العميلة 306 -أخوان في عشق إمرأة واحدة - (لهجة جزائرية )

الحلقة 13

.الحلقة 13 :
عنوانها : #اللقاء_الثاني
زاد فالفيتاس .. باقية نبكي .. خايفة نعاود نرجع .. نرجع للغرفة هاديك .. بين يديه.. تكمشت على روحي .. حط يدو عليا ..
إياد؛ ريااان ركزي فواش راح نقول  ملييييح .. دوك تروحي مع فارس .  و تبعي وش يقول فهمتي !!
باقية نغزرلوا و نهز فراسي بلالا
إياد؛ رييااااااان لازم نهربك .. عيشك افهم .. هاني بالسيف تلفتهم بصح دوك يلحقوا .. وقت ما نحبس تروحي
ريان؛ خايففففة عيشك ابقا معايا
إياد؛ كي تتفرز نخلط عليك .. حبس .. غزر فالمرايات و نزل يجري .. حل الباب .. قدم واحد و معاه وحدة تشبهلي حاطة نفس الپيريك و نفس القش ..
فارس؛ هيا ..
ركبت هاديك .. حكم اياد الفرد من عند فارس هذا .. باقية نغزرلوا .. قدم عندي حط يديه على وجهي ..
إياد؛ ريان حبيبي متخافيش .  نفرزها نلحقك فهمتي .. نحبك و اللي يحبك عمروا ما يضرك ..
~~~~~~~~~~~~~~~~~
حبسوا قدام كلينيك بريفي .. مام الطوموبيلات اللي وراه ..
منار؛ انزلي
حكمني من يدي .. و دخلنا بروحي مش فاهمة علاه جينا هنا ولا واش صرا .. باقية نتبع برك .. طلعنا وقف واحد قدام غرفة العمليات ..
-بوك هنا مسيوا
منار؛ وكتاه دخلوه
-من شي نص ساعة
وقت سمعت كلمة بوك .. نص مني طاح... زعما واش صرا بش يكون هنا .. قد ما راني ناقمة عليه .. قد ما نتمنى ما يموتش مش هذا اللي حاباتو .. نحب يتحطم بالدقيقة و الثانية ... و يولي يتمنا الموت و ميحصلش عليها ..الموت برصاصة بالنسبة ليا رحمة لساقط كيفو .. تلفت لمنار كي قال لللرجال ينزلوا .. خبط الحيط بيدو .. و حط راسوا عليه .. أول مرة نشوفوا بالحالة هاذي لهاد الدرجة باباه قريب ليه .. قدمت ليه .. منعرش كيفاه نواسيه .. بروحي مستمتعة كي راهو يتعذب .. و قليل فيه ..منيش انسانة متسامحة و منظنش رايحة نكون .. اللي عملوا معايا .. متقبلوا أي أنثى ..عندها كرامة ... قصص السماح و الحب .. خليتها للفيلمات.. الشي اللي نحس فيه دوكا مخلط .. من جيهة حاسة بالتأنيب من جهتوا .. و من جيهة مام نوقف معاه ..كون يمنع باباه .. يجي النهار اللي نكون أنا سبابو .. قد ماكنت حابة منار يكون وسيلة قد ماراني مش حابة .. خاطر متأكدة من حاجة وحدة يجي النهار اللي نحطوا فالحبس .. هاذ الفكرة كي خممت فيها وجعتني .. كون قبل شهر ماكنتش بش نتأثر خلاص ..تلفت ليه كي غزرلي .. عينيه مدمعين .. منظروا هكا قسمني   .. قدم عندي .. عنقني .. غرس راسو فرقبتي .. حسيت بنفسوا اللي يهتز .. كبس يديه على ظهري ..
منار؛ بش نموت من الوجيعة ريان .. بابا رح يموت .. نهبل كون تصرالوا حاجة..
غمضت عينيا بالقاوي. . و حطيت يديا على ظهروا
ريان؛ كون قوي .. من هاذ الحوايج تتقوا ..
منار؛ نقطة ضعفي هاذوا ريان.. منتصورش يتوفاا بابا .. صاوبوه بثلاث رصاصات .. نعرف برك شكون  جسدو نرجعوا غربال
سكت .. منجمش نواسيه .. حابة نقولوا نتمنى فداخلي يموت... راح يتخلص مني .. مي منقدرش .. خرج الطبيب ...تنطر مني دور ليه ..
منار؛ و وش صراا .. تصرالوا حاجة نطلعك من وراه
الطبيب؛ مسيوا منار طمن تجاوز مرحلة الخطر ..
خذا نفس و غزرلوا
منار؛ وكتاه يفيق ؟
الطبيب؛ منعرفوش على حساب تجاوبوا .. مزية الاعضاء الاساسية متضررتش ..
منار؛ غير ادعي ميصرالو والو
تعداه و دخل يشوفوا بلا ما يشاوروا .. شفت مع الطبيب هاذاك .. وجهوا ميتفسرش من الخوف .. مشا يحكي مع الطبا اللي معاه .. ردة فعل منار على بوه .. تظل بلي هو قريب ليه كثر من إياد .. و هنا تأكدت بلي بالفعل قدمت من الشخص الغالط.. بلعت ريقي و مشيت ...لازم نخرج .. لازم نبعد نعاود نبني أفكاري... لازم نخرج .. حطيت الكبوسة على شعري بش ميشوفونيش رجالو .. نزلت الدروج هاذوك نجري و نغزر للرض .. تخبطت فواحد .. رجع للتالي .. طلعت راسي جات عيني فعينوا ..  نفس الغزرة اللي جمعتنا أول مرة .. مستحيل نغلط فيه هو .. قلبي يخبط بش يخرج من بلاصتوا ..