عشق في بلاد حروبها لا تنتهي 4 ( 2017 )

البــ التــاسع ــارت

_
_
عِــشق فـي بِـلاد حُـروُبِهـــا لا تنتّٰــهي 4
  { 2017 }
.
في البارت السابق
قعد السيِـفاو عيونه يلودو في المكان وهوا يراجي ، واول ماوصلاته رساله نزل عيونه طول وهوا يفتح فيها بس قبل مايقراها سمع صوت فَـاتح :سِـيفاو
رفع السِـيفاو راسه وشبح لـ فَـاتح لـ يأشر بـ يده لـ شاحنات القَـاسي لـ خلو السِـيفاو ينزل من السياره بـ بتسامه وهوا يرد علي محمـد :ايوه حميده
محمـد :تحركو بسرعه الصقر مدايرلكم كمين انت والقَـاسي

قراءة ممتعة 💛
البــ التــاسع ــارت
.
.

أنــا أهــزم مــا إنــهزم ، أنــا الذي خُــلق في بِـٌلاد حُــرُوبهـا عَـلمت علـَّي بـ لكمــات لا تُــنسي 🤞🏻❌
.
.
نزل السِـيفاو تليفونه لوطه وهوا يرفع في عيونه علي السيارات اللي جايات ورا القَـاسي لكيف نازل من سيارته وهوا لاهي في تليفونه ومارفعش راسه الا علي صيحت السِـيفاو :تحرك ياقَـاسي تحرك
ضيق القَـاسي عيونه بـ عدم فهم لـ لحظات قبل مايتلفت ويشبح لـ سيارات لـ حاوطوه هوا وشاحناته ولصوت اللي هجمو عليهم :سلم نفسك انت وياه سلم نفسك
تلفت القَـاسي واول مارجع فتح باب السياره واحد من لهجمو عليهم طلق رصاصه عليه جت في رجله خلاته يفقد توازنه وقبل مايطيح حس بدين سندوه وبـ سياره جت قدامه كـ حمايه وهوا من الالم ماعاش ستوعب لـ شي وماحولش يستوعب او يفهم غير انه يهمس :السِـيفاو
ورفع راسه لـ اللي شاده لـ كان ملتم ورجع ردد :السيِـفاو
جاه صوته وهوا يساعد فيه يركب السياره :خلي راسك تحت ماتشيله بكل
هز القَـاسي راسه بخفه وهوا حاس بـ الدنيا تلف بيه ولعيونه لدغدشو وهوا يشبح لـ اللي ساعده  سكر باب السياره عليه وهوا يتلفت يأشر بـ يده لـ السياره لـ حماته مابين حط القَـاسي في السياره باش يتحرك بالقَـاسي وهوا طبس تحامه بسياره القَـاسي وتلفت يشبح في السِـيفاو اللي قدامه بتمام وهوا متحامي ورا سيارته ويدور بـ عيونه علي فَـاتح بس اول ماشاف قدامه وشاف واحد ملتم رفع سلاحه وهوا بصوب عليه بس حول اللتام علي وجهه طول وخلا السِـيفاو ياخذ في نفسه بـ بتسامة راحه :محمـد
رجع محمـد لبس اللتم ورفع سلاحه تجاه السِـيفاو وطلق رصاصه لين السِـيفاو ضيق عيونه وهوا مش مستوعب لـ لحظه قبل مايحس بـ صيحت اللي واقف وراه لفقد توازنه وطيح السلاح لكان مصوبه غدره في السيِـفاو لتلفتله وكمل عليه بضربه علي راسه بقفا رفقه خلت الشاب يغمي عليه طول ووقف وهوا يشبح لـ رجاله ليتصارعو مع رجال الصقر وهوا يشبح في فَـاتح اللي واقف ورا الشاحنه وقبل مايمشيله حس بـ يد علي كتفه خلاته يتلفت طول بـ نبضات قلب كادت تخترق قلبه من الخوف بس اول ماتلفت وشاف محمـد لهمسله :عدي لسياره لورا سيارتك مصفحه و وقف ورا الشاحنه نجيب فَـاتح ونجي
هز السِـيفاو راسه من غير اعتراض ومشي وخلا محمـد اللي طبس كر الشاب لطلق عليه علي رجله الرصاصه ركبه لسياره وربطله رجله باش مايزيد ينزف اكتر ويفقد دم وتلفت سحب سلاحه واول مارفع راسه شبح لـ السِـيفاو لـ واقف قدام السياره وهوا يصيح :فَـااااتح
وقف محمٌد وتلفت طول لـ فَـاتح اللي زمط ريقه وهوا يتجمد في مكانه وهوا حاس بـ السلاح اللي محطوط علي راسه وعلي الصوت لجاه من وراه :حركه اطيرلك راسك الاحسن تستسلم بـ هدوء
خدي فَـاتح نفسه ورخي يده لشاد بيها السلاح لطاح علي الارض وتلفت بشويه وهوا يشبح لـ الشباب لحاوطوه مع زياد اللي طبس بـ خفه وخدي سلاحه من الارض ووقف وهوا يشبح لـ فَـاتح لـ تلفت علي صياح السِـيفاو اللي خلا رجال الصقر ينتبهوله ويمشو يجرو اتجاهه بس جي محمـد قدامه ودفه بـ تعافير من السِـيفاو لـ يصيح :تي حول خوي حول ، فَـااااتح
فتح محمـد باب السياره ودف السِـيفاو وركبه بسيف وركب وهوا يتحرك  بالسياره  بسرعه وسطرب وهوا يلف بالسياره في مكانها باش غبر علي اللي حاوطوه لبعدو طول من قدامه وهما يرمو في الرصاص  بس السياره كانت مصفحه لخلا محمـد يتحرك يبعد قبل ماتجي رصاصه في وحده من القومات .
.
.
.
سكر بَـحر الشنطه لحطها قدامه وهوا ياخد في نفسه ويشد في تليفونه لـ فتحه وخش يحاول مع الرقم الخاطفيين بس كان يعطي فيه مقفل من لما اتصلو لخلاه يحدفه قدامه بـ غل وهوا يصيح :ياعـ.... ياكلاب
وشد وجهه بين يديه وهوا يحاول يهدا ويروق باش يفكر صح ويجمع افكاره اللي رجعو وتشتتو اول ماسمع صوت تليفونه يشرين ، حول يديه من علي وجهه وهوا يشد في تليفونه  وناض وقف وهوا يرد :ايوه
جاه صوت اللي خلا دقات قلبه يزيدو : وين لفلوس شكلك تبي يسيل ادم
طلع بَـحر صوته المبحوح بـ فزعه :لالا فلوسك واتيات تم ، اعطيني مكانك باش نجيكم
رد عليه بـ الصغة التهديد :لالا مش انت ، لفلوس تجيبهم امراة ولو تغلط نلعب فيكم عشره
خدي بَـحر نفسه :تمام تم اللي تبيه اللي تبيه غر ماتمسو بوي بالشر علي رحمت ولديكم ، والفلوس تامات حـ نجيب الوالده وهيا حـ تلاقيكم
جاه صوته :تمام راجي اتصالي باش نعطيك عنوان المكان ، وياويلك ادخل فيها الدوله ولا الشرطه بعدها وربي ماتكونو غير متصفيين انت وبوك ومك
بَـحر :لالا كون متهني والامور طيبه غر باللهي عليكم ماديرو شي في بوي
فصل الخط علي بَـحر اللي مسح علي وجهه وهوا يحاول ياخد نفسه ويهدا شوي ورفع راسه لـ السماء ومن غير اي صوت منه ناجا ربي ناجاه وهوا يرجو فيه بـ اللطف بـ حاله وبـ حال بوه
.
.
.
هجم رعد علي السِـيفاو وضربه بوكس علي خشمه خلا السِـيفاو يرجع التالي من غير صوت وهوا يرفع في راسه لـ رعد اللي صيح :لا امتي انم اه لا امتي يا...... بتقعد انت وبوك الـ..... ادمرو فينا وتخربو في حياتنا وضحو بينا باش تعيشو بجرمكم انم لا امتي
وقرب وزاد ضربه علي وجهه اكتر من لكمه لين طاح السِـيفاو لوطه لرجع سند روحه بـ يديه ووقف تلفت لـ رعد اللي دفه التالي وعيط :اول واحد رائد اول واحد يا....... ضحيتو بـ روحي بـ قلبي بـ توأمي يا....... وتو فَـاتح والله وعلم دور من فينا اللي جاي اني ولا علاء
وشده من ياقت جكيته وضربه بـ راسه علي جبهته لين حاجبه انجرح من طقية رعد اللي دفه وزاد ضربه علي وجهه :لا امتي اه لا امتي انم لا امتي ، امتي بتبطلو تلعبو في حياتنا وفي حياة الناس الله يلعنكم يا ..... ويلعن اليوم لنجبنا فيه بينكم
وقبل مايزيد يقرب منه حس بـ يدين كتفوه وبعدوه علي السِـفاو اللي كان يتلقا في ضربات رعد من غير صوت او اعتراض وهوا كل مايضربه يرجع يوقف ويرفعله في راسه بكل رحابت صدر لـ ضرباته .
صيح رعد اللي يحاول يدف محمـد اللي شده علي السِـيفاو :حول يامحمد حول حول خليني اربي امه انم خليني نوريه حياة الناس مش لعبه بديه هوا والـ..... بوه حول انم حول خليني نقتله الـ..... قبل مايزيد ياخد ارواحنا
زاد محمـد كتفله يديه وقرب منه :هدي يارعد هدي وخلينا نفكرو بـ العقل مانبوش الزمان يعيد الكره
رعد صيح :عاد اهو عاد واللي صار في رائد بصير في فَـاتح خليني عليه الـ.....
رجعه محمـد التالي بعيد علي السِـيفاو لـ وقف علي حيله وهوا يتكي علي السياره ويمسح في دم خشمه وفمه بـ كم تيشرته ورجع رفع عيونه لـ محمـد لتلفت لـ رعد وصيح :خلاص يارعد
خبط رعد بـ رجليه علي الارض وهوا يمسح علي وجهه بـ يديه الزوز وتلفت مشي وخلا محمـد لـ تلفت لـ السِـيفاو باتنهيده وقرب منه وهوا يشبحله لـ لحظات بـ صمت خلت السِـيفاو يرفع فيه في عيونه :ماكنتش نبي نسيبه يضيع بروحه
تنهد محمـد ورفع يده شد كتفه :انت ضيعته من دخلته في المتاها هدي يارفيقي علمته كيف يصبي في الطريق الغلط
وطبطب علي كتفه وبعد وهوا يطلع في لكلينكس من جيبه ومدهوله ، وكمل كلامه  :خود ، خود وظمن نا مستحيل نخلي لصار لـ رائد ينعاد لـ فَـاتح
خدي السِـيفاو لكلينكس من محمـد بـ تنهيده ومسح خشمه من الدم ورجع شبح لـ محمـد وقال :القَـاسي
محمـد :جاته بسيطه الحمدالله ، عدي تريح وخلي موضوع فَـاتح علي تمام
تلفت السِـيفاو فتح باب السياره من غير مايرد علي محمـد اللي شدله يده لين السِـيفاو تلفتله وهوا مضيق عيونه .
محمـد :تمام
تنهد السِـيفاو وهز راسه :تمام يامحمـد تمام
وخر محمـد التالي وهوا يشبح لـ السِـيفاو لـركب السياره وتحرك تحت نظرات محمـد اللي تلفت وهوا يخش لـ المستشفي ويرد علي تليفونه لـ شرين :ها
جاه صوت الصقر لـ رد عليه بتسهويك :صحه يا بابا النوم شني حبيبي مازال خاطرك تنني
ضيق محمـد عيونه وهوا يوقف قدام غرفة الدكتور :لنقنك بالك في تسهويك ونا ماخطر في بالك سيرته
الصقر رفع حاجبه :لنقنك خديت راحتك هلبا معاي وين ان شاءالله اليوم مش علي اساس قتلك مداهمت السِـيفاو والقَـاسي عليك فجأة سكرت تليفونك وخليت زياد بروحه
محمـد قرب من الدكتو اللي طلع من الغرفه وهوا ينزل في التليفون وقال :لحظه دكتورنا لو سمحت
ورجع رد علي الصقر :شوي وجاي لـ المقر
وسكر الخط في وجهه وقرب من الدكتو لـ قال :انت مع الشاب المتصارب
محمـد هز راسه :اي كيف حالته توا
الدكتور :الحمدالله الرصاصه ماضراتاش وماوصلتش للعظم بس نزف هلبا وبـ صعوبه وقفنا النزيف الحمدالله ومن حظه زمرته متوفره عندنا حطيناه في الملاحظه  توا وحالته مستقره نبو نراجو لـ غدوه ونشوفو كيف حالته بتكون
محمـد :شكرا دكتور بارك الله فيك ماقصرت
بتسم الدكتو وهز راسه ومشي وخلا محمـد اللي تلفت طلع وهوا يرفع في تليفونه لشرين واول ماشاف رقم الصقر سكر في وجهه الخط وهمس :وربي ماتكون نهايتك الا علي يديا
.
.
.
سكر السِـيفاو باب الحوش وهوا يلوح في المفتايح علي الطاوله وحول جاكيته وسبيدروه بـ عشوائيه علي ارضية الممر وخش لـ الحمام وهوا يوقف قدام لمرايه و يشبح لـ روحه ولـ وجهه ، لخشمه اللي ينزف مع جرح جبهته ، نزل عيونه لـ شيشمه لفتحها ودخل راسه تحتها وهوا يغمظ في عيونه ويدكر في نظرات فَـاتح ليه نظرات الرهبه لما صيح عليه نظراته اللي ستنجدت بيه بضعف
طلع السِـيفاو راسه من تحت لميه وهوا ياخد في نفسه بـ القوه وكـ أنه كان غارق في عمق البحر المظلم وهوا ياخد في الاكسجين علي قد مايقدر ويمسح في وجهه من لميه بـ كم تـشرته اللي تعبه اميه من شعره اللمبلول ، اللي ولا همه وطلع وهوا يطلع في تليفونه من جيبه ويطلع لـ البلكونه ويقعمز علي الارضيه وتكه علي لقزاز البلكونه بضهره ويتكي في راسه عليه ويشبح لـ السماء وهمس مع أذان الفجر اللي بدي يعلا بـ تكبيره في الارجاء :ياالله
وغمظ عيونه وهوا يتخيل في ضحكت رائد اللي جت في مسمعه ، في صوت فَـاتح اللي يتردد في ودنه قعد ، حس انه كلام رعد صح ، حس روحه بدل مايحمي خوته ، قعد يضحي بيهم واحد تلو الاخر ، يضحي باش هوا يستمر في وسخ قعد يغرق فيه كل يوم اكتر وكتر .
فتح السِـيفاو عيونه بـ عصبيه من روحه ومن ليدير فيه ومستمر عليه وخبط بـ رجله محبس الغرسه اللي انخبط في الحيط ودار صدا صوت اخلع مـريم اللي فتحت عيونها وهيا تحط في يدها علي قلبها وتنوض تقعمز :بسم الله
وزمطت ريقها وهيا تاخد في نفسها وتمسح في وجها بـ ضيق من رقدتها ، وقفت بشويه وهيا تقيم في شعرها من علي وجها وتطلع من الدار لـ الصاله وهيا اضيق في عيونها اول ماشافت سبيدرو وجاكيت السِـيفاو لملوحهم علي الارض بـ بعثره ، طبست قامت الجاكيت والسبيدرو لحطاته في متع لكنادر واول ماتلفتت شبحاته مقعمز في البلكونه ، ضيقت عيونها وحطت الجاكيت علي الكرسي وهيا تقرب بشويه واول ماوقفت قدام باب البلكونه وشبحاته كيف شعره مبلول ويقطر علي رقبته وتيشرته والجو برا كان صقع هلباااا شهقت مـريم بـ الصوت عالي الفت انتباه السِـيفاو لـ تلفتلها طول بس اول ماتلفت خشت مـريم تجري وخلاته يرجع يشبح قدامه ويمسح علي وجهه ولحيته وهوا يرجع يرفع في راسه بـ تضيقت عيون لـ مـريم لقعمزت قدامه بس قبل مايتكلم حطت مـريم علي راسه الفوطه وهيا تمسحله في شعره وقالت بـ عتب وفي نفس الوقت بـ خوف وهتمام :انت هبلت كيف تطلع وشعرك مبلول يقطر اميه في هـ صقع
وحولت الفوطه من وجهه وهيا تمسحله في رقبته المبلوله وتنفخ :اوووف تقول عيل صغير خيرك مخلي روحك هكي
واول مارفعت عيونها فيه هدت شوي وهيا تشبحله كيف يشبحلها بسرحان لين نزلت عيونها بـ خجل وهيا تستوعب علي روحها وعلي تصروفاتها :اني هو
لف السِـيفاو يديه علي خصرها وقعمزها في حضنه وهوا يحط في راسه علي صدرها ويحضن فيها ليه لين خلا مـريم ترفع  يداها فوق وهيا تاخد في نفسها لخانها وهرب مع دقات قلبها اللي زي الطبول من قوتهم وهيا تسمع في همسه :تعبت وحق الله تعبت ، كان نخسره حتي هوا نموت وراه يامـريم نموت
زمطت مـريم ريقها وهيا تقرب في يداها تبي تحضنه بشويه وبـ تردد بس اول مازاد السِـيفاو حضنها وقال :محتاجك اني محتاجك يامـريم هلباا
حضناته مـريم طول وهيا ادخل في صوابعها في غصلات شعره المبلوله وهيا حاسه بـ انفاسه العاليه اللي خلتها تضايق وكـ انه همه همها ، وكـ انه وجعه وجعها هيا .
.
.
.
تــاني يــوم الصــبح ...
خدت بُـتول نفسها وتلفتت لـ منذر اللي جبد الكرسي وقعمز قدام امه لـ حاطه يداها علي وجها ، وقال:باهي كيف حالها توا
خدت سميه نفسها ومسحت دموعها ورفعت راسها :الحمدالله نقولو الحمدالله بس دقات قلبها تضعف فجأة قعده مش متحمله العلاج هدا علاش شادينها في المستشفي
منذر تنهد :بنمشي معاك
سميه :قداش ليا ماعاش مشيت للعمل بنمشي بناخد إجازه وبنوقع ، بنلملها شوية حوايج ارفعهم معاك وقول لبوك يروح يرتاح شوي وجهه اصفر من قلت النوم وانت اقعد معاها مابين جيت
هز منذر راسه ووقف تلفت لـ بُـتول اللي واقفه في الزاوية وتشبحلهم وقال :هيا كان واتيه
هزت بُـتول راسها وقبل ماتتكلم تلفتت لـ امها لـ وقفت وقالت :برا انت تو نعطيها مفاتيح سيارتها
منذر هز راسه وتلفت بـ يمشي بس وقفاته بُـتول لقالت :منذر
رجع منذر تلفتلها :نعم
بُـتول :نبي نمشي معاك
شبح منذر لـ امه لـ شبحت لـ بُـتول بـ تضيقت عيون ورجع شبح لـ بُـتول وقال بـ بتسامه وهوا يمدلها في يده :هي تعالي
شبحت بُـتول لـ امها وقربت من منذر شدت يده وطلعو هما الزوز تحت انظار سميه لتنهدت :ربي يهدك يابنتي ويجمع شملك انتي وخوتك
.
.
.
حطت جوري يدها علي فمها :وشن قالولها
تنهدت بُـتول :قلبها ضعيف هلبا تحتاج تستمر مع العلاج لفتره هدا لقالوه هني والتحليل لبعتوهم لـ الدكتور الالماني قعدين يراجو في رده عليهم كان تحتاج لعمليه او لا
جوري:ياروحي قعده صغيره
بُـتول اتكت وهيا تشبح لـ غرفة بهار لقدامها :كان تشوفي حالتها دابله هلبااا وهاديه غير العاده كانت اول ماتشوفني تقعد تلقح وتدوي توا ولا كلمه
جوري :ربي يشفيها يارب وعاد انتي اختها حني عليها وانسي مشاكلك شوي مهما يكون اختك واكيد تحتاجك
سكتت بُـتول لـ تواني وهيا تشبح لـ منذر لـ طلع ورد الباب وراه وردت علي جوري :ان شاءالله هي غدوه نشوفك
جوري :تمام ياقلبي باي
سكرت جوري من بُـتول وهيا تتنهد واول ماتلفتت نخلعت وهيا توخر خطوه التالي وضيق في عيونها لـ نَــاصر اللي حاط يديه في جيوبه وواقف بـ ثقه وبتسامه مرسومه علي شفايفه :اهلين
خدت جوري نفسها وهيا تحاول ماتعليش صوتها وقالت بـ عصبيه :انت شن تبي مني مش قتلك بعد عليا وخطاني
رفع نَــاصر كتافه :مش قادر خشيتي دماغي خلاص
هزت جوري راسها:اكيد دماغك هدا فيه خلل انت مش طبيعي
ورفعت يدها لـ شاده بيها التليفون وكملت كلامها بـ تهديد :سيبني في حالي والا والله والله نقول لـ الأمن
وقبل ماتتلفت شد نَــاصر يدها بـ جرائه خلت جوري ترخي التليفونها لخداه وهيا تسحب في يدها منه بـ صدمه من تصرفه وتشبحله  كيف رفع حاجبه وشبح لـ تليفونها اللي اول مافتحه انفتح ورفع عيونه فيها كيف فاتحه فمها بـ صدمه وقبل ما تتكلم قال :اول مره نشوف تليفون بنت من غير رمز هههه
شدت جوري علي سنونها بـ عصبيه وهيا تشبح حوالينها بـ توتر وخوف وقالت :انت اكيد مهبول اكيد مجنون عطيني تليفوني توا توا هاته
ومدت يدها بـ تفكه منه بس نَــاصر بعد يده لـ شاد بيها التليفون وهوا مركز فيه لـ تواني وبعدها سكره ومده ليها قبل ماتزيد تصيح وقال وهوا يطلع في تليفونه لـ شرين من جيبه بـ يده التانيه :تفضلي
فكاته جوري منه بـ عنف وقالت بـ قرنة حواجب :وقح وحقير
وتلفتت مشت بخطوات سريعه وخوف وتوتر من الموقف لقريب وقفلها قلبها وهيا ترفع في تليفونها اللي اول ماشبحتله ضيقت عيونها وهيا تشوف في الخط مفتوح ، رفعت حطاته علي ودنها وقالت :الو
جاها صوت نَــاصر بـ ضحكه :شرف رقمك تليفوني يابنيه
فتحت جوري فمها ووقفت وهيا تتلفتله بصدمه كيف واقف يشبحلها بـ ضحكه خلتها تضرب رجلاها علي الارض وتسكر في وجهه الخط وهيا تتلفت تمشي بخطوات سريعه وتخش بـ تحطه في الحظر بس اتصلت بيها سما اللي خلتها تنفخ وهيا ترد :الو سما نعم
سما :اطلعي حني نراجو فيك برا
ضيقت جوري عيونها :كيف
سما :حني قدام كلية الهندسه اطلعي بسرعه زحمه
جوري :تمام تمام
وسكرت وهيا مش فاهمه شي وطلعت بسرعه تحت انظار نَــاصر اللي تلفت بـ بتسامه وهوا يرد علي تليفونه :ايوه مؤيد
مؤيد :وينك
نَــاصر :كيف خشيت لديسكو فيه خلقت بنوت يجلطو
مؤيد نفخ :تي مش وقت تسهويك ياراجل القَـاسي تصاوب وقالو في المستشفي
رفع نَــاصر حواجبه :كيف
مؤيد :اني وعمر في الطريق نازلين لـ طرابلس
نَــاصر :في اما مستشفي
مؤيد :في #####
.
.
.
فتحت مـريم عيونها علي حركت السِـيفاو لـ في الدار وهوا يتكلم في التليفون :شني يعني شفته
جاه صوت محمـد :لا لكلاب شالوه لـ ...... بيش يأمنو اي حركه منك نا اليوم معديله
خبط السِـيفاو يده علي الزيانه:كلاب
محمـد :كيف ماقتلك مادير شي ينقلب علينا ياسِـيفاو تمام نا قريب نوصله ونحاول نخليه يكلمك
السِـيفاو :تمام
سكر السِـيفاو من محمـد وهوا يحط في التليفون علي الزيانه بـ تخبيط وهوا ياخد في نفسه وطلعه بـ تنهيده من وسط قلبه واول ماتلفت شبحها كيف واقفه علي ركابها علي السرير وتشبحله بـ عدم فهم وبـ هدوء خلاه يقرب منها وهوا يصطنع في بتسامه علي مبسمه :صباح الخير
تحمحمت مـريم ونزلت من علي السرير وهيا ترجع في شعرها التالي :اممم صباح النور
خدي السِـيفاو جاكيته من علي السرير ورجع تلفت علي صوتها :طالع
هز السِـيفاو راسه :تبي حاجه
هزت مـريم راسها بـ معني لا بـ صمت وقعدت تشبحله بـ هدوء كيف لبس جاكيته وطلع وخلاها اتبع فيه بـ خفيه وتوقف قدام باب الدار وهيا تسمع في باب الشقه لسكره ، تنهدت ورجعت تلفتت خشت لدار وهيا تشد في راسها بداها الزوز وتنفخ بـ القوه بس اول ماسمعت صوت رنت رساله  نزلت يداها وهيا تتلفت لـ تليفون السِـيفاو لنساه علي الزيانه قربت طول منه وهيا تهمس :نسي تليفونه
قماته وهيا تفتح فيه وتشبح في الرساله لـ قرتها بـ صمت ومحتواها خلاها توخر وتقعمز علي السرير بـ صدمه فشلتها ( اني الصقر يالسِـيفاو لا تاجر مخدارات زيك ولا مهرب اسليحه زي القَـاسي يقدرو عليا ، يتجي وتجيب راس الكلب لباعني ليك يا مصير خوك هدا زي خوك اللي قبله )
ورفعت راسها علي صوت السِـيفاو لخش عليها :مـريم
واول ماشافها شاده تليفونه ضيق عيونه وقرب بـ خطوات بـ طيئه وهوا يشبحلها كيف علامات الصدمه لمبينه علي وجها الاصفر وهيا توقف وترخي في التليفون من يدها لـ طاح علي الارضية الدار ، وعيونها لمدمعه متحولوش منه وقالت بـ رجفة صوت :انـ ـت تـ ـ تـ ـاجر مخـ ـدارات
.
.
صدمــات الحـياة مرعبـة ، فــاقت قـدارات تحمــلي 💔
.
.
#يتبـع لـ البـــ1️⃣0️⃣ـــارت
#كتـــابـة_اليَــاقُــوت

________________________________
بداء كتابة الرواية في تاريخ 5 / مـــــــ5ٰــــــايـو / 2020
تم انهاء كتابة الرواية في تاريخ 12 / اكتـــ10ٰـــوبر / 2020