العميلة 306 -أخوان في عشق إمرأة واحدة - (لهجة جزائرية )

الحلقة 40

إياد؛ فهاديك الليلة قررت نغلبوا بالخمج اللي فيه .. و الحل أني نولي أقوى منو فاللعب تاعوا .. بقيت في صفو و بينتلوا بلي معادتش تهمني . حتى أني قبلت نزوج باللي خيرهالي .. و قدرت نهز كامل واش دار ووش مداير ..كل صفقة و كل تهريب .. مكانش سامحلي نعرف عليه حتى حاجة عرفتوا وقت قنعتوا بلي بش نكمل في طريقوا المسخ .. ببن هذا بكل كنت نتعذب على خاطر كنت السبت في اللي صرالك .. و في بالي متي .. حتى زدت عاودت شفتك كنت نشوف فيك ملامح ريان .. مستحيل ننسى تفاصيلك .. دخلني الشك منك .. و كيارا؛ كانت الوحيدة اللي ممكن تأكدلي .. بصح محبتش
يزيد؛ على خاطر كنت موصيها ..
إياد؛ يزيد كان مقاطعني من اللي صرا معاك هكاك .. حاولت  نعرف من عند ديفيد خطيبها .. بعد ما وصلني تقرير الكلينيك اللي دخلتيلوا
يزيد؛ واللي أنا بعثتوا ...على خاطر حسيت الوقت لحق و غلطوا تعاقب عليه
إياد؛ ديفيد معطانيش بلاصتك قالي نورمالموا فدزاير ...  بصح يزيد عيطلي و قالي بلي كفرت على غلطي و لحق الوقت نعرف بلي راك حية و شكون نتي .. و عرفت بلي نتي .. من لول إحساسي مكانش غالط .. الشي اللي صرا مكانش بيدي .. و الأهم أني وصلتلك وش صرا من لول التالي .. علابالي مش رايحة تأمني .. بصح مرتاح على خاطر النهار اللي جامي توقعت يتحقق جغ و قدرت نقول وش صرا ..
ريان؛ هكا بانتلك صفيت ضميرك !!! و نتا شكون عطاك الحق بش تتحكم في حياتي تراقبني و تعاقب في بلاصتي .. بصفتك واش تقرر إذا لحق الوقت و
يزيد؛ بصفتي باباك
ريان؛ ماكش بابا ..
يزيد؛ لا باباك و دمي يمشي في عروقك ..
إياد؛ كيفاش ؟؟
نزل راسو يحكي
يزيد؛ كنتي نتيجة نزوة .. عديتها مع وحدة هنا .. مبعد مدة جات ليا لمقر شركتي فدزاير و خبرتني بلي حامل حاوزتها .. على خاطر كنت مزوج و نحب مرتي .. تعدات شهور في بالي طيحتوا كي مديتلها الدراهم .. بصح جات خلاتك قدام الشركة مع رسالة .. جابوك الرجال .. قريت المكتوب
"هاي بنتك ... مبقاليش بزاف فهاذ الدنيا ..هام وراقها معاها .. عالأقل كفر على ذنبك و اهتم بيها .. اذا مش مأمن بلي بنتك دير تحليل DNA ...
يزيد؛ مكنتش عارف وش ندير .. مقدرتش نتقبل .. و حياة المافيا صعيبة .. نديك لداري فكرة كانت راح توجع مرتي سعاد بحكم متجيبش لولاد .. و مام تقنع .. الخمج اللي فيه كانوا بش يوجعوني بيك  .. حطيتك فالميتم .. وقلت بلي لقيتك .. وليت نزور الميتم انا و مرتي بش نشوفك .. كنت نفرح و انا نشوف فيك تكبري ..حتى لو نرعا فيك من بعيد ... و
ريان؛ تفرح عندك الوجه و تهدر فيها !!
قدم عندي يبكي ..
ريان؛ متمسنيييييش تووووووله ..
يزيد؛ سامحيني يا بنتي
ريان؛ منيييييش بنتك .. حتى الحيوانات مطيش ولادها ...
هزيت يديا نمسح فدموعي ..
ريان؛ حياتي مليانة رخس .. علاه نلوم عليه .. لكان بابا اللي من دمو طيشني ميتلاموش الناس كي ياذيوني .. اللي جابني للدنيا طيشني فميتم ... حل الباب
قدمت للباب نجبد فيه
يزيد؛ خليني نفهمك
ريان؛ قتلك حل البااااااااب
مسح وجهوا و جبد من جيبو المفتاح .. نطرت حكمتوا من يدو و حليتوا .. خرجت نجري ... من هاديك الدار ...كنتي نجري و نبكي .. ساعات .. الحقيقة توجعنا اكثر من انو منعرفوهاش .. يمكن لانو وقت تكون مخبية الواحد يحط تأملات تصبروا .. بصح وقت يعرف الدنيا متبقاش سايعتوا ...بالتالي قلوبنا ضعيفة .. مهما كنا اقوياء و ربينا روحها سنين بش نقاوموا .. كاين حوايج يهدمونا ... الشي اللي سنين نجري وراه ... الحقائق اللي حوست عليها .. شكون انا ..و واش نعرف على روحي ... كل شي طان وهم ... حياتي وهم و انا مجرد غلطة ليلة ..
#العميلة306
#يسرى_أمجوج