أسيرة هوس السادي "18+" (باللهجة الجزائرية)

الفصل الثالث: قلوب محترقة (ح86)

♨ الحلقة 86♨

في جهة خلاف.. شد فران قدام الكلينيك وتلفتلها
جعفر: انزلي
رانيا: شادة دمعتها: و.و سيرين
جعفر: ماردلهاش.. نزل حل الباب لور لسيرين نزلت مدلها يدو كبشت فيه فرحانة تنكز وتمو داخلين.. ماهي نزلت بالسيف رجليها فاشلين عليها حسها بطات دارلها
جعفر: تحركي ولا نجيو نهزوك
سيرين: ماهأ تهزهاش هزنا أنا بلييز ا عموو بلييز.. تبسملها نزل هزها كبشت ف رقبتو تضحك عاملة جو.. استناها حتى لحقتهم حاوط حزاما وهمسلها
جعفر: ماتصعبياش وهي ساهلة.. خزرلتو بانكسار.. ساهلة! حكاية لكورتاج ساهلة! حابها طيح البيبي ولدو بسهولة ذي.. كانت متأملة أنو يتراجع يبطل ويقلها حاب ولدي خليه.. أما هو لاا بكل رقعة صحيحة قالها "ماتصعبيهاش وهي ساهلة" طاحتلها دمعة سخونة زربت مسحتها ونزلت راسها مكملة طريقها معاه.. مادامها مشات فالطريق أذي ملول بإرادتها لازمها تكمل فيها للخر.. هي بيدها ماتنجمش تعيش زوز ولاد بروحها.. بخدمتها! واش من خدمة تليق بقرايتها بعد ماجرا عليها أسد وحرم عليها لخدمة فالسبيطارات لكبار.. والصغار خلاصهم قدقد مايغطيلهاش تكاليف التراتمون تا سيرين.. دخلو عند الطبيبة بعد ترحاب كبير منها بحكم جاد "جعفر" واحد مالمستثمرين فيه.. هزت راسها مع الطبيبة شافتها وقيدت لبستها غزلت.. طوپ باطو مبين شطر صدرها مع جيپ ميني مكبوس عليها كلشي مبزر والمأزر ماغطالها والو.. شافت مع جعفر لي طالڨ راسو يحكي بأريحية غزلت وكملت عليها سيرين قاعدة ف حجر جعفر تلعب معاه شابع فيه بوسان وتمحريث.. كبست يديها مغدة من روحها ومنهم قابلتها غير تنوض ليهم تنتفهم بالواحد.. قص عليها
جعفر: ماكانش شومبرة وين يلعبو للولاد هنا
ط: سي كاينة ا مسيو.. مدت يدها ل سيرين: وش اسمك ا أمورة
سيرين: أسمي
رانيا: ماجيناش هنا به نتعارفو ولانلعبو خلينا فالمفيد
ط: احمم dsl تفضلي معايا
جعفر: هزي لبنت اسح.. وقفت الطبيبة لسيرين مع قاصتها لزت لجعفر مش من عوايدها تمشي للناس ماتعرفهمش
رانيا: جبدتها منو: حبيبة زيدي مع الطبيبة تديك وين لعبي مع لولاد
سيرين: ماهأ مانحبش مانخليكش مانروحش معاها
جعفر: سيرين امشي مع طاطاك دك نجي عندك
سيرين: ماهأ مانخليش مامون وحدها
جعفر: عض لسانو: سيرييين.. خوفها كبشت ف رانيا تبكي
رانيا: هزت ووقفت: نأجلوها لمرة خلاف
جعفر: واشيااا! ت*** مش هكا
رانيا: كبست ع وذنين بنتها: اعرف مااتهدر قدام البنت
جعفر: ماتجهلينيش حنى نتي وش لي تأجلي ف بالك اجتماع تأجليه وقت ما تحبي
رانيا: عارفتو كورتااج مش اجتمااع مااتبقااش تفكرني ف نفس الأسطوانة
ط: كورتاج؟! علاه ح تنزلي البيبي؟
رانيا: حاجة خاصة.. لزت بنتها لصدرها وجات خارجة رجعها فآخر ثانية.. كبس ع ذراعها معصب
جعفر: مااقتلكش تمشي
رانيا: حابة تبقى ابقى وحدك
جعفر: والكورتاج؟
رانيا: مازلت تهدر عليه برك شوف حالة البنت زيماه
جعفر: خزر لسيرين ترجف ف حملتها وتشخنن.. تنهد وطمن بعينيه
ط: عالأقل خلينا نعرفو تفاصيل كثر ع حملك
رانيا: مانحبش
جعفر: ضد فيها: لا تحبي امشي قدامي تشو
رانيا: قتلك مانحبش مانحبش ماعندي علااه نعرف عليه وأنا ح نطيحو
ط: لسلامتك ا مدام
رانيا: ماتدخلينيش نتي
جعفر: رااانيياااا
ط: مسيو "جاد" تهدن.. شاورتلو جيهة سيرين به يدير حسابو ويراعي نفسية الطفلة الصغيرة لي وسطهم.. نفخ بغش قرب من سيرين هزها بالتحاويل بالكشايف وستين حسيفة به راحتلو.. شاور للطبيبة ساقت رانيا لطابلة الفحص جبدتها عليها وشافت خدمتها.. وقف عند راسها محمل سيرين يرضي فيها حتى ولات تضحك..
ط: حملك مليح ا مدام.. البيبي طبيعي مافهمتش علاه حابة تنزليه
رانيا: تخزر مع الإيكرون صورة البيبي بالإيكو خلات تبكي.. نزلو دموعها وحدة ورا أختها.. مش مصدقة أنو هذاك طرف منها ومنو.. ولدها ولدو.. ولدهم لي رافضو وحاببها تنزلو.. علاش؟ لدرك مافهمها علاش! كلمة وحدة قالهالها "نزليه" مش قاباو ومش ح يقبلو مادام وصلت بيه جابها لهنا ولأخر دقيقة مصمم ع رايو
جعفر: وقف مصدوم يخزر مع دموعها سبالة حفرو خدودها.. يخزر مع الصورة لي فالإيكرون.. هذاك ولدو؟ كيفااه ولدو وهو رافض لولاد؟ وهو ماعينوش فالولاد! وبالأحرى آخر همو يجيب ولاد وهو فالظروف ذي ماعندوش نسب.. بلا اسم بلا أب.. كيفاه ينجم يكون أب.. كيفاه يعطي شي بالأساس هو فاقدو.. كسر السكون عاصفة اسمها سيرين
سيرين: ماامي مااميي وش هذااك
رانيا: ماردتلهاش هربت وجهها تمسح فدموعها
سيرين: شدتلو خدودو: قلي نتا ا عمو جااد وااش أذااك لي فالTV لهييه
ط: هذااك بومبينو صغرون رح يكوون خووك
سيرين: صفقت بفرحة وطلقت ضحكتها: يااي خوويا صح تحكي صح رح يكون عندي خو؟! بصبعها ع خدها تخمم زعم: خو ولا أخت؟! اترشقت: نحب أخت أخت ماام جيبيلي أخت بليز نحب أخت بلييز
ردة فعلها صدمتهم لكل.. بالأخص رانيا لي تمنات تجيب أخ ولا أخت لسيرين به ماتخليهاش وحدها بعد ماتروح مالدنيا ذي..