#في_الغرفه_التاسعه

في الغرفه التاسعه ١٩

#في_الغرفه_التاسعه١٩
#زينب_الموسوي

السلام عليكم

🌺🌺🌺🌺🌺🌺🌺
#الحقيقه

مااعجب الحياة .. حين  لايشبعها حزنا واحدا ..
ولاتكتفي بدمعه .. ولا تستقيم بجرح ..

وتهدينا  المزيد

—————
فتاح

اعانق  الافكار  .. واتشبث  بساعات النهار  ..يقتلني الصراع بين عقلي .. وقلبي

——-

ساعات صعبه عدت  نبعد بيها الخطر عن الملا .. الاستنفذت  قدرتها على تحمل الظلم ..
اختارت الانهيار .. وهي تشوف سهام تطلع واطفالها وراها  بكائهم  يحتز  بقايا الصبر ...

قاسم  طلع  يجيب الدكتور للملا
ورا  نص ساعه بيها نترجى منها تگوم  وناخذها للمستشفى
تحول لونها احتقان وانفاسها تودع  انفاس ثانيه  بمايشبه الاحتضار ...
والدي  واني نفرك بقوه رجليها  اديها المفتوحه للجانبين ..
استعادت انتباهه  من اثر حضن حسين لها من رگبتها  وهو يسالها ( وين راحت امي ) دمعت  عيونها  وبحة صوت مقهور  ردت عليه ( ترجع غصبن  على الظلام . وان مارجعت اني اروح أأجر بيت يمها .. )

انتبهت شفتها ترجف .. واديها ثگيله ..

شلتها  مع حكيم لغرفتها ... وهي كارهه وجودنا .. خليناها على السرير ..
والدي فتح الباب وصاح بقوه

( مااريد اشوفكم .. وهالبيت الكم بيعوه واعتبروه ورث واعتبرونا متنا  ..
تتصورون موت حليم هين عليه
ودموع اطفاله سهله لو طلعت امهم  مطروده سهله
والله گلبي  مصدوع وعيني  مشلوعه. ونفسي مقبوض
مو هين السويتوه  ...
وصدمتي بيكم تعادل صدمتي  بموته .. اخجلتوني ويه ربي ونبيي

الله اكبر على كل جبار متكبر )

سد الباب  واحنا طلعنا بخجل ...

حسين يدمع   ...وفاطمه  الرافضه حضن مدين وحياة ..
واستقرت بحضن  قيسيه ...

الدكتور طلع من بيتنا الساعه ١٢ الظهر .. وهو يحجي ويه والدي بجديه وتحذير
( سيد. الملا  بحاله صحيه حرجه
بسبب حالتها النفسيه .. وتحتاج راحه والابتعاد عن الانفعال ..)
وسلم والدي الوصفه
( هذي ادويه مهدئه .. وايضا تفتح شهيتها لان شحوب وجها وارتجاف اديها  يدل على  سوء تغذيه )

وصلت الدكتور  للباب وقاسم  اخذه بالسياره مثل مااجابه ..

تبعت والدي لغرفه الملا .. شفته كاعد يمها ويحاجيها
( ملا مصدومه من الاولاد لو من الچناين .. لو تساليني اجاوبج
مصدوم اولادي   .. تغلبت زواجاتهم  على دينهم .. كوليلي شاسوي )

ويبدو ان المرض  خلاها عاجزه عن التفكير  واجابته بالي يشغل بالها اكثر
( مولاي روح ورا سهام ورجعها
والله حرام طلعتها وهي مكسورة الگلب ومطعونه بشرفها ومحرومه من اطفالها .. والله لو بيه عافيه وحيل مااخليها تطلع
لوحدها  مولاي تعرف دعوة المظلوم مايحجبها عن الله  حاجب .. وسهام اولادك ضلموها )