العميلة 306 -أخوان في عشق إمرأة واحدة - (لهجة جزائرية )

الحلقة 19

الحلقة 19 :
ريان؛ مستحيييل اطلقني
زاد كبس على ذراعي  جا وجهي مع وجهوا ديراكت .. عدا عينيه على وجهي كامل ..
إياد؛ توحشت جدك الحلوف .. نتي نورمال تهربي مني
ريان؛  اططلقني
إياد؛ شششش انا اللي نهدر هنا .. راح نروحوا منا
ريان؛ منروووحش ..
إياد؛ أوكي ..
جبد منديل من يدو
منحتاجش بزاف ذكاء... بش نعرف واش راح يصرا .. بديت ندز فيه .. بكل قوتي .. اما قبضتوا كانت أقوى .. كلش ولا ضباب .. و فهاذاك الوقت تأكدت بلي بش ندخل فصل جديد من العذاب ..
~~~~~~~~~~~~~~
ريان تحكي :
فقت من سرحتي تاع الصح نحب نطروشوا بكف.. ينسيه فحليب أمو .. مي نو المرة القوية مش اللي تبين انفعالها و غضبها قدام راجل من سبة تافهة .. المرا القوية هي الجبل الجليدي .. اللي يجي واش يجي ميهزش فيه حجرة.. تبسمت فوجهوا بتمڨعير ..
ريان؛ ههه **** قلتلي مالا ...هههه مالا كونك راجل و متبعش ال**** يا شريف ولد الفاضل
فكيت يديا منو .. و خرجت من صالة الشطيح .. هزيت بوشاتي و زربت خرجت .. لازم ندي نفس بعيد على هنا .. حكمت أعصابي بما فيه الكفاية ..نسوق فيتاس عاللخر .. أنا يقولي **** .. والله يا منار الهاشمي نخرجها فيك بالطول و العرض .. نجيب حقي منكم واحد واحد .. خبطت الفولون..و ركيت على حافة الطريق .. حطيت راسي عالفولون .. تنهدت بقوة وكتاه نرتاح يا ربي .. وكتاه نرا الحق فيهم...
تلفت لتيليفوني .. دوكا وين تولهت بلي من قبيل يصوني ..كي نكون مغششة ما نشوف والو قدامي .. حليت البوشات نشوف شكون .. لقيتوا الجنرال.. هزيت و حطيتوا انترفون ..
الجنرال؛ القاعدة الاولى للعملاء حاجة ما تهزهم
ريان؛ غيرو
الجنرال؛ علاش انسحبتي من الحفلة هكاك
ريان؛ نفحتلي
الجنرال؛ وقتك ضيق ريان و اللي رايح نقولهولك ميعجبش
ريان؛ هه علاه كاين فحياتي واش يعجب
الجنرال؛ البوس فاق
ريان؛ انعممم؟؟!!!
الجنرال؛ الطبيب المختص معانا قال اللي هو فاق .. من الغيبوبة و استجابتوا كانت مش متوقعة ..
ريان؛ خلاص فهمت فهمت .. نورمالمو مبقيتش نتفآجئ
كوبيت عليه ..باقية ندي فشهيق و زفير .. منعرف كيفاه وصلت للدار حية .. من القلقة اللي فيا .. جيست دوشت .. و ترميت عالسرير.. مخي تحرق من التخمام و الاحتمالات.. مفعول الدوا تاع الرقاد..
منار يحكي :
نرشف من الكاس ..نروح و نجي فالصالون .. بش نطرشق .. حاب نروح نكرفس جدها .. مي مش منار اللي يرخس .. معليش ريان .. جابر تسما .. و حذرتها من قبل منو .. و زادت قدمت عند و ... أوكي عليا و تفضال
خبط الكاس فنص الصالون وطلع ...
.........................
واقفة فالبيرو نروح و نجي .. الشي اللي سمعتوا خلاني .. نتخلوض بكلي .. مش متوقعة يفيق بالسرعة هاذي .. و الأدهى أنو يفيق البارح .. يرجع يخدم ليوم .. قاعدة نزيد نتأكد بلي صح كيما سمعت عليه ميطيحش .. تركزت بيديا الزوج عالبيرو .. زعما يعرفني .. هذا السؤال اللي محيرني .. و الواعرة انو دوكا اللعب يصعاب خاطر وقت يكون باباهم منقدرش نلعب بشروطي بزاف .. خذيت نفس و زوج و ثلاثة .. طبطب الباب و تحل ..
البوس؛ صباح الخير
ص صوتو خلاني نرجف بكلي .. مقدرتش نهز راسي و نغزرلوا .. و أي ردة فعل نعملها باش تكون ضدي ...هذا النهار كان لازم يجي .. طلعت راسي جات عيني فعينو بالضبط ..