيه ولا تبني احلام معاه خليك المسيطره زي عادتك هههه
سما بتسمت :نحبك اني
إينـاس رفعت حاجبها :مش منذر اني
ضحكت سما :ههههه خلينا من منذر توا ، قوليلي بجديات بتوافقي عليه هدا
تنهدت إينـاس:نشوفه قبل ومدام بابا ووسام يشكرو فيه علاش لا
سما :لا لانه اولا مطلق اكتر من مره ولـ سبب غير معلوم وتانيا عنده تلاته صغار حرام انتي صغيره وهوا كبير عليك وفوقها عنده صغار
إينـاس:كان نصيبي فيه مرحبتين بيه ، واصلا قالتلي ماما غدوه جايين
شهقت سما :مسرع العفو وبعدين مش واخديين شي ولا موتيين شي خيرهم مستعجلين
إينـاس:غدوه لما بابا يروح بيكم من المدرسه نطلع اني وياه ناخد شوي حاجات وخلاص مش لازم لـ البز الزايد
سما :اوووف منك من امتي توافقي عليهم العرسان هدو ، هدا كله من بالقاسم الحقير كرهته اني
ونفخت وهيا تحدف في تليفونها علي السرير ووقفت طلعت من الدار وخلت إينـاس اللي قعدت تشبح قدامها بسرحان في كلام القَـاسي الصبح ، كلامه حسسها بشعور بايخ ، شعور انه يبي يتسلا معاها مابين تزوج ، تنهدت وهيا تمسح في وجها بداها الزوز وناضت طلعت من الدار .
.
.
سـ أسرق أنفــاس كُـل من ســرق هــدوء أيــامي 🍃
.
.
نزل بَـحر من التاكسي لدفعله حقه وخش لـ وحده من الزنق لـ دله عليها جمال .
لبس بَـحر برنوس تيشرته وهوا يلف في يديه علي خصره وطلع السلاح والكاتم لـ ركبه بخفه ورجع رفع تشرته ورد خبا السلاح في خصره وهوا يحط في يديه في جيوبه ويتلفت يمين يسار لـ الزنقه الفاضيه والمظلمه واغلبها مصانع ومستودعات وهناقر.
خف بَـحر من مشيت رجليه وهوا يحس بـ خطوات وراه خلوه يتلفت طول وهوا يشبح في شاب ضعيف وقصير القامه قرب منه وقال :انت لكلمتني
حول بَـحر البرنوس من علي راسه بـ بتسامه :ايه
بتسم جمال :تمام هي تعالا لمعلم يراجي فينا في المصنع
وتخطا جمال بَـحر لمشي وراه وعيونه لتقدح في النار الانتقام ماحولهمش من عليه وهوا يطلع في المسدس لـ قعد يتحسس عليه علي صوت جمال لقال :كنت بنرفعك لواحد يساعدك ويعطيك قد ماتبي بس صايره مشاكل عنده لكن بأذن الله تلقا طلبك عند القَـاسي
بَـحر :حتي خوي لقي طلبه عند هدا القَـاسي
ضيق جمال عيونه وتلفت براسه بـ عفويه لـ بَـحر:خو....
وسكت اول ماشاف السلاح لبين يدين بَـحر لـ خلا جمال يوقف وهوا يتلفت كله لـ بَـحر وقال :شـ شن هدا ياراجل علاش السلاح
بَـحر تلفت حولينه :قبل بنعلمك ان مش كل ليتصل بيك تعطي فيه التقه بس للاسف ماعاش فيها فايده كان تعلمت او لا لانك بتموت
زادو نبضات جمال لوخر خطوتين التالي:شـ شنـ ـي تقول انت شن تبي مني
بَـحر :هدا التاجر نفسه اللي خليته يتفق مع حاتم خوي
خدي جمال نفسه لطلعه بـ غصه في قلبه :خـ ـوك حـ ـاتم
بَـحر غمظ عيونه وكرر :هوا هدا نفس التاجر
جمال :اسمع اسمع خلينا نتفاهمو انت فـ فـ ـاهم غلط
بَـحر كرر :اخر مره هوا نفس التاجر
مسح جمال علي لحيته بـ رعشت يد وبـ عيون دمعت من الخوف وهوا يتلفت حولينه لـ هدوء المكان ورجع شبح لـ بَـحر بعيطه اول ماشاف السلاح لرفعه بَـحر علي راسه :لالالالا مش نفسه هـ ـداكـ ـا كنت بنرفعك ليه بس ماعاش يخدم
بَـحر :شن اسمه
جمال :حـ ـول السلاح باهي وخلينا نتفاهمو
بَـحر :ادوي خيرلك شن اسمه و وين مكانه
زمط جمال ريقه :عـ ـلاء اسمه علاء يسكن في عمارات الـ ###
نزل بَـحر السلاح لوطه وخلا انفاس الراحه تطلع من جمال لمسح علي جبهته بخوف لا برعب ورهبه كادت توقف قلبه ، ورجع شبح لـ بَـحر لـ لاد ووقف وراه وقال :انت و هشام وهدا علاء والمرحوم وهاب ومن تاني
فتح جمال عيونه علي وسعهم بخطفت انفاس :وهاب مات
بَـحر :ومن تاني
ملو الدموع عيون جمال لقعد يمسح علي جبهته :اسمع اسمع راهو واللهـ ـي ماعندي علاقه باللي صار كـ ـله من دبارة علاء هوا هوا لقال الفكره لخوك
بَـحر زاد قرب منه وحط السلاح في جنب جمال لدموعه نزلو بصيحه منه وهوا يغمظ في عيونه بالقوه وهوا يسمع في همس بَـحر :نتلاقو في جهنم
وضربه طلقه في جنبه خلت صرخت الأه تطلع من جمال لـ طاح علي وجهه من بين ألامه لـ ماطولت بـ طلقه تانيه طلقها بَـحر في راسه جابت اجله .
قعد بَـحر يشبح لـ جثته لـ لحظه قبل ما يحط السلاح في خصره وطبس خدي تليفون جمال من جيبه واول مافتحه لقي رمز حمايه خلاه يتعصب وهوا يضرب جمال علي ضهره بـ يده ووقف وهوا يفك في التليفون باش يتسكر ورجع ركبه وحطه في جيبه وطبس جبد جثت جمال من رجليه ودخله بين المصانع وطلع وكمل مشي لـ مسافه لا بأس بيها لين طلعله مصنع شالع ضيه وحواليه شباب وكـ انهم يحرسو فيه ، قرب بَـحر وقال :السلام عليكم
تلفتوله الشباب وهما يردو عليه في السلام و قربو منه و واحد منهم قال :تفضل خوي
بَـحر :اني من طرف جمال
الشاب :اي اي جمال
بَـحر :ايه علي اساس بنتلاقو بداية الزنقه لكن رجيت هلبا وماجاش ورقمه مقفل
الشاب :ولا يهمك تفضل وراي القَـاسي يراجي فيك الداخل
بتسم بَـحر وخش ورا الشاب لـ اول مافتح باب المصنع تلفت القَـاسي لـ بَـحر وهوا يوقف :اهلا اهلا
بَـحر قرب منه ومد يده :اهلين بيك
بتسم القَـاسي وميل راسه وهوا يشبح لشاب الواقف ورا بَـحر :وين جمال
وقبل مايتكلم الشاب سبقه بَـحر وقال :قالي رجيني بداية الزنقه لكن ماجاش ورقمه مقفل كملت بـ التهمه بروحي لين لقيت مصانعكم
شبحله القَـاسي وبتسم :نصيبك عندنا امالا ، تفضل قعمز
قعمز بَـحر وهوا يشبح لـ القَـاسي لـ جبد الكرسي وقعمز قدامه :قالولي تبي كمية هروين
بَـحر ضحك :ههه الحق كانت سبله باش نوصل فيك
القَـاسي :ههههه يانهار منيل ماتطلع ضابط
بَـحر :ههه لالا ماتخافش جاي نبي نخدم معاك في اي شي تبيني صبي عندك تبيني نسربي حشيش حبوب اللي تبيه
القَـاسي رفع حاجبه :لهدرجه حاجتك للخدمه
بَـحر :واكتر ماتتصور
تنهد القَـاسي وهوا يحرك في يديه علي بعض :تمام علاش لا
ورفع راسه شبحله وهوا يرفع في صبعه في وجه بَـحر بضحكه :لكن ذنبك في رقبتك ياخوي مش ناقصني دنوب
بَـحر :ههههه جيتك برجليا واكيد ذنبي حامله علي كتافي
القَـاسي :تمام يجي جمال ونتفقو
بتسم بَـحر :ويجي جمال
.
.
.
تــــاني يوم
سميه خدت الشكلاطه وهيا تتلفت لـ بُـتول :امشي بسرعه غر ناخدو حاجات حاره
بُـتول :ماما هما جايين يخطبو يعني نص ساعه ومروحين اما حاجات حاره
سميه :اسكتي وتعالي وراي حني ناس نعرفو في الاصول بسرعه هيا
نفخت بُـتول وهيا تحط في السلة لوطه واطلع في تليفونها لشرين من شنطتها ورجعت شدت السله ولحقت امها لتجري في المول من مكان لا مكان ، وهيا ترد :الو جوري
جوري :شني بننخطبو يعني ماعاش بنمشو للقرايا ولا كيف ، خيرك ماجيتيش الجامعه
نفخت بُـتول :والله حسني بنلغي امها هالخطبه
جوري ضحكت :هههه خيرك وانتي علي سبله
بتول :امي هدي هبلتني حسستني بياني مش الناس جايين يشوفوني بس اوووف تخيلي قالت بتاخد حاجات حاره وماخلت شن خدت حتي من المكسرات خدتهم
جوري :هههههه ياروحي فرحانه بيك واخيرا وافقتي يجو ناس يخطبوك
بُـتول :ونبي فكيني تره ، المهم سكري توا غر نلحقها وهيا زي الفار تتجارا في المول دوختني
جوري :هههه باهي بعدين ردي باش نقصقصك
بُـتول :كان صار هدا ومالغيتش
جوري تلفتت لـ ريم :بري افتحي الباب يديا ملبزات
جوري هزت راسها وهيا ترد علي بُـتول :تمام حبي باي
وسكرت من بُـتول وهيا تمشي تفتح في الباب لـ سما :يامساؤ حلو زيكم شن غداكم
جوري :العفو مابطنك كبيره خشيتي اتسطربي علي لغدي طول
نفخت سما :قلت مساؤ حلو ماتقعديش تتبلي عليا
ومدتلها الصونيه وهيا ادف فيها :حولي حولي اليوم غدانا حوت واني منحباش قعدت من غير غدي
ومشت خشت للمظبخ وخلت جوري لتهز في راسها :مختشه واللهي مختشه
وتلفتت لحقت سما لقعمزت علي الكرسي وهيا تبتسم لـ ريم لحطت قدامها صونية الكسكسي :هههه غدي عبدالمهيمن لكن شكله مش كاتبله
سما خدت الكشيك وكلت فم وهيا تتكلم بـ صوت مضخم :تـ ـو نـخـ ـليله
قعمزت جوري قدامها وهيا تحول في السرفر علي الصونية الكسكسي بـ الحوت :اااااه محلا صنته ابداع عمتي فاطمه في الكسكسي بالحوت
ريم جابت كواشيك وقعمزت جنب جوري :وين إينـاس
سما :طلعت مع بابا بيشرو حاجات مه جايينها خطابه
رفعو ريم وجوري راسهم في سما بشهقه خلت سما تزمط في اللي في فمها وهيا تشبحلهم بـ رفعت حواجب :اوبس
جوري :خطاب شن وخيرها ماقلتش الحيوانه
سما :والله امس بس قالتلها ماما وهما مستعجلين بصلتهم محروقه شكلهم ماصدقو قلنالهم تفضلو قالو بجو غدوه علي اليوم
ريم :ومن يكون هدا
سما :صاحب وسام خوي وبابا يعرف بوه
جوري :خيرها ماقلتش باهي امس كانت معانا
تحمحمت سما وشبحت لوطه :هوا بنقولكم حاجه المفروض مانقولهاش بس بنقولها
ريم :قولي
سما شبحتلهم :عارفتكم بتمسحو بيها بلاط حوشنا وحوشكم لانه مطلق
ضحكت جوري وتكت بضهرها علي الكرسي :تبصري
سما هزت راسها ورفعت يدها ودارت تلاته صوابع :وتلاته مرات فوقها
زادت ضحكت جوري وهيا تشبح لـ ريم :تتسهوك هدي
سما :وعنده تلاته صغيويره
ريم تكت مرافق يداها علي الطاوله وحطت كفوف يداها علي راسها وهيا تشبح لـ سما لقالت :الله يستر عليكم ماتقولوش اني اللي قلتلكم
جوري :هدي تبي الدبح اختك تبي الدبح الدبح
وتنهدت وهيا تتلفت لـ باب المطبخ خطف بس رجعت عيونها علي خشت القَـاسي من باب الحوش وهوا يحول في سبيدروه وخش لـ داره ، ضيقت عيونها وشبحت قدامها وقالت :هيا ترد فيها عارفتها
ريم :سكري فمك
سما هزت راسها بـ فهم قصد جوري :ماتردش فيها هيا تبي تنساه
شبحولها ريم وجوري لـ لحظه وبعدها تنهدو .
سما :اني لازم نمشي خليت ماما تكنس في جنان بروحها
جوري وقفت :نبدل ونلحقك
سما :حقا قولو لـ عميمة سعاد علي خطيب الغفله وقوليلها ماما قتلها تعالي بعدين
ريم :باهي حاضر
طلعت سما وخلت جوري لـ مشت لدار تبدل وهيا اتمتم وطلعت وهيا تنادي :ماما
سعاد :في الصاله تعالي وجيبو غدي خوك
خشت ريم بصفرة غدي القَـاسي لـ حطاته قدامه وشبحتله :هدا جاباته سما كسكسي بالحوت
القَـاسي:اووو اليوم مدلعين
ريم :دوق حتي كسكسينا اني درته
القَـاسي :سلم يدياتك
بتسمت ريم وهيا تتلفت لجوري لـ خشت عليهم :ماما اني بنمشي لـ حوش عمي رجب
سعاد :العفو قايله
جوري :بنمشي نعاونهم مه جايين خطاب لـ إينـاس
شرق القَـاسي بـ الكسكسي لين سعاد نخلعت وهيا تمدله في الميه :بسم الله عليك
ريم :خود اشرب اميه
خدي القَـاسي لميه من يد امه وشرب وهوا يرفع في يده بـ معني مافيا شي وخلا جوري وريم يشبحو لـ بعض بفهم علي صدمته لخلاته يشرق ورجعو شبحو لـ امهم لقالت :باهي بري وارفعي من الخبزه لدرتها امبارح
ريم :حتي اني بنمشي وبعتتلك عمتي فاطمه مع سما باش تجي بعدين
سعاد :ان شاءالله ومش تموتو غادي مره مره تعالو
هزت جوري راسها وتلفتت وهيا تشبح لـ ريم لـ كانت بتلحقها بس رجعت تلفتت لـ القَـاسي لقال :تعالي قبل ماتمشي ارفعي الصفره
سعاد :خيرك العفو ماكليت شي قعد
وقف القَـاسي :الحمدالله ياامي واكل برا
وطلع وخلا ريم تشبحله وماستاقضتش الا بصوت امها اللي صيحتلها :تي زودي قيمي الصفره
.
.
.
حط نَــاصر قدامها ورقه خلتها تقرن حواجبها وهيا تشبحله :شن هدا
نَــاصر :هدي ورقة اتبات انك طالبة كلية القانون في جامعة طرابلس
فتحت آيه فمها وهيا تحاوط في وجها بداها وتوقف بصدمه للحظات وبعدها عيطت وهيا تنقز :ياربي هههههه
تلفت نَــاصر حولينه وهوا يدور في حاجه يحدفها عليها لين خلا آيه تنتبهله وهيا تحط في يداها علي فمها :خلاص خلاص خلاص سكتت ههههه
جبد غيث نَــاصر من سرواله وقال :عمو خيرها لو
نَــاصر نفخ :فرحانه بمصيبة عمك ، حتي اني مالقيت مانخدم
ورجع شبحلها كيف واقفه تضحك زي الغبيه وهيا شاده الورقه وتشبحلها بفرحه بلغت عنان السما خلت نَــاصر يبتسم :تبدي قرايا من غدوه
شبحتله آيه برفعت حواجب :بـ السرعه هدي
نَــاصر :مش سرعه الدفعه لـ انتي منها باديين قرايا ليهم شهر وبستين واسطه قدرت نحصلك مكان معاهم وتو نكلملك الدكاتره يعطوك لـ فاتك بس باللهي ماتحشميني وتكركري وراك المواد
هزت أيه راسها :ابدا وعد وعد نصفي اول بـ اول ونرفعلك راسك
نَــاصر :باهي جعان ديريلي سكلوب
قرنت آيه حواجبها بتنهيده خلت نَــاصر يهز راسه وهوا يرفع في حواجبه خلتها تقول :باهي تمام شوي ويوته
تلفت نَــاصر ببتسامه وهوا بيطلع بس وقفاته آيه :نَــاصر
تلفتلها نَــاصر بنفخه :فصلي شن تبي تاني
بتسمت آيه:شكرا هلبااا
نَــاصر :الشكر ينقبل لما يوتي السكلوب
آيه:عشر دقايق ويوته
وتلفتت مشت تجري للمظبخ وخلاته يبتسم وهوا ياخد في نفسه ويطلع في تليفونه من جيبه ويطلع وهوا يتصل بـ جوري لخشت للمظبخ :إينـاس
تلفتتلها إينـاس:نعم
جوري بتسمت وهيا تشبح لشاشة تليفونها لعلنة عن اتصال نَــاصر وقالت :تليفونك يشرين
ورجعت رفعت راسها في إينـاس وقالت:اني كملت كنس الصاله نمشي نجيب شحن تليفوني من الحوش ونجي
إينـاس مسحت يداها من لميه :باهي
طلعت جوري وطلعت وراها إينـاس لمشت لدارها وهيا تاخد في تليفونها لشرين لـ اول ماشافت المتصل زادو دقات قلبها وهيا تقعمز تشبح لشاشة التليفون لـ لحظات قبل ماتسكر الخط وهيا تغمظ في عيونها وتاخد في نفسها وطلعه وبعدها رجعت فتحت عيونها وهيا تشهق :سكرت في وجهه
نفخت وهيا تحط في يدها علي جبهتها لتواني قبل ماتحولها وهيا تشبح لتليفونها لعلن عن وصول رساله لـ فتحتها وهيا تقرا محتواها (صار هيا وحده بـ وحده )
وجتها رساله تانيه ( ردي )
ورجع اتصل وخلاها تعيط بـ كمده وهيا تضرب في يداها علي السرير .
خدت نفسها وهيا توقف تسكر في الباب علي صياح سما :إينـاس
إينـاس:شوي وجايه
وتكت علي الباب وردت عليه من دون ماتتكلم وهيا تسمع في صوته:شن الجو الشين هدا لديري فيه
إينـاس:شني درت اني
القَـاسي ضرب يده في باب السياره :اسمعي من الاخير يابنت الناس اني نبيك
ضحكت إينـاس بهزوه :واللهي تبيني وبـ اي طريقه تبيني وانت خاطب ، تسلايا مابين تجوزت ، ولا تبيني احتياط ولا كيف
رفع القَـاسي حواجبه :انتي تدوي بجديات
إينـاس حاولت ماتعليش صوتها :امالا كيف تبيني نستنتج لكلمة نبيك
القَـاسي :لهدرجه حاطيني عيل ومش راجل ، ولا شايفتيني في سن مراهقه نلعب بالنتايات ، لما نقول نبيك يعني نبيك بـ الحلال واكيد مش حـ نقعد عاطي كلمه في بنت الناس واني نكلم في غيرها ، لكن بتفكيرك هدا خلاص بينتيلي قدري عندك ...
قصت إينـاس عليه بدموع ملو عيونها وبصوت مالياته العبره :بالحلال حتي كان تبيني بالحلال عميمه سعاد ماتبينيش
القَـاسي مسح علي لحيته بتنهيده :من لبياخدك عميمة سعاد ولا اني
إينـاس نزلو دموعها :اني مانبيش ندير مشاكل
القَـاسي :هدا غير تحبيني وتفكيرك فيا هكي حاطيني عيل ومش راجل وفوقها مانقدر علي شي وراسي تحت امي
إينـاس قالت من بين دموعها بتنقنيق :حشاك وعارفه انك مش هكي بس نبي نقنع روحي انك هكي باش نبعد ومنبنيش احلام عليك ولا نعشم روحي فيك
القَـاسي غمظ عيونه :ماتبيش تعشمي روحك فيا باهي علاش معشمتيني فيك
إينـاس:اني عشمتك فيا
القَـاسي :وكلمة نحبك كيف نفسرها
اتكت إينـاس راسها علي الباب لطق وجاها صوت جوري :إينـاس الناس جو اطلعي هيا
القَـاسي :سكري يابنت الجيران سكري
إينـاس:اني اسفه
القَـاسي :تمام خلاص سكري
وسكر الخط عليها وخلاها تبكي وهيا شاده قلبها بوجع .
.
غــواك قــلبي وجــافيته ، ونــا لا قــادر نعــاتب ولا اللــوم 🥀💔
.
.
الستــره عفــه ، والعفــه جمـال راقـي لا يستوعبـه الكتيـر من العُقــول المبنيه علي جملــة " حــريــة شــخــصــيــه " 🌿
.
.
فــي الليــل
ضحكت بُـتول وهيا تقعمز قدام مراية الزيانه وردت عليه وهيا تشبح لروحها :اكيد حـ نتحجب لكن مش من امر منك
فَـاتح :امالا من امر مني
رفعت بُـتول كتافها :لما نعرف روحي جاهزه ومتأكده انه ماعاش حـ نحوله
فاتح :انتي غر البسيه متأكد انه مش حـ تفكري تحوليه
بُـتول :اممم باه لو تجوزنا واني مش متحجبه حـ تغصبني عليه
فَـاتح رفع كتافه :نوعا ما ايه
رفعت بُـتول حاجبها :يعني بتغصبني
ضحك فَـاتح :هههه بنغصبك بس بطريقه مقنعه يعني بنقولك متلا حلوه الستره للبنت ، حلو منها انه ماتوريش مفاتنها الا لـ نواها بـ الحلال
بُـتول :يعني نتحجب ونلبس طويل وندرق روحي لين يجي هداكا الراجل لـ مامخلي شن مداير وعايش حياته بطول والعرض ياخدني كـ مكافأه كونه راجل باش يتحكم فيا ويزيد يدسني بـ مسماة الغيره
فَـاتح :ماحد قالك دسي روحك تقدري تقري وتطلعي وتشرقي وتغربي بس بحجابك وبسترتك ، وبدل ماتفكري في هداكا الراجل لـ عارفك تلقيح عليا اني هههه
ضحكت بُـتول وفَـاتح كمل بضحكه :ماتفكريش فيا اني او في اي راجل او انسان فكري في ربك ، فكري انه فرض عليك والستره والعفه تقرباً لله علاش ماتفكريش هكي ، لما تلبسي وتتعري وتبيني شعرك مايعنيش انك فاسده ولا مش متربيه بس تأكدي كلهم بيشبحولك برغبة يوم يومين ، لكن لما تكوني لابسه محترم مش ظروري عبايه وخمار وكدا بس المهم حجاب صح برضو كلهم بيشبحولك بس بيشبحولك بحترام حتي لناوي يقرب ينويها بالحلال ، ينويها زوجه مش مكافأه هههه
بعدت بُـتول خصلات شعرها ورا ودنها وقالت :حلو كلامك
فَـاتح :انتي اللي حلوه ، وحطي في راسك اني مش حـ نغصبك علي شي بس نقدر نقنعك بـ كل شي وديريه برضاك
بُـتول :امممم واني نقدر نسكر راسي وماندير شي
ضحك فَـاتح :هههههه وهدا لعجبني فيك انه مش اي حد يقدر يأثر فيك
ضحكت بُـتول وهيا تتلفت لـ الباب لـ نفتح عليها بـ تقربيع ولـ امها لخشت بعياط :بُـتول
قرنت بُـتول حواجبها وهيا توقف وتسكر في الخط علي فَـاتح :خيرك
سكرت سميه الباب علي منذر اللي قربع الباب مع صيحت امه لـ قربت شدت بُـتول من مرفقها :اخرتك تكلميلي في مفرخ المخدرات وتجيبيلي اماليهم لحوشنا
زمطت بُـتول ريقها وهيا تشبح لـ امها بـ ملامح ارتخت من استغرابها وقالت بهدوء :حـ حـولي يدك باهي
سميه دفتها علي السرير وصيحت :تعرفي يابُـتول الله العلي العظيم مزال تكلميه لما نقول لبوك وجدك وهما يتصرفو معاك ، هدا ماناقص غير نعطيك لتجار مخدرات
وخدت نفسها وهيا تشد في راسها بين يداها وتلف حولينها بتوتر :مخليتيني فاتحتلهم باب حوشي ومستقبلتهم ومديرتيني زي الاطرش في الزفه كان مش من عمك عبدالقادر ره خليت بوك يمشي يسأل ونهارك كان مشي سأل وعرف حـ تجي فوق راسي اني مايعرفش بنته المصون هيا لجايباته
مسحت بُـتول دمعه سالت علي خدها وناضت وقفت وقالت :انتم ماخصكنش في حياتي اني لبناخده مش انتم
رفعت سميه حواجبها بـ صدمه وهيا تقرب منها وتشدها من دقنها :كانك ناسيه اني امك حني عيلتك ياكلبه ياللي مش متربيه
فكت بُـتول يد امها من علي دقنها وصيحت :وكان امي هدا مايعطيكش الحق انك تختاريلي من لي منعيش معاه ومن لا اني هدا الولد نبيه رضيتو مارضيتوش نبيه ولو بترفضوه الله ياامي الله لما نهرب ونخليهالكم
واول ماكملت بُـتول كلامها ضربتها سميه كف من الروح لا الروح وقربت شدتها من شعرها وهيا ترجعلها في راسها التالي وقالت من بين سنونها بـ عصبيه :هدا وين تأكدة اني جايبه عاهره وحده امسخه ، وتو تشوفي المعامله من اول وجديد ياكلبه
ودفتها علي الارض وهيا تتلفت زي المهبوله تخربلها في سريرها ادور علي التليفون لخداته مع اللاب توب والتاب وطلعت سكرت عليها الدار بالمفاتيح وهيا ادف في منذر بعياط :حول
ومشت وخلاته وهوا يتنهد وواقف حاير قدام دار بُـتول اللي دموعها نزلو وهيا تشد في خدها لـ ضربتها عليه سميه ونزلت راسها حطاته علي الارضيه وقعدت تبكي .
.
.
حـين يمـوت الــضمير ، تستلــد مـواجـع غيــركـ 🍃
.
.
طلع بَـحر من محل التليفونات وهوا يشبح لـ تليفون جمال لـ فتحوله رمزه .
خش لـ الارقام وقعد يدور بين الاسامي لين لقي رقم مسجل بـ علاء ### ، طلع تليفونه وسجل رقمه واتصل بس طلعله _ الرقم المطلوب مشغول او خارج نطاق التغطيه _ ضرب بَـحر رجله علي الارض وكمل طريقه للحوش وهوا يحاول لين فقد الامل وهوا ياخد في نفسه ويطلع فيه ، محاول انه يهدا شوي وطق علي باب حوش اخته لـ فتحله سميح الباب :جيت علي وقتك
بتسم بَـحر وخش وهوا ينزل في راسه لوطه اول ماشاف ابتهال والهَــام لـ اول ماشفاته بتسمت طول وخشت للمطبخ بـ بتسامه خلت نجوي تنتبهلها وهيا تقول :ايوا حني فيه تطورات
تحمحمت إلهَــام وحطت صونية المكرونه في الصفره وقالت بستغباء :تطورات شني
نجوي :مش علينا لكلام انفضحتي خلاص
ابتهال ضحكت :تي اسكتي فكينا منها
نجوي :ههههه باهي اهو نسكتو لين يجي الوقت الصح
وتلفتت خدت الصفره وخلت إلهَــام لحاوطة وجها بداها الاتنين بخجل وهيا تشبح لـ نجوي لطلعت رفعت لعشي لـ سميح وبَـحر لـ اول ماحطت نجوي صفرة لعشي قال :يسلم يدياتك
نجوي :صحيحه
وكانت بتطلع بس رجعت تلفتت وقالت :حقا بَـحر سمعت بـ عيلة ###
استعبط بَـحر وهز راسه :لا خيرهم
نجوي :ولدهم عبدالوهاب قالو ياناري لقوه مقتول في سيارته بين لحوايز
بَـحر :لا حولا ولا قوة الا بالله
نجوي :ايه ياناري يسخف
سميح :الله يرحمه ويعفينا كترو لمجارمه والقلوب ماتت
هز بَـحر راسه وهوا يقرب من الصفره بدم بارد وبـ ابتسامه وبدي ياكل براحه ، وكـ انه قالوله بوك رجع للحياة لـ قتلك للفلان هداكا ، ولا الزمن بيرجع للوراء ومش حـ يصير لصار لـ قتلك لاعلان هداكا ، فرح بقتله ليهم بقلب مخدر وبضمير ميت ، والسبب هما .
.
.
الإبن قَــاتل والديــه ، والــوالدين قَــاتيليين أبنائهــم ، هــدا زمــن النهايــه 🤚🏻
.
.
_ الرقم المطلوب مقفل او خارج نطاق التغطيه _
ضرب فَـاتح يده علي حديد الحمايه بعصبيه وهوا يرجع يحاول لـ اخر مره وكل خليه تدعي الاستجابه وانها ترد عليه بس للاسف تلقي نفس الاجابه من البريد الصوتي .
_ الرقم المطلوب مقفل او خارج نطاق التغطيه _
غمظ فَـاتح عيونه ورفع راسه لسماء وهوا ياحول يهدا شوي ، خدي نفسه كشهيق وطلعه زفير ، عاود الكره شهيق زفير شهيق زفـ... وشد نفسه وهوا يفتح في عيونه اول ما التليفون شرين بس اول ماشاف رقم السِـيفاو رجع انقباض قلبه ورد بعصبيه :ها سِـيفاو
السِـيفاو :علاء وينه
فَـاتح :مش عارف ليه اربع ايام مختفي قايل متزرد
السِـيفاو :الكلب اتصل بيه توا توا مايبيش يرد عليا اني
فَـاتح :شن فيه
صيح السِـيفاو :دير زي ماقتلك اتصل بيه وركبلي جري
وسكر السِـيفاو من فَـاتح لبعد التليفون من ودنه بعدم فهم وتشويش زاد علي تشويشه وهوا يتصل بـ علاء لـ سكر عليه من اول رنه وخلا فَـاتح يزيد يتوتر ويرجع يعاود ويتلقي في التسكير مره تانيه بس رجع وعاود وهوا يراجي في الرد ، رنه ، تنين ، تلاته :خير فيتكم
فَـاتح :خير فيتك انت ماتردش و وينك يامسخ
علاء :اني امسخ انظافتكم ماتعجبنيش
فَـاتح :علاء ادوي كويس انم وشن التخريف هدا بدل ماتشوف حياتك ومستقبلك وتنظف سيرتك عاشقلي في وسخ بوك
علاء :انت قلتها بوي وايه عاجبني وسخه وحتي انتم ماتحلموش تطلعو منه لانه ماكلتنا وشرابنا وحياتنا ماشيه منه هوا
فَـاتح صيح :دماغك الـ ..... شن فيه اه شن فيه ماكفاك لجانا من لعفن هدا ماكفاك موتت رائد مزال خاطرك يموت واحد منا ، واسمع من الاخير الله لا يردك خليك مصيرك اصلا زي بوك وجعلك ماعاد روحت
وقبل مايسكر جاه رد علاء :كمشه كلاب زيكم رخو بـ بوهم مايستاهلوش كلامي اصبرو ربع ساعه بس وشوفو شن يصيرلك وغر تفيدكم توبتكم ياالاولاياء الصالحين
وسكر الخط في وجه فَـاتح اللي قرن حواجبه بعدم فهم خلاه يخش من البلكونه وهوا يمشي لدار ويحول في تشرته لـ لوحه علي الارض وفتح الدولاب لبس تشرت تاني وتلفت وهوا بيطلع من الشقه لولا صوت سيارات الشرطه لـ خلاته واقف تابت مكانه يحاول يكدب ودانه وتلفت بشويه وهوا يشبح لـ امه وخواته لطلعو من ديارهم بصمت زي صمته دام دقايق قبل مايتحرك ويرجع يمشي للبلكونه وهوا يشبح في سيارات الشرطه والدوريات لحاوطو العماره والعمارات لجنبهم خلاته ياخد نفسه بصدمه عكس السِـيفاو اللي رد علي تليفونه لشرين وعيونه لوطه في الشرطه لتحاوسو في المكان ويسمع في صوت بوه لجاه :اني لجبتكم علي هدي الدنيا ياصرصريه وعشتو بخير لدميتوه وتكبرتوا عليه واني لنطيحها بيكم وندفنكم لا نعرف لا ولدي لا دمي
السِـيفاو :شكرا يابوي
.
.
"" الــدم عُمـره  مــايبقـي مـي "" ، جُـمله خاطِئـه قـد أتبثت خطائهــا بِـلادي 💔❌
.
.
.
#يتبـع لـ البـــ2️⃣2️⃣ـــارت
#كتـــابـة_اليَــاقُــوت

________________________________
بداء كتابة الرواية في تاريخ 5 / مـــــــ5ٰــــــايـو / 2020
تم انهاء كتابة الرواية في تاريخ 12 / اكتـــ10ٰـــوبر / 2020