عشق في بلاد حروبها لا تنتهي 4 ( 2017 )

البــ الخــامس ــارت

_
_
عِــشق فـي بِـلاد حُـروُبِهـــا لا تنتّٰــهي 4
  { 2017 }
.
في البارت السابق
سمع عيطت إينـاس لعترت في الشنطه وطاحت عليها وهيا تسمع في صياح جوري :تي خيرك
رد عليها القَـاسي طول بتوتر :شي شي كملي القهوي
وتلفت لـ إينـاس لـ رفعت روحها بـ وجع واول مارفعت يدها لشاده فيها التليفون ودارت لفلاش قدامها وشافت الاسليحه لطاحو من أثر طيحتها علي الشنطه وتسلحبو من تحت الشرشاف فتحت عيونها علي وسعهم وهيا تاخد في نفسها بتعيط بس قرب منها القَـاسي ورفعها من خصرها من فوق الشنطه بـ يد ويد التانيه سكرلها فمها بخفه وبسرعه منه قبل ماتعيط وقربها منه هلباااااا وهوا يشبحلها كيف وجهت عليه لفلاش وهيا تشبحله بـ صدمه وخوف وتسمع لتوسويشه :اسكتي وراسك ياغاليه تسكتي

قراءة ممتعة
البــ الخــامس ــارت
.
.
بعـــض الأشيــاء تكُــون جميــلة جــداً فقط من بعيــد 🗯
.
.
نزل القَـاسي يده من علي فم إينـاس بشويه ورجع همس :اششش تمام اهدي
ووخر عليها خطوه وهوا ياخد في تليفونها من يدها بشويه ويوجه في فلاش التليفون علي الاسليحه لـ لمهم في الشنطه بسرعه تحت نظرات إينـاس لتشبحله بصدمه وهيا فاتحه فمها وشاده قلبها اللي دقاته من قوتهم لين يترددو في مسمعها ، واول ماتلفتلها القَـاسي وخرت خطوتين وهيا تحاول اطلع صوتها اللي من الرهبه هرب منها .
زاد القَـاسي قرب منها ونزل بطوله علي مستوي طولها وقرب بوجهه من وجها وهمس:بيني وبينك لصار باهي
وبعد عليها خطوتين الورا وهوا يتصنع في بتسامه ويتلفت لـ جوري لطلعت من المطبخ وهيا شاده طاسة القهوي :لبزتهالك تلبيز راهو مش تقعد تكشخ مانفرز في شي درتها بـ البركه
خدي القَـاسي منها طاسة القهوه وقال :كل شي من تحت يدياتك عسل
ضحكت جوري وحطت يدها علي فمها :واااه عليا سلم وخيي هههه
واول ماتلفتت لـ إينـاس ودارت عليها فلاش التليفون ضيقت عيونها :خيرك
شبحت إينـاس لـ القَـاسي لضيقلها عيونه واشرلها بصبعه علي فمه بمعني ماتقوليش علي الاسليحه .
خدت إينـاس نفسها وحولت عيونها منه ورجعت شبحت لـ جوري وهزت راسها :لا شـ ـي
جوري:خيرك عيطي قبل شوي
وقبل ماتتكلم إينـاس قص عليها القَـاسي لشد الشنطه وقال :اني طالع
جوري تلفتتله :في أمان الله
شبح القَـاسي لـ إينـاس لواضح علي ملامحها الصدمه والخوف وتلفت طلع وخلهم وهوا ياخد في نفسه بـ توثر تملكه كله .
.
.
.
حطت سميه التليفون واللاب توب والتاب علي السرير وتلفتت لـ بُـتول :بس علي خاطر لقرايا رجعتهملك عارفه كويس كل قرايتك فيهم ونتمني مافيهم غير لقرايا عكس كلامك
رفعت بُـتول عيونها فيها بـ الاميلاء ومدتلها يدها :مفاتيح السياره غدوه عندي محاظره من الـ 8:30 نخاف انوضك ونزعجك الصبح ولا انوض عمو ونضايقه
سميه بتسمت وهيا تحاول ماتتعصب من طريقة كلامها المستفزه وقالت :ازعجيني عادي اني امك ، وتاني شي اني لبنرفعك واني لبروح بيك ومنها نتأكد كان حق فيه منها الدوه متع تأجيل المحاضرات
ضيقت بُـتول عيونها وقعدت تشبحلها كيف تلفتت وكملت كلامها :لعشي واتي نوضي تعشي
بُـتول :مانببيش بنتمرقد
تلفتتلها سميه وشبحتلها بطرف عيونها وهيا تتفادا في نقاش وصياح تاني ورجعت تلفتت طلعت وسكرت عليها الدار لـ اول ماسكراته حدفت بُـتول علي الباب لمخده بـ عصبيه وهيا تنفخ بـ غل .
تنهدت وهيا تشبح لـ تليفونها لـ شرين المحطوط فوق التاب والاب توب .
خداته وهيا تشبح في الرقم لـ عرفاته لـ من ، رفعت حاجبها ونزلت من علي السرير وسكرت الباب بـ المفتاح وولت قعمزت وردت :الو
فَـاتح :يامرحب
بُـتول :شن لخبار
فَـاتح :زفته
نفخت بُـتول :اوووف احرف منك والله
رفع فَـاتح حاجبه :اممم والحل
رجعت بُـتول بـ راسها التالي وتكت علي السرير :مافيش حل غير الموت
وضيقت عيونها وقالت وهيا تسبق فيه بـ كلامها :زعما كان درت في روحي حاجه يولو يهتمو من قلبهم
فَـاتح ضيق عيونه :من هما
بُـتول :اللي هما
فَـاتح :انتي مهبوله
بُـتول ضحكت :ههههه ايه وهبالي يهبل رد بالك ره
بتسم فَـاتح :وهبالك يوصل فيك تقتلي روحك
سكتت بُـتول لـ لحظات وهيا مركزه علي السقف وبعدها قالت :لا او ايه مش عارفه ، الصراحه علي كتر اهدافي لنبي نحققهم لما نرجع لحقيقتي نحس روحي من غير هدف وكأني عايشه علي الفاضي ومايهمنيش كان متت او عشت
فَـاتح :وشن هيا حقيقتك
بُـتول :يتيمه برغم امي وبوي موجودين
.
.
حينهــا لـم استطـع فهـم تلمِيحــات القـدر بـ مستقبـلي القــذر ❓
.
.
رد بَـحر باب الحوش وجبد كرسي الطاوله وقعمز وهوا يتكي بضهره عليه ورفع راسه لـ السماء وهوا ياخد في نفس كبير وطلعه بـ تنهيده طلعت من نص قلبه ، تنهيدت هم ، وتعب ، من التفكير والتخميم لكلوه وهوا في عز شبابه .
طلع باكو الدخان من جيبه مع تليفونه ، خدي سبسي من الباكو وحطه في فمه و ولعه وهوا يفتح في تليفونه وحط علي الرقم لـ قعد يشبحله لـ لحظات قبل مايتصل ويحطه في ودنه وهوا يجبد من السبسي ويسمع في ردها الخجول لـ جاه  :الـ ـو
حول بَـحر السبسي من فمه ونفخ الدخان :أهلين
سكرت إلهَــام باب دارها وتكت عليه وردت بـ فرحه ممزوجه بـ توثر حد الموت :أهلين بيك
بَـحر :ان شاءالله مازعجتكش في هـ الليل
نطت إلهَــام :لالا ابدا مزعجتنيش بكل
وسكتت اول مانتبهت علي روحها وعلي ضحكته لـ خلتها تتحمحم وتهدي من صوتها وترجع تقول :قصدي عادي
ضحك بَـحر :هههه كويس شني اسمك قلتيلي
إلهَــام قعدت ترقص في الدار زي المهبوله وقالت :إلهَــام
بتسم بَـحر وحول التليفون من علي ودنه وهوا يشبح في من خش عليه انتظار لـ اول ماشاف رقم غريب رجع التليفون علي ودنه رقال:تمام ياإلهَــام شوي ونعودلك تمام
إلهَــام :تمام
سكر بَـحر من إلهَــام  وهوا يشبح لـ الرقم الغريب اللي قعد يشبحله لـ لحظات وبعدها رد :الو
جاه الصوت لخلاه يوقف علي حيله طول :بوك عندنا وكان تبيه عايش تسمعني زين
خدي بَـحرنفسه لحسه هرب وقال :نعم نسمع فيك اللي تبيه حاضر لكن عطيني نسمع صوت بوي شوي بس عطيني نظمن عليه
وسكت وهوا يراجي في رده اللي تعطل شوي باش جاه ، وبعدها قال :مافيشي شي لا حد توا وكان تبيه يقعد كويس جيبنا 200 ألف وخوده
بَـحر :تم اللي تبوه لكـ..
وقبل مايكمل كلامه تسكر الخط قي وجهه لخلاه يصيح:الوووو لاااا لااا ستنى ياولد ..... ستنى
وتلفت ضرب الكرسي برجله وهوا يمسح علي وجهه ويرفع في راسه لـ اخته وامه لطلعو مخلوعات علي صوت صياحه .
نجوي :خيرك شن فيك
قعد بحر يشبحلها ويشبح لـ امه لـ لحظات بصمت وبعدها قال :بوي مخطوف ويبو 200الف
.
.
البُطــولات افعـــال ، والقليــل من يكُـون اسطُـورة بُطـٰوليه فعـلِـيه 💛
.
.
لف الصقر لـ مكتبه ولف الكرسي ليه وقعمز وهوا يحط في التليفون علي ودنه :ايوه زياد
زياد :نعم سيدي
الصقر :شني وصل
رفع زياد كتافه وهوا يزيد يخش بين زحمة الواصلين وقال :ليا ساعه واقف بس ماشفتاش ورقمه مقفل
الصقر ضيق عيونه :علي وصول علي وصول ماعاش يتعطل
زياد:طيارته وصلت اصلا
الصقر:امالا تحرك دور عليه وفتح عيونك زين
زياد:تمام سيدي
سكر زياد من الصقر وهوا ينفخ وتلفت اشر لـ شباب بـ يده لاول ماشرلهم جوه يجرو .
زياد:حوسو في المطار وشوفو الافندي (#محمـد) كان وصل او لا
تلفتو الشباب حاسو في المطار وخلو زياد لقعد يلف وهوا يدور بين الزحمه ومره مره يحاول يتصل بـ محمـد اللي في المحاوله السابعه شد الخط معاه ، واول ماشد الخط مع زياد طلع من بين الزحمه وهوا يستني في رد محمـد لـ جاه في اخر انفاس المكالمه :هاا
زياد :فندم وصلت ولا شن لينا ساعه واقفين نراجو فيك قدام المطار
حط محمـد السبسي في فمه وجبد منه ونفخ الدخان وقال :صح النوم نا من امس واصل
رفع زياد حواجبه :كيف
وتحمحم :قصدي علاش ماقلتش ره جينا ستقبلناك
محمـد:لوجيج الزايد مش لازم منه ، شوي اخرا ونجي للمقر خليك غادي نبيك
زياد :تمام يافندي
.
.
.
بتسمت مـريم:صحيتي علاش متعبيين روحكم
ساجده مدتلها الخبزه:تي اما تعب ريحت خبزه هيا هههههه خودي خوي
ضحكت مـريم:صحيتو
ساجده :بعدين تعالي رنيم مرت خوي رعد بتجي
مـريم:ان شاءالله خشي افطري معانا
ساجده :لالا بننزل خليت حنين بروحها
هزت مـريم راسها وقعدت واقفه لين ختفت ساجده عن نظرها ، خشت وهيا تشبح في السِـيفاو اللي خش للمظبخ وهوا لاهي في تليفونه .
سكرت مـريم الباب ولحقاته للمطبخ ، حطت الخبزه علي الرخامه وقالت :لفطور واتي تبي تفطر هني ولا في الصاله
خدي السِـيفاو طاسه اميه وقال وعيونه ماحولهمش من التليفون :مانبيش كولي انتي
تلفتتله مـريم :اممم ماكليت شي من امس قصدي هو...
وقبل ماتكمل حدف السِـيفاو طاسة لميه علي ارضيه المظبخ بـ عصبيه وصيح :اطلعي من ام راسي وكولي كب تاكلي ولا لوحي عليا لعفن
وطلع وخلاها في صدمتها وهيا تشبحله كيف مشي للبلكونه اللي سكر بابها وراه وهوا يحط في التليفون علي ودنه بـ عصبيه وهوا يراجي في الرد لـ جاه بعد لحظات :ايواً يامعلم
شد السِـيفاو علي سنونه :اني مانكلش حق حد وشوفتني المره لفاتت كيف فلوسك جوك وافيات ويخي زايدات
درس القَـاسي السياره قدام حوشهم وقال وهوا يهز في راسه :صح كلامك كله مزبوط ياشامخ لكن اني هكي سلملي فلوسي كاملات نسلملك بضعتك كامله مانبيعش الا لما نحق المصاري بعيوني
مسح السِـيفاو لحيته بيده وقال :وكان نقولك لبضعه لخديتها منك واللي كانت عندي كلها نخنبت وماعنديش كيف توا نرقع خسارتي الا كان خديت بضعه بنص تمنها ولما نبيعها ونرد لخسرته نكملك باقي الثمن
ضيق القَـاسي عيونه وهوا يدكر في مكالمته مع الصقر (....: تعجبني فهوميتك ، ايه تاجر مخدرات نبي نطيحه عينا منه ومن الفوضه لمدايرها ، توا هوا محتاج لبضعه واكيد يدور في بضعه بـ ارخص التمن بخسارته لدرتهاله ونبيك توصل فيه وانت لتبيعله )
نتبه القَـاسي علي السِـيفاو لرجع قال :الو
القَـاسي:عندك فكره من لخنب بضعتك قصدي شاك في حد
سكت السِـيفاو شوي وبعدها قال وهوا يغمظ في عيونه :ايه
بتسم القَـاسي:صقورة صح
فتح السِـيفاو عيونه وضيقهم :مزبوط لكـ..
قص عليه القَـاسي :وكان ساعدتك وجبتلك منه بضعتك شن تعطيني
السِـيفاو ضحك :تعرفه يعني هههههه
القَـاسي:وعز المعرفه تي صقوره عشره اني وياه ههههه وسر بيني وبينك كل مايبي يطيح حد يجيني طول
خفت ضحكت السِـيفاو وضيق عيونه :مكلمك عليا يعني
رفع القَـاسي عيونه وهوا يشبح في رجب بو إينـاس وفاطمه راكبين مع وسام في السياره وإينـاس واقفه عليهم ، وقال :ايه
السِـيفاو :اكيد عارض عليك بلاوي فلوس لطيحتي
ضحك القَـاسي :اووووف مش بلاوي بس تي قالي الرقم لتحطه تم ولبيك ياقاسينا
السِـيفااو ضحك بهدوء :واللي نعرفه عليك تعبد لفلوس من بعد ربي شن لمانعك تبيعني ليه
القَـاسي:اني مانبيع الا لناوي يبيعني ، معروف عليا نحب لفلوس زي مامعروف اني مش خوان
بتسم السِـيفاو :كان ساعدتني مش حـ نقدر نعطيك زي ماعرضه عليك الصقر
ضحك القَـاسي:ههههه يكفي طاسة قهوي ونتعرفو علي التريس
السِـيفاو :ههههه راجل وربي راااجل
القَـاسي ضيق عيونه:ونص المليون لعرضهم عليا مايخالف حتي هما
ضحك السِـيفاو :هههههههه مايغلو عليك ياغالي
ضحك القَـاسي:تم تم ههههه يومين ونتلاقو ياشامخ
سكر القَـاسي من السِـيفاو ونزل من السياره وهوا يرفع في يده لـ وسام ورجب لخطمو بالسياره جنبه بـ ضحكه ، واول مارجع تلفت شبح لـ إينـاس لقعده واقفه قدام باب حوشهم وتشبحله .
ختفت ابتسامة القَـاسي اللي نزل عيونه منها وهوا يمسح علي شعره لرجعه التالي ورجع رفع عيونه وقال :خير
زمطت إينـااس ريقها بـ خوف وتلفتت خشت وسكرت باب الجنان بـ القوه لين خلت القَـاسي يضيق عيونه بـ عصبيه من روحه ومن غلطه اللي من الممكن تكون غلطة عمره وتتحول لـ كارثة حياته لو إينـاس فتحت فمها وقالت لخواته .
.
.
سـألتُ عــن وصلـهُ ، فَـ قـال لـي لا ولا ، وأنـا الــدَّي تمنيــتُ أن يقــول بَـدل لا ، هــلا 💔
.
.
وقف السِـيفاو قدام باب المطبخ وهوا يشبح فيها تلم في بقايه قزاز الطاسه لكسرها ، واول مانتبهت عليه واقف وراها وقفت وسكرت يدها لـ فاها قطع القزاز من غير قصد بـ القوه لين تأوهت وهيا تشبح للقزاز لخش فيها .
قرب السِـيفاو منها طول وهوا يشد في يدها ولفها لـ اللوندينو وحول لقزاز لـ في يدها :غبيه انتي في حد يلم المرش في يديه
فكت مـريم يده منها بـ عصبيه وقالت بـ دموع ملو عيونها :حول من عليا
وبعدت وهيا تتلفت لـ شيشمة الميه لفتحتها وحطت يدها تحتها وهيا تشبح لدم ليمشي مع الميه .
تنهد السِـيفاو وتكه علي الرخمه وقعد يشبحلها :مش قصدي نعيط عليك
سكرت مـريم الشيشمه وتلفتت خدت كلينكش لفاته علي يدها وهيا تسمع في السِـيفاو لكمل :اني اسف
رفعت مـريم عيونها فيه بـ دموعها لنزلو :اصلك انت ديما هكي تجرح وبعدين تتأسف
رجع السِـيفاو تنهد :علي الاقل نجرح ونداوي مش زيك تجرحي وتمشي
ضيقت مـريم عيونها لمسحت الدموع منهم بـ كم تشرتها :انـ ـي ، اني نجرح
قرب منها السِـيفاو وحاوطها بديه اللي حطهم علي الرخامة المطبخ وهيا بينهم :اي انتي ياريتك تخشي لقلبي وتشوفي شن مدايره فيه
وطبس قرب من رقبتها وهوا يستنشق في ريحتها بـ كل حواسه وبعدها قرب باسها علي خدها وبعد خطوه وهوا يشبحلها كيف مغمظه عيونها بـ القوه وبـ توثر حس بيه وخلاه يبتسم وهوا ينزل في عيونه ويشبح لـ يدها المجروحه لـ اول ماشدها فتحت مـريم عيونها وشبحتله كيف حول لكلينكش من علي يدها وهوا يجبد فيها بشويه ويفتح في واحد من دواليب المظبخ وطلع منه معقم وتنثوره وشاش وقعد يداويلها فيها بصمت ومن غير مايرفع عيونه فيها او يشبحلها وهوا مبتسم وحاس بنظراتها اللي ماتحولوش من عليه .
.
.
نُفـوس ضَعيفه ، من هبـت نسمــة تضيـع 💔
.
.
خدت بُـتول طاسة القهوي وطلعت من الكفيتيريه وهيا ترد علي المكالمه :خيرك لاتوا ماجيتيش
جوري :اهو قريب نوصل
بُـتول :تمام تلقيني في جردينة الهندسه في مكانا
جوري:تمام
سكرت بُـتول منها ولادت لـ الجردينه اللي اول ماوصلتلها شبحت بنت تعرفها واقفه علي واحد عاطيها بضهره ولابس برنوسه ومش مبين عطاها حاجه ومشي وخلاها واقفه تحط في اللي عطاهولها في الشنطه ومانتبهت علي بُـتول لوقفت قدامها وقالت :شني عطاك
نخلعت البنت ورفعت راسها لـ بُـتول وهيا تحط في يدها علي قلبها :واااه خلعتيني يابُـتول
ضيقت بُـتول عيونها ورجعت شبحت لـ الشاب لبعد وردت شبحت لـ البنت :من ورانا يابسمه ماعرفناك من لوليد وشن عطاك اه ههههه
تحمحمت بسمه ورسمت ابتسامه علي مبسمها :هههه صديق بس و شن بيعطيني فرقة حالي غر تعالي تعالي نقعمزو عيت من لوقوف
وجبدتها من يدها ومشو قعمزو .
بسمه :شني وين جوري
شدت بُـتول راسها وشربت من القهوه :قالت قريب توصل
بسمه ضيقت عيونها :خيرك انتي جوك مش ميه ميه
بُـتول تنهدت :امي الدراه مدايرتلي ايامات السود اووووف مليت منهم مليت زيها زي بوي ازح كل مانرتاح منهم يطلعولي يخربولي في حياتي
بسمه :خيرها امك
بُـتول :مدايره الجو زايد فكينا منهم باللهي كل مانفكر فيهم نتمني ناخد مخدر ينسيني فيهم وفي همهم
ورفعت راسها لـ بسمه وكملت بضحكه :هههه بالك تعرفي وحده تبيع في سكير ولا حبوب ينسو الواحد في همه
ضحكت بسمه بـ توثر :مهبوله انتي بتودي روحك في دهيه
رفعت بُـتول كتافها بعدم مبلاء :ماعندي شن نخسر جربت كل شي ماينفعنيش جت علي هدي لبتنفعني في النسيان
سكتت بسمه لـ لدقايق وهيا تشبح لـ بُـتول اللي تشبح لـ قهوتها ومره مره تنفخ ، وبعدها قالت :لو قتلك يقعد بيني وبينك
رفعت بُـتول عيونها فيها وضيقتهم:قولي
نقصت بسمه صوتها شوي وقالت :نعرف واحد يبيع في حبوب ينسوك في كل همومك ويخلوك الامبلاء ومرتاحه
زادت بُـتول ضيقت عيونها :لكنتي واقفه عليه صح
بتسمت بسمه بستهزاء:ذكية
بُـتول :خديتي منه انتي
هزت بسمه راسها :ايه
بُـتول :اممم اعطيني حبه
بسمه :خطيرات ره كان كترتي تدمني عليهم اني ناخد فيهم بجو فتره بعد وين
نفخت بُـتول :تي هاتي وندفعلك دبل لدفعتيه علي الحبه
بتسمت بسمه :اوك تمام
طلعت بسمه حبه من شنطتها وعطتها بالخفي لـ بُـتول اللي دستها في شنطتها وعطتها لفلوس وهيا تتلفت تشبح لجوري :سكري الموضوع قدام جوري
هزت بسمه راسها ووقفت بتسمت لـ جوري لقربت منهم :واااه صقع هني تعالو نخشو الداخل
بُـتول :لالا جعانه تعالي نفطرو قبل المحاضره
بسمه :اني نستأذن
شاورتلها جوري بيدها وتلفتت لـ بتول :خاطري في منا بين كيك ههههه ولا ابصر شن اسمه  تعالي ناخدو
ضحكت بُـتول :هههه انتي تطلبي هدي المره
جوري:غر هيا كان عرفت ننطقه هدا
.
.
.
حطت جميله دهبها علي الطاوله وتلفتت لـ بَـحر لضيق عيونه وهوا يشبح لـ الذهب ورجع شبح لـ امه لقالت :هدم لفاضلات عندي برا بيعهم عارفه مايجوش خمسه لاف لكن علي الاقل يساعدو
تنهد بَـحر وتلفت لـ اخته نجوي لقالت:واني تو اروح اليوم نجيب دهبي وسميح يسحب اللي عنده في المصرف
بَـحر :عمي فوزي وخوالي (نوري) و(صالح) قريب يوصلو مرات نديرو حل
نجوي مسحت دموعها :المبلغ كبير هلباا والمشكله الفتره هدي كل شي نازل الدولار والدهب حتي حوازتنا كان بنبيعوها مش حـ تجيب هداكا المبلغ
طلع بَـحر التليفونه لـ شرين من جيبه :بـ أذن الله لو كان نبيع اللي فوقي وتحتي ولا نتسلف
ووقف وتلفت لـ امه لـ تبكي وهيا كاتمه صوتها وقرب باسها علي راسها :خلاص يمه ان شاءالله نلمو لفلوس ونروح بـ بوي وماتكون الا المور طيبه كله يجي لفلوس ينردو غر اروحو بـ بوي بس وانتي ماترعشيش روحك
طلعت جميله صوتها من بين عبرتها وبكاها :ان شاءالله ياوليدي ان شاءالله
تلفت بَـحر طلع لـ جنان وهوا يرد علي تليفونه :تي وينك ياراجل وينك
حاتم :نعم خيرك قعد ندور علي بوك ويني يعني
بَـحر ضحك بـ ستهزاء:ههه روح وراس امك روح بوك طلع مخطوف امس اتصلو بيا ويبو 200 الف
حاتم :لالا ماتقولهاش هي شوي وجاي مسافة الطريق
وسكر الخط في وجه بَـحر لـ ضيق عيونه وهوا يحول في التليفون من ودنه ويشبحله :مبرد دمك ازح مبرد دمك
وخبط يده في الحيط بـ عصبيه وهوا يتلفت لـ اطقطيق باب الجنان ولـ صوت خواله لـ علي الباب ...
.
.
.
تلفتت جوري لـ بُـتول لـ واقفه وراها ووشوشت :نسيت شن اسمه
بُـتول :مني بان كيك
هزت جوري راسها ورجعت تلفتت بس مافتت دقيقه الا ورجعت وقالت :عاودي اخر مره وربي نسيته
ضحكت بُـتول :مني بان كيك
جوري :اوك اوك تم
وتلفتت وهيا تشبح لـ البنت لخدت طلبها ومشت وخلت الشاب اللي قال :تفضلي
رفعت جوري حواجبها وهيا ناسيه الاسم :ااااا
وقبل ماتدخل بُـتول اللي شاده ضحكتها قرب ناصر وقال بـ بتسامه :مني بان كيك زوز يارفيق وخليهم علي حسابي
الشاب بتسم :من عيوني يارفيق
وتلفت ناصر لـ جوري لدف في بُـتول لقعدو لبنات لواقفات وراها يصيحو عليهم لين طلعو من زحمة الكفيتيريا لـ برا مع ضحك بُـتول لـ ستاكت وهيا تقلد في جوري اللي حاطه يدها علي وجها اللي ولا احمر من الحشمه وتجبد في بُـتول :سكري فمك النهار لحرف سكريه
خدت بُـتول نفسها ومسحت اتار دموعها لنزلو من الضحك:واااه عليا بدموعي خليتوني واااه هههههههه كان تشوفي منظرك ههههه واااه واااه تي الولد شاد ضحكته بالسيف ياحشمتك هههههههه
نفخت جوري وهيا تحول في شنتطها وتحدف فيها علي الطاوله وتقعمز : قعمزي وسكري فمك من عليا يابري درقي وجهك من عليا مش ناقصاتك ره
حطت بُـتول يداها علي فمها وهيا تكتم في ضحكتها لزادت عليها لين خلت جوري تاخد نفسها وتشبحلها بـ تضيقت عيون وقبل ماتصيح عليها وقفت بُـتول ورفعت يداها بـ ضحكه :هههه اوك اوك خلاص اهدي هههه اهو تو نمشي نشري بروحي وانتي ارتاحي وانسي هههه اصلا شن صار ماصار شي انسي هههههه
وخدت بتول شنتطها ومشت وهيا تضحك وخلت جوري اللي غطت وجها بداها الزوز وهيا بتموت من الخجل وتمتم بـ كلمات غير مفهومه بتنقنيق وماقطع عليها شي غير صوته :.....
.
.
.
#يتبـع لـ البـــ6️⃣ـــارت
#كتـــابـة_اليَــاقُــوت

________________________________
بداء كتابة الرواية في تاريخ 5 / مـــــــ5ٰــــــايـو / 2020
تم انهاء كتابة الرواية في تاريخ 12 / اكتـــ10ٰـــوبر / 2020