#
#في_الغرفه_التاسعه٧٤
#زينب_الموسوي
السلام عليكم
————————
#رفيق_العمر
__________________
علي
( بلي عمي الي معرفه بهاي الرايه .. وانت منين عرفت هالرايه )
جاوبته والفرحه تخنگ كلماتي ... وكذلك كلماته استبشرت بجوابي .. مد ايده لجيب التشيرت
( عال العال .. اذا تعرفها .. فهذي الرساله الك ومن حقك )
اصابعي ارتجفت و اخذت الضرف
وقبل ماافتحه شفته وگف يريد يطلع
( عمي گورگيس وين رايح انت اليوم ضيفي .. وفضلك هذا رد روحي اليه .. والي اريده منك تحجيلي شلون التقيت بساميه )
رجع كعد وضهرت اريحيته بالاجابه
( مرايح بس ردت نسولف ونشرب جاي .. ..
حتى السوالف يصير اله طعم )
( مو تدلل عيوني الك )
وصيت على الجاي ورجعت استمع لكل كلمه ينطقها
( شوف ابني اني رجال طالع من العراق من الثمانين وعندي بيت وشقه من ضمنه ... ااجرها كول فتره على ناس ..وبشهر الثاني بهاي السنه اتصلت بيه منظمه للاجئين واجروا الشقه وعرفت الناس عراقيين ميعرفون انگليزي وجايين من مخيم اللاجئين السعودي ( رفحا ) .. وتعرفت عليهم .. ساميه واخوها جاسم
ومرة ابوها واخواتها اثنين .. اما بقية اهلها انقتلوا . بالانتفاضه
المهم الناس كانوا بحاله متنوصف فمن جانب كولهم شافوا الاب واولاده يتصفون على الشارع العام .. وكتموا صرخاتهم من الخوف مكانهم ينكشف وينقتلون
ومن جهه ثانيه عاشوا بصحراء مابيه ادنى ظروف الحياة .. وانتهوا ابلد ميعرفون لغته وقانونه وناسه حتى ملابس ماعدهم يطلعون بيها للشارع
. وساعدتهم هوايه ومشيت وياهم بترجمه وحصلت لساميه شغل من طلبوا منها تشتغل وتعين اهلها ..
وشفتها من تملي اوراق واترجم الها تكولي اكتب متزوجه
،..
سالتها مره بنتي زوجج وين لان تعرف هذي الامور المهاجر ميعرف بيها اول ميوصل فحتى افيدها قبل لاتكتب معلومه غلط
وحجت تفاصيل القصه .. نصحتها تكتب اسمك بالملف وتاريخ عقد الشيخ تخليه تاريخ زواجكم وتاكد بالمقابله انكم متزوجين حتى يشملكم قرار لم الشمل .. لكن مرة ابوها رفضت لحد يتاكدون منك .. فيمكن تكون اتزوجت او غيرت رائيك
فمن صادفت رحلتي .. گالت عمي ليش متحجز على سوريا بدل لبنان .. وتسال اهناك شفقت عليها وگلت ويه نفسي. شنو الفرق بين لبنان وسوريا
حجزت. وانطتني الرايه علامه تذكرك بيها ..)
ماخفيت تاثري بكلامه ..ونفس الوقت قصة هجرتها وكفاحها زادتني فخر بيها .. وبقوتها
اخذت دوري بالحديث وبديته بسوال
(وحاليا اوضاعهم شلون صارت تعودوا على الحياة بكندا )
حافظ على نبرة صوت هادئه واضحه الا ان نظرته بينت انكسار على اوضاعهم وراح يبينها اليه باقتضاب
( عراقيين وعندك الحساب .. اسباع والصعب يسهل گدامهم )
STAI LEGGENDO
#في_الغرفه_التاسعه
Storie d'amoreقصه اجتماعيه حقيقيه لعائله عراقيه لااحب ان اختصر مضمونها واترك للقاريء معرفة المضمون
