#في_الغرفه_التاسعه

في_الغرفه_التاسعه٢٦

#في_الغرفه_التاسعه٢٦
#زينب_الموسوي

السلام عليكم
🦋🦋🦋🦋🦋🦋🦋🦋
#عمود_البيت
————————-
سعاد

حلم دام ثواني بصبح يوم جمعه ... شفت بيه وجه امي المحبوب . شفتها بگاعنا وبين الحلال والاشجار .. لابسه ملابس تشبه ملابس الحج البيضه .. والعافيه تلمع بوجها ..
باوعتني بفرح .. وكالت ( ارتاحي يمه سعاد )
خلص الحلم بشوگ اكبر لشوفتها .. وكلامه اليه بالراحه
تاكيد ان اواصر الامومه مانقطعت بالموت ...
تدري براحتي المسلوبه .. انسلبت قبل تلث سنوات بيوم السمعته وشفته
بالهول يتصل بامراءه ما ...
وماگدرت اكتم جرح كرامتي
ومن سالته ( منو هاي اسراء او عمتها )
اخذ قميص بيجامته واستغرق ثواني .. حتى يقرر اعلان خيانته
بلا خجل او وجل ..
لبس قميصه .. بكل وقاحه جاوبني
( لا اسراء ولاعمتها .. هذي عشيقه .. ترضي رغباتي واسراء عرضت عليها الزواج ومارفضت انما كالت انتظر ..)
تزاحمت الدموع بعيوني مو اسفا عليه وانما على عدم مبالاته بمعرفتي ..
رفع راسه وباوعني بتحدي
( هسه عرفتي .. شتريدين تسووين .. اتوركين البيت .. من حقج ومراح امنعج .. تطلبين الطلاك .. صار وتدللين ..
اتوركي البيت واولادي .. والصبح بيدي اوصلج لبيت ابوج .. )
واستمر يباوعني بتحدي .. بعد ان اصبحت الخيانه علنيه
انحشرت حنجرتي بالكلمات وصعب عليه الكلام ..
دارت حياطين البيت كدامي ومالت الگاع .. دب بجسمي ضعف رجف كل قطره بدمي ..
بعدت نظري عنه وجاوبته

( انت متهمني وطحت من گلبي وعيني من لحظة انهزامك من العمليه عرفتك مو گد معنى كلمة رجال التتصور ها بعقلك معناها تخابر وحده رخيصه بنصاص الليالي .. حتى ترضي رغبتك الحيوانيه .. واكيد مصورلها الظلم الوقع عليك لان زوجتك مريضه .. وناسي ان هالوسخه مريضه اكثر مني
مريضه بالسفاله والانحطاط .. )

نشف ريگي ... وعطشت ..
تركته ودخلت للمطبخ شرب مي .. ماطفى غليلي .. انما زادني حرگه .. شربت مي لحد امتلت مثانتي .. وزاداد غلياني

دخلت للتواليت وطلعت غسلت وجهي بالمغسله ورجعت لمواجهته .. وهو متمدد وعيونه تترقبني
( تتصور راح اترك البيت .. هالشي تحلم بيه .. هذا بيتي واهنا اطفالي .. وانت الخسرت على الاقل احترامي )...

وبوقاحه جاوبني
( لعد لاتحاسبيني ومن باجر اثث الغرفه الثانيه وانام بيها

باحتراق جسدي واتقاد عيوني
مشيت للغرفه وجاوبته
( لاتنسى تاخذ التلفون وياك )

طبگت الباب حيل وتكورت بفراشي

.. مطعونه الف طعنه .. ومقهوره حد الموت
وحزني قابض نفسي ...

وزعت دموعي بين المخده والغطى .. ويه كل هذا تعبي هجرني النوم ....وخلاني گاعده احسب همومي واقيسها بالم السرطان .. شفته هين من خيانته ...