عشق في بلاد حروبها لا تنتهي 4 ( 2017 )

البــ التــاني عشــر ــارت

_
_
عِــشق فـي بِـلاد حُـروُبِهـــا لا تنتّٰــهي 4
  { 2017 }
.
في البارت السابق
قعد القَـاسي مركز في عيونها الحمر من لبكي ولدموعها لـ ينزلو علي خدودها الحمر مكملات طريقهم لفمها لـ يرعش وهيا اضم فيه تزمط في ريقها ومره تعض فيه تكبت في عبره كابحتها داخلها .
قرب القَـاسي من غير تردد وطبع بوسه علي خدها بنوعمه زي نوعمة خدها لقعد يتحسس بـ لحيته الخشنه عليه ويهمس بـ صوت هادي :انتي خليتي فيها خوت يابنت الجيران
وبعد ميل راسه قبال وجها ورفع يده مسح دمعه سايله علي خدها وقال :طلعت امية ورد 🌺
وغمزلها بـ بتسامه قبل مايبعد يطلع من الدار ويخليها رافعه حواجبها مع فمها المفتوح بـ صدمه وهيا تفكر في داخلها لو ناضت الصبح زي ماصر ولا قعده تحلم ، زعما يا إينـاس هدا حقيقي ام حلم ، رفعت يدها تحساست بيها علي خدها مكان بوسته وردادت لـ روحها بـ همس :اكيد حلم

قراءة ممتعة 💛
البــ التــاني عشــر ــارت
.
.
بَعــتنـا مـع النَسيـم سَــلامــاً ، إلـي الــحَبِيبِ حيـثُ أقَمــا 💛🥀.
.
.
غمطت عيونها وهيا تستنشق في ريحة الجيبوطي بـ دموع سالو علي خدودها وحضنت الجيبوطي وهيا ترجع بـ دكرياتها ليه """ ....: عادي نطلب طلب
بعد خصلت شعرها ورا ودنها وقرب باسها بـ خفه علي خدها وهمس :ها قولي
تحمحمت نور وقالت بـدلع :هوا يعني نغميت من اجوائكم السلطانيه العثمانيه عادي نمشو اني وغيث لـ طرابلس عند اختي رنيم يومين نغيرو جو
ورفعت حاجبها بعدت تشبحله كيف بتسم وقرب بوجهه منها :ويهون عليك فراقي ها
سكتت نور لـ لحظات وهيا ترمش بـ رموشها وبعدها قالت :هما يومين يعني عادي
جبـار :يهون قصدك ها
قلبت نور شفايفها :باهي برا معانا
اشرلها جبـار بـ يده وقال :نوضي من عليا ها نوضي
نور :صهيبب
فنص فيها جبـار :نوضي يابنت
لفت نور يداها علي رقبته وزادت تشبتت بيه :ياروحي حبيبي اني لزعل هههههه والله ماتهون عليا راك حبيبي انت صمصوم كبدي وااه عليا محلاه وليد عمي لما يزعل محلااااه
ضحك جبـار ولف يديه علي خصرها :ها تنوضي ولا نتصرف معاك
قربت نور حركت خشمها علي خشمه بـ خفه وهمست :اتصرف هي هههههه
قلبها جبـار تحته وقعد يضغضغ فيها من بين صياحها وضحكاتها لتعلت في الدار ، الدار اللي قعدت نور تلود علي روحها وتشبحلها وهيا تسمع في صوته وفي ضحكاته : هههههه نهون ها طلعت نهون عليك يابنت العم ها
زادت حضنت نور جيبوطيه اكتر وقالت بهمس من بين دموعها :والله ماتهون واللهي ماتهون انت الروح انت القلب كيف تهون كيف وانت سكنتني كيف ياحبيبي كيف
انفتح الباب عليها وخشت رنيم لقالت :شني كملتي توتي الشناطي
تلفتتلها نور بـ دموع مغبشات عليها الرؤيه :كيف بنسيبه وبنمشي
قربت رنيم منها :مش هدا لتبيه مش تبي تطلعي من حبسهم وعاداتهم الاجراميه مش هدا اليوم لتستني فيه علاش تبكي توا
مسحت نور دموعها وهزت راسها :اي بس ، بس بنستاحش مكانه منستاحش السرير لجمعنا لدولابنا لجتمعو حويجي مع حوايجه فيه ، بنستاحش المكان لكل ريحته فيه اللي طيفه قعد ساكن فيه ، كل جيها كل زاويه في الحوش وفي ..... ادكرني فيه كيف بنمشي كيف بهون عليا فراقه كيف بهون عليا نمشي ونسيب المكان اللي فيه كل دكرياته
وضمت شفايفها وهيا تعض فيهم بـ حسره ووجع لدرجه تبننت طعم الدم اللي زمطاته مع ريقها وقالت بـ عبره :كيف بهون عليا يارنيم نسيب المدينه اللي فيها قبره كيف
زادت رنيم قربت منها وشدت يدها :طيفه حـ يمشي معاكم لانه انتي طيفه غيث طيفه فاطمة طيفه هوا مش حـ يقعد هني صدقيني طيفه وين مانتم وين ماهوا جبـار مش في الحوش هدا ولا في ...... حتي لو قبره هني
ورفعت يدها التانيه وأشرت علي قلب نور وكملت :جبـار هني في قلبك ساكنك انتي مانعوفش لو هوا يبيكم تطلعو او لا بس صدقيني حياة صغاوك مستحيل تنبني في المكان هدا هما ضاعو بـ موتت بوهم ماتزيديش اضيعيهم بـ قعدتك في عيله الغلط واكبهم من ساسهم لا واسهم
وشدت خد نور بـ يدها وكملت :لمي دكرياتك انتي وجبـار وهيا انطلقي يانور اطلعي للحياة واساسي حياتك انتي وصغاوك وفكوي فيهم وانسي الماضي
هزت نور راسها وهيا تشبح لـجيبوطي جبـار وبتسمت :هوا يبيني نطلع من هني هوا لوصي عمر لو صارله حاجه يتكفل بيا اني وصغاره و يطلعنا من هني عارفاته عارفني مستحيل نقدر نعيش في هدا المكان من غيره واني حتي لو بعدت حتي لو مشيت هوا حـ يقعد فيا وفي قلبي مستحيل ننساه اونمحي لمساته من عليا
ورفعت عيونها في رنيم لقربت حضنتها :وبي يعوضك خيو ياوخيتي
نور :ربي عوضني علي فراقه بـ صغاره
.
سلامــاً علـي مــن غــادر الحيــاة ، بـ مــوت كســير لا مجبــرُاً لــه إلا بـ مغفــرة الإلــه 💛
.
.
.
حطت بُـتول شنطتها علي طاولة مدخل الحوش وتلفتت لـجوري :بندير جو الفالحه غر نخش نغسل معاهم لماعين ههههه
ضحكت جوري :ههه لالا تعالي خليهم إينـاس مش حـ تخليك
بُـتول اشرتلها بـ يدها وخشت لـ المطبخ وخلتها تتلفت تاخد في كبوطها وشنطتها لـ طاحت منها من غير قصد وتشرتع محتواها علي الارض .
شهقت جوري اللي نزلت طول تلم في اللي تشرتع :واااه عليا ان شاءالله ماتكسر شي
قعدت تلم وتشوف لو شي تكسر لين وصلت لـ زرف شفاف فيه زوز حبات شداته في يدها وناضت وقفت وهيا تشبحله بـ ستغراب وفي نص استغرابها نخلعت اول مابُـتول فكت الزرف من بين يدها وقالت بـغضب :شني تفتشيلي قي شنطي ياحقيره
جوري:مصح وجهك ياكلبه والله مانفتش بس طاحت مني وطاحو منها حاجاتك قعدت الم فيهم
خدت بُـتول منها الشنطه بـ توثر وهيا إدس في الحبوب في جيب الشنطه وسكرت عليه السريته ورفعت راسها لـ جوري لـ قالت :وشن هدو لحبوب
ضحكت بُـتول :تريمادول
ضحكت جوري بـ تسهويك :بلا تسهويك شن هدو وخيرك حاطيهم في زرف هكي تقول مخدرات حق
بُـتول :تي حبوب راس امي عطتهملي ، حاطتهم في زرف باش مايتعرضوش لـ لهواء وجو متع الفلسفه الامهاتيه
زادت ضحكت جوري :هههه مالسانك احرف وخيرك شن لزوك من الكوجينه
بُـتول :ايه ههههه زحمه اصلا مالقيت وين نوقف مشاءالله كلهم طلعو فالحات
جوري :تعالي تعالي نطلعو ونهدرزو قبل مايجيك خوك
طلعو هما الزو وقعمزو في جنان ، شبحت جوري لـ بُـتول لقالت وهيا تشبح لـ تليفونها :المغرب قريب يأذن مسرع الوقت مشي
جوري :ايه اصلا الوقت معاك خت فت تو كان مهناش ره قعد العصر ماأذنش
بُـتول بتسمت :دمي خفيف مه قعدتي ماينمل منها
جوري :ههههه غر مش هكي ، ايه شن جوك انتي والصايع
نفخت بُـتول .اما صايع بالله ليه اربعه ايام ماكلمنيش شكله لقي غيري هههههه
جوري :قتلك من الاول باين عليه واحد ملاعبي وصايع والقاك قدامه قال غر نتسلا شوي بس انتي شي ماتسمعيش لكلام لين الفاس يطيح في الراس
بُـتول : لا فاس لا شيته ترا فكيني منك عارفتيني عارفاته من الاول زيه زي غيره بس طلع فيه الخير دار مغادره قبل مايعشمني او يعلقني فيه ههههه في هدي بارك الله فيه
تنهدت جوري :انتي مافيش اصلاح منك بكل بكل
.
.
.
طلع بَـحر مخزن السلاح لشده بـ يده ليسار وحط السلاح علي الدرجه وخدي الرصاصه اللي شدها بين صوابعه وهوا يشبحلها لـ لحظات قبل مايهمس: 9 ملي ياتخشي في صدره يافي صدر امي
وسكر قبضت يده علي الرصاصه ومسح جبهته بـ خوف ورعشة رعب سرت في كل جسمه من تفكيره وهمس :سامحيني يمه سامحيني نقتلك ولا نشوفك في علقه تقتلك 100 مره
دخل الرصاصه في مخزن السلاح وركبه في السلاح اللي حطه في خصره وهوا ياخد في نفسه ورفع راسه لـ السماء وهمس : ياااااربي سترني ياااارب سترني وماتمتحنيش في امي ياربي
وسكت لـ لحظات وهوا يشبح لـ السماء وداخله يستنجد بـ ربي اللي عارف ماعنده غيره ولا حـ يروف بـ حاله غيره .
جاه صوت عمه فوزي:شني بَـحر امتي قالولك تعالا
تلفت بَـحر لـ عمه وراجل أخته سميح لقال :كان تخليني نمشي معاك مش خير
هز بَـحر راسه وهوا يطلع في التليفون ويتصل بـ حاتم اللي طلعله مقفل نفخ وقال :لالا فكونا منهم شكلهم اكفر عباد الله نمشي بروحي خير
فوزي :وين الولد حاتم
بَـحر :قبل شوي قال اهو جاي ماعاش يتعطل تو شوي ويجي
سميح:شني مزال ولا بتتوكلو توا
فوزي:والله خطر يابَـحر رافع امك بروحك لمجرمين مايخافو ربي
بَـحر انفعل :شن بندير قولي ياعمي شن لنبنديره نخلي بوي عندهم ولا كيف
سميح:خلاص هدوء روحكم و ان شاءالله مايصير الا كل خيير
فوزي قرب من بَـحر وطبطب علي كتفه وقال: عارفني ماندوي هكي الا خايف عليك وعلي امك
بَـحر تنهد :عارف ياعمي عارف بالله سامحوني عارفين اللي اني فيه مش شويه تحملوني
وخدي نفسه بـرهبه وخوف من المستقبل وكمل : الساعه 8:0 غر نقول لـ أمي هيا
.
.
.
اتكه القَـاسي علي الحيط وهوا يتكي في القيلات جنبه وبدل التليفون من ودنه اليسارلـ ودنه ليمين وقال بـ جديه : شن قلنا يامصعب الجيها هديكا ماعاش نبي نشوفك فيها وحتي جمال ماعاش اتبعه لا ولد جيرانكم لا ولد كلبكم
مصعب :تمام تمام اصلا اني ركبت معاه مانحساباش ماشي غادي كان هدا ماركبتش معاه بكل
تنهد القَـاسي :ايوه هكي نبيك ياغزيل وتو ندبرلك سياره صغيره علي قدك وتفكني من المشي والجي مع المردف اللي زيني
ضحك مصعب :هههههه واللهي ماني عارف كيف نشكرك
القَـاسي بتسم :رد بالك من روحك ومن اميمتك ووخياتك ومانبي شكرك ياودي غر هني اميمتك بس
مصعب :ان شاءالله أمرك مدير
القَـاسي تلفت علي حركة روشن داره ، لـ قعد يشبح جيهته وقال :تمام ياغزيل نتلاقو
وسكر القَـاسي من مصعب وسند روحه بـ القيلات وقرب من روشن داره المفتوح وكانو إينـااس وجوري وريهام يضمو فيها .
تلفتت ريهام لـ إينـاس بـ رفعت حاجب :انتي وبالقاسم في علاقه
فكت إينـاس شعرها القسطلي لطاح من ربطة توكتها وغطا ضهرها لا نهايته ورجعت تلم فيه وهيا تشبح لـ جوري لقالت بـ ضحكه :تي ايه ريتي لميه تجري من تحتنا وحني مانندروش هههه
رفعت ريهام حاجبها :اها ربي يهنيكم
إينـاس :امين ولا يحرمنا من بعض
زادت ضحكت جوري :ههههه اهو بدينا لا نتحشمو لا نستحو
هزت إينـاس راسها بـ تسهويك ولفت شعرها وربطاته بـ توكه وهيا تتلفت لـ جوري لقالت وهيا تحط في حوايج القَـاسي في الدولاب :يهبل شعرك يافرخه ياسعد خوي بيه هههههه
شبحت إينـاس بـ طرف عينها لـ ريهام وقالت :اصلا ديما يقولي شعرك يهبل يا انوسي
ضحكت ريهام بـ تسهويك :انوسي وبالقاسم قالهالك
هزت آينـاس راسها وهيا ترفع في حواجبها :ايه ويقولي اكتر من هكي
وحطت يداها علي فمها وقالت بـ طريقه اضحك بـ تمتيل الخجل :بس نتحشم نقوللكم عيب هههه
شدت جوري ضحكتها وهيا تضرب في جبهتها بـ كف يدها وقالت بـ ضحكه :لالاماتقوليناش هههههه زودي امالا كملي تطبيق حوايج حبيبك ياعيب انتي
ريهام :لا هاتي تو نطبقهم اني
سبقتها إينـاس و وقفت قدام دولابه وقالت بـ غمزه لـ جوري :لالا تونديرهم اني ، اني الملزمه بيه انتي رتحي روحك حبيبتي خلاص بري
ضحكت جوري وشدت يد ريهام اللي مبين من ملامحها الغيظ من تصروفات إينـااس المستفزه وفي نفس الوقت الاستغراب من حركاتها البايخه ، وطلعو وخلو إينـااس اللي اول ماسكرو عليها الباب طلعت ضحكتها لكانت شادتها :هههههه ياربي مامستفزه اني هههههههه
ونخنقت بـ ضكتها اللي شرقت بيها وهيا تتلفت لـ الروشن بـخلعه أول ما جاها صوت القاسي :حبيبي هههههه
قعدت إينـاس تكح وهيا تشبحله كيف يشبحلها بـ ضحكه خفيفه علي ملامحه وشفايفه ومش قادر يوقفها وكمل كلام ه بـ غمزه :وااااااك من شعرك ياأنوسي يهبــل هههههههه
خدت إينـاس نفسها بـ خجل وتوثر وخلعه وخنقه مش مستوعبتهم امتي جوها ولا مستوعبه من منين جي القَـاسي لـ ضحكاته خلتها تتلفت تطلع من الدار جري وتخلي في ضحكاته يزيدو يتعلو عليها وعلي حركاتها وكلامها .
.
.
"" الــدم عُمـره مــايبقـي مـي "" ، جُـمله خاطِئـه قـد أتبثت خطائهــا بِـلادي 💔❌
.
.
بَـحر :ياخوي بشويه راهو الزناقي زي بعض
جاه صوته : تالت زنقه وهيا الوحيده تراب
بَـحر :تمام تمام وصلت
وسكر بَـحر منه وهوا يخش لزنقه ويشبح لـ امه لقالت :يارب سترك وعفوك يااارب شني وصلنا
درس بَـحر السياره :اي وصلنا ستني ماتنزليش لين ننزل نشوف
جميله :لالا لا تنزل لا تودن يبوني اني خلاص فكنا ياوليدي من الدم فكنا
بَـحر فتح الباب :غر ستني يمه ستني
نزل بَـحر من السياره وهوا يشبح حولينه ويمشي بشويه لين وقف في نص الزنقه ، واول ماتلفت وراه شبح السياره اللي جايه ولشاب لـ طلع من الروشن وصوب عليه وضربه بـ طلقه خاواها بَـحر وجت في كتفه طيحاته علي الارض بفقد توازن ودوخه غبشت علي رؤيته وهوا يتلفت لـ امه لنزلت من السياره وهيا تصيح وتعيط :بَـحر
نزلو اربع شباب كانو ملتمين وقربو من بَـحر و قعدو يضربو فيه ويركلو فيه بـ رجليهم من بين صياح جميله اللي تبعد فيهم من عليه وتصيح :خودو لتبوه خودو لفلوس وخلولي وليدي الله يرحم ولديكم ياوليداتي بعدو عليه حولو حولو
جبد منها واحد من الشباب الشنطه لكانت في كتفها بـ عنف ودفها التالي لين طاحت علي السياره بـ القوه بين عيون بَـحر اللي سحب سلاحه من خصره وصوب السلاح جيهته وطلق عليه الرصاصه لـ نغرست في صدره وطاح علي صاحبه اللي شده و صيح علي الباقي :حسه ناس جايه هيا هيا سيبوه
فك بَـحر يد الشاب لشاده وضربه بـ قفا السلاح علي راسه لين الشاب وخر وهوا يشد في راسه ويطلق في بَـحر اللي قرب من امه يجري :امي فيك حاجه شوفيلي افتحي عيونك
شدت جميله فيه وهيا تفتح في عيونها وتشبح لدم يده لـ تنزف :إيدك دم واااه عليا بيرزوني فيك
رجع بَـحر تلفت وهوا يشبح فيهم يركبو لسياره لتحركو بيها بسرعه ومشو ، وقف بَـحر وهوا يسيب في امه ويجري وراهم ويصيح :ياااااكلاب وين بوي وينه ياااكلاب اوقفووو
.
لـم أشعَـر حيـنها بـ ألام جسدي ، وانمـا كُـل ماشعرتُ بـه وخـزه في مُـنتصف قلـبي ، وخـزه رُبمـا قَتلـت ضمِـيري 🆘
.
.
ضـعت في طَـريق مهجُـور ، ومــامن سائِـل عَليِ أو مُـرشد 🔁
.
.
غمظ منذر عيونه وتكه علي السرير وقال :يااااالله مااحلاهااااااا
رفعت بُـتول حاجبها :بيبي ره قعده عيل البنت
منذر فتح عيونه وشبحلها :اني نرباها وشن فيها ههههه
ضرباته بُـتول بـ رجلها :تحساب بنات الناس لعبه تي نوض نوض منوض ، نوض انهارات تحبولي في الـ 2000 وحني خليتونا عوانس نوض
نفخ منذر :تي خيرك انم غايره منها ولا شني
بُـتول شهقت وهيا تأشر بـ صبعها علي روحها :أني ، هدا ماناقص مه غر نغار من فرخه قعده مافقصتش من دحيتها
ضحك منذر :ههههه تغاري عليا هههه وخيتي سلم اختي لـ متبي نحب غيرها تعالي ياحبيبت خوها تعالي
عيطت بُـتول وضربت يديه لـ مادهملها :بعد يامقرف بعد شن تحسابني من قوم لوط بعد سحيقه نوض كب ترقد مرقد هداكا الراجل لـ معاد ناض
شد منذو لمخده وناض وقف وتلفت حدف عليها لمخده بـ قوة قوته وطلع وخلاها تصيح عليه :ياكلب ياحيوان تو تشوف كان مازال خليتك ترقد جنبي ياتافه
ونفخت وهيا تحدف في المخده جنبها بـ تنهيده وتلفتت خدت تليفونها وتكت علي ضهرها علي السرير وهيا تفتح علي رقمه وغمطت عيونها وهيا تدعي ، يااارب يرد يااارب مايطلعش زي اللي قبله ويرد عليا
وفتحت عيونها ورصت علي الاتصال بس لـ المره الـ 100 تلقا فيه
.... الرقم المطلوب مقفل أو خارج نطاق الضغطيه ....
نفخت بـ القوه وحدفت تليفونها بـ عصبيه وبـ همس غاضب :كلب حيوان الله يلعنكم كلكم زي بعض كلاب
وتلفتت لـ الكمادينو لـ فتحت قجره وخدت الزرف لحبوب لفتحاته وخدت منه حبه حطتها في فمها من غير اي تردد وزمطتها طول من غير اميه او شي يسهل عليها زمطها ، ورجعت الحبه التانيه لـ لقجر بين كتاباتها وسكرت لقجر وتلفتت حطت راسها علي لمخده بـ ضيق بس في نفس الوقت بـ راحه بدت تسري في جميع اطراف جسمها الا عقلها لـ قعد مستاقط ورجع بيها لدكراياته """ ...:لا فهميني نبي نفهمها حياتك لملخبطه هدي
بتسمت بُـتول :حبه حبه ياحبوب حبه حبه ههههه
ضحك فَـاتح :ههههه تمام حبه حبه وشن ورانا ياحبوبه حني غيرك ""
غمطت بُـتول عيونها وهمست بـ ضحكه :هه ماصارش من الحبه حبه وبدي عندك غيري الواضح ااااه ياحظي
.
لف يديه علي روحه بـ رعشت برد سرت في جسمه بـ ألم من الصقع اللي في الشيلا ورفع راسه تكاه علي الحيط وهوا يغمظ في عيونه اللي اول ماغمظهم مر طيفها بين عيونه """بتسم وهوا ينزل في التليفون من علي ودنه وعيونه فيها كيف قصت الطريق وقربت منه بـ بتسامه وهيا ترجع في شعرها لقصير ورا ودنها ووقفت قدامه :اهلين
فَـاتح :اهلين بـ نور العين
نزلت بُـتول عيونها بـ خجل لين خلت فَـاتح يضحك :اووو مانحسبكش تتحشمي
رجعت بُـتول رفعت عيونها فيه وهيا ترفع في حاجبها :وعلاش مش بنت زيني زي غيري
رفع فَـاتح حواجبه :بنت بس مش زيك زي غيرك
يتسمت بُـتول :والله وعلاش مش زيني زي غيري """
رتسمت شبه بتسامه علي مبسم فَـاتح ، وهمس بـ تعب :خشيتي عقلي ودوختيني في يومين ، درتي لمادارتاش غيرك هدا علاش مش زيك زي غيرك
وفتح عيونه علي أثر صوت الباب لنفتح عليه ، واول ماخش محمـد سند فَـاتح روحه ووقف وهوا يشبح لـ محمـد لـ سكر الباب وراه ورجع تلفتله :كيف حالك
فَـاتح ضحك :ههه ميه ميه ولا اروع من هكي
ضحك محمـد ولف يده علي خصره جبد سلاح ومده لـ فَـاتح :بكرا الصبح بنطلعك من هنا خلي السلاح معاك كـ حمايه
خدي فَـاتح منه السلاح وفتح المخزن اللي كان فاضي مافيشي ولا رصاصه ، ضيق فَـاتح عيونه وشبح لـ محمـد وقال :فاضي هدا
محمـد :امانا بنعطيه لكي معبي ودير رقابي في رقبتي
ضحك فَـاتح بـ تعب ومسح علي شعره :ههههه طقه انت طقه ههههه
بتسم محمـد وطبطب علي كتف فَـاتح :خليك صاحي
وتلفت طلع وهوا يطلع في تليفونه من جيبه واتصل بـ سِـيفاو لـ خش عليه انتظار ، سكر محمـد منه ووقف قدام غرفة الصقر وزاد عاودله بس برضو قعد مشغول ، سكر محمـد منه ، وفتح الباب وخش وهوا يشبح لـ الصقر اللي يتكلم في التليفون بـ يد وبـ يده التانيه قابضها بـ عصبيه واضحه علي ملامح وجهه وصوته لـ طلعه بـ ضحكه ملمومه من بقايا صبره :ههه المقابل خوك وشن تبي مقابل غير خوك الاسير عندي
بتسم محمـد اللي سكـر باب المكتب وتكه عليه بـ هدوء وهوا يخفي في بتسامته ويشبح لـ رد علي الصقر بـ صوت رايق :اول مقابل خوي اكيد ومانبي غيره اصلا ، بس تعرف دكرتني في المقر متعك اللي مقابل شركة الـ ..... عاجبني هلبااا امس مشيت درت دوره عليه وخليت رجالي يدلعو ويديرو الواجب مع صاحب الشركه لقر كل لعنده ههههه تاريتك زيك زينا غرمدرك ورا لحكومه ياصقوره
خدي الصقر نفسه بـ غضب وقال :شني تبي
السِـيفاو رفع حاجبه ورجع صوته لـ الجديه ، وقال:صورك وفيديواتك مع صاحب الشركه وتفاقياتك المشبوها وصفقات المخدرات لترفع فيها وتجيب بـ حماية القضائيه وبراحه كلها عندي ، يعني ندمرك يالصقر ندمرك ، يعني لا مقابل لا تبديل خوي نبيه عندي وطريقي مش حـ نفتحهالك وكلامي وقلته وعندك لـ الصبح خوي مايوصلش عندي الدنيا بنقلبها فوق راسك وراس لشادين فيك
وسكر الخط في وجه الصقر لـ حدف التليفون علي الحيط بـ عيطت غضب واعصاب من كلام السِـيفاو لسكر كل الابواب قدامه وخلاه في نص الوحل يغرق .
.
.
جعــلت نفسـكـ غَــريب ، ومن ثُـم .....يتبع
.
.
حولت ابتهال الستار الروشن وهيا تشبح لـ السياره لخشت ، تلفتت لـ إلهَــام وعيطت :جو جو
نقزت إلهَــام من سريرها وقربت من الروشن وهيا تشبح في العيله كلها طالعه وهما يستنو في ناجي بو بَـحر اللي اول مانزل وشبحوه متصاوب الدنيا تلخبطت ونجوي اخته فقدت توازنها وطاحت علي الارض ودموعها نزلو مع صوتها لطلعاته بـ رعشه :وين بوي وينه
نزلت جميله وهيا تبكي وتعيط :ارفعوه للمستشفي وليدي ارفعوه واااااك عليا لا روحنا بـ الراجل ولا روحنا سالمين ياوخيتي لا روحت بـ ناجي ولا روحت بـ وليدي باهي
شدوها خواتها وعزوزت بنتها ورفعو قعمزوها وهما يصبرو فيها وهيا تبكي وترعش مع بعضها وتشبح لـ بَـحر لـ قعمز علي الكرسي ويشبح لـ ولد عمه مهيب اللي ربطله يده باش يوقف النزيف وهوا يقوله :نوض لازم نمشو للمستشفي نوض
بَـحر قعد يشبح حولينه وقال :وين حاتم خيره مش هني
خاله صالح :مش وقت حاتم توا نوض غر نشوفو حالتك ايدك تنزف
سميح: هيا مهيب برا معاي نرفعوه
غمظ بَـحر عيونه بـ القوه وهوا يشد في كتفه بـ ألم و وجع اختفي اول ماحس بـ تليفونه يشرين وقف وهوا يطلع فيه من جيبه بدقات قلب متسارعه ويهمس :اكيد بوي اكيد
خاله نوري :ان شاءالله خير رد رد
رد بَـحر :ايوه
جاه صوت باسم :ايوه بَـحر شن الجو
تنهد بَـحر بـ احباط وضيق وقال :ماشيه ياباسم ماشيه من عند ربي
باسم :ان شاءالله لاباس علي سلامة خوك
ضيق بَـحر عيونه وتلفت بـ بعد علي الدوشه وهوا يرفعلهم في يده المصابه بـ شويه وبـ ألم تغاطا عنه بـ معني دقيقه وبعد وهوا يرد علي باسم :كيف مافهمتش عليك خيره خوي
باسم :واللهي حسيت بيك ماتندريش
بَـحر :تي ادوي ياباسم خيره حاتم
باسم :امبكري شفته في مستشفي الـ ..... خاطمين بيه بـ سرير قدامي مشي لحقت الممريضات قالولي يبي العينايا حالته خطيره هلبا ونزف هلبااا دم
فقد بَـحر توازنه ورخي التليفون لـ طاح من يده وهوا يدعدع بـ دوخه حس بيها سميح لـ صيح وهوا يقرب منه :بَـحر تي زودو نرفعوه للمستشفي
قعد بَـحر يبعد فيهم من عليه ودموعه ينزلو من غير راده منه وهوا يطبس ويشد في راسه بين يده ويهمس من بين دموعه :ياربي مش مع بعضه ياربي لا مش مع بعضه لا
خاله نوري طبس وهوا يشد في يديه لـ محاوط بيهم راسه :بَـحر نوض غر نوض ياولدي بـ أذن الله كل شي ينحل ازمه وتزول
بَـحر :خوي ياخالي خوي حاتم ياخالي في المستشفي مضروب ياخالي بوي مخطوف ياخالي خوي بين الحياة والموت
.
.
.
اتكه نَــاصر علي حاشية الباب وهوا يشد في الدخان بين صوابعه وحوله من فمه بـ يد وبـ يده التانيه حط التليفون في ودنه وهوا يراجي في الرد اللي جاه في اخر لحظه :انت شن تبي مني اه شن تبي ممكن تفهمني
بتسم نَــاصر :نبي نفددك في حياتك
غمظت جوري عيونها بـ غيط وقالت :تصبح علي خير
شد نَــاصر علي سنونه وقال بسرعه قبل ماتحاول تسكر الخط عليه :من وين تعرفيه الفرخ لواقفه عليه انتي وصاحبتك يومها
ضيقت جوري عيونها بـ عدم فهم :فرخ ، فرخ من
نَــاصر :من غير استعباط اللي وقفتو عليه يوم السبت
جوري رفعت حواجبها وفهمت انه يدوي علي وقفتها هداكا اليوم هيا وبُـتول علي فَـاتح ، حطت يدها علي عيونها وهيا تفكر ، شن بتقوليله يعني صاحب صاحبتي ، لا ياجوري اكيد لا ، هوا هكي وهازي عليا ، كان نقوله هكي تو يبصم بـ العشره انه ماننفعش .
وستاقضت علي روحها اول ماجاها صوته لـ رجع وقال :هي وين وين تفكري في كدبه ولا شني
جوري :وانت شن خصك اصلا فيا يكون اللي يكون ونوقف مع من نبي ونكلم مع لنبيه انت مني باش تسألني وتحقق معاي
نَــاصر :اه ههه اي صح اني الغالط لمكلمك انتي تو نمشي لخوك طول ونقوله شوف اختك مع من توقف في الجامعه
وسكر الخط في وجها وخلاها تفتح فمها علي وسعه وهيا تشهق :ياربي هدا شن يخرط شن يخرط
ورجعت عاودتله بس سكر نَــاصر الخط في وجها وسكر تليفونه وهوا يطفي في الدخان ويتلفت علي صوت أيه اللي خشت لـ المظبخ وهيا حاطه يدها علي خشمها :تي شن هدا
سكر نَــاصر الباب المظبخ وشبحلها كيف اول ماشبحاته رفعت حاجبها بـ بتسامة هزوه رسمتها علي شفايفها :هوا هدا انت
هز نَــاصر راسه ورسم نفس ابتسامة الهزوه لراسمتها :ايه هدا اني
تنهدت أيه :ايه واني قلت ماتطلع العافنه الا من ....
وحطت يدها علي فمها بـ ضحكه خلت نَــاصر يضيق عيونه :انتي تبيني نمرجك طريحه وله مستحاشه لطرايحي قوليها قوليها
شهقت أيه بـ رفعت حاجب واشرتله بـ صبعها من فوق لا لوطه :هدا ماناقص غير واحد زيك يمد يده عليا
شد نَــاصر علي قبضت يده وكيف بيهجم عليها نقزت أيه وطلعت جري من المطبخ وركبت فوق وخلاته يضرب في باب المظبخ بـ رجله وهوا يشبحلها كيف بعتتله بوسه بـ يدها بـ ضحكه وخشت لـ دارنور .
.
.
.
#يتبـعلـ البـــ1️⃣3️⃣ـــارت
#كتـــابـة_اليَــاقُــوت
________________________________
بداء كتابة الرواية في تاريخ 5 / مـــــــ5ٰــــــايـو / 2020
تم انهاء كتابة الرواية في تاريخ 12 / اكتـــ10ٰـــوبر / 2020

وتــاني شي حابه نقوله ونتمناها تعتبروها نصيحه ، أنا هشه جدا جدا اتجاه الانتقادات السلبيه ، او بـ الاصح مش انتقادات سلبيه وانما تنمر ، وفيه زيني هلبا ناس من ابسط كلمه ينهز ويطيح ويصير فثات ، بينما انا نحاول نتبت روحي بين السلبيه هدي ، فـ ياريت اي شخص يبي ينتقد ينتقد بـ أسلوب بناء مصلح مش بـ أسلوب هادم محطم ، راعو شعور غيركم راعو قلوب هشه وطموح من الممكن انت او غيرك بـ كلمه اضيعه وتكسره ، وشكراً ☘️
وجوني تعليقات علي املتي " الاملاء زفته شكله مش قاريه العربي بكل " " املتك خرا ف خرا " " حلوه الروايه بس الاملاء ضاااايعه " " وقفي كتابه خششتي الاملاء في حيط "
حابه نقولكم شكراً علي مروركم وعلي تعليقاتكم وعلي صبركم علي قرائة رواياتي اللي الاملاء فيها كاريثيه 💛