عشق في بلاد حروبها لا تنتهي 4 ( 2017 )

البــ الــاول ــارت

_
_
عِــشق فـي بِـلاد حُـروُبِهـــا لا تنتّٰــهي 4
{ 2017 }
.
البــ الاول ــارت
.
حـين تكُـون العـوده أصعــب من الفُـراق 🍃
.
.
درس بَـحر سيارته ونزل سكر باب الجنان ، وتلفت شبح لـ أمه لـ حاطه كرسي ومقعمزه قدام باب الحوش ، قرب منها وهوا مضيق عيونه :خيرك يمه مقعمزه في الصقع
ضيقت أمه (جميله) عيونها :خيرك ماتردش علي تليفونك انت وخوك
بَـحر :قتلك يمه تبيني اتصلي بشفرتي لبيانا المدار مسكرها ، وعطيتك علم بايت في الخدمه
جميله :وخوك وينه
بَـحر:ونبي فكيني منه ولدك هدا تقول اني لكبير مش هوا
مسحت جميله وجها بداها الزوز وعيونها تعبو دموع :منلقاها منكم ولا من بوكم
ضيق بَـحر عيونه :خيره بوي
رفعت جميله راسها مع دموعها لـ نزلو وخلو بَـحر يزيد يقرب منها بـ فزع :خيرك شن فيك من لمضايقك يمه
جميله :بوك من اول امس ماروحش قلبي بيوقف مش مطمنه ياوليدي مش مطمنه
هز بَـحر راسه وقال :غر صبري بالك شويه يمه ، راني مستوعبتش كيف بوي ليه ليلتين ماروحش وماتقوليليش
حطت جميله يدها علي قلبها :قلبي مش مطمن يابَـحر توا مش وقت الدوه نوض دور علي بوك حتي من تليفونه مقفل مش من عوايده يسكره
بَـحر :باهي يمه باهي غر صبري بالك وماعاش تبكي تو ندورو ونجيبوه ان شاءالله مافيه غير كل خير
جميله : اتصل بـ خوك وبرو دورو عليه
هز بَـحر راسه :باهي يمه خشي داخل صقع ان شاءالله مافي الا كل خير غر خشي انتي
ناضت جميله خشت الداخل وخلت بَـحر اللي مسح علي لحيته بـ توثر وهوا يطلع في تليفونه :وينك يابوي وينك بس
وحط التليفون في ودنه وهوا يراجي في الرد ، بس قعد ينادي لين فصل الخط وخلاه يخبط في رجله علي الارض :ياعن شكلك يا (حاتم) وينك وينك
.
.
.
حط التليفون في جيبه ورفع راسه :تميت الموضوع وحـ نجيبلكم لفلوس قريب بس نبي تعطوني كميه كبيره ، تسدني سنين القدام
هز راسه بـ بتسامه :ماتاخافش بضعتك تفتحلك محل غر جيب لفلوس وتاخدها
طلع تليفونه لـ رجع يتصل من جيبه ، وقال :تمام يا(علاء) نتلاقو
رجع علاء هز راسه وقعد يشبحله كيف مشي بـ رعشة إدمان باينه وواضحه علي ملامحه ومشيته وحركته .
تنهد علاء بـ بتسامه :وبتغنيني ياصحيبي هههههه
جاه صوت من وراه :من هوا لبيغنيك
تلفتله علاء بخلعه:خلعتني ياراجل
فَـاتح :من كان هني
علاء:حد شني جبتو لبضعه
فَـاتح هز راسه وجبد الكرسي وقعمز :ايه جبناها وصاحب الشاحنات شكله واحد الله هالله
علاء ضيق عيونه :علاش
فَـاتح :خلانا ساعه وهوا يعد في الفلوس
ضحك علاء:بجديات ههههه
فَـاتح:وربي هي ماسيبنا لين عدهم وتأكد منهم زين بعدين خلانا نمشو
علاء:هدا القطرس
فَـاتح :لا القاسي اول عمليه معاه وشكله بشحورنا في كل تسليمه زي اليوم
ضحك علاء:هههههه حشيش جبتو ولا شن
فَـاتح :والله مانندري السِـيفاو هوا لـ وصا
علاء :المهم غدوه في توصيله لـ الجامعه برا انت
وقف فَـاتح :تمام امالا اني بايت برا
علاء:وين
فَـاتح:استراحة الجمعه
وتلفت ورفع يده :تشاااو ياتشيم
علاء :راك تنسي غدوه
.
.
تبــاً لـ قــلبي الدي عشـق مـن جعـل بِـلادي حُروبِهــا لا تنتهَّـي 🥀
.
.
سكر السِـيفاو الباب بشويه وعيونه فيها كيف راقده علي الصالون ومخليه التلفزيون مفتوح وعالي ، قرب سكر التلفزيون وقرب قعمز علي ركابه قدامها ورفع يده بـ تردد ورفعلها خصله من شعرها من علي وجها وعيونه تتجول في ملامحها الهاديه ، قرب بـ خفه من وجها وهوا يستنشق في ريحت نفسها الهادي وقرب باسها علي خدها وبعد من عليها بسرعه وهوا يحس بـ حركتها وتلفت خش لدار بـ لمحه من عيون مـريم لـ فتحتهم وهيا تمسح علي خشمها لستنشق ريحته وكـ أنه كان بقربها ، وكـ أنه كان وجهه قبال وجها ، وكـ أنه هدي ترددة في عقلها وماظنت انه هوا فعلا كان بقربها .
حكت عيونها بـ يداها بـ القوه وهيا تحاول تصحصح ، وناضت وقفت قربت من الدار وهيا تشبحله كيف يلبس في تيشرته .
تحمحمت وخشت تحت انظاره وقربت من الكمادينو وخدت تليفونها وقربت من السرير خدت مخده وتلفتت بـ تطلع بس وقفها صوته لقال :وين
مـريم :زي العاده بنرقد في الصاله في شي جديد
خدي السِـيفاو نفسه وهوا يحاول مايعصبش وقال بـ نبره هاديه بس واضحه فيها العصبيه:مـريم ، افتحي قلبك ، وياسر قساوه
ضحكت مـريم بـ هزوه :ماعنديش قلب اصلا ، حضرتك قتلته قداش ليك
وتلفتت بـ تطلع بس قرب منها وجبدها من يدها ولفتها ليه وقال بـ نبرة مختلطه بين الغضب وألامبلاء :جبتي حدي خلاص ، ياتقبليني وتقبلي علاقتنا ياخلينا ننهو لـ بينا في ارضه
فكت مـريم يدها منه بـ عصبيه ورفعت عيونها فيه :انهيه اني لنبيك تنهيه اصلا لو كان في يدي ماخديتكش من الاول ، ماخديت اللي دمرني وطيحني من عين بوي وامي وعيلتي كلها وطيح سمعت بوي في الارض
ضرب السِـيفاو يده في الحيط بـ عصبيه وصيح :غلطه هيا غلطه ، وصلحتها وقعد نصلح فيها ، جيت خديتك وسكتت أفوم الناس عليك جيتك وردتك حلالي علاش ماتنسيش علاش ماتتقبلينيش كـ شخص جديد غير الشخص لخطفك وغلط معاك اشبحيلي اني السِـيفاو اللي جي وخداك وتأسفلك علي كل أغلاطه وهوا نادم انسي هداكا الشخص لغلط معاك خلاص انهيه من حياتك
ضحكت مـريم من بين دموعها لـ نزلو :القلب لما يحقد علي شخص ماعاش يقدر يتقبله في أي شكل من الأشكال خلاص
سكت السِـيفاو لـ لحظات قبل مايتنهد ويمسح وجهه بـ يديه الزوز ويزيد خطوه يقرب منها وهوا يرد لهدوئه :ولما يحب شخص ينسي كل ماضيه ويتقبل كل أذيه منه ، هدا لصاير معاي
وسكت شوي ورفع عيونه شبحلها ، وكمل :ومعاك ، قعده تفكري فيه برغم كل لداره فيك هههه واني لقعد ندفع في الثمن، هوا لغلط وخلاني نغلط ، خدي مني خوي وغرقني في حب لـ تحبه
خدي منها المخده لـ بين يداها وتلفت طلع لصاله وخلاها واقفه في مكانها غـارقه في دموعها .
تلفتت قعمزت علي السرير ، وغمظت عيونها وهمست من بين دموعها  :نكرهك ونكرها ، نكرهك لانك دفعتني ثمن داره هوا ، ونكرها لانه عشمني فيه وباعني بـ الرخيص ،  الله ياخدك يا#صقر
.
.
#مـريم
أسمـي مـريم ، أني البنت اللي ضحه بيها الشخص اللي حباته بـ صدق ومن كل قلبها ، البنت اللي خطفوها بس علي خاطر عندها صلة بـ ملشياوي كبير في البلاد ، خطفوني بـ ساوموني بـ أسير عنده ، كل الحب والعهود والكلام المعسول راح في لحظه ، في ثانيه ضاع لما قلهم هيا ليكم ديرو فيها لتبوه ، باعني وسترخصني وباع السنين والعشره اللي بينا ، قعدت مخطوفه خمسه ايام ، خمسه ايام عيلتي عايشه في الخزي والعار ، إشاعات طلعت ودمرت عيلتي ، لقال هربت مع حبيبها ، واللي قال سافرت بروحها ، وماخلو شن قالو ، بعد ما مرو الخمس ايام ومات اللي بساوموني بيه، رجعوني بـ شرفي وماحد مسني ولا اعتدا عليا الشي لـ مصدقه حد حتي بوي لشكك فيا ، شكك في بنته وعطاها لـ اللي دمرها وخرب حياتها ، عطاها لخطفها وطيح سمعتها وسمعته بين الناس .
.
.
.
ضيقت عيونها بـ ضيق وتلفتت لـ الجيها التانيه وهيا تتململ وتحس بـ نفس حد جنبها خلاها تفتح عيونها طول واول ماشافت وجها لماداته وعيونها المفتوحه علي وسعهم ، نطت بـ خلعه وعيطه وهيـا توخر التالي متناسيه انه راقده علي حاشية السرير ، وطيح لوطه بـ القوه وبـ عيطه تعلت مع الضحكات اللي فيسع مانكمدت بـ خوف :والله ماقصدي وحقربي هههههه مانحسابكش مرعوشه وخوافه ههههههههه
نهضت إينـاس روحها بشويه وهيا تشد في ضهرها لـ حاساته تشكل من قوت الطيحه ، ورفعت عيونها بـ غضب وصيحت:تعرفي يا (سما) كان ماتختفي من خليقتي حالا نكون منتفاتك بين ألفين
نزلت سما من السرير بسرعه وطلعت جري من الدار بضحكه :ههههههه ماما
ردت عليها أمها (فاطمه) من المظبخ:نادي علي خوتك و هيا تعالو افطرو وقت علي المدرسه
سما شدت في باب المظبخ وهيا تشم :اااااه محلا ريحت الدحي وزفارته
ضحكت فاطمه وتلفتتلها وهيا تحذف عليها في الفوطه :ياعطيهالك باهيه يابنيتي مكتر تفتفيتك ، بري نادي علي خوتك وبوك
ضحكت سما واول ماتلفتت وشافت إينـاس لطالعه من الدار وشعرها مشفشف والسروال رجل راقي لا فوق والتاني نازل والشفايف مادتهم مترين القدام حطت يدها علي فمها طول وقالت :صباحو عسل أنوسه
شبحتلها إينـاس علي الجنب وخشت لـ الحمام وقربعت الباب لين خلتها تنخلع وهيا تضحك وتلفتت طلعت برا تنادي :بابا (وسااام) (هاني) هيا لفطور واتي ، لينا ساعتين نستنو فيكم
وسام :كدابه تراهو امي قعده ماقلتش حتي الدحي
ضحك هاني : هههه نوض نوض قريب 7:30 وقت علي المدرسه
.
.
#إينـاس
إينـاس هدا اسمي ، اني البنت التانيه في العيله يعني الوسطيه عندي اخ اكبر مني واخت واخ اصغر مني ، مسيبه قرايا من لعدادي ، والسبب إعاقتي ، تشوه من الولاده عندي عظمة الرجل مش في مكانها وكنت نحتاج عمليه بس للأسف بوي علي قد حاله والعمليه كانت مُكلفه ويبيلها سفر لـ ألمانيا وعلاج لشهور وستأصال جزاء عظمه من الرجل السليمه ، وهلبا دوه ماليها نهايه زي فلوسها ، فـ كبرت وصارت العماليه مستحيله لأنه كمل نموي ونمو رجلي ، وصارت إعاقتي مستديما ، برغم مش هـ الإعاقه اللي تخليني نسكر الأبوب في حياتي ، بس اني انسانه مانتحملش الانتقاذ مانتحملش دوت وإشارات الناس عليا ، حي شوفوها كيف تعرج ، حي شوفو رجلها ، حي خيرها هكي تمشي ، جمل عقدتني نطلع من الحوش ، ممكن تشوفو فيه سبب تافه إنه نوقف حياتي عليه ، بس بنسبه ليا التنمر لتعرضتله في صغري كافي يخليني شاده الحوش ومانطلعش ، اني اليوم تعودت علي إعاقتي بس للاسف قعده ماتعودتش علي دوت الناس ، اللي ولت احر من السابق ، شوفيها جميله ومشاءالله عليها لكن عرجه ، ياناري بتقعد في رقبة أمها وبوها لين تموت من غير زواج ، من بيرضا بـ وحده عرجه ، هدي دوت العيله اللي هما عيلتي وعزوتي ، شن نتوقع من البرانيه امالا ، يحسسوك وكـ أنه لو ماتزوجتيش حـ تعيشي مرتكبه جريمه ، وكـ أنه الزواج الفتوره لـ لازم انك تدفعيها لانك بنت ، ههه ناس سادجه ، خلوني نحصر تفكيري ونحط في راسي إنه مستحيل حـ نحب وننحب في يوم ، مستحيل شاب يشوفني ولا يحبني لأني عرجه ، وتوني لليوم هدا ، اليوم اللي نشبح فيه لـ الشخص لـ نحبه بـ عيون عارفه انه مستحيل يكون ليها ، نحب بس من بعيد ، وشوفته الشي الوحيد المسموحلي ،  حقــدي وستحقــاري لـ مُجتمـع يستنبّـد مــاخلقه اللّٰــه فيـكـ .
.
.
.
وقف تحت الشجره وعيونه واقفات علي الشاب والبنت لواقفين علي بعض وشادين يدين بعضهم ، واقف ويحاول يشبح زين يحاول يكدب عيونه ، وهوا يسمع في صاحبه لطبطب علي كتفه :هيا يانَــاصر هيا تعالا نمشو
نَــاصر :قولي كدب باللهي عليك قولي كدب ياسامح
سامح تنهد وشد نَــاصر من يده :تو نتفهمو معاه ياراجل غر تعالا وفكنا من العار في الجامعه
فك نَــاصر يده من سامح وتلفت مشي بـ غله وبـ غضبه وحرقة قلبه ، وعيونه مش قادرين يصدقو لشافوه مش قادر يستوعب رفيق عمره وحبيبته اللي قعد سنه كامله وراها ، يخونوه بهدي البساطه يخونوه ويستغفلو التـقـه لعطاهالهم .
كان يمشي ومش شايف قدامه من الغضب والقهره اللي في قلبه ، ومن دون قصد خش في واحد .
بعد نَــاصر خطوه التالي ورفع يده :بشويه خونا
ومشي وخلاه يشبحله بـ رفعة حاجب :خيره هدا
وهز راسه وهوا يطلع في تليفونه لـ شرين ورد :ايوه يُـوسف
يُـوسف:تي وينك ياراجل مش قلت بتمشي معاي
ضيق فَـاتح عيونه :شني نظامك خانب وفي يده شمعه ، شن ماشي من صباحات ربي تقول عندك كريه مش بتجيب مهاجرين
ضحك يُـوسف :هههه اخدمها بـ عقلك يافتوحه نمشي قدام عيونهم وفي عز انهار اللي متأمنين بـ ضيه ونخليلهم الليل وكوابييسه
بتسم فَـاتح وتلفت بـ عفويه بس تلاقو عيونه بـ عيون كانو سارحيين فيه ، قعد يشبحلها ، ورد علي يُـوسف :تمام عندي تسليمه في الجامعه نكملها ونجيك
سكر فَـاتح وقعد يشبحلها لين ستاقضت بـ روحها وهيا اضيق في عيونها بـ رفعت حاجب وحولتهم وهيا ترد علي صاحبتها :ها ياجوري ها
جوري:تي كليتي الولد بقشوره حولي عيونك وانتي لا تتحشمي لا تستحي
نفخت بـ ملل:تصدقي والله ماكنت مركزه فيه نفكر في ماما
ضيقت جوري عيونها :علاش خيرها امك
رجعت شعرها الأشقر القصير ورا ضهرها ، وقالت :شدتني امس نكلم في علي اوووف تعرفي دارتلي العار وجو اني واثقه فيك وياخسارت تربايتي فيك وبلا بلا بلا علي اساس بدير جو الام المهتمه
جوري :(بُـتول) بعيداً علي كلام امك الصح ، بطلي طياشه وعقلي ، تو لولاد لتكلمي فيهم ولا الجو الشين لـ ديري فيه برجعولك امك وبوك ولا شني ، حطي عقلك في راسك خلاص كبرتي ره
بُـتول :باللهي فكيني من دوتك هدي ، وغيري السيره حتي اني مالقيت لـ من نشكي
تنهدت جوري :لكلام معاك سدًا اصلا ، نوضي عبدالمهيمن قريب يجيني غر نمشو قدام الكليه
ناضت بُـتول ولمت شيتاتها حطتهم علي الطاوله ولبست شنطتها وتلفتت لـ جوري لحطت يدها علي فمها :تي هدا جايك يابنت بسرعه تحركي قبل مايوصل فينا
ضيفت بُـتول عيونها بعدم فهم وتلفتت ، واول ماتلفتت وقف فَـاتح قبالها .
رفعت بُـتول حاجبها :تفضل ؟!
بتسم فَـاتح ونزل عيونه لـ شيتاتها وهوا يطلع في ورقه من جيبه وحطها فوقهم ومشي وخلاها مش فاهمه شي ، وماستاقضتش علي روحها الا لما شحتها جوري وهيا توشرش :تي تحركي ولوحي الورقه لعطاهالك
بتسمت بُـتول وشبحت لـ الورقه لشدتها وفتحتها وهيا تقرا في الرقم المكتوب ، حطة الورقه في جيبها وشبحت لـ جوري لفتحت فمها :مصح وجهك كان بتاخديه
نفخت بُـتول :فكيني من الجو لقديم لديري فيه وبري هيا وقت
.
.
#بُـتول
اسمي حلو هلبا بُـتول ، ماتتعقدوش من دوتي المغروره ، لاني نحب روحي هلبا ، مش غرور بس مافيش حد يستاهل حبي حتي امي وبوي ، فـ عطيت كل حبي لـ نفسي ، اني وحيدت امي وبوي ، هههه طبعا وحيدتهم هما الزوز بس كل واحد عنده صغار اشقاء ليا ، لانه حضرتهم من بعد ماجابوني كتشفو انهم مش متفاهمين مع بعض فـ قررو الانفصال ، وماحد قدر يضحي بـ شبابه وبـ روحه علي خاطري ، فـ حطوني عند جدي وحناي ، وكل منهم تزوج وشاف حياته ، ماننكرش انهم مش منقصين عليا من حيت لفلوس وأي طلب ليا يتنفد من غير نقاش ، لبس ومشاوير علي كيفي من صغري لين كبرت ودارولي سياره من تلقاء نفسهم ، رفاهيه صح ، بس رفاهية من غير ربايه ، يحسابو كان عطوني كل لنبيه ونفدو طلباتي حـ نكون راضيه ومش حـ نفقدهم ، مش حـ نحتاج حنانهم ، وخوفهم ، مش حـ نحتاج لـ ام ولا لـ اب جنبي ، يحسابو لفلوس هما لبيملو دورهم في حياتي ، من صغري تربيت علي عدم وجودهم ، حتي ماما وبابا اول مانطقت بيها لـ جدي وحناي ، وممكن ماكانوش حاضرين اول مشياتي ، ولا مرضاتي ، اكيد يعني مش حـ يسيبو صغارهم وازواجهم ويجوني .
تربيت في ضل حناي وجدي ، ومره كل نهاية اسبوع يانمشي عند امي ونقعد نتعارك مع بنتها و ولدها لين اروح مع تكشيخه من امي وهزايب ، ومره عند بوي نختمها بـ عركه مع مرته لـ السماء وبرضو اروح بـ تهزيبه من بوي لين بديت ماعاش نمشي لحد منهم بدو كل مايبو يريحو ضميرهم اتجاهي يجوني مع هديه او مبلغ فلوس و يهدرزو شوي وكـ أنهم ضيوف ويمشو .
وكبرت ، وماحد وراني شن هوا العيب وشن هوا لحرام ، جدي وحناي كبار يادوبهم يهتمو في اكلي والامور البسيطه زيهم وزي حياتهم ، فـ كبرت علي مبداء الحريه وكل شي مسموح ، ماحد قالي تحجبي راك كبرتي ، ولا حد يدقق لـ حوايجي كان ضيقه او قصيره او شفافه ، ماحد ينبش وراي او ياخد في تليفوني ، بـ مختصر ماعنديش حد نخاف منه ، حتي امي وبوي ، ولما بديت نفهم خشيت علي سريب لولاد ، هوا غلط نقول علي روحي هكي بس هدا الحق بديت نكلم في كل من هب ودب في حياتي ، ندور علي شخص يملالي الفراغ بس كلهم استغلال ، يشوفو فيا بنت متحرره وفلوس يمشو علي الارض لا غير ، منهم من طامع بـ جسمي وفشل يوصله ، ومنهم من طمع بـ فلوسي خدي خدي ولما شبع مشي وخلاني .
فـ بديت حتي اني نتسلا ونضحك وجو صحاب وطلعات ولا أبالي علي الخسائر ولا علي السمعه .
.
.
نحتـاج لـ رايـة السـَـلام أنْ تــرتفع فـي أرض لا يَـعيش بِها بســلام إلا الخَـبيِث ❌🍃
.
.
سكر الكوفيني وتلفتله :خبره في الاسلحه ماشاءالله
نزل القَـاسي نظره لـ التليفون لشاده الشاب في يده ونتبه علي الخط المفتوح ، ورجع رفع عيونه فيه ، وقال بـ بتسامه : محلو امولي سمح
ضحك الشاب بـ تضيقت عيونه وقبل مايتكلم ، قرب القَـاسي منه ولفه طيحه علي السياره ولواله يده لـ شاد بيها التليفون ورا ضهره وفكه منه وهوا يسكر في الخط مع صدمة الشاب لـ قعد يقيم في راسه ويشبح لـ السيارات لـ جو .
خدي نفسه بـ خوف وهوا يسمع لـ همس القَـاسي لقرب من ودنه ، وقال :مـاعمري وحياتي ياصحيبي مارفعت السلاح في وجه حد ، لكن يشهدو عليا تريس خبره ونعجبك يابيوع
وخبط راسه علي السياره وبعد عليه وخلاه لـ الشباب لـ جوه كتفوه ورفعوه لـ السياره تحت نظرات القَـاسي لـ تلفت بـ بتسامه وقال :صقوره ليك وحشه ياصحيبي
ضحك (الصقر) وقرب حضنه ، وبعد :وليك اكتر ياصحيبي
وتلفت لـ الشباب ورفع يده :شبيبااا جيبو الضيافه
القَـاسي: ياوخيتي سلمك وخلاص علاش متعب روحك
زادت ضحكت الصقر تعلت :هههه صدقتك تو كان ماجيتش بلاه ره وريتنا قساك ياقَـاسينا
وخدي الصقر الشنطه من الشاب ومدها لـ القَـاسي لضحك :ههههه عارفني روحي في الفلوس
وحط الشنطه علي صندوق السياره وفتحها وهوا يشبح لـ لفلوس ، وبعدها سكر الشنطه ورجع شبح لـ الصقر لـ قال:شني مني ماتبيش تعد زي العاده
رفع القَـاسي حواجبه :لالا ، كان فيه اي نقص نجي لـ عندك مش غريب علي انت
الصقر:كلب من يومك ياخوان
القَـاسي أشر بـ صبعه بـ معني لا :لالا ياصحيبي الخونه مش من طبعي ومانبيع الا اللي ناوي يبيعني ، حطها في راسك ياحبي باش مانبيعكش زي مابعته ليك
الصقر:مش اني لنتهدد رد بالك ياالقَـاسي
القَـاسي:ههههههه ياحبوب انت ساعه بـ ساعه مره بصاره ومره تلقيحه مشي الامور ياصقر ماخاطريش نتعارك وربي قعد مش راقد من امس بنموت من النوم
الصقر هز راسه :ههههه والمشكله الواحد مايعرفك لا تبصر لا تلقح ، هي امالا نتلاقو
هز القَـاسي راسه وقعد واقف يشبحله بـ ضحكه لين ركب السياره وتلاشت الضحكه من مبسم القَــاسي لـ همس:نذل
.
.
.
#يتبـع لـ البـــ2️⃣ـــارت
#كتـــابـة_اليَــاقُــوت
________________________________
بداء كتابة الرواية في تاريخ 5 / مـــــــ5ٰــــــايـو / 2020
تم انهاء كتابة الرواية في تاريخ 12 / اكتـــ10ٰـــوبر / 2020

وروني قداش واحد يتابع في السلسيله 💛