العميلة 306 -أخوان في عشق إمرأة واحدة - (لهجة جزائرية )

الحلقة 11

.الحلقة 11 :
حليت عينيا .. فشلانة عاللخر كلش فيا مهدود و يوجع .. تفكرت ملامحوا تنطرت من الفراش. .. باقية نخزر للبيت اللي راني فيها .. حبيت الباب .. باقية نتسرسب على طراف صوابعي.. دار فارغة .. اصلا فيها بيت .. و صالون .. كوزينة ..شوي و تحل الباب .. تخبيت ورا الحيط .. شفتوا كي دخل و قفل الباب .. عينيا تحلوا !! ..
حالتو مدمدمة و مجروح .. وقفت داهشة ..
مع تلفت جات عيني فعينوا .. حط الساشي من يدو .. و خزر فيا .. عدا يدو على وجهوا و قدم عندي ..
إياد؛ صافا ريحتي شوي !!
هزيتلوا براسي ايه ..
إياد؛ ارتاحي دوك نديرلك كش حاجة تاكليها .. تسترجعي شوي طاقتك
تلفت هز الساشي و مشا يحضر فالفطور .. لحقتوا .. شافني كمل يقص فالطماطم ..
إياد؛ التراسات مع الوقت تروح .. و اشربي دواك فالوقت ..
كمل يطيب .. باقية ساكتة .. او بالضبط خايفة من واش صرا و واش راح يصرا .. بالاك كون يطلب منو باباه يرجعني .. يزيد يخليني كيما المرة الاولى .. تفكرت لمساتو و الضرب متاعو تلكمت على روحي .. دموعي نزلوا .. كلش يتجسد كل لقطة .. عايفة روحي.. وعايفة النهار اللي جابوني فيه للدنيا ... حاسة روحي كيما وحدة **** .. جسدها بش يفرغوا مكبوتاتهم .. كون تمادى أكثر كنت نموت .. محال ننجم نعيش ..
تنطرت وقفت كي حط يدو على كتفي ..و خزرت فيه .. هز يدو ..
إياد؛ سامحيني جيست كي شفتك تبكي حا نطمن عليك
ريان؛ م م متسمنييش
إياد؛ كيما تحبي براحتك .. ريحي نحطلك تاكلي
ريان؛ ع علاه خرجتني من تم ؟
خزرلي و تلفت .. مشا يحط فالصحن ..
ريان؛ راح تزيد ترجعني لباباك  ؟
إياد؛ كون جيت راح نرجعك منخرجكش أصلا من تم ..
ريان؛ باباك عرف بلي هربت واش راح يدير .. دوك يلقاونا ! .. و نتا ولدو ميديرلك والو !!.. أنا ي يعاود يرجعني لل..
شهقت
إياد؛ مش راح يصرالك والو مدامني معاك ..
ريان؛ ل لازم نهرب فيسع .. وين رانا !!! لازم نهرب .. هكا ميلقانيش .. و و و ميديرلي والو .. لا
قدم باقي يحكي .. مي مكنتش معاه.. دخلت فدوامة .. بين ليلة و نهار .. ندخل فلعب مش قدي .. فقت كي حط يديه على كتافي و عيط
إياد؛ رياااااااااااااااااان ..
تلفت ليه ... شفافي يرجفوا .. جسمي يرعش بكلوا ..
إياد؛ متخافيش .. راني معاك .. قبل مايصرالك اي شي .. راح نكون انا الاول اللي نواجهوا .. فهمتي .. راكي معااااايااااا ولد مو ميقيسكش ولو كان هاد العبد بابااا
.................
🔘 إسطنبول - تركيا :
قاعدة تمشي بثبات .. صوت الطالون من بعيد يتسمع .. اللي فالشركة الكل تلفتوا يشوفوا معاها .. و يحيوا فيها .. طلعت لبيروها .. حلت الباب  و دخلت .. ترمات عالكرسي .. حلت الفايبر .. لقاتوا مخليلها بزاف ميساجات .. عقدت حواجبها و دخلت تشوفهم .. تحلوا عينيها كي رات التصاور .. بعدت بالكرسي للتالي و ضحكت بالصوت ...
جهيدة؛ يتسما منار ديراكتومو .. أوكي ههههههه ...
...............................
🔘 الجزائر :
باقية نغزرلوا .. ساعات نحس بلي انتقامي .. مخليني نعيش كلشي من اول و جديد .  مي مع خوه .. و هذا بالذات يخليني نهبل .. مش هكا نحوس .. مي ميمنعش نستغلهم ضد بعض...خاطرهم يستاهلوا اللي باش يصرا .. وكلهم يدفعوا حساب الماضي .. مهما كان الثمن .. نضت وقفت ..جيت مقابلتوا .. طلع راسو يشوف .. من عينيه متلهف يستنا فالجواب ..
ريان؛ موافقة
تفآجأ .. بقا جامد للحظة .. و مبعد وقف رما لموس .. هز شعري ردو للتالي .. و طبس طبع بوسة على رقبتي .. الكورون دارلي .. متوقعتش لجاست .. عنقني و كبس عليا بكل قوتوا .. حسيت عظامي تكسروا ...همس بصوت خفيف ..
منار؛ مش راح نفرط فيك ..
رمشت بزربة .. لازم كل مرة نتذكر أنا شكون و غايتي واش و هو شكون .. سينو نغرق ...
جبد روحو .. هزلي صبعو المجروح ..
منار؛ و هذا نداويه أنا
ريان؛ ههه شكون قالك اجرحوا .. برا  فك روحك دوك
منار؛ نن تداويه نتي ..
ريان؛ ويني علبة الاسعافات ؟
شاورلي بصبعوا رحت جبتها .. ضمدتلوا جرحوا .. باقي يغزرلي ندرا كيف .. مع كملت وقفت .. حكم يديا باسهم .. ووقف ..
منار؛ ندوش و نخرجوا عندنا خدمة
ريان؛ أوكي
منار؛ دوك يجيبولك قش بدلي عليا ال ***** هادو .. مشا ..