عشق في بلاد حروبها لا تنتهي 4 ( 2017 )

البــ الثــامن ــارت

_
_
عِــشق فـي بِـلاد حُـروُبِهـــا لا تنتّٰــهي 4
  { 2017 }
.
في البارت السابق
جوري نفخت بـ غضب :مهما اديري مستحيل نسيبك ياكلبه عارفتيني وله
ضحكت بُـتول وهزت راسها وهيا ترجع تتلفت التالي لـ فَـاتح لـ قعد يشبحلها ورجعت تلفتت طول اول ماسمعت عيطت جوري اللي طلقت يدها وهيا توخر خطوتين وتنفظ في يدها من القهوه لـ تبزعت عليها وعلي حوايجها من اللي خش فيها ، واول مارفعت عيونها وشبحت نَــاصر لـ ضيق عيونه بـ تسهويك وقال :اوووه ماشفتكش
هزت جوري راسها ورجعت شبحت لـ حوايجها لـ تلبزو وقبل ماترد عليه صيحت بُـتول :انت اكيد اعمي وماتشوفش تي دوشتلها بـ القهوه
نَــاصر بتسم :قولنا مش مقصوده تفضلي معاي لسيارتي ندير معاك الواجب
رفعت جوري عيونها فيه طول وقالت :عفوا
بُـتول :انت واحد وقح وقليل ادب
وتلفتت لـ جوري وجبدتها ومشت وخلت نَــاصر يحول في لبتسامه ويصيحلهم :حلال علي غيرنا وحرام علينا ولا شن
تلفتتله جوري والدموع في عيونها من كلامه الواضح انه تلقيح وهيا تشبحله كيف غمزلها ورجع تلفت قدامه ولبس نظاراته .

قراءة ممتعة 💛
البــ الثــامن ــارت
.
.
.
شدتها بُـتول من دقنها وقالت :من غير دراما زايده وفكك منه وعتبري كلامه نباح كلب وراك تمام
هزت جوري راسها وبتسمت وهيا تحول في يد بُـتول من علي دقنها :حولي وبري خوك يراجي
طبست بُـتول باستها :مانبيش نعتبرها لزه فقط علي خاطر مضايقه وباي هههه
ومشت وخلتها تضحك وهيا تتنهد وتنزل في عيونها لـ تليفونها لـ شرين بين يداها وقبل ماترد رفعت عيونها وهيا اضيق فيهم اول ماشافت نَــاصر لـ قعمز قدامها وقال بتسهويك:هاي
زمطت جوري ريقها وشبحت حولينها ورجعت شبحتله :تفضل شن تبي
نَــاصر رفع كتافه :شي طالت النظارت بينا قلت نجي نتعرفو
رفعت جوري حاجبها :واني مش متع تعارف لو سمحت بعد عليا وماعاش تجي جيهتي
ووقفت وهيا تلم في شيتاتها في شنطتها لـ لبستها وقبل ماتتلفت تمشي وقفها صوته :يابنيه
تلفتتله جوري وشبحتله كيف بتسم وقال بـ غمزه :شني الفرق بيني وبين لواقفه عليه انتي وصاحبتك امبكري هههه ولا هوا يعرف كيف يكيفكم
فتحت جوري فمها علي كلامه ورفعت صبعه فيه بـ غل وقالت بـ عصبيه :اعرف شن دوي معاي اني مش واحده من صاحباتك الشلتت لـ تعرفهم اوك ، وبعد من عليا خير مانخلي خوتي هما لـ يتفاهمو معاك
وتلفتت بـ عصبيه وهيا ترفع في تليفونه لـ قعد يشرين وردت :نعم ياريم
ريم :مزال مش مروحه
جوري نفخت :قعده تستني في مهيمن علاش خيرك
ريم ضيقت عيونها :خيرك حتي انتي انهارات اليوم كلكم راكبكم بسم الله لعظيم ولا شن
وقفت جوري وهيا اضيق في عيونها :علاش شن صاير
تنهدت ريم وطبست شبحت القَـاسي اللي خش لـ المظبخ وقالت :مش عارفه الحق امبكري لما سيبتينا ابصر شن صار بين إينـاس وبالقاسم
جوري :شني مافهمتش شن صار
ريم :تي نقولك ابصر شن صار وين نندري اني فجأة هكي مشت روحت وخلتني وبالقاسم خش لداره قربعها وراه واعصابه في راس خشمه
تنهدت جوري وهيا ترفع في روحها علي روس صوابعها :اهو مهيمن جي لما نوصل نمشو نفهمو منها شن صار
ريم :زعما نسأل بالقاسم
جوري تلفتت يمينها واول ماتلفتت شبحت نَــاصر لجت عينها في عينه وهوا خاطم بـ سيارته قلبتله عيونها وسرعت خطواتها ومشت لـ عبد المهيمن وردت علي ريم :لالا اصبري لين نكلمو إينـاس
ريم :تمام
واول ماسكرت ريم من جوري سمعت صوت باب الحوش لـ انفتح وقفت وهيا اطلع في راسها من ادار وقالت :بالقاسم
رد عليها القَـاسي وهوا يلبس في سبيدروه :نعم
قربت ريم منه :طالع
القَـاسي رد بـ عصبيه مكبوته :شن تشوفي فيا
رفعت ريم حواجبها وقالت :قصدي ماما في حوش جدي مرات نمشو اني وجوري نتغدو عند إينـاس كان ماكش مروح باش مانحسبوش بحسابك في لغدي
ضيق القَـاسي عيونه :علاش ماشيين غادي
ريم رفعت كتافها :قعده بروحها وعمي رجب وخالتي فاطمه رفعهم وسام لـ حوش جدهم مريض هلبا وخوتها قعدين في المدرسه قلنا نمشو نسايروها
رفع القَـاسي حواجبه وهز راسه :تمام ماتحسبوش بحسابي
وتلفت وسكر الباب من غير مايزيد كلمه وطلع وهوا يتلفت لـ حوشهم اللي قعد يشبحله لـ لحظات قبل مايتلفت يفتح سيارته وركب وهوا يحط في الكيسه لـ شافتها إينـاس امبكري تحت الكرسي من لوطه ورفع راسه ولاع السياره وهوا يرد علي تليفونه وعينه في باب حوش إينـاس :نعم
الصقر :شني جوك ياقاسينا
تحمحم القَـاسي:تمام الحمدالله شني جوك انت
الصقر ضيق عيونه :تمام لكن شني مني فكرت ولا شني ره ماعاش عندي وقت وانت ارابح القصه وراها ملايين
القَـاسي تحرك بـ السياره ورد علي الصقر :جيبلي بضعته وتلاته مليوين وهوا ليك
بتسم الصقر :تم ياغالي تم
.
.
.
درس سامح السياره وتلفت لـ نَــاصر :تو نلحقكم بتاكسي اني خودو السياره
هز نَــاصر راسه ونزل من السياره وهوا يتلفت لـ معاذ لـ نزل وصيح علي سامح لـ تلفت بخش لـ العماره :ياكلب جيب لمفاتيح
ضحك سامح وشبح لـ لمفاتيح لنزلهم في يده وتلفت حدفهم لـ نَــاصر لـ تلاقهم وهوا يضحك :حي علي العقل لطالع زرده حي ههههه
معاذ :اطلع بكري من هني لستراحه بعيده ره
سامح رفع يده وتلفت اللي اول ماتلفت انخبط بـ حد خلا نَــاصر اللي سكر باب السياره يضيق عيونه وهوا يدقق في ملامح فَـاتح لبعد وقال :وين عيونك ياخوي وينهم
رفع سامح يديه :ماشفتكش خوي سامحنا
مشي فَـاتح وسيب سامح لـ ضيق عيونه وهوا يرفع في كتافه وركب من غير مايزيد يفكر ورفع تليفونه اتصل بـ مـريم اللي رفعت تليفونها بـ بتسامه اول ماشافت رقمه وردت :شني جيت
سامح :ايه اما دور انتي
مـريم :السادس
سامح :تمام
سكرت مـريم منه وتلفتت لـ ساجده لقلتلها :هدا خوك
هزت مـريم راسها بـ بتسامة فرحة :ايه قال راكب
ساجده تلفتت خدت وشاحها من الطاوله وقالت :امالا اني نازله لما يجو امك وختك تو نركب
مـريم :تمام شوي ويجو هما قولي حتي لـ أمي تركب باهي
هزت ساجده راسها واشرت علي الشاهي :الشاهي طاب سكري عليه
بتسمت مـريم :صحيتي ياحبي كل شي وتيتيه
ساجده بعتتلها بوسه :مردوده تخفيش ههههه
وطلعت من المطبخ وهيا تساوي في وشاحها واول مافتحت الباب وطلعت انخبطت في سامح اللي وخر وقال :العماره كلها درت معاها حادت خيركم
طبست ساجده راسها :اسفه
وتخطاته ونزلت تجري وخلاته رافع حواجبه وهوا يشبحلها لين ختفت علي عيونه وماتلفتش الا لما سمع صوت مـريم :سامح
تلفتلها سامح ورسم بتسمه وهوا يشبحلها كيف قربت منه :خش خش
.
.
.
تنهدت ساجده وتكت علي حاشية باب المظبخ :اخخخخ محلاااه ياربي امالا ريحته ياحنين واااه عليا
وخففت من بتسامتها وهيا تفتح في عيونها علي وسعهم وشهقت لين خلت حنين تتلفتلها :تي خيرك
قلبت ساجده شفايفها :ياريتني درت روحي دخت اخخخ راه شدني وولت قصة حب عنتر وليلي
عوجت حنين فمها وقالت :ليلي مادختش علي عنتر وعلي فكره في النهايه مات عنتر وقعدت ليلي زي البومه بروحها
ساوت ساجده وقفتها وضيقت عيونها :تفوه عليك وعلي اللي جايه تحلم جنبك
وتلفتت طلعت من المظبخ وهيا تشبح لـ فَـاتح لـ فتح باب البلكونه وقال :ساجده
ساجده :نعم
فَـاتح :ديريلي شاهي
نفخت ساجده :باااهي
رجع فَـاتح سكر باب البلكونه ورفع تليفونه لـ شرين واول ماشاف رقمها بتسم ورد :مرحبتين بـ نور العين
ضحكت بُـتول وهيا تحط في الطنجره علي النار :هههه مرحب مرحب بنور العين ، تعرف بديت كل مانسمع حد يقول نور العين ندكرك طول
خفت بتسامت فَـاتح :واني كل مانقولهالك ندكر خوي
ضيقت بُـتول عيونها وهيا تقعمز :خوك ؟؟
فَـاتح :ايه
وتنهد ورجع بتسامته علي مبسمه :خوي الصغير الله يرحمه كانت ديما علي السانه
بُـتول :ربي يرحمه ويغفرله ان شاءالله
فَـاتح :ان شاءالله ايه شني اديري
تلفتت بُـتول لـ طانجره وقالت :اراجي في لميه تغلي نبي ندير اندومي اني وخوي جعانين
فَـاتح :هههه اندومي جو اجانب
ضحكت بُـتول :ههههه لا والله لو بـ الخاطر توا مكرونه حاره ولا كسكسي اخخخخ يمسح علي لكبيده بس الله غالب اندومي وكان مش طريقة التحضير المكتوبه مانعرف نديرها ههه
تعلت ضحكت فَـاتح :هههههه حي عليك بايره
بُـتول :هلبااااااا ههههه مانعرف ندير شي
فَـاتح :هههههه يانهارك لبيض تعلمي باش تلقي روحك
بُـتول رفعت كتافها :ربي مامكتر غير المطاعم
فَـاتح :واللهي وكان تزوجتي وقالك جعان بتقوليله برا خود من المطعم
بُـتول :ومن قال بنتزوج
فَـاتح رفع حاجبه :شني امالا
بُـتول تلفتت وهيا تسمع في صوت باب الحوش لـ نفتح وقالت :مش حـ نتزوج بنقعد هكي حرة طليقة نفسي ونعيش لنفسي
فَـاتح :والله
بُـتول :واللهي الله هههه نستأذنك توا خوي جي
فَـاتح ضيق عيونه :تمام فليل نتلاقو
بُـتول :اوك
وسكرت وهيا توقف تتلفت لـ منذر لخش وهوا يحط في الشكاير قدامها ورفع راسه شبح لـ الطنجره وضحك :من جوعك حتي لميه وتيتيها ههههه
نفخت بُـتول وجبدت شكارت الاندومي :تي والله جعانه موت
منذر :ديري اربعه
بُـتول :عينك بندير السته جعانه والله ناكلك حتي انت
ضحك منذر وجبد الكرسي قعمز وهوا يشبحلها تفتح في علب الاندومي وتفرغ فيهم في الطنجره وتلفتتله :شن جبت تاني
منذر :مشروب وشكاليط وهريسه عربيه
نفخت بُـتول وجبدت الكرسي قعمزت :لا امتي بتقعد بهار في المستشفي جعت اني من وراها
منذر رفع كتافه :جرح ايدها أتر عليها
رفعت بُـتول حاجبها :علي جرح هكي مش عارف نحس في حاجه امي وعمي داسينها علينا
ضيق منذر عيونه: زي شن
بُـتول :اللي هوا شن رايك فليل نمشو لماما وبابا نتعشو غادي
منذر:حوش جدي
هزت بُـتول راسها :ايه ومنها نجيب شيتات ناسيتهم غادي
منذر :تمام عادي
.
.
.
شدت إينـاس راسها وعيطت :قولتولي خمسه دقايق ونولو اصبحتو في نص ساعه
ووقفت :اقعدو ستنو كيكتكم والحقونا
جبدتها جوري من يدها ورجعت قعمزتها علي الكرسي :اي خير بلاك انتي اه كارهه حوشنا تقول فيه عفاريت الزرق ستني شوي اطيب الكيكه ونمشو جميع
نفخت إينـاس وتلفتت لـ ريم وسما لقالت :سيبنا الدجاجه في الكوشه تراهو نحرقت حي عليكم هههه
ريم مدتلها الخبزه:بري جري سكري عليه النار واهو لحكينك
سما :باه
مشت سما جري وخلت ريم تقرب تفتح في الكوشه علي الكيكه وتلفتت لـ جوري وغمزتلها ، بتسمت جوري وشبحت لـ إينـاس لـ نفخت وقالت :اوووف وربي كان نحرقت الدجاجه لما نوكلهالكم بـ غنجها
ضحكت ريم وتلفتت اتكت علي الرخامه وقالت :اخطينا من الدجاج خيرك امبكري انتي وبلقاسم
زمطت إينـاس ريقها وشبحت لـ جوري لرفعت حاجبها :شني فيه
هزت إينـاس راسها :شـ ـي شني فيه يعني
جوري :مش علينا ياانوسه
ريم قربت جبدت الكرسي وقعمزت :سيبتك تحددي في سوريه مافيك شي وفجأه نضتي روحتي وبلقاسم قعد يقربع واعصابه في راس خشمه شني فيه بينكم
ضيقت جوري عيونها بشهقه :انتم في علاقه
هزت إينـاس راسها :لالالا
ريم ضحكت :ياكلبه وماتقوليش ههههه ريتي ريتي ياجيجي لميه تاريتها تمشي من تحت رجلينا
إينـاس :تـ ـي تي شن تقولو انتم
جوري :فضحناك خلاص حبيبتي ريتي السي بالقاسم وبدي يحب ويتعارك وكدين
تنهدت إينـاس :مش هكي انتم فاهمين غلط
ريم :تره فهمينا امالا ههههه
جوري هزت راسه :اي اي فهمين غير كدا
زمطت إينـاس ريقها وهيا تاخد في نفسه :هوا انــ ـا أوووف لقيت في داره لـ ٰـقيت مخـ...
وقبل ماتكمل هرب الضي بـ تقربيعه حاجه تكسرت في الصاله دارت صدا صوت قوي هلباا خلت لبنات ينخلعو وهما يوقفو يطلعو من المطبخ ويخلو في إينـاس اللي تفتف وهيا تبي تلحكم بس قبل ماتطلع من المطبخ حست بشخص طويل وعريض ردها وهوا يسكر في المظبخ ويتكي فيها عليه بـ سرعه خلتها تنصدم وهيا تجمع في نفسها بتعيط بس سكرلها فمها بيده وهيا تحس بوجهه قريب من وجها وبهمس صوته لـ عرفاته :اششش واني نفهمك كل شي باللهي عليك وكان عندي عندك درت غلاوه ماتجيبي سيره لشفتيه لـ حد
رفعت إينـاس يدها وحطتها علي يده لـ حاطها علي فمها وحولتها وهيا تحس بـ نفسه اللي ضرب علي وجها وقالت بـ رجفت صوت :مـ عـنـ ـها تبيع في مخدرات واسليحه وله
وفي اللحظه هدي جي الضي وشبح القَـاسي دموعها لـ علي خدودها ونظرتها الخايفه منه لـ خلاته يحس بشعور بايخ شعور جرحه وحساسه بنذالته ، الشعور لكان يتفاده حد يحسسهوله من بداية مشواره القذر .
غمظ القَـاسي عيونه وبعد عليها خطوه وهوا يمسح في وجهه بديه الزوز وفتحهم علي طقت الباب وتحريكت المنيليه وصوت ريم :إينـاس افتحي خيرك سكرتي علي روحك
رجع القَـاسي قرب منها وشد وجها بـ ديه الزوز لين خلا إينـااس تاخد نفسها وهيا تشبح لعيونه لمحولهمش من عيونها وقال بهمس:اللي تبيه اني فيه كل شي نفهمه ليك بس اسكتي قدام خواتي باللهي عليك تمام
هزت إينـاس راسها وهيا تشبحله كيف بعد علي دقات الباب واصوات ريم وجوري لصيحت :إينـاااس افتحي الكيكه نحرقت
قعدت إينـاس تشبح لـ القَـاسي لبادلها النظرات لتواني قبل مايجبدها من يدها من علي الباب لـ اول مافتحه شهقو ريم وجوري لوخرت وهيا تحط في يداها علي قلبها :اعذو بالله من الشطان امتي جيت هني انت
تحمحم القَـاسي ومسح علي جبهته بقفا يده وتلفت شبح لـ إينـاس لتحاول ترتب نفسها اللي خربه مع نبضات قلبها السريعه ورجع تلفت لـ ريم لقالت :شني صاير ادوو
القَـاسي :موضوع بيني وبين بنت الجيران
ورجع تلفت لـ إينـاس وغمزلها وتلفت مشي وخلا جوري وريم لقربو منها بضحكه وهما مش مصدقين زي إينـاس اللي مش مصدقه كونه يطلع تاجر صدمتها في اللي كشفاته عليه خلتها مش مهتمه لقربه لهمساته لكلامه ونظراته ليها الشي لكانت تتمناه لما صار صار في ظروف خلت تفكيرها يفكر في العمق واللي داسه علي الناس كلها واللي تمنت لو مش هيا لربي كشفه قدامها
.
.
.
طلع بَـحر من حوش اخته وهوا يسكر في الباب وتلفت بـ عفويه لـ روشن المظبخ وجت عينه في عين بنت كانت تشبحله وهيا مشبكه يداها في حديد الحمية متع الروشن قعد بَـحر يشبحلها لثواني وادرك لا اراديا انها نفسها إلهَــام وماقطع نظراتهم الا شرين تليفونه اللي طلعه من جيبه بـ لهفه بس تنهد اول ماشاف رقم خوه اللي رفع ورد عليه :ايوه حاتم
حاتم :وينك
بَـحر :كيف حطيت امي في حوش نجوي وماشي بنسلم مفاتيح الحوش لراجل
رفع حاتم حاجبه :بعته
بَـحر تنهد :ايه بعته وبعت لحوازه والسياره غدوه بنشوف بعتها
زمط حاتم ريقه وقال :انت عارف اني ماعنديش شي كان هدا بعته وعطيتكم فلوسه
ضحك بَـحر بهزوه وقال :غر تعالا اوقف جنبي مانبي منك شي
حاتم :تعرف انت خدمه وجو
بَـحر .تمام ياحاتم تمام بس تعالا بعدين لحوش نجوي امي تاعبه شوي
حاتم :تمام
سكر بَـحر من حاتم وهوا يهز في راسه بـ هزوه عليه وعلي روحه وعلي حالته اللي لا يرتي لها رجع تلفت لـ الروشن بس مالقاهاش تنهد ورجع شبح قدامه وطلع .
.
.
.
فتح نَــاصر يديه وقرب حضنه:ليك وحشه كبيييره لانمم
ضحك يُـوسف وطبطب علي ضهره وبعد :تي اني بصغار صغارها ههههه
تحمحم معاذ :واني ماحد مستاحشني
شبحله يُـوسف وضربه علي ضهره لين معاذ كح:امك مستاحشاتك انت خيرك ماتردش علي ام تليفونك ياكلب
حك معاذ راسه وهوا يطلع في تليفونه لشرين من جيبه وقال :من غير حشمه يايُـوسف ازح
نَــاصر ضحك :هههه وهيا حتي فيها من غير حشمك وتم ههههه
ضيق معاذ عيونه وضربه برجله وتلفت :غر اندل سامح علي المكان وجايكم
مشي معاذ وخلا يُـوسف يلف في يده علي نَــاصر :شني جو مؤيد وينه ماجاش معاكم
نَــاصر :ليه يومين مروح قال بيديرو دوره غادي ومولي
يُـوسف :شني جو محمود وعمر
نَــاصر :ماشيه علي الحاشيه
بتسم يُـوسف :وشني جوك انت
ضحك نَــاصر :زلقت اني وجي راسي علي الحاشيه ههههه
ضحك يُـوسف وشده من كتافه :خش خش غر نتكيفو بطويستين تو يبرا راسك
طلع نَــاصر لسانه :هوا اني ولد صالح بس انتم هبعتو بيا كل جغمة وسكي نشربها في رقبتكم اهو من توا بنقولها
زادت ضحكت يُـوسف :غالي غالي عادي اتمك واتمي واحد
.
نفخ معاذ :تي النم غر تعالا انت في طريق ..... تو نطلعلك
سامح :وصلتو انتم
معاذ :ايح حتي نَــاصر بادي في التكيف هههههه
ضحك سامح وهوا يطبس لدور لتحته وشبح لـ البنت لتصيح بتوشويش:تي هيا ماتخلينيش نصيح تو يركبلي علاء
زاد نزل وضيق عيونه وهوا يرد علي معاذ :واني قعد ماطلعتش من عند اختي ياكلاب ستنوني
معاذ :تراجيك ليسره ستعجل سلم ولدي تعرف وخيك نَــاصر ياحنه عينه والوسكي ههههه
سامح :هههه تمام تمام نوصل في اربع شوارع الـ.... نتصل بيك تطلعلي خليك صاحي
معاذ:انت وحظك عاد
سامح :برا ياكلب اهو ماتردش
وسكر عليه الخط وهوا يزيد ينزل وعيونه فيها وهيا تتلفت علي صوت رجليه وجو عيونها في عيونه وماحولتش عيونها الا لما بتسم وقال :السلام عليكم
تحمحمت ساجده وقالت :وعليكم السلام
ورجعت خشت لشقه وردت الباب لين خلت سامح يضحك وهوا يكمل في نزوله ومره مره يتلفت ووحده من تلفتيتاته شبحها كيف رجعت طلعت راسها تشبح فيه وتجي عينها في عينه لخلتها تشهق وتخلي في ضحكته تعلا لين حشمها وخلاها تخشش راسها وتسكر الباب بتقربيع وهيا تحط في يداها علي فمها وتشبح لي حنين لضيقت عيونها :خيرك ليلي الحراره رجعت رقت ولا شني
حولت ساجده يداها من علي فمها وقالت :واااه حشمه وخلاص
ضيقت حنين عيونها :تي خير بلاك
.
.
.
حط منذر طاسة النسكافي علي الطاوله ورجع بضهره علي الكرسي ورفع رجليه علي حاشية حديد الحمايه متع البكلونه وتلفت لـ بُـتول اللي تكمكمت في شالها وقالت ببتسامه وهيا تشبح لسماء :من لما كنت صغيره حلمي نولي مهندسه معماريه نبي نرسم ونخطط لمباني بـ تصميم اول مره تندار في ليبيا صح انه مشروع فاشل في بلادنا بس لا علا وعسا تتصلح الامور ويولي فيه مستقبل للمهنه هدي ونولي اهم واشهر مهندسه معماريه في لبلاد
وشبحت لـ منذر وكملت :وانت شن حلمك يااقتصادي
منذر ضحك :ههه والله خشيت لقتصاد باش اللبي رغبت راجل امك ههههه باش يخدمني في المصرف معاه ، كانك عليا لا بالي في اقتصاد لاهم يحزانون ولا حلمي
بُـتول :وشن حلمك
خدي منذر نفس كبير ورجع شبح لسماء والابتسامه رتسمت علي عيونه قبل شفايفه وقال بـ حماس وبهجه واضحه علي صوته :الكليه العسكريه
ضحكت بُـتول :اووو شرطي يعني
ضحك منذر ونزل رجليه وناض قعمز زين وتلفتلها وهوا يأشر لكتافه :يبدا فيه اكتر من نجمه هني وهيبه من عسكري لضابط لملازم
بُـتول :بس حني في بلاد تحكمها الملشيات مش جيش وشرطه
تنهد منذر ورفع كتافه :مش حـ نقعدو هكي طول العمر
ورجعت لبتسمه علي مبسمه :اكيد حـ تولي ليبيا زي زمان ويولي فيها شرطه وجيش موحد شرق وغرب
وتلفت لـ بُـتول وكمل :واني نبدا منهم
بتسمت بُـتول :حي نبداء اي حد يطول السانه نقوله هي احترم نفسك خوي شرطي ره
ضحك منذر :هههههه تي انتي بروحك بجيش امريكا
ضيقت بُـتول عيونها :الحق عليا ارقيلك في معنوياتك
منذر رجع اتكه علي الكرسي ورفع رجليه علي حاشة  حديد حماية البلكونه وشبحلها ببتسامه :محلاك لما قلتي خوي ههههه
بُـتول تنهد وهزت راسها برفعت حاجب :لاحولا ولا قوة الا بالله خيرك يافرخ حاستك اتقول حبيبي
منذر :ههههه ايه حبيبك وخوك شن فيها
ضحكت بُـتول وقعدت تشبحله كيف خدي طاسة النسكافي من علي الطاوله وشرب منها بهدوء خلاها تبتسم وهيا حاسه بـ إحساس حلو إحساس كانت فاقداته احساس الاخوه اللي منذر حسسهولها ووصلهولها بطريقه حلوه هلبا حلوه لدرجه حبت الحوش لكانت تركهه كره العمي وتكره روحها لما تجي فيه .
.
.
.
درس فَـاتح وهوا يشبح لـ السِـيفاو لفتح الباب وهوا يشبح لسيارت رجالته اللي جت قدام سيارتهم وهوا يرفع في تليفونه واتصل بـ القَـاسي لـ رد :ايواً ياصحيبي
بتسم السِـيفاو :شني وصلت
القَـاسي نزل تليفونه ورفع يده لـ زياد اللي ركب سيارته بـ بتسامه وهوا يرد علي تليفونه :ايوه سيدي
جاه صوت الصقر :شني صار
زياد :تم
الصقر :تمام ديرو لقلتلكم عليه
زياد :حاضر سيدي
سكر زياد التليفون من الصقر وتحرك بالسياره وخطم من جنب القَـاسي اللي ركب السياره ورد علي السِـيفاو :عشر دقايق ونوصل فيك
السِـيفاو :تمام
سكر السِـيفاو من القَـاسي وهوا يشبح لـ المكالمه لـ خشت عليه انتظار لـ كانت من محمد ، رجع حاول اتصل بيه بس ماشدش الخط لخلا االسِـفاو ينزل من السيـاره وهوا يحاول لين مل وسيب وهوا يرجع لسياره ويشبح لرجاله لـ حاوطو المكان ورجع تلفت لفَـاتح لنزل من السياره وهوا يحوس في المكان .
قعد السيِـفاو عيونه يلودو في المكان وهوا يراجي ، واول ماوصلاته رساله نزل عيونه طول وهوا يفتح فيها بس قبل مايقراها سمع صوت فَـاتح :سِـيفاو
رفع السِـيفاو راسه وشبح لـ فَـاتح لـ يأشر بـ يده لـ شاحنات القَـاسي لـ خلو السِـيفاو ينزل من السياره بـ بتسامه وهوا يرد علي محمـد :ايوه حميده
محمـد :تحركو بسرعه الصقر مدايرلكم كمين انت والقَـاسي
.
.
.
#يتبـع لـ البـــ9️⃣ـــارت
#كتـــابـة_اليَــاقُــوت

________________________________
بداء كتابة الرواية في تاريخ 5 / مـــــــ5ٰــــــايـو / 2020
تم انهاء كتابة الرواية في تاريخ 12 / اكتـــ10ٰـــوبر / 2020