#في_الغرفه_التاسعه

في الغرفه التاسعه١٥

في_الغرفه_التاسعه١٥
#زينب_الموسوي

السلام عليكم
🌸 🌸🌸🌸🌸🌸🌸 🌸
#العروس_الثالثه

———
سهام

صوت الطابوك .. والعمال
فززني من النوم .. باوعت على ساعة الحايط .. بال ١١ الضهر
نمت ساعات طويله بعد ولاده بنتي فاطمه ب ١ بالليل ...
صياحي وعى حكيم من النوم ليلة البارحه .. وطلع لبيت حليم
...
سمعت هالحجي
من حياة الحضرت ولادتي
حتى تكص السر .. مثل مالنسوان علمنها .. وقنعنها هذا يگطع الطروح عدها ...

على يميني حسين يتمغط بفراشه .. فتح عينه وشاف يمه سله .. فرك عينه وابتسم ورجع
يباوعني ويدور على بطني التعود يشوفها منفوخه .. وتبدو اصغر اليوم من ربطتها بقطعة قماش ...حتى ترجع عضلات بطني ..
مد ايده الصغيره على عيونها
ولزمت ايده بلطف
( يوم حسون هذي مو لعابه من لعاباتي الگلبت عيونهم باديك واسنونك .. هذي اختك .. )

لعب لسانه بكل جوانب حلكه .. يحاول يستوعب كلمة اختك الجان يسمعها من يطخ ابطني
واگله ( حسوني لاتمرد اختك )

اخذتها بحنيه خليتها على صدري ... وهو وياي يتبع وجودها بلمس الايد .. ويگلي
( اهنا ) وايشر على حضنه

( خلي ترضع واحطها بحضنك ..
خطيه جوعانه وشوف شلون ضعيفه وصفره .. هسه من ترضع تكبر وتظل تلعب وياك مثل صفا ومروه .. وموسى وجواد .. )

اختلط عنده الفهم وعدمه ...
واختار .. النظر الها عن قرب ...
ويجر حسرات طفوله على مكانه
المعتاد في حضني والاحتلته فاطمه في صباح ما متوقعه ...

رضعتها ... وصار حسون يفتح الباب .. حتى يتريك .. وانفتح الباب بنفس الوقت من قيسيه حامله صينيه
الكيمر والعسل ..
خلتها على الكاع .. وتحاضنت ويايه وباستني
( صلوات سهوومه .. الحمد لله
ربج سهل وخلصتي من العمليه )
( اي والله الحمد لله )
اخذت حسون توكله ويايه گعدت تباوعني منتظره اسالها عن صوت الطابوك

( شنو ماسمعتي صوت الطابوگ السيد جاب عمال من الصبح يبنون سياج بينا وبين سيد حليم .. )

الخبر مافاجأني .. وانما جمع دمعي بين جفن وجفن .. وارتعش صوتي واني اسالها عنه

( قيسيه شگالوا اخوانه وعمامه البارحه .. من راحوا عليه .. صدك راح يتبرون منه )

تغاضت عينها للصد بعيني ومدت ايدها توكل حسون
وردت بتبسيط الاخبار عليه

( ام حسين لاتقهرين نفسج
عليه .. ديري بالج على صحتج وجهالج .. وهو واهله ان شاء الله يوصلون لحل )

تأجج اللهب في نبضي ولساني
الثگل يكول اسمه
( اني مايهمني شميصير بيه ..
القاهرني الملا والسيد مايستاهلون السواه بيهم ..
وافكر بحسين وفاطمه من يكبرون ويدرون بيت جده متبرين من ابوه .. شراح يجاوبهم وشنو يبرر .. جا عبالج هاي الاجنبيه تظل وياه دوم
هسه تسلب العده والماعده وتشمره كشر عليه )