عشق في بلاد حروبها لا تنتهي 4 ( 2017 )

البــ الرابــع ــارت

بئســاً لـحيــاة ، أجبَــرت نفُــوس ظــاهره لـ الدُخـول في قَــذارتِها كـي تعيش 🆘
.
.
تحمحم مصعب بـ الصوت عالي لين خلا القَـاسي ينتبه من سرحانه علي تليفونه ويرفع في عيونه فيه بـ بتسامه رتسمت علي مبسمه :ايه موليد كم ياغزيل
مصعب :2000
القَـاسي ضحك :هههه تعرف ندكر لما كنت في عمرك مشيت خدمت في محل مواد غدائيه وكان صاحبه شيباني ولد ستين كلبه ههههههه اما ستغلني استغلال في وقتها واني كنت نهز في راسي زي الدنكي ههههه
ضحك مصعب :ههههه علاش
القَـاسي خدي نفسه ورجع اتكه بضهره علي الكرسي :ياودي كنت نمشيله من الـ 9 الصبح نايض بستين ألف واسطه وبعد خمسه ولا سبعه شفطاط بعصات الرشده من امي ههههههه
وتعلت ضحكته مع ضحكت مصعب وكمل :ههههههه وربنا هي ونكرف تقعد لا الساعه 12 فليل علي 100 جني في شهر ولد لحرام ، وياريت ماندير في شي مدايرني سوداني المحل اني نستف لبضعه ونسيق واللمع في المرش ونوقف علي الكاسه وحالتي حاله الله لا تربحه ولا تختم عليه خلاني مضحكه
زادت ضحكت مصعب :ههههههه تي باهي 100 انت اني خدمت في مواد غدائيه يعطو فيا 60 جني في الشهر مايسدوش دوا امي متع السكر ههههه
ختفت ضحكت القَـاسي طول وضيق عيونه :امك مريضه
تنهد مصعب بـ بتسامه وقال :ايه عندها السكر وتبي ايباري السكر وغاليات شوي
القَـاسي:ماعندكش عمام خوال متكفلين فيكم
رفع مصعب كتافه :عندي لكن كل واحد لاهي في حاله وفي بالهم معاش بوي الله يرحمه سادنا وهوا راس 300 جني مايسدو تمويل للحوش وحاجات خواتي لبنات
القَـاسي مسح علي لحيته وقعد يشبح لـ مصعب لـ لحظات بـ صمت كيف يشبحله ويرجع ينزل عيونه لوطه وبتسامه مرسومه علي مبسمه ابتسامة برائه ونظافة النفس والفعل واضحه عليه وعلي وجهه الناير ، خلت القَـاسي يرسم بتسامه علي مبسمه وسأل :تقرا
هز مصعب راسه :ايه تانيه تانوي
وزادت ابتسامته بـ فرح وضح هلبا علي حروف كليماته وكمل بـ بهجه وحماس :وان شاءالله بنكمل التانويه وبنخش الكليه العسكريه
رفع القَـاسي حواجيه :يانهارك لحرف لسود وتقول فيها وانت فرحان بتولي عسكري ومقعمز جنبي
ضحك مصعب :هههههه لالا ماتخافش مش حـ نجي نشدك
القَـاسي ضحك :هههههه واسطه هههههه باش كل مانخش في مشكله نتصل بيك
مصعب :لا عاد ماتركبنيش الاتم
زادت ضحكت القَـاسي لـ رفع يده وطبطب علي كتف مصعب :ههههه لالا ماركبهولكش
وشد كتفه وضغظ عليه :نبيك تكمل قرايه وتخش للكليه العسكريه وترفع راس امك من غير حرام ولا تخش في الحاجات هدي
مصعب ضيق عيونه :لكن ماعنديش حل كلهم مش راضيين يخدموني ويقدرو انه نقرا الصبح ، اللي نمشيله سوا محل مواد غدائيه ولا كوشه يبو خدمه الصبح وامي عاطيتني قلت السماح كان نسيب قرايتي حترت ماعاش عندي حل الا في الحرام باش نعيش ونعيش عيلتي ورضي امي
القَـاسي:امك بترضي كان خدمت معاي
نط مصعب :لا اكيد لا مستحيل ترضي واصلا مستحيل نقولها والله تنجلط بعدين
تنهد القَـاسي :بعيد الشر عليها ان شاءالله ربي يخليها تاج فوق راسك انت وخواتك ، نوض وماعاش تفكر في المصاريف ، ألها في قرايتك وفي امك وخواتك بس واني كل فتره نبعتلكم مصروفكم
هز مصعب راسه :لالا مايصيرش مـ....
قص عليه القَـاسي بـ صوته العالي:تي نوض روح يافرخ نوض لما كنت في عمرك نتمني يجيني حد ويقولي رتاح يابلقاسم واقرا وهيج واني نصرف عليك
بتسم مصعب:لكن شن بنقول لـ امي كان ماخدمتش من وين نجيب في الفلوس
القَـاسي سكت شوي وبعدها تلفتله وقال :امتي تروح من المدرسه
مصعب:جو الـ 2 ، 2:30
القَـاسي:تمام اني مرات تجيني انيه نحصل قرشيين حلال اللود علي مواد الغدائيه نوزع في بضعه كل مانطلع نتصل بيك تجي معاي تمام
هز مصعب راسه بـ بتسامة فرح :تمام
القَـاسي طلع تزدانه من جيبه اللي فتحه وطلع منه مبلغ ومده لـ مصعب :خود هادم وبرا خود دوا امك وكان ناقصكم حاجات باهي يافرخ وووو
ضحك مصعب ومد يده بـ خجل وخدي لفلوس وقال  :تمام تمام ههههه
.
.
هــل يَـجُـوز لـ المراء أن يحقــد علي من تسببُو في وُجــده في هدهِ الحيــاة⁉️
.
.
فتحت بُـتول باب الحوش وهيا تصيح :ماما بابا اني جيت
جاها صوت جدها (سعيد) :تعالي يابنتي تعالي
حولت بُـتول بوتها وكبوطها وخشت لـ الصاله اللي اول ماخشتلها وشافت امها لـ تلفتتلها بـ قرنت حواجب وقالت :خيرك هدا وين مروحه
نفخت بُـتول وقربت من حناها وجدها باستهم وتلفتت لـ امها ومدتلها يدها من بعيد وقالت بـ رفعت حاجب :ماما وبابا عارفين هدا موعدي في المرواح
امها (سُميه) :واني نعرف محاضراتك اتم قبل الـ 2 الظهر
بُـتول سحبت يدها وقالت :في حاجه اسمها تأخير وتأجيل المحاضرات ، وفي انه نستنو في شتات ينزلو في المصور باش نمشو وناخدوها
ورفعت كتافها بـ ضحكه استهزاء استفزت سُميه وكملت :بس مالومكش عادي كيف بتعرفي تفاصيل تافهه علي حياة بنتك وبتسيبي سبع البرومبه هوا وصغاره الملائكه
سميه خدت نفسها وهيا تحاول ماتتعصبش ، وقالت :شفتها يابوي كيف تتكلم وله شفتها وتقولي صبري بالك معاها وبشويه كيف بندوي بشويه مع وقاحتها
سعيد:بُـتول تكلمي زين مع امك
بُـتول نفخت بـ القوه :حاضر بابا
وتلفتت لـ امها ورسمت علي مبسمها ابتسامة هزوه :ممكن ياامي العزيزه طبعا كان كملتي تحقيق مستر كونن تبعك تخليني نمشي نبدل حوايجي
سُميه :بري بدلي ووتي حوايجك بنرفعك تقعدي عندي الفتره هادي
رجعت بُـتول شعرها التالي بـ هدوء وقالت وهيا تتلفت :مرتاحه هني مانبيش ماشيه معاك
سميه :اني مانشاورش فيك اني نقولك لمي حوايجك وهيا ومتخلينيش يابُـتول نعلي صوتي قدام جدك وحناك
سعيد:معليشي يابنتي بري يومين مع امك ولما تملي ولا ماعاش خاطرك تقعدي غادي اتصلي بيا ونجيك طول ناخدك
خدت بُـتول نفسها وشداته وهيا تتلفت وقالت :لا ياجدي من الاول مانيش ماشيه لحوشها ، اني عندي كرامه الحوش اللي مايبوني فيه اماليه ماعندي علاش ماشيتله
علت سميه صوتها :بُـتول شن الدوه هدي
صيحت بُـتول :مانيش ماشيه معاك خليني في حالي شن لدكرك فيا توا اه ليك سنين ناسيتيني انتي وطليقكك شن تبو فيا توا
قربت امباركه من سميه لـ زادت علت صوتها :نقصي حسك واحترميني واحترمي حناك وجدك
سعيد وقف وقرب من بُـتول اللي قص عليها وقال سابقها في كلامه :خلاص ياسميه وانتي كل ماتجي لازم ماتتعاركي مع البنت خلاص بري وخليها مش بالغصب هيا
سميه قربت من بُـتول وشدتها من مرفقها بـ القوه وبـ الغصب وشبحت لـ بوها :لا بالغصب يابوي بالغصب بالطيب بتمشي معاي
ورجعت شبحت لـ بُـتول لفكت يدها من امها بـ عنف وبـ عيون يقدحو في شرار وهيا ترجع التالي من دفت امها لصيحت :قدامي للكوجينه قدامي
ورجعت دفتها خششتها لـ المظبخ وقالت :عن اذنك يابوي
تنهد سعيد ورجع قعمز :الله يهديكم وخلاص
وشبح لـ امباركه لقربت من باب المطبخ لـ سكراته سميه وهيا تتلفت لـ بُـتول لصيحت :انتي شن جايك عليا سيبيني في حالي ولا صغارك كبرو وزعميتك بتلهي فيا توا
قربت منها سميه بـ عصبيه وشدتها من دقنها وقالت :تعرفي تتكلمي كويس ولا نعلمك يافرخه كيف تتكلمي ، راني امك مش صاحبتك ولا واحد من صحابك المردف لزيك
فكت بُـتول دقنها من يد امها وقالت :ماهو كان مربيني زين ره ماوليتش مردف ولا تعرفت علي ناس يعلموهالي
واول ماكملت بُـتول كلامها جاها كف من امها من الروح لا الروح لين نزلت بتول راسها اللي رفعتهولها امها من شعرها وخلتها تشبحلها وقالت:صح والله ماعرفنا اربوك لا حني لا جدودك كان عرفنا اربوك ره ماطلعتيش صايعه ضايعه متع دكوره اللي يلعبو بيك من واحد لا واحد ، لكن قعد مازال نقدر اربيك ياكلبه
ودفتها من شعرها علي الباب وقالت :قدامي لمي عفنك ، واللاب توب والتليفون والتاب في يدي توا توا يابُـتول والا والله وانتي تعرفيني نطلع نعبي راس جدك عليك ونكلم بوك ونقوله اللي شفته ونخليهم هما  يتصرفو معاك
وتخطتها فتحت باب المظبخ وقالت قبل ماتطلع :عشر دقايق ماتطلعيش فيهم تلقي بوك في وجهك
وطلعت وخلتها ترفع في راسها وتشبحلها كيف طلعت بـ عيون مليانات دموع كابدتهم بـ قوه لدرجه مارمشتش باش ماينزلوش وهيا تمسح علي خدها لضربتها عليه بـ القوه وبـ حقد مبين من عيونها لمدمعه .
.
.
الــشخص الصحيــح في تـوُقيت الغيـر صحيــح 💭
.
.
حط التليفون علي ودنه وهوا يراجي في الرد اللي جاه بعد لحظات .
قعد بَـحر ساكت شوي يراجي فيها تتكلم بس مانطقتش بـ ولا حرف لـ خلاه يتكلم :ايوه يابنيه
إلهَــام :نعم
بَـحر :انتي لـ نعم
إلهَــام :اممم
بَـحر :فكنا من المممم وقولي مني انتي ومن وين جبتي رقمي
تحمحمت إلهَــام وهيا حاسه روحها عرقت من نبرة صوته الجديه وقالت :انـ ـي اممم ولا حد ولا حد خلاص انسي اتصالي
وقبل ماتسكر صيح بَـحر :راك تسكري وتعالي هني خلاص ماعاش فيها انسي قولي مني انتي
نفخت إلهَــام بـ توثر :اني حمات اختك نجوي
بَـحر :باهي من وين جبتي رقمي
إلهَــام نقصت صوتها وقالت بـ خجل :خنبته من تليفون نجوي
بتسم بَـحر :وعلاش
خدت إلهَـام نفسها وبعدت التليفون وهيا تشبح لـ اختها لمقعمزه جنبها وقالت بـ توشويش:شن بنقول
ضربتها اختها علي فمها وردتلها التليفون في ودنها ووشوشت :الله يخرب بيتك ياوخيتي قولي اي شي ولا قولي تحدي تحدي
تحمحمت إلهَــام وركزت مع بَـحر اللي رجع قال:الووو وينك
إلهَــام:معاك
بَـحر تنهد وقال :اسمعي يابنت الناس راني مش فاضي للعب لفروخ واني في اسواء ايام حياتي زي ماانتي عارفه بوي مانعرفو علي اراضيه وين يعني دماغي مستك لا يستوعبك ولا يستوعب غيرك
وسكت وهوا يسمع في نفسها لـ تعلا وبعد لحظات سكرت الخط في وجهه وحدفت التليفون قدامها بـ عبره ملتها :ياريت ماتصلت ياريت ياريت واااااك ياربي وااااك مني ومن قلبي
ورفعت عيونها في اختها وحدفت عليها لمخده :كله من تحت راسك كله منك
نفخت (ابتهال) :اووووف منك ومنه ومن نقانك ، وين نندري عليه باسل وبارد هكي
تنهدت إلهَــام :اوووف تو يحسابني خفيفه متصله بيه وله اني حصلت فيه لين فددته، وياريت اتصلت وقدرت نتكلم كلمتين كويسات علي بعضهم
ابتهال:بالله نوضي نوضي وحوليه من راسك نوعه متعقد شكله
إلهَــام :اما متعقد انتي عارفه الظوروف لهما فيها
ابتهال رفعت كتافها :اللي هوا فوتيه اكيد باله لا في حب لا في بطيخ احمر ربي يلطف بـ حالهم وماعاش تتصلي
إلهَــام:لا بنتصل علي اساس
ونفخت بتنقنيق وطاحت علي سريرها بـ ضيق وهيا تفكر في كلامه .
.
.
.
فـي الليل ...
طلعت جوري المفتاح من جيبها وهيا ادور علي قفل الباب وتصيح :تي ديري لفلاش هني يابلوه
نفخت إبنـاس ودارتلها لفلاش علي القفل وهيا تتلفت يمين ويسار وتشبح وراها بخوف :تي ظلام والدنيا تخووووف هيااااا
جوري :انهاارت البيض يبيش الباب يفتح اوووف وقته هروب الضي مه وقته ياربي لا امتي بنقعدو عايشيين هكي لا ضي لا ميه لا نهار سعيد لا مبارك
ضربتها إينـاس بالتليفون علي راسها :مش وقت نقانك افتحي الباب وسكري فمك اني خايفه
عيطت جوري وهيا تشد في راسها وتحاول تفتح في الباب اللي سحبت منه المفتاح اول ما خلعهم فلاش الضي لتوجه عليهم وخلاهم يتلفتو بخلعه هيا وإينـاس لـ رفعت يداها وغمظت عيونها :اعوذ بالله من الشطان ، اعوذ بالله من الشطان ، بسم الله الرحمن الرحيم
واول ماسمعت ضحكته فتحت عيونها طول وهيا تاخد في نفسها لرجعلها .
جوري :وااااه خلعتناااا
القَـاسي قرب وتخطاهم وهوا يشبح لـ إينـاس لمنزله راسها بـ خجل وصدمه وقال :ههههه مرعوشات ههههه
جوري شبحتله :والله مصاريني قريب صبيتهم وعاد إينـاس ماتخلي فيك عرق صاحي
فتح القَـاسي الباب وخش وخشت وراه جوري اللي ادف في إينـاس:تي خشي معاي
نفخت إينـاس:تي خشي بروحك جيبي شيتاتك وهيا
جوري :وااك منك
وتلفتت خشت وهيا ترد علي القَـاسي :نعم بالقاسم ماسمعتكش
القَـاسي خش لداره وصيح :وين امي وريم
جوري وقفت قدام الدار وهيا تشبح لشنطه اللي طلعها من دولابه وقالت :مقعمزين في جنان حوش عمي رجب
القَـاسي:امتي هرب الضي
جوري:من المغرب
القَـاسي:متنشغلوش عليا اليوم مرات نروح امخر وعبدالمهيمن متزرد مع صاحبه قاللكم وله
جوري هزت راسها :اي قال
وسكتت شوي وبعدها قالت:شن فيها الشنطه
بتسم القَـاسي ورفع راسه شبحلها:بنمشي نحرق تمشي معاي
ضحكت جوري :عادي وماعنديش مشكله بكل ههههه
القَـاسي :هههههه تي بري يافرخه بري ، ديريلي طاسة قهوي قبل ماتمشي
هزت جوري راسها وطلعت تجري وخلت القَـاسي اللي فتح الشنطه وهوا يشبح لـ المسدسات لـ فيها وتلفت لـ دولابه وهوا يطلع في شنطه تانيه ويفتح فيها وكان فيها كلاشنات طلعهم وحطهم علي الشنطه لفيها المسدسات ورجعها لدولاب لسكره وتلفت لشنطه لفيها الاسليحه وهوا يفكر كيف يسكرها بس كانو لكلاشنات لحطهم فوق المسدسات طالعين من الجناب ومافيش كيف يسكر الشنطه بـ السريته ، قعد يدور بعيونه في الدار لين لقي شرشاف محطوت علي لمنادير خداه وطبقه بين اربعه وحطه فوق الشنطه ودرق الاسليحه وطلع حطهم قدام الباب وكيف تلفت بخش للمطبخ سمع عيطت إينـاس لعترت في الشنطه وطاحت عليها وهيا تسمع في صياح جوري :تي خيرك
رد عليها القَـاسي طول بتوتر :شي شي كملي القهوي
وتلفت لـ إينـاس لـ رفعت روحها بـ وجع واول مارفعت يدها لشاده فيها التليفون ودارت لفلاش قدامها وشافت الاسليحه لطاحو من أثر طيحتها علي الشنطه وتسلحبو من تحت الشرشاف فتحت عيونها علي وسعهم وهيا تاخد في نفسها بتعيط بس قرب منها القَـاسي ورفعها من خصرها من فوق الشنطه بـ يد ويد التانيه سكرلها فمها بخفه وبسرعه منه قبل ماتعيط وقربها منه هلباااااا وهوا يشبحلها كيف وجهت عليه لفلاش وهيا تشبحله بـ صدمه وخوف وتسمع لتوسويشه :اسكتي وراسك ياغاليه تسكتي
.
.
بعـــض الأشيــاء تكُــون جميــلة جــداً فقط من بعيــد 🗯
.
.
#يتبـع لـ البـــ5️⃣ـــارت
#كتـــابـة_اليَــاقُــوت
________________________________
بداء كتابة الرواية في تاريخ 5 / مـــــــ5ٰــــــايـو / 2020
تم انهاء كتابة الرواية في تاريخ 12 / اكتـــ10ٰـــوبر / 2020