عشق في بلاد حروبها لا تنتهي 4 ( 2017 )

البــ الحــادي عشــر ــارت

_
_
عِــشق فـي بِـلاد حُـروُبِهـــا لا تنتّٰــهي 4
  { 2017 }
.
في البارت السابق
هز عمر راسه وهوا يحول في جيبوطيه لحطه علي الطاوله وجبد الكرسي وقعمز :مرت #جبَـار جابت
رفع نَــاصر عيونه بـ بتسامه :بنيه
هز عمر راسه :ايه
وسكت شوي وبعدها كمل :شن صار في الحوش لقتلك عليه
نَــاصر :قتلك من يومها واتي والراجل عطيته عربون واول ماتجي نكمله الباقي ونستلم الحوش
مؤيد :عمي المهدي مش حـ يخليها تجي هني ومعاها الصغار
عمر :بيخليها ، لما يعرف هدا اللي يبيه ولده الله يرحمه اكيد بخليها ، وقلت يجو معاها هنيده وأيه اول فتره ، ومرات حتي اني نستقر هني
مؤيد:بتسيب ...... وكل شي غادي عادي
عمر :اهو انتم مسيبينها ومرتاحين بعيد وحتي اني نبي راحتي وراحت مرتي وصغاري ياسر هم وتار ودم
شبح مؤيد لنَــاصر لتنهد :اني طالع
عمر :علي خير
نَــاصر خش لدار وصيح :ماشي بنصيح

قراءة ممتعة 💛
البــ الحــادي عشــر ــارت
.
.
زمطت مـريم ريقها وهيا تهز في راسها :لا ماقالي شي
نفخت ساجده :اوووف اوووف امي بتهبل وهوا مايردش وفَـاتح مش من عادته مايروحش يومين وفوقها مايردش علي تليفوناته
حنين :بالله كان روح السِـيفاو قوليله يفتح تليفونه ولا ينزل يشوفها قلبها عليهم نار
مـريم هزت راسها بـ توثر :اكيد حـ نقوله
ساجده :غر نحطلك لعشي في الكوجينه
مـريم:خشي خشي
خشت ساجده ومـريم تلفتت لـ حنين لقالت :خوك قعد عندك
هزت مـريم راسها :ايه يستني في صحابه بيخطمو عليه خشو معاي
حنين :لالا بننزلو امي بروحها ، قولي لساجده تلحق
.
حطت ساجده سونية لعشي علي الرخامة وقربت خدت تفاحه نتشت منها واول ماتلفتت بتطلع سمعت صوته :مـريم
حطت ساجده التفاحه علي الرخامه وطلعت تجري بس جي قبالها سامح اللي ستوعب انه مش اخته و وخر وهوا يشبحلها انه هيا نفسها متع هداكا اليوم .
تحمحمت ساجده وتحشمت من اللقطه وجاها صوت مـريم كـ انه يد عون انقضها من حشمتها ، تخطاته ومشت لـ مـريم :هي تصبحي علي خير
هزت مريم راسها :وانتي من اهله
طلعت ساجده لتلفتت قبل ماتطلع وجت عينها في عين سامح لـ شد التفاحه لنتشت منها ونتش منها ببتسامه وخلاها تتحشم اكتر وهيا تسكر في الباب وتزيد من ضحكته لنتبهتلها مـريم :خيرك
ركز سامح علي روحه وهز راسه وحط التفاحه علي الرخامه:لالا غر لولاد يراجو لوطه مروح
بتسمت مـريم :شكرا لانك جيت
قرب سامح منها :قد مايصير نقعدو خوت
قربت مـريم حضناته بـ أنتماء ، و بـ احتياج اكبر ، وكـ أنها تقوله غرقت ياخوي غرقت في وحل سميك ويخوف ....
بعد سامح من عليها وباس راسها :هي تصبحي علي خير
وصلاته مـريم للباب :سلملي علي امي وبوي ورانيا
سامح :يوصل
ونزل وخلاها اتبع فيه بـ نظراتها لحس بيهم وهوا ينزل لدور لتحته اللي اول ماوصله قعد يشبح للباب الشقه لتلاقه قدامه هوا وياها هداكا اليوم بتسم وكمل نزول لوطه اللي اول ماطلع من العماره شاف نَــاصر ومعاذ يستنو فيه .
معاذ:عام تنزل
سكر سامح باب السياره :الاسنسير واقف شن بندير في عمري نزلت من الدروج
نَــاصر :هني تسكن اختك
هز سامح راسه :ايه
شبحله نَــاصر وقال :مادكرش فيكم في حاجه
رفع معاذ حاجبه وضحك بـ تسهويك :ايام تالثه تانوي لما قعدنا ندورو علي سكير نبو نجربو هههههه نفس العماره هدي دلونا عليها وله
سكت سامح وتلفت شبح للعماره وبعدها رجع تلفت شبح لـ نَــاصر لرفع كتافه :مش عارف حاسها نفسها بالتمام
هزت سامح راسه بـ عدم رضاء وقال :لالا غر عمارات الـ..... يشبهو بعض امشي امشي فكنا من السوس
.
.
.
بتسمت الممرضه وهيا تركب في الكنيولا:نزفت هلبا فـ تحتاج لاكبر كميه لدم
حط القَـاسي راسه علي لمخده ورفع تليفونه بـ يده التانيه وقال :تقعد هلبا
الممرضه :لالا جو الساعه ساعه ونص اني مره مره نجي نشوفها واصلا ماتعبش هيا
هز القَـاسي راسيه :شكرا حبوبه
بتسمت الممرضه وتلفتت طلعت وخلاته يرجع في نظره لـ تليفونه وهوا يشبح لـ الرساله اللي مكتوب فيها رقمها ، قعد يشبحله لـ لحظات بـ بتسامه وبعدعا رص عليه واتصل ......
.
دارت إينـاس الحوله وهيا تشبح لـ جوري لشاده ضحكتها بالسيف وتشبح لـ ريهام لنفخت :اوووف ياريت قولتولي لما كلمكم كنت نبي نكلمه ونظمن عليه
إينـاس :شن بتكلميه هدي هوا خواته وخمس دقايق وسكر
ريهام شبحتلها بـ رفعت حاجب :وكان هدا حتي اني مش معطله غر نبي نطمن عليه
إينـاس :اظمني ياحنه مافيه حتي حاجه علي قولته زي لحصان
نخصتها ريم اللي فنصت فيها بضحكه :انوسه خيرنا ياحبي
طلعت إينـاس تليفونها لشرين من جيب جيبوطيها وقالت :شي شي ماخيرنيش
جوري رفعت حاجبها وقالت بـ بتسامه :مني المتصل
رفعت إينـااس كتافها وهيا تشبح لـ رقم الغريب لـ يتصل :مش عارف رقـ...
وزمطت باقي كلمتها وهيا تستوعب انه مرات القَـاسي ، وقفت طول وكملت كلامها لـ قلباته :شكلها وحده من صاحباتي غر ارد قبل ماتسكر
وطلعت وخلتهم يضحكو وريهام مش فاهمه عليهم :تي خيركم تضحكو وخيرها هدي مهبوله بنت جيرانكم شكلها ، درهتلي كبدي علي الكلمه تكشخ
ريم :هههه الله غالب هبلها ولد خالتك هههه
ضيقت ريهام عيونها بـ عدم فهم :شني
جوري :ههههه شي شي
.
ردت إينـاس باب المظبخ عليها وفتحت الخط وهيا تحط في التليفون علي ودنها من غير ماتتكلم وهيا تراجي في صوته لـ جاها بعد لحظات :نايمه
إينـاس :لا
القَـاسي:باهي كويس ، شن حالك توا
إينـاس :الحمدالله انت شن حالك وحال رجلك قعده توجع فيك
القَـاسي بتسم من احساس الخوف عليه لوصله منها :في خير خيري الحمدالله مايوجع فيا شي
سكتت إينـاس وماعاش عرفت شن ترد عليه وهيا متحشمه ومخضوضه وكـ أنه واقف قدامها ، تحمحمت وهيا بتتكلم بس سبقها القَـاسي لقال :وليتي حبيبتي صار
غمظت إينـاس عيونها بـ القوه ورجعت فتحتهم وقالت بـ خجل :واللهي ما اني قلت هما فهمو غلط وصدقو روحهم وبعدين اني ماعاش عرفت شن نقولهم بعد هداكا اليوم
ضحك القَـاسي :ههههه باهي باهي خيرك خايفه انتي عادي وغر يفهمو كيف مايفهو
إينـاس :كيف عادي اكيد مش عادي
القَـاسي رفع حاجبه :وعلاش مش عادي شن مش عاجبك اني
إينـاس :لا مش هكي يعني غلط نخلوهم فاهمين حاجه مش صح
القَـاسي :ونخلوها صح  ياعيوني
رفعت إينـاس حواجبها بعدم فهم وقالت بـ كل عباطه :اني عيونك
ضحك القَـاسي :ايه عيوني وكان تبي حبيبي
هزت إينـاس راسها وهيا تحاول تستوعب كلامه :هوا انت انضربت برصاصه في رجلك ولا في راسك
القَـاسي :ههههه في قلبي الباين
ضحكت إينـاس وهيا تحط في يدها علي فمها وناضت قعدت تنقز زي المهبوله وماوقفتش الا لما سمعاته:وين مشي حبيبي
رجعت إينـاس هدت نفسها وقعمزت وقالت وهيا تاخد في نفسها اللي راح من النقز والفرحه :ايه شن حالك
ضحك القَـاسي وفهم انها متحشمه ومش عارفه شن ترد عليه ....
.
.
.
رفع فَـاتح راسه لـ الباب لنفتح ولشاب لـ حطله الاكل علي الارض وقرب فكله يديه وتلفت طلع وسكر عليه الشيلا وخلاه يمسح علي معصم يديه لنجرحو من الحبل ونزل عيونه لـ المكرونه لجايبينها ، تنهد ومسح علي وجهه وهوا يرفع راسه يشبح لطبقات اللي فوق كـ تهويه لـ الشيلا المضغوطه وكان ضي لقمر امبين منهم ، رجع راسه تكاه علي الحيط وهوا حاس روحه في قبر في ضيق مابعده ضيق ، حاس جسمه فاشل وتعبان ، في الـ 24 ساعه لقعدهم هني فكر في كل شي في كل لداره في حياته من الخير لشر ، بس دقيقه شن هوا الخير يافَـاتح لدرته شن هوا ، قولي يافَـاتح ادكرلي عمل صالح درته في حياتك عمل خير تدكر بيه روحك ، حاجه كويسه تريح بيها ضميرك ، ولا شي خير درته ، كله بيع سم يقتل في ارواح ناس بـ البطئ ، ويزيد يبنج في ضميرك لـ في غيبوبه .
زمط فَـاتح ريقه وفتح عيونه وفاق من بحر افكاره علي صوت الرصاص ودوشه لجت من برا فجأة خلاته يوقف ويقرب من الباب وهوا مش فاهم الدوشه والرصاص والتفجير لزاد اكتر مع صوت شباب المقر لـ كلهم يتحاوسو ويطلعو برا وهما يتجارو لـ مخازن الدخاير والاسليحه لـ ولعت فيهم النار وقعدت الاسليحه والدخاير يتفجرو من غير ماحد يقدر يوقف ولا شي .
.
.
.
تــاني يــوم الصبــح ....
طبعة بوسه علي خدها الملائكي الناعم وبعدت وهيا تفتح في عيونها لسالو منهم الدموع مع ابتسامه موجوعه ارتسمت علي مبسمها وهيا تهمسلها :ياريتك نورتي حياتي قبل خمسه شهور ياريتك كان البابا مراجيك علي اعصابه وفرحان بيك هلبا كان يبي يشوفك ويهمس بـ الأذان وبـ اسمك في ودنك كان حلمه انتي حلمه يافطومتي حلمه ياماما
وخدتها في حضنها وهيا تبكي ومابطلتش الا لما انفتح عليها الباب وخش غيث ورائد ووراهم رنيم لقالت :جينا جينا نحنا جينا
ركب غيت علي السرير وقرب من نور وقال وهوا يقلب في شفايفه ويرفع في يديه يهسح في دموع نور :ماما تبكي ها
مسحت نور دموعها وبتسمت :دموع فرح هدو بـ بيبينا الجديد
عيط غيت بـ فرحه :بيبينا ها بيبنا ابي نشوفها
قربت رنيم منهم وهيا تبتسم بـ دمعه بين رموشها علي حالت اختها لتفظر القلب .
حطت نور فاطمة علي السرير لقرب منها غيث وباسها وقرب من أمه وحضنها :حلوه هباااااا
ضحكت نور بدموع سالو وهيا تحضن فيه :وله زي بابا حلوه
هز غيث راسه بـ معني لا :لا ني زي بابا حلو هيا حلوه زيك
عضت نور علي شفها ودموعها زادو نزلو وهيا تحضن فيه ليها اكتر و تشبح لـ رنيم لتحاول تخفي دموعها لـ مقدرتش تقاومهم .
.
.
.
نزل بَـحر من التاكسي لخلصه وخش لـ حوش اخته وهوا شاد التليفون ولاهي فيه واول ماحس بـ حركه في الجنان رفع راسه وهوا يلمح في طيفها يتحرك جنب السور لـ مدرقه بيه روحها وتشبحله واول ماحست بـ نظراته تلفتت تبي تخش انخبط راسها في حاشيه الحيط لخلاها تعيط وهيا تشد في جبهتها بـ يداها الزوز وتغمط في عيونها بـ ألم وفي داخلها ، غبيه غبيه واااه راسي تكسر .
نفخت ونحت يداها من علي جبهتها وهيا تشوف في يدها اللي تلوتة بـدم الجرح البسيط لخلاها تقلب شفايفها وهيا تشبح لـ الدم ، نفخت وفي خاطرها ، كله منك يابحر خليتني مهبوله بيك وانت ولا معبرني ، واول ماتلفتت شهقت وهيا توخر خطوتين التالي :انـ ، انـت
ضيق بحر عيونه ورفع يده اشر علي جبهتها :دم
مسحات إلهــام جبهتها بـ كم يدها وقالت من غير اهتمام بـ جرها من خجلها منه لـ واصل لحد الموت اللي واضح عليها من توترها :عادي مش هلبا
شدلها بَـحر يدها لـ علي جبهتها من مرفقها وبعدها من راسها ، لين إلهَــام حست بـ نبضات قلبها ورعشة سرت في جسمها مش قادره تتحكم فيها من لمساته وهيا ترفع في عيونها تشبحله كيف طلع بـ يده التانيه كلينكس من جيبه ومدهولها :ماتمسحيش بـيدك خودي لكلينكس
زمطت إلهــام ريقها وخدت لكلينكس منها :شـ.. شكراً
بَـحر :شن اديري هني تراقبي فيا
رفعت إلهَــام حواجبها بـ خجل منه ومن فضيحتها قدامه بس تنهدت بـ راحه اول ماشرين تليفونه اللي طلعه من جيبه وهوا يرجع يرفع في راسه ويشبحلها كيف تلفتت خشت تجري بـ رهبه لين خلاته يبتسم وهوا يرجع يشبح لتليفونه لـ أول ماشاف الرقم تلاشت ابتسامته ورد :الو نعم
جاه صوته :خلي امك تجيب لفلوس اليوم ، ورد بالك تغلط راهو امك حـ تبات معاي
بَـحر خدي نفسه :تمام اللي تبوه
.
.
.
خش محمـد لـ مبني المقر وهوا يشبح لـ الشباب لـ يتحاوسو في بعضهم ولـ التوتر والاجواء المشحونه ، بتسم بـ خفه وتلفت مشي لـ غرفة الصقر اللي اول مافتحها شبح الصقر اللي بعثر كل اللي علي المكتب بـ يده بـ عصبيه وصيح :ولاد الـ ....... الـ ...... كان ماوريتهم النجوم في عز الضهر كان ماقتلتله خوه والد الـ....
ورفع راسه في زياد وكمل بـ صياح :جيب امه والد...... اليوم بنبعتله راس خوه نوريه مع من يلعب
صيح محمـد :هدي ياصقر هدي
زادت صيحت الصقر تعلت:انت ولا كلمه
محمـد اشر بـ راسه لـ زياد بـ معني اطلع ، طلع زياد وسكر الباب وراه وخلا محمـد اللي قرب من الصقر وقال :ماديرش حاجه تندم عليها ، نحنا توا في امس الحاجه لـ السِـيفاو
خبط الصقر يده في الطاوله بـ القوه وشبح لـ محمـد بـ عيون حمر غاضبه تايره :اني مانحتاج لحد وبدات ليه الكلب الـ....
محمـد هز راسه :لا تحتاجه السِـيفاو سكر عنا طريق الـ.... وماعاش نقدرو ناخدو اسليحه ودخاير لـ خسرنها من تجار غير القَـاسي لـ طيرته بـ عملتك ومستحيل يحملك مره اخرا
وسكت بـ بتسامه وهوا يشبح لـ الصقر لـ زاد توثره وهوا يتلفت يخبط في يده في الحيط اكتر من مره لين ايده ادمدمت بجروح نزفت منها الدم وهوا يرجع يشبح لـ محمـد لـ خفي بتسامته وكمل :انت في حاجة السِـيفاو والقَـاسي والا مانقدروش نستقبلو الدفعه الجديده عشان ماعندنا اسليحه ولا دخاير ليهم وكان ماستقبلناهمش بيسحبو منك الاقدميه وبوجهوهم لـ المقرات لخرا هديء ياصقر وخلينا نفكرو في هدنا بينا ، عشان مانخسروش مناصبنا واكيد منصبك اهم  من راس السِـيفاو والقَـاسي صح
مسح الصقر علي جبهته بـ حرقه سيطر عليها وقال قبل مايتلفت ويطلع :تصرف انت الموضوع عندك ياطقه
وطلع وقربع الباب علي محمـد لضحك وهوا يقعمز علي الكرسي لتكي عليه بـ ضهره وحط رجل علي رجل وطلع تليفونه من جيبه واتصل بـ السِـيفاو لرد عليه من اول تشرينه :ها طقه
محمـد :شن رايك شويه علي لبحر في عز الشتاء
بتسم السِـيفاو وهوا يسكر في باب الحوش ويتكي عليه :في عز التلج كان تبي غر يكون معانا فَـاتح وعيوني ليك
محمـد :تم يارفيق
سكر السِـيفاو من محمـد ورفع عيونه في باب المظبخ اللي حس بـ حركت مـريم فيه ، قرب بشويه ووقف قدام الباب وهوا يشبح فيها كيف واقفه علي الكوشه وتتكلم في التليفون :مافيا شي يا(ايلاف) انسي سألي
ايلاف :متأكده مافي شي
مـريم ضحكه ضحكة مزيفه رافقتها بـ كلامها :خيرك انتي غر نبي نسأل عادي شن قالو علي راجلي لما سألو عليه حب الاطلاع عالي عندي اليومين هدم
ضحكت ايلاف : ياي بس ولا يهمك حـ نقصقص رؤوف وسراج
بتسمت مـريم :تمام سلميلي علي خالتي ولاولاد وروان هلبااااا وعلي عمي عبدالحكيم
ايلاف :هوا بنقولك سلميلي علي السِـيفاو بس ماتجيش هههه
ضحكت مـريم :ههه مهبوله سكري مع السلامه
سكرت مـريم وتنهدت وهيا تفتح في الكوشه وطلعت الكيكه حطتها علي الرخامه واول ماتلفتت نخلعت وهيا توخر بـ شهقه وتحط في يداها علي قلبها .
بتسم السِـيفاو وقرب صب طاسة اميه وتلفت مدهالها :بسم الله عليك
خدت مـريم طاسة لميه منه من غير ولا كلمه وشربت وهيا تشبح لـ الارض وركزت في رجليه لقعدو يقربو منها اكتر وبصوته :شكله عندك هلبا اسأله
حطت مـريم طاسة لميه علي الرخامه وهيا تاخد في نفسها من قربه:اسئلة شن
نزل السِـيفاو علي مستوى طولها وشد دقنها بـ يده وخلاها تشبحله :لما تبي تعرفي عليا حاجه تعاليلي اني واسئليني ماتمشي لحد ولا تسألي حد عليا ، تعاليلي اني وتأكدي مستحيل نكدب ولا نلف وندور عليك
مـريم :اني خايفه ومش مرتاحه حاسه روحي في كبوس طويل ماعاش يبي يتم كل شي ملخبط وكل شي مش قادره نستوعبه وكل شي غريب ومش عارفه علي شن وشن بنسأل ومش قادره ندير ولا ردت فعل
السِـيفاو :مقدر شعورك وحالتك عارف لعشتيه ولعيشتهولك هلبا وصعب بس بـ اذن الله يجي اليوم ونرتاحو يجي يوم والكبوس هدا يتم
وطبع بوسه علي جبهتها وبعد طلع من المطبخ وخلاها واقفه تفكر في كلامه وفيه وفي تصروفاته وفي هدوئها اللي مش معتاد ابدا ، هدوئها اللي مستغرباته المفروض بعد لسمعاته عليه تقلب الحوش فوقي لوطي تصيح تعيط تتصل بـ بوها وخوها يجو ياخدوها بس لا كل اللي داراته الصمت العذر التفهم ، عدراته ومش عارفه علاش حست بيه من عيونه مش ناقصه ابدا هم وعياط وصياح ومشاكل وعراك في الوقت اللي الخوف محاصره انه يفقد فيه فَـاتح بنفس الطريقة لفقد فيها رائد
.
.
.
فتحت بُـتول شنطتها وطلعت 60 دينار ومدتهم لـ بسمه لتنهدت وقالت :اسمعي اني ماعنديش الا اربعه بس والولد لناخد منه مختفي ماعاش يرد عليا
بُـتول :اعطيني زوز والحبه عليها 30 دينار اكيد مش حـ يطول وحـ يرد عليك يعني مدبيه يبيع
سكتت بسمه لقعدت تشبح لـ بُـتول لـ لحظات وبعدها خدت منها لفلوس لـ حطتهم في شنطتها وطلعت حبتين كانو في كيسه صغيره شفافه ومدتهم لـ بُـتول لـ خدتهم بـ بتسامه :عندك علم لما خديتها رقدت طول خفت ندير حاجه وننفضح ههه
بسمه ضحكت :ههه لالا ماتخافيش هما يهدو لعصاب ويرخوك وتحسي روحك فرحانه هلبا بس مايغيبوش في العقل ولا يهبلو زي لحبوب التانيات
بُـتول رفعت حاجبها :معلومه جديده باه لقلتيلي كان هدا ره قعدت ناخد فيهم ونرقد اوك خلي نتلاقو لما يكملو من عندي
وناضت خدت شنطتها وتلفتت وهيا ترد علي تليفونها :ها جوريتي
جوري :تي وينك
بُـتول :اطريت نمشي الجامعه نسيت ماخديتش شيت
جوري :اما شيت كلهم واخدينهم مع بعض
بُـتول نفخت :اووف تحبي تقصقصي هلبا طلع عندي واحد ناقص قلت نخطم ناخده خير مايتم من المصور المهم اني قريب نوصلك
جوري :نستني ماتتعطليش
وسكرت جوري من بُـتول وتلفتت لـ إينـاس لصيحت :هي انتي الراجل كيف خش يبدل وين مقربعه عليه
حولت ريهام يدها من منيلية باب دار القَـاسي وقالت :مانحسابش خش اني نحسابه قعد في المربوعه مع الرجاله
جوري بتسمت :لالا توا كيف خش بـ بدل
ريهام :غر نسيت تليفوني الداخل لما رقدت فيها نبيه
جوري :غر يبدل وخشي خوديه
هزت ريهام راسها وتلفتت خشت لصاله وهيا حاسه بـنظرات إينـاس لبتاكلها بـ عيونها من غلها وماحستش بـ روحها الا بـ ضربت جوري وضحكتها :هههه ايوه حني غيوره واااك تخلو الواحد تنفتح نفسه علي الحب
إينـاس نفخت :اوووف جوري ماخاطريش فيك ولا في غيره لا في حب لا في بطيخ صيفي زودي جيبيلي مفاتيح الحوش يبو صواني قالو
جوري ضيقت عيونها :بري جيبي بروحك مش ماخاطركش فيا ملحي امالا
وخشت للمظبخ وسيبتها تنفخ عليها بـ القوه وتلفتت وهيا اتمتم بـ كليمات مش مفهومه خشت لدار لبنات خدت لمفاتيح حوشهم وقامت تليفونها وهيا تشبح في خوها وسام متصل بيها ، عاودتله وهيا تتلفت لـ الباب لطق ونفتح مع صوته لجاها :جوري
تجمدت إينـاس في مكانها وهيا تشبحله كيف اول ماشافها رتسمت علي شفايفه لبتسامه ، نزلت عيونها لدمعو لرجله الملفوفه بـ الشاش ولـ القيلات اللي مساعدينه في المشي ، رجعت شبحتله ودموعها نزلو لين خلت القَـاسي يخش ويسكر في الباب الدار ويقرب منها وعيونه ماحولهمش منها كيف نزلت عيونها منه وهيا تنخلع من صوت وسام لصيح :تي الوو إينـاس
تحمحمت إينـاس :ها نعم شن تبي متصل لقيتك
وسام :هدا وين شفتيها ليا من اصبح متصل بلاش توا
عضت إينـاس علي شفها وهيا تحس بـ قربه منها لخلا توثرها يزيد اكتر وهيا تسكر من وسام واول مارفعت راسها وشبحتله نزل القَـاسي لـ مستوي طولها وهمس :دموع هدوم ولا مية ورد
نزلت إينـاس عيونها منه بـ خجل ومسحت دموعها وقالت بـ صوت متقطع وهيا تشبح لـ رجله :حـ ـالك بـ ـاهي رجلك كويسـ ـه
ميل القَـاسي راسه :حالي باهي حالك باهي
هزت إينـاس راسها وهيا تحاول تبعد عيونها منه :الحمدالله
رفع القَـاسي حاجبه :وهـ دميعات نازلات علي خاطري
زمطت إينـاس ريقه :لا بس اني راسي يوجع شوي وبعدين ولد جيرانا
وسكتت شوي وهيا تدكر في كلمته يومها (...:مافيش باس عادي زي وخيتي هههه)
ورفعت عيونها فيه وكملت :وزي خوي واجعني حالك
قعد القَـاسي مركز في عيونها الحمر من لبكي ولدموعها لـ ينزلو علي خدودها الحمر مكملات طريقهم لفمها لـ يرعش وهيا اضم فيه تزمط في ريقها ومره تعض فيه تكبت في عبره كابحتها داخلها .
قرب القَـاسي من غير تردد وطبع بوسه علي خدها بنوعمه زي نوعمة خدها لقعد يتحسس بـ لحيته الخشنه عليه ويهمس بـ صوت هادي :انتي خليتي فيها خوت يابنت الجيران
وبعد ميل راسه قبال وجها ورفع يده مسح دمعه سايله علي خدها وقال :طلعت امية ورد 🌺
وغمزلها بـ بتسامه قبل مايبعد يطلع من الدار ويخليها رافعه حواجبها مع فمها المفتوح بـ صدمه وهيا تفكر في داخلها لو ناضت الصبح زي ماصر ولا قعده تحلم ، زعما يا إينـاس هدا حقيقي ام حلم ، رفعت يدها تحساست بيها علي خدها مكان بوسته وردادت لـ روحها بـ همس :اكيد حلم
.
.
.
#يتبـعلـ البـــ1️⃣2️⃣ـــارت
#كتـــابـة_اليَــاقُــوت
________________________________
بداء كتابة الرواية في تاريخ 5 / مـــــــ5ٰــــــايـو / 2020
تم انهاء كتابة الرواية في تاريخ 12 / اكتـــ10ٰـــوبر / 2020