Shadows Of A Silverharth [COMPLETED]

Chapter 59: Papa

Habang iniiwasan pa rin ng mga propesor at ibang estudyante ang infinite number of swords ay busy naman sa pagkalaban ang bluebloods kay Egar. Lahat ng ginagawang atake nila Finnix ay iniiwasan lang o sinasalag ni Egar nang walang kahirap-hirap.

"I'm done playing with you. Siguro oras na rin para maningil ng utang. Life will be paid by life!" Parang sinapian ng demonyo si Egar na ngumisi sa harap ng bluebloods. "Ako naman ang aatake. REVENGE OF BLADES!" Mula sa likod ni Egar ay nagsilabasan ang pitong naglalakihang mga espada na may bahid ng kamatayan. Pinaghalo ni Egar ang kaniyang signus at ang signus na ipinahiram sa kaniya.

Naramdaman nila Finnix ang kapangyarihang napapaloob sa mga sandata. Kapangyarihang alam nilang hindi nila matatakasan.  Egar waved his hand kasabay ng paglipad ng mga sandata patungo sa bluebloods. Hindi alam ng pito kung ano ang kanilang gagawin. Tila naestatwa silang lahat. Tila dumikit ang mga paa nila sa lula. Lalo pang napapalapit ang mga sandata nang maramdaman ni Ester ang takot na nararamdaman ng kaniyang mga kaibigan na siyang nagpagising sa kaniya. Their fear woke her up. Hindi na nagawang mag-isip ng kaniyang utak at sumabay na lang siya sa iginalaw ng kaniyang katawan.

Humarang siya sa harap ng kaniyang mga kaibigan at ibinuka ang kaniyang braso. Kitang-kita ng mga mata ni Ester ang papalapit na mga sandatang tiyak na gugutay-gutayin ang kaniyang katawan. Ipinikit niya nalang ang kaniyang mga mata upang tanggapin ang kaniyang kamatayan. Ngunit lumipas ang ilang segundo ay wala siyang naramdamang sakit. Ramdam niyang buo pa rin ang kaniyang katawan. Binuksan niya ang kaniyang mga mata at natagpuang lumulutang ang mga sandata sa mismong harap niya. Nakatutok pa sa kaniyang dalawang mata at noo ang dulo nito. Halos bumigay ang kaniyang nanginginig niyang mga tuhod.

Sa mga panahong iyon ay bumuti na ang kalagayan ni Magnus dala ng pinakawalang signus ni Ester. Naghilom ang kaniyang mga sugat, at bumalik sa dati ang kaniyang pangangatawan. Nawala ang mga markang tanda ng lahat ng pinagdaanan niya sa kamay ng mga drakos.

Dali-dali siyang lumabas upang tumulong sa labanan ngunit isang bagay ang kaagad niyang napansin nang makita niya ang sira-sirang field; si Ester ay nakatayo at nakatutok sa kaniya ang pitong naglalakihang espada.

Ester felt a connection between the blades and her body. Egar also felt it. There is a connection between his signus and the lady not far away from him.

"Itigil mo 'yan, Egar! Huwag mong papatayin ang sarili mong anak!" sigaw ni Magnus. Umigting ang tenga ni Ester at ni Egar. Tila nabingi siya ss kaniyang narinig. Nagsihulugan ang mga sandata sa lupa. Nawala rin ang portal kung saan lumalabas ang walang katapusang mga sandata.

Napatulala si Egar sa kaniyang narinig. Lumakas ang tibok ng kaniyang puso. Unti-unti niyang namumukhaan ang babae na malaki ang pagkakahawig sa kaniya.

"Ester?" hindi alam ni Egar kung ano ang kaniyang nararamdaman. Tila nawala ang kaniyang galit nang makita niya ang kaniyang anak. Naging payapa at puno ng kagalakan ang kaniyang puso.

'Ang boses na iyon! Ang paraan niya nang pagsambit ng pangalan ko!' Umiiling na naisip ni Ester. "Papa?" sambit niya kahit alam niyang kahibangan lamang ito.

Tila musika sa tenga ni Egar ang boses ni Ester. Matagal-tagal na rin. Matagal-tagal nang hindi niya naririnig ang boses ng kaniyang na tinatawag siya sa paraang iyon. Nanginginig ang kamay niyang tinanggal ang kaniyang suot na maskara. Egar's face was revealed to everyone. Napasinghap ang lahat nang makitang parang lalaking bersyon ni Ester ang hari ng mga drakos.

Napatunganga ang lahat at hindi nila magawang gumalaw. Napatahimik sila sa kanilang narinig na rebelasyon. Kahit na sila Finnix, Lucas, Winwin, Hydra, Heaven, Ten at Crystal ay napatahimik na rin. Hindi nila alam kung ano dapat ang kanilang maramdaman. Hindi nila alam kung ano ba dapat ang kanilang magiging reaksiyon. Kung dapat ba silang matuwa dahil sa senyales na tapos na ang labanan; kung dapat ba silang matuwa para kay Ester o magalit dahil sa mga lihim na ito ni Ester na ngayon lang nila nalaman.