عشق في بلاد حروبها لا تنتهي 4 ( 2017 )

البــ التــالت عشــر ــارت

_
_
عِــشق فـي بِـلاد حُـروُبِهـــا لا تنتّٰــهي 4
  { 2017 }
.
في البارت السابق
سكر تليفونه وهوا يطفي في الدخان ويتلفت علي صوت أيه اللي خشت لـ المظبخ وهيا حاطه يدها علي خشمها :تي شن هدا
سكر نَــاصر الباب المظبخ وشبحلها كيف اول ماشبحاته رفعت حاجبها بـ بتسامة هزوه رسمتها علي شفايفها :هوا هدا انت
هز نَــاصر راسه ورسم نفس ابتسامة الهزوه لراسمتها :ايه هدا اني
تنهدت أيه :ايه واني قلت ماتطلع العافنه الا من ....
وحطت يدها علي فمها بـ ضحكه خلت نَــاصر يضيق عيونه :انتي تبيني نمرجك طريحه وله مستحاشه لطرايحي قوليها قوليها
شهقت أيه بـ رفعت حاجب واشرتله بـ صبعها من فوق لا لوطه :هدا ماناقص غير واحد زيك يمد يده عليا
شد نَــاصر علي قبضت يده وكيف بيهجم عليها نقزت أيه وطلعت جري من المطبخ وركبت فوق وخلاته يضرب في باب المظبخ بـ رجله وهوا يشبحلها كيف بعتتله بوسه بـ يدها بـ ضحكه وخشت لـ دارنور .

قراءة ممتعة 💛
البــ التــالت عشــر ــارت
.
.
تَّـراس في خدمه نبي نكون رُوحي حياتي بَـــــــــــــــــــادي
فـي عمر العِشرين حياتي والصوت مجهُـول ينـــــــــــــادي
نـخدم في مصنع قـز رخـام مش عايش زي نْــــــــــــــدادي
نـكدح نتمرمد بـ الحلال ننَّدل ونقُـول عــــــــــــــــــــــــادي
وبـدت القصه ، مشيت لحوشنــا ، لقيت امي تنــــــــــــــوح
خـيرك شن فيه شكُـون اللي ضايقك قالتلي بوك مــــــاروح
غـير صبري بالك لحظه يا أمي راني ماستوعبتــــــــــــش
كـيف بُويـا ليه ليلتين ماروح واني ماستعلمتــــــــــــــــــــش
تـبكي تقول قلبي نـاخصني تو مش وقت الـــــــــــــــــــدوه
بـوك نقالـه مسكر ، اطلع دور جِيبه تـــــــــــــــــــــــــــــوا
بـاهي صبري بالك علاش تبكـي تو نجيبـــــــــــــــــــــــــه
درتهـا في بالي كان مش حادث اكيده في كتيبــــــــــــــــــه
مـشيت لـ كل مكان مالقيته خشيـت حتي تزانـــــــــــــــــات
مـراكز شرطه سجلت اسمه في كل مستشفي وشيــــــــلات
لـصقت وراقي في كل حيوُط هدا لفلان مفقُــــــــــــــــــــود
والـوقت يفوت حطيت عُروض جيب الوالـد شن تبي خـــود
فـي نص الليل نقالي يشرين الــو شكُون نعـــــــــــــــــــــــم
بُــوك محبُوس نبو فلُـوس 200 ألف قلتله تـــــــــــــــــــــم
لـقطت انـي خوالي وعمامي فلُـوس مش هَداكَـا الكـــــــــــــم
30 ألـف شن بسدُو طلبـو فلـوس هلبــاا للنــــــــــــــــــــــم
وجـهي كلاه لحشم تسلفـت ومـاتمـــــــــــــــــــــــــــــــوش
مــافيش حل بِيـع سيارتك بِيع لحوازه والحــــــــــــــــــوش
تــالت يوم نقالي يشرين الــو شكُون نعـــــــــــــــــــــــــــم
قــالي جد امُـك وين لفلُـوس شكلك تبي يسيل الـــــــــــــدم
قُـلتله متوفرات تـم عطيني مكان نجيكُـــ ـــــــــــــــــــــــم
قَــالي لفلوس تجيبهم مرا تغلـط نلعب فيكُـــ ـــــــــــــــــــم
خـلاص تمام ماتمسـو بُـوي علي رحمة ولديكُــ ـــــــــــــم
الفلُـوس تامـات حـ نجيب الوالـده وهيا حـ تلاقيكُــــــــــــم
قَــالي خلاص راجي اتصــال عنوان المكَـان نعطيكُــــــم
قَــالي ياحليلي كـان تجيب الدوله حـ نصفيكــ ـــــــــــــــم
خــلاص تمام وكُـون متهني وكل فلُـوسي ليكُــــــــــــــ م
ســكرت الساعه تمـركي نراجي في رنـه منهـــــــــــــــم
فــاتو يومين ماكلمُنيش نفكـركيف نوصلهـــ ــــــــــــــــم
تــالت يوم نقالي شرين الــو شكُـون معـــ ــــــــــــــــــاي
جيب امـك وجيب لفلـوس تغلط امك حـ تبات معـــــــــاي
سـلمت امري لـ ربي سـلاحي تحتي فـي وسطـه طلقــــه
بــيني وبين نفسي نقتـل امي ومانشوفهــاش في علقــــــه
فـي صدري خنقـه مــاتريحتش حاس بيصير تشكنــــــي
فـي خـاطري يـــاربي سترني في أمي مـاتمتحنــــــــــي
مــشينا بـ تاليفون خديت النعتـه في زنقــه درســـــــــــت
صــار تـربيقـه مرجُـولي كبـدي ضـربُوني تهرســــــــت
جبـدت ســلاحي 9 مـلي في صدره طلقـه غرســـــــــت
مــوقف غريب عجيب رهيب وانـا في الـدم غطســــــت
قــامو لفلـوس وطلعـت حببي واكـل طلقه في ايــــــــدي
واقـف مصدوم مش فاهم شي اصلا لـ صار مش بيــدي
روحــت بـ امي عـدل العيلـه كلهــا تراجــ ــــــــــــــــي
خــوالي وعمامي كُـلها تراجي بنروح بـ ناجـــ ــــــــــي
لــقيتهم كُلـهم يستنو إلا خُـوي لكبـر مني مهنـــــــــــاش
زعــما علاش شن فيه مهناش خيره ماجــ ــــــــــــــاش
جــتني مُكالمــه قُـلت اكيـده يقُـولولي بُـــ ــــــــــــــــوك
والــمُكالمه ان شاءالله لا بـاس علي سلامة خُـــــــــــوك
قَــالي مبكري في المستشفي خطم بـ سرير حدايــــــــــا
لــحقت الممرضات قالولي يبــي العينايــــــــــــــــــــــه
قُـلت نكلمـك نفهم منـــك ونعطيــك الخَـبـــ ــــــــــــــــر
خُــوك ينزف حالتــه تعبانــه ماعاش نفرز في شبــــــر .............#يتبع
#حقيقيه
.
.
دمعــة الراجـل واعـره ، ودمعــة المظلُــوم قـــاسيه 💔
.
.
مسح بَـحر دمعته وهوا يدرس في السياره ، ونزل خش يجري لـ المستشفي ووراه راجل اخته سميح وامه لـ تبكي بـ غصه كامدتها وهيا ترجف من فوق لا لوطه من الرعاش وتلحق في بَـحر اللي وقف علي الرسبشن وقال :لو سمحتي وخيتي عندي خوي جابوه بكري قالو في غيبوبه
بنت الريسبشن وقفت وهيا تشبح في يده لشادها بيده التانيه وقعد الدم ينزف منها وقالت :تفضل خش نشوفو حالتك وبعدين اعطيني اسم خوك ونظمنوك عليه
بَـحر زاد ضغط علي كتفه وقال :مش وقتي باللهي عليك شوفيلي خوي وين
سميح :نشوفوه وبعدين ننزلو ديروله يده وخيتي غر قولينا وينه
هزت بنت الرسبشن راسها وقالت :شن اسمه خوك
بَـحر :حاتم ناجي الـ###
بنت الرسبشن : الدور التاني الحجره 8
تلفت بَـحر وسرع خطواته اللي مش متوازنه وركبو بسرعه لدور التاني اللي اول ماركبوله ووصلو لـ الغرفه طلع الدكتور من الحجره وهوا يقول لـ الممرضه :دورو علي زمرة دم {+O} بسرعه
شدت جميله في يد سميح اللي سندها وخف من سرعة مشياته وهوا يشبح لـ بَـحر لـ قرب من الدكتور بـ لهفه وقال :لو سمحت دكتورنا
رفع الدكتو راسه فيه :تفضل
واول ماركز علي كتفه :ايدك تنزف لازم ماتخش نشوفولك جرحك
بَـحر :اني تمام دكتور غر طمني علي خوي حالته كويسه
الدكتور :انت خو المريض الحجره 8
هز بَـحر راسه :ايه خوه
الدكتور :مانبيش نكدب عليك بس حالته خطيره هلبا الرصاصه جاياته في القفص الصدري وتسببتله في نزيف داخلي وقفناه بـ صعوبه جداً ، وحني درنا اللي علينا الباقي علي ربي
حط بَـحر يديه علي راسه وهوا حاس بـ دوخه خلت الدكتور يقرب منه وطبطب علي ضهره :ماعليكم الا بـ الدعاء وبـ اذن الله القادر يطلع منها بخير
نزل بَـحر يديه من علي راسه وتلفت شبح لـ سميح لقعمز امه علي لكراسي وهوا يهدي فيها ورجع شبح لدكتور وقال :بالله دكتور عندي استفسار ، نبي عيار الطلقه لضاربه خوي
ستغرب الدكتور من سأله :عيارها 9 ملي
رفع بَـحر حواجبه مع نفسه لخداه بـ خنقه منعت عليه الاكسجين لنقص عليه مع ضبابه سوده غظت علي عيونه وضيق فشل كل جسمه خلاه يفقد توازنه ويشد في الدكتور لسنده وهوا يصيح :سستر ، سستر تعالو بسرعه
.
.
.
تـــــاني يوم الصبــــح.....
فتح نَــاصر الروشن وهوا يشبح لـ نور وهنيده وأيه لـ نزلو لـ المقبره ومعاهم غيث وعائشه الصغيره وخلوله بنت هنيده جني اللي مقعمزها في حجره ولاهيه في الدركسيون لتلعب بيه ، باسها بـ ضحكه :تبي تسوقي يافرخه ههههه
هزت جني راسها :اي نبي نثوق
ضحك نَــاصر وهوا يرفع في تليفونه لشرين :ثوقي هي هههه
ورجع باسها وهوا يشبح لـ تليفونه واول ماشاف رقمها بتسم وقعد يشبح لتليفون لشرين لين عرفه خلاص المكالمه بتم فتح الخط ورد :ايوه
جاه صوتها اللي تحمحمت وقالت :صـ صباح الخير
نَــاصر رفع حاجبه مع بتسامة مكر وقال :تفضلي تبي حاجه ياأنسه
شدت جوري علي يدها بـ القوه وغيط وهيا تحاول تهدي وتدوي كلام موزون وقالت :اممم هوا هوا ، خطيب صاحبتي وهيا مشت تشوف فيه ولما جي وقت المحاضره مشيت انادي فيها
نَــاصر :كدابه
فتحت جوري فمها وعيطت :احترم نفسك ياانت اني مش مطره نبررلك بكل ره لكن مانبش تسببلي مشاكل بيني وبين خوي من سوء تفاهم
نَــاصر :نسببلك مشاكل ؟ لو انتي واثقه في روحك علاش خايفه امالا
جوري :اكيد واثقه من روحي بس بس ، مانبيش ندير موضوع وهوا مافيش موضوع اصلا وجيت وحكيتلك لصار
تلفت نَــاصر وهوا يشبح في أيه لجايه والدموع في عيونها وقال قبل ماتركب :مش هدا لصار واني وانتي عارفين من هوا لوقفتي عليه وكلامي مش معاك اني كلامي مع اللي مسؤول عليك وبما انك واثقه من روحك مافيش مشكله تشاااو
وسكر الخط في وجها وسيبها تحط في يداها علي وجها :ياااربي ياااربي
واول مانفتح الباب عليها نخلعت ورفعت راسها بـ خلعه لين إينـاس استغربت :خيرك
تنهدت جوري ورجعت نزلت دفنت راسها في السرير وعيطت بـ لخبطه وخوف ورعب .
.
.
تعـــال وأنظــر كـم هــدي الوحـده تُحزنـنــي 💔
.
.
مسحت أيه دموعها وتلفتت ركبت السياره وخلت هنيده لدموعها علي خدودها وتشبح لـ نور لـ الدموع محبوسات في عيونها بـ لمعة وجع وهيا واقفه قدام قبره وتشبح في الرخامه المكتوب عليها ( صهيب المهدي المختـار )
نزلو دموعها مع راسها لـ نزلاته وهيا تشبح لـ غيث اللي قعمز جنب القبر وحط جنبه شيشه اميه والشكاره لفتحها وطلع منها شتلات ورد وقعد يحفر بـ يديه الصغار جنب اللوحه بـ جهد كبير وهوا يوزع في الورد ويساوي """ فتحت عيونها علي بوسه علي جبينها وهيا تبتسم بـ تعب وتشبحله كيف بعد وهوا يشبح لـ البيبي اللي في حضنها ملفوف بـ الحاف ابيض امبينه قداش هوا صغير ، وحديت الولاده بـ نعومة اظافره وبشرته الحساسه لـ رفع جبـار يده ومشا بصبعه علي خده بـ رهبه وقشعريره سرت في كل جسمه وهوا يزمط في ريقه ويرجع يرفع في عيونه في نور لـ القاها تشبحله بعيون تعبانه دابلات دمعة فرحه نزلت منهم مع صوتها التعبان لطلع :شن بتسميه
قعد جبـار يشبحله لـ تواني قبل مايقرب منه ويهمس في ودنه :الله اكبر الله اكبر ، اشهد ان لا اله الا الله واشهد ان محمد الرسول الله حي علي الصلاة حي علي الفلاح الله واكبر الله اكبر لا اله الا الله
وقرب باسه بخفه من خده ورجع همس بـ رعشه :غيث
ورفع راسه لـ نور لقرب باسها :نبي نسميه غيث ها غيث عشان نبي كل حياته غيث نافع زي ماجاني بـ غيث التوبه
رفعت نور يدها وشدت خده بـ ضحكت فرح مع دموعها لـ رجعو سالو بـ راحه وحب وطمأنينه عكس دموعها لسالو توا خوف ورهبه وعدم أمان لبعده .
نزلت قعمزت علي راكبها وحطت عائشه علي تراب قبره  ونزلت همست قريب من التراب بـ دموع سبقوها ولمسو تراب القبر :حبيبي شوف بنتنا ، شوف فاطمة
وغمظت عيونها وسندت راسها علي التراب ويد محاوطه بيها فاطمة الراقده ويد قبضتها بتراب القبر:اليوم منمشو لطرابلس ، خدينا حوش غادي وبنحولو نعيشو غادي ، لكن مش حـ نحرمك من صغارك ره مستحيل نحرمك منهم ياحبيبي حـ نجيبهم كل فتره هني باش تشوفهم حـ نكبرهم بين دكرياتك ومش حـ نخليهم ينسوك ابدا ولا اني حـ ننساك ياصهيب
وضمت شفايفها بـ كتم عبرتها اللي كامدتها وهيا ترجع تهمس :ستاحشتك ياصهيب ستاحشتك هلباااااا ، مش قادره نتعود علي فراقك مش قادره علي بعدك ياقلبي انت ، مش قادره نتقبل موتك يابو صغاري مش قادره ياحبيبي
ونخنقت بـ عبرتها لـ خلتها تزيد تقبض يدها علي القبر بـ شهقات خلت فاطمة تأن بـضيق من بكي نور لـ قامت راسها ليها بـ عبره وحضنتها وهيا تحس بـ يدين غيث اللي علي راسها :ماما
مسحت نور دموعها بـ خفه ورفعت راسها ليه لـ اول ماشبحتله كيف مخلي روحه كله تراب وهوا يكمل في كلامه :ماما علاس تبكي ها
لفت نور يدها عليه وقرباته منها وهيا تتكه بـ خدها علي خده وعيونها في قبر جبـار وقالت :نبكي علي بابا
غيث:حرام تبكيس ها بابا عند ربي حرام تبكي عليه
تلفتت نور شبحتله :ماهو ستاحشته هلبا
غيث :حتي نا ها حتي نا ستاحست بابا هلبا ونبيه هلبا لكن نحبه نبيس عدبه هكي نا ها ندعيله ونصليله باس يحس الجنه
بتسمت نور من بين دموعها :من مقايلك لكلام هدا
غيث :عمو عمر
زادت بتسامة نور لقربت وبساته ورجعت شبحت لـ قبر جبار بـ لمعت دموع وبتسامه وكـ انها تقوله خوفك طلع غلط اهو والدك يحبك اهو رافع راسه بيك اهو خايف علي عدابك من ربي ويدعيلك ويزرعلك في الورد .
وفاقت علي صوت غيث اللي رجع وقال وهوا يبعد :ديري معاي ماما ورد
هزت نور راسها ورجعت حطت فاطمة جنب قبر جبـار بـ خفه وكـ انها مستقصده تحطها باش تحسسه بـ وجودها تحسسه انها جابتله البنت لـ كان يتمني فيها جابتله اللي من لحمه ودمه ولحم ودم امه ولخدت اسم امه ( فاطمة الزهراء ) ، وقربت من غيث قعدت تساعد فيه في زرع الوردات بـ عين تبكي وعين تبتسم .
.
.
نفخت أيه وهيا تخبط في مرش السياره وقالت :تي انخنقت افتحلي الروشن
نَــاصر شبحلها من لمرايا ورفع حواجبه :لا انخنقي
شدت أيه علي سنونها بـ غل وحولت عيونها منه وتلفتت لـ الباب وهيا تفتح فيه بس اول مالقاته مسكر عيطت :لا هكي هلبا تي خيرك انت حابسني يعني تي افتح نو مش قادره نتنفس خيرك هكي
حط نَــاصر السماعات في ودانه وتكي علي الكرسي بـ ضهره وراسه وتجاهلها بـ مكر وهوا يحس بـ ضرباتها لـ علي الكرسي بـ غل بـ سعاده علي غيضها وقوي صوت لغنيه ....