عشق في بلاد حروبها لا تنتهي 4 ( 2017 )

البــ الســابع ــارت

_
_
عِــشق فـي بِـلاد حُـروُبِهـــا لا تنتّٰــهي 4
{ 2017 }
.
في البارت السابق
بتسمت بُـتول :حبه حبه ياحبوب حبه حبه ههههه
ضحك فَـاتح :ههههه تمام حبه حبه وشن ورانا ياحبوبه حني غيرك
وتلفت علي صوت علاء  لـ ناداه :فَـااااااتح
رفعله فَـاتح يده بـ معني نعم ، أشرله علاء بـ يده بـ معني تعالا وصيح :وين رعد هيا ركبنا لسطح
فَـاتح نزل تليفونه لوطه :اهو جايين
هز علاء راسه وركب وخلا فَـاتح لـ رجع شبح قدامه وهوا يشبح لـ رعد لـ طلع من المحل ، ورد علي بُـتول :بنستأذنوك ياباش مهندس توا
بُـتول :اوك حتي اني خوي ينادي نستأذنك
فَـاتح :تمام تشاو
وسكر منها وهوا يشبح لـ رعد لـ يشبح لـ سيارة محمد وقال :محمد وصل
فَـاتح :شكله هكي

قراءة ممتعة 💛
البــ الســابع ــارت
.
.
لــا يَــهم إذا مـرن الايــام بـدون هدف حققتُــه ، المُـهم أنَي لــم آُئذي فيـهـم احــد 💛
.
.
اتكي بضهره علي الكرسي وقال :القَـاسي هوا مهرب اسليحه بس مخشش خشمه حتي في تهريب المخدرات ، وشكله الصقر ميسرله اموره بمقابل يجيبله الروس لمعرقلين طريقه النذل يعرف يخدمها ويعرف من يصاحب
بتسم محمـد :علي قد ندالته غبي
ضيق السِـيفاو عيونه وتلفت لـ محمـد :كيف غبي بصحبته لـ القَـاسي ومساعدته ليه ترقي في خدمته وولا في منصب يهابو فيه الوزراء
رجع محمـد بضهره علي الكرسي وحط رجل علي رجل وقال وهوا يولع في السبسي :كان يخدم في مخه لهز فيه بلا فايده كان جاب راسك بسهوله ، خدي بضعه منك تسوي ملايين يقدر يبعتلك واحد من رجاله يوهمك انه تاجر ومهرب ويمسكك بـ الجرم المشهود من غير مساعدة هـ القَـاسي اللي باعه
وتلفت محمـد لـ السِـيفاو لـ ضيق عيونه وشبحله بـ نظارات خلت محمـد يضحك :هههه كنك يارا
السِـيفاو:جاب ربي الصقر مايفكرش زيك ره رحت في ستين الف دهيه من زمااان
غمزله محمـد بضحكه :باش تعرف نا ماكيفي حد
السِـيفاو بتسم :بغباء الصقر كسبت معرفت القَـاسي
ضيق محمـد عيونه:يعني توا بتتقابلو
هز السِـيفاو راسه :ان شاءالله
محمـد :ماتخافش مدايرلك كمين
السِـيفاو رفع حاجبه :وهدا طلبي منك تعرفلي كان مدايرلي كمين ولا لا
محمـد :تمام
ورفع راسه علي صوت رعد اللي خش ورا علاء وفَـاتح وهوا يضحك وفاتح يديه:عقيـــد
ضحك محمـد ووقف فتح يديه زي مامداير رعد لـ قرب وحضنه وهوا يكمل :ليك وحشه ياشرقاوي
.
.
رحيـلكـ لـن يُـنسي أبـداً ، فـ انت أصبحت مـن الخـاليدين الباقيين علـي عروش المظلومين الظالمين 🥀
#جبَــار
.
.
ضحكت رنيم :حبيب خالتو ستاحستك هلبااات
جاها صوت غيث الطفولي :تالي نونو هنا
زادت ضحكت رنيم وهيا تسمع في صوت نور :ههه قالك تعالي عندنا
رنيم نفخت وهيا تتلفت لـ ساجده و مـريم لـ شاورتلها:كملي والحقينا في البلكونه
هزت رنيم راسها وردت علي نور :الايام الجايه رعد قالي تو نوفعك ، المهم شن صاو
تنهدت نور وشبحت لـ غيث اللي تلفت يلعب بـ العابه وقالت :مش حـ يخلوني يارنيم مش حـ يخلوني نطلع من الجحيم هدا
رنيم :لالا مستحيل نخليك غادي وين عمر باه مش قال بطلعك وتكفل بـ طلوعك من غادي
نور :ايه بس عمي المهدي وقف وقال مانخليش صغار ولدي يتربو بعيد عليا
وخدت نفس بـ عيون دمعو وطلعاته وكملت :عمر قال اصبري لين تجيبي وترمي العده وبعدين ساهل
رنيم :ياعموي يااختي ياويتني جنبك ياويتني نقدو نقعد معاك
نزلو دموع نور :بنموت يارنيم قلبي ينبض بس علي الفاضي حاسه روحي من غير روح وكأنه روحي ندفنت مع صهيب
مسحت رنيم دموعها :الله يوحمه هدي سنة الحياة ماعندنا مانديوو الا بدعوه ليه
زادو دموع نور لـ نزلت راسها وهيا تخفي في دموعها علي غيث :مش قادره نتقبل كلمة الله يرحمه ، استغفرالله استغفرالله يارنيم لا اعتراض علي حكم الله نقول فيها وفي داخلي كل خليه تقولي اني معترضه اني معترضه ، موته جتني اصعب من موتت بوي وامي ، موته حرقتني يارنيم مش قادره نتأقلم ونعيش من بعده ، مش قادره بعد ماحسيت بحبه وبـ الأمان في حضنه ومعاه مشي وخلاني في الجحيم اللي حبيته بسببه واعره يااختي واعره كل شي يدكر فيا فيه كل شي لو ماصغاره معاي وفيا ره من يومها لحقته وماخليته بروحه
رنيم :قوي روحك علي خاطو صغاوكم علي خاطوه هوا محتاج لدعوتك ، وصغاوك محتاجيلك مايصيو تهملي ووحك واللي في بطنك وه هدا مايوضيش وبي ولا جبـار الله يوحمه علي الاقل حافظي علي الشي لخلاه فيك
مسحت نور دموعها وهيا ترفع في راسها لـ غيث لوقف قدامها وهوا قارن حواجبه زي ماكان يدير جبـار بـ تمام لـ درجه خلا نور تبتسم وهيا تشبحله خلاها لـ لحظه تتخيله قدامها وهيا تشبحله كيف قرب ومسحلها دموعها وتمتم بـ كليمات طفوليه مش مفهومه خلتها تتنهد وتقرب تبوسه وترد علي رنيم :اصلا مامصبرني غيرهم عارفه بوجودهم صهيب حـ يكون معاي ومحاوطني ديما ومش حـ ننساه منهم
تنهدت رنيم :نحبك هلبا اني اعوفي انه اختك ديما جنبك ومش حـ نسيبك
حضنت نور غيث لـ لف يديه علي رقبتها :حتي اني نحبك هلبا
.
.
ومــاسندي فـي هده الحيــاة غيرك يــاأخي 💛
.
.
قعمزت بُـتول علي السرير وهيا تشبح لـ الحبه اللي في يدها برغبه كبيره في الراحه وعدم التفكير .
غمظت عيونها وحطتها في فمها وفتحت عيونها وهيا تتلفت تاخد في طاسة لميه وتشبحلها بـ تأنيب ضمير وخوف اللي تملكها فجأة وخلاها اطلع الحبه من فمها طول وتدفل في الماده لـ افرزتها بسبب لعابها في لكلينكس ، وخدت كلينكش تاني وحطت فيه الحبه ودستها في القجر ورجعت اتكت علي سريرها بـ رعشت خوف وهيا تزمط في ريقها بـ دقات قلب زايده وهيا تحط في راسها علي لمخده وتغمظ في عيونها لـ رجعت فتحتهم اول ماسمعت فتحت الباب ، وهيا تنهض في روحها وتشبح في منذر اللي دخل راسه من الباب وقال :عادي نتقل عليك ونجي نرقد جنبك
قعدت بُـتول تشبحله وفي داخلها فكرت وكـ انه حس بـ خوفها ورهبت وحدتها وحتياجها لـ حد جنبها .
بتسمت بُـتول و دنتله وهيا تأشرله بـ يدها :تعالا
ضحك منذر وجي رقد جنبها وهوا يتغطا بـ الورغان وخدي نفسه بـ بتسامه واسعه وتلفت شبحلها كيف تشبح لـ السقف بـ هدوء :مش جايك نوم زيني
تلفتت بُـتول شبحتله وهزت راسها بـ معني ايه
رجع منذر شبح لـ السقف وقال :اني فرحان
ضيقت بُـتول عيونها :شني لمفرحك
رفع منذر كتافه :هههه تافه عارف روحي بس فرحان بيك اول مره نقعدو نهدرزو ونضحكو مع بعض من غير عركه ههههه واول مره نرقد جنبك
ورجع تلفتلها وكمل بـ ضحكه:اصلا جيتك وكنت مش متوقع ابدا تقوليلي باهي وكنت موتيلك سبه هكي كبريتها
ضحكت بُـتول :ههههه كلب عارفاتك حيوان
ضحك منذر بـ تنهيده :ياريت نقعدو ديما هكي
بتسمت بُـتول وقعدت تشبحله :شن هـ المحبه لنزلت فيا ههههه
منذر :هههه لا والله مش توا بس من زمان من لما كنا صغيرين بس كنت نخاف نقرب منك بسبب الترايح لعاطيتهالي
وضيق عيونه وتلفت شبحلها :ولا ماتدكريش لما دفيتيني من علي الدروج وجيت طايح علي راسي بس علي خاطر جيت بنلعب معاك
ضحكت بُـتول :وااااه قعد تدكر
منذر :امالا شني ماننساش اني
بُـتول :هههه ولا لما عطيتك طريحة نباش لقبور في المدرسه لما قلت انك خوي
منذر نفخ :وهداكا اليوم ينتسي كانت في السادس وانتي اولا عدادي مسحتي بكرامة امي الارض
تعلت بُـتول ضحكتها :ههههههه سوري كانت فيا الهبله شوي
منذر :وانتي الصادقه هلباااا وتوا زادت عليك حبتين
بُـتول رفعت حاجبها :مصحك كان زادت ره ماتحلمش ترقد جنبي توا
ضحك منذر :ههههه لالا علي دماغك انتي كيف ماتبي روحك
ضحكت بُـتول وتنهدت وقعدت تشبح لـ السقف بـ هدوء وبـ صمت لـ لحظات قبل مايقطع الهدو منذر لـ قال :بُـتول
تلفتتله بُـتول :نعم
بتسم منذر من غير مايشبحلها :نحبك
رتسمت بتسامه علي مبسم بتول طول وهيا تقرب منه تحط في راسها علي صدره وتحضن فيه :من غير درامه وتمرقد
ضحك منذر وحضنها وغمظ عيونه وكمل :برغم انك اسمط اخت في العالم بس مافيش زيك
شدت بُـتول ضحكتها وقالت :تمرقد خير مالزك
.
.
.
تــاني يــوم وفي عمارات وسط المدينه وفي وحده من شقق العمارات العاليات انفتحت البلكونه وطلع وهوا يصيح :تي بننشر الشلاتيت اصبرو
نفخ سامح وتلفت علي صوت البكرج لـ فاج وخلاه يشهق وهوا يجري يسكر عليه وعيط :يامعاذ الشياطيين مش قلنالك عينك علي ام البكرج
اتاوب معاذ وقال وعيونه في التليفون :اني يادوبي عيني علي روحي
خش نَــاصر وسكر البلكونه وهوا يجبد في المخده من تحت راس معاذ لـ عيط :تي خير امك
حدف عليه نَــاصر لمخده :صحصح وهيا
نفخ معاذ وناض بنعس وهوا يلبس في سبيدروه ورفع راسه شبح لـ سامح لصب القهوي في طواسي كاغط ومدله طاسه وشد زوز طواسي طلع بيهم :اني نزلت
لبس نَــاصر شنطة الطهر ودف معاذ اللي يتكسل وسكر باب الشقه ورجع تلفتله وجبده من شنطه لين معاذ صيح :تي القهوي يانعي القهوي شرتعت نصها
ضحك نَــاصر :تعالا ننزلو من الدروج باش تصحصح
معاذ هز راسه وتلفت :ننزل من امك مش من الدروج تي فوتني
رجع نَــاصر جبده وهوا يتنابش هوا وياه وصواتهم يرنو في العماره كلها بين عراك وضحك لين وصلو لوطه .
ركب معاذ ومتد علي لكراسي التالانيه :نقصو المسجل بـ نتمرقد مابين وصلنا
قوي سامح المسجل علي قوته وتحرك وشبح بـ ضحكه لـ نَــاصر لضحك وهوا يشبح لـ معاذ لـ عيط وهوا يحط في شنطه علي وجهه :صحصح خونا ورانا متحان
معاذ :وورانا طروف يبو يتعاكسو
سامح ضحك وهوا يطلع في تليفونه لـ شرين من جيبه :سكرو افومكم
معاذ ناض قعمز :هدا وين صحصحت اني جت انيه نهدرز
نقص سامح المسجل :يا.... سكر فمك
ضحك معاذ وسامح رد:ايوه
جاه صوتها :شني الجو
سامح :الحمدالله شني جوك انتي وسِـيفاو
مـريم :الحمدالله اليوم امي ورانيا بجو تعالا معاهم مستاحشتك
سامح سكت شوي وبعدها قال :عندي مانديـ...
قصت عليه مـريم :تقدر تأجل علي خاطر اختك ولا مانستاهلش
تنهد سامح :تمام تمام مع العصر ان شاءالله نخطم عليك
بتسمت مـريم :نستني فيك
وسكرت مريم منه بـ بتسامة فرح واول ماتلفتت انخلعت من السِـيفاو اللي كان متكي علي الرخامه وراها ويشبحلها بـ بتسامه لين زمطت ريقها وهيا تاخد في نفسها وترجع في شعرها التالي :خلعتني
السِـيفاو :بسمالله عليك
شدت مـريم بتسامتها وتلفتت:تبي فطور
وقف السِـيفاو علي حيله وقرب منها هلبا لين توقفت مـريم علي الحركه وهيا تحس في نفسه لـ يضرب علي رقبتها وهمسه :اليوم اني لبنديرلك لفطور
ولفتها ليه وهوا ينزل في عيونه لـ يدها اللي قعده ملفوفه بـ الشاش وشدها بـ خفه :شن حال يدك
ورجع شبحلها كيف منسمطه ومصدومه من تصروفاته لين خلاته يضحك وهوا يميل في راسه :ها الو وين وين
هزت مـريم راسها وهيا تستوعب علي روحها وقالت :اه شني
زادت ضحكت السِـيفاو لـ قرب وباسها من خدها بـ خفه وبـ سرعه وبعد :قعمزي وتفرجي كيف يندار لفطور يابرنسيسه
رفعت مـريم حاحبها وكيف بتتكلم بس السِـيفاو جبدها من يدها بـ خفه وبـ يده التانيه جبد الكرسي وقعمزها عليه :ارتاحي
وتلفت وخلاها تبتسم وهيا تشبحله كيف يوتي ويحوس قدامها وهيا مش عارفه شن ادير او شن تتكلم غير انها تبتسم .
.
.
كُـل البدايــات متوقعه الا البدايــات التي تُخــلق في بِـلاد حُـروُبهــا لا تنتّٰــهي ❓
.
.
صيحت جوري وهيا تسكر في الباب :الشاهي نزح خشو سكرو عليه
خبطت ريم علي خدها :يعطك بكشه بالقاسم راقد تو ينوض
جوري حطت يدها علي فمها :نسيته نسيته
وتلفتت لـ إينـاس لمقعمزه علي كرسي طاولة الجنان :اقعدي ماتروحيش اني عندي محاضره وروح خليك نتغدو مع بعض
إينـاس :غر بري انتي بري انتلفي
دفلت جوري عليها وطلعت جري علي تبيب عبدالمهيمن وخلت ريم تضحك :ههههه مهبوله ، ايه شن حال جدك
إينـاس رفعت كتافها :قالو مريض هلبااا امبارح بابا وعمي رفعوه المستشفي ومتوقعوش يشدوه
ريم :ياناري ربي يلطف بـ حاله وخالتي فاطمه اليوم بتبات غادي
هزت إينـاس راسها:للاسف ايه وبتخليلي لمهبله هدو وياريت حتي وسام معاي واااه ماتفكرينيش
ضحكت ريم :هههه حرام عليك علي اساس هاني شادلك راسك وهوا من يروح من المدرسه يمشي لنادي طول
إينـاس:لا حرام عليا وخيي الحق بس سما تبارك الله بـ عوض عشرين
وقفت ريم :ههههه تعالي تعالي نخشو نديرو فطور جعت
إينـاس:اوووف ماخاطريش نخش
ريم :تي هيا الحكيني
خشت ريم وناضت إينـاس لحكتها وهيا اول ماسكرت باب الحوش وتلفتت شبحت القَـاسي اللي طالع من داره وهوا يحك في شعره بـ يد واليد التانيه شاد بيها التليفون ويتكلم بـ صوت ناعس وعيونه قعدات مغمظات ومنظره كان يهبل ونفس الوقت مبهدل ههه .
بتسمت إينـاس وهيا سارحه فيه بس اول ماصيح استاقطت بـ روحها وخشت لـريم في المظبخ وهيا تسمع في صياحه :ريم
ريم :نعم
القَـاسي :وراس وخيتي طلعي سوريتي العربيه وحداديها و وتيلي قهوتي
ريم :حاااضر
واول ماسمعو تسكيرت باب الحمام تلفتت ريم لـ إينـاس :بالله كملي قلي ادحي غر نمشي نطلعها
هزت إينـااس راسها وقربت كسرت الدحيات وحطتهم في الطاجين وهيا مبتسمه وتتخيل في شكله ومره مره تتنهد ومخلعها الا صوت ريم :إينـاس
سكرت إينـاس علي الدحي وحطاته في صفرت لفطور وطلعت قدام باب المطبخ :نعم
ريم :جيبيلي طاسة اميه
تلفتت إينـاس وعبت طاست اميه وطلعت مشت لـ دار القَـاسي وهيا تشم في ريحته لغابقه الدار اللي مقلوبه بـ فراشاته وبطاطينه وتليفونات لحاطهم جنبه وكانت الدار دافيه عكس الحوش اللي متلج .
خشت مع دقات قلبها لـ زادو بـ خجل وكـ انه هوا معاهم في الدر وقربت من ريم لـ تنفخ وهيا تمس في الحداد :اوووووف مافيشي اميه مايبيش يبخ
إينـااس قربت قعمزت :حولي ياحماره مش راصه البطمه
ضيقت ريم عيونها :كيف
ساوت إينـاس لبريزه ورصت البطمه اللي اول مارصتها بخ الحداد لميه وخلا ريم تضحك :حي واني من امبكري نهبك زي الغبيه امالا كملي تحديد غر نديرله قهوته قبل مايطلع من الحمام
صيحت إينـاس :لالا نتحشم وين ماشيه مرات يطلع من الحمام
ريم :تي ارك فرحانه بالقاسم دوشه بين الساعه وساعه ونص ههههه ديري دير
بتسمت إينـاس وهزت راسها وطبست قعدت تكمل في التحديد اللي اول ماكملاته وقفت بشويه وعلقت السوريه علي يد الدولاب اللي جاها فضول انه تفتحه .
تلفتت يمين ويسار بـ خوف ورجعت شبحت لـ الدولاب وفتحاته وهيا تشبح لـ حوايجه ولـ ريحته اللي ماليه الدولاب ، بتسمت وهيا تغمظ في عيونها وتشم بـ كل حواسها في ريحته ، وبعدت سكرت الدولاب وهيا بتتلفت بـ تطلع بس لمحت جيبوطيه اللي ديما يلبس فيه محطوت علي المندار جنب فراشاته ، قربت منه وهيا تتلفت التالي بـ خوف وفي نفس الوقت بـ ضحكه علي روحها وعلي مغامراتها البسيطه وهيا تقعمز قدام الجيبوطي اللي رفعاته وشمت ريحته اللي حساستها وكـ أنه هوا قدامها وكـ أنه تمس فيه هوا مش في جيبوطيه .
بتسمت ورداته في مكانه وهيا تركز علي الكيسه السوده اللي تحته ، ضيقت عيونها وبعدت الجيبوطي علي الجنب وقربت فتحت الكيسه بشويه وهيا اضيق في عيونها وتشبح في كيسات صغار كـ حجم الكف ومعبيات بـ البودره وبعضهم بـ الحبوب برغم عدم فهمها لـ لحظه شن هادو بس في اللحظه لـ بعدها شهقت طول وهيا تفتح في فمها بـ صدمه وخوف اللي زادو اول ماحست بـ حد قعمز وراها بـ التمام ، واول ماتلفتت وهيا بـ تصيح سكرلها القَـاسي فمها بـ يده ويده التانيه لفها علي خصرها باش ماتحاولش تبعد وقال بـ تنهيده ممزوجه بـ ضحكه متوثره :انتي علاش مصره تفضحيني قدامك
رفعت إينـاس يداها وشدت يده اللي علي فمها وهيا تشبحله بـ دموع ملو عيونها خلو القَـاسي يخف من ضغط يده علي فمها وهوا يضيق في عيونه ويشبحلها بـ تركيز كيف حولت يده بـ يداها وهيا تاخد في نفسها بـ رعب واضح عليها هلبا ، وواضح علي صوتها اللي طلعاته :هـ هـدم مـ مـ ـخدرات
زمط القَـاسي ريقه وقبل مايتكلم سمعو صياح ريم من المظبخ :إينـاااس هيا شني كملتي
وكانت إينـاس بـ توقف بس شدها القَـاسي من يداها وهوا يبي يتكلم بس فكت ايناس يداها منه ودفاته وناضت بخطوات سريعه وهيا تحاول تتغلب علي رجلها لتعكز عليها وتزيد من خطواتها قبل ماالقَـاسي يشدها بس طلعت من الدار بـ سرعه وهيا تحس بـ خطواته لـ وراها ولحقتها لـ المظبخ لـ اول ماخشت قربت خدت جيبوطيها من فوق الطاوله وقالت بـ خوف :اني مروحه
تلفتتلها ريم :وين مروحه تعـٰ...
وقبل ماتكمل ريم كلامها طلعت إينـاس وخلتها مصدومه وهيا تطلع من المظبخ وتتلفت لـ القَـاسي اللي شبحاته ولا لـ الدار وخلاها تزيد تستغرب وهيا اضيق في عيونها وترجع تشبح لـ إينـاس علي صوت الباب الحوش لـ سكراته وهيا تطلع بسرعه من حوشهم وتمشي لـ حوشهم وهيا ترعش مع بعضها وكياس بودرت الهروين قعدات بين عيونها وهيا تسكر في باب الجنان وتتكه عليه وتحط في يداها علي قلبها اللي نبضاته من سرعتهم حاسه بيهم يدقو زي الطبول في ودنها .
.
.
.
قعد بَـحر يشبح لـ المبلغ لـ قدامه وبعدها تلفت لـ خاله لـ قال :30 ألف حتي نص الميلغ ماوصلناه
عمه فوزي :الله لا يسامحهم عارفين مافيش لا مرتبات ينزلو لا بـ حيلتنا شي مالقو يخطفو الا لـ علي قد حاله
تنهد خاله نوري :حسبي الله ونعم الوكيل فهم
بَـحر وقف :بارك الله فيكم الباقي تو ندبره ان شاءالله
عمه فوزي:شني بدير وانت ماحيلتك الا معاش 500 في الشهر
بَـحر :نبيع السياره والحوازه وكان اطريت حتي الحوش
خاله صالح :كيف بتبيع الحوش لالا ماتبيعاش وين بتسكنو وين بتعيشو فكر في القدام يابَـحر
بَـحر: شن بندير ياعمي امالا شن بنقولهم اصبرو عليا بالله خمسه سته سنين تانيات اللقط لفلوس ولا شني تي بوي بين يديهم والله كان نقدر نبيع روحي لما نبيع المهم نجيب بوي من بين يديهم
تنهد خاله وشبح لـ عمه فوزي لـ قرب منه وطبطب علي كتفه :ربي يفتحها ان شاءالله وان شاءالله خير
.
.
من سُــوء تفــاهم احيــانـاً ، يُــولد الظُـلم 💔
.
.
عيطت جوري :هبلتي هبلتي انتي
نفخت بُـتول :اوووف منك اوووف تي بنشوفه شوي بس ونمشي والله مامعطله
جوري :بري بروحك اني مش ماشيه معاك
بُـتول :خيرك هكي تي علي الاقل اقعدي وراي
هزت جوري راسها وقبل ماتتكلم سبقتها بُـتول في لكلام :تمام تمام اصلا كلكم نفسي نفسي لا صحبه لا كلام فاضي
وتلفتت خدت شنطتها و وقفت :خليك تو نمشي بروحي
ومشت وخلتها وهيا اطلع في تليفونها من جيبها وتاخد في نفس وترد بـ ضيق :الو
فَـاتح :صباح الخير باش مهندس
بتسمت بُـتول :صباح النور
فَـاتح :وين ماشيه
بُـتول ضيقت عيونها :اممم كيف وين ماشيه
فَـاتح :تلفتي يمينك
وقفت بُـتول في مكانها وتلفتت يمينها وهيا تسمع فيه يكمل في كلامه :السياره الكحله شبحتيها
بتسمت بُـتول وهيا تشبح فيه كيف فتح باب السياره ووقف وهوا يتكه علي الباب بـ يده وكمل كلامه :تقدري تجيني
هزت بُـتول راسها من غير اي تردد :اوك
بتسم فَـاتح ونزل التليفون وهوا يشبح فيها كيف قصت الطريق وقربت منه بـ بتسامه وهيا ترجع في شعرها لقصير ورا ودنها ووقفت قدامه :اهلين
فَـاتح :اهلين بـ نور العين
نزلت بُـتول عيونها بـ خجل لين خلت فَـاتح يضحك :اووو مانحسبكش تتحشمي
رجعت بُـتول رفعت عيونها فيه وهيا ترفع في حاجبها :وعلاش مش بنت زيني زي غيري
رفع فَـاتح حواجبه :بنت بس مش زيك زي غيرك
بتسمت بُـتول :والله وعلاش مش زيني زي غيري
هز فَـاتح راسه وقبل مايتكلم انتبه علي البنت لـ وقفت ورا بُـتول وقالت :بُـتول
تلفتت بُـتول طول لـ جوري لـ فنصت فيها وقالت :هيا ياسر
ضحكت بُـتول :ريلاكس جيجي هههه
ورجعت تلفتت لـ فَـاتح وقالت :وهدي صاحبتي الخوافه
ضحك فَـاتح :بجوده
غصبت جوري ابتسامه علي مبسمها وهيا تفرك في يداها بـ توتر وتشبح حولينها بـ خوف وقالت :بجوده بيك
واول ماتلفتت يسارها وشبحت نَــاصر لمقعمز علي المرشبيدي ويشبحلها ختفت بتسامتها ورجعت تلفتت لـ بُـتول:هيا بُـتول
فَـاتح :مزال
بُـتول رفعت كتافها :مش حـ تسيبني في حالي خلاص هههه نتلاقو
هز فَـاتح راسه :تمام
بتسمتله بُـتول وتلفتت وهيا تشبح لـ جوري اللي مدتلها يدها لين خلتها تبتسم وهيا تقرب وتشد في يدها وتقرب منها وهيا تمشي :احلي صاحبه
جوري نفخت بـ غضب :مهما اديري مستحيل نسيبك ياكلبه عارفتيني وله
ضحكت بُـتول وهزت راسها وهيا ترجع تتلفت التالي لـ فَـاتح لـ قعد يشبحلها ورجعت تلفتت طول اول ماسمعت عيطت جوري اللي طلقت يدها وهيا توخر خطوتين وتنفظ في يدها من القهوه لـ تبزعت عليها وعلي حوايجها من اللي خش فيها ، واول مارفعت عيونها وشبحت نَــاصر لـ ضيق عيونه بـ تسهويك وقال :اوووه ماشفتكش
هزت جوري راسها ورجعت شبحت لـ حوايجها لـ تلبزو وقبل ماترد عليه صيحت بُـتول :انت اكيد اعمي وماتشوفش تي دوشتلها بـ القهوه
نَــاصر بتسم :قولنا مش مقصوده تفضلي معاي لسيارتي ندير معاك الواجب
رفعت جوري عيونها فيه طول وقالت :عفوا
بُـتول :انت واحد وقح وقليل ادب
وتلفتت لـ جوري وجبدتها ومشت وخلت نَــاصر يحول في لبتسامه ويصيحلهم :حلال علي غيرنا وحرام علينا ولا شن
تلفتتله جوري والدموع في عيونها من كلامه الواضح انه تلقيح وهيا تشبحله كيف غمزلها ورجع تلفت قدامه ولبس نظاراته .
.
.
.
#يتبـع لـ البـــ8️⃣ـــارت
#كتـــابـة_اليَــاقُــوت

________________________________
بداء كتابة الرواية في تاريخ 5 / مـــــــ5ٰــــــايـو / 2020
تم انهاء كتابة الرواية في تاريخ 12 / اكتـــ10ٰـــوبر / 2020