عشق في بلاد حروبها لا تنتهي 4 ( 2017 )

البــ التــالث ــارت

_
_
عِــشق فـي بِـلاد حُـروُبِهـــا لا تنتّٰــهي 4
  { 2017 }
.
في البارت السابق
نزلو دموع مـريم :باهي واني شن دنبي
قرب السِـيفاو منها ورفع يده بـ تردد لـ وجها ومسحلها دمعتها :ذنبك كنتي تعرفيه ، لما خطفتك كنت نبي نساوم خوي بيك نحسابه خطيبك وربي نحسابه خاطبك قلت اكيد عرضه وشرفه مش حـ يرخي بيك بس طلع نذل خلاني نغلط معاك وخسرني خوي
ونزل بـ طوله علي طولها وقال :خوي مات واني غالط في حقه هلبا مات قبل مانصلح أغلاطي معاه ، وانتي مش راضيه تعطيني الفرصه نصلح اغلاطي معاك ، خليتيني واحل وضميري كل يوم يقتل فيا يامـريم كل يوم
قعدت مريم تشبحله ، تشبح لـ عيونه لـ مبين فيهم جرح ، وألم ، وذنب ، بس مش عارفه من شن ، مش عارفه ذنبه كبير ، لدرجه مش حـ تتخيلا .......

قراءة ممتعة 💛
البــ التــالث ــارت
.
.

حطت يدها علي فمها بـ صدمه وهيا تشبح لـ الفيديو اللي ماقدرتش تكمله وهيا تنزل في التليفون لوطه بـ عدم تصديق ، وقبل ماتستوعب اللي شافاته شرين تليفونها اللي رفعاته واول ماشافت رقمه ردت طول :انـ ـت انت شن درت ، مستحـ ـيل تكون نَــاصر اللي نـ عرفه مستحيل
بتسم نَــاصر :هدا وجهي التاني وكان نبي ندير اكتر من هكي غير انتي ماتعرفينيش
خدت إسراء نفسها :هوا درت فيه هكي امالا اني شن
نَــاصر:انتي بنت للأسف إنك بنت ، واللي ربوني علموني مانلعب بـ شرف حد ، لكن علموني اللي خاني نمسحه من حياتي
اسراء:نَــاصر اني نحبك انت والله والله كلمته هكي بجو مانحسابش بـ يكبر الموضوع
ناصر :هههه كيف كلمتيه بجو شن تشوفي فيا طرطور وراك مش راجل مش معبي عينك ولا شن
سكتت اسراء وماعاش عرفت شن ترد وهيا تسمع في نفسه العالي اللي واضح انه متعصب وكمل كلامه ليطلع من بين سنونه لمسكرهم بـ غضب :رقمي تنسيه زي مابتنسيني اللي زيك وزي الكلب الـ..... مايسوي الشبشب اللي لابسه توا وتهنو بـ بعض كان قدرتو
وسكر الخط في وجها وحدف التليفون علي الكرسي لجنبه وهوا يرفع في راسه لـ مؤيد لـ كان واقف وراه متكي علي الحيط ويسمع في مكالمته .
ضيق نَــاصر عيونه :خيرك
مؤيد :باه الإستفاده من لدرته في الولد ، تو علي خاطر نتايه بـ تنشر فيديو لـ صاحبك وضيعله هيبته
رجع نَــاصر بـ ضهره علي الكرسي وقال :حاشه الصحبه منه
مؤيد :في يوم من الأيام كان اسمه صاحبك
نَــاصر :وعلي خاطر هديكا الايام ضيعت هيبته قدامها هيا بس ومادرت اكبرمن هكي ، خسرته فيها زي ماخسر صحبتنا لا بيا ولا بيها خليته
ووقف وقرب من مؤيد :ماتخافش ماتوصلش فيا ننشر الفيديو بس وريته اللعب معاي واعر
وتلفت خش لدار .
.
.
.
سكرت إينـاس لكتاب بـ غل وشداته ضربتها بيه علي راسها :هدا شن فيه اه شن فيه حرقتيلي دمي الله يحرقلك دمك
شدت سما راسها بـ يداها الزوز :بشويه بشويه عليا خيرك هكي
إينـاس:تي شن بشويه ، نقولك يمين تقوليلي يسار
سما قلبت شفايفها وغمظت عيونها وقالت بـ تنقنيق :حي عليا حي والله شكلي ورقتي بتقعد بيضه تللش غدوه وبنحصل صفر وبعدها بنتهزب من الابله في الفصل قدام ليسوا واللي مايسوا
غمطت إينـاس عيونها وخدت نفسها وتلفتت خدت لمخده لـ غتصت فيها وجها وعيطت بـ القوه وبعدها حدفتها وراها وهيا تنزل من السرير وتجبد في الكتاب :جيبي كراساتك واطلعي وراي في الجنان
بتسمت سما من بين دموعها لمسحتهم وطلعت جري ورا إينـاس لـ لبست كبوطها وطلعت شحت الطاوله وزوز كراسي في الجنان وقعمزت وهيا تشبح لـ سما لـ ردت الباب وقربت وهيا متكمشه من السقع :واااه سقع حتي المعلومه تتجمد قبل ماتوصل
ضيقت إينـاس عيونها :شكلك تبيني نخش نتمرقد صح
سما عيطت :لالالا خلاص والله ندوبها ونخششها غصب علي اللي جابوها
بتسمت إينـاس وفتحت لكتاب :افتحي السطل اللي في راسك الساعه 1 وافهمي عليا
هزت سما راسها ورفعت حواجبها وهيا تحاول تفهم من إينـاس لـ مره تهدا وتشرح بشويه ومرا تصيح لين صوتها يتردد في الشارع كله .
تنهدت إينـاس وهيا تشبح لـ ساعة تليفونها :خلاص ياسر فيك الساعه 4
سما حطت يدها علي فمها وهيا تتاوب :مافهمت شي بس يلا بنرقد ماعاش فيها
واول ماركزت علي إينـاس لـ فاتحه فمها ورافعه حاجبها :هدا كله ومافهمتي شي
ضحكت سما :هههههه تي نبصر خيرك ههههه
نفخت إينـاس:قبل ماتتمرقدي ديريلي نص بـ طن
سما :تي ليل خلاص قريب انوض للمدرسه
إينـاس:باه بري كان مازال قريتك تعالي ادفلي عليا
سما رفعت كتافها :اوك تصبحي علي خير
وخدت كتاباتها وخشت وخلتها تشبحلها لـ لحظه بصمت وبعدها دفلت :تفوه عليك تفوه
ونفخت وهيا تنزل في راسها علي الطاوله وتغمط في عيونها بـ عدم تفكير وبـ دهن صافي وماقطع عليها الا صوت جاي من ورا السور :ايواً حبيبي
رفعت إينـاس راسها طول ورفعت حواجبها وهيا توقف وتقرب من السور وتحاول تسمع صوته لـ رجع وقال :بضعتي قامت حوروب فايزه ياقليبي ماعندك كيف اتشكك فيها رد بالك ايوه ههههه
حاوطت إينـاس وجها بـ يداها الزوز بـ بتسامه وهيا تتنهد وهمست :حتي من صوتك يهبل اوووف
وهزت راسها بـ ضحكه وهيا تتكه علي السلوم اللي متكي علي الحيط وتسمع في تهدريزه بـ بتسامه بس في لحظه ركزت علي السلوم بـ فكره خطرت في بالها خلتها تضحك وهيا تحط في يداها علي فمها ، وبعدها شدت السلوم وركبت بشويه لين وصلت لـ أعلي السور لشدت فيه بـ يداها وهيا ادور عليه بـ عيونها لين لقاته مقعمز في سيارته وهوا فاتح الباب لـ شاده بـ رجله ويتكلم في التليفون ويدخن .
بتسمت إينـاس وقعدت سارحه فيه وهيا تتنهد وتهمس لـ روحها :محلاااه ياربي
وطبست وهيا تشبح وين تحط رجلها في الدرجة السلوم وزادت ركبت واول مارفعت راسها وشبحتله لقاته يشبحلها وهوا ينزل في تليفونه لوطه وينزل من السياره :مني
شهقت إينـاس بـ خوف وبـ ستعجال عبيط نقزت التالي وطاحت هيا والسلوم اللي طاح عليها بـ تقربيع مع عيطتها اللي كتمتها بـ يداها .
قرب القَـاسي من السور وقال وهوا يحاول مايعلي صوته هلبا :يابنت شني روحك صعدت لـ السماء ولا قعده
نهضت إينـاس روحها وهيا تشد في يدها بوجع اللي جت كل طيحتها عليها ، وكانت بتسكت وماهيش راده علي القَـاسي ، بس زاد القَـاسي تكلم :تي تكلمي يابنت ره وربنا نجي نطق عليكم
خبطت إينـاس علي خدها وقالت :مافيا شي مافيا شي
بتسم القَـاسي :عايشه ميه ميه
حولت إينـاس السلوم من عليها بشويه وناضت وهيا تتوجع وردت عليه :لا 50 في الميه
ضحك القَـاسي :لا حولي ولا قوة الا بالله خشي وماعاش تعاوديها يابنت
بتسمت إينـاس وماعاش ردت عليه وهيا تستني في حركه منه او صوت بس ماعاش جاها لين عبست وهيا تتنهد وتشبح لـ يدها وقبل ماتتأوه منها جاها صوته :تي خشي يابنت هيا
نخلعت إينـاس من صوته اللي عجباته بـ مكر ونفخت بـ بتسامه رتسمت علي مبسمها وتلفتت خشت وسكرت الباب اللي اول ماسمعه القَـاسي هز راسه بـ تنهيده وهوا يرجع يقعمز في سيارته :عليك لقطه شينه هههههه
.
.
تُـدفن بعض الدكريـات في القـلب ، وتصبـح ومِيـض أمــل للـعيش 🥀
.
.
غمظ عيونه وخدي نفس كبير وفتح عيونه وهوا يشبح في الحَمَام لـ معبي الساحه يتمشي بين الناس الماره بدون خوف ، مأمن انه ماحد حـ يمسه اوحـ يقيد حريته حاط تقته فيهم الثقه لـ ضاعت منهم وبينهم .
حس بيد شدت كتفه :تقول امك قاطعه سرتك في ميدان الشهداء
ونقز قعمز جنبه :ياهو مؤيد نكلمو فيك
نفخ مؤيد :شن جابك انت
ضحك (معاذ): عملت خوك لجابتني هههههه
مؤيد :من قالك
معاذ تنهد :سامح امس اتصل بيا واليوم جيت طياره لكن مالقيتاش شكله ماشي للجامعه
مؤيد :بالله زيد كلمه قوله يفوته مش ناقصنا مشاكل علي خاطر النثايات
سكت معاذ لتواني وبعدها قال :اهو انت وقفت حياتك علي خاطر بنت
تلفت مؤيد شبحله :ماتت من تحت راسي وعلي خاطري توقف حياتي ويوقف قلبي علي خاطرها ، مش وحده خانتني مع اعز صاحبي بعد سنين حب واني نلحك فيها من مكان لا مكان زي الكلب
تنهد معاذ بـ الصوت وقرب لف يده علي رقبت مؤيد :الله يرحمها ياصاحبي الله يرحمها العايش ابقي من الميت ، صحصح وعيش اللي دير فيه لا يرضي ربي ولا يرضيها
وبعد وهوا يطبطب علي ضهره : المهم اني ماشي للجامعه فليل جاي بايت عندكم
مؤيد:علاش
وقف معاذ وتلفتله بـ رفعت حاجب :قولي ماتجيش ياراجل وخلاص
ضحك مؤيد :ههههه علي اساس مش حـ تجي كان قلتها
معاذ ضربه علي كتفه :تعرفني ماعنديش وجه ولا كرامه ههههه هي تشاو نتلاقو بعدين
وتلفت وهوا يطلع في تليفونه واتصل بـ نَــاصر اللي نقص مسجل السياره ورد :ايوه
معاذ:شني مني
رفع نَــاصرحاجبه :مني شني
ضحك معاذ:ههه تافه تي وينك
نَــاصر :متصندل في السياره قدام الكليه نراجي في سامح بجيب شيتات المحاضره وبننزلو ناكلو حاجه
معاذ :هي ياخوانا خودولي شيت وربي ماني عارف راسي من رجليا
نَــاصر :تي غر تعالا انت
معاذ :اهو جاي ربع نص ساعه نوصل فيكم
ناصر :تمام اوك
وسكر منه وهوا يضيق في عيونه ويشبح لـ المكالمه لخشت عليه انتظار قعد يشبح لـ الرقم لـ لحظات يدكر كيف كان الفرحه تملا قلبه اول ماتتصل بيه ويشوف رقمها وتوا الوجع والحقد بدي يملا قلبه .
خش وحطها في الحظر وقوي المسجل ....