عشق في بلاد حروبها لا تنتهي 4 ( 2017 )

البــ الـــرابـع والعـــشريــن ــارت

_
_
عِــشق فـي بِـلاد حُـروُبِهـــا لا تنتّٰــهي 4
  { 2017 }
.
.
في البارت السابق
رفع فَـاتح عيونه لـ باب الزنازانه لـ انفتح واول ماشاف رعد وقف طول وقال :رعد
رفع السِـيفاو راسه طول ووقف :شني لجابك هني مش بعتلك مع محمد تبعد علي الانظار تي خيرك انم يارعد خيرك ماتسمعش في الكلام
قعد رعد يشبحلهم بصمت لين تسكرت الزنزانه عليهم هما التلاته وفَـاتح قرب منه بريبة وربكه وقال :رعد خيرك شن فيك
شبحله رعد وقال :عضم الله اجركم في علاء
رفع فَـاتح حواجبه بصدمه وقال :شني تقول انت
وهز راسه وتلفت لـ السِـيفاو لـ شد راسه ورجع قعمز لوطه علي ركابه وسجد علي الارض وهوا يخبط في راسه بشويه ويردد :لا ياربي لا ، لا ياربي لا

قراءة ممتعة 💛
البــ الـــرابـع والعـــشريــن ومــاقبــل الأخــير ــارت
.
.
لمــا الخونـه تجيـكـ مرتيـن مـن نفـس الـشخص ، يــا انـكـ غبـي يـا تتغــابــا 🤚🏻
.
.
اتكئ القَـاسي بضهره علي الكرسي وهوا يشبح في العسكر لـ محاوط حوش رعد ويفتشو فيه ، رفع تليفونه واتصل وهوا يدير في مكبر الصوت ويراجي في الرد لجاه في اخر لحظه :شني صار
شبح القَـاسي العسكر لـ طلعو وهما واقفين علي زياد لـ مبين من ملامح وجهه العصبيه ، ورجع القَـاسي شبح لتليفون وسكر المايك وحطه علي ودنه وقال:تم ياصحيبي
بتسم محمد وشبح لـ الصقر لـ ابتسامته من الودن لـ الودن وهوا يخش لـ مكتبه :تمام نتلاقو يارفيق
وسكر محمد من القَـاسي ولحق الصقر لـ طق وخش عليه بـ بتسامه زي بتسامة الصقر لـ رفع تليفونه لشرين بـ يد وبـ التانيه اشر بيها لـ محمد بـ معني خش .
خش محمد وقعمز بـ هدوء وعيونه في الصقر لـ رد علي تليفونه وقال:بشر يازياد
تحمحم زياد :الحوش نظيف ياسيدي مالقينا شي
ختفت لبتسامه كليا من ملامح الصقر بـ صدمه خلاته يوقف :كيف مالقيتو شي مش قتلكم حطوله حشيش في حوشه قبل ماتطلبو العسكر
زياد :ايه ياسيدي واني معاهم لما حطوه لكن توا مالقينا شي تقول فص ملح وداب
عيط الصقر :يا...... ماينعباش عليكم في شي يا.....
وسكر الخط وحدف التليفون علي المكتب بالقوه وهوا يسب ويعاود تحت عيون محمد لـ خفي ضحكته وقال وهوا يوقف :شني صار
تلفتله الصقر وخبط يده علي الطاوله :كلاب لكلاااب
.
.
وفـي غمــرة غيــوم السمـاء الجميلـة لكـ تتفجــأة بـعدم اتزانـك علي الطيــاران وتسقـط ☁️🍃
.
.
فـــي الليـــل
سكرت نور الضي وردت الباب ومشت لـ المظبخ وهيا تجبد في الكرسي وتقعمز بـ تنهيده خلت هنيده تتلفتلها :كيف حالها
رفعت نور كتافها :بتهبل
هنيده نفخت وقعمزت علي الكرسي اقبالها بـ ملامح متعبه متوتره خلت نور اضيق عيونها:خيرك شن فيه
هنيده :خيره نَــاصر امبكري
نور :شي قال يبي يرفعنا لبنت نخطبوهاله
رفعت هنيده حاجبها :بنت مني
نور :مانعرفش والله مانعرف وجوي ماخلانيش عندي فضول نقصقص الحق قتله خليها ايام الجايه
ورفعت عيونها لـ هنيده وكملت :وفرخه أيه مش عارفه خيرها شكلها متعاركه مع نَــاصر من لما روحت وهيا في الدار وجبهتها مجروحه ماخلتنيش حتي نداويهالها
مسحت هنيده خدها بيدها وقالت :مادويهاش لانه مزال الجروح جايينها
ضيقت نور عيونها:كيف مافهمتش
هنيده :عمي سليمان اتصل بـ عمر وقاله يروح بيها علي خاطر عطاها لولد صاحبه
شهقت نور :كيف يعطيها كيف تي خيرها العيله الحرفه هدي خيرهم
هنيده :مش عارفه كيف بنقولها كيف فرحت بـ القرايه والجو هني اووووف اوووف
وقفت نور بعصبيه وهيا تتلفت علي طقت الباب ، خشت لصاله لصغار وخلت هنيده لـ مشت فتحاته وهيا تشبح في عمر اللي خش وقال :وين أيه
هنيده تنهدت :قعده في دارها
عمر :ناديها في الكوجينه
وكان بيتلفت يخش للمظبخ بس وقفاته هنيده :عمر
تلفتلها عمر :روحه
بتسمت هنيده لـ لحظه قبل ماتتلاشه في اللحظه لبعدها وقربت منه :اقنع عمي يخليها قوله اني خوها ومانبيش نعطيها باللهي عليك حبيبي هيا كيف فرحت بقرايتها
عمر تنهد ورفع يدها باسها :لو الود ودي مانعطيهاش الا برضاها لكن اني مش جبـار اني مانقدرش عمامك واللهي مانقدرهم ياحبي
خدت هنيده نفسها وهزت راسها وهيا توطي فيه بحزن خلا عمر يقرب يبوسها علي راسها وقال :بري ناديها
.
.
اعلـٌم انكـ النــار و أريــدكـ ، ومتشـوقـه لـ الإحتـراق 🔥
.
.
خشت إلهَــام لدارها جري والدموع سابقينها علي خدودها وتلوحت علي سريرها وهيا تستسلم لشهقاتها لعلو اكتر مع صوت امها لـ لحقتها مع ابتهال لسكرت باب الدار وتلفتت شبحت امها لـ قربت من إلهَــام:وراس بنتي تحوليه من راسك مدام خوك قال مايصلح بيك خلاص تلقي نصيبك تو بتعادي خوك علي خاطره
رفعت إلهَــام راسها وقالت من بين دموعها :ايه نعاديه هوا شن خصه كان بابا قال باهي اه شن خصه ، وفوقها يعبي في راس بابا ويقوله مايصلحش مش عيب عليه يقول علي خو مرته هكي
تنهدت امها ( ساميه ) :هوا يعرفه اكتر منا وبعدين قوليلي من وين عنده لفلوس هدي كلها في ليلها وضحها خدي سياره وحوش ، باهي كان داسهم طلعهم طلع بيهم بوه اللي لما انخطف باه اللي فوقه واللي تحته باش يجيب حق فدية بوه الله يرحمه
سكتت إلهَــام وهيا تتذكر في كلام بَـحر الغريب والمتناقض ، ورفعت عيونها في امها لكملت كلامها :امسحي دموعك وتو يجيك نصيب احسن منه ان شاءالله
مسحت إلهَــام دموعها وقالت :مانبيش غيره ياماما وفهمي ولدك انه اني نبيه ولو كان نطلع لبابا ونقولهاله
وقفت ساميه :لا حولي ولا قوة الا بالله انتي بتجيبي اخرتي باتجيبي اخرتي
وطلعت وخلت ابتهال تقرب منها :إلهَــام خلاص
عيطت عليها إلهَــام:خليني بروحي خلوني في حالي
نفخت ابتهال ووقفت طلعت وخلتها تاخد في تليفونها وهيا تمسح في دموعها بعبت واتصلت بـ بَـحر ، مره الاولي سكر عليها ، التانيه ماردش ، التالته رد في اخر لحظه بـ عيطه :شن تبي في .....
حطت إلهَــام يدها علي فمها وهيا تحاول تكتم بكاها وطلع صوتها :انـ ـي نبيـ ـك
هدي بَـحر طول من تعصبيه وهوا يتنهد ويتكي بضهره علي كرسي السياره وقال :لا انتي نصيبي ولا اني نصيبك حلي عليا يابنت الناس وفكك من المشاكل مع عيلتك
زادت عبرت إلهَــام مع صوتها لعلي :نبيها المشاكل اني نبيها خيرك هكي مش قتلي كان تتخلي عليا بتقتلني علاش تبيني توا نتخلا عليك
بَـحر :خليك من لكلام وشوفي واقعنا خوك معاه حق واني قايلهالك مانصلحش بيك
إلهَــام:بس نبيك اني نحبك
زمط بَـحر ريقه وماعاش عرف شن يرد عليها وسكت وهوا يسمع في صوت بكاها وشهقاتها ولصوتها لجي بعد لحظات صمت وكسرة بيه سكونهم :بَـحر
بَـحر :نعم
إلهَــام:ماتسيبنيش باللهي عليك
تنهد بَـحر ورجع راسه التالي وهوا يغمظ في عيونه بشعور غريب ومتناقض لحد السخريه . منه فرحان وسعيد ومنه مضايق وغاضب ، غاضب لدرجه ماقدرش يزيد يتكلم معاها ويسمع دموعها وهوا ينزل في التليفون من علي ودنه وسكر الخط في وجها وخلا دموعها يزيدو من سيلهم وهيا تحدف في التليفون بـ عيطة قهر طلعت من وسط قلبها ، قهر انه بعد ماوصلت في اخر درجه عثرت وطاحت للقاع مره تانيه .
وقفت من بين دموعها وطلعت من الدار ومشت لـ الحمام لـ قربعاته وراها بـ القوه وخلت ابتهال لوقفت وهيا تشبح لـ امها لقالت :خليها تو ينفعها لدير فيه في روحها
تنهدت ابتهال ومشت لـ الحمام لـ طقت عليه :إلهَــام
وزادت طقت وهيا تنادي بـ اسمها بس إلهَــام ماردتش عليها وهيا تشبح لـ مراية الحمام لـ لحظات تتأمل في دموعها الماليين عيونها وخدودها قبل ماتنزل عيونها لـ يدها لـ شاده بيها شفرت الحلاقه ( اللاميته ) .....
.
والمضحــكـ في الأمــر ، قلبـي لازال يـنبض 🥀
.
.
ويــالا سخــرية الــنصيب منــا ، يَـلم شملنــا بـ أشخـاص لـم نفـكر بهـم الا بـ لـحظة كـره 🍂
.
.
فتحت رنيم عيونها بخلعه من صوت الصياح لـ خلاها توقف وهيا تجبد في وشاحها من علي السرير وتلبس فيه وتطلع جري وهيا تشبح فيهم كلهم في الصاله واول مازادت قربت تعلا صياح نَــاصر :تي كيف يعطوها كيف شن في دماغهم هدم شن في دماغهم العيله هدي رانا في 2017 في 2017 وقعدين يبيعو في بناتهم علي مصالحهم ويزوجو فيهم قطوس في شكاره
تنهد عمر وتلفتله :خلاص يانَــاصر ماتكبرش الموضوع شني يعني مش جديد علينا زي معطينا الاولات حتي أيه زيهم وأهم متهنين وربي يهنيها حتي هيا
ضحك مؤيد لمقعمز بهدوء بستهزاء وقال :متهنين هلبا مشاءالله
نَــاصر :متهنين تي اما هني امالا من الاء اللي يوم عند راجلها وعشره حرجانه
نور :عنده حق ياعمر البنت كيف فرحت بقرايتها حرام عليكم عشمتوها وتوا بتردها للقبر غادي ، كان تشوف حالتها كيف بتموت من لبكي
وشبحت لـ مؤيد لـ مقعمز و لهنيده لقربت من رنيم وقالت :ادوو قولو حاجه
رفعت هنيده كتافها بـ معني ماعندي ماندير وشبحت لـ عمر لـ مسح علي وجهه بديه الزوز ورجع شبح لنَــاصر وقال :شن بندير باهي شني تبو مني ندير راني وربي مانقدرهم ولا نقدر السانهم
نَــاصر خبط رجله في الحيط ورجع تلفتلهم :كلكم كنتو ادمو في جبـار وعمايله لكن والله مايقدركم حد غيره وربي مايقدر العيله الحرفه السوده هدي غيره
وتلفت بخطف لـ نور لـ هدت من عصبيتها طول اول ماذكر اسم جبـار وخلاته يستوعب علي روحه وهوا يتحمحم ويهدي لـ لحظات صمت عمت عليهم كلهم قبل مايكسر مؤيد عليهم الصمت :باهي خلينا ندو ماعهم وانت خوها ياعمر عندك الحق تمانع زيجتها كان ماتبيش
عمر :باه وعرضت بنوض بوي ويقولي بنتي واني حر فيها تي مافيش معاهم حل مافيش
هز نَــاصر راسه وتلفتلها وقال :فيه حل ، مش اني ولد عمها واني ليا الأحقيه بيها وله خلاص بنت عمي واني نبيها
شبحوله كلهم بـ نظرات متفجأة خلت نَــاصر يرفع في يديه :غدوه ماشي معاكم ونبيكم توقفو معاي
وتلفت طلع وخلاهم بـ ستغرابهم وهما يشبحو لبعض .
.
.
أصــريت عليكـ ، واتمنــي اصراري مــايخيب 💛🍃
.
.
تـــاني يــــــوم
قعمزت سميه قدام بُـتول اللي تشبح للارض بهدوء :لا امتي بتقعدي هكي
بُـتول :لين نموت
سميه :لـ من طالعه راسك مسكر قلنالك ماينفعش بيك راهو متع مخدرات عيلته ماتصلحش
بُـتول :نبيه
سميه مسحت علي وجها بعصبيه كامدتها بسيف :راك حـ تندمي
بُـتول :نبي نندم
سميه :مش بعدين تقوليلي ياماما زودي ، راهو مافيشي امان مايبيع في المخدرات الا يعني مدمن ، ماتأمنيلاش مرات يروحلك سكران ويضربك مرت يروحلك واخد حاجه ويقتلك
رفعت بُـتول عيونها فيها وقالت :نبيه يقتلني
سكتت سميه وماعاش عرفت شن ترد عليها وهيا تشبحلها لـ لحظات وبعدها وقفت وقالت بعصبيه :نحيت يديا منك بري خوديه وجعلك معاد وليتي ، لكن حطي في راسك يابُـتول عليا نوتيك ونطلعك من عندي ماناقصك شي بس اول ماتطلعي انسي انه تطلبي مني المساعده ولا انه نطبطب عليك وقت ماتحرجي ان شاءالله يقدادك ماخصني فيك
وتلفتت طلعت من الدار وهيا تاخد في تليفون بُـتول من علي الطاوله ورجعت خشتلها وحدفتهولها قدامها علي السرير وطلعت وخلتها تشبح لتليفون لـ لحظات قبل ماتسمع صوت باب الحوش تقربع وبهار لجتها تجري :بثو
رفعت بُـتول عيونها فيها بتنهيده خلت بهار تتنهد زيها وهيا تقرب تقعمز قدامها :بتخسرينا كلنا علي خاطره
بُـتول رفعت كتافها بدموع ملو عيونها بـ حيره خلت بهار تقرب وتشد يداها :اني مش حـ نسيبك امتي ماتحتاجيني حـ تلقيني جنبك
وبتسمت بضحكه وكملت بـ بتسهويك :كان مامتش من قلبي
ضحكت بُـتول وهيا تفك في يداها منها :اوووف منك ومن تسهويكك البارد
ضحكت بهار وقربت حضنتها بسيف من بين تعافير بُـتول لـ تعيط عليها :تي حولي حولي
واول ماسمعو صوت باب الحوش انفتح وصوت منذر لصيح :امي
بعدت بهار من علي بُـتول وهيا توقف تبي تمشيله بس وقفت بُـتول وهيا تشد في يد بهار وقالت :اني بنمشيله
وتخطتها وطلعت من الدار ومشت لـ للمظبخ لوقفت قدام بابه وهيا تشبحله كيف حط الشكاير علي الطاوله وقال ظناً منه انها امه لواقفه قدام الباب :جبتلها حاجات من برا خوديهملها وماتقوليلهاش مني
نزلو دموع بُـتول من حنيته عليها برغم لداراته فيه وقالت :اني اسفه
تلفت منذر طول وشبحلها كيف قربت منه وهيا مطبسه راسها :سامحني
منذر :لا عادي اني لسامحيني تخطيت حدودي حسبت روحي خوك
رفعت بُـتول راسها فيه :ماتقولش هكي
حول منذر عيونه منها وقال :اهو كولي كان بتاكلي وكان هدا لوحي
وكان بيتخطاها وبيطلع بس قربت بُـتول منه ولفت يداها علي خصره وحضناته وقالت من بين بكاها :واللهي اسفه واللهي ماكان قصدي ندير هكي ، اسفه منذر سامحني واللهي نحبك هلبااا انت خوي انت سندي مانقدرش نستغني عليك بكل ماديرش فيا هكي
تنهد منذر ولف يديه عليها علي صوت صيحت بهار لقربت منهم وهيا تنقز تحضن فيهم :تصالحو تصالحو تي نحنا اخوا مالينا الا بعضينا
ضحك منذر وضربها علي راسها بخفه خلاها تبعد وهيا تقرن حواجبها وتقول :ماعاش تضرب قلبي يوجع
تلفت بُـتول براسها لي بهار وهيا قعده حاضنه منذر وقالت بصوت قعد مجروح من لبكي :تعرفي كان ماتبطلي سيرت قلبك وربي لما تحصلي طريحه نباش لقبور مني
بهار زادت نقرنت حواجبها :واه عليا وااه اهي ولت بُـتول لحقيقتها
ضحك منذر عليهم وقال :راني جعان ياخوا
بعدت بُـتول من عليه وقالت :اني تو نديرلكم غدي
بهار هزت راسها وشبحت لـ منذر :شكلنا بنقعدو جعانين
شبحتلها بُـتول وهيا تربع في يداها بنظره خلت منذر يزيد في ضحكته وهوا يجبد في الكرسي ويقعمز :ههههه تي ديري ان شاءالله محروق ناكله اني
هزت بُـتول حواجبها لـ بهار لـ دارت الحوله بعيونه بتسهويك ههه.
.
سـ تضـل بين طيــات قـلبي الــمُحب لـكـ إلـي اخـر انفــاسي يـاأخـي 🥀💔
.
.
.
قعمزت سما وهيا تشبح لتليفون إينـاس لـ يشرين ورجعت شبحتلها وقالت :رقم شكله بالقاسم
قعدت إينـاس تغسل في لماعين ومادارتش ردت فعل خلت سما تتنهد وهيا تتلفت لـ امها لخشت عليهم وقالت :بري انشري لحوايج
نفخت سما وناضت مشت وخلت فاطمه تقعمز وشبحت لـ إينـاس لتغسل في لماعين بصمت وهدوء ماقطعاش عليها الا صوت امها لقالت :الناس اتصلو ويبو ردنا
وتنهدت وكملت :وبوك قال مانقدرش ارد بالقاسم ، واني قعده سعاد ماكلمتني حيرتوني ، واللهي لا حيرتوني شن بندير
ورجعت شبحت لـ إينـاس لمستمره في صمتها ، وكملت :تي تكلمي قولي حاجه
تلفتت إينـاس وكانت بتتكلم بس سكتت اول ماشافت جوري لخشت مع سما وقالت :السلام عليكم
تلفتتلها فاطمه :وعليكم السلام نورتي يابنتي
بتسمت جوري :النور نورك عمتي شن حالك
فاطمه :الحمدالله
سما :ماما هاني يدور علي شورت الكوره متعه مالقيتاش زودي شوفيه نفخلي راسي
وقفت فاطمه :امس كيف غسلتهوله وين تلفتوه
ومشت ولحقتها سما وخلت جوري لـ شبحت لـ إينـاس لبتسمت وقالت :شني الجو
رفعت جوري كتافها :انتي لشن جوك
إينـاس:الحمدالله
جوري :بس الواضح غير هكي ، تي كان من زيك نطير من الفرحه ههههه
إينـاس:علي شن بنفرح واني عارفه عميمه سعاد ماتبينيش ولا بنفرح علي لسمعته وعلي انه ......
وسكتت وهيا تتساقط علي روحها وكملت وهيا تغير في باقي جملتها :باللهي خليني ساكته ياجوري
تنهدت جوري وقالت :ماما مش قصدها حاجه هيا تحبك بس ...
وسكتت وهيا مش عارفه شن تكمل ، تقولها بس رافضه علي اعاقتك او شن بتقول .
مسحت إينـاس دمعه في مدمع عينها وتلفتت:فاهمه وعادرتها ولو كنت مكانها حـ ندير زيها فـ من الاول نسكر الموضوع من عندي خير ماتصير مشاكل اكبر
جوري :ماتقوليش هكي لو علي امي واللهي لما تقتنع وبدات بالقاسم حلف غيرك يحرم عليه
رجعت إينـاس تلفتت لجوري وقالت بـ رفعت حاجب :قال هكي
جوري هزت راسها :ايه
تنهدت إينـاس وهيا تدكر في رسالته ( نبي نشد في يدك ونطلع من غرقتي من لوسخ هدا وربنا نبيك اني )
خدت نفسها وهيا تنتبه علي روحها علي صوت سما لخشت عليهم وقالت :خاطري في نسكافي تشربو معاي
جوري :اني نشرب عادي
سما :تم اتصلي بـ ريم تجي
جوري :تمام اني طلعه بنقعمز في جنان
إينـاس:نكمل غسل لمعين وجاياتك
هزت جوري راسها وطلعت وهيا تتصل بـ ريم لـ ردت عليها طول :ها شن تبي
جوري :اسلوبك يااختي اسلوبك
ريم :اختصري هيا المسلسل بيكمل شن تبي
جوري :الله يرزيك فيه ، تعالي حوش عمي رجب سما بدير نسكافي قتلك تعالي اشربي معانا
ريم :هي شوي يتم المسلسل ونجي
وسكرت الخط في وجه جوري لـ رفعت حواجبها :لا حولي ولا قوة الا بالله خزي عليك
وتنهدت وخشت حطت علي رقم نَــاصر وهيا مترداده تتصال قعدت لـ دقايق تفكر لين نفخت وهيا ترص علي الاتصال وقعدت تراجي في رده لي ما جاهاهش وخلاها اضيق في عيونها بضيق قلب وبكسرة خاطر .
.
هَــل لـي بـ عُــذر يُجبـر قلبـي الـذيّ تعـلق بـكـ بـ سهـوة عقـل 💔🥀
.
.
وفـي عـز إحـتِـيـاجـكـ لــ حـد يـفـهـمـكـ ، تَـلـقـا نـص عَـاجـز عـن فـهـمـكـ والـتَـانـي يـسـتَـغـبـاء يَـفـهـمـكـ 🥀🚫
.
.
حدفت أيه المشط علي السرير وعيطت :شني اني لعبه ، لعبه بين يديهم واحد يبي يبيعني وتاني يبي يتزوجني باش يزيد عذابي ولا شني
رنيم :اهدي عذاب شني لتدوي عليه مش خيرلك ياخدك نَــاصر علي واحد ماتعرفي اصله من فصله
أيه ضحكت :نَــاصر هههه
وتحولت ضحكتها لدموع نزلو علي خدودها :تي هدا عذابي اصلا
نور تنهدت :باهي غر اهدي وخلينا ندوو بشويه ونديرو حل
هنيده :فكري زين علي الاقل نَــاصر حـ يخليك تكملي قرايه مش هداكا اكيد زي تفكير عمامك متزمت
شدت أيه راسها بين يداها :ماحد فاهمني ماحد تي اما حل هدا انتم تقولولي يا أيه ماتخشيش النار تعالي وخشي لجهنم هكي نفهم في كلامكم اني ره
وتلفتت طلعت من الصاله وهيا تبكي وكانت تبي تمشي لدار بس حست بـ يد شدت يدها من التالي وجرتها واول ماتلفتت وستوعبت انه نَــاصر عيطت وضرباته علي يده :حول حول من عليا انت التاني حول
جبدها للمظبخ وطلعها لجنان من باب المظبخ ودفها قدامه واشرلها بصبعه علي فمه وقال :سكري فمك
زادت أيه عيطت عليه وفكت يدها منه :حول من عليا ومانيش ساكته شن تبي مني انت شني اه خليني في حالي مانبيكش ومانبيش تعاطفك ولا زيجتك خليني في بلاي
نَــاصر :ومن طلب راي امك انتي من طلبه
عيطت أيه من بين دموعها بـ عصبيه من لهجته البارده :شني من طلب راي شني بتتزوج عرصه انت
نَــاصر :ايه عرصه ، علي اساس تو اللي جايك هدا بيطلبو موافقتك عليه مه بيعطوك قطوس في شكاره وماحد طالب رايك وحتي اني لما نقول نبيك ويوافقو واكيد بوافقو ، ماحد بيطلب موافقتك انتي
هدت أيه طول وهيا تستوعب في حقيقة كلامه لخلا شهقات بكاها هيا لتزيد وقعمزت لوطه علي الارض وهيا تردد :حسبي الله فيكم حسبي الله
نزل نَــاصر وقعمز قدامها وقال :نوضي وياسر دراما ، علي الاقل معاي بتلقي حريتك وبتكملي قرايتك
رفعت أيه عيونها فيه وقالت من بين دموعها :وبتحمل عليا جميل علي هدا ، اني مانبيش هكي اني نبي لنتزوجه ينسيني حاجه اسمها خوف حاجه اسمها قيود وقوانين لعايشه فيها مش ناخد حد بيحمل عليا جميل علي خاطر دارلي هدي ودارلي هدي زيك انت
تنهد نَــاصر :انتي تعرفي طبعي لبصايري لما نقولك هكي نبصر عليك ونبي نغيظك مش قصدي نحسسك بجميل
قعدت أيه تشبحله لـ لحظه قبل ماتنزل عيونها وتمسح دموعها بـ عبت وقالت :حتي كان اني مانبيش ناخد حد يكرهني وحامل عليا
نفخ نَــاصر وعدل تقعميزته وهوا يتكي علي الحيط :لا حامل لا بتجيب نوضي سلم بنت عمي نوضي كب توتي حوايجك غدوه ماشين لـ ....
غمظت أيه عيونها بغيظ منه ورجعت فتحتهم فيه :انت شني اه شني هـ البرود اللي فيك تلاجه تلاجه تي نقولك مانبيكش مانبيش نتزوجك
نَــاصر رفع كتافه :واني نبي نتزوجك
أيه:باش تعذبني وتزيد اطلع روحي
هز نَــاصر راسه :ايه ، وشي تاني لانه خاطري نتزوجك ونجيب منك عشر صغار باش يساعدوني في تطليع روحك لانه مشاءالله انتي بسبع اروح
رفعت أيه حواجبها فيه بـ صدمه من بروده وبصارته برغم المشاكل لـ صايره و بعد لحظات ضحكت من بين دموعها لـ قعدات ينزلو وهيا تشبحله وخلاته يبتسم :هيا نوضي وياسر بكي
مسحت أيه دموعها ووقفت معه وهيا تتلفت بـ تخش بـ يأس بس وقفها نَــاصر :أيه
لقتلته أيه وهيا قعده تمسح في دموعها :ها
نَــاصر :حطي في راسك اني ماقلتش نبي نتزوجك الا واني متأكد انه نبي نتزوجك لذاتك مش علي خاطر شفقه تمام
قعدت أيه تشبحله لـ لحظات وبعدها قالت :مش عارفه علاش شاكه انك ملبوس بجني العاشق
ضحك نَــاصر وقرب ضربها علي راسها بخفه :جني امك كريمه خشي خشي ياعنشكلك خشي
شدت أيه مكان ضربته وتلفتت خشت وقالت :ماعاش تضرب
خش نَــاصر وراها وجبدها من تشرتها وقربها منه وباسها علي راسها مكان وين ضربها وبعد تخطاها وخش وخلاها تحط في يدها علي راسها ومش عارفه تبكي ولا تضحك ولا تفرح ولا تستغرب من اللي صاير .
.
ظننت طِيــلت سنَـوات حيــاتي أنــي أكــرهكـ لـ أتفجــأة في شُهــور قليلــه بـ عكـــس ذالـكـ 💘
.
.
.
...... بــــــعد مرور أسبــــوع ......
وفي بداية الاسبوع الجديد افرجو علي فَـاتح ورعد والسِـيفاو بعد مانعرضو علي النيابه وتبين انه مافيش اي دليل يدل انهم يتاجرو في الممنوعات وبـ جهد من محمد والقَـاسي انه مايخلوش الصقر يدير حركه يركب عليهم القضيه طلعو برائه .
.
فَـ أما إينـاس فـ كانت طول الاسبوع في ريبه وربكه ولخبطه لزادت عليها اكتر لما سعاد لـ تنازلت قدام القَـاسي ومشت خطبتهاله رسمي بعد مافسخ الخطبه من ريهام لـ صارت بينها وبين ريم وجوي مناقشه وزعل لـ ماهمتش جوري ابدا بسبب تفكيرها في نَــاصر لـ ماعاش قدرت تتصل بيه وتتنازل علي كرامتها وكبريائها وهيا تراجي في أتصال منه من بعد هداكا اليوم بس للاسف ماعاش اتصل بيها نهائياً وهوا لاهي في المشاكل اللي صارت بينه وبين عمه سليمان لقال انه خلاص عطي كلمه لراجل انه يعطيه أيه لـ حالتها في الويل .....
.
حولت أيه اليرغان من علي وجها بعيون متورمه من لبكي وهيا تشبح في اكرام لـ خشت عليها وقربت قعمزت لوطه وتكت بـ يداها علي السرير وتشبحلها :نايضه
فتحت أيه عيونها وشبحتلها بـ دموع سالو علي خدودها خلت اكرام تتنهد وهيا تمسحلها في دموعها :ياسر بكي وادعي ربي هوا لقادر يحلها
هزت أيه راسها :مـ ـش حـ تنحل انـ ـي اني عارفه حظي
تنهدت اكرام وبعدت وهيا اطلع تليفون أيه لعطاهولها عمر لخداه منها قبل مايروحو ، طلعاته اكرام من جيبها وحطاته قدام أيه وقالت :ربي قادر علي كل شي وقادر يصلح من حظك ماعاش تقولي هكي
شبحت أيه لـ تليفون وقالت :علاش هدا
اكرام :نَــاصر قالي نعطيهولك شكله يبي يكلمك
ووقفت وكملت :ردي بالك الاء تشوفه عندك اني ماشيه لحوش جدي الحوش مافيه حد خلي ودانك مفتوحه مرات بوي يجي يكلمك ولا امي
هزت أيه راسها وناضت قعمزت وهيا تشد في التليفون وتشبح لـ اكرام لطلعت وسكرت عليها باب الدار وخلتها تشبح لـ التليفون لـ لحظات قبل ما ترجع راسها اتكيه علي الحيط وهيا تتنهد :ياربي المشكه ليك يااارب ساعدني
واول ماتليفون شلع ضيه معلن عن مكالمه شبحتله وهيا تشبح في الرقم المتصل اللي مش مسجل بـ اسم ، خلاها تشبحله لـ لحظات قبل ماتفتح الخط من غير ماتتكلم وهيا تراجي في صوت يجيها بس ماجاهاش صوت لين اظرت انها تتكلم :الو
نَــاصر :خيرك ماتتكلميش من الاول
مسحت أيه دموعها وقالت بصوت واضح فيه بحت العبره :وخيرك انت ماعندكش صوت
تنهد نَــاصر :حتي في عز ام نكدك السانك هكي كبره
بتسمت أيه، وناصر كمل :مره تانيه لما نتصل بيك سمعيني صوتك باش مانصبحوش في مشكله اكبر
أيه:علاش خايف حد يعرف انك كلمتني
نَــاصر :اكيد
أيه قرنت حواجبها :جبان وحقير
نَــاصر :وربي كانك قدامي بس نوريهولك الجبان الحقير كيف يعرف يضرب
أيه تعصبت :سكر نَــاصر سكر راني مش ناقصتك
نَــاصر :علي اساس اني لـ ناقصك ولا ناقص تفكيرك المعاق
أيه نفخت وهيا تغمظ في عيونها بـ فشل :اني فاشله وحقربي ماعنديش جهد نتكلم ونتعارك
نَــاصر :دوم عليك الفشل ان شاءالله
فتحت أيه عيونها :نَــاصر شن تبي
ضحك نَــاصر :تمام خلاص اهو بنستيقم في الكلام
أيه:تعمل فيا طيب
نَــاصر :شن حالك
ايه :هوا سؤالك غريب بس الحمدالله وانت
نَــاصر :مش كويس
ايه :وعلاش
نَــاصر سكت لـ لحظه وبعدها قال مجاوب علي اتهامها :اني مش جبان ومش خايف انهم يعرفو انه نكلم فيك ونبيك ، اني خايف يشدوك تكلمي فيا ويديرو فيك حاجه وبدل مانكحلوها نعموها
أيه بتسمت :تبيني ؟!
مسح نَــاصر علي شعره وقال :تو من بين سبعطاشرلاف كلمه مانتبهتي الا علي ام نبيك
ضحكت أيه:ههههه مه حسيت من كلامك طلع الكليمه الغير صحيحه في الجمله التاليه ههههه
بتسم نَــاصر من ضحكتها لحس انه فرحت قلبه وقال :بالعكس هيا الكلمه الصحيه ميه في الميه من بين كل كلامي
هدت أيه من ضحكتها وقعدت لبتسامه تابته علي مبسمها بشعور حلو لذع قلبها وقالت :مش عارفه علاش حاسه انه بدلوك ولا عدلو فيك فيوز كان فاسد
نَــاصر عوج فمه وقال برفعت حاجب :تو ماتجيش نقولك انتي الفاسده لانه بتولي مرتي فـ شن بندير توا بنزمطها لين اطيحي بين يديا
رجعت أيه ضحكت عليه وهيا حاسه انه نست كل المشاكل لصايره وكل نكدها وغمها بـ مكالمته ، حست انه حتي في عراكهم راحه وسلام .
.
شعــور الـراحه والسـلام في أي عــلاقه كـانت يُـتبث نجَـاحهــا 💛🍃
.
.
لا تحــدثني عـن الـعِـشق يـاسـيدي ، فـ نحـن فـي بِـلاد حُـكمة عليـه بـ الإعـدام 🥀
.
.
زمطت إلهَــام ريقها وهيا تشبح لـ ابتهال وقالت :وشن يبي فيا
رفعت ابتهال كتافها :مش عارف بس لما قالي اناديك شكله راقيله لا المليون
زادت إلهَــام خافت وهيا تشبح لـ باب الدار لـ انفتح ولـ نجوي لخشت عليهم وقالت :إلهَــام تعالي سميح يبيك
وقفو ابتهال وإلهَــام لـ قالت :لالا مانيش طالعتله مرات يضربني
نجوي بتسمت :ماتخافيش هوا بقولك كلمتين
وتنهدت وكملت :زعميته بحطك في امر الواقع بس ماتخافيش
قرنت إلهَــام حواجبها بعدم فهم وهيا تبي تسأل بس قربت منها نجوي وقالت :ماتخافيش عمي الهادي طلع منه موضوعكم بس سيوره يرضي عليك في الاخير انتي بنته وسميح حتي هوا زيه اني صح ممكن نكون انانيه ونفكر في خوي ، بس بَـحر شاف هلبا مانبيشي يخسرك حتي انتي
نزلت إلهَــام عيونها من نجوي وقالت :ولا اني نبي نخسره
وخدت نفسها وتخطت نجوي وطلعت وهيا تخلي في ابتهال لـ قربت من نجوي :بقولها كان بتتزوجي ماعاش نبوك وله
شبحتلها نجوي ورفعت كتافها :ان شاءالله خير وخلاص
.
وقفت إلهَــام قدام خوها اللي اشر بـ يده تقعمز جنبه :قعمزي
قعمزت إلهَــام جنبه براس مارتفعش عن الارض أبـداً وبـ السان اخرس وبـ ودان مفتوحه تراجي في كليمات سميح لـ قال :الولد عشرة عمر اني وياه ونسيبي وعزيز عليا ولو كان جي وطلبك مني قبل مايصير هذا كله يشهد عليا ربي كنت نعطيك وعيوني مغمظه
وسكت لـ لحظه وهوا يشبحلها وكمل بـ تشديد علي كلامه :لكن عرضت توا علي خاطر بَـحر ماعاش ولا زي قبل الكره غم عيونه وقلبه سيرته في شارعهم زفت لما سألت عليه الولد بعد لصار معاه انقلب ومالومه لكن انتي اختي من حقي نخاف عليك وله من حقي ندور مصلحتك والولد هدا مايصلحش بيك راهو بدي غامض في يوم وليله ولا عنده حوش وسياره وهوا حتي خدمه مايخدم
وسكت وهوا يشبحلها يراجي في ردها لـ حافظت بيه لـ روحها ولتزمت الصمت لين خلت سميح يَيأس بـ تنهيدت غضب وقال :بوي ماباش يتكلم معاك بعد العمله لدرتيها في روحك
شبحت إلهَــام لـ يدها المجروحه بعد محاولتها للإنتحار وقعدت تمسح عليها بصبعها ومسمعها مع سميح لكمل :وقالي نوصلك قلت سماحه
رفعت إلهَــام عيونها فيه طول بـ كسرت قلب ورعشة خاطر وبـ دموع ملو عيونها ، وهيا تشبح لـ سميح لـ نزل عيونه منها وكمل :وقالك حوشي ماعاد يبيك تخشيله اما اني اختي علي عيني وراسي وحوشي مفتوحلك لكن الساني ماعاش يخاطب السانك
وناض وهوا يشبحلها كيف الدموع سالو علي خدودها بعبره وكمل :والخيار ليك وشوفي شن ينفعك
.
.
.
#يتبـع لـ البـــ2️⃣5️⃣(والأخيــر)ـــارت
#كتـــابـة_اليَــاقُــوت

________________________________
بداء كتابة الرواية في تاريخ 5 / مـــــــ5ٰــــــايـو / 2020
تم انهاء كتابة الرواية في تاريخ 12 / اكتـــ10ٰـــوبر / 2020