#في_الغرفه_التاسعه

#في_الغرفه_التاسعه٧

#في_الغرفه_التاسعه٧*
#زينب_الموسوي

السلام عليكم

🌺🌺♥️♥️♥️♥️♥️

#الزعل

———————

سعاد ....

بدايه الشهر قبل الغروب بشويه ... گادتني الملا من ايد. وام مصطفى الايد الثانيه ...
وملكه سدت باب اهلي .... وتوجهن بيه لبيت عيالي ... ام مصطفى تهلهل والملا ترفع الصلوات على محمد وال محمد .... وصلنا لباب لبيت .. امي سبقتني لهناك من الظهر ...
ماگدرت تشوف البيت فارغ من بناتها ومن اثاثه ...
هذي اخر ساعات لاهلي بالكاظميه .. سلموا المفتاح وبعد العشى يتوجهون للبيت الجديد بالثوره ...

اديهن تركتني .. ودخلن قبلي .. بقت ملكه .. ذبت العبايه عن متوني وشالت البوشيه عن وجهي وبقى البرگع .. الباب المفتوح ونازله عليه برده سودا
تستر باقي البيت من ان ينكشف
مصطفى اخذ ايدي وشكر الملا
( الله يحفظج ملا ماقصرتي )
( مبارك يوم مصطفى )
باسته امه ودخلوني لممر البيت القصير على جانب الايمن الحمام وعلى الجانب الايسر الاستقبال ... وبنص البيت هول صغير مفروش سجاده وبساطين وكرويتات تلاثه خشب جوزي شراشفهن مخططه ابيض واسود ...
وغرفة نوم ام مصطفى بابها على الهول ... والمطبخ معزول عن البيت ... وقريب من مكان متروك يسموه خرابه

گعدت .. بين الموجودات العددهن ست نسوان من الجوارين .. وخاله مصطفى ام بكر ... جايه متفرجه مثل مافهمتنا ام مصطفى من اجتي الظهر وصتني اخلي زواگه حتى تقهرها بجمال عروس ابنها ....
وحسيتها فعلا متفرجه وهي تدقق بيه وتسال الجوارين
( صدوك العروس معلمه ) ؟سبقت ملكه بالجواب ( اي خيه معلمه ) الي افتهمته من جوابها اكو اتفاق على ان تفهم اهل ام مصطفى اني معلمه

العرس بسيط. وناس بس تبارك وتروح .. وقت العشى بقوا الخاله وامي وملكه والملا .. سهام مااجتي حسب ميكولون تصير جبسه ..
فرشت ملكه ونضال نايلون .. وقدمن اربع مواعين تمن وعليها لحم ..

واني من ضمن النسوان الاكلت

واربع صواني راحت للاستقبال
ام مصطفى سمعتها تكول للمدير والمعلمين والساده
...

بغرفتي الجديده .. غرفة الزوجيه .. اتابع النسوان .. وهنه يطلعن من الباب بعد ميباركن وينطني الواجب . واتابع الاخشاب وترتيبها .. هاي اول مره يصير عندي جربايه ... الملا كعدتني عليها .. ودعت اليه
( شايفه كل الخير .. وان شاء الله على عينج. كل الزرق والصحه
بنيتي هالله هالله بام مصطفى
هذي امج الثانيه وشافت ضيم وقهر على اولادها )
( ان شاء الله ملا بعيوني )
باستني بخدودي ( بارك الله بيج )
طلعت من الغرفه .. راحت ايدي تلمس الدوشك .. گطنه خفيف مو عالي وجهه اقماش دولين مشجر
.
..والكنتور . طلاگتين . وزاويه وميز مرايا عليه لعابه وزواگه اشترتها ملكه ....والشباك مسدود بوفيه زغيره نضدتها بطانيتين ومندر والبردات ماروني من اختياري
.. ..